ໄດອາຣີ່ຂອງ HeRo Knd - ພັນລາວ.ຄອມ

ຂຽນເມື່ອ: ສ.ຫ.. 7, 2010 | ມີ 8 ຄຳເຫັນ ແລະ 0 trackback(s)

ເລຶ່ອງທີ່ຂ້າພະເຈົ້າຈະເລົ່າຕໍ່ໄປນີ້ເປັນເລື່ອງຈິງທີ່ເກີດຂຶ້ນກັບຄົນທີ່ຂ້າພະເຈົ້າຮູ້ຈັກ. ແຕ່ໃນການຂຽນຕໍ່ໄປນີ້ອາດຈະມີບາງຢ່າງທີ່ຂ້າພະເຈົ້າໄດ້ເພີ່ມເຕີມໃສ່ ເພື່ອເປັນການເຮັດໃຫ້ຜູ້ອ່ານມີຄວາມເຂົ້າໃຈ ແລະ ມີຄວາມຮູ້ສຶກໄປກັບເລື່ອງນີ້ ແຕ່ຂໍຢ້ຳວ່າເລື່ອງດັ່ງກ່າວນີ້ເປັນເລື່ອງຈິງ ເຊິ່ງເລື່ອງກໍມີຢູ່ວ່າ:

ໃນຄ່ຳຄືນຂອງ ວັນທີ 22.07 ທີ່ຜ່ານມາ ໃນເສັ້ນທາງເລກທີ 13 ໄດ້ມີຊາຍຄົນໜຶ່ງຂັບລົດເກັງມາດ້ວຍຄວາມໄວ ເມື່ອກາຍເດີ່ນກິລາແຫ່ງຊາດມາໄດ້ໄລຍະໜຶ່ງກໍມີສຽງໂທລະສັບດັງຂຶ້ນໃນລົດ ……ເບີທີ່ສະແດງຂຶ້ນແມ່ນເບີຂອງຄົນຮັກຂອງລາວເອງ…... ຊາຍຄົນນັ້ນຮັບໂທລະສັບຂອງລາວ. “ ປານໃດຊິມາຮອດ! ຖ້າດົນລະໄດ໋! ມາໄວໆແດ່ແມະ! “ ຄົນຮັກຂອງລາວເວົ້າ. “ ຖ້າອີກຈັກໜ້ອຍເດີ້ ເຂົາກຳລັງໄປ “ ຊາຍຄົນນັ້ນບອກກັບແຟນຂອງລາວ ແລ້ວກໍວາງໂທລະສັບພ້ອມທັງເລັ່ງລົດໃຫ້ໄວຂຶ້ນເພື່ອໃຫ້ໄປທັນງານລ້ຽງຂອງໝູ່ ເຊິ່ງແຟນຂອງລາວໄດ້ຢູ່ທີ່ນັ້ນກ່ອນແລ້ວ. ຫຼັງຈາກນັ້ນເຫດການທີ່ບໍ່ຄາດຝັນກໍເກີດຂຶ້ນ ເມື່ອຢູ່ດີໆລົດຂອງຊາຍຄົນນັ້ນກໍເກີດເສຍຫຼັກ ປີນຂ້າມຄັນຄູກາງທາງໄປຕຳກັບລົດຕູ້ຄັນໜຶ່ງທີ່ກຳລັງຂີ່ມາພໍດີ. ຄວາມໄວຂອງລົດຕູ້ ບວກໃສ່ກັບຄວາມໄວຂອງລົດເກັງທີ່ລາວຂັບມາຢູ່ແລ້ວນັ້ນ ເຮັດໃຫ້ເກີດສຽງດັງສະນັ່ນຫວັ່ນໃຫວ, ແຮງປະທະຂອງລົດທັງສອງຄັນນັ້ນເຮັດໃຫ້ເກີດຄວາມເສຍຫາຍຢ່າງຫຼວງຫຼາຍ. ທາງໜ້າລົດຂອງຊາຍຄົນນັ້ນຫຼຸບເຂົ້າ ຍິ່ງໄປກວ່ານັ້ນເບື້ອງຄົນຂັບທີ່ລາວນັ່ງຢູ່ໄດ້ຫຍໍ້ເຂົ້າມາໜີບຮ່າງຂອງລາວໄວ້ເຮັດໃຫ້ລາວບາດເຈັບສາຫັດ. ຜູ້ຄົນທີ່ຜ່ານໄປມາ ແລະ ຄົນທີ່ຢູ່ແຖວນັ້ນໄດ້ພາກັນຕົກຕະລຶງກັບພາບອຸບັດເຫດທີ່ປະກົດຢູ່ທາງໜ້າຂອງພວກເຂົາ. ໂຊກດີທີ່ໃນຂະນະນັ້ນມີພົນລະເມືອງດີຜ່ານມາພົບເຫັນ, ພົນລະເມືອງດີຄົນນັ້ນໄດ້ນຳຮ່າງຂອງຊາຍທີ່ໝົດສະຕິອອກມາຈາກລົດທີ່ມສະພາບບໍ່ຕ່າງຫຍັງຈາກເຫຼັກເສດ ແລະ ໄດ້ນຳເອົາຊາຍຄົນນັ້ນໄປໂຮງໝໍ. ຫຼັງຈາກທີ່ນຳເອົາຊາຍຜູ້ໂຊກຮ້າຍຄົນນັ້ນໄປຮອດໂຮງໝໍແລ້ວ ພວກເຂົາກໍໄດ້ເອົາໂທລະສັບຂອງລາວກວດເບິ່ງເບີທີ່ໂທອອກຄັ້ງສຸດທ້າຍ ແລະ ໄດ້ຕິດຕໍ່ຫາເບີດັ່ງກ່າວ ເຊິ່ງເບີນັ້ນແມ່ນເບີຂອງແຟນລາວຄົນທີ່ກຳລັງລໍຄອຍລາວຢູ່ທີ່ງານລ້ຽງ. ຫຼັງຈາກທີ່ພວກເຂົາບອກກັບແຟນຂອງລາວກ່ຽວກັບເລື່ອງທີ່ເກີດຂຶ້ນ ເຮັດໃຫ້ແຟນຂອງລາວຕົກໃຈສຸດຂີດຈົນເກີດອາການຊ໊ອກຄາທີ່. ຫຼັງຈາກນັ້ນພວກເຂົາກໍໄດ້ຕິດຕໍ່ຫາຄອບຄົວຂອງລາວ ແລະ ອີກປະມານ 15ນທ ຄອບຄົວຂອງລາວກໍໄປຮອດໂຮງໝໍ. ພໍ່ແມ່ຂອງລາວແນມເບິ່ງຮ່າງຂອງລູກຊາຍທີ່ບໍ່ຮູ້ສະຕິ ແລ້ວນ້ຳຕາຂອງຜູ້ເປັນພໍ່ແມ່ກໍໄຫຼຊຶມອອກມາດ້ວຍຄວາມອີຕົນສົງສານລູກ. ພໍ່ແມ່ຂອງຊາຍຄົນນັ້ນພະຍາຍາມເຮັດໃຫ້ລາວຮູ້ສຶກໂຕໂດຍການບີບມື, ຢິກຕາມແຂນຂາແຕ່ກໍບໍ່ໄດ້ຜົນ. ຫຼັງຈາກທີ່ຄົນຮັກຂອງລາວທຳໃຈກັບເລື່ອງທີ່ເກີດຂຶ້ນໄດ້ແລ້ວກໍ່ເຂົ້າໄປຢ້ຽມລາວທີ່ໂຮງໝໍ. ໃນຂະນະທີ່ລາວຢ່າງເຂົ້າໄປໃນຫ້ອງທີ່ຊາຍຄົນນັ້ນນອນຢູ່ ຕາຂອງຍິງຄົນນັ້ນບໍ່ກ້າມືນເຕັມທີ່ ຄ້າຍກັບວ່າບໍ່ຢາກເຫັນຄົນຮັກຂອງຕົນຕົກຢູ່ໃນສະພາບແບບນັ້ນ. ລາວຄ່ອຍໆກ້າວຂາເຂົ້າໄປໃກ້ໆຕຽງທີ່ຊາຍຄົນນັ້ນນອນໝົດສະຕິບໍ່ຕອບສະໜອງກັບໂລກພາຍນອກຢູ່, ຈາກນັ້ໜລາວກໍໃຊ້ມືຂອງລາວຄ່ອຍໆຈັບມືຂອງຊາຍຄົນນັ້ນໄວ້ພ້ອມທັງເວົ້າອອກມາເປັນສຽງເບົາໆປົນກັບນ້ຳຕາຂອງລາວທີ່ໄຫຼອອກມາຢ່າງຊ້າໆວ່າ “ ຖ້າເຂົາບໍ່ບອກໃຫ້ເພີ່ນມາໄວໆເພີ່ນກະຄືຊິບໍ່ຟ້າວມາ ແລະ ມັນກະຄືຊິບໍ່ເປັນແນວນີ້ “. ຄວາມຮູ້ສຶກຂອງລາວຕອນນັ້ນເຕັມໄປດ້ວຍອາລົມໂສກເສົ້າ. ທັນທີທີ່ລາວເວົ້າສຸດ ເລື່ອງທີ່ບໍ່ຄາດຝັນກໍເກີດຂຶ້ນ ເມື່ອມືຂອງຊາຍຜູ້ທີ່ເປັນຄົນຮັກຂອງລາວທີ່ນອນໝົດສະຕິຢູ່ນັ້ນໄດ້ຄ່ອຍໆເໜັງ ແລະ ກຳມືຂອງຍິງຄົນນັ້ນໄວ້ຈົນແໜ້ນ ຄ້າຍກັບວ່າຊາຍຄົນນັ້ນຮັບຮູ້ສິ່ງທີ່ຄົນຮັກຂອງລາວເວົ້າໄປ ແລະ ໃຫ້ອາໄພຍິງຄົນນັ້ນທຸກຢ່າງ. ທຸກຄົນທີ່ຢູ່ໃນຫ້ອງນັ້ນຕ່າງກໍຕົກຢູໃນຄວາມມຶນງົງ, ຕົກໃຈ ແລະ ປະຫຼາດໃຈກັບເຫດການທີ່ກຳລັງເກີດຂຶ້ນ. ນ້ຳຕາຂອງຍິງຄົນນັ້ນຍິ່ງໄຫຼອອກມາເມື່ອຮູ້ວ່າຄົນຮັກຂອງລາວຮັບຮູ້ເຖິງຄວາມຮູ້ສຶກທີ່ລາວມີຕໍ່ເຂົາ. ປະຈຸບັນຊາຍຄົນນັ້ນໄດ້ຖືກສົ່ງຕໍ່ໄປປິ່ນປົວຢູ່ທີ່ປະເທດເພື່ອນບ້ານ ແລະ ຄາດວ່າອາການຂອງລາວຈະເລີ່ມດີຂຶ້ນເລື້ອຍໆ.

