ຄົນແອບຮັກຄືຈັ່ງອ້າຍ           ຄິດໃນໃຈໄດ້ແຕ່ຫ່ວງ
ສິດຄວາມຫວງເປັນບໍ່ໄດ້         ຢ້ານຄົນໃກ້ເພິ່ນຊິຖາມ
ໃນທຸກຍາມຄິດຮອດຫນ້າ         ຢາກໂທຫາເອົາສຽງສົ່ງ
ສິ່ງທີ່ຄົງພໍເຮັດໄດ້              ຄືບັນຍາຍໄວ້ແຕ່ອັກສອນ ນີ້ແລ້ວ

ຂຽນບົດກອນແທນຄຳເວົ້າ         ແຕ້ມຄວາມເຫງົາອອກເປັນສື່
ນີ້ແຫລະຄືຄົນແອບຮັກຈັ່ງອ້າຍ      ບໍ່ໝາຍອ້າງຕຳແໜ່ງແຟນ
ຂໍພຽງແຂນຄວາມຮັກເຈົ້າ         ໃນຄວາມເຫງົາຂອງໃຈໝົ່ນ
ນ້ຳຕາປົນຄວາມເຈັບຊ່ຳາມ          ຍາມມເຫັນນ້ອງຄຽງຄູ່ເຂົາ ນາງເອີຍ

ກຳຫຍັງເດ່ນຳກ້ຽວ              ຍັງຮັກດຽວເຝົ້າຄອຍຫ່ວງ
ຮູ້ເຕັມຊວງເປັນບໍ່ໄດ້            ຄົນຄຽງໃກ້ນ້ອງແມ່ນເຂົາ
ຫມູ່ກອງເພິ່ນເມົາເຫຼົ້າ           ໂຕພັດເມົາແຕ່ນ້ຳທ່າ
ຮັກໃນໃຈແຕ່ບໍ່ກ້າ             ຊິຈາເວົ້າຕໍ່ພະນາງ

ບໍ່ຂໍຫຍັງດອກເດີ້ລ້າ            ພຽງສາຍຕາຍີ້ມມາຕໍ່
ຂໍເກັບເອົາຮອຍນ້ອງຍີ້ມ          ມາພີມໄວ້ໃນພາບຝັນ
ບາງວັນເພີ້ບາງວັນໃຫ້          ແອບນ້ອຍແອບຍີ້ມສົ່ງ
ບໍ່ປະສົງຊິບອກເຈົ້າ            ວ່າໃຈນີ້ຍັງຮັກຫຼາຍ ແທ້ແລ້ວ
 

