Final Fantasy ໑
ປະຖົມບົດແຫ່ງຕຳນານແກ້ວຄລິສຕັລ.



Prologue

໒໐໐໐ປີທີ່ແສນຍາວນານ ກ່ອນໜ້າຍຸກປະຈຸບັນ...
"The Four Fiends"ປີສາດຮ້າຍທັງ໔ ໄດ້ເຮັດພັນທະສັນຍາກັບອັດສະວິນໜຸ່ມຄົນ໑ ນາມວ່າ"ກາຣ໌ແລນດ໌" ເພື່ອມຸ້ງໝາຍສູ່ການມີຊີວິດຢືນຢາວຊົ່ວນິລັນດອນຂອງທັງ໒ຝ່າຍ...

ອັດສະວິນໜຸ່ມຜູ້ເກ່ງກ້າຄົນນັ້ນ ໄດ້ຮັບພະລັງທີ່ເກີນຮັບຮູ້ເຖິງ ແລະເກີດໃໝ່ ໃນຮ່າງຂອງສິ່ງທີ່ມີຊີວິດທີ່ເຕັມໄປດ້ວຍພະລັງດ້ານມືດ...
ຊື່ຂອງມັນແມ່ນ"ຄາອອສ".

...ແລ້ວ ເວລາກໍ່ລ່ວງເລີຍໄປເຖິງ໒໐໐໐ປິ... ກະແສປະຫວັດສາດ ແລ່ນໄຫຼໄປຢ່າງຕໍ່ເນື່ອງ
ໂດຍບໍ່ມີປະໂຫຍກໃດ ກ່າວເຖິງເນື້ອຫາຂອງພັນທະສັນຍາໃນເງົາມືດນັ້ນເລີຍ ແມ່ນແຕ່ແຖວດຽວ...



When Legend becomes Real

ໃນທີ່ສຸດກໍ່ມາເຖິງເວລາທີ່ຕຳນານໜ້າໃໝ່ໄດ້ເລິ່ມຕົ້ນຂຶ້ນ...
ຜູ້ຄົນໃນຍຸກປະຈຸບັນ ໄດ້ປະເຊີນໜ້າກັບໄພຄັ້ງໃຫຍ່ທີ່ບໍ່ເຄີຍມີມາກ່ອນ... "ປີສາດຮ້າຍທັງ໔"ທີ່ເຄີຍໄດ້ຍິນແຕ່ລຳເລົ່າຂານ ກໍ່ໄດ້ປະກົດຕົວຂຶ້ນ...
ທັນໃດ ແກ້ວຄລິສຕັລທັງ໔ ທີ່ຄວບຄຸມຄວາມທຸ່ນທ່ຽງຂອງໂລກ... ທັງດິນ ນ້ຳ ລົມ ໄຟ ຕ່າງກໍ່ສູນເສີຍປະກາຍແສງໄປໝົດ.

ລິຊ - ຮ່າງກະດູກທີ່ຂ້າບໍ່ຕາຍ ປະກົດຕົວຂຶ້ນທີ່ຖ້ຳເລິກໃຕ້ຜິວໂລກ ແລະເຮັດໃຫ້ແຜ່ນດິນແຫ້ງ ໄຮ້ພືດພັນທັນຍາຫານ.

ມາລິລິທ - ແມ່ຍິງ໖ແຂນທີ່ເຄິ່ງຮ່າງກາຍເປັນງູຍັກ ປະກົດຕົວຂື້ນທີ່ໃຈກາງພູເຂົາໄຟອັນຮ້ອນແຮງ ແລະເຮັດໃຫ້ແປວໄຟລຸກ ໄຮ້ການຄວບຄຸມ.

ຄຣາເຄນ - ປາເມິກຍັກໜ້າຂີ້ດຽດ ປະກົດຕົວຂຶ້ນທີ່ວິຫານໃຕ້ບາດານ ແລະເຮັດໃຫ້ແມ່ນ້ຳແຫ້ງ ທະເລປັ່ນປ່ວນ.

ເທຍແມທ - ມັງກອນ໖ຫົວເປັນຕາຢ້ານ ປະກົດຕົວຂຶ້ນເທິງຜາສາດລອຍຟ້າ ມໍລະດົກຂອງຊົນເຜົ່າທີ່ດັບສູນ ແລະເຮັດໃຫ້ສາຍລົມປັ່ນປ່ວນ.

ຈາກນັ້ນໂລກກໍ່ຈົມລົງສູ່ຄວາມມືດ...



The Prophecy

...ໃນພາວະທີ່ສຽງແຜດຮ້ອງ ບໍ່ສາມາດບັນເທົາຄວາມທຸກທໍລະມານໄດ້...
ຜູ້ຄົນທົ່ວໂລກຕ່າງກໍ່ມຸ້ງໝັ້ນ ຝາກຄວາມຫວັງອັນເລັກນ້ອຍ ໃຫ້ກັບຄຳທຳນາຍສັ້ນໆທີ່ຖ່າຍທອດປາກຕໍ່ປາກວ່າ...
"ເມື່ອໂລກກ້າວເຂົ້າສູ່ຄວາມມືດ... ຜູ້ກ້າທັງ໔ ຈະນຳແສງສະຫວ່າງກັບຄືນມາ"

...ແລ້ວ ໃນທີ່ສຸດຄວາມຝັນຂອງມວນມະນຸດ ກໍ່ສຳເລັດຜົນ... ນັກຮົບທັງ໔ຄົນ ປະກົດກາຍຂຶ້ນ
ຫຼັງຈາກຜ່ານການເດີນທາງທີ່ຍາວນານ ພ້ອມກັບເສດສ່ວນຂອງຄລິສຕັລທີ່ໄຮ້ປະກາຍທັງ໔ ປະຄອງແໜ້ນໄວ້ໃນມື...

ບັດນີ້... ພາລະກິດທີ່ຈະນຳໂລກກັບສູ່ທິດທາງທີ່ຄວນຈະເປັນ... ກໍ່ໄດ້ເລີ່ມຕົ້ນຂຶ້ນແລ້ວ...

Toward the Past

ພວກເຂົາຜ່ານຮ້ອນຜ່ານໜາວ ເດີນທາງໄປກວ່າເຄິ່ງໂລກ ໄດ້ປະເຊີນກັບອຸປະສັກຕ່າງໆມາກມາຍ
ບໍ່ວ່າຈະບຸກຖ້ຳເລິກຄົ້ນຫາມຸງກຸດກັບມາໃຫ້ແກ່ລາຊາໄຮ້ບັນລັງ ນຳດວງຕາກັບມາໃຫ້ແກ່ແມ່ມົດຜູ້ສູນເສຍແສງສະຫວ່າງ
ນຳນ້ຳຢາໄປປຸກເຈົ້າຊາຍເອລຟ໌ທີ່ຫຼັບໄຫຼ ນຳເພັດມາເບີກທາງຈາກຍັກໄທທັນຂະໜາດໃຫຍ່ ຯລຯ.

ແຕ່ວ່າ... ໂດຍທີ່ບໍ່ມີໃຜຄາດຄິດ... "ກະແຈ"ທີ່ສຳຄັນທີ່ສຸດສຳຫຼັບຕຳນານບົດນີ້ ບໍ່ໄດ້ຢູ່ທີ່ພາລະກິດກອບກູ້ຄລິສຕັລໃນພາຍຫຼັງ
ແຕ່ຢູ່ທີ່"ຈຸດເລີ່ມຕົ້ນ"ຂອງເລື່ອງລາວທັງໝົດ...

ເມື່ອເບິ່ງກັບໄປທີ່ຄັ້ງທຳອິດ ເວລາທີ່ບັນດານັກຮົບແຫ່ງແສງປະກົດຕົວ...
ທຸກຄົນໄດ້ໄລ່ນຳໄປກຳຈັດ"ຍອດອົງຄະລັກແຫ່ງອານາຈັກໂຄເນເຣຍ"ທີ່ເສຍສະຕິ ລັກພາຕົວເຈົ້າຍິງຄົນສຳຄັນໜີໄປ.

ພ້ອມກັບໄຊຊະນະຄັ້ງທຳອິດ ຊື່ສຽງຂອງນັກຮົບທັງ໔ ກໍ່ໂດ່ງດັງໄປທົ່ວ...
ໂດຍບໍ່ມີໃຜສົນໃຈ ເຖິງຮ່າງໄຮ້ວິນຍານຂອງອົງຄະລັກໜຸ່ມຄົນທໍລະຍົດ ທີ່ຢູ່ເບື້ອງໜ້າ...
ເຊິ່ງມີນາມວ່າ... "ກາຣ໌ແລນດ໌"...



The Hidden Truth

ໃນວິນາທີເປັນຕາຍ... ກ່ອນທີ່ຈະຈົບຊີວິດລົງ ກາຣ໌ແລນດ໌ໄດ້ເຮັດພັນທະສັນຍາມືດກັບປີສາດຮ້າຍທັງ໔
ແລະຖືກດຶງກັບໄປສູ່ອະດີດເມື່ອ໒໐໐໐ປີກ່ອນ ພ້ອມເກີດໃໝ່ໃນຮ່າງຂອງ"ຄາອອສ" ລາຊາແຫ່ງຄວາມມືດ.

ແລະຄາອອສ ກໍ່ໃຊ້ພະລັງທີ່ໄດ້ຮັບ ສົ່ງປີສາດຮ້າຍທັງ໔ ຂ້າມເວລາຈາກອະດີດ ມາຊ່ວງຊິງແສງສະຫວ່າງໃນປະຈຸບັນ...

ວົງວຽນຂອງຊະຕາກຳດັ່ງທີ່ເປັນຢູ່ນີ້ ກໍ່ໝູນວຽນຕໍ່ໄປ... ຈາກອະດີດສູ່ອະນາຄົດ... ແລະຈາກອະນາຄົດຢ້ອນກັບສູ່ອະດີດ... ຊ້ຳແລ້ວຊ້ຳເລົ່າ ບໍ່ມີວັນຈົບສິ້ນ...
ຄາອອສ ແລະປີສາດຮ້າຍທັງ໔ ກໍ່ຍັງຄົງມີຊີວິດຢູ່ເໜືອລິຂິດແຫ່ງເວລາ... ແສງສະຫວ່າງຂອງຄລິສຕັລ ກໍ່ຍັງຄົງຖືກຍາດຊິງໄປ...

...ຕະຫຼອດການ...

Behind the Cover

Final Fantasy ໑ - ບົດແຫ່ງ"ການທຳນາຍ" - ນັ້ນ ໄດ້ສ້າງກະແສທີ່ຮຸນແຮງຢ່າງບໍ່ມີໃຜຄາດຄິດ ເມື່ອ໒໐ປີກ່ອນໜ້ານີ້... ອາດຈະເພາະວ່າຮູບແບບຂອງເນື້ອເລື່ອງທີ່ກ້າ"ນອກ"ນິຍາມເກົ່າຂອງຄຳວ່າ"ແຟນຕາຊີ" ໃຫ້ໄກເກີນຄຳວ່າ"ຄວາມເພີ້ຝັນ" ຢ່າງທີ່ຫຼາຍຄົນເຄີຍເຂົ້າໃຈ... ໂດຍຍັງເຫຼືອໄວ້ເຊິ່ງກິ່ນອາຍແຫ່ງການຜະຈົນໄພຢ່າງຄົບຖ້ວນ.

ຖ້າຈະເວົ້າເຖິງແນວຄິດເລື່ອງຂອງ ໄທມ໌ລູປ(Time Loop) ທີ່ຫຼິ້ນເລື່ອງຂອງກະແສເວລາໝູນວຽນກັບໄປກັບມານັ້ນ
 ເຖິງຈະຕ້ອງຍອມຮັບວ່າ ບໍ່ແມ່ນເລື່ອງແປກໃໝ່ເທົ່າໃດ ແລະສາມາດພົບໄດ້ໃນນິຍາຍຫຼາຍໆເຫຼັ້ມໃນຍຸກນັ້ນ...
ແຕ່ ສຳຫຼັບເກມໃນຊ່ວງເວລາດັ່ງກ່າວແລ້ວ... ນີ້ບໍ່ແມ່ນໂຄງເລື່ອງທົ່ວໆໄປຢ່າງແນ່ນອນ.