ເຫດການທີ່ເກີດຂຶ້ນມັນເປັນຄວາມບັງເອີນ ຫຼື ບໍ່ ?

ຊາຍຄົນນັ້ນຮັບຮູ້ທຸກຢ່າງທີ່ຍິງຄົນນັ້ນສົ່ງຜ່ານທາງຄວາມຮັກ ຫຼື ບໍ່ ?

ຄວາມຮັກ ສ້າງໃຫ້ເກີດເລື່ອງປະຕິຫານໄດ້ ຫຼື ບໍ່ ?

ຄຳຖາມເຫຼົ່ານີ້ຍັງກາຍເປັນຄຳຖາມທີ່ຕ້ອງການຄຳຕອບຈາກພວກທ່ານຢູ່

ການຂຽນຂອງຂ້າພະເຈົ້າບາງຈຸດອາດຈະບໍ່ຖືກຕາມຫຼັກການ ເຮັດໃຫ້ຜູ້ອ່່ານສັບສົນ

ເນື່ອງຈາກວ່າຂ້າພະເຈົ້າບໍ່ມີຄວາມຖະໜັດໃນເລື່ອງການຂຽນພໍເທົ່າໃດ

ກໍຕ້ອງຂອງອະໄພຈາກຜູ້ອ່ານໃນທີ່ນີ້ດ້ວຍ

ຂໍຂອບໃຈທຸກທ່ານທີ່ອ່ານ

"ຄວາມຮັກ" ຈົບລົງ ແຕ່ "ຊີວິດ" ຍັງບໍ່ຈົບ

ຂຽນເມື່ອ: ກ.ລ.. 30, 2010 | ມີ 8 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

ຫຼາຍຄັ້ງທີ່ ຄວາມຮັກ ເຮັດໃຫ້ເຮົາລືມໃນຫຼາຍໆ ສິ່ງ...

