ນີ້​ແມ່ນ​ເລື່ອງ​ທີ່​ຫນ້າ​ເສົ້າ​ປົນ​ຕະຫລົກ​ອີກ​ເລື່ອງ​ຫນຶ່ງ​ກ່ຽວ​ກັບ​ຄວາມ​ຮັກ​ຂອງ​ສາວ​ລາວນາງ​ຫນຶ່ງ ນາງ​ມີ​ຊື່ວ່າ ກໍ. ສາວ ກໍ ​ເປັນ​ຜູ້ຍິງ​ທີ່​ງາມພໍ​ປານ​ກັບ​ນາງ​ໃນ​ວັນນະຄະດີ​ທີ່​ມີ​ຄີງ​ກົມ​ສ້ວຍ, ​ໃບ​ຫນ້າ​ຮູບ​ໄຂ່, ຮູ​ປຮ່າງ​ອອນ​ລະ​ຊອນ, ນາງ​ມີ​ທຸກ​ຢ່າງ​ທີ່​ຜູ້ຍິງ​ປາດ​ຖະຫນາ ຈົນ​ບັດ​ນີ້​ອາຍຸ​ຂອງ​ນາງ​ຍ່າງ​ເຂົ້າ​ເຖິງ​ເລກ​ 3 ​ແລ້ວ ​ແຕ່​ຄວາມ​ງາມ​ຂອງ​ນາງ​ກໍ່​ຍັງ​ຄົງ​ບໍ່​ປ່ຽນ​ແປງ. ນອກຈາກ​ຄວາມ​ງາມ​ແລ້ວ​ນາງ​ຍັງມີ​ຄວາມ​ຮູ້ແລະກາຮສຶກສາສູງເຖິງຂັ້ນປະລິນຍາໂທ, ຄວາມສະຫລາດ ​ແລະ ມີ​ຊາດ​ຕະກູນ​ທີ່​ດີ ຫລື ​ເວົ້າ​ໄດ້​ວ່າ​ເປັນ​ຜູ້​ຍິງ​ທີ່​ເກືອບ​ສົມບູນ​ແບບ, ​ເປັນ​ຜູ້​ຍິງ​ທີ່​ພຽບພ້ອມ​ໄປ​ດ້ວຍ​ຮູບ​ສົມບັດ​ແລະ​ຄຸນສົມບັດ. ​ແຕ່​ເປັນ​ທີ່​ຫນ້າ​ແປກ​ໃຈ​ວ່າ​ເປັນ​ຫຍັງ​ນາງຈຶ່ງ​ຄອງ​ຕົວ​ເປັນ​ໂສດ ​ແລະ ​ບໍ່​ມີ​ແຟນນຳ​ບ້ານ​ນຳ​ເມືອງ​ເພິ່ນ.

      ຄວາມ​ເປັນ​ມາ​ກໍ່​ມີ​ຢູ່​ວ່າ​ ນາງ​ສາວ ກໍ ນີ້​ເຄີຍ​ມີ​​ແຟນມາ​ແລ້ວ​ຫລາຍ​ຄົນ​ແຕ່​ກໍ່​ບໍ່​ສົມ​ຫວັງ​ນຳ​ເຂົາ​ຈັກ​ເທື່ອ ຄົບ​ຜູ້​ຊາຍ​ຄົນ​ໃດ໋ກະຕ້ອງ​ເສຍ​ໃຈ​ຢູ່​ເລື້ອຍ, ຖ້າ​ເຂົາ​ບໍ່​ຫນີ​ປະ​ກໍ່​ແມ່ນ​ມີ​ການ​ປະພຶດ​ທີ່​ບໍ່​ດີ​ຕໍ່​ນາງ ​ເຮັດ​ໃຫ້​ນາງ​ບໍ່​ສາມາດ​ອົດທົນ​ກັບ​ພວກ​ຜູ້​ຊາຍ​ເຫລົ່າ​ນັ້ນ​ໄດ້ ສຸດ​ທ້າຍ​ກໍ່​ຕ້ອງ​ເປັນ​ຝ່າຍ​ຫນີ​ໄປ​ເອງ. ນາງ​ຜ່ານ​ຄວາມ​ເສົ້າ​ໂສກ​ໃນ​ເລື່ອງ​ຂອງ​ຄວາມ​ຮັກ​ມາ​ຫລາຍ​ຕໍ່​ຫລາຍ​ຄັ້ງ ​ແລະ ​ແຕ່​ລະ​ຄັ້ງ​ມັນ​ໄດ້​ເຮັດ​ໃຫ້​ນາງ​ມີ​ຄວາມ​ເຂັ້ມ​ແຂງ​ຂຶ້ນ​ແຕ່​ໃນ​ອີກ​ເບື້ອງ​ຫນຶ່ງ​ຂອງ​ຄວາມ​ເຈັບ​ປວດ​ແລະ​ຜິດ​ຫວັງ​ນັ້ນ​ມັນ​ໄດ້​ເຮັດ​ໃຫ້​ນາງ​ກາຍ​ເປັນ​ຄົນ​ເຢັນ​ຊາ​ຕໍ່​ຄວາມ​ຮັກ​ແລະ​ຄວາມ​ອົດທົນ​ທີ່​ມີ​ຕໍ່​ຄົນ​ຮັກ​ໃຫມ່​ຂອງ​ນາງ​ນັ້ນ​ຫລຸດ​ຫນ້ອຍ​ຖອຍ​ລົງ​ນັບ​ມື້.

