ການເດີນທາງ ສູ່ເຂດນໍ້າຖ້ວມ

ກ່ອນອື່ນ ກະຂໍຂອບໃຈເພື່ອນໆພັນລາວຫຼາຍຄົນ ທີ່ໄດ້ສົ່ງຂໍ້ຄວາມຫຼັງໄມ ແລະ ຢາກໃຫ້ຂຽນໄດອາຣີ. ກໍຫາໄດ້ມີໂອກາດໄດ້ມານັ່ງຂຽນເພາະວ່າ ໄດ້ອອກໄປຕ່າງແຂວງ ລະຫວ່າງວັນທີ 25 ກໍລະກົດ ຫາ ວັນທີ 5 ສິງຫາ 2011. ກໍຈະຖືໂອກາດ ນຳເອົາເລື່ອງລາວ ການເດີນທາງຄັ້ງນີ້ມາແບ່ງປັນໃຫ້ກັບເພື່ອນໆ ມັນອາດຈະຍາວແດ່ ກະອົດສາອ່ານແດ່ເດີ!!!

ມື້ທໍາອິດຂອງການເດີນທາງ - ວັນທີ 25 ກໍລະກົດ

ພໍສຽງເພັງ ຜູ້ບ່າວເຖົ້າແລະສາວໄວທີນ ຂອງໂທລະສັບ ທີ່ຕົນເອງຕັ້ງຄ່າໃຫ້ເປັນສຽງໂມງປຸກ ດັ່ງຂຶ້ນ! ມັນກະເປັນສັນຍານບອກວ່າ ດຽວນີ້ 5  ໂມງເຊົ້າແລ້ວ!!! ຕ້ອງໄດ້ຮີບລຸກອອກຈາກບ່ອນທີ່ອົບອຸ່ນ, ອອກໄປອາບນ້ຳ ເພື່ອກະກຽມອອກເດີນທາງ ໄປຕ່າງແຂວງແຕ່ເຊົ້າ.

ລົດຫ້ອງການມາຮັບຕອນປະມານ 6 ໂມງເຊົ້າ ຈາກນັ້ນກໍ່ໄດ້ອອກໄປກິນເຂົ້າປຽກ ສີບຸນເຮືອງ! ເຂົ້າປຽກຮ້ານນີ້ ຖືວ່າເປັນຮ້ານທີ່ມີຊື່ສຽງດົງດັງ ແລະ ຖ້າຢາກຈະໄປກິນຕ້ອງໄດ້ໄປໄວໆ ບໍ່ຊັ້ນ ທ່ານຈະໄດ້ອ່ານແຕ່ປ້າຍ ທີ່ຂຽນວ່າ!! ຂອບໃຈ ເຂົ້າປຽກໝົດແລ້ວ! ພາຍຫຼັງເຕີມພະລັງ ເປັນທີ່ຮີບຮ້ອຍ ກໍ່ອອກເດີນທາງໄປຮັບ ທີມງານສອງສາມຄົນທີ່ຈະນັ່ງລົດໄປນໍາກັນ. ຂະບວນລົດ ໄດ້ພາກັນໄປເຕົ້າໂຮມກັນທີ່ ກະຊວງແຜນການ ແລະ ການລົງທຶນ ຖືວ່າເປັນຄາລະວານໃຫຍ່ສົມຄວນຂອງການເດີນທາງໄປຄັ້ງນີ້! ເພາະມີລົດທັງໝົດສິບຄັນ ທີ່ມີຄົນທັງໝົດ ສີ່ສິບກວ່ວຄົນ. ອ່ານມາຮອດນີ້ ຫຼາຍຄົນຊິມາຖາມວ່າ ແລ້ວຈະພາກັນໄປໃສ ແຕ່ເຊົ້າແທ້ ແລະ ຄືວ່າໄປຫຼາຍຄົນປານນັ້ນ!!! ດຽວຂໍຊີ້ແຈ້ງເລີຍນໍ້! ການເດີນທາງຄັ້ງນີ້ ແມ່ນຂ້າພະເຈົ້າໄດ້ເຂົ້າຮ່ວມກັບທີມງາມ ທັງຂອງລັດ ແລະ ອົງການຈັດຕັ້ງສາກົນ ເພື່ອຈະໄປປະເມີນຜົນກະທົບຈາກໄພນ້ຳຖ້ວມ ທີ່ເກີດຂຶ້ນຊ່ວງ ທ້າຍເດືອນ ມິຖຸນາ ຜ່ານມາເນື່ອງຈາກມີ ພາຍຸໄຮ່ມາ ພັດຜ່ານມາທາງ ບ້ານເຮົາ. ເຮັດໃຫ້ ແຂວງຊຽງຂວາງ, ໄຊຍະ, ວຽງຈັນ ແລະ ບໍລິຄຳໄຊ ທີ່ເປັນສີ່ແຂວງທີ່ໄດ້ຮັບຜົນກະທົບຈາກພາຍຸລູກນີ້. ຄິດວ່າຫຼາຍຄົນກະອາດຈະໄດ້ຍິນຂ່າວ!

