ເດັກຜູ້ຍິງຄົນໜຶ່ງນັ່ງເຫງົາຢູ່ແຄມປ່ອງຢ້ຽມ
ລາວແນມໄປເຫັນໂຖຕົ້ນໄມ້ທີ່ມີແຕ່ດິນທີ່ແຕກແຫງຢູ່
ແຕ່ພັດຍັງມີແກ່ນຂອງຕົ້ນຫຍັງຈັກຢ່າງງອກຢູ່
ລາວເກັບມັນຂຶ້ນມາດ້ວຍຄວາມສົງໃສວ່າ ມັນເກີດຂຶ້ນມາໄດ້ແນວໃດ ??
ວັນທີ1
ລາວເອົາແກ່ນນັ້ນໄປປູກໃສ່ໂຖໜ່ວຍໃໝ່ ແລ້ວກໍ່ຖ້າມື້ທີ່ມັນຈະງອກອອກມາ
ລາວຢາກເຫັນໄວໆວ່າມັນຈະເກີດເປັນຫຍັງ ຈຶ່ງຫົດນ້ຳໃຫ້ບັກຫລາຍໆ ຈົນວ່ານ້ຳລົ້ນອອກມາ
ວັນທີ2
ລາວຈອບເບິ່ງການເຕີບໃຫຍ່ຂອງແກ່ນນັ້ນ ທັນໃດນັ້ນກໍ່ມີປາຄຳອອກມາ
ລາວເອົາປາຄຳໃສ່ໄວ້ໃນກວດໂຫລແລະຄິດວ່າຄືສິຫົດນ້ຳຫລາຍໂພດຈຶ່ງເອົາໂຖຕົ້ນໄມ້ໄປໃສ່ເຕົາອົບ
ວັນທີ3
ລາວເປີດເຕົາອົບອອກມາເບິ່ງແລ້ວເຫັນລູກໄກ່ນ້ອຍຢູ່ໃນນັ້ນ
ມັນແນມມາຫາລາວ ແລະ ຍ່າງຕາມລາວຕະຫລອດ
ເດັກຍິງຄົນນັ້ນມີຄວາມຄິດວ່າຄວນຈະໃສ່ປຸ໋ຍລອງເບິ່ງ ແລະ ກໍ່ເລີ່ມໃສ່ປຸ໋ຍຈົນໝົດຖົງໃຫຍ່ໜຶ່ງ
ວັນທີ4
ມີໂບສີແດງອອກມາແຕ່ແກ່ນນັ້ນ ລາວດີໃຈຫລາຍຈຶ່ງເອົາໂບນັ້ນມາຜູກໃຫ້ໄກ່ນ້ອຍ
ແຕ່ລະມື້ລາວຈະເຝົ້າເບິ່ງວ່າຊິມີຫຍັງອອກມາແຕ່ແກ່ນນັ້ນອີກ ລາວມີຄວາມສຸກກັບການໄດ້ເບິ່ງແຍງ
ຫົດນ້ຳ ແລະ ໃຫ້ປຸ໋ຍ
ວັນທີ30
ລາວເລີ່ມເບື່ອທີ່ຈະຫົດນ້ຳ ແລະ ເບິ່ງແຍງຕົ້ນໄມ້ແລ້ວ
ລາວບໍ່ຕື່ນເຕັ້ນກັບສິ່ງທີ່ອອກມາຈາກແກ່ນນັ້ນອີກແລ້ວ
ຕົ້ນໄມ້ກໍ່ເລີ່ມແຫ້ງ ໃບໄມ້ກໍ່ເລີ່ມເປັນສີເຫລືອງ ແລະ ບໍ່ມີຫຍັງອອກມາຈາກແກ່ນນັ້ນອີກແລ້ວ
ວັນທີ 180
ໃບໄມ້ຈົນວ່າແຫ້ງກອບໝົດແລ້ວ
ດິນເລີ່ມແຕກແຫງຄືກັບຕອນທຳອິດທີ່ພົບມັນ
ລາວເສຍໃຈຫລາຍທີ່ເລື່ອງມັນເປັນແບບນີ້
ວັນທີ250 ລາວຫົດນ້ຳໃນປະລິມານທີ່ພໍດີ ແລະ ລາວມີຄວາມຫວັງທີ່ຈະໄດ້ພົບກັບສິ່ງທີ່ເຮັດ
ໃຫ້ລາວປະຫລາດໃຈຄືທີ່ຜ່ານມາ
ວັນທີ 251
ລາວເອົາໂຖມາຮັບແສງແດດອ່ອນໆໃນຕອນເຊົ້າດ້ວຍໃຈເບິກບານ ແລະ ເຕັມໄປດ້ວຍຄວາມຫວັງ
ວັນທີ 252
ລາວໃສ່ປຸ໋ຍໃຫ້ຕົ້ນໄມ້ ພ້ອມກັບມີລູກໄກ່ທີ່ຜູກໂບແດງ ແລະ ປາຄຳໃນກວດໂຫລຢູ່ໃກ້ໆ
ວັນທີ 300
ການເອົາໃຈໃສ່ເບິ່ງແຍງຢ່າງໃກ້ຊິດຂອງລາວ ເຮັດໃຫ້ຕົ້ນໄມ້ກັບມາມີໃບຂຽວອີກເທື່ອໜຶ່ງ ແລະ
ສິ່ງທີ່ເຮັດໃຫ້ປະຫລາດໃຈກວ່ານັ້ນແມ່ນ ແກ່ນນັ້ນໄດ້ກາຍເປັນດອກສີຂາວນ້ອຍໆທີ່ມີຮູບຮ່າງ
ຄືກັບຮູບຫົວໃຈລາວຕື່ນເຕັ້ນຫລາຍ
ວັນທີ 340
ລາວຮ້ອງເພງ ແລະ ເວົ້າກັບດອກໄມ້ສີຂາວນັ້ນທຸກຍາມທີ່ມີເວລາວ່າງ
ລາວຮູ້ສຶກມີຄວາມສຸກຫລາຍ ທີ່ໄດ້ເອົາໃຈໃສ່ໂດຍລືມໄປເລີຍວ່າມັນຊິກາຍເປັນຫຍັງຕໍ່ໄປອີກ...
ລາວບໍ່ໄດ້ຄາດຫວັງໃຫ້ດອກໄມ້ຊິປ່ຽນເປັນຫຍັງອີກແລ້ວ
ລາວມີແຕ່ເບິ່ງແຍງມັນເປັນຢ່າງດີທີ່ສຸດ
ວັນທີ 365
ລາວນັ່ງຢູ່ແຄມປ່ອງຢ້ຽມຕາມເຄີຍ
ໂຖຕົ້ນໄມ້ຢູ່ຕໍ່ໜ້າລາວບໍ່ໄດ້ມີດອກໄມ້ສີຂາວຮູບຫົວໃຈອີກແລ້ວ
ມັນໄດ້ຫາຍໄປແລ້ວ!!!
ແຕ່ລາວບໍ່ໄດ້ເສຍໃຈ ຫລື ຮ້ອງໄຫ້ເລີຍ
ເພາະມີເດັກນ້ອຍຜູ້ຊາຍຄົນໜຶ່ງຢືນຢູ່ແຄມປ່ອງຢ້ຽມນຳ
ເດັກຄົນນັ້ນສາມາດລົມກັບລາວໄດ້ ຍິ້ມໃຫ້ລາວໄດ້ ໄປນຳລາວທຸກໆບ່ອນ
ເຂົ້າໃຈລາວ ແລະ ລາວກໍ່ບໍ່ເຄີຍເຫງົາອີກເລີຍ ...
** ເຈົ້າຮູ້ບໍ່ວ່າດອກໄມ້ສີຂາວນັ້ນໄດ້ປ່ຽນເປັນຫຍັງ **
ເດັກຍິງຜູ້ນັ້ນໃຊ້ເວລາ 1 ປີ ໃນການຮຽນຮູ້ເລື່ອງຄວາມຮັກ
ລາວໄດ້ຮຽນຮູ້ວ່າ
* ຖ້າຫົດນ້ຳມັນຫລາຍໆກໍ່ບໍ່ໄດ້ເຮັດໃຫ້ຕົ້ນໄມ້ໃຫຍ່ໄວໄດ້
* ການເອົາໃຈໃສ່ເປັນສິ່ງທີ່ຊ່ວຍລໍ່ລ້ຽງໃຫ້ຄວາມຮັກຢູ່ຕໍ່ໄປໄດ້!!
* ການຄອງຄອຍເມື່ອຄັ້ງທຳອິດຈະເຕັມໄປດ້ວຍຄວາມຕື່ນເຕັ້ນສະເໝີ
ແຕ່ດົນໆໄປມັນກໍ່ຈະກາຍເປັນຄວາມທໍ້ແທ້ ແລະ ຄວາມເບື່ອໜ່າຍ
* ເຖິງເຮົາຍອມຮັບທີ່ຈະສູນເສຍແຕ່ກໍ່ບໍ່ມີທາງທີ່ຈະໜີຈາກຄວາມເຈັບປວດໄດ້
* ບໍ່ມີຄຳວ່າຊ້າໄປສຳລັບຄວາມຮັກ ເຮົາສາມາດເລີ່ມຕົ້ນໄດ້ໃໝ່ສະເໝີ
* ການທີ່ເຮົາຄາດຫວັງກັບຄວາມຮັກຫລາຍເທົ່າໃດ ເມື່ອມັນບໍ່ເປັນໄປຕາມທີ່
ເຮົາຫວັງໄວ້ມັນກໍ່ຈະແຮ່ງເຈັບປວດຫລາຍເທົ່ານັ້ນ
ເຈົ້າເດ ເຂົ້າໃຈໃນຄວາມຮັກແລ້ວຫລືຍັງ
ເຈົ້າໃຊ້ເວລາເທົ່າໃດໃນການຮຽນຮູ້ ແລະ ພະຍາຍາມເຂົ້າໃຈໃນຄວາມຮັກ
“ຄວາມຮັກ” ບໍ່ມີຂໍ້ປະຕິບັດຕາຍຕົວ ແຕ່ລະຄົນຈື່ງຕ້ອງຫາຄຳຕອບເອົາເອງ
ຕາມວິທີທີ່ແຕກຕ່າງກັນ ...
ທີ່ມາ : FW
ຂຽນເມື່ອ: ມິ.ຖ.. 4, 2009
| ມີ
ໜວດໝູ່:
