ຫຼາຍວັນຜ່ານມານີ້ ຂ້ອຍໄດ້ອ່ານຂ່າວກ່ຽວກັບການຂ້າໂຕຕາຍຂອງເດັກນ້ອຍຜູ້ຍີງຄົນໜື່ງເຊີ່ງສາເຫດມາຈາກການທີ່ຕົນເອງຮັກເພດດຽວກັນແລະບໍ່ໄດ້ຮັບການຍອມຮັບຈາກຄອບຄົວຈົນເປັນເຫດເຮັດໃຫ້ເກີດຄວາມຄຽດຄິດຫຼາຍຈົນຕັດສິນໃຈຂ້າໂຕຕາຍໃນທີ່ສຸດ ເມື່ອຂ້ອຍໄດ້ອ່ານຂ່າວດັ່ງກ່າວຂ້ອຍຮູ້ສຶກເສຍໃຈກັບເຫດການແບບນີ້ແລະເສົ້າໃຈຈົນເຮັດໃຫ້ເກັບເອົາຂ່າວນັ້ນມາຄິດໃນຫົວຕົນເອງໄປມາຫຼາຍຮອບກ່ຽວກັບເລື່ອງທີ່ເກີດຂື້ນ ຂ້ອຍບໍ່ເຂົ້າໃຈວ່າ ພໍ່ແມ່ຄອບຄົວຂອງນ້ອງຄົນນັ້ນຄິດແນວໃດກັບການທີ່ລູກຕົນເອງເປັນເພດທາງເລືອກ ຫລື ພໍ່ແມ່ຮັບບໍ່ໄດ້ທີ່ສັງຄົມຄົນອ້ອມຂ້າງເວົ້າໃຫ້ລູກຂອງຕົນ ແລະ ຕົນເອງກໍມາຮ້າຍມາກົດດັນລູກຂອງຕົນເອງ ຫຼື ພໍ່ແມ່ບໍ່ເຄີຍເປີດໃຈລົມກັບລູກຕົນເອງເລີຍ ຈົນເຮັດໃຫ້ເຫດການແບບນີ້ເກີດຂື້ນ.

ຂ້ອຍບໍ່ແມ່ນເພດທາງເລືອກ ແຕ່ໂດຍສ່ວນໂຕແລ້ວຄິດວ່າສັງຄົມເຮົາມັນກໍພັດທະນາມາໄກແລ້ວ ຈິດໃຈມະນຸດກໍຄວນພັດທະນາຕາມການເວລາທີ່ມັນຜ່ານມາເຊັ່ນກັນ ສັງຄົມຄອບຄົວຄົນໃກ້ຄຽງຄວນໃຫ້ໂອກາດ ເພດທາງເລືອກ ໃຫ້ເຂົາໄດ້ມີໂອກາດສະແດງອອກຕາມທີ່ເຂົາເປັນ ໃຫ້ເຂົາໄດ້ເຮັດໃນສີ່ງທີ່ພວກເຂົາມັກ ເພາະ ໃຜກໍຕາມທີ່ເກີດມາເປັນຄົນ ຍ່ອມມີກຽດ ມີສັກສີ ມີຄວາມເປັນຄົນ ຄືກັນທັງໝົດທັງມ່ວນ ບໍ່ແມ່ນວ່າເຂົາເລົ່ານັ້ນເກີດມາເປັນເພດທາງເລືອກແລ້ວເຂົ້າຈະມີຄວາມຮູ້ສຶກນຶກຄິດ ແລະ ກຽດສັກສີຄວາມເປັນຄົນນ້ອຍໄປກວ່າຄົນອື່ນແຕ່ຢ່າງໃດ ຖ້າຫາກເວົ້າເລື່ອງຄວາມສາມາດ ເຂົາກໍເກັ່ງ ມີຄວາມສາມາດຫຼາກຫຼາຍ ບາງຄົນເກັ່ງກວ່າເຮົາກໍມີ. 

ສ່ວນຄົນທີ່ເປັນພໍ່ແມ່ທີ່ຍັງບໍ່ທັນເຂົ້າໃຈລູກຫຼານຂອງຕົນ ຂໍໃຫ້ເປີດໃຈກວ່ານີ້ສາ ສຶກສາຮຽນຮຸ້ ລູກໆຫຼານຂອງຕົນເອງໃຫ້ຫຼາຍກວ່ານີ້ ເປີດໃຈຍອມຮັບ ເປີດໃຈຮັບຟັງ ແລະ ໃຫ້ໂອກາດເຂົາໄດ້ເຮັດໄດ້ເປັນໃນສີ່ງທີ່ຕົນເອງເປັນ ເຖີງແມ່ນ ວ່າຄົນອື່ນຈະບໍ່ເຂົ້າໃຈ ບໍ່ຍອມຮັບໃນລູກຂອງເຮົາ ແຕ່ຢ່າງນ້ອຍເຮົາຜູ້ເປັນພໍ່ແມ່ຄວນເປັນຄົນທີ່ຢືນຄຽງຂ້າງລູກຂອງຕົນຈົນວັັນສຸດທ້າຍ ເພາະເຖີງຈະດີຈະຊົ່ວ ເຂົາເລົ່ານັ້ນ ກໍ່ເປັນລູກຂອງເຮົາ ມັນຈະຜິດຫຍັງຖ້າເຮົາຈະຮັກ ແລະ ສົ່ງເສີມສີ່ງທີ່ລູກເຮົາເປັນ ແລະ ເປັນຫຍັງເຮົາຈີ່ງຕ້ອງໄປຮັກ ໄປຊັງລູກຂອງຕົນເອງຍ້ອນຄຳເວົ້າຂອງຄົນອື່ນທີ່ບໍ່ໄດ້ມີສ່ວນໄດ້ສ່ວນເສຍໃນຄອບຄົວເຮົາ. ເລື່ອງຄອບຄົວເຮົາເຮົາຄວນຕັດສິນໃຈ ສ່ວນວ່າລູກເຮົາຈະເປັນເພດໃດກໍເລື່ອງຂອງເຂົາ ຂໍພຽງແຕ່ເຂົາເປັນຄົນດີຂອງສັງຄົມ ບໍ່ສ້າງຄວາມເດືອດຮ້ອນໃຫ້ສັງຄົມ ແລະ ຄອບຄົວເທົ່ານີ້ກໍພຽງພໍແລ້ວ ບູຮານເພີ່ນກ່າວໄວ້ ພໍ່ແມ່ລ້ຽງລູກໄດ້ແຕ່ຮ່າງກາຍ ສ່ວນຈິດໃຈບໍ່ສາມາດລ້ຽງໄດ້.

ຂ້ອຍມີຄຳຖາມຖ້າຫາກທ່ານໃດຜ່ານມາເຫັນ ຊ່ວຍຕອບ ຫຼື ເກັບໄປຕອບໃນໃຈກໍໄດ້ 

1:ທ່ານຄິດແນວໃດຖ້າຫາກລູກຂອງທ່ານເປັນເພດທາງເລືອກ?

2:ທ່ານຈະມີວິທີຮັບມືກັບສັງຄົມ ຫຼື ຄົນໃນຕະກູນແນວໃດ ຖ້າຫາກລູກຂອງທ່ານເປັນເພດທາງເລືອກແຕ່ພວກເຂົາບໍ່ຍອມຮັບ?

3:ທ່ານຈະມີວິທີໃດ ໃນການແກ້ໄຂເພື່ອໃຫ້ສັງຄົມ ຫຼື ຄົນທີ່ບໍ່ທັນເປີດໃຈຍອມຮັບເພດທາງເລືອກ ໄດ້ຫັນມາເປີດໃຈແລະໃຫ້ໂອກາດເພດທາງເລືອກຫຼາຍຂື້ນ?

