ການເລືອກສີເຄື່ອງນຸ່ງ ຕາມວັນເກີດ
ນອກຈາກຮູບແບບຄວາມທັນສະໄໝຂອງເສື້ອຜ້າ ແລະເສັ້ນໃຍທີ່ນຸ່ມນວນ ນຸ່ງສະບາຍແລ້ວ ສີສັນຂອງເສື້ອຜ້າກໍເປັນອີກໜຶ່ງຢ່າງທີ່ເຮົາບໍ່ຄວນເບິ່ງຂ້າມ ເພາະສາດ ໃນການເລືອກໃສ່ເສື້ອຜ້າສີສັນຕ່າງໆ ຕາມວັນເກີດທີ່ມີມາແຕ່ບູຮານກວ່າ 700 ປີ ຕັ້ງແຕ່ສະໄໝບູຮານ. ນອກຈາກຄວາມເປັນສິລິມຸງຄຸນແລ້ວ ຍັງຊ່ວຍໃຫ້ເຮົາມີຄວາມຫມັ້ນໃຈໃນການດຳເນີນຊີວິດປະຈຳວັນຢ່າງມີຄວາມສຸກໄດ້ອີກດ້ວຍ
ສຳລັບຜູ້ທີ່ເກີດວັນອາທິດ
ອາດຈະໃຊ້ສີແດງ ສີສົ້ມ ຫລືສີອື່ນໆ ມາປະກອບ ເພື່ອໃຫ້ເກີດຄວາມມີສິລິມຸງຄຸນ ສຳລັບຊີວິດ ບໍ່ແມ່ນສະເພາະສີປະຈຳວັນຢ່າງດຽວ ຄວນຈະເລືອກນຸ່ງເສື້ອຜ້າ ດ້ວຍໂທນສີແດງ ທັງແດງສົດ ແດງເຂັ້ມ ລວມທັງຊົມພູ ສົ້ມ ຫລືແສດ ຈະຊ່ວຍໃຫ້ຄົນເກີດວັນນີ້ຮູ້ສຶກສົດຊື່ນ
ສ່ວນສີຄຳ ຄີມ ແລະຂຽວ ຈະໃຫ້ຄວາມເປັນມຸງຄຸນໃນເລື່ອງຂອງໂຊກລາບ
ສຳລັບຜູ້ທີ່ເກີດວັນຈັນ
ຜູ້ທີ່ເກີດມື້ນີ້ ມີນິໄສອ່ອນໂຍນ ອ່ອນຫວານ ນຸ່ມນວນ ແຕ່ຂີ້ໃຈນ້ອຍໄປແດ່ ພະຍາຍາມຢ່າຄິດຫຼາຍ ເພາະອາດເຮັດໃຫ້ມີເລື່ອງຫງຸດຫງິດບໍ່ສະບາຍໃຈ ແຕ່ກໍເປັນຄົນດີມີນ້ຳໃຈ ແລະມີສະເໜ່ ໃນຕົວເອງເປັນພິເສດ
ສີເຄື່ອງນຸ່ງທີ່ຄວນນຸ່ງຄື ເຫລືອງ ຄຳ ໄຂ່ໄກ່ ຄີມ ຟ້າ ເພາະຈະມີຜູ້ໃຫຍ່ໃຫ້ຄວາມຊ່ວຍເຫລືອສະໜັບສະໜູນ
ສີຂຽວ ໝາຍເຖິງການເລື່ອນຕຳແໜ່ງ ຄວາມດຸໝັ່ນຂັນແຂງ ຫລືຄວາມກະຕືລືລົ້ນໃນການເຮັດວຽກງານ
ສ່ວນສີມ່ວງ ຈະໝາຍເຖິງໂຊກລາບ
ສະຫລຸບແລ້ວສີທີ່ເໝາະສຳລັບຄົນເກີດວັນຈັນຫລາຍທີ່ສຸດກໍຄື ເຫລືອງ ເຫລືອງຄຳ ໄຂ່ໄກ່
ສຳລັບຜູ້ທີ່ເກີດວັນອັງຄານ
ເປັນ ຄົນທີ່ມີຈິດໃຈເຂັ້ມແຂງ ໂດດດ່ຽວ ຕັດສິນໃຈຫຍັງດ້ວຍຕົວເອງ ເປັນຄົນກົງໄປກົງມາ ມີຄວາມຍຸດຕິທຳເປັນທີ່ສຸດ ທີ່ສຳຄັນຄືເປັນຄົນຮັກດຽວໃຈດຽວ ແລະຮັກຄອບຄົວເປັນທີ່ສຸດ
ຜູ້ທີ່ເກີດວັນນີ້ຄວນເລືອກນຸ່ງເຄື່ອງສີ ຊົມພູ ແດງ ສົ້ມ ຂຽວ ເປັນພິເສດ ເພາະເປັນສິລິມຸງຄຸນ ແລະຈະເຮັດໃຫ້ຄົນເກີດວັນອັງຄານເບິ່ງອ່ອນຫວານນຸ່ມນວນ ແລະເບິ່ງເປັນທຳມະຊາດຫລາຍຍິ່ງຂຶ້ນ ນອກຈາກນີ້ສີຊົມພູ ແລະແດງ ຍັງໝາຍເຖິງໂຊກລາບອີກດ້ວຍ
ສຳລັບຜູ້ທີ່ເກີດວັນພຸດ