ເງິນຊື້ອາຫານດີລົດເລີດໄດ້        ແຕ່ຊື້ສຸຂະພາບດີບໍ່ໄດ້

ເງິນຊື້ເຮືອນໃຫຍ່ຫຼັງງາມໄດ້       ແຕ່ຄວາມອົບອຸ່ນພາຍໃນເຮືອນບໍ່ໄດ້

ເງິນຊື້ອັນນອນແສນນຸ້ມສະບາຍໄດ້  ແຕ່ຊື້ການນອນຫຼັບເປັນສຸກບໍ່ໄດ້

ເງິນຊື້ອາວຸດສົງຄາມໄດ້          ແຕ່ຊື້ຄວາມສະຫງົບສັນຕິບໍ່ໄດ້

ເງິນຊື້ເສື້ອຜ້າລາຄາແພງໄດ້       ແຕ່ຊື້ຄວາມງາມບໍ່ໄດ້

ເງິນຊື້ເລກຫວຍໄດ້             ແຕ່ຊື້ໂຊກລາບວາດສະໜາບໍ່ໄດ້

ເງິນຊື້ຄວາມຮູ້ຕ່າງໆໄດ້          ແຕ່ຊື້ພອນສະຫວັນບໍ່ໄດ້

ເງິນຊື້ປາກກາເຈ້ຍໄດ້           ແຕ່ຊື້ຄວາມເປັນກະວີບໍ່ໄດ້

ເງິນຊື້ຄວາມຕາມໃຈໄດ້         ແຕ່ຊື້ຄວາມຈົງຮັກພັກດີບໍ່ໄດ້

ເງິນຊື້ຄຳປະຈົບຄຳຊົມໄດ້       ແຕ່ຊື້ຄວາມຈິງໃຈບໍ່ໄດ້

ເງິນຊື້ຄວາມສຸກຊົ່ວຄາວໄດ້      ແຕ່ຊື້ການເວລາກັບມາບໍ່ໄດ້

ເງິນຊື້ເມຍສາວແລະງາມໄດ້     ແຕ່ຊື້ແມ່ເປັນແບບຢ່າງຂອງລູກບໍ່ໄດ້

ເງິນຊື້ເພື່ອນກິນເພື່ອນທ່ຽວໄດ້   ແຕ່ຊື້ເພື່ອນແທ້ເພື່ອນຕາຍບໍ່ໄດ້

ເງິນຊື້ອຳນາດຍິ່ງໃຫຍ່ໄດ້      ແຕ່ຊື້ສະຕິປັນຍາບໍ່ໄດ້

ເງິນຊື້ໄດ້ຫຼາຍກໍ່ຈິງ           ແຕ່ຊື້ຊີວິດໃຜຈັກຄົນໄວ້ບໍ່ໄດ້ເລີຍ

ຄິດໃຫດ້ດີ       ເຮັດໃຫ້ຖືກ          ເວົ້າໃຫ້ຄວນ

ຢູ່ພາຍໃຕ້ລຸ່ມຟ້າ..............ໂລກມະນຸສດຽວກັນ
ບັນຫາມີທຸກຄົນ................ບໍ່ວົນຫຼີກໄດ້
ບໍ່ມີໃຜຫຼີກເວັ້ນ.................ເວນກັມເກີດຮ່ວມ
ຮວມທັງພຸທເຈົ້າ...............ຍັງຕ້ອງເຂົ້າ ສູ່ນິບພານ...ຫັ້ນເດ

ເສດຖີມີເງິນລ້ານ..............ຍັງທຸຂທາງໃຈ
ໄຂບັນຫາບໍ່ຕົກ................ກ່ວາເງິນເປັນລ້ານ
ລຳຄານທຸຂໃຈລົ້ນ...........ເມືອງຄົນແສນໜ່າຍ
ບາງຜ່ອງຂ້າຕົວຕາຍ........ບໍ່ເສັຽດາຍຮອດບ້ານ ເງິນລ້ານກໍບໍ່ສົນ....ແທ້ນາ

ຈົນແຕ່ຕົວເທົ່ານັ້ນ............ສົດຊື່ນທາງໃຈ
ຫາກິນໄປວັນໆ................ບໍ່ຄາງເຄືອງແຄ້ນ
ເງິນແສນທັງເງິນລ້ານ.......ເພັຊພອຍກ້ອນໃຫ່ຍ
ເງິນຄຳຫຼາຍປານໃດ..........ຫາກຫົວໃຈເປົ່າຫ້ວາງ ວິມານແກ້ວກໍເລົ່າໝອງ..ແທ້ນາ

ເຂົ້າຂອງມີມາກລົ້ນ...........ປັຈຈັຍນອກກາຍຍາ
ມີສອງມື ແຂນຂາ.............ນັບວ່າບຸນຫຼາຍແລ້ວ
ມີຫູຕາດັງແຂ້ວ................ທຸກປະການຖ້ວນຖີ່
ທຸຂຈົນ ຫຼືຮັ່ງມີ................ໜີໃປໃສກໍບໍ່ລອດ ເມື່ອມັນຮອດມື້ຊິຕາຍ....ທ່ານເອີຍ