ຂຽນເມື່ອ ຫລາຍກວ່າ 11 ປີ ກ່ອນໜ້ານີ້
ຕາມລີ້ງ
http://lao.voanews.com/content/laos-official-insists-to-begin-construction-of-high-speed-railway-next-year/1547310.html
ທາງການລາວຢືນຢັນທີ່ຈະເລີ່ມລົງມືກໍ່ສ້າງທາງລົດໄຟຄວາມ
ໄວສູງເພື່ອເຊື່ອມຕໍ່ ກັບຈີນໃນປີໜ້າ ໂດຍຈະກູ້ຢືມເງິນທຶນຈາກ ທະນາຄານການຄ້າຂາອອກ-ຂາເຂົ້າ ຂອງຈີນຄິດເປັນມູນຄ່າ
ລວມເຖິງ 7.000 ລ້ານໂດລາ
ທ່ານ ລັດຕະນະມະນີ ຄູນນີວົງ ລັດຖະມົນຕີຊ່ວຍວ່າການກະ
ຊວງໂຍທາທິການ ແລະຂົນສົ່ງ ໄດ້ໃຫ້ການຢືນຢັນວ່າ ການກໍ່ ສ້າງທາງລົດໄຟຄວາມໄວສູງເຊື່ອມຕໍ່ລະຫວ່າງລາວກັບຈີນ ມີ
ກໍານົດທີ່ຈະເລີ່ມລົງມືໃນປີ 2013 ເພື່ອໃຫ້ສໍາເລັດ ແລະເປີດ ໃຊ້ຢ່າງເປັນທາງການພາຍໃນປີ 2018. ໃນຂະນະນີ້ ທາງການ
ລາວກັບຈີນ ກໍາລັງຢູ່ໃນຂັ້ນຕອນຂອງການເຈລະຈາກັນ ໃນ
ລາຍລະອຽດກ່ຽວກັບສັນຍາກູ້ຢືມເງິນທຶນຈາກທະນາຄານການ
ຄ້າຂາອອກ-ຂາເຂົ້າຂອງຈີນ ຊຶ່ງເຊື່ອວ່າຈະສາມາດຕົກລົງກັນ
ໄດ້ໃນໝໍ່ໆນີ້.
ການສໍາຫລວດທີ່ດິນເພື່ອກໍ່ສ້າງທາງລົດໄຟຄວາມໄວສູງ
ການກໍ່ສ້າງທາງລົດໄຟຄວາມໄວສູງດັ່ງກ່າວນີ້ ຈະຍຶດຖືຕາມ
ການສຶກສາແລະ ການອອກ ແບບກໍ່ສ້າງໂດຍບໍລິສັດທີ່ປຶກສາ
ຈາກຈີນ ທີ່ໄດ້ດໍາເນີນການສໍາເລັດໂດຍສົມບູນແລ້ວ ແລະພາກ ສ່ວນທີ່ຈະເປັນຜູ້ຮັບເໝົາກໍ່ສ້າງນັ້ນ ກໍຈະເປັນບໍລິສັດຈາກຈີນ
ເຊັ່ນດຽວກັນ.
ທັງນີ້ໂດຍອິງຕາມລາຍງານທີ່ທ່ານ ສົມສະຫວາດ ເລັ່ງສະຫວັດ
ຮອງນາຍົກລັດ ຖະມົນຕີ ຜູ້ຊີ້ນໍາວຽກງານດ້ານເສດຖະກິດ
ຂອງລາວ ໄດ້ຖະແຫຼງຕໍ່ກອງປະຊຸມສະໄໝວິສາມັນຂອງ
ສະພາແຫ່ງຊາດລາວຊຸດທີ່ 7 ທີ່ໄດ້ຈັດຂຶ້ນຢ່າງເປັນທາງການ ໃນວັນທີ 18 ເດືອນຕຸລາທີ່ ຜ່ານມານັ້ນກໍໄດ້ລະບຸວ່າ ຈະມີການປັບປ່ຽນຮູບແບບຂອງການເປັນຮຸ້ນສ່ວນໃນໂຄງການ ກໍ່ສ້າງທາງລົດໄຟຄວາມໄວສູງລະຫວ່າງລາວກັບຈີນ.
