ໄລ­ຍະ​ນີ້ ອາ­ກາດ​ຮ້ອນ​ຫຼາຍ​ອີ່­ຫຼີ ເຫັນ​ບ່າວ​ສາວ​ຫຼາຍ​ຄົນ​ໄປ​ນັ່ງ​ຊຸມ​ແຊວ ໂອ້​ລົມ​ກັນ​ຢູ່​ຮ້ານ​ຂາຍ​ຕຳ​ໝາກ­ຫຸ່ງ ເຄີຍ​ສັງ­ເກດ ແລະ ຖາມ​ຕົນ​ເອງ​ແດ່ ຫຼື ບໍ ເປັນ​ຫຍັງ​ນໍ ? ເວ­ລາ​ພວກ​ເຮົາ​ສັ່ງ​ໃຫ້​ແມ່­ຄົວ​ສີ­ມື​ດີ​ຕຳ​ໝາກ­ຫຸ່ງ​ໃຫ້​ກິນ ຈຶ່ງ​ຕ້ອງ​ຂໍ​ລົດ​ປະ­ສົມ “ສົ້ມ​ຫວານ​ເດີ” ເຮັດ​ເຜັດໆ​ແດ່​ໜ້ອຍ​ໜຶ່ງ... ສ່ວນ​ຫຼາຍ​ແມ່ນ​ອອກ​ມາ​ລັກ­ສະ­ນະ​ນີ້​ແຫຼະ ທັງໆ​ທີ່​ການ​ກິນ​ຕຳ​ໝາກ­ຫຸ່ງ​ໃນ​ຍາມ​ຮ້ອນ​ນັ້ນ ແມ່ນ​ການ​ກິນ​ຕຳ​ສົ້ມ ແຕ່​ມັນ​ກໍ​ຊ່ວຍ​ເພີ່ມ​ລົດ​ຊາດ​ຂອງ​ຄາບ​ເຂົ້າ​ໄດ້​ເປັນ​ຢ່າງ​ດີ ສິ່ງ​ທີ່​ໜ້າ​ສົນ­ໃຈ ເປັນ​ຫຍັງ​ນໍ ! ບາງ​ຄົນ​ກໍ​ຍັງ​ຢາກ​ສຳ­ຜັດ​ຄວາມ​ຫວານ ແລະ ເຜັດ​ໄປ​ຄຽງ​ຄູ່​ກັນ.

ມື້­ວານ​ນີ້ ມີ​ສາວ​ງາມ​ຄົນ​ໜຶ່ງ​ຍ່າງ​ເຂົ້າ​ມາ​ຮ້ານ​ຂາຍ​ຕຳ​ໝາກ­ຫຸ່ງ​ແຖວໆ​ແຄມ​ຂອງ ບໍ­ລິ­ເວນ​ທ່າ​ວັດ​ຈັນ​ນີ້​ລະ ”ສົ້ມ​ຫວານ​ເດີ ! ເຮັດ​ເຜັດໆ​ໂລດ... ຕາຍ​ບໍ່​ເອົາ​ເລື່ອງ” ເພິ່ນ​ວ່າ ບະ ! ຄື​ມາ​ແປກ​ແທ້ ຢ່າ​ທ້າ​ເດີ ! ຍາມ​ຮ້ອນ​ແບບ​ນີ້ ຖ້າ​ຫຼົງ​ກິນ​ຂາ​ແມ­ງວັນ​ເຂົ້າ​ໄປ ອາດ​ມີ​ເລື່ອງ​ເດືອດ­ຮ້ອນ​ຮອດ​ທ່ານ­ໝໍ​ໄດ້ ແນມ​ເບິ່ງ​ໜ້າ​ຕາ​ຜິວ​ພັນ​ໄວ​ອາ­ຍຸ​ແລ້ວ ຖ້າ​ບໍ່​ມີ​ໃຜ​ເອົາ​ເລື່ອງ ກໍ​ຄົງ​ຄິດ​ເສຍ­ດາຍ​ແທນ​ບໍ່​ໜ້ອຍ​ເນາະ ! ວ່າ​ບໍ ? ເພາະ​ໜ້າ​ຕາ​ງາມໆ​ສ່ຳ​ນີ້ ຖ້າ​ສົ່ງ​ເຂົ້າ​ຂັດ​ເລືອກ​ນາງ​ສາວ​ລາວ ຫຼື ນາງ​ສັງ­ຂານ​ແລ້ວ ຮັບ­ຮອງ​ວ່າ​ຖືກ​ໃຈ​ກຳ­ມະ­ການ​ຫຼາຍ​ຄົນ​ແນ່­ນອນ ຢ່າງ​ຂີ້­ຮ້າຍ ເລືອກ​ໄປ​ຖ່າຍ​ປະ­ຕິ­ທິນ ຫຼື ສະ­ແດງ​ລະ­ຄອນ​ປະ­ກອບ​ເພງ ຫຼື ມິວ​ສິກ​ວີ​ດີ​ໂອ ກໍ​ຄົງ​ໄດ້​ຮັບ​ຄວາມ​ສົນ­ໃຈ​ບໍ່​ໜ້ອຍ ເບິ່ງ​ລາວ​ກິນ​ກໍ​ຄຶດ​ເປັນ­ຕາ​ອີ່​ຕົນ ທັງ​ກິນ​ທັງ​ຂີ້­ມູກ​ຍ້ອຍ ນ້ຳ​ຕາ​ໄຫຼ.... ແລະ ບັນ​ລະ​ຍາຍ​ເລື່ອງ​ຄວາມ​ຮັກ​ຂອງ​ນາງ ຢ່າງ​ສະ­ນຸກ​ສະ​ໜານ.