ເປັນຄົນທີ່ມີສະເໜ່ ແລະມີສະຕິປັນຍາປະຕິພານ ຄຳເວົ້າຄຳຈາຂອງຜູ້ທີ່ເກີດວັນພຸດນັ້ນຖືວ່າມີສະເໜ່ຫລາຍ ບໍ່ວ່າຈະເປັນຍິງຫລືຊາຍ ໃຜໄດ້ຟັງຮັບຮອງວ່າຕ້ອງເຄີບເຄີ້ມຕາມໄປນຳແນ່ນອນ
ສີຂຽວນອກຈາກຈະ ເປັນສີປະຈຳວັນແລ້ວ ກໍຍັງເປັນສີແຫ່ງໂຊກລາບຂອງຄົນວັນພຸດອີກດ້ວຍ ບໍ່ວ່າຈະເປັນ ຂຽວອ່ອນ ຂຽວແກ່ ຂຽວໃບໄມ້ ລວມທັງສີທຳມະຊາດ ຂອງສາຍລົມແລະແສງແດດ ກໍຖືເປັນສີແຫ່ງສິລິມຸງຄຸນ ທີ່ຈະຊ່ວຍເສີມສ້າງພະລັງຊີວິດໃຫ້ກັບຜູ້ທີ່ເກີດວັນພຸດໄດ້ເປັນຢ່າງດີ
ສຳລັບຜູ້ທີ່ເກີດວັນພະຫັດ
ຄົນທີ່ເກີດວັນພະຫັດ ພວກເຂົາບອກວ່າເປັນຜູ້ທີ່ມີທຳມະສູງ ຊື່ສັດ ຮັກດຽວໃຈດຽວ ທີ່ສຳຄັນຄືມີຄວາມເປັນຜູ້ນຳ ເປັນຜູ້ທີ່ຄິດໄປເຖິງອະນາຄົດ ວາງແຜນໄກ ແລະມີສະເໜ່ໜ້າຄົ້ນຫາ
ສີສົ້ມ ສີຄຳ ສີປະກາຍຕ່າງໆ ອີກທັງສີນ້ຳຕານອ່ອນ ແລະນ້ຳຕານແກ່ ກໍເປັນມຸງຄຸນກັບຜູ້ທີ່ເກີດວັນນີ້ ເຄື່ອງນຸ່ງທີ່ເລືອກນຸ່ງຄວນເປັນສີສົ້ມ ແສດ ທອງ ເພາະເປັນທີ່ຈະນຳເລື່ອງດີໆ ມາສູ່ຕົວທ່ານ
ສຳລັບຜູ້ທີ່ເກີດວັນສຸກ
ຊື່ກໍບອກຢູ່ແລ້ວວ່າເປັນຄົນທີ່ມີຄວາມສຸກ ສົດຊື່ນ ລື່ນລົມ ສົດໃສຕະຫລອດເວລາ ມອງໂລກໃນແງ່ດີ ແລະມີອາລົມຂັນ ເປັນສະເໜ່ຢ່າງດີໃຫ້ ທັງກັບເພດກົງກັນຂ້າມ ແລະເພດດຽວກັນ ໃຜໆ ກໍຢາກທຳຄວາມຮູ້ຈັກກັບຄົນເກີດວັນສຸກທັງນັ້ນແຫລະ ເຖິງຈະເບິ່ງໂລກໃນແງ່ດີ ແລະຄິດການໄກ ແຕ່ກໍຕ້ອງລະວັງກັບອາລົມທີ່ປ່ຽນແປງງ່າຍໄວ້ນຳ
ສີທີ່ໃຫ້ຄວາມເປັນມຸງຄຸນຂອງຄົນເກີດວັນນີ້ຄື ສີຟ້າທຸກແບບ ສາມາດເລືອກນຸ່ງເຄື່ອງໄດ້ທຸກສີ ແຕ່ສີທີ່ນຳໂຊກລາບໄດ້ດີຄື ສີຊົມພູ ຟ້າ ແດງ ເຫລືອງອ່ອນ ຂາວ ຄີມ ແລະສີທອງ
ສຳລັບຜູ້ທີ່ເກີດວັນເສົາ
ເປັນຄົນທີ່ມີຄວາມມຸ່ງໝັ້ນ ແລະເຊື່ອໝັ້ນໃນຕົວເອງສູງ ບໍ່ຄ່ອຍຍອມໃຜ ມີຄວາມຂີ້ໃຈນ້ອຍ ຕ້ອງຫລຸດທິດຖິລົງນຳ ເນື່ອງຈາກເປັນຄົນກົງໄປກົງມາ ສະເໜ່ ຂອງຄົນທີ່ເກີດມື້ເສົາ ຄື ເປັນຜູ້ທີ່ມີຄວາມເລິກລັບ ໜ້າຄົ້ນຫາ ແລະມີຄວາມເປັນຕົວຂອງຕົວເອງສູງ
ຖ້າຢາກໃຫ້ຜູ້ທີ່ເກີດວັນນີ້ມີສະເໜ່ ກໍຕ້ອງເລືອກໃສ່ເສື້ອຜ້າສີມ່ວງ ທັງມ່ວງອ່ອນ ສີຟ້າ ສີນ້ຳເງິນເຂັ້ມ ຫລືຊົມພູ ຈະຊ່ວຍສົ່ງເສີມໃຫ້ຄົນວັນເສົາເບິ່ງມີສະເໜ່ ໜ້າຮັກ ອ່ອນຫວານແລະນຸ່ມນວນຂຶ້ນ ອີກທັງເຮັດໃຫ້ຜູ້ໃຫຍ່ໃຫ້ການສະໜັບສະໜູນອີກດ້ວຍ
ຂຽນເມື່ອ: ມ.ກ.. 28, 2011
| ມີ
ໜວດໝູ່:
