ຂຽນເມື່ອ: ກ.ຍ.. 2, 2011
| ມີ
17 ຄຳເຫັນ
ແລະ
0 trackback(s)
ເມື່ອຫຼາຍປີກ່ອນຕອນທີ່ເຄືອຂ່າຍໂທລະສັບເຂົ້າມາປະເທດລາວຄັ້ງທຳອິດນັ້ນ ກ່ອນຈະໄດ້ໃຊ້ໂທລະສັບມືຖືກໍບໍ່ແມ່ນເລື່ອງງ່າຍໆ ນອກຈາກລາຄາຂອງເບີໂທລະສັບຈະແພງເປັນລ້ານແລ້ວ, ຍັງຕ້ອງປະກອບເອກະສານຢ່າງຄັກແນ່ ໄປຍື່ນໄວ້ເພື່ອໃຫ້ທາງໂທລະຄົມເພິ່ນພິຈາລະນາ ຈາກນັ້ນຈຶ່ງສາມາດຊື້ໄດ້ ແລະເມື່ອໄດ້ມາແລ້ວຄ່າໂທກໍຍັງແພງອີກ(ແພງກວ່າປັດຈຸບັນ), ຕອນນັ້ນໂປຣໂມຊັ່ນທີ່ທາງໂທລະຄົມເຮັດອອກມາເພື່ອເອົາໃຈລູກຄ້າກໍຍັງບໍ່ມີ.
ຕົກມາບໍ່ເທ່ົາໃດປີມານີ້ ບັນດາເຄືອຂ່າຍໂທລະຄົມຂອງລາວ ໄດ້ມີການແຂ່ງຂັນກັນຢ່າງດຸເດືອດ ທັງທາງດ້ານຄຸນນະພາບ, ການບໍລິການ, ລາຄາ, ຂອງແຈກຂອງແຖມ ແລະການຊ່ວຍເຫຼືອສັງຄົມ ເຊິ່ງການແຂ່ງຂັນກັນຂອງບັນດາເຄືອຂ່າຍໂທລະຄົມໄດ້ເຮັດໃຫ້ປະຊາຊົນລາວທຸກທ້ອງຖິ່ນ ທັງເຂດຊົນນະບົດ, ທຸລະກັນດານ ແລະເຂດທົ່ງພຽງຕົວເມືອງ, ທັງຜູ້ທຸກຜູ້ຮັ່ງໄດ້ມີໂອກາດຊົມໃຊ້ໂທລະສັບອັນເປັນເຕັກໂນໂລຊີການສື່ສານສະໄໝໃໝ່ທີ່ທັນສະໄໝ ຍ້ອນວ່າລາຄາເບີຖືກ, ຄ່າໂທຖືກ(ມີການແຖມມູນຄ່າໂທ)… ເຊິ່ງສະຫຼຸບແລ້ວຍິ່ງມີການແຂ່ງຂັນກັນຂອງບັນດາເຄືອຂ່າຍໂທລະຄົມ ປະໂຫຍດກໍຍິ່ງຕົກສູ່ປະຊາຊົນຫຼາຍຂຶ້ນ ເຊິ່ງບັນດາທ່ານກໍຄົງຮູ້ສຶກຄືກັນກັບຂ້າພະເຈົ້າ ແມ່ນບໍ?
ແຕ່ບັນດາທ່ານທີ່ເຄົາລົບ! ຕົກມາໄລຍະເດືອນສອງເດືອນມານີ້ ບັນດາເຄືອຂ່າຍໂທລະຄົມໄດ້ພ້ອມກັນຕັດໂປຣໂມຊັ່ນ ອັນທີ່ເປັນຜົນປະໂຫຍດຂອງຜູ້ຊົມໃຊ້ລົງ ເຊັ່ນ ບໍ່ມີໂປຣໂມຊັ່ນໂທລ້າໆ, ຊື້ເບີບໍ່ມີມູນຄ່າໂທ… ໂດຍໂທລະຄົມແຕ່ລະເຄືອຂ່າຍອ້າງວ່າເປັນຄຳສັ່ງຂອງ ກະຊວງໄປສະນີ ໂທລະຄົມ ແລະການສື່ສານ ເຊິ່ງມັນໄດ້ເຮັດໃຫ້ຜູ້ໃຊ້ໂທລະສັບຕ້ອງຈ່າຍຄ່າຕື່ມມູນຄ່າໂທຫຼາຍຂຶ້ນກວ່າຕອນທີ່ມີໂປຣໂມຊັ່ນ. ຂ້າພະເຈົ້າຄິດວ່າໂປຣໂມຊັ່ນເປັນສິ່ງສຳຄັນທີ່ອາດຈະຕັດອອກຈາກການເຮັດທຸລະກິດບໍ່ໄດ້, ມັນເປັນເລື່ອງແປກທີ່ບໍ່ໃຫ້ມີການແຂ່ງຂັນກັນເຮັດໂປຣໂມຊັ່ນ ແລະຂ້າພະເຈົ້າຄິດວ່າຄົງບໍ່ມີບ້ານໃດເມືອງໃດເຮັດທຸລະກິດໂດຍບໍ່ໃຫ້ມີໂປຣໂມຊັ່ນ ຫຼືບໍ່ໃຫ້ມີການແຂ່ງຂັນກັນ ນອກຈາກບ້ານເຮົາທີ່ກຳລັງເຮັດຢູ່ໃນປັດຈຸບັນນີ້.
ຂ້າພະເຈົ້າຂໍໃຫ້ບັນດາທ່ານ ມີຄຳເຫັນຕໍ່ບັນຫາດັ່ງກ່າວເບິ່ງດູ ເຊິ່ງຄຳເຫັນຂອງທ່ານຈະເປັນປະໂຫຍດຕໍ່ການຂຽນບົດ ຂອງວຽກຂ້າພະເຈົ້າເປັນຢ່າງຍິ່ງ.
ຄິດແນວໃດກັບການຕັດໂປຣໂມຊັ່ນອອກຈາກເຄືອຂ່າຍໂທລະຄົມຂອງກະຊວງ ໄປສະນີ ໂທລະຄົມ ແລະການສື່ສານ?
ໜວດໝູ່:
