ພໍພົບ­ພານ­ພໍ້ນ້ອງ  ຜູ້ງາມ­ຄ່ອງ­ຕາຫວານ 
ຫັນ­ສາຍ­ຕາມາ­ພົບ  ຍິ້ມນາງ­ສົ່ງ­ໃຫ້ 
ໃຈ­ຊິວາຍ­ແລ້ວເດີ້­ຫຼ້າ     ຮອຍ­ຍິ້ມການດາ­ສັງມາເດັ່ນ 
ຈົນ­ຫົວ­ໃຈ­ອ້າຍເກືອບ­ຢຸດເຕັ້ນ    ເຫັນ­ແລ້ວເປັນ­ປ່ວງ­ນໍາ 
­ແມ່ນ­ຢູ່­ທາງເຂດ­ກໍ້າ ຖານ­ຖິ່ນ­ດິນ­ໃດ ເດ­ນໍ 
ບອກ­ອ້າຍ­ແດ່­ຄົນ­ດີ ຊິ­ຕາມ­ໜີນໍາເຈົ້າ 
ໄປ­ລັກເອົາຮອຍ­ຍິ້ມ ປຸ້ມ­ໃສ່­ຖົງ­ແລ້ວ­ຫອບ­ແລ່ນ 
ມາ­ໄວ້­ແຍງ­ລັດເຊົ້າ ຕາງ­ກິນ­ແກ້ມ­ກັບເຂົ້າ ບະ­! ຄື­ຊິເຖົ້າ­ບໍເປັນ 
ຍິ້ມ­ຂອງນາງເນັ້ນໆ­ ດຶງ­ດູດ­ສາຍ­ຕາ 
ຄືມົນ­ຕາມາສະ­ກົດ  ບໍ່ອາດ­ຫຼົງ­ລືມ­ໄດ້ 
ສາລະ­ພາບເຫມິດ­ໃຈ­ແລ້ວ ຫຼົງ­ຮອຍ­ຍິ້ມນາງເຈົ້າ­ຮູ້ບໍ 
ຂໍມາ­ຢູ່­ຮ່ວມ­ຫ້ອງ   ເປັນເຈົ້າຂອງ­ຮອຍ­ຍິ້ມເຈົ້າ ໄປ­ຈົນເທົ່າ­ຊີບ­ວາຍ 
ເຮັດ­ຈັງ­ໃດ ຈັງ­ຊິ­ໄດ້ ມາ­ຢູ່­ໃກ້­ຄຽງ­ຂ­ວັນ 
ຫວັ່ນ­ໃຈ­ຢ້ານ­ຄວາມ­ຈິງ   ເຈົ້າ­ບໍຫຼິງມາຫາ­ອ້າຍ 
ຍິ້ມ­ໃຫ້­ໃຜ ຜູ້ອື່ນ­ພຸ້ນ ຫາກເປັນ­ບຸນ­ອ້າຍມາ­ຜ່ານ 
ສອງ­ພວງ­ແກ້ມນວນ­ຈັນ   ກັບ­ຮອຍ­ຍິ້ມນາດ­ນ້ອງ ກ້ຽວ­ໃຈ­ອ້າຍ­ບໍຢາກ­ລາ 
­ແຕກະ­ຊ່າງເຖາະ­ນໍ້­ຫຼ້າ    ອ້າຍ­ບໍວ່າ­ແນວ­ໃດ 
ຍ້ອນ­ທາງ­ໃຈ­ມັນ­ຫຼົງ­ຮັກ   ມັກ­ແຕ່­ສາວ­ຜູ້­ສົ່ງ­ຍິ້ມ 
ແມ່ນ­ຊິງາມ­ຄື­ພິມ­ແຕ້ມ    ແນມຍາມ­ໃດ­ກໍຍິ້ມຍາກ ບໍເອົາເດີກ! 
ມັກ­ແຕ່­ຄົນ­ສົ່ງ­ຍິ້ມ­ໃຫ້ ວາຈາ­ນັ້ນ­ພ້ອມ­ພໍ່າພຽງ

