ພັນລາວ.ຄອມ
ຊອກຫາ:
ຊອກຫາແບບລະອຽດ
ຂຽນເມື່ອ ຂຽນເມື່ອ: ທ.ວ.. 30, 2009 | ມີ 21 ຄຳເຫັນ ແລະ 0 trackback(s)

ຂ້ອຍຂັບລົດມາ ເລີຍຫລົງທາງ ຊ່ວຍບອກທາງຂ້ອຍແດ່

 

ຂອບໃຈຫລາຍໆ ຈະໄດ້ໄປກ່ອນເດີ້

ຈົບແລ້ວ ຂອບໃຈທີ່ຕິດຕາມ

ສະຖານທີ່ຖ່າຍທຳ: ເມືອງພູກູດ ແຂວງ ຊຽງຂວາງ

ນັກສະແດງ : ຂ້າພະເຈົ້າເອງ

ຂໍຂອບໃຈ ພາຫະນະສົງຄາມ ທີ່ຈອດໄວ້ແຄມທາງ ບໍ່ຮູ້ວ່າຂອງຝ່າຍໃດ

 

ຂຽນເມື່ອ ຂຽນເມື່ອ: ທ.ວ.. 25, 2009 | ມີ 21 ຄຳເຫັນ ແລະ 0 trackback(s)
ເຕົາລີດແບບນີ້ ບໍ່ເຫັນຄົນວຽງຈັນໃຊ້ຫລາຍສິບປີແລ້ວ ແຕ່ມາພົບເຫັນທີ່ແຂວງຊຽງຂວາງ ເພິ່ນເອົາມາເປັນເຄື່ອງເອ້ບ້ານເຕົາ ກໍ່ຕ້ອງມີໄຟ ເວລາໃຊ້ເພິ່ນຄີບຖ່ານໄຟແດງໆ ໃສ່ເຂົ້າໄປ ພໍເຕົາຮ້ອນ ກໍ່ນຳໄປລີດເຄື່ອງໄດ້





ຂຽນເມື່ອ ຂຽນເມື່ອ: ທ.ວ.. 21, 2009 | ມີ 17 ຄຳເຫັນ ແລະ 0 trackback(s)

ຂໍ້ມູນ ຈາກ ນສພ ວຽງຈັນໃຫມ່

  • ການສະແດງ "ມ້າງເຄືອເຂົາກາດ" ນິທານບູຮານລາວ ທີ່ນັກສະແດງຝ່າຍເຈົ້າພາບວຽງຈັນເກມນຳມາເລົ່າໃຫ້ແຂກຟັງ ໂດຍລວມເອົານັກສະແດງ 1.500 ກ່ວາຄົນ ມາສະແດງຟ້ອນເຮັດເປັນຮູບຕ່າງໆ ສື່ຄວາມໝາຍເຖິງຄວາມມີເມດຕາກາລຸນາຂອງປູ່ເຍີ-ຍ່າເຍີ ແລະ ສິງຄຳ ທີ່ໄດ້ມ້າງເຄືອເຂົາກາດໃຫ້ໂລກ ໄດ້ພົບກັບແສງສະຫວ່າງ
  • ຕໍ່ດ້ວຍການສະແດງບົດຟ້ອນ "ບຸນປີໃໝ່ບ້ານເຮົາ" ບົດຟ້ອນນີ້ເຮັດໃຫ້ທົ່ວເດີ່ນປຽກຊຸ່ມໄປດ້ວຍນ້ຳໃສເຢັນທີ່ຖືກຫົດ ແລະ ສາດ ຈາກຂັນ (ໂອ) ປະສານການຟ້ອນລຳ ຊຶ່ງເຫຼົ່ານັກສະແດງພະຍາຍາມຖ່າຍທອດໃຫ້ຜູ້ຊົມໄດ້ເຫັນເຖິງບຸນປະເພນີຂອງລາວ ໃນໄລຍະອາກາດຮ້ອນອົບເອົ້າ ພາຂວັນດອກໄມ້ແຊມຝ້າຍມຸງຄຸນ ທີ່ຄົນລາວນິຍົມກັນມັດຂໍ່ຕໍ່ແຂນ ເພື່ອຄວາມເປັນສິລິມຸງຄຸນໃນປາງບຸນນີ້ ກໍຖືກຢິບຍົກຂຶ້ນມາອວດເຊັ່ນກັນ
  • ຖັດຈາກອາກາດຮ້ອນອົບເອົ້າ ກໍຕໍ່ໃສ່ລະດູຝົນ ຊຶ່ງເປັນລະດູທີ່ປະຊາຊົນລາວກຽມເຮັດນາ ເມື່ອຝົນຟ້າບໍ່ຕົກ ກໍຕ້ອງມີການຂໍຝົນຈາກພະຍາຟ້າແຖນ ໃນບົດຟ້ອນ "ບຸນບັ້ງໄຟ" ເຫຼົ່ານັກສະແດງແຕ່ງກາຍໃນຊຸດສີແສດ ເຊີ້ງກັນຢ່າງມ່ວນຊື່ນ ມີການທາໜ້າແຕ້ມຕາ ຊຶ່ງເປັນເອກະລັກໜຶ່ງຂອງນັກເຊີ້ງບັ້ງໄຟ ພ້ອມນີ້ ຫຸ່ນເຟືອງຂະໜາດຍັກທີ່ອອກມາຟ້ອນໃຫ້ຜູ້ຊົມເບິ່ງ ກໍສ້າງສີສັນໃຫ້ການສະແດງຊຸດນີ້ບໍ່ນ້ອຍ
  • ບຶດຈ້ຳບຶດ ! ຄືສຽງປຸກໃຈສີພາຍເຮືອແຂ່ງ ໃນບົດຟ້ອນ "ເຊີ້ງຊ່ວງເຮືອ" ປະເພນີທີ່ຈັດຂຶ້ນຖັດຈາກບຸນອອກພັນສາປະວໍລະນາ 15 ຄ່ຳ ເດືອນ 11 ລາວ ທຸກໆປີ ບົດຟ້ອນນີ້ນອກຈາກສຽງຈັງຫວະດົນຕີ ແລະ ເພງຮ້ອງທີ່ຄຶກຄື້ນມ່ວນຊື່ນແລ້ວ ບັນດາສີພາຍບ່າວ-ສາວຍັງອອກແຮງແກ່ວງໄມ້ພາຍຖ່າຍທອດໃຫ້ເຫັນຄວາມຈູບຈ້າວຫ້າວຫັນ ແຕ່ສວຍງາມດ້ວຍການ ປະສານທ່າຟ້ອນອັນອ່ອນຊ້ອຍ ເຂັ້ມແຂງ ຈຶ່ງກາຍເປັນບົດຟ້ອນອີກບົດທີ່ຊະນະໃຈຜູ້ຊົມຫຼາຍຂຶ້ນ