    ເລື່ອງບາງເລື່ອງມັນກໍບໍ່ຢາກເວົ້າເຖີງ ແຕ່ຄົນມັກຖາມ ໂດຍເພາະເລື່ອງເງິນເດືອນ

ເຈົ້າຄິດແນວໃດກັບການທີ່ຖືກຖາມເລື່ອງເງິນເດືອນ ໂດຍສະເພາະຄົນທີ່ຫາກໍພົບກັນກັບເຮົາພຽງແຕ່ມື້ດຽວ.ຖ້າຖາມເລື່ອງສ່ວນໂຕບາງຢ່າງເຮົາກໍພໍຕອບໄດ້ເຊັ່ນວ່າ ມາແຕ່ໃສ?ບ້ານເກີດເມືອງນອນຢູ່ໃສ?ຮຽນຫຍັງ?ເຮັດວຽກຫຍັງ?ປະມານນີ້ ມັນກໍເປັນເລື່ອງທຳມະດາຂອງການພົບກັນໄໝ່ ແລະ ຖາມກັນເພື່ອ ສ້າງຄວາມ ລື້ງ ເຄີຍກັນ ແຕ່ ມັນຈະມີຄົນບາງຄົນຖາມເຖີງເງິນເດືອນ ເຊັ່ນໄດ້ເງິນເດືອນເທົ່າໃດ ? ໄດ້ຫຼາຍໃດນໍ? ສ່ວນໂຕຂ້ອຍແລ້ວ ແມ່ນບໍ່ຄ່ອຍມັກປານໃດ ທີ່ມີຄົນບໍ່ທັນສະ ໜິດມາຖາມເຖີງ ເລື່ອງນີ້.ເພາະມັນລຳບາກໃຈຈະຕອບ ຕາມທຳມະດາແລ້ວ ຂ້ອຍມັກຕອບໄປວ່າ ເງິນເດືອນກໍພໍໄດ້ໃຊ້ໄດ້ຈ່າຍຢູ່ ບາງເດືອນກໍກູ້ມກິນ ບາງເດືອນກໍ ຂັດສົນ ທຳມະດາແລ້ວ ເຮົາຕອບສຳ່ນີ້ກໍໜ້າຈະເຂົ້າໃຈແລ້ວວ່າ ເຮົາບໍ່ສະດວກ ຕອບ ປານນັ້ນຖາມບໍ່ເລີກບໍ່ແລ້ວ ຢາກຮູ້ຈຳນວນໃຫ້ໄດ້ ພັດວ່າ.

ພວກທ່ານເດ ເຄີຍພົບພໍ້ກັບປະສົບການແບບນີ້ບໍ?

ແລະ ທ່ານມີວິທີຮັບມືກັບຄົນປະເພດນີ້ແນວໃດ?

ທ່ານຄິດວ່າຖາມເຖີງເລື່ອງເງິນເດືອນສົມຄວນຖາມບໍ?

