• 2  ທັນວາ ໃສສ່ອງຊັ້ນ         ເດືອນເດັ່ນແວວວາວ

ເມືອງລາວເຮືອງສະໄຫວ              ຮຸ່ງໄກການກ້າວ

ນັບແຕ່ປີເຈັດສິບຫ້າ (1975)        ສະຖາປະນາປົດປ່ອຍ

ຈາກພວກຜີເຜດຮ້າຍ                   ມານບ້າບາບໜາ

• ປວງຊົນລາວທຸກແຫຼ່ງຫຼ້າ       ເອກະລາດມາມື

ບໍ່ວື່ວົນນຳຫຍັງ                              ເຫດຮົນແຮງຮ້ອນ

ນອນກໍ່ເຕັມຕາໄດ້                       ບໍ່ມີມານກວນກໍ່

ບໍ່ຄືຄາວແຕ່ກີ້                             ນອນລີ້ຢູ່ຂຸມ

• ບຸນຄຸນພັກ ປົກປ້ອງປຸ້ມ   ປານຢູ່ເມືອງແມນ

ແດນສຸຂະວະດີ                         ເລີດອີຫຼີສົມແມ້ງ

ແສງປະວັດໃສກ້າ                      ແກ້ວປະທຳມະລາດ

ຢາດລົງມາແຕ່ຟ້າ                      ມາເບື້ອງມະນຸດຄົນ

• 2 ທັນວາເອີຍ! ຂໍໃຫ້ຄຽງຄູ່ຟ້າ       ປະຊາຊາດລາວທັງຜອງ

ເມືອງລາວເປັນເມືອງທອງ           ຢູ່ສຸກສະຫງົບນິ້ງ

ສຸກສົມຈິງຈັງເວົ້າ                            ເມືອງລາວລ້ຳເລີດ

ເກີດເປັນລາວ ພູມໃຈຫຼາຍຍິ່ງແທ້        ຫາແນວອ້າງບໍ່ເທົ່າທັນ

• ຂໍຖະໜົນຮັກໝັ້ນ                    ບຸນຄຸນພັກປະຊາຊົນ

ອຸທິດຕົນ-ອຸທິດໃຈ                               ເພື່ອລາວຫຼາຍລ້ານ

ສຸກສຳລານເລີງເລື້ອຍ                           ເອື້ອຍອາວນ້ອງນຸ່ງ

ທັງພໍ່ລຸງ ແລະ ແມ່ປ້າ 2 ທັນວາເບີກຟ້າ             ນະພາແຈ້ງຮຸ່ງແສງ

• ຢ່າມີແນວກັ່ນແກ້ງ                    ແຊງຍາດມີບັນຫາ

ສິ່ງສັກສິດໃນໂລກກາ                             ຊ່ວຍມາຖະໜອມຕຸ້ມ

ມາຄຸ້ມຄອງຄຽນເຄົ້າ                             ປະຊາລາວທຸກເຜົ່າ

ຍືນຍົງຍາວຢູ່ໝັ້ນ                                 ນິຣັນດອນຄູ່ຟ້າ

                                                          ລາວກ້າກວ່າແຕ່ຫຼັງ ແທ້ນາ...