”ໂຕ​ຮູ້​ບໍ ? ຄວາມ​ຮັກ​ມັນ​ກໍ​ມາ​ທັງ​ຫວານ ແລະ ຂົມ​ຄື​ກັບ​ລົດ​ຊາດ​ຂອງ​ຕຳ​ໝາກ­ຫຸ່ງ​ນີ້​ລະ”.

“ບໍ່​ຮູ້ ! ເພາະ​ເຮົາ​ບໍ່​ມັກ​ລົດ​ຂົມ ຖ້າ​ເປັນ​ສີ​ນົວໆ​ຄື​ກັບ​ປາ­ແດກ​ນີ້​ກໍ​ຍັງ​ພໍ­ໄຄ” ໝູ່​ຂອງ​ນາງ​ຢອກ​ຄືນ.

ຄວາມ​ຮັກ​ນີ້​ນ່າ​ສ່ຽວ ! ຍິ່ງ​ພົບ​ກັນ​ໄປ​ດົນ​ກໍ​ຍິ່ງ​ຕ້ອງ​ຮູ້​ໃຈ ແລະ ເຫັນ­ໃຈ​ຫຼາຍ​ຂຶ້ນ ການ​ປຸງ​ແຕ່ງ​ຄວາມ​ຮັກ​ຈະ​ໃຫ້​ຫວານ​ຢ່າງ​ດຽວ ຫຼື ຂົມ​ອ່ຳ​ລ່ຳ​ສະ­ເໝີ​ກໍ​ຄົງ​ເປັນ​ໄປ​ບໍ່​ໄດ້ ມັນ​ກໍ​ຕ້ອງ​ເພີ່ມ​ເຕີມ​ສີ­ສັນ​ໃຫ້​ກັບ​ຄວາມ​ຮັກ​ໃໝ່ໆ​ຢູ່​ຕະ­ຫຼອດ ໂຕ​ເບິ່ງ​ແມ໋ ! ແມ່ນ​ແຕ່​ແມ່​ຄ້າ­ຂາຍ​ຕຳ​ໝາກ­ຫຸ່ງ​ລາວ​ກໍ​ຍັງ​ພັດ­ທະ­ນາ​ສີ­ມື​ຢູ່​ຕະ­ຫຼອດ ຈັກ​ສົ້ມ​ຫວານ ສົ້ມ​ນົວ ເຜັດ​ແດ່ ບາງ​ຄົນ​ກໍ​ມີ​ໝາກ­ຫຸ່ງ​ປະ­ສົມ​ເຂົ້າ­ປຸ້ນ ບາງ​ຄົນ​ກໍ​ມັກ​ກິນ​ຕຳ​ປະ­ສົມ ເຊິ່ງ​ເອີ້ນ​ວ່າ: “ຕຳ​ມົ້ວ” ບໍ່​ຈັກ​ໝີ່ ເຂົ້າ­ປຽກ ໜໍ່­ໄມ້ ລູກ­ຊີ້ນ ແລະ ອື່ນໆ... ສະ​ມາ​ປິ​ຜັກ ກໍ​ຍັງ​ເອົາ​ລົງ​ຄົກ​ດຽວ ເພື່ອ​ໃຫ້​ຖືກ​ໃຈ​ລູກ​ຄ້າ ຫຼື ທັນ​ກັບ​ຄວາມ​ຢາກ​ຂອງ​ທຸກໆ​ຄົນ ຄວາມ​ຮັກ​ກໍ​ຄ້າຍໆ​ກັນ​ນີ້​ລະ ຢາກ​ມີ​ຄວາມ­ສຸກ​ກັບ​ຄວາມ​ຮັກ ກໍ​ຕ້ອງ​ປັບ­ປຸງ​ລົດ​ຊາດ​ຂອງ​ຄວາມ​ຮັກ​ຢູ່​ເລື້ອຍໆ ເວົ້າ​ສະ­ເພາະ​ແມ່ນ​ຜູ້­ຍິງ​ເຮົາ ຕ້ອງ​ພັດ­ທະ­ນາ “ສະ­ເໜ” ຂອງ​ຕົນ​ໃນ​ທຸກໆ​ຊົ່ວ­ໂມງ ຈະ​ນຸ່ງ​ແນວ­ໃດ ? ກິນ​ຫຍັງ ? ເວົ້າ​ຈາ​ແບບ​ໃດ​ເພື່ອ​ໃຫ້​ຜູ້​ຊາຍ​ຮັກ­ຫອມ ຄວນ​ໃສ່­ໃຈ​ດູ​ແລ​ເບິ່ງ­ແຍງ​ໃຫ້​ມັນ​ທັນ​ສະ­ໄໝ ເຮັດ​ໃຫ້​ພໍ­ໃຈ​ນ້ອງ​ນຸ່ງ​ພໍ່​ແມ່ ແລະ ໝູ່­ຄູ່ ຢ່າ​ເອົາ­ໃຈ​ຕົນ​ເອງ​ເປັນ​ໃຫຍ່ ຫຼື ຢ່າ​ຫຼົງ­ໄຫຼ​ເຈົ້າ​ຂອງ​ຈົນ​ລືມ​ແນມ​ເບິ່ງ​ຄົນ​ອ້ອມ​ຂ້າງ ແລະ ຕ້ອງ​ເຮັດ​ໃຫ້​ຄົນ​ເຫຼົ່າ­ນັ້ນ ພູມ­ໃຈ​ໃນ​ຄຸນ­ຄ່າ​ຂອງ​ເຂົາ­ເຈົ້າ​ແດ່ ເມື່ອ​ເວ­ລາ​ໄດ້​ຢູ່​ໃກ້​ເຮົາ ຊີ­ວິດ​ຄູ່​ຕ້ອງ​ສ້າງ​ໃຫ້​ມີ​ຄວາມ​ຕື່ນ­ເຕັ້ນ​ຢູ່​ຕະ­ຫຼອດ ປ່ຽນ​ບັນ­ຍາ­ກາດ​ໃຫ້​ໄດ້​ມີ​ເວ­ລາ​ຢອກ​ລໍ້​ມ່ວນ­ຊື່ນ​ແດ່ ສິ່ງ​ສຳ­ຄັນ​ແມ່ນ​ຕ້ອງ​ສ້າງ​ໃຫ້​ມີ​ປັດ​ໄຈ 4, 5 ແລະ 6... ການ​ເພີ່ມ​ສີ­ສັນ ແລະ ລົດ​ຊາດ​ຂອງ​ຄວາມ​ຮັກ ແມ່ນ​ການ​ເຮັດ​ໃຫ້​ຄົນ​ໃກ້​ຕົວ​ເກີດ​ຄວາມ​ອົບ​ອຸ່ນ​ສະ­ເໝີ ໂຕ​ເບິ່ງ​ຕິ​ແມ່​ຄ້າ​ຕຳ​ໝາກ­ຫຸ່ງ ເວ­ລາ​ຕຳ​ແລ້ວ​ກໍ​ຍັງ​ສົ່ງ​ໃຫ້​ລູກ​ຄ້າ​ເປັນ​ຄົນ​ຊີມ​ຈົນ​ວ່າ​ຖືກ​ໃຈ ອັນ​ນີ້​ແມ່ນ​ເວົ້າ​ສ່ວນ​ຂອງ​ຜູ້­ຍິງ​ເຮົາ​ເດີ ! ສ່ວນ​ຜູ້​ຊາຍ​ຄວນ​ຈະ​ເຮັດ​ແນວ­ໃດ​ຕໍ່​ຄວາມ​ຮັກ​ນັ້ນ ເຮົາ​ມອບ​ໃຫ້​ໂຕ​ເປັນ​ຄົນ​ມີ​ຄຳ​ເຫັນ​ສາ ຄວາມ​ຈິງ​ຢາກ​ນັ່ງ​ຟັງ​ຕໍ່​ຢູ່​ດອກ ແຕ່​ມີ​ວຽກ​ຕ້ອງ​ໄປ.

ອັນ​ຄວາມ​ລະ­ອຽດ​ຂອງ​ຜູ້­ຍິງ​ນີ້ ຕັ້ງ​ມີ​ຫຼາຍ​ສິ່ງ​ດີໆ​ອີ່­ຫຼີ ສົມ​ພໍ​ດອກ ເຂົາ​ກິນ​ຕຳ​ໝາກ­ຫຸ່ງ​ຢູ່​ຮ້ານ​ໃດ ກໍ​ບໍ່​ເຄີຍ​ເຫັນ​ຜູ້​ຊາຍ​ມາ​ຕຳ​ໃຫ້​ກິນ ອາດ​ຈະ​ແມ່ນ​ຄວາມ​ໄຮ້​ດຽງ­ສາ​ຂອງ​ຜູ້​ຊາຍ​ໃນ​ເລື່ອງ​ຂອງ​ການ​ປຸງ​ແຕ່ງ​ຄວາມ​ ຮັກ​ນີ້​ລະ ເລີຍ​ບໍ່​ໄດ້​ຮັບ​ຄວາມ​ໄວ້​ວາງ­ໃຈ​ຈັກ​ເທື່ອ.

ໂດຍ: ສາຍ​ດາ​ຣາ