------------------- ຍາມນາຂ້າເສົ້າ--------------

ກ່ອນນາງອອກຈາກບ້ານ                        ຖານຖິ່ນເຮົາໄປ
ຊາມໄວເຄີຍສັນຍາ                               ກ່ອນລາວັນນັ້ນ
ບໍ່ນານວັນຊິຄືນໂຄ້ງ                               ຄືນນາຫາພີ່
ນາປີຫມາຍນັດໄວ້                                 ນາງນ້ອງຕ່າວຄືນ ວ່າເດ

ເວັນຄືນຊາຍນັບນິ້ວ                                ລຽງໄລ່ເວລາ
ປານໃດນໍຍາມນາ                                   ຈັ່ງຊິມາເຖີງນັ້ນ
ຄອຍເວັນວັນຄືນມື້                                  ວັນເດືອນເລີຍລ່ວງ
ໃຈຫ່ວງຫາແຕ່ເຈົ້າ                                  ຄອຍເຝົ້ານັບວັນ ນັ້ນນໍ


ພໍຍີນຟ້າຮໍ່າຮ້ອງ                                      ຝົນຫລັ່ງໄຫລມາ
ມິຖຸນາບອກເຕືອນ                                   ເຂດເດືອນຝົນເຂົ້າ
ນາປີເຮົາຊິເລີ່ມແລ້ວ                                 ແສນດີໃຈຊົມຊື່ນ     
ແຟນຊິຄືນຕ່າວໂຄ້ງ                                  ມາພໍ້ພົບກັນ ວ່ານັ້ນ

ເດືອນເຈັດແປດຜ່ານພົ້ນ                            ຈົນລ່ວງເລີຍລາ ແລ້ວເດ
ດໍານາປີກາຍມາ                                       ບໍ່ເຫັນຄືນຄືເວົ້າ
ເປັນຈັ່ງໃດນໍນ້ອງ                                      ປະຄົນຄອງນໍ້າຕາຫລັ່ງ
ເປັນຫຍັງຕົວະບ່າວອ້າຍ                             ໃຫ້ຊາຍຖ້າພັດບໍ່ມາ…?

ສໍ ເມືອງຊໍາ  1/8/2014

 

                                    ຍາມຝົນ

      ລະດູ ການເຄື່ອນຍ້າຍ                ໝູນປ່ຽນແປໄປ
                     ຕາມເວລາ                ລ່ວງເລີຍເລີງເລື້ອຍ
                      ຕາມວັນມື້               ເດືອນປີວຽນຮອດ
         ລະດູ ຝົນເຄື່ອນເຂົ້າ                ຄືນໂຄ້ງຕ່າວມາ ອີກແລ້ວ

      ພຶກສາ ຊາດໃຫຍ່ນ້ອຍ               ລອຍເລີ່ມລຸກມາ
      ຈໍ່ຈາວ ຊອມແຊມຊອນ               ປົ່ງເຕັມຕາມຕົ້ນ
                      ຂຽວໆເຂັ້ມ               ຍວຍຍາຍຍອດຍື່ນ
             ປົກຄຸມ ກໍກິ່ງກ້ານ               ໂອຍເອັ້ນອວດສົມ ງາມເດ

      ຫລຽວເບິ່ງ ໄປທົ່ງກວ້າງ               ນໍ້າອັ່ງໃນນາ
                      ພວມລົງໄຖ               ຄາດພຽນແພງກ້າ
                     ປົວແປງປ້ອງ              ຄອງຄັນຄືນໃຫມ່
    ຫລຽວເຫັນ ກ້າອ່ອນນ້ອຍ               ລົມຕ້ອງແກວ່ງໄກວ ງາມເດ

        ເຕັມຕາມ ຄອງຮ່ອງນໍ້າ              ວັງບວກນາຫນອງ
       ກົບຂຽດ ໂຕນໂຢ໋ຍຢ໋າຍ              ຫມູ່ປາລອຍທັງບ້ອນ
           ນົກເຕັນ ງອຍຮຽວໄມ້             ແຄມຫນອງບິນແສ່ວ
              ປາຊີວ ຕິດປາກຂື້ນ             ເທິງໄມ້ງ່າງອຍ ພຸ້ນເດ

ສໍ ເມືອງຊໍາ       28 ກໍລະກົດ 2014

 