• ລູກໄດ້ຈອນຈາກບ້ານ             ມາຢູ່ວຽງວັງ

ຫັນຫຼັງລາດົງດອນ                        ທົ່ງນາທາງບ້ານ

ລາໄລພົງໄພກ້ວາງ                        ພູມຖານບ້ານເກົ່າ

ລາເຜົ່າພັນພີ່ນ້ອງ                         ເນົາຢັ້ງຢູ່ຫຼັງ

• ແມ່ກໍ່ອຸກອັ່ງເອົ້າ                     ແສນໂສກໂສກາ

ແມ່ຄະນິງຫາ                                ຫ່ວງນຳແລງເຊົ້າ

ແມ່ກໍ່ເອົາໃຈຕັ້ງ                              ລົງນາສວນໄຮ່

ເພື່ອຫາເງິນສົ່ງໃຫ້                         ຕົວເຈົ້າຈ່າຍຮຽນ

• ໃຈແມ່ວຽນບໍ່ແລ້ວ                ເລີຍສົ່ງສານຫາ

ຢາກມາເຖິງບຸດຕາ                          ຢູ່ວຽງຈັນພີ້

ສະບາຍດີບໍຫຼ້າ?                             ແພງຂວັນຕາຂອງແມ່

ຫຼືລູກມີທຸກແທ້                                ຂຽນຕ້ານຕອບຫາ ແມ່ເນີ

• ແມ່ກໍ່ຫວັງວ່າເຈົ້າ                  ຕັ້ງຕໍ່ການຮຽນ

ທັງມີໃຈພຽນອົດ                             ຮ່ຳຮຽນພຽນສູ້

ເປັນຄົນດີຄູຍ້ອງ                              ສະຫາຍແພງຮັກຮ່ຳ

ຮຽນກໍ່ເກັ່ງເສັງກໍ່ໄດ້                          ຄືດ້າມດັ່ງເຂົາ

• ຢ້ານເດ! ຢ້ານວ່າເຈົ້າ             ປະພຶດຊົ່ວແນວບໍ່ດີ

ຢ້ານວ່າມີຄົນພານ                            ຊັກຊວນທາງຮ້າຍ

ຢ້ານວ່າສາຍໃຈແກ້ວ                         ມົວເມົາຫາທ່ຽວ

ຢ້ານບໍ່ຫຼຽວລຳ່ຈ້ອງ                          ການຮຽນຖິ້ມປ່ອຍວາງ

• ຢ້ານລູກເດີນຍ່າງເຂົ້າ             ທາງແຫ່ງອະບາຍ

ເອົາກາຍໄປມົ້ວສຸມ                            ເສບດົມຢາບ້າ

ມຶນເມົາສຸລາເຫຼົ້າ                               ຊຸມແຊວຊົມຊື່ນ

ກາງຄືນຫາທ່ຽວຫຼີ້ນ                          ຕາມຮ້ານເທັກບາ

• ລູກເອີຍ! ມາຢູ່ພີ້                    ເມືອງໃຫຍ່ນະຄອນຫຼວງ

ປວງຊົນແອອັດ                                  ອັ່ງອໍໂຮມເຕົ້າ

ໃຫ້ລູກເອົາໃຈຕັ້ງ                              ຂະຫຍັນພຽນຮຽນຮຳ່

ເງິນຄຳແມ່ສົ່ງໃຫ້                              ຊົມໃຊ້ຈ່າຍອອມ ເອົາເນີ

• ອັນໜຶ່ງປະພຶດພ້ອມ                ກົດລະບຽບໂຮງຮຽນ

ຢ່າໄດ້ວົນວຽນຫາ                            ສິ່ງບໍ່ດີທັງສິ້ນ

ຢ່າໄດ້ພາກັນຫຼີ້ນ                            ການພະນັນໄຮ້ຄ່າ

ອານາຄົດເມືອໜ້າ                          ພາຍຊ້ອຍຊິໝົ່ນໝອງ ໄດ໋ລູກເອີຍ.

