|
ສ້າງເມື່ອ ກ.ຍ.. 4, 2010 19 ຄົນໂຫວດ,
0 ຄຳເຫັນ,
ອ່ານ 517 ເທື່ອ
ມີຄົນເຄີຍບອກວ່າ " ອົກຫັກ ດີກວ່າຮັກບໍ່ເປັນ " ສະໄໝກ່ອນອາດຈະແມ່ນ ແຕ່ສະໄໝນີ້ເຫັນວ່າຍອມຮັກບໍ່ເປັນ ດີກວ່າອົກຫັກ ເພາະອົກຫັກບາດໃດຫົວໃຈປານລະລາຍທຸກເທື່ອ
ທີ່ຜ່ານມາເຄີຍເຫັນນ້ຳຕາຂອງສາວໆ ຊຶ່ງຖືກຫັກອົກມາຫຼາຍຕໍ່ຫຼາຍແລ້ວ ແລະເພາະຄວາມຢາກຮູ້ວ່າເຫດຜົນໃດ ເປັນເຫດຜົນສຸດນິຍົມທີ່ເຮັດໃຫ້ສາວໆ ເສຍອົກເສຍໃຈ ແລະລືມຜູ້ຊາຍອັນເປັນທີ່ຮັກບໍ່ໄດ້ຈັກເທື່ອ...
ຈາກການສອບຖາມສາວໆ ໜ້າໃສທີ່ຍ່າງຂວັກໄຂວ່ໄປມາຕາມທ້ອງຖະໜົນ ປາກົດວ່າ ມີຫລາຍສາເຫດນຳກັນ ແຕ່ທີ່ເຂົ້າວິນມາເປັນອັນດັບທຳອິດ
ເພາະຜູ້ຊາຍຄົນນັ້ນເປັນຄົນທຳອິດ
ຜູ້ສາວຍຸກນີ້ຍັງໃຫ້ຄວາມສຳຄັນກັບຜູ້ຊາຍທີ່ເປັນຄົນທຳອິດ ບໍ່ວ່າຈະເປັນແຟນຜູ້ທຳອິດ ພາຄົນຮັກ ໄປຮູ້ຈັກກັບພໍ່ແມ່ເປັນຄົນທຳອິດ ແລະທີ່ສຳຄັນສຳລັບສາວໆ ຍຸກນີ້ແມ່ນຈະເປັນຍຸກທີ່ຂ້ອນຂ້າງໄປມານຳກັນໄວ. ແຕ່ສາວໆ ສ່ວນຫຼາຍກໍຍັງໃຫ້ຄວາມສຳຄັນກັບຜູ້ຊາຍຄົນທຳອິດ ທີ່ນາງຍອມເສຍພົມມະຈັນໃຫ້ ດັ່ງນັ້ນ ເວລາຖືກຜູ້ຊາຍເຊິ່ງເປັນຄົນທຳອິດຂອງຊີວິດຫັກອົກ ມັນຈຶ່ງເປັນຄວາມເຈັບປວດຢ່າງທີ່ສຸດ.
ເພາະຄວາມຜູກພັນ
ຄວາມຜູກພັນ ເພາະໃນຊ່ວງເວລາທີ່ຍິງຊາຍ ຊຶ່ງຕັດສິນໃຈຄົບຫາກັນ ຍ່ອມຫລີກລ້ຽງບໍ່ໄດ້ທີ່ທັງຄູ່ ຈະຢູ່ນຳກັນແທບຕະຫລອດເວລາ ດັ່ງນັ້ນ ຈຶ່ງເກີດຄວາມຜູກພັນ ທັງໃນແງ່ຂອງຄວາມສຸກ ໄປກິນເຂົ້ານຳກັນ ຊື້ໝາມາລ້ຽງນຳກັນ ທຸກຢ່າງລ້ວນແລ້ວແຕ່ເປັນຄວາມຜູກພັນທັງສິ້ນ ຫລືແມ່ນແຕ່ຄວາມທຸກທີ່ເກີດຈາກການຜິດຖຽງກັນ ມັນກໍຖືເປັນຄວາມຜູກພັນຢ່າງໜຶ່ງດ້ວຍ ອີກຝ່າຍໜຶ່ງໂມໂຫ ອີກຝ່າຍໜຶ່ງເຂົ້າມາອອຍ ເຊິ່ງເມື່ອທັງສອງໄດ້ຮຽນຮູ້ຊຶ່ງກັນ ແລະກັນ ແລ້ວກໍຍາກທີ່ຝ່າຍໃດຝ່າຍໜຶ່ງໂດຍສະເພາະຝ່າຍ ທີ່ກຳລັງຈະຖືກຖິ້ມນັ້ນຈະທີ່ຕັດໃຈລົງ.
