໑໓ ກະທູ້
໕໔ ໂພສ
ຂາປະຈຳເວັບບອດ 
|
 ຂຽນເມື່ອ ຫລາຍກວ່າ 11 ປີ ກ່ອນໜ້ານີ້, ແກ້ໄຂເມື່ອ ຫລາຍກວ່າ 11 ປີ ກ່ອນໜ້ານີ້
ຂ້ອຍມີຄົນຮູ້ຈັກຫຼາຍຄົນ ອາຍຸປະມານ 50-60 ປີ ເຈັບປ່ວຍຫຼາຍພະຍາດຕ່າງໆກັນໄປ ເຊັ່ນ: ກະເພາະ, ອຳມະພາດ, ມະເຮັງ...
ເວລາຕໍ່ມາອີກບໍ່ດົນພໍທໍ່ໃດກໍ່ໄດ້ຍິນຂ່າວວ່າ: ເສຍຊີວິດແລ້ວ. ບາງຄົນເປັນອຳມະພາດ ເຊິ່ງເຮົາໄປຢ້ຽມຢາມພີ່ນ້ອງໃນໂຮງໝໍກໍ່ເຫັນອີກຫຼາຍໆຄົນ ຊ່າງເປັນຕາອີດູຕົນສົງສານ, ອາຍຸບໍ່ພໍທໍ່ໃດກໍ່ເປັນອຳມະພາດ ຊ່ວຍເຫຼືອຫຍັງຕົວເອງບໍ່ໄດ້ອີກ, ລູກຫຼານຕ້ອງຮັບຜິດຊອບໝົດ, ຖ້າລູກຫຼານໃຈດີໄປກໍ່ດີໄປ ຢ້ານແຕ່ຍາມລູກຫຼານໃຈຮ້າຍມາ ຊິເກີດອາການທໍ້ໃຈສ່ຳໃດ, ເພາະວ່າຄົນເປັນອຳມະພາດ ຍັງໄດ້ແຕ່ຮູ້ສຶກ ແຕ່ເຮັດຫຍັງເວົ້າຫຍັງບໍ່ໄດ້ແລ້ວ, ໂອຊີວິດ...
ຂ້ອຍຮູ້ຈັກກັບອາຈານຄົນໜຶ່ງ ອາຍຸລາວປີນີ້ກໍ່ 65 ປີແລ້ວ, ລາວຍັງເປີດໂຮງຮຽນສອນພາສາອັງກິດເພີ່ມທີ່ເຮືອນລາວອີກ, ເພິ່ນແຂງແຮງດີ, ແຂ້ວຂອງເພິ່ນກໍ່ຍັງດີໆ ບໍ່ມີບັນຫາຫຍັງເລີຍ, ຫຼັງກໍ່ບໍ່ຄົດ, ການເວົ້າຈາ ແລະ ການສອນກໍ່ໄດ້ດີ, ເພິ່ນເປັນຄົນລາວ ທີ່ສອບເສັງໄດ້ທຶນໄປຮຽນຢູ່ອາເມລິກາ, ຍ້ອນເພິ່ນຮຽນດີຮຽນເກັ່ງ, ເພິ່ນຈິ່ງມີຄະແນນດີ ສາມາດຕໍ່ໂທໄດ້ຈົນຈົບ, ເພິ່ນໄດ້ແຕ່ງງານກັບຍິງອາເມລິກາ, ມີລູກຊາຍນຳກັນສອງຄົນ. ຕໍ່ມາໂຊກບໍ່ເຂົ້າຂ້າງ ເມຍເພິ່ນໄດ້ເປັນບ້າ, ເພິ່ນກໍ່ເສຍໃຈຫຼາຍ ຕອນນັ້ນເພິ່ນກໍ່ກິນເຫຼົ້າແຕ່ບໍ່ຫຼາຍ, ຕໍ່ມາເພິ່ນກໍ່ທຽວມາຢາມລາວ ຈິ່ງໄດ້ແຕ່ງງານກັບຍິງຄົນລາວ, ມີລູກຊາຍໜຶ່ງຄົນ.
ເພິ່ນສອນໄວ້ວ່າ: ກ່ອນທີ່ທຸກມື້ນີ້ອາຈານຊິແຂງແຮງໄດ້ສ່ຳນີ້ ແມ່ນຕອນແຕ່ກີ້ອາຈານຍັງໜຸ່ມຍັງນ້ອຍ ແມ່ນມີແຕ່ຍ່າງກັບຍ່າງເດີ! ແຕ່ບ້ານດົງໂດກ ໄປຫາ ຕະຫຼາດເຊົ້າ ບໍ່ໄດ້ມີລົດທຽວເດີ, ມີແຕ່ປ່າ ທາງກໍ່ພໍເປັນຮ່ອມທາງດິນແດງ, ໄປໃສກໍ່ມີແຕ່ຍ່າງ, ລົດຖີບກໍ່ຍັງບໍ່ມີຖີບ, ໄປຫາໝູ່, ໄປຫາພີ່ນ້ອງ, ໄປລົມສາວ ອັນໃດກໍ່ມີແຕ່ຍ່າງກັບຍ່າງໝົດ, ເຫຼົ້າເບຍ ອາຈານກໍ່ບໍ່ກິນ. ຫຼັງຈາກນັ້ນ ໝາກໄມ້ອັນໃດທີ່ຮູ້ວ່າໄດ້ສີດສານຂ້າແມງໄມ້ ຫຼື ສານເລັ່ງໃສ່ຫຼາຍ ອາຈານກໍ່ຈະບໍ່ກິນເດັດຂາດ ເຊັ່ນວ່າ: ໝາກແຕງໂມທີ່ຂາຍຕາມຕະຫຼາດ ອາຈານຈະບໍ່ກິນເດັດຂາດ ຢາກປານໃດກໍ່ບໍ່ກິນ, ຖ້າແມ່ນເພິ່ນປູກເອງຊິກິນຢູ່.
ໝູ່ຂອງເພິ່ນອາຍຸກໍ່ສ່ຳໆກັນກັບເພິ່ນຫັ້ນລະ ແຕ່ວ່າໝູ່ຂອງເພິ່ນບໍ່ເຫຼືອແຂ້ວຈັກເລັ່ມແລ້ວ, ການທີ່ບໍ່ມີແຂ້ວກໍ່ເປັນຜົນຢ່າງຍິ່ງຕໍ່ສຸຂະພາບ ເພາະກິນອາຫານບໍ່ຍ່ອຍດີ ຮ່າງການກໍ່ຈະບໍ່ໄດ້ຮັບສານອາຫານສົມບຸນປານໃດ. ອາຈານເຕືອນອີກວ່າ: ຄົນທີ່ດື່ມວິສກີ້ ລຽນຕິດກັນທຸກໆມື້ຫຼາຍ ຢູ່ໄດ້ບໍ່ເກີນຫ້າປີ ເພາະອາຈານສັງເກດມາແລ້ວ ແລະ ອາຈານຍັງບອກໃຫ້ສັງເກດເບິ່ງໂລດ, ຜູ້ໃດຈະທຸກ ຫຼື ຮັ່ງກໍ່ຕາມ ຖ້າເມົານຳແຕ່ສຸລານາລີຫຼາຍແມ່ນບໍ່ດີເສຍຫຼາຍຢ່າງ.
ໝູ່ເພື່ອນຫຼາຍຄົນຂອງອາຈານຫົວຂວັນວ່າ: ອາຈານຄືບໍ່ໄປຫຼິ້ນສາວແດ່ ຖານະກໍ່ດີປານນັ້ນ, ອັນໃດກໍ່ມີຄົບໝົດ? ອາຈານຕອບວ່າ: ເລື່ອງໄປຫຼິ້ນນັ້ນໄປງ່າຍໆ ແຕ່ບໍ່ໄປ ຍ້ອນວ່າບໍ່ຢາກມີບັນຫາໃນຄອບຄົວ, ຖ້າເກີດມີບັນຫາຂຶ້ນມາແລ້ວຈະແກ້ບັນຫານັ້ນຍາກ, ຄົນໃນຄອບຄົວກໍ່ຈະບໍ່ມີຄວາມສຸກ ແລະ ບໍ່ເຊື່ອໃຈກັນ. ຖ້າມີບັນຫາແລ້ວ ເຈົ້າຈະປ່ຽນເມຍຈັກຄົນກໍ່ໄດ້ ປ່ຽນໄປສ່ຳໃດກໍ່ຄືເກົ່າຫັ້ນລະ ແລ້ວສຸດທ້າຍໄດ້ຫຍັງແດ່? ຄົນໃນສັງຄົມຍ້ອງວ່າດີບໍ່? ຄວາມໝັ້ນຄົງໃນຄອບຄົວມີບໍ?
ອາຈານບອກອີກວ່າ: ຄົນເຮົາຖ້າຢາກຕາຍແມ່ນງ່າຍໆ, ແຕ່ຖ້າຢາກຢູ່ຢ່າງມີສຸຂະພາບດີ ແລະ ອາຍຸໝັ້ນຂວັນຍືນນັ້ນຍາກ.
ຄົນຢູ່ຂ້າງເຮືອນເພິ່ນ ມີລູກຊາຍອາຍຸບໍ່ຮອດ 15 ປີ, ຫາກໍ່ຮຽນມັດທະຍົມ, ຕອນນີ້ເປັນມະເຮັງຕັບ, ຍ້ອນແຕ່ລະມື້ແຕ່ລະວັນໄປເລາະຊອກຫາແຕ່ກິນເຫຼົ້າ-ເບຍ, ອາຈານເປັນຄົນຂ້າງເຮືອນກໍ່ເຕືອນແລ້ວ, ແຕ່ກໍ່ເຫັນວ່າເຂົາທຳທ່າຊັງໃສ່ອາຈານ ເພິ່ນເລີຍບໍ່ເວົ້າຫຍັງອີກ, ຕໍ່ມາເປັນແນວນັ້ນກໍ່ມາເວົ້າກັບອາຈານວ່າ: ແມ່ນຄວາມໃດເນາະ.
ທຸກມື້ນີ້ອາຈານດອງໝາກໄມ້ ສູດ ຫ້າ-ສາມ-ໜຶ່ງ ເຊັ່ນ: ໝາກໄມ້ ຫ້າໂລ, ນ້ຳຕານໜຶ່ງໂລ ແລະ ນ້ຳສາມລິດ, ໝາກໄມ້ກໍ່ຈະມີ: ໝາກຍົມ, ໝາກຍໍ, ໝາກເຟືອງ, ໝາກບ້າ... ໝາກອື່ນໆທີ່ໃຊ້ດອງ ຢ່າງໃດກໍ່ໄດ້, ອິງໃສ່ສູດນັ້ນ ດອງໝາກໄມ້ ຍິ່ງເວລາດົນໄປເທົ່າໃດ ຄຸນນະພາບຂອງໝາກໄມ້ດອງຍິ່ງດີຂຶ້ນເທົ່ານັ້ນ: ວິຕະມິນຊີຫຼາຍ, ສານອາຫານເພີ່ມຂຶ້ນ... ຊ່ວຍຫຼາຍໃນເລື່ອງສຸຂະພາບ ດື່ມມື້ລະນ້ອຍ... ຊ່ວຍດັບກິ່ນປາກ, ເຫືອກ, ແຂ້ວ...
ສຸດທ້າຍຂໍຝາກໄວ້ວ່າ: ຢ່າລືມໝັ່ນອອກກຳລັງກາຍ, ກິນອາຫານທີ່ມີປະໂຫຍດ, ເບິ່ງແຍງຕົວທ່ານເອງ ແລະ ຄົນຮອບຂ້າງທ່ານແດ່ເດີ :)
( ຮັກແພງ )
____________________________________________ 
|
ກະທູ້ມາໃໝ່
ຫມວດ