ລືມວ່າ....

ເຮົາເຄີຍກິນເຂົ້າຄົນດຽວໄດ້.......ໂດຍບໍ່ຮູ້ສຶກເຫງົາ

ເຮົາເຄີຍໄປໃສຄົນດຽວໄດ້.........ໂດຍບໍ່ຮູ້ສຶກວ່າມັນເປັນເລື່ອງຍາກ

ຍິ່ງກັບຄວາມຮັກ ທີ່ຄົບກັນມາດົນນານ

ຍິ່ງດົນ ຄວາມຜູກພັນກໍຍິ່ງເພີ່ມຂຶ້ນ

ເມື່ອຄວາມຜູກພັນເລີ່ມຫຼາຍຂຶ້ນ ຊີວິດເຮົາກໍຈະເກີດຄວາມລຶ້ງເຄີຍ

ລຶ້ງເຄີຍທີ່ຈະກິນເຂົ້າກັບເຂົາ ເບິ່ງໜັງກັບເຂົາ

ໄປໃສຕໍ່ໃສກັບເຂົາ......

ຄວາມຮັກ ບໍ່ໄດ້ເຮັດໃຫ້ເຮົາອ່ອນແອລົງດອກ...

ແຕ່ ຄວາມຮັກ ມັກຈະເຮັດໃຫ້ເຮົາລືມການໃຊ້ຊີວິດຄົນດຽວ

ບໍ່ຕ່າງຫຍັງຈາກການທີ່ເຮົາເບິ່ງໂມງແຂວນຝາ ທີ່ເດີນບອກເວລາໄປເລື້ອຍໆ

ໂດຍບາງຄັ້ງ ອາດຈະລືມໄປວ່າ ທີ່ໂມງເດີນໄດ້ນັ້ນ ເພາະມີຖ່ານໃຫ້ພະລັງງານຢູ່

ດັ່ງນັ້ນ ຈຶ່ງມີຄວາມເປັນໄປໄດ້ວ່າ ມື້ໃດມື້ໜຶ່ງຖ່ານຈະໝົດ

ເປັນໄປໄດ້...ພໍໆ ກັບຄວາມຮັກທີ່ເຄີຍມີມາຈະໝົດລົງ

ຊຶ່ງຖ້າມື້ທີ່ຖ່ານໝົດມາຮອດແທ້ໆແລ້ວ..

ເຖິງວ່າເຂັມໂມງຈະຢຸດເດີນ ແຕ່ເຊື່ອບໍ່ວ່າ...ເວລາຍັງເຄື່ອນໄປຕະຫຼອດ

ເວລາໃນໂລກນີ້ບໍ່ໄດ້ຢຸດຄືເຂັມໂມງ

ຄວາມຮັກທີ່ໝົດລົງແລ້ວນັ້ນກໍເຊັ່ນກັນ

ຄວາມຮັກໝົດ ແຕ່ບໍ່ໄດ້ໝາຍຄວາມວ່າ "ຊີວິດ" ຈະໝົດ

ຊີວິດຂອງເຮົາ ຍັງກ້າວເດີນຕໍ່ໄປໄດ້ສະເໝີ

ມັນອາດຈະເຫງົາ.....ທີ່ຕ້ອງກັບມາກິນເຂົ້າຄົນດຽວ

ອາດຈະເຈັບປວດ.....ທີ່ເບີໂທລະສັບທີ່ຄຸ້ນເຄີຍບໍ່ປາກົດເທິງໜ້າຈໍເລື້ອຍໆ ອີກແລ້ວ

ແຕ່ເຊື່ອບໍ່ ວ່າ.....ກ່ອນໜ້າທີ່ບໍ່ມີເຂົາ ເຮົາຍັງຢູ່ຢ່າງມີຄວາມສຸກໄດ້.

HeRo Knd

ເບິ່ງທັງໝົດ

ອ່ານຄືນຫຼັງ

2010 (2)

ໝວດໝູ່

ຄວາມຮັກ (2)

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.