ໄດອາຣີ່ຂອງ Pain Akatsuki: ຈາຮີດ ກັບ HIV

ຂຽນເມື່ອ: ກ.ຍ.. 13, 2010 | ມີ 7 ຄຳເຫັນ ແລະ 0 trackback(s)

ສາເຫດສຳຄັນທີ່ເຮັດໃຫ້ຄົນໜຸ່ມສາວຕິດເຊື້ອ HIV ຢູ່ທຸກມື້ນີ້ກໍ່ເພາະປະເພດນີທີ່ຄັບແຄບແລະສິນລະທຳຈອມປອມທີ່ສ້າງຂື້ນມາໂດຍກຸ່ມຄົນກຸ່ມໜຶ່ງ ເຊິ່ງຈາຮີດປະເພນີດັ່ງກ່າວກຳລັງເຮັດໃຫ້ຄົນຕາຍແລະເດືອດຮ້ອນຢ່າງຫຼວງຫຼາຍ ເຊິ່ງມັນບໍ່ໄດ້ແມ່ນສິ້ງທີ່ດີງາມຢ່າງທີ່ເອີຍອ້າງແຕ່ຢ່າງໃດ.

ຊົນຊົ້ນປົກຄອງລາວຫຼືບັນດານັກການເມື່ອງທັ້ງຫຼາຍຕົວະເຮົາສະເໝີວ່າ ເຂົາປ້ອງກັນ “ຮີດຄອງປະເພນີແລະວັດທະນະທຳອັນດີງາມຂອງຊາດ” ຈາກອິດທິພົນຕາເວັນຕົກທີ່ມີການສ້າງພາບວ່າ “ສັງຄົມຕາເວັນຕົກບ້າເຊັກ” ໃນຂະນະທີ່ມີການອ້າງວ່າສັງຄົມລາວມີ ທຳນຽມອັນດີງາມ ແຕ່ໃນຄວາມເປັນຈິງແລ້ວຖ້າເຮົາສຶກສາປະຫວັດສາດໃຫ້ດີແລ້ວ ການແຕ່ງກາຍແບບປັດຈຸບັນແມ່ນໄດ້ມາຈາກພວກຕາເວັນຕົກໃນຊ່ວງທີ່ພວກມັນເຂົ້າມາປົກຄອງແລະເຜີຍແຜ່ວັດທະນະທຳຂອງມັນ ເຊິ່ງການແຕ່ງກາຍຂອງລາວໃນສະໄໝກ່ອນ(ກ່ອນທີ່ຈະມີຄົນຕ່າງປະເທດເຂົ້າມາຢູ່ລາວ) ແມ່ນຈະມີການນຸ່ງຖືຕ່າງຈາກປະຈຸບັນ ແລະ ນອກຈາກນີ້ການຮັກນວນສະຫງວນໂຕກໍ່ເປັນຄ່ານິຍົມໃໝ່ໃນຍຸກທຶນນິຍົມ ເພາະໃນຍຸກກ່ອນໆຊາຍກັບຍິງຈະຢູ່ນຳກັນໂດຍບໍ່ມີການຈົດທະບຽນແຕ່ງງານ ແລະຄູ່ຮັກມັກຈະໜີໄປຢູ່ນຳກັນປະຈຳ.

ນອກຈາກນັ້ນຄ່ານິຍົມ “ຮັກນວນສະຫງວນໂຕ” ເປັນຄ່ານິຍົມຈອມປອມທີ່ເລືອກປະຕິບັດ ເພາະມີການພະຍາຍາມໃຊ້ກັບຍິງຢ່າງເຄັ່ງຄັດ ແຕ່ໃນຜູ້ຊາຍບໍ່ໄດ້ໃຫ້ຄວາມສຳຄັນ ຍິ່ງໄປກ່ວານັ້ນໃນອາດີດ ໃນໝູ່ຄົນຜູ້ໃຫຍ່ທີ່ມີອຳນາດ ມັກຈະມີການໃຊ້ແຮງງານເໝືອນທາດແລ້ວ ຊາຍໃນຊົນຊັ້ນປົກຄອງ(ໃນຊ່ວງສະໄໝທີ່ມີການປົກຄອງໂດຍເຈົ້າຊີວິດ) ມັກຈະມີເມຍນ້ອຍຈຳນວນຫຼາຍໆຄົນ ໂດຍເຫັນຜູ້ຍິງເປັນຊັບຊົມບັດ ແລະນີ້ຄືປະເພນີຊົວໆຂອງຄົນໃນສະໄໝທີ່ກ່ອນທີ່ນິຍົມກະທຳມາ.

