ເວລາຮູ້ວ່າຈະມີພີ່ນ້ອງ ຫຼືແຂກໄກໄທອື່ນ ຄົນຮັກຄົນແພງມາຢ້ຽມຢາມ ກິນເຂົ້າເຊົາເຮືອນ ຄົນລາວຈະຂຸ້ນຂ້ຽວ ພາກັນຫ້າງຫາກະກຽມ ທຸກສິ່ງທຸກຢ່າງ ດ້ວຍຄວາມຕື່ນເຕັ້ນຍິນດີ ນັບແຕ່ການຕົບແຕ່ງ ປະດັບປະດາ ສະຖານທີ່ ເຮືອນຊານບ້ານຊ່ອງ ໃຫ້ສະອາດຈົບງາມ ຮຽບຮ້ອຍ ເປັນຕາໜ້າຢູ່ໜ້າເຊົາ ເຖິງວ່າເຮືອນນ້ອຍ ແຕ່ສິ່ງສຳຄັນແມ່ນ ໃຈບໍ່ນ້ອຍຕາມ ໃຈຕ້ອງກ້ວາງໃຫຍ່ ໃຫ້ແຂກມີຄວາມພໍອົກພໍໃຈ ສະດວກສະບາຍ ສົມໜ້າສົມຕາຜູ້ມາຢາມ ສ່ວນໜຶ່ງກໍແມ່ນ ຮີບຟ້າວຂົນຂວາຍເອົາຂອງຢູ່ຂອງກິນ ຢ່າງພຽງພໍ ມາສະສົມໄວ້ບໍ່ໃຫ້ຂາດໃຫ້ເຂີນ ເຮືອນໃຕ້ມີໝາກເຂືອ ເຮືອນເໜືອມີເຂົ້າ ແລະ ນ້ຳ ຫຼືວ່າ ເຮືອນເອມມີໄກ່ ເຮືອນບາໄມມີໝູ ກໍພ້ອມກັນເອົາມາສູ່ແຂກກິນ ເຮັດໃຫ້ແຂກໄດ້ຢູ່ໄດ້ກິນ ຢ່າງອີ່ມໜຳສຳລານ ເບີກບານຫົວໃຈ ຖືວ່າມາເຮືອນແມ່ ເຮືອນພໍ່ ບໍ່ໃຫ້ເຈົ້າຄິດງໍ້ເລື່ອງກິນ ເລື່ອງຢູ່ ມາແຕ່ຕົວກັບຫົວໃຈກໍພໍແລ້ວ ເງິນຄຳບໍ່ສຳຄັນ ແຕ່ຄັນໃຫ້ດີແທ້ ມີຈັກໜ້ອຍຕິດຕົວມານຳແດ່ ກໍຫາກດີເນາະ ເພິ່ນວ່າ ! ເພາະບາງເທື່ອກໍໄດ້ແຈກລູກ ແຈກຫຼານຕື່ມແດ່ ໃນຍາມຈະເດີນທາງກັບ.

ເວົ້າເລື່ອງຄົນລາວພວກເຮົາ ເຖິງວ່າຕົນເອງທຸກຍາກ ແຕ່ຈິດໃຈກໍບໍ່ເຄີຍສະແດງໃຫ້ເຫັນ ເຖິງຄວາມລຳບາກ ຄວາມຄັບແຄບ ຂີ້ຖີ່ ຫຼື ບໍ່ມີນ້ຳໃຈ ຄົນລາວເປັນຄົນເອື້ອເຟື້ອເພື່ອແຜ່ ດູແລ ແລະ ຫ່ວງໃຍຄົນອື່ນ ດ້ວຍຫົວຈິດຫົວໃຈ ເອົາອົກເອົາໃຈ ຜູ້ມາຢ້ຽມຢາມ ບໍ່ໃຫ້ເພິ່ນເວົ້າຂວັນເຂົາວ່າ: ຄົນລາວເຮົາ ດ້ອຍພັດທະນາວ່າຊັ້ນ ! ອັນນີ້ກໍຍັງຄິດສົງໃສຢູ່ວ່າ: ເຂົາເວົ້າຖືກຢູ່ບໍ ? ເພາະຕົວຈິງແລ້ວ ຈິດໃຈຂອງຄົນລາວນີ້ ມັນພັດທະນາ ແລະ ຈະເລີນຮຸ່ງເຮືອງເຫຼືອງເຫຼື້ອມ ມີອະລິຍະທຳທີ່ໜ້າອັດສະຈັນ ແລະ ຫຼົງໄຫຼ ມາຫຼາຍຮ້ອຍຫຼາຍພັນປີແລ້ວ ຊຶ່ງຜ່ານມາ ຄົນລາວກໍໄດ້ພິສູດໃຫ້ຄົນທັງໂລກ ຮັບຮູ້ເຂົ້າໃຈ ແລະ ຕື່ນຕາຕື່ນໃຈມາແລ້ວວ່າ:ຄົນລາວ ເປັນຄົນດີມີນ້ຳໃຈໄມຕີຈິດ ແລະ ມີຊີວິດທີ່ສົດຊື່ນແຈ່ມໃສ ບໍ່ໄດ້ຫງ່ວມເຫງົາເສົ້າໂສກ ແລະ ມັກຫາເລື່ອງຫາຄວາມ ຄືດັ່ງປະເທດອື່ນ ພິເສດ ຄົນລາວເປັນຄົນທີ່ມັກສະຫງົບ ສັນຕິ ມີລະບຽບວິໄນ ນ້ຳໃຈດີງາມ ຮູ້ເອົາໃຈເພິ່ນມາໃສ່ໃຈໂຕ ຮັກຫອມ ເຫັນອົກເຫັນໃຈ ອະໄພໃຫ້ກຽດ ແລະ ຊ່ວຍເຫຼືອເຊິ່ງກັນ ແລະ ກັນ ດ້ວຍຄວາມຈິງໃຈ ... ປັດຈຸບັນນີ້ ກໍຄືສູ່ມື້ນີ້ ຄົນລາວທັງຊາດ ກໍກຳລັງເປັນເຈົ້າການ ຮ່ວມແຮງຮ່ວມໃຈກັນ ມ່ວນຊື່ນສະຫຼອງໄຊ ພ້ອມຈິດພ້ອມໃຈ ຮັບຕ້ອນແຂກຕ່າງດ້າວ ທ້າວຕ່າງແດນ ທີ່ເດີນທາງມາຢ້ຽມຢາມທ່ຽວຊົມ ແລະ ສະເຫຼີມສະຫຼອງວຽງຈັນ ເປັນນະຄອນຫຼວງ ຄົບຮອບ 450 ປີ ແລະ ວັນຊາດທີ 2 ທັນວາ ຄົບຮອບ 35 ປີ ຊຶ່ງປີນີ້ກໍມີ 21 ໂຄງການ ຫຼາຍກິດຈະກຳທີ່ສ່ອງແສງເຖິງ ຄວາມສວຍງາມ ອຸດົມສົມບູນທາງທຳມະຊາດ ມີປະຫວັດສາດທີ່ໜ້າອັດສະຈັນ ແລະ ມີວັດທະນະທຳຫຼາຍສີສັນ ແລະ ລ້ຳຄ່າ ... ຖືວ່າຄົນລາວ ໄດ້ຜ່ານເລື່ອງລາວທັງໄລຍະຮ້ອນ ແລະ ໜາວ ແຕ່ຈິດໃຈຂອງຄົນລາວວິລະຊົນ ກໍບໍ່ເຄີຍຖືກດັບສູນ ຄວາມເປັນຊາດລາວ ຄົນລາວຍັງຖືກບູລະນະໃຫ້ງອກງາມ ແລະ ເບັ່ງບານ ເໝືອນດັ່ງດວງຈຳປາ ທີ່ນັບມື້ສວຍງາມ ສົ່ງກິ່ນຫອມຫວນ ໄປທົ່ວທຸກສາລະທິດຂອງດິນແດນ ສາທາລະນະລັດ ປະຊາທິປະໄຕ ປະຊາຊົນລາວ ຜູ້ອົງອາດ ພາຍໃຕ້ການນຳພາຂອງພັກ ປະຊາຊົນປະຕິວັດລາວ ທີ່ມີກຽດສະຫງ່າ.