• ມື້ນີ້ຟ້າສະຫວ່າງແຈ້ງ           ນະພາເບີກເບີຍບານ

ສິດຂໍໄຂຂຽນສານ                  ກ່າວກອນຈານ້ອມ

ຍໍຍື່ນພອນແຖມຊ້ອນ              7 ຕຸລາຍູ້ສົ່ງ

ຈິດປະສົງມາດແມ້ງ                 ອວຍພອນໃຫ້ແດ່ຄູ ວ່ານາ

• ຄຳວ່າ: “ຄູ” ຊື່ນີ້                   ເລິກເຊິ່ງມີຄວາມໝາຍ

ໜັກແໜ້ນທັງກາຍໃຈ               ວາດວົງແວວຍື້ມ

ຫາໃດປຸນປານໄດ້                    ຄຸນຄູຜູ້ສອນສັ່ງ

ພູເຂົາສູງໝື່ນຊັ້ນ                      ບໍ່ທຽມເທົ່າທຽບພະຄຸນທ່ານແລ້ວ

• ຂາດຄູ ຄືດັ່ງຕາບອດເບື້ອງ        ບໍ່ຮູ້ຮ່ອມອຸດົມການ

ເໝືອນດັ່ງຈັນສູນແສງ                 ມືດມົວສີເສົ້າ

ມີຄູ ອັນວ່າກາຍຍາເນື້ອ               ກໍແວວວາວວາດຄ່ອງ

ມີຄູ ເຮົາຈິ່ງໃສສ່ອງເຫຼື້ອມ            ສະເໝືອນເທົ່າດັ່ງພະຈັນ ພຸ້ນແລ້ວ

• ຄູປຽບດັ່ງໜັກຮົບກ້າ      ຕີຕ່ອຍອະວິຊາ

ຄູປຽບດັ່ງສາຍລົມເຢັນ                ເປົ່າປັດຄວາມຈ້າ

ຄູປຽບດັ່ງສາຍທານ້ຳ                    ລິນໄຫຼໃສສະອາດ

ຫົດຮວາດດວງດອກໄມ້                 ໃຫ້ໃສແຍ້ມເບັ່ງບານ

• 7 ຕຸລາຍ່າວແຍ້ມ              ແຊມຊໍ່ມາລາຫອມ

ຫອມກີ່ນເນີນນານເຫີຍ                   ບໍ່ເສື່ອມສູນສັນເສົ້າ

ດຸດດັ່ງຄຸນຄູເຈົ້າ                             ປະຄອງໃຈບໍ່ຈາງຈືດ

ສິດຂໍຍໍຍົກເກົ້າ                               ປະນົມນ້ອມມອບຖວາຍ ແດ່ທ້ອນ

• ຄູຈົ່ງຍືນຍິ່ງລ້ຳ                   ກ້ຳເກີ່ງທໍລະນີ ພຸ້ນທືອນ

ສີສ່ອງໃສແວວວາວ                         ດັ່ງພະຈັນເພັງແຈ້ງ

ຍືນຍິ່ງຄົງສະຖຽນໝັ້ນ                     ຊີວາວັນຢ່າເຫຼືອງຫຼ່າ

ໂລຄາເຂັນເຄາະຮ້າຍ                        ໃຫ້ໄກເນື້ອຫ່າງຄີງ ທ່ານເນີ

• ສິດຂໍກົ້ມກາບໄຫວ້               ບູຊາກຽດຄຸນຄູ

ຜູ້ສັ່ງສອນວິຊາສິນ                            ທອດຖ່າຍເທຄວາມຮູ້

ສິດບໍ່ມີຂອງຕ້ອນ                              ຂໍພອນໄຊເສີມສົ່ງ

ຍືນຍົງຍາວແກ່ນໝັ້ນ                         ນິລັນເທົ່າຕະຫຼອດການ ພຸ້ນທ້ອນ

• ໃຫ້ທ່ານລຸລາບໄດ້               ໂຊກໃຫຍ່ມະຫັນຕາ

ວາດສະໜາສູງສັກ                             ກຽດຊື່ສຽງນິຍົມຍ້ອງ

ໃສສ່ອງສີສັນກ້າ                                ເທຍລະຄາລຸ້ງເດັ່ນ

ກາຍຍາແຂງແກ່ນເຂັ້ມ                       ໄພຮ້າຍໃຫ້ຫ່າງເຫີນ ທ່ານເນີ

• 1 ກັນຍາໄຂກີບອ້າ          ບານເບັ່ງຫອມຫວນ

 ດຸດັ່ງດວງຈັນທາ                     ພຸ້ງກະຈາຍແສງຈ້າ

 ເຕືອນບອກທາລິການ້ອຍ        ຄະນອງນາມເຍົາໜຸ່ມ

 ຊຸມນັກຮຽນໝູ່ນ້ອງ                 ພາກັນເຂົ້າຮ່ຳຮຽນ

• ການສຶກສາເປັນທາງໃຫ້           ໄປເຖິງບ່ອນຈຸດໝາຍ