ບ້ານເຮົາໜາວແລ້ວບໍ

ສອງເດືອນ­ປາຍເຂດ­ຕັ້ງ..........ຊິໄກຫ່າງເຄຫາ
ຂ້າມເຂດຟ້າ­ທະ­ເລຫຼວງ..........ລ່ວງເລີຍໄກແຄວ້ນ
ເນົາໃນແດນ­ດິນ­ກວ້າງ..........ທວງ­ຖາມ­ກັນ­ພາ­ສາອື່ນ
ຕື່ນເຊົ້າມາ ຫຼຽວງ­ວາກ­ຂວາ­ຜ່ອງຊ້າຍ ບໍຄືກໍ້າ­ຖິ່ນສະ­ຖານ

ລູກບ້ານ­ນອກຕ້ອງ­ຈາກບ້ານ..........ສະ­ຖານ­ຖິ່ນ­ທີ່ເຄີຍ­ນອນ
ລາເສື່ອໝອນເຄີຍ­ໝູນ..........ສອງເຂືອພໍ່ແມ່ເຈົ້າ
ໝູ່ເພື່ອນ­ຝູງ­ທີ່ເຄີຍເວົ້າ..........ຈໍາໃຈເຫງົາ­ຊິເຫີນຫ່າງ
ມີຊີວິດ­ຈຶ່ງຕ້ອງສ້າງ.............ຫວັງ­ມື້ໜ້າໃຫ້­ສົດໃສ

ກາບ­ຂໍພອນເຖິງເທພໄທ້..........ຜູ່­ຊິໄປໃຫ້­ມີໂຊກ ແນ່ເດີ
ຜູ່­ທີ່­ຢູ່ໃຫ້­ມີຄວາມ­ສຸກ...........ດ້ວຍ­ກັນສະ­ເໝີດ້າມ
ຄຸນ­ບິດາມານ­ດາ­ຕາມ­ປົກປ້ອງ..........ຍາມ­ລູກ­ປອງໄກຫ່າງ
ມາ­ຢູ່­ຕາມ­ລໍາ­ພັງ ໃຈກາງເມືອງເພິ່ນ­ພຸ້ນ ຄຸນເຈົ້າໃຫ້­ຄຸ້ມ­ຄອງ

ຕາ­ລໍ່າມອງເບິ່ງ­ຮວງເຂົ້າ.........ຄືຊິບໍໄດ້­ຢູ່ກ່ຽວກໍາ ແລ້ວນໍປີນີ້
ເຄີຍໄດ້ເຮັດ­ທໍາ­ທຸກ­ປີ...........ກະ­ຊິໜີຈອນຍ້າຍ
ແສນ­ອາໄລ ແຕ່ກະ­ຈໍາໃຈແລ້ວ..........ແນວຊະ­ຕາໄດ້­ຂີດແຕ່ງ
ຟ້າ­ຄໍ່າແລງໃນ­ມື້­ນີ້ ຜ່ານໄປອີກ­ມື້ໜ້າ ບໍຄືຟ້າເຄີຍ­ລໍ່າແຍງ ແລ້ວນໍ

ຮັບກະ­ແສຊ່ວງ­ນີ້ ນ້ອງໆ­ນັກ­ສຶກ­ສາ­ປີຊຸດທ້າຍ ມຊ ກໍາ­ລັງ­ຂຸ້ນຂ້ຽວຈົບ­ການ­ສຶກ­ສາ ກຽມໂຕກຽມໃຈຮັບໃບປະ­ກາດ... ແລະກໍຍັງມີອີກຫຼາຍໆຄົນຍັງຕ້ອງບາກບັ່ນຕໍ່ໄປ...

ສິ່ງສຳຄັນ ຢ່າລືມໃຜຜູ້ນຶ່ງ ທີ່ເປັນແປ້ນຢັນໃຫ້ເຮົາມາຕະຫຼອດ.

ຢູ່­ຫ້ອງ­ແອ­ຣ໌ເຢັນ­ຈ້ອຍ ບໍ່­ຄື­ຂ້ອຍ­ຄົນນະ­ຖາ
ລູກ­ຊາວນາເກືອກ­ຕົມ ໝົ່ນ­ໝອງ­ຄີງ­ຮ້າຍ
ເອົາອາ­ໄສ­ຮົ່ມ­ຫວ້າ ເປັນ­ຫຼັງ­ຄາ­ພໍບັງ­ແດດ
ຜິດ­ແຜດ­ກັນ­ກັບນາດ­ນ້ອງ ນັ້ງ­ໃນ­ຫ້ອງ­ຕາກ­ແອ­ຣ໌

ເອົາ­ຄັນ­ແທເປັນ­ບ່ອນເທີ້ງ ແທນ­ຕັ່ງນວດນວມ­ດີ
ມີ­ແສງ­ແດດ ສາຍ­ລົມ ພ້ອມ­ທັງ­ຝົນ­ຮໍາ­ຍ້ອຍ
ທາງ­ວຽກງານ­ຂອງ­ຂ້ອຍ ໃຊ້­ແຕ່­ແຮງ­ສຸມ­ໃສ່
ຂຸດ­ຂີ້ດິນ­ງັດ­ໄຫງ້ ເຫື່ອ­ໃຄ­ຍ້ອຍກະ­ພ່ອງເຫມັນ

ຕ່າງ­ກັບເນື້ອເຢັນ­ຫຼ້າ ວາສະ­ໜາ­ມັນເຫີນ­ຫ່າງ ກັນ­ແລ່ວ
ເຈົ້າ­ນັ້ນ­ຍ່າງເລາະ­ຫ້າງ ບາດ­ທາງ­ອ້າຍ­ຍ່າງເລາະ­ຄວາຍ
ພໍຕອນ­ສວາຍເຈົ້າເຂົ້າ­ຮ້ານ ເຄື່ອງ­ດື່ມ­ອາຫານ­ສັ່ງ­ຊຸດ­ໃຫຍ່
ອ້າຍ­ນັ້ງ­ລົງ­ກ້ອງ­ຮົ່ມ­ໄມ້ ໄຂເອົາ­ແອບເຂົ້າ­ນ້ອຍ ກອຍ­ຈໍ້າ­ນໍ້າ­ປົ່ນ­ປາ

ເຮັດ­ຈັງ­ໃດ­ໄດ້ເດ­ຫຼ້າ ຕາມ­ປະ­ສາ­ຄົນ­ບ້ານນອກ
ເຄື່ອງ­ນຸ່ງ­ຂອງ­ຖືບົ່ງບອກ­ໃຫ້­ຮູ້ ວ່າເຮົາ­ນັ້ນ­ມັນ­ຫ່າງ­ໄກ
ຄົນນອນນາ­ຄື­ຈັ່ງ­ອ້າຍ ບໍ່ກ້າຫມາຍ­ໄດ້­ຄຽງ­ຄູ່
ໄດ້­ຫາຍ­ໃຈ­ຢູ່ ຮ່ວມ­ໂລກ­ນີ້ ທາງ­ພີ້ກໍ່ວ່າ­ບຸນ ຫລ້າເອີຍ!!

ອ້າຍ­ຄູຄໍາຫຼ້າ­ຂີ້ເມົາ

ອົກເອີຍ ຫົວ­ອົກ­ຄູຄໍາຫຼ້າ ຕ້ອງມາ­ນໍ້າຕາຫຼັ່ງ
ຜິດ­ຫວັງ ຍ້ອນ­ຖືກ­ສາວ­ຫຼອກ­ຕົ້ມ ບໍ່­ສົມເວົ້າ­ກ່າວ­ຈາ
ສາວ­ຕ້ອຍເມີນ­ໜີ­ຫນ້າ ຄູອາສາ­ບໍ່­ສົມກຽດ ເຈົ້າ­ແລ້ວ
ນັ້ງ­ໃນ­ຮຸນ­ໄດເພິ່ນ­ພຸ້ນ ເວັບ­ຈີນ­ອ້າຍ­ໄລ່ບໍ່­ທັນ ແລ້ວນໍ

