ຂຽນເມື່ອ ຫລາຍກວ່າ 12 ປີ ກ່ອນໜ້ານີ້,
ແກ້ໄຂເມື່ອ ຫລາຍກວ່າ 12 ປີ ກ່ອນໜ້ານີ້
ນິດຕະຍາ ປານມາໄລທອງ ສາວລາວ-ອາເມຣິກັນ ທີ່ໄດ້ສ້າງຊື່ສຽງແລະຄວາມພາກພູມໃຈໃຫ້ແກ່ປະຊາຄົມລາວໃນລັດມິນນີໂຊຕາກໍຄື ໃນທົ່ວສະຫະລັດແລະທົ່ວໂລກກໍວ່າໄດ້ ຫລັງຈາກທີ່ນາງໄດ້ຖືກເລືອກເມື່ອເດືອນພະຈິກປີກາຍນີ້ໃຫ້ເປັນນາງງາມລັດມິນນີໂຊຕາປະຈໍາປີ 2012ຫລື Miss Minnesota USA 2012ຊຶ່ງນາງເປັນຄົນອາເມຣິກັນເຊື້ອສາຍເອເຊຍຄົນທໍາອິດທີ່ໄດ້ຄອງຕໍາແໜ່ງນີ້ ໃນລັດທີ່ມີຊາວເອເຊຍອາໃສຢູ່ຫລາຍສົມຄວນໂຮມທັງພວກອົບພະຍົບລາວລຸ່ມແລະລາວມົ້ງ.
ແຕ່ວ່າເລື່ອງລາວຂອງນິດຕະຍາບໍ່ແມ່ນເລື່ອງລາວຂອງສາວງາມທີ່ໄປປະກວດເພື່ອໂຊຄວາມງາມຂອງຕົນແລະເພື່ອຊື່ສຽງ,ຄວາມດັງຫລື ຄວາມມີໜ້າມີຕາເທົ່ານັ້ນ,ແຕ່ເຫດຜົນທີ່ນິດຕະຍາເຂົ້າປະກວດໂດຍທີ່ບໍ່ໄດ້ຕັ້ງໃຈໄວ້ລ່ວງໜ້າແລະທັ້ງໆທີ່ອາຍຸແກ່ກ່ວານາງງາມຄົນອື່ນໆນັ້ນ
ແມ່ນເພາະຢາກໄດ້ເງິນລາງວັນມາເປັນທຶນການສຶກສາເພື່ອໃຫ້ໄດ້ເຂົ້າຮຽນຕໍ່ໃນມະຫາວິທະຍາໄລຍ້ອນວ່າຖານະຄອບຄົວທຸກຍາກນິດຕະຍາ
ຈຶ່ງບໍ່ສາມາດເຂົ້າຮຽນຕໍ່ມະຫາວິທະຍາໄລໄດ້ຫລັງຈາກທີ່ຮຽນຈົບມັດທະຍົມປາຍໃນປີ 2003.ນາງຕ້ອງໄດ້ເຮັດວຽກຫາເງິນມາຊ່ວຍລ້ຽງຄອບ ຄົວເຊິ່ງມີພໍ່ແມ່ອ້າຍເອື້ອຍນ້ອງນໍາກັນ 10 ຄົນ.ດັ່ງນັ້ນນາງງາມລັດມິນນີໂຊຕາຄົນນີ້ຈຶ່ງບໍ່ໄດ້ມີແຕ່ຄວາມງາມເປັນຄຸນນະສົມບັດເທົ່ານັ້ນແຕ່ຍັງມີຄວາມຮັບຜິດຊອບສູງແລະກະຕັນຍູຮູ້ບຸນຄຸນນໍາອີກ. ນິດຕະຍາເປັນລູກສາວຂອງທ່ານເກສອນແລະຍານາງແກ່ນຈັນ ປານມາໄລທອງຈາກແຂວງສະຫວັນນະເຂດ. ທ່ານເກສອນເລົ່າກ່ຽວກັບລູກສາວຄົນນີ້ ສູ່ຟັງວ່າ:
"ຖ້າຈະເວົ້າເຖິງເບື້ອງຫຼັງຂອງນິຕະຍານັ້ນພວກຂ້າພະເຈົ້າເອງເປັນອົບພະຍົບມາຢູ່ທີ່ສູນນາໂພ(ນະຄອນພະນົມ)ແລະຢູ່ທີ່ນັ້ນປະມານສອງປີ
ແລະນິຕະຍານັ້ນເກີດໃນວັນທີ່ 8/7/1985.ຫຼັງຈາກນັ້ນ ກໍ່ໄດ້ໄປຢູ່ສູນອົບພະຍົບປະເທດຟີລິບປິ່ນປະມານ6ເດືອນແລ້ວກໍ່ໄດ້ອົບພະຍົບໄປທີ່
ລັດມິນນີໂຊຕາທຳອິດໃນວັນທີ່ 24/10/1986. ເວລນັ້ນນິຕະຍາມີອາຍຸໄດ້ປະມານ1ປີກັບ16ວັນແລະຫຼັງຈາກນັ້ນມາພວກຂ້າພະເຈົ້າເອງກໍ່ໄດ້
ໄດ້ຍ້າຍໄປຫຼາຍບ່ອນຫຼາຍທີ່ແລະໃນສຸກທ້າຍກໍ່ໄດ້ກັບມາມິນນີໂຊຕາອີກ"
ນອກຈາກນ້ອງສາວຫລ້າຈະເປັນ Down Syndrome ຫລືໂຣກປັນຍາອ່ອນມີພັດທະນາການຫລືການເຕີບໃຫຍ່ທີ່ບໍ່ສົມບູນຍ້ອນຄວາມຜິດປົກກະຕິທາງໂຄຣໂມໂຊມ ຫລືທາງເຊື້ອກໍາມະພັນນັ້ນແລ້ວ ແມ່ຂອງນິດຕະຍາເອງກໍ່ມີສຸຂະພາບບໍ່ດີ ເປັນໂຣກຫົວໃຈນໍາດ້ວຍ.
ໃນຄອບຄົວທີ່ມີ 10 ຄົນນັ້ນ ມີແຕ່ນິດຕະຍາກັບອ້າຍເຂີຍເທົ່ານັ້ນທີ່ເຮັດວຽກຫາລ້ຽງຄອບຄົວທັງໆທີ່ນິດຕະຍາເອງກໍມີຄວາມຮູ້ພຽງແຕ່ຂັ້ນມັດທະຍົມປາຍເທົ່ານັ້ນ.ຍ້ອນໃຫຍ່ຢູ່ສະຫະລັດແລະໄດ້ໃຊ້ຊີວິດສ່ວນໃຫຍ່ຢູ່ກັບເອື້ອຍນ້ອງແທນທີ່ຈະຕິດຕາມໄປກັບພໍ່ແມ່ທີ່ຍ້າຍລັດຢູ່ເລື້ອຍ ໆນັ້ນ ນິດຕະຍາຈຶ່ງບໍ່ມີໂອກາດໄດ້ຮຽນເວົ້າພາສາລາວຈົນກະທັງເມື່ອສາມປີມານີ້ ຈື່ງຍັງເວົ້າບໍ່ເກັ່ງ ແຕ່ກໍພະຍາຍາມເວົ້າຢູ່ເລື້ອຍໆກັບພໍ່ແມ່ເພື່ອຈະໄດ້ເວົ້າເກັ່ງຂຶ້ນ.ນິດຕະຍາເລົ່າເຖິງຊີວິດຕອນຍັງນ້ອຍວ່າ: ນາງເຂົ້າໂຮງຮຽນປະຖົມຢູ່ລັດມິນນີໂຊຕາຫຼັງຈາກນັ້ນພໍ່ແມ່ໄດ້ພາຍ້າຍໄປ
ທີ່ລັດ ນອດເຄໂຣໄລນາກໍ່ເລີຍໄດ້ເຂົ້າຮຽນມັດທະຍົມຕອນຕົ້ນແລະຕອນປາຍຢູ່ທີນັ້ນແລະຮຽນຈົບໃນປີ2003ແລ້ວກໍ່ໄດ້ເຮັດວຽກເລີຍເປັນພະ ນັກງານຕ້ອນຮັບຢູ່ທະນາຄານແຫ່ງໜຶ່ງແລະຕໍ່ມາໄດ້ເຮັດວຽກຢູ່ນຳບໍລິສັດປະກັນໄພແຫ່ງໜຶ່ງ ແຕ່ຍ້ອນເປັນຄົນມີຮູບຮ່າງໄດ້ສັດສ່ວນ ນິຕະ ຍາຈຶ່ງໄດ້ໄປຊອກວຽກເຮັດເປັນນາງແບບນຳແຕ່ກໍ່ບໍ່ມີວຽກເຮັດຫຼາຍຍ້ອນວ່າຄົນລັດມີນີໂຊຕ້າມັກນາງແບບທີ່ມີຜົມສີທອງ,ຕາຟ້າຫຼີແບບຄົນຈີນ,ຄົນຍີ່ປຸ່ນຫຼາຍກ່ວາ.
ຫລັງຈາກຮຽນຈົບມໍປາຍໃນປີ 2003 ນິດຕະຍາກໍບໍ່ໄດ້ຮຽນໜັງສືຕໍ່ເລີຍ ຈົນກະທັ້ງປີກາຍນີ້ຈຶ່ງໄດ້ເຂົ້າຮຽນທີ່ Normandale Commun ity College ທີ່ເປັນມະຫາວິທະຍາໄລຊຸມຊົນທີ່ພວກນັກສຶກສາທຸກຍາກພາກັນໄປຮຽນເອົາອະນຸປະລິນຍາ 2 ປີ ເພາະຄ່າຮຽນບໍ່ແພງຫລາຍ ແລ້ວຈຶ່ງໄປຮຽນຕໍ່ມະຫາວິທະຍາໄລໃຫຍ່ອີກ 2 ປີ ເພື່ອເອົາປະລີນຍາຕີ. ແຕ່ການທີ່ຈະໄປຮຽນຕໍ່ມະຫາວິທະຍາໄລໃຫຍ່ນັ້ນ ກໍຈະຕ້ອງການຄ່າຮຽນຫລາຍໝື່ນ$ ນິດຕະຍາຈຶ່ງເລີ່ມຊອກຫາທຶນສຶກສາແລ້ວນາງກໍມາພົບເວັບໄຊ້ຂອງຄະນະກໍາມະການປະກວດນາງງາມລັດມິນນີໂຊຕາ ກໍເລີຍຕັດສິນໃຈເຂົ້າສະໝັກທັງໆທີ່ບໍ່ເຄີຍຄິດມາກ່ອນແລະກໍບໍ່ຄິດວ່າຕົນເອງງາມເຖິງຂະໜາດທີ່ຈະເຂົ້າປະກວດນາງງາມໄດ້.
ນິດຕະຍາເວົ້າວ່າ : ໃນໄລຍະສອງເດືອນໃນການກຽມໂຕນັ້ນ ນາງຕ້ອງໄດ້ໄປອອກກໍາລັງກາຍຢ່າງຂຸ້ນຂ້ຽວເພື່ອໃຫ້ຫຸ່ນດີ. ນອກນີ້ແລ້ວ ນາງຍັງຕ້ອງໄດ້ຊອກຮຽນຮູ້ກ່ຽວກັບຂ່າວທີ່ສໍາຄັນຕ່າງໆ ເພື່ອໃຫ້ທັນກັເຫດການໂລກ ເພື່ອໃຫ້ສາມາດຕອບຄໍາຖາມໄດ້ດີໃນຮອບສໍາພາດ. ສ່ວນເລື່ອງເຄື່ອງນຸ່ງເສື້ອຜ້າ ນາງຕ້ອງໄດ້ຊອກເອົາເອງໝົດຕະຫລອດທັງເຄື່ອງແຕ່ງໜ້າແຕ່ງຕາ,ເຮັດຜົມແລະຫາສະປອນເຊີມາຊ່ວຍໃນ ເລື່ອງຄ່າໃຊ້ຈ່າຍ,ແຕ່ກໍມີທຸລະກິດທ້ອງຖິ່ນພຽງສອງສາມຮ້ານເທົ່ານັ້ນທີ່ໃຫ້ເງິນມາບ່ອນລະ100-200 ໂດລາ,ແຕ່ສ່ວນຫລາຍແລ້ວ ຈະແມ່ນ
ຍາດພີ່ນ້ອງແລະໝູ່ເພື່ອນ,ແຕ່ກໍໄດ້ໜ້ອຍຫລາຍ ແລະ ຄອບຄົວຂອງນາງເອງກໍທຸກຍາກ,ຂະໜາດທີ່ວ່າບໍ່ມີເງິນພໍທີ່ຈະຊື້ປີ້ໃຫ້ໝົດທຸກຄົນໃນ ຄອບຄົວໄປເບິ່ງມື້ປະກວດນັ້ນໄດ້ ມີແຕ່ແມ່ແລະເອື້ອຍເທົ່ານັ້ນທີ່ໄດ້ໄປເບິ່ທງໃຫ້ກໍາລັງໃຈນິດຕະຍາເຖິງແມ່ນລາຄາປີ້ເຂົ້າຊົມມີພຽງແຕ່ 30-
40 ໂດລາເທົ່ານັ້ນ.
ນີ້ແຫຼະເປັນທີ່ໄປທີ່ມາຂອງສາວລາວຕ່າງແດນຄົນໜຶ່ງທີ່ພະຍາຍາມເຮັດທຸກສິ່ງທຸກຢ່າງເພື່ອສ້າງອານາຄົດທີ່ດີໃຫ້ແກ່ຕົນເອງແລະ
ຄອບຄົວ
ທີ່ມາ 
ກະທູ້ມາໃໝ່
ຫມວດ