 ຕ້ອງການເບິ່ງຕື່ມ ເຊີນທີ່ punlao.com/album.php

ຂຽນເມື່ອ ຂຽນເມື່ອ: ທ.ວ.. 14, 2009 | ມີ 17 ຄຳເຫັນ ແລະ 0 trackback(s)
ຫລາຍຄົນຄົງຈະຮູ້ຈັກເຈົ້າປຸ້ນກັນດີ ເພາະວ່າເປັນອາຫານທີ່ພວກເຮົາມັກພົບເຫັນໃນງານໆຕ່າງໆ ບໍ່ວ່າຈະເປັນງານດອງ ເຮັດບຸນຕ່າງໆ,..ເຂົ້າປຸ້ນທີ່ພົບຢູ່ຫ້ວຍຊາຍຈະແຕກຕ່າງ ຈາກເຂົ້າປຸ້ນອື່ນ ກ່ອນອື່ນແມ່ນມັນເປັນຂອງກິນຫລິ້ນ ບໍ່ແມ່ນເປັນອາຫານສຳລັບຮັບແຂກຮັບຄົນ ການຊື້ການຂາຍ ບໍ່ແມ່ນຈະສັ່ງເປັນຖ້ວຍ ເພິ່ນຂາຍກັນເປັນກິໂລ ດັ່ງນັ້ນບໍ່ຄວນໄປຄົນດຽວ ຢ່າງຕ່ຳຫນ້າຈະໄປ4ຄົນ
ບ່ອນຂາຍເປັນສະຖານທີ່ທີ່ຮົ່ມເຢັນ ເປັນຕູບຫຍ້າ ໃນທ່າມກາງຕົ້ນໄມ້ໃຫຍ່ ບັນຍາກາດດີ
ຫລັງຈາກເລືອກຕູບຮຽບຮ້ອຍແລ້ວ ກໍ່ສັ່ງເຂົ້າປຸ້ນມາຈັກກິໂລຫນຶ່ງ ສັງເກດເຄື່ອງປຸງເທິງໂຕະມີຫຍັງແດ່ ມີ: ເກືອ, ແຈ່ວຫມາກຖົ່ວເນົ່າ ທີ່ປຸງແຕ່ງດີແລ້ວ
ເມື່ອຄົນເສີບຍົກເຂົ້າປຸ້ນມາຈະໄດ້: ເຂົ້າປຸ້ນ, ຜັກຫອມຊອຍ, ຜັກບົ້ງລວກ, ນ້ຳເຂົ້າປຸ້ນທີ່ບັນຈຸໃສ່ການ້ຳຮ້ອນທຳມະດາທີ່ນີ້ລະ (ອັນນີ້ກະແປກ) ທີ່ແປກຍິ່ງກວ່ານັ້ນ ແມ່ນນ້ຳເຂົ້າປຸ້ນເປັນນ້ຳຮ້ອນທຳມະດາ ແຕ່ວ່າຕັກມາຈາກຫມໍ້ທີ່ເພິ່ນໃຊ້ບີບເຂົ້າປຸ້ນ ບໍ່ມີສານເຄມີຫລືເຄື່ອງປຸງຫລືສ່ວນປະກອບຢ່າງອື່ນ (ບໍ່ມີຊີ້ນ, ກະດູກ, ເຄື່ອງເທດຫຍັງເລີຍ)
 
ວິທີປຸງ :1 ເທນ້ຳຈາກກາລົງໃສ່ຖ້ວຍ
2 ໃສ່ຜັກຫອມຊອຍ
3 ໃສ່ແຈ່ວຫມາກຖົ່ວເນົ່າ
4 ໃສ່ເຂົ້າປຸ້ນ
5 ໃສ່ຜັກລວກ
 
6 ກິນໄດ້
ແຊບຫລືບໍ່ ເບິ່ງເອົາ
ຂຽນເມື່ອ ຂຽນເມື່ອ: ທ.ວ.. 3, 2009 | ມີ 13 ຄຳເຫັນ ແລະ 0 trackback(s)

 

ບານເຕະຄູ່ເປີດສະຫນາມ ທີ່ແຂ່ງຂັນກັນ ໃນວັນທີ 2 ທັນວາ ທີ່ຜ່ານມາ

ຄູ່ທີ 1 ມາເລ ພົບ ຕີມໍ

ຄູ່ທີ່2 ໄທ ພົບ ຫວຽດນາມ

ພາບຈາກ ເວັບໄຊ ສ່ວນຕົວ ຂອງ ທ່ານ ສຸລິວັນ ພົມມະຈັນ

alt

alt

alt

alt

alt

 

 

 

 

ຂຽນເມື່ອ ຂຽນເມື່ອ: ພ.ຈ.. 29, 2009 | ມີ 12 ຄຳເຫັນ ແລະ 0 trackback(s)

alt

ທັດສະນະວິໄສບໍ່ຄ່ອຍດີເລີຍ ຂັບລົດຕ້ອງ ເປີດຕາໄຟ ຢ້ານຄົນມາຕຳ

alt

ເຫັນຕາເວັນຄືກັນ ແຕ່ຕາເວັນມື້ນີ້ອັບແສງ

alt

ຫນອງນ້ຳຫງຳມື້ນີ້ ົທົ່ວຫນ້ານ້ຳມີຄວັນລອຍ

ຂຽນເມື່ອ ຂຽນເມື່ອ: ພ.ຈ.. 24, 2009 | ມີ 23 ຄຳເຫັນ ແລະ 0 trackback(s)

ຊຽງຂວາງ ຍາມນີ້ ກໍ່ເປັນຍາມຫນາວ. ໂພນສະຫວັນ ເປັນເມືອງເອກ ຊື່ເປັນທາງການແມ່ນເມືອງແປກ ສ່ວນໂພນສະຫວັນ ກາຍເປັນຊື່ບ້ານ.

ໂພນສະຫວັນ ເປັນເມືອງຢູ່ພື້ນທີ່ສູງ ສູງຈາກນ້ຳທະເລ ປະມານ 1000 ແມັດ. ລ້ອມຮອບດ້ວຍພູຫົວໂລ້ນ ພາໃຫ້ລົມພັດຜ່ານງ່າຍ

ພາສາມົ້ງ ເຂົ້າໃຈວ່າເປັນພາສາທາງການ ພາສາທີ2 ຂອງທີ່ນີ້ (ເດົາເອົາ) ເພາະ ໄປທາງໃດ ກໍ່ໄດ້ຍິນແຕ່ເຂົາລົມກັນພາສານີ້ (ພະນັກງານໄປສະນີ ແລະ ພະນັກງານທະນາຄານ ແມ່ນສາມາດບໍລິການລູກຄ້າ ເປັນພາສາມົ້ງ ເຫັນມາກັບຕາ)

ດິສໂກເທັກ ຂອງຄົນມົ້ງ ກໍ່ມີ ມີຄືກັບເທັກຢູ່ວຽງຈັນ ພຽງແຕ່ ຜູ້ໃຫ້ບໍລິການ ປາກພາສາມົ້ງ ນັກຮ້ອງກໍ່ຮ້ອງເພງພາສາມົ້ງ (ບາດເທັກຄົນລາວ ພັດບໍ່ຄ່ອຍມີເພງລາວໃຫ້ຟັງ)

ຍາມນີ້ ກໍ່ເປັນຍາມບຸນກິນຈຽງ ທາງການແຂວງ ເພິ່ນຈັດຍິ່ງໃຫຍ່ ຈັດໃສ່ runway ຂອງເດີ່ນບິນເກົ່າ ຫລາຍຄົນບອກວ່າ ບຸນທາດຫລວງກັບບຸນກິນຈຽງ ຢາກວ່າ ຄົນຫລາຍເກືອບຊ່ຳກັນ

ຂ້າພະເຈົ້າຈະພາທ່ານ ໄປເບິ່ງບຸນກິນຈຽງ

ກ່ອນອື່ນ ພາໄປຕະຫລາດຈີນກ່ອນ ເພື່ອເລືອກເບິ່ງແຟຊັນ ເສື້ອຜ້າຂອງສາວລາວມົ້ງ ເຊິ່ງນັກອອກແບບ ໄດ້ເຮັດໄວ້ກຽມຕ້ອນຮັບບຸນກິນຈຽງ

ແບບເສື້ອຜ້າຍິງສາວ

alt

ໄດ້ຖາມທາງຜູ້ຂາຍວ່າ ຊຸດຫນຶ່ງ ລາຄາຫລາຍປານໃດ ແຕ່ຂ້າພະເຈົ້າເປັນຄົນຂີ້ລືມ ບໍ່ຄ່ອຍມັກຈື່ຈຳລາຍລະອຽດ ປະມານວ່າແພງສົມຄວນ

ໄດ້ເສື້ອຜ້າແລ້ວກໍ່ໄປກັນເລີຍ

alt

alt

ໃນງານບຸນ ກໍ່ມີການຕັ້ງຜາມຂາຍເຄື່ອງ ຈາກຫລາຍພາກສ່ວນ ສ່ວນໂທລະຄົມ, ເຄື່ອງໄທ ຄ້າຍໆກັບຢູ່ໄອເທັກ, Moneygram ບໍລິການຝາກໂອນເງິນ ທີ່ແຕກຕ່າງ ແມ່ນ ມີຮ້ານຖ່າຍຮູບ ສຳລັບໃຫ້ສາວໆທີ່ແຕ່ງໂຕມາດີ ໄດ້ບັນທຶກຮູບໄວ້ ຂຽນປ້າຍເປັນສອງພາສາ (ກຳລັງຫາວິທີຮຽນອ່ານພາສາມົ້ງຢູ່ ຄືກັນ)

alt

alt

ຮູ້ສຶກວ່າ ຄົນທີ່ມາບຸນນີ້ ຈະມາຈາກ ຫລາຍເມືອງ ແລະ ມາຈາກຕ່າງປະເທດກໍ່ມີຫລາຍ

ບາດນີ້ ມາໂຫຍ້ນຫມາກຄອນກັນໃຫ້ມ່ວນໆ ຟັງສຽງຂັບລຳໄປນຳ ລົມກັນໄປນຳ

alt

ບ່າວສາວ ທີ່ພົບກັນໃນມື້ນີ້ ຫລາຍຄູ່ຈະໄດ້ໃຊ້ຊີວິດຮ່ວມກັນໄປຕະຫລອດຊີວິດ

ຂໍຈົບການບັນຍາຍພຽງເທົ່ານີ້ ຜິດພາດປະການໃດ ຂໍອະໄພດ້ວຍ

ຂຽນເມື່ອ ຂຽນເມື່ອ: ພ.ຈ.. 12, 2009 | ມີ 12 ຄຳເຫັນ ແລະ 0 trackback(s)

