ກອງລໍຄືຖ້ຳນ້ຳລອດທີ່ໃຫຍ່ທີ່ສຸດແຫ່ງຫນຶ່ງຂອງສປປລາວເປັນຄວາມຍິ່ງໃຫຍ່ທີ່ທຳມະຊາດສ້າງຂຶ້ນມາແລະນີ້ເປັນສ່ວນຫນຶ່ງຂອງລະບົບນິເວດປ່າຫີນບູນທີ່ຕັ້ງຢູ່ແຂວງຄຳ ມ່ວນໃນເຂດ ປ່າສະຫງວນແຫ່ງຊາດພູຫີນບູນລະຫວ່າງຫມູ່ບ້ານນາຕານເມືອງນາຍກາຍແລະກຸ່ມບ້ານກອງລໍເມືອງຫີນບູນ.

                   ຄວາມອາລັງການຂອງຖ້ຳແຫ່ງນີ້ເກີນກວ່າຈະບັນຍາຍໄດ້ສະນັ້ນຕ້ອງໃຊ້ຈິນຕະນາການຢ່າງດຽວເພາະເປັນພາບທີ່ທັງປະທັບໃຈແລະງຶດງໍ້ອັດສະຈັນກັບທຳມະຊາດທີ່ເຫມືອນມີ ຄົນປັ້ນແຕ່ງຂຶ້ນມາ, ເປັນນ້ຳລອດພື້ນດ້ວຍໄລຍະທາງ7 ກວ່າກິໂລແມັດທີ່ສັບຊ້ອນ, ພາຍໃນຖ້ຳເຕັມໄປດ້ວຍຫີນງອກ, ຫີນຍ້ອຍຂະຫນາດໃຫຍ່, ມີນ້ຳຕົກພາຍໃນ, ພ້ອມກັບແມ່ ນ້ຳທີ່ຄົດໂຄ້ງ, ຍັງບໍ່ທັນລວມເຖິງແກ້ງ, ຫີນແລະ  ຄວາມຫລາກຫລາຍທາງຊີວະພາບອື່ນໆທີ່ເຊື່ອງຊ້ອນປະສານກັບຫາດຊາຍທີ່ສວຍງານປະມານ20 ກວ່າຈຸດເຮັດໃຫ້ນັກທ່ອງ ທ່ຽວໄດ້ຊົມຂະນະທີ່ຂີ່ເຮືອລອດຜ່ານເຂົ້າໄປໃນຖ້ຳໄດ້ຕະຫລອດເວລາສຳລັບຍາມແລ້ງແມ່ນເຫມາະສົມທີ່ສຸດໃນການຂີ່ເຮືອເລາະຊົມຮູບຊົງສີສັນຂອງຖ້ຳແລ້ວສາມາດແວ່ຍ່າງເລາະ ຕາມຫາດຊາຍຂາວສຳຜັດກັບອາກາດທີ່ເຢັນສະບາຍຂອງທຳມະຊາດແຫ່ງນີ້. ປະຈຸບັນເປັນທີ່ຫນ້າຍິນດີທີ່ຊາວບ້ານໄດ້ເຂົ້າມາມີສ່ວນຮ່ວມໃນການຈັດການການທ່ອງທ່ຽວໂດຍ ຊຸມຊົນນອກຈາກຈະໄດ້ຕື່ນຕາກັບຄວາມງາມຂອງຖ້ຳແລ້ວຊາວບ້ານກໍ່ມີລາຍຮັບຈາກການທ່ອງທ່ຽວຫລາຍຂຶ້ນ.ໃນເມື່ອກ່ອນຊາວບ້ານກໍ່ໃຊ້ຖ້ຳນ້ຳລອດແຫ່ງນີ້ເປັນເສັ້ນທາງຄົມ ມະນາຄົມກ່ອນການທ່ອງທ່ຽວມາເຖິງເນື່ອງຈາກຫມູ່ບ້ານນາຕານເຊິ່ງມີທີ່ຕັ້ງຢູ່ອີກຟາກຂອງປາກຖ້ຳນັ້ນບໍ່ມີຖະຫນົນເຂົ້າອອກເພາະຖືກປິດລ້ອມດ້ວຍສາຍພູຫີນບູນທີ່ສູງຊັນດັ່ງ ນັ້ນຊາວບ້ານຈິ່ງຕ້ອງໃຊ້ເຮືອຫາງຍາວເປັນພາຫະນະໃນການເດີນທາງສູ່ໂລກພາຍນອກເປັນໄລຍະທາງ7 ກວ່າກິໂລແມັດພາຍໃນຖ້ຳທຸກໆມື້.  ຕາມການເລົ່າຂານກັນມາຖໍ້າແຫ່ງ ນີ້ມີຄວາມຫມາຍມາຈາກກອງທັບລໍບໍ່ແມ່ນກອງຫລໍ່, ຍ້ອນເຫດຜົນວ່າ: ຄຳວ່າກອງແມ່ນມາຈາກກອງທັບ, ສ່ວນລໍມາຈາກການລໍຖ້າຈິ່ງໄດ້ເອີ້ນຖ້ຳກອງລໍມາຮອດປະຈຸບັນນີ້.

         ຖ້ຳກອງລໍແມ່ນຢູ່ລະຫວ່າງອີກບ່ອນຫນຶ່ງຂອງເມືອງຄູນຄຳເຊິ່ງຫ່າງຈາກຕົວເມືອງທ່າແຂກໄປປະມານ196 ກິໂລແມັດ, ບັນດາທ່ານທີ່ຈະໄປທ່ຽວຊົມກໍ່ສາມາດຂີ່ລົດໄປຕາມ ເສັ້ນທາງເລກທີ13 ເຂົ້າໄປຕາມທາງເລກ8A ຈະຮອດບ້ານຄູນຄຳເຊິ່ງຫ່າງຈາກຖ້ຳໄປປະມານ40 ກິໂລແມັດ, ສຳລັບຜູ້ທີ່ມັກການຜະຈົນໄພແມ່ນແນະນຳໃຫ້ຂີ່ເຮືອກໍ່ຈະໄດ້ພົບ ບັນຍາກາດອີກແບບຫນຶ່ງ.ຖ້າເດີນທາງຈາກທ່າແຂກແຂວງຄຳມ່ວນຂຶ້ນລົດໂດຍສານຈາກທ່າແຂກຢູ່ຄິວລົດຫລັກສອງຂຶ້ນໄປຕາມເສັ້ນທາງຫມາຍເລກ13 ໃຕ້ຈົນຮອດບໍລິເວນ ບ້ານນ້ຳທອນລົງລົດທີ່ທາງແບ່ງຫລັກ20. ແລ້ວມຸ່ງຫນ້າສູ່ບ້ານນາຫີນ. ຈາກບ້ານນາຫີນສາມາດຂີ່ລົດສອງແຖວໄປຍັງຖ້ຳໂດຍກົງໃຊ້ເວລາທັງຫມົດປະມານ4-5 ຊົ່ວໂມງ (ໄລ ຍະທາງເກືອບ200 ກິໂລແມັດຈາກທ່າແຂກ) ຫລືຖ້າຈະເດີນ ທາງດ້ວຍລົດໂດຍສານຈາກວຽງຈັນ-ທ່າແຂກຫລື ວຽງຈັນ-ສະຫວັນ. ລົງໄປຕາມເສັ້ນທາງຫມາຍເລກ13 ໃຕ້ຈົນ ຮອດບໍລິເວນບ້ານນ້ຳທອນລົງລົດທີ່ບ້ານວຽງຄຳທາງແບ່ງຫລັກ20. ບໍລິເວນນ້ຳທອນຈາກທາງແບ່ງຫລັກ20 ຕໍ່ລົດສອງແຖວສາຍທາງແບ່ງ-ຫລັກຊາວຄ່າລົດ30.000 ກີບ (ຊາຍແດນຫວຽດ) ບອກໂຊເຟີລົດວ່າລົງຢູ່ບ້ານນາຫີນ. ລົດຄັນສຸດທ້າຍຫມົດ4 ໂມງແລງຂອງແຕ່ລະມື້ສ່ວນຄ່າເຮືອເຂົ້າຖ້ຳປະມານ1 ແສນກີບກຳນົດໃຫ້ຂີ່ບໍ່ເກີນ3-4 ຄົນ. ທ່ານສາມາດພັກແຮມຄືນຕາມເຮືອນຊາວບ້ານນາຫີນ, ນາຕານແລະບ້ານກອງລໍຫລືເຮືອນພັກສາລາຫີນບູນໃກ້ໆກັບຖ້ຳກອງລໍກໍ່ໄດ້ເຊັ່ນດຽວກັນ.