ແລ້ວເປັນຫຍັງໃນປັດຈຸບັນພວກຈາຮີດນິຍົມ(ກຸມຄົນທີ່ເຄັ່ງໃນຈາຮີດ ເວົ້າງ່າຍໆຄືພວກທີ່ບໍ່ເບິ່ງຄວາມເປັນຈິງທີ່ເປັນຢູ່)ຈຶ່ງມັກເບິ່ງໃນມຸມມອງແຄບໆຕໍ່ການມີຄູ່ຮັກຫຼືເພດສຳພັນ? ຜົນໃນຮູບປະທຳຄື ພວກຈາຮີດນິຍົມພະຍາຍາມຕົວະຍົວະໃຫ້ເຮົາຄິດວ່າການມີເພດສຳພັນເປັນເຮື່ອງສົກກະປົກ,ໜ້າອາຍ ແທນທີ່ຈະຄິດວ່າມັນແມ່ນຄວາມຕ້ອງການໂດຍພື້ນຖານຕາມທຳມະຊາດຂອງມະນຸດ ເພາະເຫດນັ້ນພວກສິນລະທຳຈອມປອມກໍ່ພະຍາຍາມສະເໜີວ່າການໄປມີເພດສຳພັນກ່ອນແຕ່ງງານເປັນເລື່ອງເສຍຫາຍໃນຂະນະທີ່ບັນດາຄົນມີອຳນາດໃຊ້ເງິນຊື້ບໍລິການທາງເພດຈາກເດັກນ້ອຍເປັນສິດທິສ່ວນບຸກຄົນ ພວກນີ້ຍັງໄດ້ເວົ້າຕໍ່ໄປອີກວ່າການມີເພດສຳພັນບໍ່ແມ່ນເລື່ອງທີ່ຄິດວ່າຈະມ່ວນແລະກໍ່ໃຫ້ເກີດຄວາມສຸກແຕ່ຢ່າງໃດອີກດ້ວຍໂດຍສະເພາະໃນເພດຍິງ ດັ່ງນັ້ນໄວຫຼຸ້ນທີ່ມັກກັນແລະມີເພດສຳພັນກັນຈຶ່ງຖືກເບິ່ງວ່າເປັນພວກ “ບໍ່ມີສິນລະທຳ”

ປັນຫາຄື ໃນຄວາມເປັນຈິງ ການມີເພດສຳພັນນອກກອບຂອງຈາຮີດເກີດຂື້ນຕະຫຼອດເວລາ ແລະ ຍ້ອນຈາຮີດທີ່ຄັບແຄບເຮັດໃຫ້ການສົນທະນາເລື່ອງເພດແລະການເຂົ້າໃຈວິທີປ້ອງກັນໂຕເອງຈາກໂລກຕິດຕໍ່ທາງເພດເປັນເລື່ອງທີ່ຍາກ ສັງຄົມຖືກກົດດັນໃຫ້ປະຕິເສດຄວາມຈິງທີ່ວ່າ ໄວຫຼຸ້ນໃນປະຈຸບັນມີເພດສຳພັນກ່ອນແຕ່ງງານ ດັ່ງນັ້ນການເຜີຍແຜ່ຄວາມຮູ້ເລື່ອງເພດສືກສາຢ່າງລະອຽດຫຼືການກຳນົດໃຫ້ມີວິຊາເພດສຶກສາໃນໂຮງຮຽນເປັນເລື່ອງທີ່ບໍ່ຈຳເປັນ ຄິດແຕ່ວ່າເປັນການສົ່ງເສີມໃຫ້ເດັກນ້ອຍມີເພດສຳພັນກ່ອນໄວອັນຄວນ ແລະຜູ້ຍິງເສຍປຽບຢູ່ບ່ອນວ່າບໍ່ກ້າບັງຄັບໃຫ້ຄູ່ນອນໃສ່ຖົງຢາງອານາໄມ ທັ້ງໆທີ່ແຟນຂອງເຂົາອາດຈະໄປມີເພດສຳພັນກັບຄົນອືື່ນ ເຊັ່ນຕາມຮ້ານບໍລິການເປັນຕົ້ນ. ດັ່ງນັ້ນຍ້ອນຈາຮີດທີ່ຄັບແຄບແລ້ວ ການທີ່ຜູ້ຍິງຖືກກົດຂີ່, ກີດກັ້ນໃນສັງຄົມ ຈຶ່ງເປັນອີກສາເຫດໜຶ່ງທີ່ເພີ່ມຄວາມສ່ຽງໃຫ້ເຂົາເຈົ້າໃນເລື່ອງ HIV ອີກດ້ວຍ.

