ພາບປະກອບ

ຈັບ 10 ໂຈນໃຈຊົ່ວ ລຸມຂົ່ມຂືນສາວລາວຈົນອາການປານຕາຍ
----------------------------------------------------------------------------
(ກະລຸນາໃຊ້ວິຈາລະນະຍານໃນການບໍລິໂພກຂ່າວ)

ກ່ອນອື່ນຕ້ອງຂໍກ່າວກ່ອນວ່າເລື່ອງທີ່ຈະເອົາມາແບ່ງປັນໃຫ້ກັນຮັບຮູ້ໃນຄັ້ງນີ້ເປັນເຫດການທີ່ໜ້າສະຫຼົດໃຈເປັນຢ່າງຍິ່ງ, ດັ່ງນັ້ນທາງທີມງານຂໍສະຫງວນຮູບພາບຂອງຍິງສາວຜູ້ເຄາະຮ້າຍເອົາໄວ້ບໍ່ໃຫ້ມີການເຜີຍແຜ່ໃນວົງກວ້າງເນື່ອງຈາກມັນອາດຈະເປັນການຊ້ຳເຕີມນ້ອງຜູ້ເຄາະຮ້າຍໃນທາງອ້ອມ ແລະ ເພື່ອເປັນການປົກປ້ອງກຽດສັກສີຂອງນ້ອງບໍ່ໃຫ້ຕົກຕໍ່າໄປກວ່ານີ້ອີກ. ພ້ອມກັນນີ້ທີມງານ “ຂ່າວສານບ້ານເມືອງ” ກໍ່ຂໍອະນຸຍາດນ້ອງຜູ້ເຄາະຮ້າຍ ແລະ ບັນດາຍາດຕິພີ່ນ້ອງຂອງນ້ອງນຳເອົາເລື່ອງທີ່ເກີດຂຶ້ນໃນຄັ້ງນີ້ມາເລົ່າໃຫ້ບັນດາພີ່ນ້ອງຊາວລາວເຮົາໃຫ້ໄດ້ຮັບຟັງກັນເພື່ອເປັນຄະຕິເຕືອນໃຈ ແລະ ເປັນອຸທາຫອນໃນການໃຊ້ຊີວິດຂອງພີ່ນ້ອງຊາວລາວ ໂດຍສະເພາະແມ່ນແມ່ຍິງລາວເຮົາບໍ່ໃຫ້ຕົກເປັນເຫຍື່ອຂອງພວກມານສັງຄົມແບບນ້ອງຜູ້ເຄາະຮ້າຍທີ່ພວກເຮົາຈະເລົ່າໃຫ້ຟັງໃນຕໍ່ໄປນີ້ອີກ.
ເມື່ອວັນທີ 13 ພຶດສະພາ 2013 (ວັນຈັນ) ທີ່ຜ່ານມາບໍ່ເທົ່າໃດມື້ນີ້ເອງ, ປກສ ເມືອງໄຊທານີ ໄດ້ສົມທົບກັບອຳນາດການປົກຄອງບ້ານອຸດົມຜົນ ແລະ ບ້ານລາດຄວຍ ຕ້ອງພົບກັບເຫດອັນໜ້າສະຫຼົດໃຈເປັນຢ່າງຍິ່ງເມື່ອມີຊາວບ້ານຜູ້ໃຈດີຄົນໜຶ່ງນຳເອົາຮ່າງກາຍອັນເປືອຍເປົ່າຂອງຍິງສາວຜູ້ເຊິ່ງບໍ່ມີແມ່ນກະທັ້ງເຫື່ອແຮງທີ່ຈະຊ່ວຍເຫຼືອໂຕເອງໄດ້ແລ້ວມາສົ່ງທີ່ຫ້ອງການບ້ານອຸດົມຜົນ, ເມືອງໄຊທານີ, ນະຄອນຫຼວງວຽງຈັນ ຫຼັງໄດ້ເຫັນສະພາບຂອງນ້ອງຄົນດັ່ງກ່າວຊາວບ້ານລວມທັງແມ່ຄ້າຊາວຂາຍບໍລິເວນຕະຫຼາດແຖບນັ້ນກໍ່ໄດ້ແຫ່ກັນມາຫຸ້ມເບິ່ງຈົນເຕັມຫ້ອງການບ້ານ. ທັນທີທີ່ຮ່າງກາຍຂອງຍິງສາວໄດ້ຖືກນຳມາສົ່ງຍັງຫ້ອງການບ້ານອຸດົມຜົນເຂົາກໍ່ໄດ້ຖືກສົ່ງຕົວໄປຍັງໂຮງໝໍເມືອງໄຊທານີ້ຢ່າງຮີບດ່ວນເພາະອາການຂອງນ້ອງເຂົາຢູ່ໃນຂັ້ນຮ້າຍແຮງຫຼາຍ. 
