ສືບເນື່ອງຈາກແບບສຳຫລວດຂອງ ທ່ານ ມະຫາ ໄຮ້ປະໂຍກ ທີ່ເວົ້າກ່ຽວກັບອາຍຸຂອງນະຄອນ

ວຽງຈັນວ່າແມ່ນ 450 ປີແທ້ຫລືບໍ່ ຄວາມຈິງເປັນແນວໃດ ຂ້າພະເຈົ້າເລີຍຂໍຂຽນໄດອາຣີ່ແຍກສາ

ເນາະ ຖືວ່າເປັນຂໍ້ມູນໃຫ້ຄົນລາວເຮົາໄດ້ອ່ານໄດ້ຮູ້ນຳກັນ.

ຖ້າຖາມວ່າ ວຽງຈັນມີອາຍຸຈັກປີ ອັນນີ້ບໍ່ມີຫລັກຖານຢັ້ງຢືນທີ່ແນ່ນອນ ແຕ່ກໍພໍມີແຫລ່ງທີ່ໄປ

ທີ່ມາດັ່ງນີ້:

ອີງໃສ່ບົດຄວາມ ວຽງຈັນເກົ່າແກ່ ຮຸ່ງເຮືອງ ແລະ ຮ້າງມາແລ້ວຢ່າງໃດ ໃນວາລະສານລານຄຳ ສະບັບທີ 7 ເດືອນເມສາ - ມິຖຸນາ 2009

ຂ້າພະເຈົ້າຄັດມາສະເພາະປະເດັນອາຍຸຂອງນະຄອນວຽງຈັນດັ່ງນີ້:

"...ອີງຕາມຕຳນານເກົ່າແກ່ ເຊັ່ນ ຕຳນານອຸລັງຄະທາດ ແລະ ຕຳນານຂຸນບູລົມ ເຊິ່ງທັງສອງຕຳນານ ຂຽນຂຶ້ນໃນລະຍະ

ຄຣິດຕະສະຕະວັດທີ 15 (ປະມານ 600 ປີກ່ອນ) ແຕ່ວ່າເນື້ອໃນຂອງຕຳນານທັງສອງແມ່ນເວົ້າຄືນຫລັງໄປອີກເປັນ

ຮ້ອຍປີ. ສິ່ງນີ້ເປັນໄປໄດ້ກໍຍ້ອນວ່າ ມີເອກະສານເກົ່າແກ່ ໃຫ້ອ້າງອີງແລະອ່ານສືບຕໍ່ກັນມາ. ຖ້າອີງຕາມສອງຕຳນານ

ນີ້ ສະແດງວ່າ ວຽງຈັນ ເປັນເມືອງທີ່ມີມາກ່ອນສະໄຫມພຣະຍາຟ້າງຸ່ມ (ຄ.ສ. 1354) ເຊິ່ງຂໍ້ມູນນີ້ໄປສອດຄ່ອງກັບຄຳ

ຈາຣຶກໃນສິລາເລກຫລັກນຶ່ງຂອງ ຂຸນລາມກຳແຫງ ແຫ່ງອານາຈັກ ສຸໂຂໄທ ປີຄ.ສ. 1285 ທີ່ເວົ້າເຖິງເຂດແດນຂອງ

ສຸໂຂໄທໃນເວລານັ້ນວ່າ: "...ທິດຕາເວັນອອກ ເຖິງເມືອງສະຫລວງ ໆລໆ ສະຄາ ກະທັ່ງຝັ່ງແມ່ນນ້ຳຂອງເຖິງວຽງຈັນ

ວຽງຄຳ..." ໃນຄະນະທີ່ວັນນະຄະດີພື້ນເມືອງເຊັ່ນເລື່ອງພະລັກພະລາມ, ພື້ນບຸລີຈັນ ນິທານປາກເປົ່າຈຳພວກກ່ຳພ້າ

ກ່ຳພອຍທັງຫລາຍທີ່ມັກໄດ້ຂອງວິເສດນຳພະອິນ ໄດ້ແຕ່ງດອງນຳລູກສາວເຈົ້າເມືອງ ແລ້ວອອກມາສ້າງບ້ານສ້າງ

ເມືອງຂຶ້ນໃຫມ່ ເຖິງຈະບໍ່ມີຂໍ້ມູນກ່ຽວກັບຍຸກສະໄຫມທີ່ແນ່ນອນ ແຕ່ອາໄສໂຄງເລື່ອງກໍພໍຈູງໄປຫາຂໍ້ສະຫລູບວ່າ:

"ນະຄອນຫລວງວຽງຈັນນີ້ ອາດຕັ້ງຂຶ້ນແຕ່ສະໄຫມ ພ.ສ. 218 ຫາ ພ.ສ. 236 ພຸ້ນ ເພາະຜູ່ຕັ້ງວຽງຈັນຄົນແຮກ

ແມ່ນບຸລີຈັນ ຊາວບ້ານຫນອງູຄັນແທ (ບໍລິເວນບ້ານ ດົງປ່າລານ ໃນປັດຈຸບັນ) ແລະບຸລີຈັນ ເຊິ່ງຕໍ່ມາເປັນພະຍາ

ຈັນທະບຸລີປະສິດທິສັກ ນີ້ເອງທີ່ເປັນຜູ່ໄດ້ຮັບເອົາກະດູກຫົວເນົ່າຂອງພະພຸດທະເຈົ້າ ຈາກພະອໍລະຫັນ 5 ອົງ

ທີ່ເປັນຄະນະທູຕານຸທູດ ທີ່ພະເຈົ້າອະໂສກກະລາດ ສົ່ງອອກໄປບອກກ່າວໃຫ້ເມືອງທັງຫລາຍ ສ້າງພະທາດ

ບັນຈຸພະບໍລົມສາລີລິກະທາດ ມາບັນຈຸໄວ້ໃນນະຄອນວຽງຈັນ ເຊິ່ງຊາວລາວຮຽກວ່າ ທາດຫລວງ (ຕາມການຈາ

ຣຶກຢູ່ທາດຫລວງ ຮຽກທາດຫລວງເປັນພາສາປາລີວ່າ ຄຸຍຫະຖູໂປ ແປວ່າ ສະຖູບຫລືທາດທີ່ບັນຈຸ ດູກໂມມ

ຫລື ດູກຫົວເນົ່າ ນັ້ນເອງ...)"

      ຖ້າເຊື່ອຕາມຕຳນານນີ້ ວຽງຈັນແລະພະທາດຫລວງ ກໍມີອາຍຸເຖິງ 2300 ກວ່າປີແລ້ວ. ການທີ່ປະຊາຊົນ

ລາວ ຖືວ່າພະທາດຫລວງເປັນເຈດີສັກສິດມິ່ງຂວັນຊາວລາວ ຄູ່ກັບເມືອງວຽງຈັນມາແຕ່ບູຮານນະການ

ກໍແມ່ນສອດຄ່ອງກັບຕຳນານປະຫວັດສາດນີ້ເປັນຢ່າງດີ..." 

    ປະມານນີ້ລະພີ່ນ້ອງ ສະຫລຸບແລ້ວການສະຫລອງໃນປີທີ່ຈະມາຮອດນີ້ແມ່ນຄົບຮອບ

450 ປີ ຂອງການຍ້າຍນະຄອນຫລວງມາຈາກຫລວງພຣະບາງ ມາເປັນວຽງຈັນ ຄົບຮອບ

450 ປີ ບໍ່ແມ່ນສະຫລອງອາຍຸຂອງນະຄອນວຽງຈັນ ວ່າຊັ້ນສານໍ້.