++++++++++++ສາຍລົມ
ສາຍລົມປິວປິ່ນເປື້ອງ           ເຫີນເວີ່ນເວຫາ
ວົນວຽນປິວໄປມາ                ທົ່ວໂລກາກວ້າງ
ຊວງເຄີຍລົມຕໍາຕ້ອງ            ຟອງລົມເລີຍລ່ວງ
ບໍ່ເຫັນຄວງຄາບເນື້ອ            ເຄືອຂ້ອງຄາດຄີງ  ແດ່ນໍ

ຄວາມຈິງລົມລ່ວງຍ້າຍ          ກາຍຜ່ານບາງຫົນ
ເຮັດໃຫ້ຄົນສຸກໃຈ                 ຊື່ນໃນຊວງເນື້ອ
ບາງເທື່ອລົມຊ່ອຍໃຫ້             ເຢັນກາຍສົດຊື່ນ
ຄື້ນລົມອາດຊ່ອຍຍູ້                ຊູເສົ້າຫ່າງເຮົາ  ກໍມີ

ບາງທີລົມເຫລົ່ານັ້ນ                ມັນພັດເປັນໄພ
ກະຫນໍ່າໄປຮຸນແຮງ                ຮອດແຄງເຮືອປິ້ນ
ດິນກະຈາຍຈວນພົ້ງ                ພົງໄພທະລາຍມຸ່ນ
ແຕ່ຫາກຊຸນບໍ່ໄດ້                    ໃນເນື້ອບ່ອນລົມ ນັ້ນນໍ
+++++++++++ສໍ ເມືອງຊໍາ


 

------------ເຫດຜົນທີ່ໂທນຳ--------
ທຸກມື້ຜົວນາດນ້ອງ          ຕ້ອງດ່ວນໄປການ
ເຮັດງານຫາເງິນຄໍາ         ເພື່ອນໍາມາລ້ຽງ
ປະພຽງເມຍລູກນ້ອຍ        ຄອງຄອຍຄິດຮໍ່າ
ຄິດນໍາຜົວແຕ່ເຊົ້າ            ຈົນເທົ້າທ່ຽງຄືນ

ຕື່ນມາຜົວຮີບຮ້ອນ           ຈອນຈາກລົງເຮືອນ
ເຕືອນເມຍບໍ່ຕ້ອງຫາ        ແຕ່ງພາກຽມເຂົ້າ
ສຽງເວົ້າຍັງບໍ່ແລ້ວ            ລົງເຮືອນພະລັນດ່ວນ
ສ່ວນເມຍຍໍຕິບເຂົ້າ          ບໍ່ທັນເວົ້າຕອບຜົວ ຊໍ້ານໍ

ແລງຊົວລົວຄໍ່າຄ້ອຍ         ຄ່ອຍພີ່ຜົວແພງ
ແຍງແຕ່ໂມງແຂນຜາ        ຫ່ວງຫາອວນອ້າຍ
ຢ້ານຜົວມີເຫດຮ້າຍ          ຄິດຫລາຍອຸກອັ່ງ
ສຽງດັງໆຕອບໂຕ້             ຍາມໂທເຂົ້າພີ່ຮັບສາຍ

ຊາຍເອີຍຮູ້ບໍ່ນ້ອງ            ເມຍຫ່ວງຜົວແພງ
ແຍງທາງຄອງຄອຍຜົວ      ບໍ່ກິນຮອດເຂົ້າ
ເຖິງແມ່ນເຈົ້າຊິຮ້າຍ         ໂວຍວາຍກໍ່ຕາມຢ່າ
ໂທຫາເພາະຫ່ວງອ້າຍ      ຮັກຫລາຍນັ້ນນ້ອງຈິ່ງໂທ ຊາຍເອີຍ      

ສໍ ເມືອງຊຳ

-----------------ໄປບໍ ບ້ານອ້າຍ----------------
ຕົນຕົວອ້າຍ                  ຊາຍຢູ່ເມືອງຊໍາ
ເຖີງຕົວດຳ                   ແຕ່ໄຕຊຳຮ້ອຍ
ບົນບ້ານຂ້ອຍ                ເມືອງດອຍຫມອກມືດ
ພືດພັນໄມ້                     ໃນດ້າວອັ່ງອໍ
ຫນາວຫລາຍຫນໍ           ຫລາຍຄົນເຂົາຊ່າ
ຜາຫີນຕັ້ງ                     ທັງສູງກອງກໍ່
ໄປບໍນ້ອງ                      ລອງຫລີ້ນທ່ຽວຊໍາ
ຄັ້ນໄປຢາມ                    ເມືອງຊໍາບ້ານອ້າຍ
ຂໍເປັນໄກ້                       ພາໄປທ່ອງທ່ຽວ
ບໍ່ກ່ຽວຈ້າງ                     ທາງອ້າຍຮັບຟຣີ
ມາຕີນ້ອງ                      ລອງທ່ຽວເມືອງຫນາວ
ພູຜາຍາວ                      ສູງຊັນລຽນລ້ອມ
ຄັ້ນນາງພ້ອມ                 ຊິງຊອມຕາມພີ່
ຄົນດີນ້ອງ                      ລອງເບີ່ງຕາມໄປ
ຫີນຕັ້ງໃຜ                       ກໍຊົມຊ່າຍ້ອງ
ເຫັນບໍນ້ອງ                     ກອງກໍ່ລຽນລໍາ
ມາເມືອງຊໍາ                   ກາບຊົມຫນ່ວຍແກ້ວ
ແລ້ວນັ່ງຫລີ້ນ                  ຊົມສວນນາຫມີ່
ຜາທີ່ຕັ້ງ                         ທັງສູງສະຫງ່າ
ປ່າຫມາກມັ້ນ                  ຫມາກຈອງຫມາກຄາຍ
ເປັນຫລາຍໆ                  ຢັ່ງຢາຍງ່າກ່ອງ
ລ່ອງລົງໃຕ້                      ໄປທ່ຽວວຽງໄຊ
ໃຫ້ສົມໃຈ                         ທົ່ວເຖີງທຸກຖໍ້າ
ລົງຊໍາໃຕ້                         ໄປຊົມຜານັ່ງ
ຫີນຕັ່ງແກ້ວ                      ຜາອີ້ວຫລາຄໍາ
ຜ້າໃຫມຄໍາ                       ຜືນແພງຫລາຍລ້ານ
ບາດກັບບ້ານ                     ຖານຖິ່ນເມືອງນາງ
ທາງຕົວຊາຍ                     ມີຫລາຍຂອງຝາກ
ຫມາກຈອງພ້ອມ                ຫນໍ່ຈ້າຫນໍ່ລັນ
ຢ່າລືມມັນ                         ຫນັງຍໍາແຊ່ເພັ້ຍ
ຢ່າໃຫ້ເສຍ                         ໃດແຈ່ວປາບໍ້າ
ເມືອງຊໍາອ້າຍ                    ຍັງຫລາຍບ່ອນທ່ຽວ
ຄັ້ງດຽວນັ້ນ                          ມັນບໍ່ທົ່ວເຖີງກັນ
ຄ່ອຍພົນກັນ                         ທ່ຽວຊົມເທື່ອຫນ້າ
ຊິພານ້ອງ                            ໄປທຸກທ້ອງທົ່ວແດນ ນັ້ນແລ້ວ

ສໍ ເມືອງຊຳ

-------------ອັກສອນສານສິນ------------
ກ. ກອນກ່ອມກ້ຽວ               ໄກວແກວ່ງກວມໄກ
ຂ. ຂໍໄຂຂານ                       ຂີດຂຽນໄຂຂໍ້
ຄ. ຄຽງຄໍາຄ້ອງ                    ຄົງຄອງຄຸນຄ່າ
 ງ. ງົງງຶດງໍ້                          ງານໄງ້ງົດງາມ

ຈ. ໃຈຈອດຈັ້ງ                      ຈົງຈໍ່ຈໍາຈົນ
ສ. ສົນສອນສິນ                    ສືບສານເສີມສ້າງ
ຊ. ຊວນຊາວເຊື້ອ                 ຊຸມຊົນຊົມຊື່ນ
ຍ. ຍໍຍື່ນຍ້ອງ                       ແຍງຍິ້ມຍຶດເຍືອ

ດ. ເດີນດຸ່ງດັ້ນ                       ແດນດ່ານດອນໃດ
ຕ. ຕາມຕົວຕົນ                      ຕິດຕຽມເຕີມແຕ້ມ
ຖ. ແຖມຖານຖ້ອຍ                  ແຖວຖັນໆຖີ່
ທ. ທັງທຸ່ງທື້ນ                         ເທທັ້ງທົ່ວທວງ

ນ. ໃນເນດນ້ອຍ                      ແນເນັ່ງເນີນນານ
ບ. ເບີຍບານບົນ                      ບໍ່ບາງບົນບັ້ນ
ປ. ປັນແປງປ້ອງ                      ປອງໄປແປວປ່ອງ
ຜ. ຜອງຜັດແຜ້ວ                      ເຜີຍຜູ້ຜ່ານຜາຍ

ຝ. ຝັງຝາກເຝົ້າ                         ຝັນໃຝ່ຝອຍແຝງ
ພ. ພົງພັນແພງ                         ເພື່ອນພຽນພຽງພ້ອມ
ຟ. ແຟນຟັງຟ້າວ                       ຟູມຟາຍເຟືອນຟັ່ງ
ມ. ມາຍມັດມ້ວນ                      ມວນແມ້ງມ່ວນມັນ
ຢ. ຢືນຢູ່ຢັ້ງ                             ຢາຍຢັ່ງຢາມເຢືອນ
ລ. ໄລລືມເລືອນ                       ເລົ່າລົມໆເລື້ອຍ
ວ. ວົນວຽນເວົ້າ                         ວອນໆວີວ່ອນ
ຫ. ເຫັນຫ່ອນແຫ້ງ                     ຫວນໃຫ້ຫ່ວງຫາ

ອ. ອາອ່ານອ້າງ                          ເອີນອ່ອນອວນອົມ
ຮ. ໂຮມແຮງເຮົາ                         ຮັກຮຽງຮຽນຮ້ອຍ
     ສໍ ສອດສ້ອຍ                         ສອນສິນສານສືບ
     ຕັນຕຶບຫນ້າ                           ລາມ້ຽນຈອດລົງ ກ່ອນແລ້ວ

ສໍ ເມືອງຊຳ

ບໍ່ໄດ້ໃສ່ ອັກສອນຄວບ ແລະ ຣ
 

                                 65 ປີ ເຕີບໃຫ່ຍມີໄຊ

   ລາວອິດສະຫຼະກໍ່ຕັ້ງ                                ກໍາລັງໃໝ່ທະຫານລາວ
ວັນທີ 20 ມັງກອນ                                     ກ່າວຂານໄຂກ້ອງ
ກອງລາດສະວົງໄດ້ສ້າງ                              ຕາມແນວທາງປ່ຽນແປງໃໝ່
ພາຍໃຕ້ການສ່ອງຊີ້                                   ປີຊາກ້າ ທ່ານ ໄກສອນ.

   ນັບແຕ່ມື້ກໍ່ຕັ້ງ                                       ປະກາດຂ່າວຂານໄຂ
ນັບເປັນວັນມີໄຊ                                       ໃຫ່ຍແຂງແຮງກ້າ
ພັກນຳພາເຍືອງຊີ້                                       ແນວທາງດີສອດຄ່ອງ
ປົດປ່ອຍພົງພີ່ນ້ອງ                                      ຈາກມືຮ້າຍໝູ່ມານ.

   ການເວລາຜ່ານພົ້ນ                                  ຜົນປົດປ່ອຍແປຜັນ
ຫັນກົນໄກການນຳພາ                                  ສູ່ມືປະຊາໄດ້
ໃຈໜື່ງດຽວສານສ້າງ                                   ຕາມແນວທາງນັກຮັກຊາດ
ອົງອາດປົກປ້ອງໄວ້                                     ປະຊາໄດ້ຢູ່ເຢັນ.

   ມັນເປັນວັນເອກອ້າງ                                 ລືທົ່ວໂລກາ
ວັນທີ 2 ທັນວາ                                           ຜ່ອຍຄາຍຫາຍຮ້ອນ
ຄືດັ່ງປາໂຮມຕ້ອນ                                        ສະຫລອງຊົມນໍ້າໃໝ່
ໄພ່ປະຊາຊື່ນຊ້ອຍ                                         ສະຫຼອງແມ້ງມ່ວນມະໂນ.

   ຂະຫຍາຍຕົວເຕີບກ້າວ                               ແສງສະຫ່ວາງນຳພາ
ພັກກັບປະຊາຊົນ                                         ດັ່ງປາກັບນໍ້າ
ພ້ອມພໍ່າພາກັນສ້າງ                                      ຕາມແນວທາງລະບອບໃໝ່
ສີວິໄລຮຸ່ງກ້າວ                                            ຈະເລີນຂື້ນສູ່ສະໃໝ.

   ເນື່ອງໃນໂອກາດນີ້                                  ຂໍອວຍພອນໄຊ
ໄປເຖິງທະຫານລາວ                                    ທົ່ວແດນເໜືອໃຕ້
ຂໍໃຫ້ມີໄຊກ້າ                                           ໂລຄາຢ່າມາແວ່
ປາບແພ້ພວກເຜດຮ້າຍ                             ສະບາຍເບື້ອງບ່ອນປະຊາ ນັ້ນທ້ອນ.

                                                                  ໂດຍ : ສໍ ເມືອງຊຳ