Final Fantasy ໒
ກ້າວທີ່໒ ສູ່ການປະຕິວັດ



Prologue
ອານາຈັກ ພາຣາເມເກຍອັນກວ້າງໃຫຍ່ ນຳໂດຍຈັກກະພັດຜູ້ມັກໃຫຍ່ໃຝ່ສູງ ໄດ້ຂະຫຍາຍອຳນາດ ຮຸກຮານດິນແດນອ້ອມຂ້າງຢ່າງບໍ່ຢຸດຢ່ອນ... ພາຍໃຕ້ເວດມົນດຳອັນກ້າແຂງ ແລະກອງທະຫານແຫ່ງຄວາມມືດທີ່ຂ້າບໍ່ຕາຍແລ້ວ... ສຽງຮ້ອງໄຫ້ຂອງຜູ້ຄົນ ດັງອຶກກະທຶກໄປທົ່ວ ແປວໄຟລຸກໄໝ້ ຢາດເລືອດຟົ້ງກະຈາຍ ຍ້ອມລາຕີທີ່ມືດມິດ ໃຫ້ເປັນສີແດງເດືອດ...

ແມ່ນວ່າຈະໄຮ້ເຊິ່ງກຳລັງ ແຕ່ລາຊາແຫ່ງເມືອງຟິນນ໌ ກໍ່ໄດ້ລັກກໍ່ຕັ້ງກອງທັບປະຕິວັດຂຶ້ນມາໃນເມືອງທີ່ແສນຫ່າງໄກ ເຮັດການສຸມກຳລັງ ແລະປະສານຄວາມຮ່ວມມືກັບອານາຈັກອື່ນໆ ທີ່ຕ່າງກໍ່ປະສົບຊະຕາກຳດຽວກັນ ແລະກຳລັງຈະເດີນໜ້າໄປສູ່ຈຸດຈົບໃນຮູບແບບດຽວກັນ...

Innocent Lambs
ຟິຣິອອນ /ມາເຣຍ /ກາຍ ເປັນ໑ໃນຜົນລັບທີ່ເຫັນກັນຈົນລື້ງຕາ ທີ່ໄດ້ຮັບຜົນກະທົບຈາກສົງຄາມທີ່ເຕັມໄປດ້ວຍຄວາມກະຫາຍ ແຕ່ໄຮ້ເຊິ່ງຄວາມໝາຍຄັ້ງນີ້... ພໍ່ແມ່ຂອງທຸກຄົນ ຖືກສັງຫານສິ້ນໃນການໂຈມຕີຂອງຈັກກະພັດ... ພວກເຂົາ ຖືກກອງທະຫານແຫ່ງຄວາມມືດ ໄລ່ລ່າໝາຍເອົາຊີວິດ.

ເຈົ້າຍິງຮິລດາ ບຸດຂອງລາຊາເມືອງຟິນນ໌ ໄດ້ຊ່ວຍເຫຼືອບັນດາເດັກນ້ອຍໄວ້ ຍັງມີພຽງແຕ່ ເລອອນ ອ້າຍຂອງມາເຣຍເທົ່ານັ້ນ ທີ່ຖືກພາໂຕໄປໂດຍທະຫານຈັກກະພັດ... ດ້ວຍຄວາມຕ້ອງການທີ່ຈະແກ້ແຄ້ນ ແລະຊອກຫາສະມາຊິກຄົນສຳຄັນທີ່ສູນຫາຍໄປ... ເດັກນ້ອຍທັງ໓ຄົນ ໄດ້ຍື່ນຄຳຂໍເຂົ້າເປັນສ່ວນ໑ຂອງກອງທັບປະຕິວັດທັນທີ ພ້ອມປະກາດກ້າ ຈະຄົ້ນລົ້ມຈັກກະພັດແຫ່ງຄວາມມືດໃຫ້ໄດ້.

...ຊີວິດທີ່ຮັກສາມາໄດ້ ບໍ່ແມ່ນສິ່ງທີ່ດ້ອຍຄ່າຂະໜາດຈະເອົາມາຖິ້ມ... ເຈົ້າຍິງຮິລດາປະຕິເສດຄຳຂໍ ຮ້ອງຂອງເດັກນ້ອຍທັນທີ... ແຕ່ມາເຖິງຕອນນີ້ ບໍ່ມີຫຍັງທີ່ຈະຢຸດຢັ້ງແປວໄຟແຫ່ງຄວາມມຸ້ງໝັ້ນ ທີ່ລຸກເຜົາໃນໃຈຂອງທັງ໔ຄົນໄດ້ອີກຕໍ່ໄປ...



The Stubborn Rebellion
ການຕໍ່ຕ້ານຍັງຄົງຍືດເຍື້ອ ຝ່າຍຈັກກະພັດຄ່ອຍໆບຸກ ກອງທັບຕໍ່ຕ້ານຄ່ອຍໆຖືກເຮັດໃຫ້ຖອຍ... ການສູນເສຍທີ່ເກີດຂື້ນນັ້ນມາກມາຍເຫຼືອເກີນ... ທະຫານເອກ /ຈອມເວດມົນຄົນສະນິດ /ສຸດຍອດອົງຄະລັກ /ຄູ່ໝັ້ນ ຫຼືລວມທັງລາຊາແຫ່ງຟິນນ໌ຜູ້ນຳທັບ... ກໍ່ຍັງຕ້ອງຈົບຊີວິດລົງທ່າມກາງສົງຄາມທີ່ນັບມື້ຍິ່ງທະວີຄວາມຮຸນແຮງ ແລະເມື່ອຈັກກະພັດໄດ້ປ່ອຍສຸດຍອດຍານຮົບທຳລາຍລ້າງ ຊື່ Dreadnought ອອກມາ ແສງສະຫວ່າງທີ່ເຫຼືອນ້ອຍຂອງກອງທັບປະຕິວັດ ກໍ່ຫາຍໄປ...