ຕຳນານ ກ່ຽວກັບ ຈີ່ນາຍໂມ້
ຍັງມີການຖົກຖຽງກັນຢູ່ກ່ຽວກັບຊື່ຂອງແມງທີ່ຫາກິນໃຕ້ດິນ ຫລືນັກຮ້ອງໃຕ້ດິນ  ທີ່ເສີບເປັນຈານ ໃນຮ້ານເບຍ
ຫລາຍທ້ອງຖິ່ນ ກໍ່ເອີ້ນຕ່າງກັນ ລະຫວ່າງ ຈີ່ນາຍ ຈີ່ຫລໍ່ ຈີ່ຫລີດ 
ສຳລັບບ້ານຂ້ອຍ ເຂດສວນມອນ ເອີ້ນມັນວ່າຈີ່ນາຍ 
ຊື່ຈີ່ນາຍຍັງເປັນຊື່ຂອງຄ້າຍທະຫານສະໄຫມລະບອບເກ່ົາ ຊຶ່ງຮູ້ຈັກກັນໃນນາມຄ້າຍຈີ່ນາຍໂມ້ ດຽວນີ້ ເພິ່ນເອີ້ນວ່າວິທະຍາຄານໄກສອນພົມວິຫານ ຕັ້ງຢູ່ຖະຫນົນສາຍທ່າເດື່ອ ປະມານກິໂລແມັດທີ7 

ຄຳວ່າໂມ້  ໃນຄຳເວົ້າພາສາລາວແລະໄທ ມີຄວາມຫມາຍວ່າ ເວົ້າເກີນຄວາມຈິງ ແລະ ຜູ້ທີ່ມັກເວົ້າເກີນຄວາມເປັນຈິງ ເພິ່ນເອີ້ນວ່າ ຄົນຂີ້ໂມ້

ຄັນຊັ້ນ ຈີ່ນາຍໂມ້ ກະແປວ່າ ຈີ່ນາຍເວົ້າເກີນຄວາມຈິງ ລະຕີ

ຈີ່ນາຍໂມ້ ຕາມຕຳນານແລ້ວ ແມ່ນຈີ່ນາຍທີ່ມີຂະຫນາດໃຫຍ່ ເກີນທຳມະດາປະມານວ່າຊ່ຳຂະຫນາດ ຂອງລົດໄຖນາພຸ້ນລະ  ຂະຫນາດວ່າມີຜູ້ຊາຍຜູ້ຫນຶ່ງ ມາດຶງຂາຊ້າຍຂອງມັນ ມັນຍັງໃຊ້ຂາ ດີດຜູ້ຊາຍຜູ້ນັ້ນ ກະເດັນ ສິບກິໂລແມັດ  

ບ່ອນທີ່ຊາຍຜູູ້ນັ້ນດຶງຂາມັນ ເອີ້ນວ່າ ຈີ່ນາຍໂມ້ ມາຮອດດຽວນີ້ ແລະ ບ່ອນທີ່ຊາຍຜູ້ນັ້ນກະເດັນໄປຕົກ (ລາວໄດ້ຂາຊ້າຍຂອງຈີ່ນາຍໄປພ້ອມ ) ເອີ້ນວ່າດອນຂາຊ່້າຍຮອດດຽວນີ້ , ດອນຂາຊ້າຍ ແມ່ນບໍລິເວນ ທ່າເດື່ອ ຫລື ກິໂລແມັດ ທີ 20

ຮູບປັ້ນຂອງຈີ່ນາຍໂມ້ ມີໃຫ້ເຫັນ ຢູ່ວັດຊຽງຄວັນ ແລະ ວັດຈອມເພັດ 
ຮູບນີ້ມາຈາກວັດຈອມເພັດ 

alt

alt

ຂຽນເມື່ອ ຂຽນເມື່ອ: ພ.ຈ.. 5, 2009 | ມີ 19 ຄຳເຫັນ ແລະ 0 trackback(s)

ທີ່ມາ: ເລື້ອງລາວອາຖັນ ຂອງ ຜາທໍ້ຫນໍ່ຄຳ  
My Community > General Category > ສົນທະນາປະສານັກພະເນຈອນ
ຊົນເຜົ່າໄທແດງ
ເຜົ່າໄທແດງ ແມ່ນມີຖິ່ນຖານຢູ່ ເມືອງແຖງ ເຊິ່ງປະຈຸບັນແມ່ນ ເມືອງດຽນບຽນຟູໃນປະເທດຫວຽດນາມ. ເຜົ່າໄທແດງໄດ້ອົບພະຍົບມາຕັ້ງຖິ່ນຖານຢູ່ບ້ານ ນາກາງ ເມືອງເຟືອງ ແຂວງວຽງຈັນ ເມື່ອ 100 ປີຜ່ານມາ. ໃນເບື້ອງຕົ້ນ ມີພຽງ 6 ຄອບຄົວ ດຽວນີ້ມີຮອດສາມຮ້ອຍຄອບຄົວ ຫນຶ່ງໃນນັ້ນມີຄອບຄົວຂອງ ສະຫາຍ ບິ້ງ ຈິ່ງບ່າວໂຮມ ພະນັກງານ ຫ້ອງການເຕັກນິກ ກຕຟ
alt

ຜາທໍ້ຫນໍ່ຄຳ
ຖ້າທ່ານໄດ້ໄປເມືອງເຟືອງ ບໍລິເວນສາມແຍກ ບ້ານທ່າ ທ່ານຈະແນມເຫັນ ຜາທີ່ລັກສະນະ ເປັນກອງດິນສວດ ຄ້າຍກັບຜາຕັ້ງວັງວຽງ, ໃນຍາມແລງ ຖ້າແນມຂຶ້ນໄປ ຈະມີແສງເຫລື້ອມ ອັນເປັນແສງຂອງຕາເວັນຍາມແລງ ກະທົບໃສ່ກັບຫນໍ່ຄຳ ຢູ່ຈອມຜາ, ເພິ່ນວ່າ ຫນໍ່ຄຳນີ້ ມີຂະຫນາດ ເທົ່າກະຟູຍ 200 ລິດ

ສາມຫມື່ນເມືອງເຟືອງ
ມີການຊ່າລືກັນກ່ຽວກັບ ຜາທໍ່ຫນໍ່ຄຳ ໄດ້ຍິນໄປຮອດບ່ອນຕ່າງໆ ພາໃຫ້ມີຄົນຫລັ່ງໄຫລມາຊົມ ແລະ ຜິປອງເອົາຫນໍ່ຄຳ. ພວກເຂົາຕັ້ງຕູບເຮັດດ້ວຍເຟືອງ ອ້ອມຕີນຜາທໍ່ ນັບຈຳນວນໄດ້ ສາມຫມື່ນຕູບເຟືອງ ເຕັມທົ່ວທົ່ງນາ. ນາບ່ອນນັ້ນ ຕໍ່ມາຈຶ່ງເອີ້ນວ່າ ນາທົ່ວ ປະຈຸປັນກາຍເປັນບ້ານ ນາທົ່ວ. ສາມຫມື່ນເມືອງເຟືອງຈຶ່ງມືຊື່ເອີ້ນ ມາຈາກ ສາມຫມື່ນຕູບເຟືອງ ນັ້ນເອງ
alt

ທາດຫລົງເຈົ້າ
ໃນຈຳນວນ ສາມຫມື່ນຕູບເຟືອງ ມີເຈົ້າຊາຍອົງຫນຶ່ງ. ພະອົງສັ່ງໃຫ້ ຜູ້ຕົນຕັດໄມ້ມາເຮັດຂັ້ນໄດ ກ່າຍໄປຈອມຜາ, ເມື່ອເຮັດແລ້ວ ພະອົງເປັນຜູ້ທຳອິດທີ່ປີນຂຶ້ນ ສ່ວນຜູ້ຄົນອື່ນໆກໍ່ປີນນຳຫລັງໄປ.
ແຕ່ວ່າ ບາດປີນໄປໄດ້ຫມໍ່ຈະຮອດຈອມ ແນມລົງມາ ເຫັນວ່າຂັ້ນໄດ ໄມ້ໄຜ່ ກາຍເປັນງູໃຫຍ່ ສ່ວນຕອກມັດ ກາຍເປັນຂີ້ເຂັບ.
ຄົນທີ່ພວມປີນ ພາກັນຕີຂ້າຂີ້ເຂັບແລະງູ ຈົນພາໃຫ້ຂັ້ນໄດຫັກ ຜູ້ຄົນຕົກລົງມາຕາຍ ນັບທັງເຈົ້າຊາຍ. ຜູ້ຄົນຢູ່ທາງລຸ່ມ ພາກັນກໍ່ທາດໃຫ້ກັບເພິ່ນ ໂດຍປັນເອົາປູນຄ້ຽວຫມາກນຳແຕ່ລະຄົນ ຜູ້ລະເລັກລະນ້ອຍ ຕ້ອຍໃສ່ໃບພູຄຳຫມາກ ໄດ້ມາຈັກຫນ້ອຍຈັກຫລາຍ ກໍ່ໄດ້ທາດອົງຫນຶ່ງ ໃສ່ຊື່ວ່າທາດຫລົງເຈົ້າ ຍັງມີໃຫ້ເຫັນຢູ່ທຸກມື້ນີ້. ຜູ້ຄົນທີ່ກາຍໄປທາງນັ້ນ ຖ້າບໍ່ປົດຫມວກ ຈະມີອັນເປັນໄປທັນທີ. ດຽວນີ້ ບໍ່ຄ່ອຍເປັນຫຍັງແລ້ວ ຂໍແຕ່ຢ່າລົບຫລູ່ເພິ່ນ
alt

ຄົນຝລັ່ງຢາກໄດ້ຫນໍ່ຄຳ
ໃນເວລາຝລັ່ງເສດເຂົ້າມາຍຶດຄອງລາວ, ນາຍຝລັ່ງຜູ້ຫນຶ່ງໄດ້ສຳຫລວດເຂົ້າໄປພົບ ກັບຫນໍ່ຄຳ ແລະ ເກີດຢາກໄດ້ ເລີຍສ່ອງກ້ອງເບິ່ງຈຸດດີແລ້ວ ຈຶ່ງໃຊ້ປືນຍິງໃສ່ ບໍ່ພໍຄາວ ລາວກໍ່ເຈັບທ້ອງຢ່າງແຮງ , ພວກກູລີ ຫາມນຳສົ່ງໄປວຽງຈັນ ແຕ່ໄປບໍ່ພໍເທົ່າໃດກໍ່ໃຈຂາດ ແລະ ຝັງໄວ້ແຖວນັ້ນ. 
alt

ຄົນອາເມລິກາຢາກໄດ້ຫນໍ່ຄຳ
ເມື່ອອາເມລິກາເຂົ້າມາເຮັດສົງຄາມໃນລາວ ເມືອງເຟືອງກາຍເປັນສະຫນາມບິນ ທີ່ມີຍົນຫລາຍຊະນິດຂຶ້ນລົງໄດ້, ຄົນອາເມລິກາ ໄດ້ເອົາຍົນບິນໄປໃກ້ໆ ກັບຫນໍ່ຄຳ ເພື່ອສັງເກດການແລະວາງແຜນເພື່ອຫາວິທີເອົາຄຳ. ເມື່ອຍົນຫຍັບເຂົ້າໃກ້ ຍົນກໍ່ມີອາການຂັດຂ້ອງ ບໍ່ສາມາດບິນຕໍ່ໄດ້ ນັກບິນເລີຍເອົາຍົນກັບໄປ
alt

ຄົນໂຊວຽດຢາກໄດ້ຫນໍ່ຄຳ
ຄົນໂຊວຽດເຂົ້າມາລາວໃນໄລຍະສ້າງສາປະເທດຊາດຫລັງສົງຄາມ ເພື່ອຊ່ວຍສຳຫລວດແຮ່ທາດ ສຳຫລວດແຜນທີ່. ນັກວິຊາການໂຊວຽດ ໄດ້ຕອກຫລັກເຈາະດິນ ອ້ອມໆຜາທໍ່ ເພື່ອວິໄຈດິນ. ຈາກນັ້ນ ກໍ່ເຮັດຫົນທາງຂຶ້ນໄປຫາຫນໍ່ຄຳ, ເມື່ອຂຶ້ນໄປ ໄດ້ເຄິ່ງທາງ ພົບວ່າມີງູໃຫຍ່ ມາລັດທາງ. ດັ່ງນັ້ນ ພວກໂຊວຽດ ພາກັນໄລ່ງູຈົນເມື່ອຍ ແຕ່ງູກໍ່ບໍ່ໄປ, ຈຶ່ງພາກັນນັ່ງລົງໂງ່ນຫີນ ບໍ່ພໍຄາວໂຊວຽດຜູ້ທີ່1 ລົ້ມລົງຕົກໂງ່ນຫີນຄໍຫັກເສຍຊີວິດທັນທີ, ຈາກນັ້ນຜູ້ທີ2 ກໍ່ເປັນແບບດຽວກັນ ພວກໂຊວຽດ ເລີຍພາກັນເອົາສົບກັບລົງມາ
alt

ເລື້ອງທັງຫົມດຜູ້ຂ້າໄປຟັງມາຈາກ ເຮືອນດີ ທີ່ບ້ານທ່າ ຕອນໄປສົ່ງສະການພໍ່ສະຫາຍ ບິ້ງ ຈິ່ງບ່າວໂຮມ.
ຟັງແລ້ວແປຈາກພາສາໄທແດງອີກເທື່ອຫນຶ່ງ ມີຫລາຍຄຳທີ່ຟັງບໍ່ອອກ

ຂຽນເມື່ອ ຂຽນເມື່ອ: ພ.ຈ.. 2, 2009 | ມີ 10 ຄຳເຫັນ ແລະ 0 trackback(s)

ອັນນີ້ແມ່ນເລື້ອງເກົ່າ ຈາກ http://forum.pnomsin.com/index.php?topic=942.0 12-02-2008

ເອົາມາໂພສໃຫມ່ ປັນພີ່ນ້ອງພັນລາວ 

ຂ້າພະເຈົ້າວາງແຜນເດີນທາງໄປແຂວງຈຳປາສັກ
ຫລັງຈາກກຳນົດວັນເດີນທາງຮຽບຮ້ອຍແລ້ວ ກໍ່ເຂົ້າໄປເວັບໄຊຂອງການບິນລາວ
ເຫັນວ່າມີຖ້ຽວບິນໄປປາກເຊທຸກເຊົ້າ ເລີຍວາງແຜນໄປທາງຍົນ
ຫລັງຈາກສົ່ງແຜນງານໃຫ້ຝ່າຍບໍລິຫານ ເພິ່ນກໍ່ແຈ້ງບອກວ່າ ຍົນເຕັມທຸກຖ້ຽວ
ສົງໄສເປັນຍ້ອນເທດສະການກຸດຈີນ

ບໍ່ເປັນຫຍັງຫຍັບການເດີນທາງໃຫ້ໄວຂຶ້ນກໍ່ໄດ້ ໂດຍການຂີ່ລົດເມ VIP
ອອກເດີນທາງຕອນແລງ ຕອນເຊົ້າກໍ່ຮອດປາກເຊ
ຕົກລົງຈະເດີນທາງໄປປາກເຊ ດ້ວຍລົດເມ
ເຄີຍເດີນທາງແບບນີ້ມາຫລາຍເທື່ອແລ້ວ
ພໍດີທ່ານ ”ບ່າວປາກເຊ” ເພິ່ນຮູ້ເຂົ້າ ເລີຍໃຫ້ເບີໂທ ສຳລັບຈອງບ່ອນນັ່ງລົດເມ
ແລະ ໄດ້ໂທຈອງລ່ວງຫນ້າຮອດ 2ມື້ ກ່ອນອອກໄປຄິວລົດກໍ່ໂທອີກເພື່ອແນ່ໃຈວ່າມີລົດແນ່ນອນ
ຢ້ານວ່າລົດຈະເຕັມຄືກັນກັບຍົນ

ໄປຮອດຄິວລົດ ເຂົາຖາມມາວ່າຈອງໄວ້ຫລືບໍ່ ຊື່ຫຍັງ ປີ້ລົດເມ ບໍລິສັດຈິດປະສົງ ລາຄາ 150000 ກີບ
ໃນປີ້ລົດຂຽນ ເລກບ່ອນນັ່ງ ຫມາຍເລກ 2, ເລກລົດ, ແລະ ບໍລິການຕ່າງໆ ທີ່ຈະໄດ້ຮັບ ເຊັ່ນ ເຂົ້າຫນົມອົມ, ນ້ຳດື່ມ, ອາຫານ ແລະ ຜ້າເຢັນ
ໄຄແດ່ທີ່ໄດ້ຈອງໄວ້ ເພາະມີຫລາຍຄົນຍັງຫລັ່ງໄຫລມາຖາມຊື້ປີ້ ປະກົດວ່າປີ້ລົດໄປປາກເຊ ບໍ່ເຫລືອແລ້ວ

ເມື່ອຕອນຂຶ້ນເມ ປີນຂຶ້ນໄປຊັ້ນ 2 ບ່ອນນັ່ງຫນ້າສຸດ
ໂທ້ເອີຍ ບໍ່ມີຮອດບ່ອນສິປ່ອນຂາ ມີບ່ອນນັ່ງເກືອບຕິດກັບໂຕະທາງຫນ້າແວ່ນລົດ ທີ່ເຂົາເອົາກະເປົາມາວາງໄວ້
ເວລານັ່ງ ຕ້ອງຍົກຂາມາພາດໄວ້ໂຕະຫນ້າລົດ
ບ່ອນນັ່ງຂອງລົດຄັນນັ້ນ ບໍ່ມີຮອດສາຍແອວ ຖ້າມີເຫດລົດຢຸດກະທັນຫັນ ຂ້າພະເຈົ້າຄົງໄດ້ລອຍທະລຸແວ່ນລົດ ປິວລົງໄປກອງຢູ່ຖະຫນົນເບື້ອງຫນ້າລົດ

ຂ້າພະເຈົ້ານັ່ງຫ່າງຈາກຈໍໂທລະທັດຂອງລົດ ບໍ່ເຖິງ1ແມັດ
ຕອນກ່ອນລົດຈະອອກ ເພິ່ນເປີດເພງລາວ ຕອນລົດແລ່ນອອກໄປແລ້ວ ເພິ່ນມອດໄຟແລະສາຍຫນັງ ສາຍບໍ່ຈົບດອກ ເພິ່ນມອດກ່ອນ ເພາະຫລາຍຄົນນອນແລ້ວ

ມາຕື່ນກັນອີກເທື່ອຫນຶ່ງ ຕອນ1ໂມງ ລົດຈອດຢູ່ທ່າແຂກ ເປັນເວລາ 10-15 ນາທີ
ຈາກນັ້ນ ກໍ່ເດີນທາງຕໍ່ 5 ໂມງເຊົ້າ ລົດໄຕ້ໄຟ ເປີດເພງ ແລະ ແຈກຜ້າເຢັນ
6 ໂມງໂດຍປະມານ ກໍ່ຈອດຢູ່ສາລາຄຳ ແຄມນ້ຳເຊໂດນ

ທີ່ຄິວລົດ, ລົດສາມລໍ້, ຕຸກຕຸກ, ຈຳໂບ້ ທະຍອຍພາຜູ້ໂດຍສານຈາກໄປ
ຂ້າພະເຈົ້າ ຂຶ້ນລົດກະບະຂອງທ່ານຮອງຫົວຫນ້າສາຂາພາກໃຕ້ ເພັດສະຫມອນ ມຸ້ງຫນ້າເຂົ້າໃນເມືອງ ແລະ ມາຢຸດທີ່ໂຮງແຮມແສງອາລຸນ
ໂຮງແຮມສີ່ຊັ້ນປຸກໃຫມ່ກາງໃຈກາງເມືອງ ຕົບແຕ່ງຕາມແບບຈີນ ອາດຈະຈັດສະເພາະຊ້ວງກຸດຈີນກໍ່ໄດ້
ທີ່ຫນ້າທາງເຂົ້າ ເພິ່ນເອົາຕຸກະຕາປຸມເປົ້າຂະຫນາດເທົ່າໃຫຍ່ກວ່າຄົນ ແຕ່ງຕົວແບບຈີນບູຮານມືຈັບກ້ອນຄຳ ມາຢືນຢູ່
ດ້ານໃນ ຂ້າງ ເຄົາເຕີ ມີຮ້ານເສັ້ນໄຫວ້ ວາງຢູ່ພື້ນ ມີຫມາກໄມ້ແລະຂະຫນົມ ໃນອາຄານເປີດເພງດົນຕີພື້ນເມືອງຈີນ

ໄດ້ຫ້ອງທີ່ຫ້ອງພັກ ຊັ້ນສາມ ມີລິບໃຫ້ໃຊ້ຂຶ້ນລົງ ຫ້ອງນອນມີບ່ອນສຽບກາດກະແຈເພື່ອໄຕ້ໄຟ ມີຕູ້ເຢັນ ໂທລະທັດ ແອເຢັນ ນ້ຳອຸ່ນ
ແຂກສ່ວນຫລາຍເປັນນັກທ່ອງທ່ຽວມາຈາກໄທ

ລະຫວ່າງເດີນທາງຈາກໂຮງແຮມ ໄປຫາສຳນັກງານກຕຟ ບັງເຢາະ ລົດແລ່ນຜ່ານ ຕະຫລາດດາວເຮືອງທີ່ບໍ່ໄດ້ເຫັນ1ປີມາແລ້ວ
ຫນ້າຕະຫລາດ ມີການຕຶກຫ້ອງແຖວເກີດລຽນຢາຍກັນຈົນສຸດທາງ
ຂ້າງທາງເຂົ້າຂົວ ກຳລັງສ້າງຕຶກສູງ ທີ່ຈະກາຍເປັນໂຮງແຮມ
ກາຍມາອີກທີ່ຫນ້າໂຮງແຮມສົມຫວັງ ກໍ່ເຫັນອາຄານສູງ ທີ່ຈະກາຍເປັນໂຮງແຮມອີກ 1 ແຫ່ງ
ເຫັນມີແຕ່ການກໍ່ສ້າງ

ທີ່ບັງເຢາະ ອາຄານທີ່ເຄີຍໃຊ້ເປັນສຳນັກງານໂຄງການຂອງຟຟລ ໄດ້ຖືກໂອນມາໃຫ້ກຕຟ ແລະ ກຳລັງຖືກຕໍ່ເຕີມໃຫມ່
ອາຄານສອງຫລັງຖືກດັດແປງໃຫ້ກາຍເປັນຫລັງດຽວ ເພິນ່ມີແຜນເຂົ້າໄປຢູ່ໃນປິໃຫມ່ລາວ
ຕອນນີ້ ພະນັກງານກຕຟພາກໃຕ້ທັງຫມົດ ໃຊ້ຫ້ອງການຂອງໂຮງງານເສົາປາກເຊ ຊາມຊາຫ້ອງການສາຂາສ້າງສຳເລັດ

ຕອນເຊົ້າຂ້າພະເຈົ້າເຮັດວຽກກັບກຕຟ ສ່ວນຕອນບ່າຍ ເຮັດວຽກກັບຟຟລ ສາຂາຈຳປາສັກ
ອາຄານໄຟຟ້າຈຳປາສັກ ມີການປ່ຽນແປງເລັກນ້ອຍ ການຕໍ່ເຕີມອາຄານ ເຮັດສຳເລັດແລ້ວ
ຫ້ອງການພະແນກເຕັກນິກ ຍ້າຍລົງມາຢູ່ຫ້ອງປະຊຸມ
ສ່ວນຫ້ອງປະຊຸມ ຍ້າຍໄປທີ່ອາຄານຕໍ່ເຕີມໃຫມ່

ຫລັງເລີກການ ພະນັກງານຟຟລ ພາຂ້າພະເຈົ້າໄປຮ້ານເບຍຮ້ານຫນຶ່ງ ຊື່ວ່າຕົ້ນຕານຄູ່
ມັນກໍ່ຢູ່ຄິວລົດຈິດປະສົງ ບ່ອນສາລາຄຳ ບ່ອນນ້ຳເຊໂດນປ່ອງໃສ່ນ້ຳຂອງ
ຢູ່ບ່ອນຫັ້ນ ມີຮ້ານເບຍຫລາຍຮ້ານຕິດກັນ
ຕົ້ນຕານຄູ່ ເປັນຊື່ຮ້ານເພາະມີຕົ້ນຕານເຕ້ຍໆສອງຕົ້ນຕິດກັນ ປູກຢູ່ຫນ້າຮ້ານ
ຮ້ານດັງກ່າວ ໃນມື້ນັ້ນ ຄົນເຂົ້າຫລາຍເປັນພິເສດ ກໍ່ຄົງເປັນເພາະເທດສະການກຸດຈີນອີກນັ້ນລະ
ມີສາວເບຍລາວ ແລະ ຄາລສເບີກ ກໍ່ພາກັນມາບໍລິການ ສາວ tigo ກໍ່ມີ

ອອກຈາກຕົ້ນຕານຄູ່ ພວກເຮົາໄປຕໍ່ກັນທີ່ ກິ່ງທອງ
ຮ້ານທີ່ເປັນບ່ອນ ທີ່ຄົນໃຊ້ອວດຄວາມສາມາດໃນການຮ້ອງເພງ
ເພິ່ນເປີດ CD ຖ້າບໍ່ມີແຜ່ນກໍ່ໃຊູ້ຄອມພິວເຕີ ເປີດ nick karaoke
ມີແຂກທັງລາວແລະຕ່າງປະເທດ
ການຕົບແຕ່ງຮ້ານກໍ່ເຫັນເອົາເຄື່ອງໃຊ້ເກົ່າໆ ມາວາງໂຊ
ມີທັງພວກຄອມພິວເຕີຮ້າງ ໆ
ທີ່ແປກກວ່ານັ້ນ ທາງໄປຫ້ອງນ້ຳ ຈະມີຄຳຂວັນ ຫລື ຄະຕິເຕືອນໃຈຂຽນໄວ້ເຕັມຝາ
ເນື້ອໃນຂອງຄຳຂວັນ ແມ່ນບໍ່ຢາກໃຫ້ຄົນເມົາແລ້ວຕີກັນ

ອອກຈາກບ່ອນນັ້ນແລ້ວ ພັກພວກທີ່ເຫລືອ ຊວນກັນໄປຕໍ່ທີ່ ເທັກເປີດໃຫມ່ ແຖວຫລັກ2
ແຕ່ໄປເທັກໂດຍບໍ່ມີຄູ່ ຄືວ່າບໍ່ຄັກ ເລີຍບອກໃຫ້ທ່ານບ່າວປາກເຊ ມາສົ່ງທີ່ໂຮງແຮມ

ຂຽນເມື່ອ ຂຽນເມື່ອ: ຕ.ລ.. 26, 2009 | ມີ 4 ຄຳເຫັນ ແລະ 0 trackback(s)
ໜວດໝູ່: ວິທະຍາສາດ

 ເຫັນເລື້ອຍໆ ວ່າເພິ່ນໃຊ້ຜິດໃຊ້ຖືກ ຂະຫນາດວ່າຄົນໃນວົງການໄຟຟ້າ (ພວກທີ່ເຮັດວຽກບໍ່ກ່ຽວກັບເຕັກນິກ) ຍັງບໍ່ເວັ້ນ ແລ້ວຄົນນອກ ສິບໍ່ຜິດໄດ້ແນວໃດ? ດັ່ງນັ້ນ, ຂໍອະນຸຍາດ ອະທິບາຍ ຄວາມແຕກຕ່າງ ລະຫວ່າງ ກິໂລໂວນ ແລະ ກິໂລວັດ. ໄຟແຮງຕ່ຳ ແຮງກາງ ແລະ ແຮງສູງ ແມ່ນກຳນົດເປັນ ກວ ແປວ່າ ກິໂລໂວນ. 1 ກິໂລໂວນ ເທົ່າກັບ 1000 ໂວນ

dsc01987.JPG

ທີ່ເຫັນໃນຮູບແມ່ນເພິ່ນໃຊ້ຜິດ 

ໄຟແຮງຕ່ຳ 1 phase 2 wire = 230 V

ໄຟແຮງຕ່ຳ 3 phase 4 wire = 400 V ເອີ້ນໄດ້ອີກວ່າ 0.4 kV (kilovolt)

ໄຟແຮງກາງ 22,000 V ຫລື 22 kV (kilovolt)

ໄຟແຮງສູງ 115,000 V ຫລື 115 kV (kilovolt)

ໄຟແຮງສູງ ໃນປະຈຸບັນຢູ່ລາວ ນອກຈາກ 115 kV (kilovolt) ຍັງມີ 230 kV (kilovolt) ແລະ 500 kV (kilovolt)

ສ່ວນ ກິໂລວັດ ນັ້ນ ບໍ່ຄ່ອຍເຫັນໃນຂ່າວປານໃດ ເພິ່ນຈະໃຊ້ ຄຳວ່າເມກາວັດ ເປັນສ່ວນໃຫຍ່

1 MW (ເມກາວັດ) = 1000 kW (ກິໂລວັດ) = 1,000,000 W (ວັດ)

ເມກາວັດ ສ່ວນໃຫຍ່ເຫັນເພິ່ນໃຊ້ກັບກຳລັງຂອງເຂື່ອນ

wattage ແມ່ນກຳລັງ ສ່ວນ voltage ແມ່ນແຮງດັນ

ຄຳວ່າ ກິໂລວັດໂມງ ແມ່ນພົບເລື້ອຍຄືກັນ ມັນແມ່ນພະລັງງານທີ່ຊື້ຂາຍໄດ້ ພວກເຮົາຈ່າຍຄ່າໄຟຟ້າ ກໍ່ອີງໃສ່ ຈຳນວນ ກິໂລວັດໂມງທີ່ຂຽນໃນໃບບິນ

ຈື່ໄວ້ວ່າ ຖ້າເວົ້າເຖິງຕາຂ່າຍສາຍສົ່ງ ແມ່ນແທກເປັນ ກິໂລໂວນ, ຖ້າເວົ້າເຖິງເຂື່ອນ ແມ່ນແທກເປັນ ເມກາວັດ 

VA= volt ampere ໃຊ້ກັບກຳລັງລວມ ຂອງຫມໍ້ແປງ 

1 kVA = 1000 VA 

ກຳລັງລວມ S= ກຳລັງແທ້ P+ກຳລັງທຽມ Q

P ແທກເປັນ W (watt)

Q ແທກເປັນ Var 

S ເປັນ VA 

P = S * cos(Phi)

cos(phi)= 0.7 ໂດຍປະມານ 

----------------------------

ທີ່ມາ: ເອົາມາຈາກ http://www.pnomsin.com/?p=50

www.pnomsin.com ເວັບໄຊ ທີ່ໃຫ້ຄວາມຮູ້ເລື້ອງໄຟຟ້າ 

ຂຽນເມື່ອ ຂຽນເມື່ອ: ມ.ສ.. 19, 2009 | ມີ 32 ຄຳເຫັນ ແລະ 0 trackback(s)

ພາບມາຈາກ ບ້ານ ສະຜ່າຍ

ປາຫຍັງກະບໍ່ຮູ້ຊື່ ຖາມຄົນແຖວ ບ້ານ ກະວ່າບໍ່ເຄີຍເຫັນ ເບີ່ງແບບນື່ງກະຄືປານິນ, ທີ່ເຫັນແຕ່ຫົວ ເພາະວ່າໄປບໍ່ທັນ ເພີ່ນຕັດເອົາສ່ວນ ໂຕໄປເຮັດສົ້ມແລ້ວວ່າຊັ້ນ ກະຍັງເລີຍແຕ່ຫົວ ເຈົ້າຂອງເພີ່ນວ່າ ບາດຕອນຊິຕົ້ມສ່ວນຫົວເຫັນແຂ້ວເລີຍບໍ່ຕົ້ມຊ້ຳ ຊາວບ້ານພາກັນໄປເບີ່ງຫລາຍສົມຄວນ ຄືຊິບໍ່ແມ່ນໄປຂໍເລກຕິເບາະ ແຮ ໆ  Grin

alt

ທີ່ມາ

ຊຸມຊົນຄົນໃນວົງການໄຟຟ້າ > Internet/e-mail > ບົດຄວາມ ພາບຖ່າຍ ວິດີໂອ ຈາກອິນເຕີເນັດ ເອົາມາຕ້ອນກັນ (Moderator: tue) > ປາ

 

ຂຽນເມື່ອ ຂຽນເມື່ອ: ມ.ນ.. 25, 2009 | ມີ 25 ຄຳເຫັນ ແລະ 0 trackback(s)
ໜວດໝູ່: ຄວາມຮັກ

alt

ແມ່ເຖົ້່າຂີຢາ ເຂົ້າອິນເຕີເນັດເພື່ອລົມບ່າວ

ພໍ່ເຖົ້າຂີ້ເຫລົ້າ ເຂົ້າອິນເຕີເນັດເພື່ອລົມສາວ

ແລ້ວ ຄວາມຈິງໃຈຂອງຄົນໃນເນັດ ມີຢູ່ຫລືບໍ່

ຂຽນເມື່ອ ຂຽນເມື່ອ: ມ.ນ.. 13, 2009 | ມີ 18 ຄຳເຫັນ ແລະ 0 trackback(s)
ໜວດໝູ່: ຄວາມຮັກ

ເມື່ອກ່ອນມີເມືອງໜອງຫານ ຫຼື ເມືອງທິຕານະຄອນ ມີພະຍາຂອມ ເປັນຜູ້ປົກຄອງ ບ້ານ ເມືອງ ຊຸ່ມເຢັນເປັນສຸກ ແຕ່ດົນມາ ກໍ່ເກີດຍຸກທີ່ຫຍຸ້ງຍາກລຳບາກຍາກເຂັນ ບ້ານເມືອງເກີດແຫ້ງແລ້ງ 8 ປີ 8 ເດືອນ ເພາະພະຍາແຖນຄຽດ ທີ່ປະຊາຊົນບໍ່ເຮັດບຸນບັ້ງໄຟ ຈື່ງບັນດານໃຫ້ເກີດແຫ້ງແລ້ງ. ດັ່ງນັ້ນ ພະຍາຂອມຈຶ່ງໄດ້ປ່າວປະກາດ ໃຫ້ປະຊາຊົນເຮັດບຸນບັ້ງໄຟ ເພື່ອຈູດຖວາຍບູຊາພະຍາແຖນ ໂດຍຈັດໃຫ້ມີການແຂ່ງຂັນ ສຳລັບພະຍາຂອມ ໄດ້ເຮັດບັ້ງໄຟທີ່ໃຫ່ຍກ່ວາໝູ່ ຊຶ່ງເອີ້ນວ່າ: ” ບັ້ງໄຟແສນ” ໃນຖານະເຈົ້າພາບ ແລະປະກາດໃຫ້ຫົວເມືອງຕ່າງໆ ມາຮ່ວມແຂ່ງຂັນໃນວັນເພັງເດືອນ 6. ທ້າວຜາແດງ ແຫ່ງເມືອງຜາໂພງ ກໍຊາບຂ່າວການປະກາດ ຂອງພະຍາຂອມ ເຈົ້າເມືອງໜອງຫານທີ່ວ່າ ຫາກ ມີບັ້ງໄຟ ຜູ້ໃດຂື້ນສູງສຸດ ພະຍາຈະຍົກເມືອງໃຫ້ປົກຄອງເຄິ່ງໜື່ງ ແລະຍົກລູກສາວ ນາງໄອ່ຄຳໃຫ້ດ້ວຍ.

ສຽງຊ່າ ລືເລື່ອງ ບຸນບັ້ງໄຟ ແລະຄວາມຈົບງາມຂອງທິດາໄອ່ຄຳ ແຫ່ງ ເມືອງໜອງ ຫານໄດ້ແຜ່ພື ໄປຮອດ ເມືອງ ບາດານ ຊຶ່ງເຈົ້າເມືອງມີໂອລົດ ຊື່ວ່າ ທ້າວພັງຄີ ທ້າວພັງຄີ ຄິດຢາກໄດ້ ນາງ ໄອ່ຄຳ ຈຶ່ງລັກ ຂື້ນມາເມືອງ ມະນຸດ ທ້າວພັງຄີ ໄດ້ແປງເປັນກະຮອກເຜືອກ ໂດຍແຂວນເຂາະຄຳໄຕ່ຂື້ນຕົ້ນໝາກເດື່ອ ໃກ້ຊານ ເຮືອນ ຂອງນາງ ໄອ່ຄຳ. ທຸກເຊົ້າ ແລະງກະຮອກເຜືອກພັງຄີ ຈະໂດດເຕັ້ນໄຕ່ ໄປມາ ຕາມກິ່ງງ່າໄມ້ໝາກເດື່ອ ໃນ ເວລານາງໄອ່ຄຳອອກມາພັກຜ່ອນບົນຊານເຮືອນ ເຫັນກະຮອກໂດດເຕັ້ນໄປມາກໍນືກຢາກໄດ້ມາລ້ຽງ ເພາະເຫັນວ່າໜ້າຮັກດີ. ເມື່ອເຖິງເວລາ ຫຼືວ່າກຳນົດຈູດບັ້ງໄຟແຂ່ງຂັນປາກົດວ່າ ບັ້ງໄຟທີ່ຂື້ນສູງກ່ວາໝູ່ ແລະ ຊະນະເລີດ ໄດ້ແກ່ບັ້ງໄຟຂອງຊຽງຫຽນ ສ່ວນບັ້ງໄຟຂອງທ້າວຜາແດງນັ້ນ ຖືດີນປືນແຫ້ງໂພດເລີຍລະເບີດ ແລະບັ້ງໄຟຂອງພະຍາຂອມ ເມືອງໝອງຫານເອງ ເຊື້ອຂີ້ໝື້ປືນອ່ອນຈູດບໍ່ຂື້ນ ພົ່ນແຕ່ຄວັນສີດຳນານ ເຖິງສາມວັນສາມຄືນ ເປັນອັນວ່າເມືອງໝອງຫານເຄິ່ງໜື່ງ ແລະນາງໄອ່ຄຳ ຕ້ອງຕົກເປັນຂອງທ້າວຊຽງຫຽນ ຢ່າງແນ່ນອນ. ຂ່າວການຈູດບັ້ງໄຟແສນ ໄດ້ຍິນໄປທົ່ວເມືອງ ຈົນນາງໄອ່ຄຳບໍ່ສາມາດຢູ່ເຢັນເປັນສຸກໄດ້ ເພາະຕົວນາງເອງ ແມ່ນຫຼົງຮັກທ້າວຜາແດງ ມາກ່ອນແລ້ວ.

ກ່າວເຖິງທ້າວພັງຄີ ຜູ້ເປັນກະຮອກເຜືອກ ຜູ້ຫຼົງຮັກນາງໄອ່ຄຳຄືກັນ ກໍ່ຍັງວົນວຽນ ເຕັ້ນໄຕ່ໄປມານຳຕົ້ນໝາກເດື່ອນ ນາງໄອ່ຄຳ ສັ່ງໃຫ້ນາຍພານຈັບ ແຕ່ໜ້າເສຍດາຍ ທີ່ນ່າຍພານບໍ່ສາມາດຈັບເປັນໄດ້. ຈຳເປັນຕ້ອງໄດ້ຈັບຕາຍໂດຍໃຊ້ໜ້າທະນູຍິງເມື່ອ ທ້າວພັງຄີ ລູກຊາຍພະຍານາກຖືກລູກໜ້າທະນູຂອງນາຍພານ ກໍເລີຍຕົກລົງຈາກງ່າຕົ້ນໝາກເດື່ອ ກ່ອນຈະຕາຍທ້າງພັງຄີ ໄດ້ອະທິດຖານວ່າ : ຂໍໃຫ້ຊີ້ນຜູ້ຂ້າໄດ້ແປດພັນກວຽນ ຄົນທັງເມືອງກິນບໍ່ໝົດ ຈັກເທື່ອແລະ ຖ້າຫາກຜູ້ໃດກິນຊີ້ນແລ້ວ ຈະຕ້ອງຕາຍໄປເຊັ່ນດຽວກັນ. ເມື່ອທ້າວພັງຄີເສຍຊິວິດ ປະຊາຊົນເມືອງໜອງຫານ ກໍປາດຊີ້ນ ແລະ ແບ່ງປັນກັນກິນຍົກເວັ້ນແຕ່ຄອບຄົວແມ່ຮ້າງ ນາງໝ້າຍ ທີ່ຊາວ ເມືອງລັງກຽດ ເຂົາເຈົ້າບໍ່ໄດ້ສ່ວນແບ່ງຈາກຊາວເມືອງ ດັ່ງນັ້ນ ພວກແມ່ຮ້າງນາງໝ້າຍ ຈຶ່ງບໍ່ຖືກທ້າວພັງຄີ ສາບແຊ່ງ ແລະລອດຕາຍ.

ຂ່າວການຕາຍຂອງທ້າວພັງຄີ ແພ່ໄປຮອດເມືອງພະຍານາກ ພະຍານາກ ມີຄວາມຄຽດແຄ້ນ ຈຶ່ງເກນພົນທະຫານນາກ ຂື້ນມາບຸກໂຈກຕີຖະຫຼົ່ມດິນເມືອງໜອງຫານ ຈົນຫາຍລົງດິນ ແລະເກີດນ້ຳຖ້ວມ ກອງທັບພະຍານາກ ເຂົ້າບຸກໂຈມຕີຄົນທັງເມືອງຕາຍຈົນໝົດ. ພວກທີ່ຍັງເຫຼືອ ແມ່ນບ້ານແມ່ຮ້າງ ນາງໝ້າຍເທົ່ານັ້ນ. ຂະນະທີ່ເກີດຄວາມວຸ້ນວາຍ ທ້າວຜາແດງ ໄດ້ມານຳເອົານາງໄອ່ຄຳຂື້ນຂີ່ມ້າຫວັງ ເພື່ອນຳ ນາງໜີໄປຢູ່ເມືອງຜາໂພງດ້ວຍກັນ. ແຕ່ຍ້ອນວ່ານາງ ໄອ່ຄຳ ໄດ້ກິນຊີ້ນທ້າວພັງຄີ ດັ່ງນັ້ນ ນາງເອງກໍຖືກທະຫານພະຍານາກນຳຕິດຕາມ ມ້າທີ່ທ້າວຜາແດງ ໃຊ້ເປັນພາຫະນະ ນຳນາງ ໄອ່ຄຳ ໄປບໍ່ລອດ ເພາະເສັ້ນທາງມີແຕ່ຕົມ ຈົນໃນທີ່ສຸດ ນາງ ໄອ່ຄຳ ຕ້ອງຕົກອອກຈາກຫຼັງມ້າ ແລະ ສິ້ນໃຈຕາຍ.

 

alt

ພາບຈາກ http://banchiang.igetweb.com/index.php?mo=3&art=158205

 

___________________________________________________________________________

ຈື່ບໍ່ໄດ້ວ່າເອົາມາແຕ່ສົງໄສວ່າ ຄົງຈະເອົາມາຈາກອິນລາວ ແລ້ວເອົາມາລົງໄວ້ທີ່ http://www.pnomsin.com/?p=11

ຂຽນເມື່ອ ຂຽນເມື່ອ: ມ.ນ.. 1, 2009 | ມີ 21 ຄຳເຫັນ ແລະ 0 trackback(s)
ໜວດໝູ່: ຄວາມຮັກ

ຄົນຂຽນຊອບແວຣ໌ ກໍ່ໂຣແມນຕິກເປັນນຳເຂົາຢູ່ບໍ

software guy
ຂ້ອຍມີດອກໄມ້ສຳລັບເຈົ້າ

ແທ້ຫວາ?

ຂ້ອຍດາວໂຫລດ screen saver ຮູບດອກກຸຫລາບ ໃຫ້ເຈົ້າ

ໂອຍ ດອກໄມ້ ໃນຈໍບ້າໆຂອງເຈົ້ານີ້ ມັນບໍ່ໂຣແມນຕຶກດອກ, ຜູ້ຍິງເຂົາຕ້ອງການສິ່ງທີ່ສຳຜັດໄດ້ ຮູ້ສຶກໄດ້

ງົງ???  ແມ່ນຫຍັງ ? ເຈົ້າຈະໃຫ້ຂ້ອຍພິມອອກຫວາ ຫລື ແນວໃດ?

ເບິ່ງແລ້ວ ຂໍຄຳຄິດເຫັນດ້ວຍ

ຂຽນເມື່ອ ຂຽນເມື່ອ: ກ.ພ.. 13, 2009 | ມີ 21 ຄຳເຫັນ ແລະ 0 trackback(s)
ໜວດໝູ່: ຄວາມຮັກ

1 ພາສາມົ້ງ  ******່ ລູ ກໍ - ຂ້ອຍຮັກເຈົ້າ kou lou kor

2 ພາສາຂະມຸ ໂອ ຣັກ ບາ - ຂ້ອຍຮັກເຈົ້າ o rak ba

 

ແຖມ

ບອກຮັກເປັນພາສາຕ່າງປະເທດ

1 ພາສາລັດເຊຍ ຢາ ຈີເບຍ (ວາສ)  ລຸບລູ Ya tibya (Vas) lublu

2 ພາສາຢູເຄຣນ ຢາ ແຕແບ ໂກຄາຢູ Ya tebe lokhayou

3 ພາສາຄະແມ ຄະຍົມ ສະຣໍໄຣ ແນະ

ຂຽນເມື່ອ ຂຽນເມື່ອ: ກ.ພ.. 11, 2009 | ມີ 13 ຄຳເຫັນ ແລະ 0 trackback(s)

 ມື້ນີ້ ອາຍຸຢຽບເລກ4ແລ້ວ ເຖົ້າຫລາຍອີຫລີ

ອາຍຸ40 ຄຶດຫລາຍ ນອນຫງາຍມື້ກ່າຍຫນ້າຜາກ

ມາສະຫລອງວັນເຖົ້າ ເອີ້ຍ ວັນເກີດ ໃຫ້ກັບໂຕເອງ

ມີເຄັກມີຝາກທຸກຄົນ ສະມາຊິກພັນລາວ ມີຫລາຍ ເລີຍຕ້ອງເລືອກເຄກກ້ອນໃຫຍ່ແດ່

ຫວັງວ່າຄົງຈະພໍສຳລັບທຸກຄົນ

 

alt alt alt alt alt alt alt alt alt alt

ທີ່ ມາ : http://play.kapook.com/photo/show-62652

ຜ່ານ : forum.pnomsin.com/index.php

ຂຽນເມື່ອ ຂຽນເມື່ອ: ກ.ພ.. 9, 2009 | ມີ 20 ຄຳເຫັນ ແລະ 0 trackback(s)
ໜວດໝູ່: ທັມມະ

ບູຮານເພິ່ນວ່າ

10 ປີ ອາບນ້ຳບໍ່ຫນາວ

20 ປີ ລົມສາວບໍ່ເບື່ອ

30 ປີ ເມືອນາກ່ອນໄກ່

40 ປີ ຄຶດຫລາຍ ນອນຫງາຍມືກ່າຍຫນ້າຜາກ

50 ປີ ໄປນາກັບມານັ່ງເສົ່າ

60​ ປີ ເປົ່າຂຸ່ຍບໍ່ດັງ

70 ປີ ຍ່າງນຳທາງບໍ່ທ່ຽງ

80 ປີ ນັ່ງກໍ່ຄາງ ນອນກໍ່ຄາງ

90 ປີ ໄດ້ກິນກໍ່ຈົ່ມ ບໍ່ໄດ້ກິນກໍ່ຈົ່ມ

100 ປີ ໄຂ້ກໍ່ຕາຍ ບໍ່ໄຂ້ກໍ່ຕາຍ

ວົງຈອນຊີວິດ

ຂຽນເມື່ອ ຂຽນເມື່ອ: ມ.ກ.. 30, 2009 | ມີ 13 ຄຳເຫັນ ແລະ 0 trackback(s)
altທ່ານຜູ້ນີ້ເພິ່ນ ມັກຍົນບັງຄັບວິທະຍຸ ເພິ່ນມັກເອົາມັນມາບິນຢູ່ແຖວແຄມຂອງ ແຄມບຶງທາດຫລວງaltເດັກນ້ອຍກໍ່ຫຸ້ມເບິ່ງ ໂດຍສະເພາະເວລາມັນລົງ ພໍໄດ້ຈັບໄດ້ບາຍaltລົດວິບາກນ້ອຍ ສຳລັບນັກບິດທີ່ຍັງນ້ອຍໃຫຍ່ມາ ມັນຈະກາຍເປັນນັກຂີ່ລົດວິບາກ altທ້າວໂຕນີ ກໍ່ຍັງສົນໃຈລົດວິບາກ ຄັນນີ້ແພງບໍ່ລະ ພໍ່ມັນສິມີເງິນຊື້ບໍ່


LaoUpload.com au8ust.org LaoJobs.net UploadDer.com Tamsang.com ULS 5tutor.net