ເພາະວ່າພາຍຫຼັງຈາກທີ່ທາງການຝ່າຍຈີນໄດ້ທໍາການສຶກສາຄວາມເປັນໄປໄດ້ແລະ ອອກແບບການກໍ່ສ້າງລົດໄຟດັ່ງກ່າວສໍາເລັດແລ້ວນັ້ນ ກໍປາກົດວ່າທາງການຝ່າຍຈີນໄດ້ປະສົບກັບບັນຫາກ່ຽວກັບການຫາກຸ່ມບໍລິສັດຂອງຈີນທີ່ຈະເຂົ້າມາລົງທຶນໃນໂຄງການ ແລະສາເຫດທີ່ເຮັດໃຫ້ເກີດສະພາບການດັ່ງກ່າວ ກໍຍ້ອນວ່າຕ້ອງໃຊ້ ເວລາຍາວນານເຖິງ 38 ປີ ຈຶ່ງຈະຄຸ້ມກັບທຶນທີ່ໄດ້ລົງໄປນັ້ນ.
ດ້ວຍເຫດນີ້ ຈຶ່ງເຮັດໃຫ້ທາງການຝ່າຍຈີນໄດ້ນໍາສະເໜີຕໍ່ທາງການຝ່າຍລາວວ່າ ຖ້າຫາກທາງການລາວຍັງຕ້ອງການທີ່ຈະລົງທຶນກໍ່ສ້າງທາງລົດໄຟຄວາມໄວສູງດັ່ງກ່າວຕໍ່ໄປ ກໍມີທາງເລືອກຢູ່ທາງນຶ່ງ ຊຶ່ງກໍຄືການກູ້ຢືມເງິນທຶນຈາກທະນາຄານ ເພື່ອການສົ່ງອອກແລະນໍາເຂົ້າຂອງຈີນ ທີ່ສາມາດຕອບສະໜອງການກູ້ຢືມດັ່ງກ່າວໄດ້ທັງ 100% ເຕັມ ກໍຄືໃນມູນຄ່າ 7.000 ລ້ານ
ໂດລາ.
ຫາກແຕ່ວ່າການກູ້ຢືມດັ່ງກ່າວກໍມີເງື່ອນໄຂທີ່ລັດຖະບານລາວຈະຕ້ອງປະຕິບັດຕາມຢູ່ 4 ປະການດ້ວຍກັນຄື ການສ້າງຕັ້ງບໍລິສັດຂຶ້ນມາບໍລິຫານໂຄງການ ແລະມີສະຖານະເປັນລູກໜີ້ຂອງທະນາຄານຈີນ ໂດຍລັດຖະບານລາວຈະຕ້ອງຄໍ້າປະກັນເງິນກູ້ຢືມທັງ 100% ພ້ອມດອກເບ້ຍໃນອັດຕາ 2% ຕໍ່ປີ ເປັນເວລາ 30 ປີ ໂດຍມີໄລຍະປອດການຊໍາລະໜີ້ໃນ 10 ປີທໍາອິດ ພ້ອມກັນນີ້ ການຄໍ້າປະກັນເງິນກູ້ດັ່ງກ່າວກໍຍັງລວມເຖິງລາຍຮັບແລະຊັບສິນທັງໝົດໃນໂຄງການ ຕະຫຼອດຈົນການທີ່ລັດຖະບານລາວຍັງຈະຕ້ອງຄໍ້າປະກັນດ້ວຍລາຍຮັບຈາກບໍ່ແຮ່ 2 ແຫ່ງ ທີ່ເປັນການລົງທຶນຂອງຈີນຢູ່ໃນລາວອີກດ້ວຍ. ໂດຍໃນທີ່ນີ້ ກໍໝາຍເຖິງບໍ່ແຮ່ຄໍາ ແລະ ທອງແດງຢູ່ເຊໂປນ ກັບບໍ່ແຮ່ບ໊ອກໄຊ້ ຢູ່ຈໍາປາສັກນັ້ນເອງ.