         ຫຼາຍຄົົນກໍຄົງຈະເຄີຍມີປະສົບການ  ໂດຍການຟັງມາ  ໄດ້ຍິນມາ ຫຼື ເກີດຂື້ນກັບໂຕເອງ ກ່ຽວກັບການໃຫ້ຄົນອື່ນ (ຢືມເງິນ )ຂ້ອຍຄິດວ່າທຸກຄົນກໍຈະເຄີຍແນ່ນອນຢ່າງນ້ອຍ ສຸດກໍອາດຈະເທື່ອໜື່ງ,ສອງເທື່ອ,ສາມເທື່ອ ຫຼື ຫຼາຍເທື່ອ.ຂ້ອຍເອງກໍແມ່ນໜື່ງໃນນັ້ນ ຂໍອອກໂຕກ່ອນວ່າຂ້ອຍເອງບໍ່ແມ່ນຄົນທີ່ມີເງິນຫຼາຍບໍ່ແມ່ນຄົນລວຍ ພຽງແຕ່ພໍຢູ່ ພໍກິນ ເຮັດວຽກກິນເງິນເດືອນຄືກັບຫຼາຍຄົນນະທີ່ນີ້. ແຕ່ສີ່ງທີ່ຂ້ອຍພົບເປັນປະຈຳແມ່ນມັກຈະມີຄົນມາຢືມເງິນຂ້ອຍຢູ່ເລື້ອຍໆ ມັນເປັນນຳຫຍັງຂ້ອຍກໍບໍ່ຮູ້ຄືກັນ ຂ້ອຍ ບໍ່ຮູ້ວ່າເຂົາຄິດ ແນວໃດຈີງມັກມາຢື່ມເງິນນຳຂ້ອຍ. ບາງຄົນກໍ່ສົ່ງຕາມກຳນົດ ບາງຄົນກໍສົ່ງຄືນຊ້າ ບາງຄົນກໍບໍ່ສົງເລີຍ ຈົນເຮັດໃຫ້ເສຍໝູ່ເສຍເພື່ອນໄປຍ້ອນ. ໂຕຂ້ອຍເອງ ກໍບໍ່ໄດ້ເຮັດຫຍັງໃຫ້ເຂົາ ນິໃສສ່ວນໂຕຂ້ອຍແມ່ນຈະໃຫ້ໂອກາດຜູ້ຢືມສະເໝີ ເຖີງຈະສົ່ງຊ້າແຕ່ຂ້ອຍບໍ່ເຄີຍປະຈານພວກເຂົາລົງໃນໂຊຊ້ຽວຕ່າງໆ ແມ່ນບໍ່ເຄີຍເຮັດ .ຂ້ອຍຈະລໍ ຖ້າຈົນກວ່າພວກເຂົາມາສົ່ງຄືນ ໃຫ້ຂ້ອຍ ຂ້ອຍຈະຖາມເຂົາຢູູ່ສາມເທື່ອ ໂດຍເວັ້ນໄລຍະການຖາມອອກຫ່າງກັນ ເພາະຂ້ອຍຄິດວ່າຄົນເຮົາ ມັນຕ້ອງມີ ເຫດຜົນບາງຢ່າງ ທີ່ເຮັດ ໃຫ້ບໍ່ສາມາດເອົາເງິ ທີ່ຢືມໄປມາ ສົ່ງຄືນ ຕາມກຳນົດ ແຕ່ກັບບາງຄົນທັງທີ່ຂ້ອຍໃຫ້ໂອກາດເຂົາປານນັ້ນເຂົາກໍຍັງບໍ່ມີຄວາມສຳນຶກ ບໍ່ເຫັນໃຈຂ້ອຍ ບໍ່ຕິດຕໍ່ມາຫາຂ້ອຍ ບໍ່ຕອບ ຂ້ອຍເວລາທີ່ຂ້ອຍຕິດຕໍຫາ ຂ້ອຍບໍ່ເຂົ້າໃຈຄື ກັນ  ເຂົາຄິດແນວໃດ ເຂົາເອົາຫຍັງເຮັດຫົວໃຈ.

ແຕ່ຖ້າ ຖາມວ່າຂ້ອຍເອງເດເຄີຍຢືມເງິນຄົນອື່ນບໍ? ອັນນີ້ປະຕິເສດບໍ່ໄດ້ເພາະຜ່ານມາໃນອາດີດ ສະໄໝທີ່ວຽກງານຂ້ອຍຍັງບໍ່ໝັ້ນຄົງຂ້ອຍກໍຢືມນຳໝູ່ຂ້ອຍຫຼາຍເທື່ອແລະຫຼາຍ ຄົນນຳອີກ ແຕ່ສຳລັບຂ້ອຍແລ້ວມັກຈະຖືສັດຈະຢູ່ 3 ປະການໃນການຢືມເງິນຂອງຂ້ອຍຄື :ການກົງຕໍເວລາ,ຄວາມຈີງໃຈ,ແລະ ຮັບຜິດຊອບ