ຮອຍຍິ້ມ ຄວາມໂອບເອື້ອອາລີ ມີນ້ຳໃຈ ແລະ ຫ່ວງໃຍຄົນອື່ນ ເປັນສະເໜ່ອັນໜ້າຫຼົງໄຫຼ ຂອງຄົນລາວພວກເຮົາ ເພາະຄົນລາວເປັນຄົນໃຈດີ ໃຈບຸນ ຢູ່ໃນສິນກິນໃນທຳ ຖະນຸຖະໜອມຕ່ອມຕຸ້ມ ຮັກແພງຄົນອື່ນຫຼາຍກ່ວາຕົນເອງ ໃນຊີວິດປະຈຳວັນ ພວກເຮົາສາມາດພົບເຫັນຮອຍຍິ້ມ ແລະ ຄວາມມີນ້ຳໃຈ ໄດ້ທຸກຫົນແຫ່ງຂອງດິນແດນລ້ານຊ້າງ ຄົນລາວບໍ່ເຄີຍຄິດເອົາປຽບຄົນອື່ນ ບູຮານວ່າ: ຄັນອ້າຍຊິເມືອນຳນ້ອງ ບໍ່ໃຫ້ເຄືອງບາດແຂນ ຄັນຊິເມືອນຳນ້ອງ ບໍ່ໃຫ້ແຄ້ນບາດຍ່າງ ຄັນບໍ່ຂຶ້ນຂີ່ຊ້າງ ຊິພາອ້າຍຂີ່ລົດຍົນ.

ແນວໃດກໍຕາມ ສິ່ງທີ່ຢາກແລກປ່ຽນ ແລະ ເປັນຫ່ວງຫຼາຍທີ່ສຸດ ຢ້ານຄົນອື່ນແນມເບິ່ງຄົນລາວເຮົາ ດ້ອຍພັດທະນານັ້ນ ກໍຍັງແມ່ນເລື່ອງຄວາມເອຶ້ອເຟື້ອເພື່ອແຜ່ ແລະ ບໍ່ດູແລຂີ້ເຫຍື້ອຂອງແຕ່ລະຄົນ ໂດຍສະເພາະແມ່ນ ມາລະຍາດໃນການຖິ້ມຂີ້ເຫຍື້ອ ຊຶ່ງພວກເຮົາຍັງບໍ່ພ້ອມກັນ ພັດທະນາເທົ່າທີ່ຄວນ ເພາະມື້ສົມໂພດຮູບປັ້ນເຈົ້າອະນຸວົງ ພະອົງກໍຄືຊິຕ່ຳຄ້ອຍນ້ອຍໃຈ ເປັນຫ່ວງເປັນໃຍ ລູກຫຼານເຫຼັນຫຼ້ອນຂອງເພິ່ນ ທີ່ບໍ່ພ້ອມກັນຮັກສາບ້ານເຮືອນ ຫຼືດູແລອະນຸສາວະລີແຫ່ງນີ້ ຊ່ວຍກັນ ຄວາມສະອາດສວຍງາມ ໃຜໆກໍນິຍົມຊົມຊອບ ບູຮານວ່າ: ຢູ່ໃຫ້ເຮັດດີ ໜີໃຫ້ເພິ່ນຄິດຮອດ.

ໂດຍ: ສາຍດາຣາ ຈາກຫນັງສືພິມ ວຽງຈັນໃຫມ່