ພໍທີມງາມມາພ້ອມໜ້າພ້ອມຕາ, ຂະບວນລົດກໍເລີ່ມອອກເດີນທາງຕອນປະມານ ເຈັດໂມງ! ເພາະວ່າຖ້າອອກຊ້າ ການສັນຈອນອາດຈະຕິດຄັດ ເພາະດຽວນີ້ ລົດລາພາຫະນະ ຢູ່ວຽງຈັນນີ້ແມ່ນຫຼາຍແທ້ໆ!!

ຂີ່ລົດອອກຈາກກະຊວງແຜນການ ໄປຕາມທາງຕັດໃໝ່ໂສກປາຫຼວງ ອອກສູ່ທາງ 13 ເໜືອ. ໃຊ້ເວລາປະມານ ຊົ່ວໂມງກວ່າໆ ພວກເຮົາກໍ່ມາຮອດແຖວໂພນໂຮງ! ນະທີ່ນີ້ ກໍ່ໄດ້ຢຸດລົດພັກປະມານ ເຄິ່ງຊົ່ວໂມງໃຫ້ ບັນດາທີມງານທີ່ຍັງບໍ່ໄດ້ກິນເຂົ້າເຊົ້າ ໄດ້ເຕີມພະລັງກັນກ່ອນ.

ຕີນລົດທັງ ສີ່ສີບຕີນກໍ່ໄດ້ໝູນໄປອີກເພື່ອມຸ້ງໜ້າໄປແຂວງຊຽງຂວາງອັນເປັນແຂວງທໍາອິດທີ່ພວກເຮົາຈະໄປ ປະເມີນຜົນກະທົບ! ຂະບວນລົດກໍ່ເລີ່ມຈະປີນໄປຕາມພູອັນເປັນເສັນທາງຄົດຄ້ຽວ! ຂຶ້ນທາງພູພະ ແລ້ວກໍ່ລົງໄປ ຈົນຮອດ ເຂດຫີນເຫີບ! ຕາມເສັ້ນທາງ ເຫັນແລ້ວກະແມ່ນເປັນຕາຊະອອນຄວາມຂຽວສະອຸ້ມຂອງທຳມະຊາດ ໃນຊ່ວງໜ້າຝົນ. ຢາກໃຫ້ເພື່ອນໄດ້ໄປເຫັນແທ້ໆ!

ລົດແລ່ນດ້ວຍຄວາມໄວປະມານຫ້າສິບກິໂລແມັດຕໍ່ຊົ່ວໂມງ ຕາມເສັ້ນທາງອັນບໍ່ຄ່ອຍສະດວກປານໃດ!! ແຕ່ບາງຊ່ວງກະໄດ້ເລັ່ງເຕັມທີ່! ປະມານ ສິບເອັດໂມງຍັງ ພວກເຮົາກໍ່ແລ່ນກາຍວັງວຽງ ແລ້ວກໍ່ມາແວະ ກິນເຂົ້າສວາຍທີ່ ເມືອງກາສີ! ຖືໄດ້ວ່າເປັນຈຸດພັກ ທີ່ຜູ້ເດີນທາງຕາມເສັ້ນທາງສາຍນີ້ຈະຕ້ອງໄດ້ຢຸດເອົາແຮງ ກ່ອນຈະເດີນທາງຕໍ່ໄປ! 

ກິນເຝີກາສີ ອີ່ມທ້ອງແລ້ວ! ກໍ່ອອກເດີນທາງຕໍ່! ເສັ້ນທາງຂ້າງໜ້ານີ້ຍອມຮັບວ່າທໍລະຫົດ ຄົດຄ້ຽວ ແຕ່ເປັນສິ່ງທີ່ທ້າຍທາຍແລະຕື່ນເຕັ້ນ. ຕາມສອງຝາກທາງກໍ່ໄດ້ຊື່ນຊົມ ທຳມະຊາດ ທົ່ງນາ ແລະ ສວນສາລີ ທີ່ກຳລັງອວດໂຊຄວາມງາມຂອງລະດູປູກຝັງ! ລົດແລ່ນຜ່ານເຂດກິ໋ວກະຈຳ ມູ້ງໜ້າສູສາມແຍກພູຄູນ! ມາຮອດນີ້ ພວກເຮົາກໍ່ໄດ້ແວະຊື້ສາລອຍ! ຕົນເອງນີ້ກະຖືວ່າ ມັກກິນສາລີສາລອຍເປັນຊີວິດຈິດໃຈ!  ລົດໂຄ້ງຂວາໄປສູ່ ແຂວງຊຽງຂວາງ!!

ເສັ້ນທາງສູ່ແຂວງຊຽງຂວາງຈາກແຍກພູຄູນ ກະສະດວກສະບາຍດີ. ພູມີປະເທດທີ່ສູງຂຶ້ນ ພວກເຮົາໄດ້ສຳພັດກັບ ທຳມະຊາດທີ່ຕ່າງອອກໄປ! ສັງເກດເຫັນທົ່ງຫຍ້າ ຂຽວສະອຸ່ມ ຍິ່ງເຂົ້າໃກ້ເຂດຕົວເມືອງ ກໍ່ຈະໄດ້ເຫັນຕົ້ນໄມ້ເຂດ ໜາວ ອັນໄດ້ແກ່ຕົ້ນແປກ ແລະ ຕົ້ນໄມ້ໃບແຫຼມ ຊະນິດອື່ນໆ. ຍັງຈື່ໄດ້ທີ່ຫຼາຍຄັ້ງຂີ່ຍົນມາຊຽງຂວາງ ຖ້າແນມລົງໄປ ຈະເຫັນພູຜາທີ່ປົກຄຸມດ້ວຍປ່າແປກ ແລະ ມີທົ່ງຫຍ້າອັນກວ້າງຂວາງ ເບິ່ງແລ້ວ ກະປານວ່າແມ່ນ ສະໜາມຕີກ່ອຟພຸ້ນລະ!

ປະມານ ສີ່ໂມງເຄິ່ງລົດພວກເຮົາກໍ່ໄດ້ມາຮອດເມືອງແປກ ອັນເປັນໃຈກາງຂອງແຂວງຊຽງຂວາງ ແຕ່ຖ້າຈະໃຫ້ຮູ້ຈັກ ແທ້ໆ ຕ້ອງເວົ້າວ່າມາຮອດໂພນສະຫວັນ! ຫຼາຍຄົນເຂົ້າໃຈຜິດ ຄິດວ່າໂພນສະຫວັນແມ່ນເມືອງໜຶ່ງຂອງແຂວງ ຊຽງຂວາງ. ແຕ່ທີ່ຈິ່ງແລ້ວ ໂພນສະຫວັນ ແມ່ນບ້ານໜຶ່ງ ຂອງເມືອງແປກ ທີ່ຕັ້ງຢູ່ໃຈກາງເມືອງ! ສະນັ້ນ, ທຸກຄົນຕ້ອງຈື່ເອົາໄວ້ເດີ!!!

ຍ້ອນການເດີນທາງອັນຍາວໄກ! ກິດຈະກຳຂອງແລງມື້ນີ້ ພວກເຮົາກໍ່ບໍມີຫຍັງຫຼາຍ ກະພຽງແຕ່ໂອ້ລົມ ເພື່ອກະກຽມ ເຮັດວຽກກັບທາງແຂວງໃນມື້ອື່ນ!! ຕົນເອງຄືຊິອາບນ້ຳ ແລ້ວຈະໄປກິນເບຍ ຈັກສອງສາມແກ້ວ ແກ້ເມື່ອຍ!!!

ຕິດຕາມພາກຕໍ່ໄປ.........

 ທາງສູ່ແຂວງຊຽງຂວາງ

ຕົ້ນແປກແຂວງຊຽງຂວາງ

ສາວນ້ອຍ ທີ່ຮ້ານນ້ຳປັ່ນ ສາມແຍກພູຄູນ!! ຢ່າລື່ມໄປອຸດໜູນເດີ!!!