ຜູ້ເຖົ້າເລົ່າພື້ນວ່າ:  ປາງກ່ອນໃນໂລກນີ້ບໍ່ມີຄົນທ່ອງມີແຕ່ຜີທຽວ  ຜີທັງປວງແມ່ນຜີແມ່ຍ່າເປັນໃຫຍ່ ຜີແມ່ຍ່ານີ້ມີ 6 ຍ່າຄື:

  1.  ຍ່າເຍີ  ເມຍປູ່ເຍີ  ມີບຸນຄຸນແກ່ຄົນຄື  ເມື່ອຄົນເກີດມາໃໝ່ກໍ່ມີເຄືອເຂົາກາດປົກບັງໂລກໃຫ້ມືດບໍ່ໃຫ້ເຫັນແສງຕາເວັນເດືອນ ແລະ ດາວຄົນໄດ້ທຸກຮ້ອງໃຫ້ໃຊ້ໃຜຕັດເຄືອນັ້ນກໍ່ພາກັນຕາຍໄປໆ  ປູ່ເຍີຍ່າເຍີອຶດຄົນຫລາຍ ຈິ່ງຍອມຕາຍແທນ ຄືຂັນອາສາຕັດເຄືອນັ້ນຈົນຂາດ ພໍຕັດຂາດແລ້ວປູ່ຍ່າກໍ່ຂາດໃຈຕາຍ  ຄົນທັງປວງຈຶ່ງເຫັນແສງສະຫວ່າງ ແລະ ເປັນສຸກສືບມາ  ຈິ່ງນົບໃຫວ້ຫາປູ່ຍ່ານີ້ບໍ່ຂາດ  ປາກຄຳໃດ  ອອກຊື່ວ່າ ເຍີໆ ຄືວ່າ  ຢູ່ດີເຍີ  ໄປດີເຍີ  ກິນເຍີ ນອນເຍີ ອາຍຸໝັ້ນຍືນເຍີ ດັ່ງນີ້ເປັນເຄົ້າຮອດຊູ່ມື້ນີ້ແລ.

   2.  ຍ່າປຸ ຢູ່ພູຍ່າປຸ  ເປັນຍ່າທ່ຽງທຳໜັກແໜ້ນຮັກສາສິນກຳມະບົດສິບ  ບໍ່ໜີຈາກພູຍ່າປຸ  ບໍ່ເຮັດຮ້າຍໃຫ້ຄົນ ແລະ ສັດຈັກເທື່ອ  ຊ່ອຍຄົນດີ  ບໍ່ເຂົ້າຂ້າງຄົນຖ່ອຍ  ຄືຊ່ອຍຮັກສາພຮະຊັຍເຊດຖາ  ບໍ່ຊ່ອຍບໍ່ຮັກສາພຼະສາຂຽດໂງ້ງຄົນທັງປວງຈຶ່ງເອົາຊື່ເພີ່ນມາເວົ້າເປັນສົງໃສບໍ່ດີບໍ່ຮ່າຍວ່າ  ບໍເດ?  ຊິດີບໍເດບຸ? ຊິໄດ້ບຸເດ? ໃຫ້ຮິ່ນຕອງຄັກໆຈິ່ງເຮັດ ບໍ່ດີຢ່າເຮັດ.

  3.  ຍ່າວາຍ  ຫຼອກຫຼອນໃຫ້ຄົນຢ້ານເຫັນຄົນແລ້ວຍ່າກໍ່ຫົວຟະໆ  ໃຜເຫັນກໍ່ຮ້ອງຢ້ານວາຍໆສູ່ຄົນ  ຍ່ານີ້ມັກຈັບຄົນຂັງໃວ້ທໍຣະມານຕ່າງໆ ຖ້າມີຜູ້ຕໍ່ສູ້ໄດ້ຍ່າກໍ່ຍອມ  ຍ່ານີ້ມັກຢູ່ປ່າເລິກດົງໜາຕຶບຊູ່ບ່ອນ  ແຕ່ບໍ່ມັກຂ້າຄົນ  ແຕ່ເຮັດໃຫ້ຍ້ານຮ້ອງວາຍໆ  ຈຶ່ງຊື່ວ່າຍ່າວາຍ  ເປັນຍ່າບໍ່ດີ.

  4.  ຍ່າງ່າມ  ລາງເທື່ອໃຈດີ  ແລະ  ລາງເທື່ອກໍ່ໃຈຮ້າຍຊ່ອຍຄົນກໍ່ມີ ແລະ ເຮັດຮ້າຍກໍ່ມີ ບໍ່ພິຈາຣະນາຫາເຫດຜົນ ເອົາແຕ່ໃຈຕົນເອງ ທ່ຽວຢູ່ທົ່ວທີບບໍ່ດີ.

  5.  ຍ່າດຳ  ແລະ    6.  ຍ່າແດງ  ທັງສອງຍ່ານີ້ເປັນຍ່າບໍ່ດີຈັກດີ້  ໃຜເຂົ້າກອດແຂ່ງພັນຂາເອົາໃຈເພິ່ນແລ້ວແມ່ນຄົນຖ່ອຍມີຜິດທໍ່ໃດກໍ່ຊ່ອຍໂລດ  ຍ່ານີ້ຮັບຈ້າງລາງວັນຂ້າຜູ້ກິນຄົນຊູ່ແນວ  ໃຜກ່ຽວຂ້ອງກັບເພິ່ນແລ້ວກໍ່ຍັງດັບເຝິກແອບໃຫ້ເປັນຄືເພິ່ນໝົດ  ບໍ່ເຮັດຄວາມດີແກ່ຄົນສັດໂລກຈັກດີ້  ມີແຕ່ທ່ຽວຄ້ວາຮັບຈ້າງ  ເຮັດຮ້າຍຂ້າຜູ້ກິນຄົນຖ່ອຍທົ່ວທີບ  ບໍ່ມີບຸນຄຸນກັບໃຜ  ຄັນຄຽດຫຼືໄດ້ຄ່າຈ້າງແລ້ວແມ່ນແຕ່ຍາດເພື່ອນມິດສະຫາຍກໍຂ້າໂລດ.

  ພື້ນຍ່ານີ້ເປັນປະຣັມປະຣາມາແລ

ຈາກ: ປື້ມພົງສາວະດີ ແຂວງ ອັດຕະປື.