ວັນທີ 9ທັນວາ 2010ທີ່ຫາກໍຜ່ານໄປນັ້ນ ແມ່ນວັນສາກົນ ເພື່ອຕ້ານການສໍ້ລາດບັງຫຼວງ ໃນວັນດັ່ງກ່າວ ທົ່ວໂລກ ແລະ ໃນ ສປປ ລາວ ພວກເຮົາໄດ້ມີການເຄື່ອນ ໄຫວ ທົບທວນຜົນກະທົບຂອງການສໍ້ລາດບັງຫຼວງ ທີ່ມີຕໍ່ເສດຖະກິດ-ສັງຄົມ ສື່ມວນຊົນໄດ້ລົງຂ່າວຫຼາຍ ກ່ຽວກັບນິຕິກຳຕ່າງໆ ບໍ່ວ່າຂອງຕ່າງປະເທດ ສາກົນ ກໍຄືກົດ ໝາຍພາຍໃນປະເທດ ທີ່ພົວພັນເຖິງບັນຫາດັ່ງກ່າວ.

ສຳລັບຢູ່ ສປປ ລາວ ແລ້ວ ຖ້າທຽບໃສ່ປະເທດອື່ນ ເຫັນວ່າຍັງຢູ່ໃນລະດັບຕ່ຳ ແຕ່ຖ້າທຽບໃສ່ສະພາບຄວາມເປັນຈິງ ຂອງປະເທດເຮົາແລ້ວ ເຫັນວ່າຢູ່ໃນຂັ້ນຕ້ອງໄດ້ ພ້ອມກັນສະກັດກັ້ນ ແລະ ເຜີຍແຜ່ການກະທຳດັ່ງກ່າວ ເພາະບໍ່ດັ່ງນັ້ນ ມັນຈະກາຍເປັນພະຍາດຮ້າຍແຮງ ທີ່ບໍ່ສາມາດປິ່ນປົວໄດ້.

ໃນເວລາສົນທະນາກັບເພື່ອນຜູ້ອ່ານຫຼາຍຄົນ ຕ່າງກໍກ່າວເປັນສຽງດຽວກັນວ່າ: ການສໍ້ໂກງໃນຮູບແບບຕ່າງໆ ໃນທົ່ວສັງຄົມເຮົາ ກ້າວສູ່ລະດັບເຕືອນໄພ ບໍ່ເກງກົວກົດໝາຍ ມີລັກສະນະເປີດແປນ ແລະ ແຜ່ລາມ ...

ການກວດກາຜ່ານມາ ກໍມີການດຳເນີນຢ່າງຕໍ່ເນື່ອງ ແລະ ເຂັ້ມງວດ ມີການລົງວິໄນ ແລະ ຮ້ອງຟ້ອງດຳເນີນຄະດີ ແຕ່ເບິ່ງແລ້ວ ຍັງມີຜູ້ກະທຳຜິດຢູ່ ແລະ ມີຜູ້ອາໄສຊ່ອງ ວ່າງຂອງກົດໝາຍ ຫຼື ລະບຽບການຕ່າງໆຈຳນວນໜ້ອຍດຽວ ຫຼີກໜີ.

ຫາກແມ່ນວ່າພວກເຮົາເປັນເຈົ້າການຮ່ວມກັນ ລອງຕັ້ງບັນຫາເບິ່ງວ່າ: ລາຍຮັບເປັນເງິນເດືອນ ຫຼືລາຍຮັບຈາກແຫຼ່ງອື່ນໆຂອງຄົນເຮົາດຽວນີ້ ລວມເຖິງນະໂຍບາຍຕ່າງໆ ທີ່ ໄດ້ຮັບອຸດໜູນນັ້ນ ບໍ່ມີຄວາມສາມາດມີເຮືອນຢູ່ຫຼາຍຫຼັງ ມີລົດຫຼາຍຄັນ ມີກິດຈະການໃຫ້ແກ່ລູກຫຼານ ໄດ້ດຳເນີນການຢ່າງໃຫຍ່ໂຕໄດ້ ຍົກເວັ້ນພວກນັກທຸລະກິດ ພວກຄ້າ ຂາຍລາຍໃຫຍ່ແລ້ວ ເງິນນັ້ນມາຈາກໃສ ?.

ຫຼືລອງຕັ້ງບັນຫາວ່າ: ການທີ່ບໍ່ມີເຮືອນຢູ່ອາໄສ ? ເງິນເດືອນບໍ່ກຸ້ມກິນ ເປັນສາຍເຫດຂອງການສໍ້ລາດບັງຫຼວງ ຫຼືບໍ່ ? ນີ້ກໍແມ່ນບັນຫາ ເກີດມີກໍລະນີບາງລາຍຄິດວ່າເຮັດ ການມາຫຼາຍປີ ຊັ້ນຕຳແໜ່ງກໍພໍຄືບ້ານຄືເມືອງ ດັ່ງນັ້ນ ມີຄວາມຮຽກຮ້ອງໃຫ້ມີເຮືອນຢູ່ຖາວອນ ມີລົດຂີ່ (ລົດໃຫຍ່) ມີເງິນໃຊ້ຈ່າຍພຽງພໍໃນຄອບຄົວ ແລະ ແຮໄວ້ເວລາ ເຈັບເປັນ ຫຼືວ່າຍາມເຂົ້າຮັບບຳນານ ສະນັ້ນ ເວລາມີໂອກາດ ມີເງື່ອນໄຂ ແມ່ນຕັກຕວງເອົາໂລດ ອັນນີ້ແມ່ນແນວຄິດເອກະຊົນ ແນວຄິດເຫັນແກ່ສ່ວນຕົວເກີນໄປ ບໍ່ເບິ່ງຜູ້ ອື່ນ ແນມເຫັນແຕ່ຕົນເອງ ແລ້ວເກີດມີແນວຄິດຊັ່ງຊາ ... ແລະ ເຮັດກັນຢ່າງແຜ່ລາມ ເຖິງຈະບໍ່ຫຼວງຫຼາຍ ແຕ່ຫຼາຍບ່ອນເຮັດໂຮມກັນເຂົ້າ ກໍຫຼາຍເຊັ່ນກັນ.

ນັ້ນຄືບາງບັ້ງເລກທີ່ຕັ້ງຂຶ້ນ ໃນໂອກາດສະຫຼອງວັນສາກົນ ຕ້ານການສໍ້ລາດບັງຫຼວງ ທີ່ຕ້ອງໄດ້ຄິດ ແລະ ແກ້ໄຂ ບໍ່ຊັ້ນ ມັນຈະແຜ່ລາມ ກາຍເປັນມະເຮັງ ຍາກແກ່ການ ແກ້ໄຂ.

ຄົນທີ່ມີຄວາມສຸກ ແມ່ນຄົນຮູ້ກຳນົດເພດານຊີວິດ... ຊັບສິນ ເງິນຄຳ ເວລາຈາກໂລກນີ້ໄປ ເອົາໄປບໍ່ໄດ້ ສະນັ້ນ ຈະໃຫ້ຄົນຈົ່ມຄິດຮອດໃນທາງບວກ ຫຼືລົບ.

ສິ່ງສຳຄັນແມ່ນ ເພື່ອການຄົງຕົວ ແລະ ຂະຫຍາຍຕົວຂອງຊາດເຮົາ.