ໃນຮູບປະທຳ ສິນທຳຈອມປອມ ໄດ້ເພີ່ມຄວາມສ່ຽງໃຫ້ກັບພົນລະເມື່ອງ ເພາະແນວຈາຮີດພະຍາຍາມປິດບັງວິທີການປ້ອງກັນໂຕທີ່ແທ້ຈິງຈາກເຊື້ອ HIV, ພວກຈາຮີດນິຍົມບໍ່ຍອມຮັບຄວາມຈິງທີ່ວ່າ ໄວຫຼຸ້ນສະໄໝນີ້ທັ້ງທີ່ເປັນເພື່ອນແລະຄູ່ຮັກກັນມັກມີເພດສຳພັນກັນກ່ອນແຕ່ງງານ ແລະ ມັກມີການປ່ຽນແຟນຢ່າງເປັນເລື່ອງປົກກະຕິ ແນວຈາຮີດຈຶ່ງຄັດຄ້ານການສອນວິຊາເພດສຳພັນໃນໂຮງຮຽນ ໂດຍອ້າງວ່າຈະເປັນການສົ່ງເສີມການມີເພດສຳພັນນອກວິໄນຄອບຄົວ ແລະ ຜິດກັບຮີດຄອງປະເພນີອັນຈອມປອມທີ່ນັບຖືກັນມາແຕ່ບູຮານທັ້ງໆທີ່ຫາຈະມີໃນຊ່ວງທີ່ມີການເຂົ້າມາຂອງພວກຈັກກະພັດ.

ສັງຄົມທີ່ເຕັມໄປດ້ວຍສິນລະທຳຈອມປອມ “ມືຖືສາກ ປາກຖືສິນ” ພ້ອມກັບກກົນໄກຂອງທຶນນິຍົມ ມີຜົນເຮັດໃຫ້ການມີເພດສຳພັນສາມາດຊື້ຂາຍກັນໄດ້ ເຊິ່ງຫຼາຍຄັ້ງທີ່ຜູ້ຂາຍບໍລິການຖືກກົດຂີ່ ແລະຖືກປາບປາມຈາກລັດ ແຕ່ບາງຄັ້ງກໍ່ມີການເຮັດຜິດຂອງເຈົ້າໜ້າທີ່ ທີ່ໄປດຳເນີນການປາບປາມຜູ້ຂາຍບໍລິການ ເຊິ່ງຜົນທີ່ຕາມມາກໍ່ຄື ພວກເຂົາຖືກດູໝິ່ນແລະຂາດການເອົາໃຈໃສ່ໃນເວລາໄປໂຮງໝໍ ດັ່ງນັ້ນເຖິງເວລາທີ່ເຮົາຕ້ອງປ່ຽນທັດສະນະຄະຕິທີ່ສັງຄົມມີຕໍ່ຜູ້ຂາຍບໍລິການທາງເພດ ເພາະແນວຄວາມຄິດຂອງຄົນທົ່ວໄປທີ່ມີຕໍ່ຜູ້ຂາຍບໍລິການຈະມີຢູ່ຫຼາຍໆຄວາມຄິດແຕ່ຫຼັກໆຈະມີຢູ່ສອງຄວາມຄິດຄື

* ແນວຄິດທີ່ໜຶ່ງ ຄິດວ່າການຂາຍບໍລິການທາງເພດເປັນຄົນບໍ່ມີສິນລະທຳ ເປັນຄົນບໍ່ດີ ແລະຍັງດ່າບຸກຄົນເຫຼົ່ານັ້ນວ່າເປັນຄົນໂລມາກໂລພາ ທັ້ງໆທີ່ເຈົ້າຍັງບໍ່ຮູ້ເຫດຜົນທີ່ເຂົາເຈົ້າຕ້ອງມາຂາຍບໍລິການທາງເພດເຊິ່ງເຂົາເຈົ້າອາດຈະຖືກຕົວະ,ຖືກບັງຄັບ,ຫຼືເຕັມໃຈ ແຕ່ສຳຫຼັບຜູ້ທີ່ຄິດວ່າ ຄົນພວກນີ້ຂີ້ຄານ,ໂລມາໂລພາ,ບໍ່ຍອມປະກອບອາຊີບທີ່ດີ,ມັກແຕ່ທາງທີ່ງາຍແລະສະບາຍ ສຳລັບຄົນທີ່ຄິດແນວນີ້ພວກເຮົາກໍ່ມີຄຳຕອບພຽງຄຳຕອບດຽວຄື້ ຖ້າຄິດວ່າການມີເພດສຳພັນກັບຄົນແປກໜ້າຫຼາຍຄົນໃນຄືນດຽວມັນເປັນເລື່ອງ “ງາຍ” ກາລອງໄປເຮັດເອງເບິ່ງແມ້ມັນຊີງ່າຍຄືທີ່ຄິດບໍ່.