1.ການກົງຕໍ່ເວລາ

ທຸກເທື່ອທີ່ຂ້ອຍຢືມເງິນນຳໃຜ ຖ້າຂ້ອຍນັດວັນເວລາສົ່ງເງິນຄືນ ແມ່ນຈະສົ່ງຕາມເວລາທີ່ຂ້ອຍນັັດທຸກເທື່ອ ເມື່ອຮອດວັນນັດສົ່ງຖ້າເຂົາບໍ່ສະດວກມາເອົາຂ້ອຍກໍ ຈະຫາທາງເອົາໄປໃຫ້ເຂົາ ຖ້າກໍລະນີຂ້ອຍບໍ່ໝັ້ນໃຈວ່າຂ້ອຍຈະສາມາດສົ່ງຕາມເວລານັດໝາຍ ຂ້ອຍຈະມີວິທີໜື່ງເມື່ອຕອນທີ່ຂ້ອຍໄປຢືມເງິນຂ້ອຍຈະກະເວລາເພື່ອໄວ້ ຕົວຢ່າງວ່າ: ເງິນເດືອນຂ້ອຍອອກທຸກວັນທີ່30ຫຼື 31 ຂອງທ້າຍເດືອນ ຖ້າຂ້ອຍບໍ່ໝັ້ນໃຈວ່າຈະໄດ້ເງິນເດືອນໃນມື້ນັ້ນ ຂ້ອຍຈະກະເພື່ອໄວ້ປະມານ2-3ວັນເຊັ່ນ ຂ້ອຍຂະບໍ່ນັດສົ່ງເງິນຄືນໃນວັນທ້າຍເດືອນ ຂ້ອຍຈະນັດສົ່ງເງິນຄືນປະມານທີ່2 ຫຼື ທີ 3 ຂອງເດືອນຖັດໄປ ເພື່ອແນ່ໃນວ່າຂ້ອຍຈະທັນເວລາສົ່ງຕາມທີ່ນັດໄວ້ ແຕ່ຖ້າຂ້ອຍໄດ້ເງິນເດືອນຕາມເວລາ ຄືທີ30 ຫຼື 31 ຂອງເດືອນຂ້ອຍກໍຟ້າວສົ່ງເງິນຄືນໂດຍທີ່ບໍ່ລໍຖ້າໃຫ້ຮອດວັນທີ່ນັດໝາຍກໍໄດ້.

2,ຄວາມຈີງໃຈ

ແນ່ນອນໃຜກໍມັກຄົນຈີງໃຈ ລວມທັງເຮົາແລະ ຄົນອື່ນ ສະນັ້ນເວລາທີ່ຂ້ອຍຢືມເງິນນຳໃຜກໍຕາມຖ້າຫາກວ່າ ບໍ່ສາມາດປະຕິບັດຕາມຂໍ້ຕົກລົງຄືການທີ່ບໍ່ສາມາດສົ່ງ ເງິນຄືນໃຫ້ແກ່ເຈົ້າຂອງເຂົາຕາມທີ່ນັດໝາຍກັນໄວ້ນັ້ນ ຂ້ອຍຈະສະແດງຄວາມຈີງໃຈທັນທີ່ ໂດຍການໂທຫາເຈົ້າໜີ້ກ່ອນວັນກຳນົດສົ່ງເພື່ອຄອບ ແລະ ອະທິບາຍເຫດຜົນວ່າ ເຮົາບໍ່ສາມາດສົ່ງເງິນຄືນຕາມທີ່ເວລານັດໝາຍນັ້ນຍ້ອນຫຍັງ ແລະ ຈະສົ່ງຄືນເຂົາໄດ້ມື້ໃດ ສ່ວນໂຕຄິດວ່າການເຮັດແບບນີ້ເຖີງຈະບໍ່ຊ່ວຍໃຫ້ເຈົ້າ ໜີ້ລົດລົງແຕ່ຢ່າງໃດ ແຕ່ຢ່າງນ້ອຍເຮົາກໍໄດ້ສະແດງໃຫ້ເຂົາເຫັນແລ້ວວ່າເຮົາຈີງໃຈ ຢ່າງນ້ອຍເຈົ້າໜີ້ກໍໜ້າຈະເຂົ້າໃຈວ່າເຮົາບໍ່ທັນຍ້ອນຫຍັງ ດີກວ່າມິດໄປບໍ່ເວົ້າບໍ່ວ່າ ຫຍັງ.

3,ມີຄວາມຮັບຜິດຊອບ

ແນ່ນອນວ່າເຮົາຢືມມາເຮົາຕ້ອງໄດ້ໃຊ້ຄືນ ເພາະບໍ່ແມ່ນເງິນເຮົາ ເຖີງຈະສົ່ງຊ້າແຕ່ກໍຕ້ອງໄດ້ສົ່ງຄືນໃຫ້ຄົບທຸກກີບ ບໍ່ວ່າຈະດ້ວຍເຫດຜົນໃດໆ ຕ້ອງຫາມາສົ່ງຄືນໃຫ້ໄດ້ ບໍ່ແມ່ນຊິປົບໜີ ໃຫ້ຄົນອື່ນປະຈານທົ່ວບ້ານທົ່ວເມືອງ.