ເຈົ້າໜ້າທີ່ໄດ້ຖາມຊາວນາຜູ້ພານ້ອງຄົນນີ້ມາສົ່ງວ່າມັນເກີດເລື່ອງຫຍັງຂຶ້ນ, ເຊິ່ງລາວກໍ່ຕອບວ່າໃນຕອນເຊົ້າມືດຂອງວັນດຽວກັນ (ວັນຈັນ) ລາວໄດ້ອອກໄປນາແຕ່ເຊົ້າແລ້ວກໍ່ພົບກັບຮ່າງກາຍຂອງນາງນ້ອຍຜູ້ນີ້ຢູ່ແຄມທາງໄປນາເຊິ່ງບໍ່ໄກຈາກທາງຢາງພໍເທົ່າໃດ ໃນສະພາບທີ່ຮ່າງກາຍເສື້ອຜ້າຂາດສ້ອຍຈົນເກືອບບໍ່ມີເສື້ອຜ້າປົກປິດຮ່າງກາຍໄວ້ເລີຍ, ຕາມຮ່າງກາຍຂອງນາງເຕັມໄປດ້ວຍຮ່ອງຮອຍການຖືກທຳຮ້າຍ, ມີຮອຍບວມຊ້ຳເຕັມຕົວວ ແລະ ໃນນາທີນັ້ນບໍ່ວ່າໃຜເຫັນກໍ່ຄົງຄິດເປັນຢ່າງອື່ນບໍ່ໄດ້ນອກຈາກຄິດວ່າລາວຖືກລຸມທຳຮ້າຍ. 
ຊາວນາຄົນດັ່ງກ່າວໄດ້ເຂົ້າໄປໃກ້ເພື່ອຈະຊ່ວຍເຫຼືອເອົານ້ອງເຂົາແຕ່ນ້ອງເຂົາກໍ່ແຂກຮ້ອງຂຶ້ນໝົດແຮງແລ້ວກໍ່ສະຫຼົບໄປ. ເມື່ອເປັນແນວນັ້ນລາວກັບເມຍກໍ່ຮີບພາກັນນຳຕົວມາສົ່ງທີ່ຫ້ອງການບ້ານອຸດົມຜົນໂດຍມີພຽງຜ້າສະໂລ່ງຜືນດຽວຊ່ວຍປົກຮ່າງກາຍຂອງນ້ອງເຂົາເອົາໄວ້.
ເມື່ອພາຍຫຼັງທີ່ນ້ອງເຂົາໄດ້ຮັບການຊ່ວຍເຫຼືອຈາກທີມແພດຢູ່ໂຮງໝໍຈົນຮ່າງກາຍສາມາດເໜັງຕີງໄດ້ແດ່ແລ້ວ ທາງເຈົ້າໜ້າທີ່ (ທະຫານ ແລະ ຕຳຫຼວດ) ກໍ່ໄດ້ສອບຖາມຕົ້ນປາຍສາຍເຫດຈິ່ງຮູ້ວ່າ: ນ້ອງຄົນນີ້ມາຈາກເມືອງວັງວຽງ, ແຂວງວຽງຈັນ, ຫາກໍ່ມາຢູ່ເຮືອນນຳອ້າຍທີ່ສ້າງຄອບຄົວຢູ່ບ້ານທົ່ງປົ່ງ, ເມືອງສີໂຄດຕະບອງ, ນະຄອນຫຼວງວຽງຈັນ, ເພື່ອກຽມລໍຖ້າເຂົ້າຮຽນຕໍ່ວິຊາຊີບ. ເວລາມາຢູ່ບ້ານນຳອ້າຍນ້ອງຄົນນີ້ໄດ້ຄົບຫາເປັນແຟນກັບຜູ້ຊາຍຄົນໜຶ່ງທີ່ຢູ່ຂ້າງບ້ານຂອງອ້າຍລາວແລະໃນວັນທີ່ເກີດເຫດ (ວັນອາທິດ) ຜູ້ຊາຍຄົນນັ້ນກໍ່ໄດ້ຊັກຊວນນ້ອງໃຫ້ອອກໄປດອງນຳກັນເຊິ່ງນ້ອງເຂົາກໍ່ຕົກລົງແລະຄອບລາອ້າຍເປັນຢ່າງດີກ່ອນອອກຈາກບ້ານ. ແຕ່ເມື່ອຂຶ້ນລົດມານຳຜູ້ຊາຍຄົນນັ້ນເຂົາຊ້ຳພັດບໍ່ໄດ້ພານ້ອງໄປດອງຕາມທີ່ບອກໄວ້, ມັນພານ້ອງເຂົາໄປຫາໝູ່ອີກ 11 ຄົນແລ້ວພວກຊົ່ວຊ້າສັນດານສັດຊັ້ນຕໍ່າພວກນີ້ກໍ່ພາກັນລຸມທຳຮ້າຍນ້ອງເຂົາຈົນອາການສາຫັດຢ່າງທີ່ໄດ້ກ່າວໄປກ່ອນໜ້ານີ້. ເມື່ອພວກມັນສົມໃຈກັນທຸກຄົນແລ້ວພວກມັນກໍ່ຄິດທີ່ຈະຂ້ານ້ອງຜູ້ເຄາະຮ້າຍດ້ວຍການເອົານ້ອງເຂົາຖິ້ມລົງລົດຂ້າງທາງ….ແຕ່ໂຊກຍັງດີທີ່ນ້ອງເຂົາບໍ່ຕາຍຈິ່ງໄດ້ຄານໄປລີ້ຢູ່ໃນປ່າແຄມທາງໄປນາຂອງຊາວບ້ານເພື່ອຫວັງວ່າຖ້າບຸນຍັງມີພໍກໍ່ຄົງຈະມີຄົນມາເຫັນຕົນເອງ.
ກ່າວເຖິງເຈົ້າໜ້າທີ່ເມື່ອໄດ້ຮັບຂໍ້ມູນເປັນທີ່ຮຽບຮ້ອຍແລ້ວກໍ່ໄດ້ນຳກຳລັງໄປຈັບຕົວພວກຊົ່ວທີ່ພາກັນຂົ່ມຂືນນ້ອງເຂົາໄດ້ທັງໝົດ 10 ຄົນ (ຫຼົບໜີໄປໄດ້ 2 ຄົນ) ເຂົ້າຄຸກຕາມລະບຽບ. ຢ່າງໃດກໍ່ຕາມເຖິງພວກຊົ່ວນັ້ນຈະໄດ້ຮັບກຳຂອງພວກມັນໄປແລ້ວແຕ່ກໍ່ຍັງມີພວກທີ່ຫຼົບໜີໄປໄດ້ ແລະ ທີ່ສຳຄັນມັນຍັງບໍ່ສົມກັບທີ່ພວກມັນໄດ້ເຮັດໄວ້ກັບນ້ອງຜູ້ເຄາະຮ້າຍໃນຄັ້ງນີ້ໄດ້ເລີຍແມ່ນແຕ່ໜ້ອຍດຽວ. ເຖິງຮ່າງກາຍຂອງນ້ອງເຂົາມັນຈະສາມາດຟື້ນຟູໄດ້ແຕ່ສະພາບຈິດໃຈບໍ່ຮູ້ວ່າອີກດົນປານໃດຈິ່ງຈະໄດ້ຮັບການຮັກສາໃຫ້ໝົດໄປ, ພາບຝັນຮ້າຍຂອງນ້ອງເຂົາມັນບໍ່ມີວັນທີ່ຈະລົບໄປຈາກຄວາມຊົງຈຳອັນແສນເຈັບປວດນີ້ໄດ້ ແລະ ມັນກໍ່ຈະຕາມຕິດຕົວໄປຕະຫຼອດຊີວິດ, ອີກຢ່າງໜຶ່ງນ້ອງເຂົາຈະໃຊ້ຊີວິດຢູ່ໃນສັງຄົມໄດ້ຢ່າງໃດ, ຈະສູ້ໜ້າກັບຜູ້ຄົນແບບໃດ ແລະ ສັກສີຄວາມເປັນຄົນທີ່ສູນເສຍໄປແມ່ນໃຜຈະເປັນຄົນກອບກູ້ຄືນມາໃຫ້ນ້ອງເຂົາ….ຝາກເລື່ອງນີ້ເຖິງເຈົ້າໜ້າທີ່ຜູ້ຮັກສາຄວາມຍຸດຕິທຳໄວ້ໃນທີ່ນີ້ດ້ວຍວ່າ: “ສິ່ງທີ່ເອີ້ນວ່າຄວາມເປັນຄົນຂອງນ້ອງເຂົາທີ່ໄດ້ຖືກຄົນນຳກັນຢຽບຢ່ຳທຳລາຍໄປ ຕ້ອງຊົດເຊີຍກັນສໍ່າໃດຈິ່ງຈະເອີ້ນໄດ້ວ່າ…ຍຸດຕິທຳພຽງພໍ”.

                                                      . 

ມີຄຳສັ່ງແນະນຳຈາກເຈົ້າຄອງນະຄອນຫລວງວຽງຈັນ. ຫ້າມລ້າໆບໍ່ພໍ ຕ້ອງມີມາດຕະການເຂັ້ມງວດໃສ່ໂທດຜູ້ປະກອບການທີ່ລະເມີດກົດລະບຽບ, ແລະ ມີການຕັກເຕືອນເດັກນ້ອຍທີ່ພົບເຫັນເຂົ້າໃຊ້ບໍລິການຮ້ານກິນດື່ມພ້ອມ ສົ່ງຂ່າວເຖິງຜູ້ປົກຄອງ ແລະ ອື່ນໆ. ຊ່ວຍກັນພັດທະນາ.

ຄຳສັ່ງແນະນຳ:

1. ຫ້າມບໍ່ໃຫ້ເປີດບໍລິການກາຍ 23:30 ໂມງ (ສຳລັບຕອນຄ່ຳວັນສຸກ, ວັນເສົາ ແລະ ວັນອາທິດ ແມ່ນບໍ່ໃຫ້ກາຍ 24:30 ໂມງ) ຢ່າງເດັດຂາດ.

2. ໃຫ້ຫົວໜ່ວຍທຸລະກິດ ວັດທະນະທຳ-ທ່ອງທ່ຽວທຸກປະເພດທີ່ນຳໃຊ້ເຄື່ອງຂະຫຍາຍສຽງຕ້ອງຖືເປັນສຳຄັນໃນການປັບປຸງສ້ອມແປງສະຖານທີ່ບໍລິການໃຫ້ຖືກຕ້ອງຕາມມາດຕະຖານທີ່ວາງໄວ້ ເພື່ອບໍ່ໃຫ້ມີສຽງດັງລົບກວນສັງຄົມອ້ອມຂ້າງຢ່າງເດັດຂາດ.

3. ຜູ້ປະກອບການວົງດົນຕີເສບປະຈຳຮ້ານ, ເສບເຄື່ອນທີ່, ເອເລັກໂທນທີ່ເຄື່ອນໄຫວຮັບໃຊ້ໃນງານບຸນປະເພນີຕ່າງໆ ຕະຫລອດການນຳໃຊ້ເຄື່ອງສຽງທຸກປະເພດຕ້ອງປະຕິ ບັດລະບຽບໃນການນຳໃຊ້ເພງ ຮ້ອງ, ຂັບລຳທ້ອງຖິ່ນຂອງລາວເປັນຕົ້ນຕໍ ແນໃສ່ຮັກສາ ແລະ ສົ່ງເສີມມູນເຊື້ອສິລະປະວັນນະຄະດີຂອງຊາດລາວເຮົາ.

4. ຫ້າມເດັດ ຂາດບໍ່ໃຫ້ສວຍໃຊ້ສະຖານທີ່ບັນເທີງ, ຮ້ານກິນດື່ມ, ຮ້ານອາຫານ, ຮ້ານອົບນວດ, ຮ້ານເສີມຄວາມ ງາມທຸກປະເພດເປັນບ່ອນມົ້ວສຸມສິ່ງເສບຕິດ ແລະການຄ້າປະເວນີ.

5. ເຈົ້າຂອງເຮືອນພັກ, ໂຮງແຮມ ທຸກລະດັບຕ້ອງເອົາໃຈໃສ່ປະຕິບັດລະບຽບການຄຸ້ມຄອງດຳເນີນທຸລະກິດຢ່າງເຂັ້ມງວດ, ເອົາໃຈໃສ່ກວດກາຕິດຕາມຄົນພັກເຊົາໃຫ້ລະອຽດ ເພື່ອຫລີກເວັ້ນການສວຍໂອກາດເປັນບ່ອນຊຸກເຊື່ອງ ແລະ ເຄື່ອນໄຫວສິ່ງທີ່ຜິດກົດໝາຍ, ຮັບປະກັນຄວາມສະຫງົບປອດໄພໃຫ້ແກ່ຜູ້ມາໃຊ້ບໍລິການ.

6. ຜູ້ປະກອບການທຸລະກິດ ວັດ ທະນະທຳ ແລະ ທ່ອງທ່ຽວທຸກປະເພດ ຕ້ອງເປັນເຈົ້າການແນະນຳເຈົ້າໜ້າທີ່ປ້ອງກັນຄວາມສະ ຫງົບໃນຮ້ານຂອງຕົນໃຫ້ເອົາໃຈໃສ່ກວດກາຄວາມເປັນລະບຽບຮຽບຮ້ອຍ, ຕິດຕາມຄົນເຂົ້າ- ອອກ, ບໍ່ອະນຸຍາດໃຫ້ເດັກທີ່ບໍ່ເຖິງ 18 ປີ ເຂົ້າໃຊ້ບໍລິການຢູ່ຕາມຮ້ານບັນເທີງ, ຫ້າມຜູ້ທີ່ບໍ່ມີໜ້າທີ່ກ່ຽວຂ້ອງຖືອາວຸດ ຫລື ຂອງແຫລມຄົມເຂົ້າໄປໃນສະຖານທີ່ບໍລິການຕ່າງໆຢ່າງເດັດຂາດ.

7. ຜູ້ປະກອບການທຸລະກິດ ວັດທະ ນະທຳ-ທ່ອງທ່ຽວຕ້ອງເອົາໃຈໃສ່ປັບປຸງທຸລະກິດຂອງຕົນໃຫ້ຖືກຕາມມາດຖານວາງໄວ້ ພ້ອມທັງຕັດສິນໃຈແກ້ໄຂຈຸດອ່ອນໃຫ້ທັນເວລາ, ໃຫ້ການຮ່ວມມືໃນການຕິດຕາມກວດກາຂອງເຈົ້າໜ້າທີ່ເປັນຢ່າງດີ.


ຈາກ "ໜັງສືພິມ ລາວພັດທະນາ"