ແຕ່ຢ່າງໃດກໍຕາມ ທາງການລາວກໍເຊື່ອໝັ້ນວ່າ ໂຄງການ ດັ່ງກ່າວຈະສ້າງຜົນປະໂຫຍດໃຫ້ກັບລາວໄດ້ຢ່າງຄຸ້ມຄ່າອີກດ້ວຍ ດັ່ງທີ່ທ່ານ ສົມສະຫວາດ ໄດ້ຖະແຫຼງ ຢືນຢັນວ່າ:
“ໂຄງການສ້າງທາງລົດໄຟເຊື່ອມຕໍ່ລາວ-ຈີນນີ້ ເປັນເສັ້ນທາງທີ່ມີຄວາມໝາຍປະວັດສາດ ອັນຈະນໍາເອົາຜົນປະໂຫຍດມາສູ່ປະເທດເຮົາຢ່າງມະຫາສານ ພ້ອມກັນນັ້ນ ກະເປັນການເຮັດໃຫ້ປະເທດລາວເປັນໃຈກາງເຊື່ອມຕໍ່ກັບບັນດາປະເທດໃນອະນຸພາກພື້ນໃຫ້ປາກົດເປັນຈິງ ດ້ານນຶ່ງອີກກະເປັນການຍົກສູງບົດບາດອິດທິພົນ ຂອງປະເທດເຮົາ ເພາະວ່າ
ປະເທດເຮົາຈະເປັນປະເທດທໍາອິດຢູ່ໃນເອເຊຍອາຄະເນ ທີ່ມີລົດໄຟຄວາມໄວສູງຕາມມາດຕະຖານສາກົນ.”
ທາງລົດໄຟສະເພາະທີ່ຢູ່ໃນເຂດລາວຈະມີລະຍະທາງຍາວເກືອບ 420 ກິໂລແມັດ ຊຶ່ງຕາມ
ການກໍ່ສ້າງທີ່ເຊື່ອມຕໍ່ຈາກຈີນຢູ່ທີ່ດ່ານຊາຍແດນບໍ່ເຕັນໃນແຂວງ ຫຼວງນໍ້າທານັ້ນ ຈະມີການ
ກໍ່ສ້າງສະຖານີໃຫຍ່ 7 ແຫ່ງ ນອກນັ້ນກໍຈະເປັນສະຖານີຍ່ອຍ ອີກ 24 ແຫ່ງ. ສ່ວນສາເຫດ
ທີ່ເຮັດໃຫ້ການກໍ່ສ້າງຕ້ອງໃຊ້ເງິນທຶນສູງນັ້ນ ກໍເນື່ອງຈາກວ່າ ພື້ນທີ່ທີ່ຈະກໍ່ສ້າງທາງລົດໄຟນັ້ນ
ເປັນທັງເຂດພູດອຍ ແລະແມ່ນໍ້າລໍາເຊ ຊຶ່ງເຮັດໃຫ້ຕ້ອງມີການເຈາະອຸບໂມງ 76 ແຫ່ງ ກໍຄິດ
ເປັນລະຍະທາງລວມເຖິງ 195 ກິໂລແມັດ ແລະຍັງຈະຕ້ອງສ້າງຂົວອີກ 154 ແຫ່ງ ຄິດເປັນ
ລະຍະທາງຍາວລວມກັນເກືອບເຖິງ 70 ກິໂລແມັດອີກດ້ວຍ ຈຶ່ງເຮັດໃຫ້ທາງລົດໄຟຄວາມ ໄວສູງໃນລາວ ຕ້ອງໃຊ້ທຶນກໍ່ສ້າງສູງດັ່ງກ່າວ.
ເປັນເທວະດາມານານ ຂໍເປັນຊາຕານຊົ່ວຄາວ
|