ເລື່ອງ­ຄວາມ­ຮັກ­ວ່າ­ນັ້ນ ຄູຍັງ­ອ່ອນ­ປະ­ສົບການ
ມານຍາ­ຍິງ­ຮ້ອຍເຫຼັ້ມກ­ວຽນ ບໍ່­ຫ່ອນ­ຕາມ­ທັນເຈົ້າ
ເອົາ­ແຕ່­ສອນເດັກ­ນ້ອຍ ຕ້ອຍເລີຍ­ຫຼອຍ­ໄປທາງ­ອື່ນ
ພໍຮູ້­ຂ່າວ ຄູເກືອບ­ລົ້ມ­ທາງ­ຢືນ ຝືນ­ນໍ້າຕາ­ບໍ່­ໃຫ້ຍ້ອຍ ອາຍເດັກ­ນ້ອຍ­ຊິກ່າວ­ຂ­ວັນ

ປ­ຣິນຍາ­ທີ່­ໄດ້ນັ້ນ ເຂົາ­ໃຫ້ອ້າຍມາເປັນ­ຄູ
ສອນ­ຄວາມ­ຮູ້­ໃຫ້­ສິດ­ພຽນ ອ່ານເປັນ­ຂຽນ­ໄດ້
ວິ­ຊາຫຼາຍ­ໃຈ ຄູບໍ່­ສູ້ ວິ­ຊາເຈົ້າ­ຊູ້ ຄູບໍ່­ຜ່ານ
ຕ້ອຍ­ບໍ່­ສົນ ຄົນເງິນເດືອນ­ຕາມ­ຊັ້ນ ຄືອ້າຍ­ນັ້ນ ຕ້ອງເສົ້າຫມອງ

­ແຫນ້ນ­ໃນ­ໃຈຢາກ­ຮໍ່າ­ຮ້ອງ ດັງ­ກ້ອງອອກ­ໃຫ້­ສ່ວາງ­ໃຈ
ກໍ່­ຄິດ­ອາຍ­ນັກ­ຮຽນ ເຂົາ­ຊິ­ຫາ­ວ່າ­ຄູບ້າ
ກັ້ນ­ນໍ້າຕາ­ບໍ່­ໃຫ້ຍ້ອຍ ອອຍ­ກັບ­ໃຈ ເຮົາ­ບໍຫານ­ໄປ­ແຂ່ງເພິ່ນ
ເຂົາ­ມີ­ລົດ ມີເງິນ ສໍາປະ­ທານ­ທີ່ດິນ ປູກ­ຢາງ­ພາລາກ­ວ້າງ ໆ­ ພາຍ­ຫນ້າ­ຊິມັ້ງ­ມີ

ທຽບ­ໃສ່ມາທາງ­ອ້າຍ­ພີ້ ຫລາຍ­ປີ­ໄປ­ຢ້ານ­ລໍາບາກ ­ແລ້ວ­ນໍ
­ແນວ­ກິນ-ຢາກ ­ແພງ­ຊັກ­ໄຊ້ ເງິນ­ທີ່­ໄດ້ (ຄື)ຊິບໍ່­ພໍ
ຕ້ອຍ­ບໍ່­ລໍເງິນເດືອນ­ອ້າຍ (ເດືອນສິບເພິ່ນ­ວ່າ­ຊິ­ຂຶ້ນ­ໃຫ້­ຢູ່) ຮັກມາຫຼາຍໆ­ ­ໄດ້­ຂາດເຄິ່ງ
ແວວ­ຕາ ຄົນເຄີຍເບິ່ງ­ແຕ່ກ່ອນ­ກີ້ ມາດຽວ­ນີ້­ໂລດເລົ່າເມີນ

ເປັນ­ສ່ວນເກີນເຈົ້າ­ແລ້ວ ບໍ່ມີ­ແນວ ຊິ­ໃຫ້­ຄູ­ໄດ້­ຕັ້ງ­ຕໍ່
ຫ້ອງກະ­ບໍ່­ຢາກ­ຂຶ້ນ ຫັນເພິ່ງເຫຼົ້າເປັນ­ຫມູ່­ໃຈ
­ໃຜ­ຊິເຕືອນ ­ໃຜ­ຊິ­ຮ້າຍ ຕາມ­ແຕ່­ໃຈ ເມົາໆ­ ຖອນໆ­ ບໍ່­ຢາກ­ຊື່ນ
­ໂສ້­ລົດ­ຂາດ ເຊ­ຊຸກ­ລົງ­ລົ້ມ­ພື້ນ ເດັກ­ນ້ອນ­ຢືນ­ຫຸ້ມເວົ້າ ເອົ໊າ! ຄູຄໍາຫຼ້າ­ຂີ້ເມົາ...ອ໊າ!!

ຂໍອະ­­ໄພ­ນໍາເດີ້ ຫາກ­ຊື່­ຕົວ­ລະ­ຄອນ­ໄປ­ກົງ­ກັບ­ຊື່ ຜູ່ເຂົ້າມາ­ອ່ານ...

 ເກາະກະແສເພງດັງ

ປຽບເຈົ້ານັ້ນດັ່ງດອກຟ້າ (She's out of my league)