      ຄວາມ​ຮັກ​ຄັ້ງລ່າ​ສຸດ​ຂອງ​ນາງ​ໄດ້​ເກີດ​ຂຶ້ນ​​ເມື່ອ​ປະມານ​ກາງ​ປີ 2008 ນີ້​ເອງ. ນາງ ກໍ ​ໄດ້​ບັງ​ເອີນ​ພົບ​ກັບ​ບ່າວ​ຕ່າງປະ​ເທດ​ຄົນ​ຫນຶ່ງ ທີ່​ມີ​ອາຍຸ​ຫ່າງ​ກັນ​ພຽງ​ປີ​ດຽວ ​ແຕ່​ວ່າ​ຊາຍ​ຫນຸ່ມ​ຄົນ​ນັ້ນ​ມີ​ການ​ສຶກສາ​ສູງ​ລະດັບ​ດ໊ອກ​ເຕີ​ດ້ານ​ມະນຸດ​ວິທະຍາ ທີ່​ເດີນທາງ​ມາ​ເຮັດ​ວຽກ​ຢູ່​ປະ​ເທດ​ລາວ​ໃນ​ບໍລິສັດ​ຂອງ​ຕ່າງປະ​ເທດທີ່​ມີ​ຊື່​ສຽງ​ແຫ່ງ​ຫນຶ່ງ​ໃນ​ລາວ. ທັງ​ສອງ​ໄດ້​ເລີ່​ມຄົບ​ຫາ ຫລື ທີ່​ຟລັ່ງ​ເອີ້ນ​ວ່າ​ອອກ​ເດດ ​ກັນ​ມາ​ໄດ້​ໄລຍະ​ຫນຶ່ງ ​ແຕ່​ວ່າ​ທັງ​ສອງ​ຄົນ​ນີ້​ບໍ່​ໄດ້​ລົມ​ກັນ​ຢ່າງ​ເປັນ​ທາງ​ການ​ວ່າ​ພວກ​ເຂົາ​ຈະ​ຄົບ​ກັນ​ໃນ​ຖານະ​ໃດ໋, ບໍ່​ເຄີຍ​ບອກ​ຮັກ​ກັນ, ອອກ​ງານ​ສັງຄົມ​ນຳ​ກັນ​ຢ່າງ​ເປີດ​ເຜີຍ​ແຕ່​ບໍ່​ໄດ້​ແນະນຳ​ກັນ​ໃນ​ຖານະ​ແຟນ. ທັງ​ສອງ​ຄົນ​ນີ້​ເຮັດ​ວຽກ​ຢູ້ຄົນ​ລະ​ແຂວງ, ຜູ້​ຊາຍ​ເຮັດ​ວຽກ​ຢູ່​​ເຊ​ໂປ​ນ; ​ແຂວງສະຫວັນ​ນະ​ເຂດ ສ່ວນ​ຜູ້ຍິງ​ເຮັດ​ວຽກ​ຢູ່​ທ່າ​ແຂກ ​ເຊິ່ງທັງ​ສອງ​ຄົນ​ນີ້​ບໍ່​ຄ່ອຍ​ໄດ້​ພົບ​ກັນ​ຄື​ຄູ່​ຮັກ​ຄູ່ອື່ນໆ ​ແຕ່​ພວກ​ເຂົາ​ກໍ່​ໂທ​ຫາ​ກັນ ​ແລະ ສົ່ງ​ຂໍ້ຄວາມ​ຫາ​ກັນ​ຕາມ​ພາສາ​ຂອງ​ຄົນ​ທີ່​ຄິດ​ຮອດກັນ. ​ຊາຍ​ຫນຸ່ມ​ກໍມີ​ທ່າ​ທີ​ວ່າ​ຈະ​ມີ​ໃຈ​ໃຫ້​ກັບ​ສາວ ກໍ ພໍ​ສົມຄວນ. ສາວ​ ກໍ ​ໄດ້​ເກີດ​ຄວາມ​ຮູ້ສຶກ​ດີ​ກັບ​ຊາຍ​ຫນຸ່ມ​ຜູ້​ນີ້​ເຊັ່ນ​ກັນ.

​ເມື່ອ​ບໍ່​ດົນ​ມາ​ນີ້​ສາວ ກໍ ​ໄດ້​ຊັກ​ຊວນ​ໃຫ້​ຊາຍ​ຫມຸ່ມມາ​ຢ້ຽມຢາມ​ເຮືອນ​ຂອງ​ຕົນ​ ​ເຊິ່ງຊາຍ​ຫນຸ່ມ​ຕ່າງ​ຊາດ​ຜູ້​ນີ້​ກໍ່​ໄປ​ຢາມ​ບ້ານ​ຂອງ ກໍ ດ້ວຍ​ຄວາມ​ເຕັມ​ໃຈ. ຖ້າ​ຈະ​ເວົ້າ​ໄປ​ວ່າ​ຊາຍ​ຫນຸ່ມ​ບໍ່​ເຂົ້າ​ວ່າການ​ທີ່​ນາງ​ສາວ ກໍ່ ພາ​ຕົນ​ເຂົ້າ​ເຮືອນ​ນັ້ນ​ມີ​ຄວາມ​ຫມາຍ​ແນວ​ໃດ໋ກໍ່​ຕອບ​ໄດ້​ຍາກ ​ເພາະວ່າ​ຊາຍ​ຫນຸ່ມ​ຜູ້​ນີ້​ເຄີຍ​ມາ​ສຶກສາ​ແລະ​ອາ​ໃສ​ຢູ່​ໃນ​ລາວ​ກ່ອນ​ຫນ້າ​ນີ້​ຫລາຍ​ປີ​ແລ້ວ​ແລະ​ກໍ່​ເຄີຍ​ມີ​ແຟນ​ເປັນ​ສາວ​ລາວ​ມາ​ກ່ອນ. ການ​ໄປ​ຢາມ​ບ້ານ​ເຮືອນ​ກໍ່​ອາດ​ເວົ້າ​ໄດ້​ວ່າ​ເປັນ​ເລື່ອງ​ປົກກະຕິ​ຂອງ​ຫມູ່​ເພື່ອນ ​ແຕ່​​ໃນ​ກໍລະນີ​ນີ້ ນາງ​ສາວ ກໍ ​ໄດ້​ຖືກ​ເພັ່ງ​ເລັງ​ຈາກ​ຍາດ​ພີ່ນ້ອງ​ເພາະ​ທີ່​ຜ່ານມາ​ເຖິງ​ວ່າ​ນາງ​ຈະ​ມີ​ແຟນມາ​ຫລາຍ​ຄົນ​ແລ້ວ​ແຕ່​ນາງ​ກໍ່​ບໍ່​ໄດ້ພາ​ໃຜ​ເຂົ້າ​ເຮືອນ ​ເຂົ້າຊານ​ຈັກ​ເທື່ອ. ​ແຕ່​ພໍ່​ແມ່​ຂອງ​ນາງ​ກໍ່​ບໍ່​ໄດ້​ວ່າ​ຫຍັງ​ຫລາຍ​ແລະ​ປ່ອຍ​ໃຫ້​ເປັນ​ເລື່ອງ​ຂອງ​ນາງ​ເອງ.

ຫລັງ​ຈາກ​ການ​ຢ້ຽມຢາມ​ຂອງ​ຊາຍ​ຫນຸ່ມ​ໄດ້​ຊິ້ນ​ສຸດ​ລົງ​ແລ້ວ ຊາຍ​ຫນຸ່ມ​ກໍ່​ໄດ້​ກັບ​ເມືອ​ວຽງ​ຈັນ​ເຮັດ​ວຽກ​ຢູ່​ວຽງ​ຈັນ​ກ່ອນ​ແລະ​ມີ​ແຜນ​ຈະ​ກັບ​ເມືອ​ປະ​ເທດ​ຂອງ​ຕົນ​ໃນ​ວັນ​ຄຮິ​ສມາດ​ເພື່ອ​ສະຫລອງ​ກັບ​ຄອບຄົວ, ຊາຍຫນຸ່ມໄດ້ບອກກັບສາວ ກໍ ວ່າ ເຂົາວາງແຜນໄວ້ວ່າຈະກັບມາລາວກ່ອນປີໃຫມ່ສາກົນ ແລະ ອາດຈະມີແຜນໄປທ່ຽວຕ່າງປະເທດກັບສາວ ກໍ. ຫລັງຈາກຊາຍຫນຸ່ມກັບໄປເຖິງວຽງຈັນໄດ້ພຽງສອງມື້ ຊາຍຫນຸ່ມກໍ່ເກີດການລົ້ມປ່ວຍກະທັນຫັນເນື່ອງຈາກອາຫານເປັນພິດ ເພາະເມື່ອກັບໄປເຖິງວຽງຈັນແລ້ວຊາຍຫນຸ່ມໄດ້ອອກໄປທ່ຽວກິນເບຍກັບຫມູ່ເພື່ອນເດິກດື່ນແລະກິນພິຊຊາ ເຮັດໃຫ້ລາວບໍ່ສະບາຍຢ່າງຫນັກ. ຊາຍຫນຸ່ມໄດ້ສົ່ງຂໍ້ຄວາມມາຫາຍິງສາວບອກວ່າຕົນເອງບໍ່ສະບາຍມີອາການຖ່າຍແລະຮາກບໍ່ຢຸດເຮັດໃຫ້ເມື່ອແຮງ. ຍິງສາວຮູ້ແນວນັ້ນຈຶ່ງໂທໄປຖາມອາການດ້ວຍຄວາມເປັຍຫ່ວງເປັນໃຍເປັນໄລຍະໆ ແລະ ບອກໃຫ້ຊາຍຫນຸ່ມໄປໂຮງຫມໍແຕ່ຊາຍຫນຸ່ມກັບປະຕິເສດແລະບອກວ່າຈະລໍຖ້າຟັງອາການກ່ອນ ຖ້າສ້ບໍ່ດີຂຶ້ນຈຶ່ງຈະໄປໂຮງຫມໍ. ເວລາຜ່ານໄປເຄິ່ງມື້ຍິງສາວພະຍາຍາມຕິດຕໍ່ຊາຍຫນຸ່ມເພື່ອສອບຖາມອາການແລະພົບວ່າຊາຍຫນຸ່ມມີອາການຫນັກກວ່າເກົ່າຍິງສາວຈິ່ງໂທບອກໃຫ້ຫມູ່ທີ່ຢູ່ວຽງຈັນຊ່ວຍໄປເບິ່ງແຍງຊາຍຫນຸ່ມໃຫ້ແທນ. ຫລັງຈາກນັ້ນເພື່ອຂອງສາວ ກໍ ກໍ່ໄປຕາມທີ່ສາວ ກໍ ຂໍຮ້ອງແລະພົບວ່າຊາຍຫນຸ່ມນັ້ນບໍ່ສະບາຍແຮງແຕ່ລາວກໍ່ບໍ່ຍອມໄປໂຮງຫມໍ ຈົນເຖິງຕອນແລງຂອງມື້ດຽວກັນນັ້ນເອງນາງສາວ ກໍ ກໍ່ໂທໄປຫາອີກແລະຮູ້ວ່າຊາຍຫນຸ່ມອາການຫນັກຈຶ່ງໄດ້ຂໍຮ້ອງໃຫ້ໄປໂຮງຫມແລະຊາຍຫນຸ່ມກໍ່ຕົກລົງໃຈໄປໂຮງຫມໍ ໂດຍທີ່ສາວ ກໍ ໄດ້ຂໍຮ້ອງໃຫ້ຫມູ່ຂອງຕົນຊ່ວຍເປັນຜູ້ດູແລທຸກຢ່າງຈົນຊາຍຫນຸ່ມດີຂຶ້ນແລະອອກຈາກໂຮງຫມໍໄປພັກຢູ່ເຮືອນ. ຫລັງຈາກອອກຈາກໂຮງຫມໍແລ້ວຊາຍຫນຸ່ມແລະຍິງສາວກໍໄດ້ໂທຕິດຕໍ່ກັນປະມານສອງມື້ແລະຫລັງຈາກນັ້ນຈົນຮອດມື້ນີ້ທັງສອງກໍ່ບໍ່ໄດ້ຕິດຕໍ່ກັນອີກເລີຍ. ສາວ ກໍ ເອງກໍ່ບໍ່ໄດ້ໂທ ແລະ ຊາຍຫນຸ່ມເອງກໍ່ບໍ່ໄດ້ໂທຫາ ກໍ ອີກເລີຍ. ສາວ ກໍ ຍັງຄິດຮອກຊາຍຫນຸ່ມແລະຫລຽວແນມເບິ່ງໂທລະສັບທຸກມື້ ເພື່ອວ່າບາງທີ່ອາດຈະມີຂໍ້ຄວາມຫລືສາຍທີ່ບໍ່ໄດ້ຮັບຈາກຊາຍຫນຸ່ມຄົນນັ້ນ.

ເຫດຜົນທີ່ ກໍ ບໍ່ຍອມໂທຫາຊາຍຫນຸ່ມນັ້ນກໍ່ຍ້ອນວ່າ ຊາຍຫນຸ່ມບໍ່ຄ່ອຍໂທຫາ ກໍ ແລະ ສ່ວນໃຫຍ່ແລ້ວແມ່ນ ກໍ ເປັນຜູ້ໂທ ຫລື ສົ່ງຂໍ້ຄວາມຫາ ຊ້ຳບໍ່ພໍຊາຍຫນຸ່ມບໍ່ເຄີຍກ່າວຄຳຂອບໃຈຕໍ່ ກໍ ເລີຍທີ່ນາງທັງເປັນຫ່ວງເປັນໃຍ ແລະ ຂໍຮ້ອງໃຫ້ຫມູ່ໄປຊ່ວຍເຫລືອ ແລະ ເບິ່ງແຍງຕົນ. ທຸກຄັ້ງທີ່ຊາຍຫນຸ່ມເຫງົາ ຫລື ບໍ່ມີທາງໄປ ຊາຍຫນຸ່ມຈະໂທມາຫາ ກໍ ແຕ່ເມື່ອ ກໍ ເຫງົາ ຊາຍຫນຸ່ມບໍ່ແມ້ແຕ່ຈະຖາມໄຖ່ຄວາມຮູ້ສຶກຂອງນາງ ນີ້ອາດເປັນເຫດຜົນທີ່ເຮັດໃຫ້ ກໍ ຕັດສິນໃຈບໍ່ຍອມໂທຫາຊາຍຫນຸ່ມຕ່າງປະເທດຄົນນັ້ນອີກ. ນາງອາດຈະບໍ່ມີຄວາມຫວັງແລະ ຄວາມອົດທົນຫລົງເຫລືອຢູ່ອີກແລ້ວກໍ່ເປັນໄດ້. ເຖິງວ່າ ກໍ ຈະຮັກຄົນຮັກຂອງຕົນພຽງໃດ ແຕ່ ກໍ ກໍ່ບໍ່ອາດທຳຮ້າຍຕົນເອງເພື່ອຄນຮັກທີ່ບໍ່ເຄີຍເຫັນຄຸນຄ່າແລະບໍ່ເຄີຍຮັກ ກໍ ເລີຍ.