 ກາສຶກສາເປັນແສງທຽນ           ສ່ອງເຍືອງແຍງໄຕ້

 ການສຶກສາພາເຮົາກ້າວ            ເປັນທວນໄຟເຮືອງຮຸ້ງ

 ການສຶກສາເປັນປ່ອງທ້າງ         ທາງເຂົ້າແຫ່ງປັນຍາ

• ຕື່ນເຖີດພວກນ້ອງນ້ອຍ           ຫຼານລູກປະຊາລາວ

 ຮີບພາກັນສຶກສາ                       ຊອກສະແຫວງຄວາມຮູ້

 1 ກັນຍາວຽນມາແລ້ວ               ເປັນວັນໄຂສົກຮຽນໃໝ່

 ຈົ່ງກຽມໃຈຕໍ່ຕັ້ງ                         ຢ່າມົວຫຼີ້ນທ່ຽວເພີນ

• ພວກນ້ອງຍັງອ່ອນນ້ອຍ            ເຍົາໜູ່ມໄວຄະນອງ

 ຢ່າໄດ້ໝອງເສຍສີ                      ເສື່ອມສູນສະໝອງປູ້

 ຮີບເລັ່ງຫາຄວາມຮູ້                     ວິຊາສິນພຽນພ່ຳ

 ສິ່ງເຫຼົ່ານີ້ປະເສີດລ້ຳ                  ເງິນແກ້ວບໍ່ປຽບປານ ແທ້ເນີ

• ຫວນຄືນຄິດອາດີດຄັ້ງ            ຕອນເມື່ອເຍົາໄວ

       ສາຍອູ່ເໝືອນສາຍໃຈ                    ຜູກພັນພະວົງກ້ຽວ

       ຄິດເຫັນດິນແດນດັ້ນ                            ວັງວຽງງາມບ້ານເກົ່າ

        ຫອມກີ່ນເນົາແນບເນື້ອ                 ມະໂນຊ້ອຍຊື່ນສະອອນ ແທ້ນາ

• ຈຳປາແດນດ່ານນັ້ນ               ຍັງບານເບີກເບີຍສີ

        ສາຍວາລີຍັງລິນນອງ                   ເຟື້ອງຟອງເຟືອນຟົ້ງ

        ສາຍນ້ຳຊອງບໍ່ເຫີຍແຫ້ງ                    ນ້ຳປາມ້ອມຍັງໄຫຼຫຼັ່ງ

        ຊາວວັງວຽງຍັງຮັກໝັ້ນ                ປະສານກ້ຽວຮ່ວມພະລັງ

• ຄິດຮອດຕອນອາບນ້ຳ            ຕາມທ່າຮີມຊອງ

        ເຫັນນ້ຳຟອງເຟືອນຟັດ                ຍວກໄຫຼເປັນຄື້ນ

        ຊົມໝູ່ປູປາບ້ອນ                          ລຽບເກາະດອນແຄມຫາດ

        ພາຍເຮືອກາບລ່ອງແກ້ງ              ວັງນ້ຳແແມ່ນະທີ

• ຄິດເມືອຍາມທ່ຽວຫຼີ້ນ           ງານປີໃໝ່ກຸດສົງການ ນັ້ນນາ

       ແສນເບີກບານສຳລານໃຈ             ອວຍພອນສົງນ້ຳ

       ເຫັນດອກຄູນບານແຍ້ມ                ດອກຟາງແດງເຮືອງເຮື້ອ

        ຈຳປາຫອມກີ່ນກົ້ວ                      ບໍ່ມົວເສົ້າເກົ່າໝອງ

• ວັງວຽງຂົງເຂດແຄ້ວນ            ມີນາມຊື່ລືຊາ

      ງາມໂສພາໃຜມາເຫັນ                     ບໍ່ອາດຫຼົງລືມໄດ້

      ນ້ຳໃຈຄົນເມືອງນັ້ນ                         ຂະຫຍັນພຽນດຸໝັ່ນ

       ສາມັກຄີຜູກໝັ້ນ                            ພາກັນສ້າງກໍ່ແປງ

• ແດນວັງວຽງຖີ່ນນັ້ນ                ຮຽມຮັກຫ່ວງຂະນຶງຫາ

      ສິ້ນວຽກງານຈະກັບມາ                   ຕ່າວຄືນຫວງໂຄ້ງ

      ຈະຄືນມາເສີມສ້າງ                         ໂຮມພະລັງແຮງຮ່ວມ

      ປິຕິພູມບັງເກີດເກົ້າ                        ບໍ່ລືມເຈົ້າຊົ່ວນິລັນ ແທ້ນາ!.

• ເພີ່ນວ່າແນວຄິດນັ້ນ             ມັນມີຫຼາກຫຼາຍສີ

       ແນວຄິດດີກໍ່ມີຫຼາຍ                    ບໍ່ເປັນໄພຕໍ່ເມືອງບ້ານ

       ແນວຄິດີບໍ່ຢ້ານ                          ໃຜມາມອງວ່າດ້ອຍຄ່າ

        ມາລະຍາດສະຕິຊາດຕໍ່ຕັ້ງ          ສັງຄົມນັ້ນເພີ່ນຍົກຍໍ

• ນານາຈິດຕັ້ງຄົນຄິດໄດ້          ໃນຫຼາຍແງ່ມູມມີ

       ຊິເຮດຫຍັງທຳຫຍັງ                    ກໍ່ຊັ່ງຊາສະຕິໄວ້

        ຄິດໄຕ່ຕອງໃຫ້ມັນຖ້ວນ             ຢ່າຫວນທຳໄປກ່ອນຄິດ

        ຊິເກີດເຫດເດືອດຮ້ອນ                ຫາກຫຼອນພໍ້ແກ້ບໍ່ທັນ ນັ້ນເດີ່

• ບາງຜ່ອງມີແນວວາດໄວ້         ຊິສ້າງກໍ່ການໄກ

           ຄິດໄປມາຫຼາຍຫົນ                 ໂລດບໍ່ມີທຳແທ້

           ມີແຕ່ມອງການຄົ້ນ                  ຄິດວົນໄປຫຼາຍຢ່າງ

           ຄິດຫຼາຍທາງວາດວ່າໄວ້           ບໍ່ເຫັນໄດ້ສິ່ງໃດ

• ບາງຜ່ອງຄິດເອົາຕັ້ງແຕ່ໄດ້     ໃຈບໍ່ໃສ່ເປັນຂອງໃຜ

        ຂໍພຽງໃຈປະສົງຄິດ                     ຢາກຊິຄວາມາມ້ຽນ

        ຄິດບຽດບຽນວຽນຫັກລ້າງ          ລິດສະຫຍາຫຍາມຜູ້ອື່ນ

        ຂືນຈິດໃຈຜູ້ອື່ນໄດ້                       ວ່າຕົນເກັ່ງກວ່າເຂົາ ບໍ່ດີເດີ່

• ບາງຜ່ອງໄວລຸ້ນນັ້ນ                ແນວຄິດແຄບບໍ່ເຫັນໄກ

        ຄິດອັນໃດພໍສະໜຸກ                     ຄຸກຄາບໍ່ກົວຢ້ານ

        ໃຈຫຶກເຫີມຫານຫ້າວ                   ຫັນໄປເອົາອະບາຍຍະມຸກ

         ຄຸກຈອງຈຳບາດພາດພັ້ງ              ພໍຟັງເບື້ອງຜູ້ກ່າວເຕືອນ

• ບາງຜ່ອງໄວລຸ້ນນັ້ນ                 ຊັກພາບລາຍສະກັນ

       ຕາມເລົາຄີງມັງກອນເຫີນ              ຄາບໄຟເຫີນຟ້າ

       ຕາມແຂນຂາລາຍໝົດກ້ຽງ             ຜົມຫຍຸ້ງເຫຍີງຊີ້ເກ່ເດ່

        ຮີດຄອງລາວເພອຸ້ຍປຸ້ຍ                  ໄປຫຼົງເພີ້ເຫີ່ແຕ່ເຂົາ

• ເພີ່ນວ່າຄິດບໍ່ດີສັກສີເສົ້າ           ບໍ່ສົມຊື່ມວນມະນຸດ

          ຈຸດຈົບຂອງຄົນມີ                         ຄິດບໍ່ດີລະວັງໄວ້

          ຫຼົບໜີໄປໄກພົ້ນ                           ຢ່າວົນວຽນປະສົງຕໍ່

           ຍົມພິບານກວດພໍ້                        ຊິຈັດມ້ຽນຢັດໃສ່ກົງ ເດີ່ທ່ານເອີຍ

ພໍ່ເຮັດວຽກ ອາບແດດ ຖືກແຜດເຜົາ

ລູກກິນເຫຼົ້າ ຟັງເພງ ຄື້ນເຄງເຫຼືອ

ແມ່ຂາຍຜັກ ກິນເຂົ້າກັບເກືອ

ລູກເອື້ອເຟື້ອ ພາສາວທ່ຽວ ລ້ຽວໂຮເທວ

ພໍ່ຫາເງິນ ສົ່ງລູກຮຽນ ພຽນອົດສາ

ລູກຕິດຢາ ຄົບໝູ່ຊົ່ວ ມົ້ວໃຫ້ເຫັນ

ແມ່ກະຫາຍ ດື່ມນ້ອງຄອງ ຕອນກອງເພນ

ລູກທະເລ້ນ ຈິບວາຍແດງ ແພງຈັບໃຈ

ພໍ່ອົດຢາກ ບໍ່ເຄີຍຈົ່ມ ທົນລຳບາກ

ລູກມັກມາກ ເພດສຳພັນ ມັນຈິບຫາຍ

ແມ່ຕ່ຳຜ້າ ປູກມ້ອນ ຫາລາຍໄດ້

ລູກຍິງຊາຍ ທ່ຽວສົມສຸກ ໂລກຕິດໂຕ

ພໍ່ສູບນ້ຳ ເຂົ້າຄັນນາ ປູກເຂົ້າກ້າ

ລູກເມົາມົວ ການພະນັນ ໝັ່ນຫາຜົວ

ແມ່ຫາບນ້ຳ ລ້ຽງເປັດໄກ່ ເຮັດສວນຄົວ

ລູກໃຈຊົ່ວ ໃຊ້ເງິນເພີນ ເດີນຫຼົງທາງ

ພໍ່ຂາຍງົວ ສົ່ງຄວາຍຮຽນ ວຽນສີສະ

ລູກຕະກະ ກິນຟຣາດຟູດ ກວ້າງຂວາງ

ແມ່ປວດເມື່ອຍ ສູ້ວຽກໜັກ ບໍ່ລະວາງ

ລູກສຳອາງ ໃຊ້ເຄື່ອງແພງ ແຂ່ງສັງຄົມ

ພໍ່ຈ່ອຍແຫ້ງ ເຫື່ອແຮງນ້ອຍ ດ້ອຍອາຫານ

ລູກປະພຶດ ອັນຕະພານ ລ່າເສບສົມ

ແມ່ເຫັນດອກ ທົບຕົ້ນ ໝົດອາລົມ

ລູກແຂ້ວຄົມ ຄ່າພໍ່ແມ່ ກ່ອນແກ່ຕາຍ.

 ຜົນການວິໃຈໃໝ່ໃນສາຫະລັດອາເມລິກາໄດ້ໃຫ້ຮູ້ວ່າຄວາມເຫງົາເຮັດໃຫ້ມີຄວາມສ່ຽງຕໍ່ການເປັນມະເຮັງຫຼາຍຂຶ້ນ ແລະ ເຮັດໃຫ້ມະເຮັງທີ່ເປັນຢູ່ ແລ້ວລຸລາມຫຼາຍຂຶ້ນ.

 ນັກວິໃຈຈາກ ມະຫາວິທະຍາໄລ ເຍລ ຮ່ວມກັບນັກວິໃຈຈາກມະຫາວິທະຍາໄລ ຊິຄາໂກ ໄດ້ສຶກສາກັບໜູພົບວ່າ: ໜູທີ່ຖືກຂັງສ່ຽງຕໍ່ການເປັນມະເຮັງຫຼາຍກວ່າໜູທີ່ຢູ່ເປັນກຸ່ມ ແລະ ເປັນມະເຮັງຊະນິດຮ້າຍແຮງກວ່າ ໂດຍລະບຸວ່າສາເຫດເກີດຈາກຄວາມເຫງົາ ແລະ ໜ້າຈະເກີດຜົນເຊັ່ນນີ້ກັບມະນຸດ.