ຍິ່ງພຽງເຫລືອບໄປເຫັນຂອງຂວັນ ຮູບໃນກະເປົາກໍຍິ່ງຕອກຢ້ຳ ຄວາມຄິດຮອດຢູ່ທຸກເທື່ອ ນອກຈາກສິ່ງຂອງແລ້ວ " ສະຖານທີ່ " ກໍເປັນສ່ວນສຳຄັນ ໂດຍສະເພາະເປັນທີ່ທີ່ເຄີຍເຮັດກິດຈະກຳເລື້ອຍໆ ເຊັ່ນ ໂຮງຮຽນ ໂຮງໜັງ ສວນສາທາລະນະ ໂຕະຕັ່ງ ເຮືອນຄົວ ຫຼືເຮືອນກໍຕາມ ພໍໄປຍືນບ່ອນທີ່ເຄີຍມີກິດຈະກຳຮ່ວມກັນ ບ່ອນເຄີຍມ່ວນເຄີຍຫົວ ເຄີຍຫຼິ້ນເຄີຍກິນນຳກັນ ກໍຍິ່ງເຈັບຍິ່ງຊ້ຳ.
ເພາະເຂົາເປັນໝູ່ມາກ່ອນ
ຕອນເປັນໝູ່ກໍສະຫນິດກັນຫລາຍ ພໍເປັນແຟນກັນກໍຍິ່ງມີຄວາມສະໜິດສະໜົມ ແນບແໜ້ນເຂົ້າໄປອີກ ເມື່ອເລີກກັນ ແຕ່ຖ້າຍັງພົບກັນ ເພາະຮຽນບ່ອນດຽວກັນຫລືເຮັດວຽກ ບ່ອນດຽວກັນຍິ່ງເຮັດໃຫ້ຍາກທີ່ຈະລືມລົງໄດ້.
ເພາະຍັງບໍ່ມີຄົນໃໝ່
ຂໍ້ນີ້ແຫລະທີ່ສາວໆ ຫລາຍຄົນບອກກົງກັນວ່າ ເພາະຂ້ອຍຍັງບໍ່ມີຄົນໃໝ່ ຂ້ອຍຈຶ່ງເຈັບປວດ ແຕ່ຖ້າມີຄົນໃໝ່ເມື່ອໃດ ບັນຫາຖືກຫັກອົກຄົງທຸເລົາໄປໄດ້ຫຼາຍ ເພາະຄົນໃໝ່ (ທີ່ຖືກໃຈ) ຈັດເປັນຢາຊັ້ນຍອດຍິ່ງກວ່າໝໍໃດໆ ກໍວ່າໄດ້.
ຜູ້ມີປະສົບການດ້ານອົກຫັກ ໃຫ້ເຫດຜົນທີ່ລືມຢາກວ່າ ລາວຫາກໍ່ເຄີຍມີແຟນ ພໍມີແຟນມັນເປັນຄວາມພູມໃຈນ້ອຍໆ ຂອງຜູ້ຍິງ ເວລາພວກເຂົາເຮັດຫຍັງກໍດີໄປຫມົດ ຊ່ວງເວລາທີ່ຄົບກັນ ມັນຈຶ່ງເປັນເວລາທີ່ມີຄວາມສຸກ ແຕ່ພໍເລີກກັນມັນຍາກທີ່ຈະລືມ.
ອີກຜູ້ໜຶ່ງໃຫ້ເຫດຜົນວ່າ ທີ່ລືມບໍ່ໄດ້ ເພາະຜູ້ຍິງມັກທຳໃຈຍອມຮັບບໍ່ໄດ້ທີ່ຖືກປະ ເຮັດໃຫ້ຢ້ອນຖາມຕົວເອງວ່າ ເຮົາເຮັດຫຍັງຜິດໄປຫລືບໍ່ ພວກເຂົາຈຶ່ງຖິ້ມເຮົາໄປ ຜູ້ຍິງເປັນຄົນມັກຄິດຫລາຍ ເມື່ອຫາຄຳຕອບບໍ່ໄດ້ ຄວາມຄິດກໍຍັງວົນວຽນຢູ່ ເຮັດໃຫ້ຕັດໃຈບໍ່ໄດ້ຈັກເທື່ອ.
ເຖິງຈະມີລ້ານເຫດຜົນທີ່ເຮັດໃຫ້ " ລືມ " ຍາກ ແຕ່ຢ່າງຫນ້ອຍສິ່ງໜຶ່ງທີ່ຕ້ອງຄຳນຶງໄວ້ ເມື່ອຜິດຫວັງໃນຄວາມຮັກ ຂໍໃຫ້ຮັກຕົວເອງໃຫ້ຫລາຍໆ ລວມທັງເຮັດຫຍັງຂໍໃຫ້ມີສະຕິ ຮິ່ນຕອງໃຫ້ຮອບຄອບ ແລະຢູ່ກັບເພື່ອນ ຢູ່ກັບຄອບຄົວ ແລ້ວຈະຮູ້ວ່າຍັງມີຄົນທີ່ຍັງຮັກເຮົາຢູ່ອີກຫຼວງຫຼາຍ…
ມາຈາກ www.sansuok.com
|
|
ສ້າງເມື່ອ ກ.ຍ.. 4, 2010 15 ຄົນໂຫວດ,
0 ຄຳເຫັນ,
ອ່ານ 580 ເທື່ອ
ເມື່ອເວົ້າເຖິງເມົາເຮົາຈະເຫັນໄດ້ວ່າຄົນເຮົາເມົາຫຼາຍສິ່ງຫຼາຍຢ່າງ. ແຕ່ຜູ້ຂຽນຈະຂໍຍົກມາເວົ້າສູ່ທ່ານຜູ້ອ່ານຟັງພຽງແຕ່ “ສາມເມົາ” ຄື ສຸລາ, ນາລີ ແລະ ການພະນັນ ທີ່ຄິດວ່າມັນເປັນເມົາທີ່ສາມາດເຮັດໃຫ້ຜູ້ຄົນເສຍວັດຖຸເງິນຄຳ, ເສຍສຸຂະພາບ, ເສຍອະນາຄົດ, ເສຍຊີວິດ ແລະ ເສຍຄວາມເປັນລະບຽບຮຽບຮ້ອຍຂອງສັງຄົມໄດ້.
ສຸລາ ຖ້າເປັນເຫຼົ້າ ເບຍ ມັນກໍເປັນສຸລາທີ່ຄົນສ່ວນຫຼາຍໃນສັງຄົມຍອມຮັບ ແລະ ນິຍົມດື່ມເພື່ອພົບປະສັງສັນລະຫວ່າງໝູ່ເພື່ອນ, ຍາດພີ່ນ້ອງ ແລະ ແຂກຄົນເຊິ່ງຖືວ່າແມ່ນເຄື່ອງດື່ມທີ່ສາມາດສ້າງຄວາມມ່ວນຊື່ນສາມັກຄີໄດ້ເປັນຢ່າງດີ, ແຕ່ກົງກັນຂ້າມຖ້າດື່ມບໍ່ມີສະຕິ ຫຼື ບໍ່ຖືກກາລະ-ເທສະ ມັນກໍສາມາດສົ່ງຜົນກະທົບທີ່ຮ້າຍແຮງຕໍ່ຜູ້ດື່ມໄດ້ເຊັ່ນກັນ ເຊັ່ນ: ດື່ມທຸກມື້ຈົນເປັນນິດໄສ, ດ່ມຈົນເມົາແລ້ວຂັບຂີ່ລົດພາໃຫ້ເກີດອຸບັດຕິເຫດ ຫຼື ອາລະວາດຕີກັນ... ການດື່ມແບບນີ້ ນອກຈາກຈະເສຍສຸຂະພາບ, ເສຍເງິນຄຳແລ້ວ ຍັງເສຍກຽດສັກສີ, ເສຍອະນາຄົດ ແລະ ອາດຈະເສຍຊີວິດກໍເປັນໄດ້. ຮ້າຍແຮງກວ່າເຫຼົ້າເບຍແລ້ວກໍຍັງມີ ຢາເສບຕິດ ເປັນຕົ້ນແມ່ນຢາບ້າທີ່ສາມາດເຮັດໃຫ້ຜູ້ເສບກ້າຂ້າແມ່ນແຕ່ພໍ່ແມ່ຂອງຕົນເອງ...
ນາລີ ຖ້າຜູ້ຊາຍທ່ານໃດບໍ່ສາມາດຢັບຢັ້ງຈິດໃຈຂອງຕົນເອງກໍມັກຈະຕົກຢູ່ໃນວຽນວົນແຫ່ງການເມົານາລີ ເຊິ່ງກໍເປັນເມົາໜຶ່ງທີ່ສາມາດສ້າງຄວາມເສື່ອມເສຍ ທາງດ້ານວັດຖຸເງິນຄຳ, ກຽດຍົດສັກສີ, ວັດທະນະທຳ ແລະ ເຮັດໃຫ້ສະຖາບັນຄອບຄົວອ່ອນແອ ຈົນບາງເທື່ອກໍເຖິງຂັ້ນແຕກຫັກກໍມີ.
ການພະນັນ ເຄີຍໄດ້ຍິນຄຳຄະຕິພົດບົດໜຶ່ງບໍວ່າ “ໂຈນປຸ້ນສິບເທື່ອ ກໍບໍ່ທໍ່ໄຟໄໝ້ເຮືອນເທື່ອດຽວ, ໄຟໄໝ້ເຮືອນສິບເທື່ອ ກໍບໍ່ທໍ່ເສຍການພະນັນເທື່ອດຽວ” ຄະຕິພົດດັ່ງກ່າວໄດ້ສະແດງໃຫ້ເຫັນວ່າ ຖືກໂຈນປຸ້ນກໍເສຍແຕ່ເງິນຄຳ ຍັງເຫຼືອເຮືອນໃຫ້ອາໄສຢູ່, ໄຟໄໝ້ເຮືອນກໍຍັງເຫຼືອດິນໃຫ້ອາໄສຢູ່ ແຕ່ເສຍການພະນັນບາງເທື່ອແມ່ນແຕ່ດິນກໍບໍ່ເຫຼືອໃຫ້ຢູ່ ຍ້ອນຖືກຢຶດ ຫຼື ຂາຍມາແທນໜີ້.
ມີບາງຄົນຖາມວ່າ ການຊື້ເລກເປັນການພະນັນບໍ? ຄຳຕອບກໍຄືເຂົ້າຂ່າຍການພະນັນແນ່ນອນ, ແຕ່ມັນພັດຖືກກົດໝາຍຍ້ອນວ່າແມ່ນການທ້ອນໂຮມທຶນຮອນໄປພັດທະນາປະເທດຊາດ (ຖ້າເລກທີ່ທ່ານຊື້ນັ້ນບໍ່ແມ່ນເລກເຖື່ອນ). ແນວໃດກໍຕາມທ່ານກໍຄວນຄຳນຶງເຖິງລາຍໄດ້-ລາຍຈ່າຍຂອງທ່ານໄປພ້ອມ ແລະ ຢ່າໄປຈົມຢູ່ກັບການສ່ຽງໂຊກຈົນມືນຫູມືນຕາບໍ່ຂຶ້ນກໍແລ້ວກັນ ບໍ່ແມ່ນເຫັນຕົ້ນກ້ວຍເໜັງຕິງຍ້ອນລົມພັດກໍໄປຂໍເລກ ຫຼື ຝັນເຫັນໜອນຢູ່ໃນຖົງປາແດກກໍຕີວ່າແມ່ນເລກເດັດກໍບໍ່ສົມຄວນເດີ້ !
ສະຫຼຸບແລ້ວທ່ານຈະເຮັດອັນໃດກໍໄດ້, ຈະກິນອັນໃດກໍກິນ ຖ້າການເຮັດການກິນຂອງທ່ານບໍ່ຜິດກົດໝາຍ ຫຼື ບໍ່ສົ່ງຜົນກະທົບທີ່ບໍ່ດີຕໍ່ຕົວຂອງທ່ານ ແລະ ຄົນຮອບຂ້າງ ຈົນເຂົາເວົ້າວ່າທ່ານກຳລັງເມົາ.
www.sansuok.com
|
