| ຄວາມດີ....ເປັນເສັ້ນທາງກ່າຍກ້ຽວ......ເດີນທ່ຽວໃຫ້ເຖິງຈຸດ
ບໍຣິສຸດສົດໃສ..................ຈາກໃຈຈິງແຈ້ງ
ບໍ່ໄດ້ແຝງຊອນໄວ້...............ຢູ່ທາງໃນຊ້ອນເຊື່ອງ
ທຳຄວາມດີບໍ່ຕ້ອງເຄືອງ....ນຳສຽງຄົນປາກຕ້ານ....ພານຂໍ້ຢ່າຕໍ່ເຕີມ
ຄວາມດີງາມຊ່ວຍເພີ້ມ...........ເຊີດຊູຊື່..ທັງລືສຽງ
ດີພ້ອມພຽງວາຈາ.................ວາດລີລາຍ້າຍ
ປະດັບກາຍຄົນເຮົານີ້..............ເອົາຄວາມດີເປັນທີນຶ່ງ
ແລ້ວຈຶ່ງຈະໄປເຖິງ.........ຈຸດທີ່ຫມາຍຫມັ້ນໄວ້.....ສົມດ້າມດັ່ງໃຈ
ຄວາມດີ....ແມ່ນຕົກລົງສູ່ໃຕ້......ໄຫຼລ່ອງໄປຕາມຂອງ
ເວີນຕາມສາຍນະທີທອງ............ແຕ່ບໍ່ຫມອງມົວເສົ້າ
ເຖິງຈະເອົາຈົມນໍ້າ....................ຕາມລຳທານວັງໃຫຍ່
ກໍຍັງໄຫຼເວີ່ນຜ້າຍ.............ກາຍມາໃກ້ໃຫ້ຫຼໍ່າແຍງ
ໃຊ້ວີທີຈະກັ່ນແກ້ງ...................ແຍ້ງໄປຈູດໄຟເຜົາ
ເຖົ່າຖ່ານແດງ..ໂດ້ນຟືນຈຸ...........ຈູດລົນຈົນໄຫມ້
ດັບຄວາມດີບໍ່ມີໄດ້.....................ສູນສລາຍໄປງ່າຍໆ
ຄວາມດີ..ຕົກລົງນໍ້າກໍບໍ່ໄຫຼ......ຕົກໃສ່ໄຟກໍບໍ່ໄຫມ້.....ຍັງຄົງໄວ້ຕະລອດການ
ສ່ວນເພັດພອຍຄ່າລ້ານ...........ທີ່ພວກທ່ານປະດັບກາຍ
ຄິດເປັນຫຼາຍຣາຄາ................ຄ່າເງິນຄຳແກ້ວ
ເປັນພຽງແວວປະກາຍເພີ້ມ.........ເສີມສັກສີໃຫ້ສູງສົ່ງ
ຍາມເມື່ອທ່ານລືມຫຼົງ....ປົດວາງປົງຖິ້ມໄວ້.....ຂະໂມຍຮ້າຍພັດຫອບໄປ
ເຈັບຫົວໃຈຈົນຄັບແຄ້ນ............ນີ້ວມືເປົ່າ...ຄໍກໍແປນ
ເສັຍແຫວນງາມ ສາມກາຣັດ.....ເຂັມຂັດທອງຄຳແທ້
ພໍຢາກດຸດຄັນແທຫມົ້ນ..............ຫົວຕຳໂພນທຸບດິນແກ່ນ
ເງິນເປັນລ້ານເປັນແສນ....ຫາມາແທນທຽບບໍ່ໄດ້....ຈິດໃຈເສົ້າໂສກສັນ
ຂອງນອກກາຍເຫຼົ່ານັ້ນ............ຕ່າງກໍໄຝ່ຝັນຫາ
ເງິນຕຣາທັງສິນຊັພ................ທີ່ໄຄວ່ຄວາມາໄດ້
ຍາມເມື່ອລົມຫາຍໃຈຈັ້ງ............ພະລັງແຮງກໍອິດອ່ອນ...ລົງແລ້ວ
ຜົນສຸດທ້າຍ....ເຫຼືອແຕ່ພຽງອາພອນ...ປົກຮ່າງນອນນິ້ງໆ.....ຄີງເຈົ້າກໍເປົ່າແປນ
ສ່ວນຄວາມດີ....ຈະຍືນຍົງແຫນ້ນແຟ້ນ.....ໃນຜືນແຜ່ນໂລກາ
ຈະບໍ່ໄລລາລັບ................ດ່ວນຕາມຕົວເຈົ້າ
ແມ່ນວ່າໄຟເຜົາໄຫມ້..........ດິນຖົມກາຍຈົນເປັນຝຸ່ນ
ຄວາມດີບໍ່ສູນຫາຍ.....ປະດັບກາຍຈົນຊົ່ວຟ້າ......ນະພາຊີ້ນບໍ່ເສື່ອມສີ......ທ່ານເອີຍ | 
ກັບໄປ kingkeo's Blog
ແຈ້ງເນື້ອຫາບໍ່ເຫມາະສົມ