 ວົງການແພດຮູ້ຢູ່ແລ້ວວ່າຄົນເຈັບທີ່ເປັນມະເຮັງທີ່ຊຶມເສົ້າມັນມີອັດລອດຊີວິດໜ້ອຍລົງ ແລະ ເຄີຍມີການວິໃຈພົບວ່າກຳລັງໃຈຊ່ວຍໃຫ້ຄົນເຈັບທີ່ເປັນມະເຮັງມີສຸຂະພາບດີຂຶ້ນ. ຜົນການວິໃຈຫຼ້າສຸດພົບວ່າຄວາມໂດດດ່ຽວ ແລະ ຄວາມຊຶມເສົ້າເຮັດໃຫ້ໜູທີີ່ມັກຢູ່ເປັນກຸ່ມສ່ຽງຕໍ່ການເປັນມະເຮັງເຕົ້ານົມຫຼາຍຂຶ້ນເຖິງ 3 ເທົ່າ, ໜູທີ່ຖືກແຍກຂັງມີຈຳນວນເນື້ອງອກຫຼາຍຂື້ນ 84 ເທົ່າຂອງໜູທີ່ຢູ່ເປັນກຸ່ມຢ່າງໜາແໜ້ນ ແລະ ເປັນເນື້ອງອກທີ່ສ່ຽງຕໍ່ການລຸກລາມ. ນອກຈາກນີ້ຍັງມີຮອກໂມນຄວາມຊຶມເສົ້າສູງກວ່າ ແລະ ໄຊ້ເວລາດົນກວ່າໃນການປັບຕົວອອກຈາກພາວະຊຶມເສົ້າ.

 ດ້ານນັກວິໃຈຈາກປະເທດອັງກິດພົບວ່າເປັນໄປໄດ້ທີ່ຄວາມຊຶມເສົ້າມີຜົນທາງອ້ອມຕໍ່ການເປັນມະເຮັງໂດຍອາດຈະສົ່ງຜົນມາການໄຊ້ຊີວິດທີ່ບໍ່ເປັນປະໂຫຍດຕໍ່ສຸຂະພາບເພີ່ມຄວາມສ່ຽງຕໍ່ການເປັນ ມະເຮັງເຊັ່ນການ ກິນອາຫານທີ່ບໍ່ເປັນປະໂຫຍດ, ການດື່ມເຫຼົ້າ, ການສູບຢາ ແລະ ອື່ນໆ.... ເປັນຕົ້ນ.

   ນ້ຳເປັນຢາທີ່ສຳຄັນຫຼາຍ ມີປະໂຫຍດເຖິງ 10 ປະການຄື:

    ເສີມສ້າງການເຮັດວຽກຂອງສະໝອງ, ເພີ່ມການເຜົາຜານພະລັງງານ, ຊ່ວຍຄວບຄຸມນ້ຳໜັກໃຫ້ຢູ່ໃນເກນມາດຕະຖານ, ຄວບຄຸມອຸນນະພູມຂອງຮ່າງກາຍ, ໃຫ້ຄວາມຊຸ່ມຊື່ນແກ່ປາກ, ຕາ ແລະ ດັງ, ປົກປ້ອງເນື້ອເຍື້ອອະໄວຍະວະຕ່າງໆຂອງຮ່າງກາຍ, ຊ່ວຍເສີມສ້າງການຍ່ອຍອາຫານ ແລະ ປ້ອງກັນອາການທ້ອງອືດ, ຊ່ວຍຫຼໍ່ຫຼື່ນບໍລິເວນຂໍ້ ແລະ ເສັ້ນເອັນ, ກຳຈັດຂອງເສຍອອກຈາກຮ່າງກາຍ, ຊ່ວຍໃນການລະລາຍ ແລະ ດູດຊຶມວິຕາມິນແຮ່ທາດຕ່າງໆທີ່ເປັນປະໂຫຍດສຳຄັນທີ່ຮ່າງກາຍຕ້ອງການ, ຊ່ວຍລຳລຽງສານອາຫານ ແລະ ອົກຊີແຊນ. ຜູ້ຊາຍຄວນດື່ມນ້ຳ 3.7 ລິດຕໍ່ວັນ, ຜູ້ຍິງຄວນດື່ມນ້ຳ2.7 ລິດຕໍ່ວັນ.