ທັງໝົດນີ້ແມ່ນ ວິທີທີ່ຂ້ອຍໃຊ້ເມືອຂ້ອຍຢືມເງິນຄົນອື່ນ ແຕ່ຂ້ອບໍ່ເຂົ້າໃຈວ່າຄົນອື່ນມາຢືມເງິນຂ້ອຍເຂົາຄືໃຊ້ຄືນຂ້ອຍຍາກແທ້ ຈົນບາງຄົນຂ້ອຍຈົນບໍ່ເອົານຳມັນເພາະ ມັນດົນເກີນໄປ ແຕ່ຂ້ອຍກໍບໍ່ໄດ້ປະຈານເຂົາເຈົ້າດອກ ພຽງແຕ່ຕັດຂາດໄປເລີຍ ຄົນແບບນັ້ນ ເງິນທີ່ຢືມໄປຖືວ່າເປັນການຈ້າງໃຫ້ເຂົາອອກຈາກຊີວະດເຮົາໄປ.

ທຸກຄົນເດ ເຄີຍມີປະສົບການຖືກຢືມເງິນແລະບໍ່ແທນບໍ ? ແລະ ທ່ານເຮັດແນວໃດກັບຄົນປະເພດນັ້ນ? ແລະ ຖ້າທ່ານຢືມເງິນຄນອື່ນເດ ທ່ານປະຕິບັດແນວໃດຕໍ່ເຈົ້າໜີ້?

ສະບາຍດີ ເພື່ອນທາງ ພັນລາວທຸກຄົນ

ບໍ່ຮູ້ວ່າຍັງມີຄົນນຳໃຊ້ເວບນີ້ຢູ່ ຫຼື ບໍ່? ແຕ່ເຖີງຢ່າງໃດຂ້ອຍຍັງມີຄວາມຫວັງເລິກໆໃນຫົວໃຈວ່າ ຍັງມີຄົນຈຳນວນບໍ່ນ້ອຍທີ່ຍັງນຳໃຊ້ເວບນີ້ຢູ່ເລື່ອງທີ່ຂ້ອຍຢາກເວົ້າໃຫ້ຟັງໃນມື້ນີ້ ບໍ່ແມ່ນເລື່ອງຂອງຂ້ອຍເອງແຕ່ຢ່າງໃດ ແຕ່ ເປັນເລື່ອງທີ່ເກີດຂື້ນກັບຄົນໃກ້ໂຕ ແລະ ຮູ້ຈັກຮັກແພງກັນ ຂ້ອຍມີລຸ້ນນ້ອງ ແລະ ຄົນຮັກແພງຂ້ອນຂ້າງຫຼາຍພວກເຂົາເລົ່ານັ້ນມັກຈະໂທຫາ ສົ່ງຂໍຄວາມຫາ ຫຼື ມາຫາເພື່ອປຶກສານຳຂ້ອຍຢູ່ສະເໜີ
ໃນຫຼາຍເລື່ອງ ມີທັງເລື່ອງຄວາມຮັກ,ເລື່ອງການຮຽນ,ເລື່ອງສ່ວນໂຕ ເລັກໆນ້ອຍໆ ຈຳນວນຫຼາຍ ແຕ່ຂ້ອຍຈະຍົກຕົວຢ່າງມາໜື່ງເລື່ອງ ນັ້ນຄືເລື່ອງ
ການຮຽນ.
ຂ້ອຍຄິດສະເໝີວ່າທຸກຄົນຕ້ອງມີຄວາມຝັນ,ມີອຸດົມການທີ່ຢູ່ໃນຫົວຂອງຕົນເອງບໍ່ຫຼາຍກໍນ້ອຍ ແຕ່ຖາມວ່າຄວາມຝັນເລົ່ານັ້ນເຮົາມີສິດຕັດສິນໃຈເຮັດມັນດ້ວຍ
ຕົນເອງ ຫຼື ບໍ? ຫຼື ເຮັດບາງສີ່ງບາງຢ່າງທີ່ພໍ່ແມ່ເປັນຄົນຕັດສິນແລະເລືອກໃຫ້ເຮົາ ລຸ້ນນ້ອງຫຼາຍຄົນເວົ້າກັບຂ້ອຍວ່າ :ໃນການຮຽນ ແລະ ການເຮັດວຽກ ທຸກຢ່າງແມ່ນຄອບຄົວເປັນຄົນຕັດສິນໃຈໃຫ້.ນັບແຕ່ເລື່ອງການຮຽນ,ຊີວິດກການເປັນຢູ່ ອື່ນໆ ແມ່ນຄອບຄົວຕັດສິນໃຈໃຫ້ ແມ່ນແຕ່ເລື່ອງສ່ວນໂຕບາງທີພໍ່ແມ່ກໍຍັງມາມີສ່ວນຮ່ວມໃນການຕັດສິນໃຈ.

