ຄວາມໝາຍຂອງ ສາມີ ພັນລະຍາ ຄື:

- ສາມີ ແປວ່າ ຜູ້ລ້ຽງ (ຜົວ)

- ພັນລະຍາ ແປວ່າ ຄົນຄວນລ້ຽງ (ເມຍ)

ຄຳທັງສອງຄຳນີ້ ເປັນຄຳທີ່ແຝງຄວາມໝາຍໃນຕົວ ແລະ ເປັນຄຳທີ່ຄູ່ກັນ ຜູ້ຊາຍທີ່ໄດ້ ຊື່ວ່າສາມີ ກໍ່ເພາະລ້ໜງດູ ພັນລະຍາ, ຜູ້ຍິງທີ່ໄດ້ ຊື່ວ່າພັນລະຍາ ກໍ່ເພາະເຮັດເຮັດຕົນເປັນຄົນໜ້າລ້ຽງ

ປະເພດຂອງພັນລະຍາ

ພັນລະຍາທັງຫຼາຍໃນໂລກນີ້ ແບ່ງອອກເປັນ 7 ປະເພດ ຄື:

1. ວະທະກະພັນລະຍາ ພັນລະຍາສະເໝີດ້ວຍ ເພັດສະຄາດ ຄື: ພັນລະຍາທີ່ຄິດລ້າງຜານສາມີ ພະຍາຍາມຂ້າສາມີ ຍິນດີໃນຊາຍອື່ນ ຕົບຕີປ້ອຍດ່າສາມີ

2. ໂຈລີພາລິຍາ ພັນລະຍາສະເໝີດ້ວຍໂຈນ ຄື: ພັນລະຍາທີ່ມັກລ້າງຜານຊັບສິນສາມີ ໃຊ້ຊັບບໍ່ເປັນແດ່ ຍັກຍອບຊັບເພື່ອຄວາມສຸກສ່ວນຕົວແດ່ ສ້າງໜີ້ສິນໃຫ້ໃຊ້ໃຫ້ແດ່

3. ໄອພະຍະລິຍາ ພັນລະຍາສະເໝີດ້ວຍນາຍ ຄືພັນລະຍາທີ່ມັກລ້າງຜານສັກສີຂອງສາມີ ບໍ່ສົນໃຈຊ່ວຍວຽກງານ ກຽດຄ້ານ ກິນຫຼາຍ ປາກມາກ,ປາກຮ້າຍ ກ່າວຄຳຫຍາບ ມັກຂົ່ມຂີ່ສາມີ ທີ່ດຸໝັ່ນຂັນແຂງ ຄືກັບເຈົ້ານາຍຂົ່ມເຫັງຂີ້ຂ້າ ພູມໃຈທີ່ໄດ້ຂົ່ມເຫັງສາມີ

4. ມາຕາພັນລະຍາ ພັນລະຍາສະເໝີດ້ວຍພໍ່ແມ່ ຄືພັນລະຍາທີ່ມີຄວາມຮັກເມດຕາສາມີບໍ່ມີທີ່ສິ້ນສຸດ ຄືກັບມານດາຮັກບຸດ ເຊັ່ນ: ສາມີຈະຕົກຕ່ຳໝົດບຸນວາດສະນາ ຈະເຈັບປ່ວຍຈະພິການຕະຫຼອດຊີວິດ ກໍ່ບໍ່ປະຖີ້ມ ບໍ່ເວົ້າບໍ່ເຮັດໃຫ້ສະເທືອນໃຈ ເຖິງຈະຕາຍຈາກໄປ ແຕ່ຕົນຍັງສາວກໍ່ບໍ່ຍອມມີສາມີໃໝ່

5. ພະຄິນີພະລິຍາ ພັນລະຍາສະເໝີດ້ວຍນ້ອງສາວ ຄືພັນລະຍາທີ່ເຄົາລົບສາມີ ເປັນຄົນລະອາຍບາບ ມີຄວາມຢັ້ງຍືນ ແຕ່ມີທັງຂັດໃຈກັນແດ່ ທັງດື້ ທັງງອນ ທັງມັກຫຍອກ ທັງຂີ້ໃຫ້ ຕ້ອງທັງຊູ່ທັງອອຍ ຈັກໜ່ອຍຈະໄປທ່ຽວ ຈັກໜ່ອຍຈະກິນ ຈະແຕ່ງຕົວ ແຕ່ກໍ່ຊື່ສັດສຸຈະຣິດຕໍ່ສາມີ

6. ສະຂາພະລິຍາ ພັນລະຍາສະເໝີດ້ວຍເພື່ອນ ຄືພັນລະຍາທີ່ມີລົດສະນິຍົມ ມີຄວາມມັກຄືກັນກັບສາມີ ຖືກຄໍກັນ ເປັນຄົນມີສີນລະທັມ ມີຄວາມປະພຶດດີ ແຕ່ມີຄວາມທະນົງຕົວ ຖືວ່າສະເໝີຕົວ ຖືວ່າສະເໝີກັນ ຫາກຝ່າຍກົງກັນຂ້າມຂາດເຫດຜົນ ກໍ່ບໍ່ຍອມກັນ

7. ທາສີພັນລະຍາ ພັນລະຍາສະເໝີດ້ວຍຄົນໃຊ້ ຄືພັນລະຍາທີ່ເຮັດຄືກັນກັບຄົນໃຊ້ ເຖິງສາມີຈະຂ້ຽນຕີ ດ່າວ່າ ຂູ່ເຂັນ ກໍ່ບໍ່ຄິດຢາກຮ້າຍຕອບສາມີ ອົດທົນຢູ່ໃນອຳນາດໄດ້

- ຈະເບິ່ງວ່າໃຜເປັນສາມີພັນລະຍາຊະນິດໃດ ຕ້ອງເບິ່ງຫຼັງຈາກແຕ່ງດອງໄປແລ້ວໄລຍະໜຶ່ງ ຈຶ່ງຈະເຫັນແຈ້ງ

ການແຕ່ງດອງມີ 2 ໄລຍະຄື:

- ໄລຍະແຕ່ງ: ຄືກ່ອນເປັນຜົວເມຍກັນຕ່າງຄົນຕ່າງແຕ່ງຕົວ ແຕ່ງທ່າທາງ ອວດຄຸນສົມບັດໃຫ້ອີກຝ່າຍໜຶ໋ງເຫັນ

- ໄລຍະງານ: ຄືຫຼັງຈາກເປັນຜົວເມຍກັນແລ້ວ ຕ່າງຄົນຕ່າງຕ້ອງເຮັດວຽກງານຕາມເຕັມທີ່ ໃຜມີຂໍ້ດີຂໍ້ເສຍ ຄວາມຮູ້ຄວາມສາມາດການປະພຶດຢ່າງໃດ ກໍ່ຈະປະກົດຊັດແຈ້ງອອກ

ນັ້ນຄືຄວາມໝາຍ ແຕ່ງງານ ຫຼື ແຕ່ງດອງ