ຜະ​ຫຍາ​ກ້ຽວ​ພາ​ລາ​ສີ​ໂຕ້​ຕອບ​ໜຸ່ມ​ສາວ

(ຊາຍ).... ສຸກສະ​ບາຍ​ໝັ້ນ​ສະເໝີ​ມັນ​ເຄືອ​ເກົ່າ​ບໍ່ນໍ່ ທັງ​ພໍ່​ແມ່​ພີ່​ນ້ອງ​ສະ​ບາຍ​ຖ້ວນ​ຢູ່​ສູ່​ຄົນ​ບໍ່​ເດ

(ຍິງ).... ນ້ອງ​ນີ້ ສຸກ​ສະ​ບາຍ​ໝັ້ນ ສະເໝີ​ມັນ​ເຄືອ​ເກົ່າ​ອ້າຍເອີຍ ທັງ​ພໍ່​ແມ່​ພີ່​ນ້ອງ​ສະບາຍພ້ອມ​ສູ່​ຄົນ

(ຊາຍ).... ອ້າຍ​ນີ້​ຢາກ​ຖາມ​ຂ່າວ​ນ້ຳ ຖາມ​ຂ່າວ​ເຖິງ​ປາ ຖາມ​ຂ່າວ​ນາ ຢາກ​ຖາມ​ຂ່າວ​ເຖີງ​ເຂົ້າ ອ້າຍ​ຢາກ​ຖາມ​ຂ່າວ​ນ້ອງ​ວ່າ​ມີ​ຜົວ​ແລ້ວ​ຫລື​ບໍ່​ ຫລື​ວ່າ​ມີ​ແຕ່​ຊູ້ ຜົວ​ຊິຊ້ອນ​ຫາກ​ບໍ່ມີ

(ຍິງ).... ໂອນໍ່ອ້າຍ​ເອີຍ ນ້ອງ​ນີ້​ປອດ​ອ້ອຍ​ຊ້ອຍ​ສະເໝີ​ດັ່ງ​ຕອງ​ຕັດ ພັດ​ແຕ່​ເປັນ​ຍິງ​ມາ​ບໍ່ມີຊາຍ​ຊິມາ​ກ້ຽວ ພັດ​ແຕ່​ສອນ​ລອນ​ຂຶ້ນ​ບໍ່ມີ​ເຄືອ​ກ້ຽວ​ພຸ່ມ ພັດ​ແຕ່​ເປັນ​ພຸ່ມ​ໄມ້​ເຄືອ​ຊິກ້ຽວ​ກໍ່ບໍ່ມີ

(ຊາຍ).... ນ້ອງ​ຢ່າ​​ຕິ​ຖະແຫຼງເວົ້າ ເອົາ​ເລົາ​ມາ​ປູກ ບໍ່ແມ່ນເຊື້ອຊາດອ້ອຍກິນໄດ້ກໍ່ບໍ່ຫວານ

(ຍິງ).... ຄັນ​ບໍ່ຈິງນ້ອງບໍ່ເວົ້າ ຄັນບໍ່ເອົານ້ອງບໍ່ວ່າ ຄັນບໍ່ແມ່ນທ່ານ້ອງບໍ່ໄລ່ຄວາຍລົງ ຄັນແມ່ນຕີລົງແລ້ວຖອຍຄືນມັນຊິຍາກ ມັນຊິລຳບາກນ້ອງທຽວຫຍຸ້ງຢູ່ບໍ່ເຊົາ

(ຊາຍ).... ອ້າຍ​ນິ້ ເປັນ​ດັ່ງ​ອາ​ຊາ​ໄນ​ມ້າ ເດິນທາງ​ຫິວ​ຫອດ ມາ​ພໍ້​ນ້ຳ​ສ້າງ​ແລ້ວ​ໃນ​ຖ້ຳ​ກະ​ສ່ອງ​ດາຍ ກາຍ​ໄປ​ແລ້ວ ຜັດ​ຄືນ​ມາ​ກົ້ມ​ສ່ອງ ຢາກ​ກິນ​ກະ​ກິນ​ບບໍ່ໄດ້ ເລຍ​ລິ້ນ​ຢູ່​ເປົ່າ​ດາຍ

(ຍິງ).... ນ້ອງ​ນີ້​ເປັນ​ດັ່ງ​ເຮືອ​ຄາ​ແກ້ງ ເສົາ​ປະ​ດົງ​ຄຸງ​ຫາດ ຫາ​ຜູ້​ຄຶດ​ຊ່ອຍ​ແກ້ ໃຫ້​ຫາຍ​ຮ້ອນ​ກະ​ບໍ່ມີ

ໄຂ​ກະ​ໄຂ​ມາ​ຖ້ອນ​ໄຂ​ແປວ​ປ້ານ​ເປ່ງ ຄັນ​ບໍ່ໄຂ​ເປ່ງ​ທ້າງ​ທາງ​ນັ້ນ​ສິ​ຂາດ​ເຂີນ

ຄຳ​ປາກ​ເຈົ້າ​ບອກວ່າ​ໄຫລ​ໄຫລ ຫົວ​ໃຈ​ເຈົ້າ​ບອກວ່າ​ລ້ຽວ​ລ້ຽວ

ເຈົ້າ​ຫາກ​ຝັງ​ກ່ຽວ​ໄວ້​ໃນ​ຫັ້ນ​ໝື່ນ​ດວງ ບໍ່ຮູ້

ຄອງ​ກິນ​ນ້ອງ​ຊ້າງ​ສາມ​ປີ​ຂີ້​ບໍ່​ອອກ ຄອງ​ເອົາ​ລູກ​ພະ​ເຈົ້າ​ເລີຍ​ຊິເຖົ້າ​ແກ່​ຕາຍ

ຄອງ​ກິນ​ນ້ອງ​ຊ້າງ​ສາມ​ປີ​ຂີ້​ບໍ່​ອອກ ອອກ​ແຕ່​ຂີ້​ກຳ​ພ້າ​ສາມ​ກ້ອນ​ທໍ່​ສາ​ລາ

ຄາວ​ເມື່ອ​ເວົ້າ​ໝາຍ​ຊິ​ເອົາ​ມາ​ຈີ່ ບາດ​ວ່າ​ມາ​ຮອດ​ແລ້ວ​ສັງ​ບໍ່​ປິ້ງ​ຈີ່​ກິນ

ຄາວ​ເມື່ອ​ເວົ້າ​ແຕ່​ກີ້​ ວ່າ​ຊິຕົບ​ແຜ່ນ​ແປ້ນ​ແປນ​ມື​ໃຫ້​ນາງ​ນັ່ງ ບາດ​ວ່າ​ມາ​ຮອດ​ແລ້ວ​ຈຳ​ໃຫ້​ນັ່ງ​ໜາມ