ມັນເຮັດໃຫ້ອົດຄິດບໍ່ໄດ້ວ່າ

1 ເປັນຫຍັງພໍ່ແມ່ຈີ່ງຕັດສິນໃຈແທນລູກທຸກຢ່າງ?

ຄຳຕອບທີ່ໄດ້ຄື:ຍ້ອນວ່າພໍ່ແມ່ຮັກລູກ,ຍ້ອນວ່າພໍ່ແມ່ເຄີຍລຳບາກມາກ່ອນໜ້ານີ້ແລ້ວ ເລີຍບໍ່ຢາກໃຫ້ລູກຕົນເອງລຳບາກ,ຍ້ອນພໍ່ແມ່ມີປະສົບການຜ່ານມາຫຼາຍແລ້ວ,ຍ້ອນລູກຍັງຢູ່ໃນການເບີ່ງແຍງ ແລະ ຍັງອາໃສໃຊ້ຈ່າຍເງິນຄຳນຳພໍ່ແມ່ຢູ່,ຍ້ອນຄິດວ່າລູກຍັງນ້ອຍຢູ່ສະເໜີ ແລະ ຍ້ອນເຫດຜົນອື່ນໆ

2,ເປັນຫຍັງລູກຈີ່ງບໍ່ກ້າຕັດສິນໃຈເຮັດຫຍັງດ້ວຍຕົນເອງ?

ຄຳຕອບທີ່ໄດ້ກໍຄື:ຕະຫຼອດຊີວິດທີ່ຜ່ານມາຕົນເອງບໍ່ເຄີຍໄດ້ຕັດສິນໃຈດ້ວຍຕົນເອງຈັກເທື່ອ,ຍ້ອນບໍ່ກ້າຕັດສິນໃຈເພາະຢ້ານພໍ່ແມ່ວ່າໃຫ້,ຕັດສິນໃຈບໍ່ໄດ້ເພາະຍັງບໍ່ທັນໄດ້ປຶກສາຄອບຄົວ,ຕັດສິນໃຈບໍ່ໄດ້ຍ້ອນພໍ່ແມ່ຈະບໍ່ສົງເສີມຖ້າຕັດສິນໃຈເລື່ອກໃນສີ່ງທີ່ພໍ່ແມ່ບໍ່ພ້ອມ ແລະ ຍ້ອນອື່ນໆ

3,ເປັນຫຍັງພໍ່ແມ່(ບາງຄົນ)ຈີ່ງມີຄວາມຄິດວ່າລູກຕົນເອງ ຕ້ອງເປັນ ແລະ ເຮັດຕາມຄວາມຄິດຂອງພໍ່ແມ່ຢາກໃຫ້ເປັນ?

ຄຳຕອບທີ່ໄດ້:ເພາະວ່າເຂົາເລົ່ານັ້ນເປັນລູກ,ເພາະຢາກໃຫ້ລູກໄດ້ດີ ແລະ ເປັນໃນສີ່ງທີ່ດີໆ ຕາມຄວາມຝັນຂອງພໍ່ແມ່

4,ລູກຮູ້ສຶກແນວໃດເມື່ອພໍ່ແມ່ຕັດສິນໃຈແທນທຸກເລື້ອງ?

ຄຳຕອບທີ່ໄດ້: ຄວາມຈີງບໍ່ໄດ້ຢາກເຮັດ ບໍ່ໄດ້ຢາກມາ ບໍ່ໄດ້ຢາກເປັນແບບນີ່ ແຕ່ເກງໃຈພໍ່ແມ່ ຢ້ານພໍ່ແມ່ຄຽດ.ຢ້ານພໍ່ແມ່ບໍ່ສົ່ງເສີມ.

ແຕ່ ບາງຄົນຕອບວ່າ ດີແລ້ວ ສະບາຍເຮົາຈີ່ງບໍ່ໄດ້ຄິດຫຍັງຫຼາຍ,ຖ້າເວົ້າເລື່ອງການຮຽນ ຈົບໄປພໍ່ແມ່ກໍຫາວຽກໄວ້ໃຫ້ແລ້ວ ແລະ ອື່ນໆ
 

ຈາກສີ່ງທີ່ເລົ່າມາຂ້າງເທີງຕາມແນວຄິດຂອງຂ້ອຍຄິດວ່າ ເວົ້າເລື່ອງການຕັດສິນໃຈເຮັດສີ່ງໃດສີ່ງໜື່ງຄວນຈະປ່ອຍໃຫ້ລູກໄດ້ມີທາງເລືອກ ໄດ້ຄິດດ້ວຍຕົນເອງແນ່ກໍເປັນການດີ.ໄດ້ຮຽນຮູ້ແລະຕັດສິນໃຈຫຍັງຈັກຢ່າງດ້ວຍໂຕເອງ ເວົ້າງ່າຍໆ ໃຫ້ໂອກາດເຂົາເຈົ້າໄດ້ຕັດສິນໃຈເລື່ອກເອງຕົວຢ່າງເລືອກສາຍຮຽນ,ເລືອກບ່ອນຮຽນ,ເລືອກອາຊີບ ດ້ວຍຕົນເອງ ເພາະຂ້ອຍເຊື່ອວ່າຖ້າຄົນເຮົາໄດ້ເຮັດຫຍັງທີ່ຕົນເອງມັກແລະຕົນເອງໄດ້ເລືອກ ເຂົາໜ້າຈະເຮັດໄດ້ດີ ແລະ ມີຄວາມສຸກກັບສີ່ງທີ່ເຂົາຕັດສິນໃຈແລະ ເລືອກເຮັດມັນ

ທີ່ເວົ້າມານີ້ບໍ່ໄດ້ໝາຍຄວາມວ່າ ຄອບຄົວພໍ່ແມ່ຈະປະລະ ປ່ອຍຈົນຕາມອຳເພີໃຈ ເຖີງແມ່ນເຮົາຈະໃຫ້ໂອກາດໃນການເລືອກເຮັດ ແລະ ຕັດສິນໃຈ ແຕ່ເຮົາກໍຍັງຄ່ອຍເບີ່ງພວກເຂົາແບບຫ່າງໆ ແລະ ຄອຍໃຫ້ກຳລັງໃຈ,ໃຫ້ຄໄປຶກສາໃນເມື່ອພວກເຂົາພົບບັນຫາ ບາງຄັ້ງຄາວ.

ຄຳຖາມສຸດທ້າຍ

ພວກທ່ານເດ ຄິດແນວໃດ ກັບການທີ່ພໍ່ແມ່(ບາງຄົນ)ຕັດສິນໃຈທຸກຢ່າງແທນລູກ? ແລະ ການທີ່ຍອມຮັບຟັງການອະທິບາຍຈາກລູກເດ ທ່ານໄດ້ໃຫ້ໂອກາດເຂົາຫຼາຍສຳໃດໃນການຮັບຟັງສີ່ງທີ່ເຂົາຢາກເວົ້າ?ຢາກອະທິບາຍ?ຢາກຕັດສິນໃຈ? ທ່ານ ໄດ້ໃຫ້ ທາງເລືອກ ແກ່ພວກເຂົາຫຼື້ບໍ?