*ແນວຄວາມຄິດທີ່ສອງ ແນວຄວາມຄິດນີ້ກໍ່ມອງຂ້າມຄວາມເປັນມະນຸດຂອງຄົນທີ່ຂາຍບໍລິການເຊັ່ນກັນ ແຕ່ແທນທີ່ເຂົາຈະຄິດວ່າຜູ້ຍິງທີ່ຂາຍບໍລິການເປັນຄົນບໍ່ດີ ພວກເຂົາກັບຄິດວ່າຄົນເຫຼົ່ານີ້ແມ່ນເຫຍື່ອ, ຈິງຢູ່ວ່າໃນທຸລະກິດແບບນີ້ມັກມີກໍລະນີທີ່ເດັກນ້ອຍຖືກຕົວະມາຂາຍບໍໍລິການທາງເພດ ແຕ່ຍິງບໍລິການສ່ວນໃຫຍ່ບໍ່ແມ່ນເຫຍື່ອແບບນັ້ນ ເຂົາເປັນຜູ້ຕັດສິນໃຈໃນລະດັບໜຶ່ງໃນການປະກອບອາຊີບ ເຮົາຕ້ອງໃຊ້ຄຳວ່າ “ລະດັບໜຶ່ງ” ເພາະວ່າເສລີພາບຂອງເຂົາທີ່ຈະເລືອກວຽກງານນັ້ນມີຈຳກັດ ທັ້ງໆທີ່ຊົນຊັ້ນນຳອ້າງວ່າທຸກຄົນມີ “ໂອກາດແລະເສລີພາຍເທົ່າກັນ” ທີ່ຈະເລືອກອາຊີບແລະວິຖີຊີວິດ ໃນຄວາມເປັນຈິງ ຕາບໃດທີ່ຄົນສ່ວນໜ້ອຍຄວບຄຸມປັດໃຈການຜະລິດແລະມູນຄ່າສ່ວນໃຫຍ່ຈາກການຜະລິດ ມະນຸດສ່ວນໃຫຍ່ຈະມີທາງເລືອກໃນການດຳເນີນຊີວິດຈຳກັດຫຼາຍ.

ສະຫຼຸບແລ້ວ ສິນລະທຳຈອມປອມແລະແນວຄວາມຄິດຈາຮີດນິຍົມ ທີ່ມີຕົ້ນກຳເນີດມາຈາກການສ້າງລະບຽບວິໄນໃນຄອບຄົວ ເປັນອຸປະສັກຫຼັກໃນການໃຊ້ນະໂຍບາຍທີ່ສາມາດລຸດຜ່ອນການແພ່ລະບາດຂອງໂລກເອດໃນສັງຄົມເຮົາ ດັ່ງນັ້ນພາກປະຊາຊົນຈຶ່ງຈຳເປັນທີ່ຈະໃຫ້ຄວາມສຳຄັນກັບການເມື່ອງທາງເພດ ແລະ ຄວນຈະສະໜັບສະໜູນສິດທິແມ່ຍິງ,ກະເທຍ,ເກ,ທອມດີ້ແລະສິດທິຂອງຜູ້ໃຫ້ບໍລິການທາງເພດ ແລະ ທີ່ສຳຄັນເຮົາຕ້ອງເປີດສຶກທາງແນວຄວາມຄິດກັບແນວຄວາມຄິດຈາຮີດນິຍົມ.

ກັບໄປໄດອາຣີ່ຂອງ Pain Akatsuki

ແຈ້ງເນື້ອຫາບໍ່ເໝາະສົມ

Pain Akatsuki

ເບິ່ງທັງໝົດ

ອ່ານຄືນຫຼັງ

2010 (1)

ໝວດໝູ່

ອື່ນ ໆ (1)

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.