ຍາມແວວຕາແນມຈ້ອງ  ລອງຕຶກຕອງປຽບທຽບຄ່າ

ວາດສະຫນາສ່ຳອ້າຍ      ຄືຊິພ່າຍໃຫ້ແກ່ເຂົາ

ລົດງາມໆຮັບທຸກເຊົ້າ   ທຽບກັບເຮົາໂລດແຕກຕ່າງ

ຫົນທາງຄົງຫ່າງເຍີ້ນ   ຍາມເມື່ອເດີນພໍ້ຫນ້າ  ໃດຊິກ້າເອີ່ຍຈາ

ເຈົ້ານັ້ນປຽບດອກຟ້າ   ແນວຫມາວັດຢ້ານບໍສົມ

ໄດ້ຊື່ນຊົມພຽງສາຍຕາ   ບໍ່ຫານຈາມາຊ້ອນ

ຮອດຍາມນອນຝັນເຫັນຫນ້າ ຈັ່ງມີວາດສະຫນາ ໃກ້ເນື້ອອຸ່ນ

ບຸນບໍ່ສົມນົງນາດນ້ອງ      ຄິດຫມາຍປອງຄຽງຄູ່ເຈົ້າ ຕົນອ້າຍຍ້ານບໍ່ຄື

ເຫລືອໃຈເດ! ຄິດຢາກຍື້    ເດັດດອກຟ້າ ມາດົມກິ່ນ

ປີນກາປີນຂຶ້ນບໍໄດ້        ມືອ້າຍຍື້ບໍ່ສູງ

ຊິຕັດໄມ້ ມາພະຍຸງຂຶ້ນ     ໃຫ້ທຽມນາງຢ້ານບໍ່ເກິ່ງ ເຈົ້າແລ້ວ

ແມ່ນວ່າມືຍື້ເຖິງ  ຕີນພັດວິດຈາກພື້ນ  ບືນຂຶ້ນພະລາດລົງ

ຄິດຢາກປົງໃຈຕັ້ງ          ເຊົາຫວັງຕັດອອກຫ່າງ

ບຸນບໍ່ສົມໄດ້ສ້າງ           ແມ່ນທຽວຫ້າງກໍ່ເລົ່າມາຍ

ຄົນຈົນໆຄືຈັ່ງອ້າຍ         ບໍ່ກ້າຫມາຍ ຢ້ານແມ່ນ້ອງນັ້ນຊິດ່າ

ຄົນມີຫນ້າມີຕາ ຖານະດີພຽບພ້ອມ ແນວນັ້ນຈັ່ງຄູ່ຄວນ  ເຈົ້າແລ້ວ

ຂໍອະໄພນຳເຈົ້າຂອງຮູບ ທີ່ເອົາຮູບລົງໂດຍບໍໄດ້ຮັບອະນຸຍາດ

ຖ້າເປັນການລ່ວງລະເມີດ ກໍ່ຂໍອະໄພມານະທີ່ນີ້ດ້ວຍ (ເອົາມາແຕ່ອິນເທີຣ໌ເນັທອີກທອດນຶ່ງ)

ຂໍໂທດເດີນາດນ້ອງ ຜູ້ງາມຄ່ອງຕາຫວານ

ສາວສະຫວັນໂສພາ ຊາຍຊິຈາວອນເວົ້າ

ຢາກເປັນເຂີຍບ້ານເຈົ້າ ຂໍເຊົາເຮືອນຫລັງໃຫຍ່ 

ພໍຊິໄດ້ບໍ່ນ້ອງ        ໃຫ້ລອງເວົ້າກ່າວຈາ

ອ້າຍນີ້ມາເຫັນຫນ້າ  ສາວຊ່າແດນສະຫວັນ

ໃຈໃຝ່ຝັນໂຫຍຫາ   ວ່າຢາກມາຄຽງຊ້ອນ

ຊາຍຢາກຍັບສວນມ້ອນ ເຂົ້າມາຊອນສວນຫມີ່ ເຈົ້າເດ

ຢາກຍັບສວນຫມາກມີ້   ມາທາງພີ້ຊິວ່າໃດ

ເຈົ້ານັ້ນແນວນາມໄມ້    ໃບດົກນົກຫມາຍປອງ 

ຊາຍຫວັງຄອງເຊີຍຊົມ    ຢາກຊື່ນຊູຊິດໃກ້

ມືຢາກຈັບຖືຝ້າຍ      ຄຽງກາຍມັດແຂນຕໍ່ ເຈົ້າແລ່ວ

ຂໍເປັນເຂີຍແມ່ນ້ອງ   ພໍໄດ້ແດ່ບໍນາງ

ຢ້ານແຕ່ເປັນຝັນຮ້າງ  ນາງນ້ອງຊິບໍ່ສົນ

ຫົວອົກຄົນບ້ານໄກ   ຢ້ານເປັນໄປດັ່ງເພງຮ້ອງ

ເປັນທຳນອງຕົວະຕົ້ມ ຫລົງລົມສາວຕັ້ງຕໍ່ ຢ້ານເດ໋!

ຕົວະມາຂໍຮອດບ້ານ  ສາວນັ້ນພັດວິວາ

ເຫລືອໃຈແຕ່ຜູ້ຂ້າ   ທາງບ້ານຫ່າງກັນໄກ

ຢາກຍັບຍ້າຍເຮືອນຊານ ມາຫາໃຫ້ມັນແລ້ວ

ຢາກໄດ້ແນວນາມໃພ້  ໄທສະຫວັນຕ້ອນແມ່

ຢ້າແຕ່ຄົນຂີ້ລ້າຍ     ຄືອ້າຍເພິ່ນບໍ່ສົນ

ຫາກແມ່ນບຸນພໍຊົ້ນ  ຊິວົນວຽນສານຕໍ່

ຂໍເປັນກໍຮ່ວມໄມ້    ເປັນໃບຊ້ອນຮົ່ມເງົາ

ຂໍພຽງໃຈນ້ອງເຈົ້າ   ບໍ່ມີເຂົາກັ້ນຫວ່າງ

ອ້າຍຂໍຍ່າງຮ່ວມນ້ອງ ຄຽງເຈົ້າເຂົ້າວິວາ

ຫມູແລະຫມາຍັງລ້ຽງ ງົວ ຄວາຍ ນ້ອງປ່ອຍ ນັ້ນເດ໋

ເປັດແລະໄກ່ ນົກນ້ອຍ ຍັງຄອຍລ້ຽງບໍ່ລາ

ຊິບໍ່ສົງສານຫນ້າ     ເຫັນອ້າຍມາແລ້ວປະປ່ອຍ ເປັນບໍ!!!!

ອົດລ້ຽງເອົາອ້າຍຜູ່ນ້ອຍ ໄວ້ທຽວຕ້ອຍບາດເຂົ້ານອນ ສາວເອີຍ

&&&&&&&

ຫາກິນກັບຂອງເກົ່າ

ບໍ່ໄດ້ລົງໄດອະຣີ່ດົນເຕີບແລ້ວ

ຊ່ວງນີ້ຄິດແຕ່ງກອນໃຫມ່ບໍ່ອອກ (ບໍ່ປ່ອງ) ເລີຍເອົາບົດກອນເກົ່າທີ່ເຄີຍຂຽນໄວ້ມາລົງ

ຫວັງວ່າຊິບໍ່ຕຳນິກັນ

ຄິດຮອດເດຮັກຂ້າ ອາດີດເກົ່າຄາວຫລັງ

ຄັ້ງທີ່ເຮົາທັງສອງ ເຄີຍຮັກກັນຄົງຫມັ້ນ

ນາງຍັງສັນຍາອ້າຍ ວ່າສອງໃຈຊິຫມັ້ນແກ່ນ

ແຟນເອີຍແຟນ ເຈົ້າຊ່າງມາຖິ້ມອ້າຍ ຫາຍຫນ້າບໍ່ຫ່ວງຫລັງ

ຈັກຍ້ອນຫຍັງອ້າຍບໍ່ຮູ້ ມູນເຫດເປັນແນວໃດ

ເຈົ້າຈາກໄກບໍ່ເອີ່ຍຄຳ ນ້ຳຄຳລາບໍ່ມີຈ້ອຍ

ອ້າຍໄດ້ຄອຍຄອງຖ້າ ຄິດເຫັນພາບເຈົ້າມາ ນ້ຳຕາຫລັ່ງ

ຫລືຍ້ອນສາວເຈົ້ງຊັງ ຕິວ່າຈົນຕ່ຳຕ້ອຍ ແຟນຂ້ອຍຈຶ່ງຫ່າງໄກ ເດນໍ

ຄັ່ນແມ່ນເປັນຍ້ອນອ້າຍ ຊິບໍ່ວ່າເຈົ້າແນວໃດ ຫລ້າເອີຍ

ຊິຖືວ່າວາດສະຫນາ ອ້າຍເກີດມາບໍ່ສົມເຈົ້າ

ຖືວ່າເຮົາບໍ່ເຄີຍສ້າງ ເຮັດບຸນ ຮ່ວມກັນມາ ແຕ່ປາງກ່ອນ

ຫລອນເກີດມາຊາດນີ້ ຈິ່ງມີຮ້າງຫ່າງໄກ ຊັ້ນບໍ

ໄປຢູ່ໃສໃຫ້ເຈົ້າເວົ້າ ບອກກ່າວອ້າຍມາສາ

ຫລາຍປີລາອ້າຍຍັງຄອຍ ຕັ້ງຕາລໍທຸກແລງເຊົ້າ

ຫາກເຂົ້າມາເຫັນກອນອ້າຍ ຝາກອອນໄລນ໌ໃຫ້ເຈົ້າກ່າວ ຕອບມາເດີ່

ຍັງຄອງຄອຍຂ່າວຄາວ ສົ່ງເຂົ້າມາພໍໃຫ້ຮູ້ ວ່າແຟນ(ເກົ່າ)ອ້າຍຢູ່ສະບາຍ ຫລ້າເອີຍ!!

ຂໍອະໄພນຳຜູ້ທີ່ເຄີຍອ່ານມາກ່ອນ