ລາວຈັບຊາວຄຣິສຕຽນ 5 ຄົນ ຢູ່ສະຫວັນນະເຂດ

ເຈົ້າໜ້າ​ທີ່​​ແຂວງ​ສະຫວັນ​ນະ​ເຂດ​ໃນ​ພາກ​ໃຕ້​ຂອງ​ລາວ​ໄດ້​ຈັບ​ຊາວ​ ຄຣິສຕຽນທີ່​ໄປ​ຮ່ວມ​ພິທີ​ສວດ​ມົນ​ພາວະນາ​ ໃນ​ວັນ​ອາທິດ​​ແລ້ວນີ້ ອັນ​ເປັນ​ພາກສ່ວນ​ນຶ່ງ​ຂອງການປາບ​ປາມ​ພວກ​ນັບຖື​ສາສະໜາ​ຄຣິສຕ໌ ທີ່​ຍັງ​ດຳ​ເນີນ​​ຕໍ່​ມາ​ຢູ່ໃນ​ເຂດ​ດັ່ງກ່າວ​ຂອງ​ລາວ.

ກຸ່ມ​ສິ້ງຊອມ​ອິດສະຫຼະພາບ​ໃນ​ການ​ນັບຖື​ສາສະໜາ​ຢູ່​ລາວຫຼື HRWLRF ​ແຈ້ງວ່າ ຊາວ​ຄຣິສຕຽນ​ທັງ 5 ຊຶ່ງ​ປະກອບ​ດ້ວຍ​ຜູ້​ຊາຍ 2 ​ຄົນ​ແລະ​ແມ່ຍິງ 3 ຄົນ ​ຈາກ​ເຂດ​ເມືອງ​ພະ​ລານ​ໄຊ ​ໄດ້​ຖືກ​ຈັບ​ຂະນະ​ໄປ​ຮ່ວມ​ພິທິສວດ​ມົນ​ພາວະນາ​ທີ່ບ້ານ​ບົວຄຳ ​ໃນ​ເຂດ​ເມືອງ​ອາດ​ສະພັງ​ທອງ ​ແຂວງ​ສະຫວັນ​ນະ​ເຂດ ​ໃນ​ຂໍ້​ຫາ​ຈັດ​ພິທີີ​ທາງ​ສາສະໜາ​ໂດ​ບບໍ່​ໄດ້​ຮັບ​ອະນຸຍາດ​ຈາກ​ທາງ​ການ.

ບ້ານ​ບົວຄຳ​ເປັນບ່ອນ​ທີ່​ເຄີຍມີ​ການ​ຈັບ​ກຸມ​ຜູ້ນຳ​ຂອງ​ຊາວ​ຄຣິສຕຽນ 8 ຄົນ ​ໃນ​ເດືອນ
ທັນວາ​ປີ 2011 ​ໃນ​ຂໍ້​ຫາ​​ໂຮມ​ຊຸມນຸມ​ຊາວ​ຄຣິສຕຽນ 200 ກວ່າ​ຄົນ​ເພື່ອສະ​ເຫຼີມສະ
ຫຼອງບຸນຄຣິສຕ໌ມາສ.

ນຶ່ງ​ອາທິດ​ຫຼັງຈາກ​ວັນ​ທີ 21 ທັນວາ​ປີ​ກາຍ​ນີ້ ​ເຈົ້າໜ້າ​ທີ່​ລາວ​ກໍ​ໄດ້​ເຕືອນ​ຊາວຄຣິສຕຽນ
47 ຄົນ​ທີ່​ບ້ານນາ​ຖູ ​ໃນ​ເຂດ​ເມືອງ​ພະ​ລານ​ໄຊ ​ໃຫ້​ພວກ​ເຂົາ​ເຈົ້າອອກ​ຈາກ​ສາສະໜາ
ຫຼືຖ້າ​ບໍ່​ດັ່ງນັ້ນ​ແລ້ວ​ກໍ​ຈະ​ປະ​ເຊີນ​ກັບ​ການ​​ຖືກໄລ່ໜີ​ອອກ​ຈາກບ້ານ.

ລາຍ​ງານ​ຂອງ​ຄະນະ​ກຳມາ​ທິການ​ສະຫະລັດ​ວ່າ​ດ້ວຍ​ອິດສະຫຼະພາບ​ໃນ​ການນັບຖື​ສາ
ສະໜາ​ຂອງ​ນາໆ​ຊາດ​ຫຼື USCIRF ທີ່​ນຳ​ອອກ​ເຜີຍ​ແຜ່​​ເມື່ອ​ໄວໆ​ມານີ້ ຍັງ​ສືບ​ຕໍ່ຈັດ​ເອົາ​
ລາວໄວ້ຢູ່​ໃນ​ກຸ່ມ​ປະ​ເທດ ​ທີ່​ຖືກ​ຕິດຕາມ​ສິ້ງຊອມ​ເບິ່ງ​ສຳລັບ​ປີ 2012.