...ກະແຊັດເກມ 8 bit ນ້ອຍໆນີ້ ຖ່າຍທອດທັງອົງປະກອບທີ່ຜູ້ຫຼິ້ນຄາດຫວັງວ່າຈະພົບ ແລະເກີນກວ່າທີ່ຜູ້ຫຼິ້ນຄາດຄິດວ່າຈະພົບ.

ແຕ່ຕົ້ນຈົນຈົບ ເຮົາຈະໄດ້ສວມບົດບາດເປັນຜູ້ກ້າທັງ໔ ອອກເດີນທາງກຳຈັດບັນດາປີສາດຮ້າຍທັງ໔ ແລະນຳແສງສະຫວ່າງກັບຄືນສູ່ຄລິສຕັລ
ໂດຍຮູບແບບການຕໍ່ສູ້ ຈະເປັນລັກສະນະຂອງເກມດັ້ງເດີມ ມີການຍ່າງໃນສາກເມືອງ ສາກແຜນທີ່ໂລກ ແລະສາກຕໍ່ສູ້.

ໃຊ້ຄວາມສາມາດເທົ່າທີ່ມີ ຈັດການສັດຕູໃຫ້ໄດ້ ພ້ອມຮັບຄ່າປະສົບການມາທ້ອນໄວ້ ໃຫ້ຕົວລະຄອນຂອງເຮົາ ເກ່ງຂຶ້ນເລື້ອຍໆ ນຳເງິນໄປຊື້ອາວຸດ ຊຸດປ້ອງກັນ ຮຽນຮູ້ເວດມົນໃໝ່ໆ ແລະຊ່ອຍເຫຼືອຜູ້ຄົນຕ່າງໆ ຕະຫຼອດເສັ້ນທາງການເດີນທາງ.

Final Fantasy ນຳເອົາຈຸດດີຂອງເກມພາສາຮ່ວມສະໄໝ ມາດັດແປງໃຫ້ມີເອກະລັກສະເພາະຕົວ ແລະນຳຈຸດດ້ອຍ ມາປັບປຸງໃຫ້ທັນສະໄໝຂຶ້ນ ເຮົາຈະໄດ້ເລືອກອາຊີບຂອງຕົວລະຄອນທັງ໔ ຕັ້ງແຕ່ເລີ່ມຕົ້ນ ບໍ່ວ່າຈະເປັນນັກຮົບ ນັກກັງຟູ ໂຈນຂີ້ລັກ ນັກເວດມົນດຳ ມົນຂາວ ມົນແດງ ຕາມທີ່ເຮົາຕ້ອງການ.

ເນື້ອເລື່ອງດຳເນີນໄປ ແລະເຮົາຜ່ານການທົດສອບຈາກມັງກອນຜູ້ຍິ່ງໃຫຍ່"ບາຮາມຸຕ" ໑ໃນສັນຍາລັກປະຈຳເກມແລ້ວນັ້ນ
ຕົວລະຄອນຂອງພວກເຮົາ ກໍ່ຈະປ່ຽນແປງໂສມໜ້າ ແລະພັດທະນາຄວາມສາມາດໃຫ້ສູງຂຶ້ນໄປອີກຂັ້ນ.

ການມີບົດບາດທີ່ແນ່ນອນຂອງຕົວລະຄອນແຕ່ລະຕົວ ມີການພັດທະນາທີ່ເດັ່ນໃນແຕ່ລະສາຍອາຊີບ
ແລະເມື່ອບວກຮ່ວມກັບກຣາຟຟິກທີ່ໂດດເດັ່ນໃນຕອນນັ້ນ ແລະເພງປະກອບທີ່ຍັງຄົງມ່ວນຫູ
ແມ່ນວ່າຈະເບິ່ງຈາກຕອນນີ້ ເຮັດໃຫ້ Final Fantasy ກາຍເປັນຊື່ທີ່ຕິດຫູຊື່໑ ເທົ່າທຽມກັບຊື່ອື່ນໆ...



Beyond the First Step

...ຈົນເຖິງປະຈຸບັນ Final Fantasy ໑ ເປັນພາກທີ່ຖືກນຳມາປັບປຸງ ແລະຍ້າຍສູ່ເຄື່ອງເກມອື່ນໆ ຫຼາຍຄັ້ງທີ່ສຸດ ບໍ່ວ່າຈະເປັນເຄື່ອງເກມຄອນໂຊລ ຫຼືເກມມືຖື ຖ້ານັບລວມແລ້ວກໍ່ເປັນ໑໐ຫຼຸ້ນ.

ຄວາມເດັ່ນທີ່ບໍ່ມີວັນຈາງຫາຍ?

ຫຼືຕຳນານເກົ່າທີ່ຍັງຄົງນຳກັບມາຫາກິນ?

ຖາມແຟນເກມພາສາ ຖາມແຟນເກມໄຟນັລ ຖາມບໍລິສັດສແຄວຣ໌ຜູ້ໃຫ້ກຳເນີດ... ນິຍາມຂອງມັນ
ຈຸດປະສົງຂອງມັນ ກໍ່ຄົງຈະແຕກຕ່າງກັນໄປ ຕາມຈຸດຢືນຂອງແຕ່ລະຜູ້ຕອບ.

...ແຕ່ ສິ່ງທີ່ແນ່ນອນກໍ່ຄື ຫາກເບິ່ງກັບໄປຈາກວັນນີ້ ກໍ່ນັບວ່າກະແຊັດເກມສີຂາວໆອັນນັ້ນ ໄດ້ວາງຮາກຖານທີ່ໝັ້ນຄົງ
ແລະຍິ່ງໃຫຍ່ເໜືອຄຳອະທິບາຍ ໃຫ້ກັບກິ່ງກ້ານຂອງຕົນ ທີ່ແຕກຍອດອອກມາໃນພາຍໜ້າ.

ຄົງບໍ່ມີໃຜຖຽງວ່າ"ຄວາມເພີ້ຝັນ" ນ້ອຍໆທີ່ປະກົດໂສມເປັນຄັ້ງທຳອິດນີ້ ມີຄວາມໝາຍຢ່າງຫຼາຍທີ່ສຸດ ຕໍ່ກ້າວຕໍ່ໆໄປທີ່ຈະນຳມາ... ລວມທັງເກມ ແລະສຳຫຼັບຕຳນານອື່ນໆທີ່ຈະກ່າວຕາມຫຼັງ...



Travels Back in Time

...ບໍ່ແມ່ນຄັ້ງທຳອິດ ທີ່ນັກຮັບແຫ່ງແສງ ໄດ້ຮັບຮູ້ເລື່ອງລາວທັງໝົດ ວ່າເກີດຫຍັງຂຶ້ນ ເໜືອກະແສເວລາ.

...ບໍ່ແມ່ນຄັ້ງທຳອິດ ທີ່ພວກເຂົາ ຕັດສິນໃຈທີ່ຈະເດີນທາງຢ້ອນກັບໄປສູ່ອະດີດ ເມື່ອຄັ້ງ໒໐໐໐ປີກ່ອນ.

...ບໍ່ແມ່ນຄັ້ງທຳອິດ ທີ່ບັນດາຜູ້ທີ່ຖືກເລືອກ ຕ້ອງກັບໄປອະດີດທີ່ແສນຍາວໄກ ເພື່ອພິຊິດປີສາດຮ້າຍທັງ໔... ພິຊິດຄາອອສ... ແລະພິຊິດຊະຕາກຳຂອງຕົນເອງ.

...ການດີ້ນຮົນເພື່ອຈະສິ້ນສຸດວົງຈອນຂອງກະແສເວລາຄັ້ງນີ້... ເບິ່ງຄືວ່າຈະຈົບລົງຢ່າງໄຮ້ປະໂຫຍດ ຄືກັບທີ່ມັນເຄີຍເປັນມາ ແລະຄືກັບທີ່ມັນຈະເປັນໄປ.

...ແຕ່ຄັ້ງນີ້ ມີຫຍັງທີ່ປ່ຽນໄປ...? ມີຫຍັງທີ່ບໍ່ຄືເກົ່າ...?

...ທ່ານເທົ່ານັ້ນ ທີ່ຈະຄວບຄຸມເສັ້ນທາງຂອງພວກເຂົາ ແລະນຳບົດສະຫຼຸບທີ່ແທ້ຈິງ ກັບສູ່ໂລກອີກຄັ້ງ...


ທີ່ມາ: Zieghart
ແປໂດຍ: TINO