ແຕ່ວ່າ ດ້ວຍຄວມດື້ໃນໄວເຍົາ ຫຼືຄວາມມຸ້ງໝັ້ນເພາະເຊື່ອໃນຄວາມຖືກຕ້ອງກໍ່ແລ້ວແຕ່... ຕະຫຼອດຕັ້ງແຕ່ຕົ້ນນັ້ນ ເດັກນ້ອຍທັງ໓ ໄດ້ມີບົດບາດຢ່າງຫຼວງຫຼາຍ ຕໍ່ກອງທັບປະຕິວັດ... ພວກເຂົາສ່ຽງຕາຍນັບຄັ້ງບໍ່ຖ້ວນ.

ທັງ ລອບເຂົ້າໄປສືບຂໍ້ມູນສຳຄັນ... ຮັບມອບຖ້ອຍຄຳສຸດທ້າຍກ່ອນສິ້ນຊີບຂອງຜູ້ນຳ... ຕາລ່າໂລຫະມິສຣິລເພື່ອປ່ຽນແປງໂສມໜ້າຂອງກອງທັບ... ສືບທອດເວດມົນໃນຕຳນານທີ່ສາບສູນ... ຮ່ວມທາງກັບມັງກອນໄວເວີຣ໌ນ ຝ່າສູ່ໃຈກາງພາຍຸຂະໜາດຍັກເຂົ້າຫາຈັກກະພັດ... ຈົນສຸດທ້າຍ ທຸກຄົນສາມາດທຳລາຍຍອດຍານຮົບໃຫ້ແຕກກະຈາຍ ແລະຂ້າຈັກກະພັດພາຣາເມເກຍລົງໄດ້ສຳເລັດ!!



Real Confrontation
ໜ້າເສຍດາຍ... ຮອຍຍິ້ມແຫ່ງຄວາມສຸກ ພັດຢູ່ໄດ້ພຽງຊົ່ວຄາວ... ສັດຕູຄູ່ແຄ້ນທີ່ຂັດຂວາງເດັກທັງ໓ມາຕະຫຼອດການເດີນທາງ ແລະຮູ້ຈັກກັນໃນນາມ "ອັດສະວິນດຳ" ສຸດຍອດທະຫານມືຂວາຂອງຈັກກະພັດພາຣາເມເກຍ ໄດ້ປະກົດໂສມໜ້າທີ່ແທ້ຈິງອອກມາ ເຊິ່ງກໍ່ແມ່ນ "ເລອອນ" ອ້າຍຜູ້ພັດພາກຂອງມາເຣຍ ເຊິ່ງຫຼົງໃນອຳນາດແຫ່ງຈັກກະພັດອັນຍິ່ງໃຫຍ່ນັ້ນເອງ...

ຈັກກະພັດໄດ້ປ່ຽນແປງໂສມໜ້າໄປຢ່າງໄວວາ ດ້ວຍການນຳທັບຂອງຜູ້ນຳທີ່ແຂງແກ່ນກວ່າເກົ່າ ການຮຸກຮານເທື່ອໃໝ່ກຳລັງຈະເລີ່ມຂຶ້ນ... ຊ້ຳຮ້າຍ ຈັກກະພັດພາຣາເມເກຍທີ່ຄວນຈະຈົບຊີວິດລົງໄປແລ້ວ ກໍ່ຫວນກັບມາອີກຄັ້ງ ຈາກພັນທະສັນຍາປີສາດພ້ອມຮູບໂສມຂອງອະສູນຈາກໂລກມືດ ແລະພະລັງເວດມົນອັນໜ້າຢ້ານ.

...ໂລກອັນແສນມືດມິດ ກໍ່ກັບສູ່ຄວາມມືດມົນຍິ່ງກວ່າທີ່ເຄີຍ!!!



Behind the Cover
Final Fantasy ໒ - ບົດແຫ່ງ "ການປະຕິວັດ" ນັ້ນ ບໍ່ແມ່ນແຕ່ໝາຍເຖິງເນື້ອເລື່ອງທີ່ກ່າວເຖິງການຕໍ່ຕ້ານຈັກກະພັດ ແລະຄວາມທຸກຂອງຄົນທີ່ລ້ວນແຕ່ຖືກພິກໃຫ້ມາຢູ່ທ່າມກາງໄຟສົງຄາມ ຢ່າງບໍ່ມີທາງຫຼີກໜີເທົ່ານັ້ນ... ແຕ່ຕົວເກມເອງ ກໍ່ສະແດງຈຸດຢືນຂອງເກມຢ່າງຊັດເຈນ ໃນກ້າວທີ່໒ນີ້ເອງວ່າ... ຈະເດີນເທິງເສັ້ນທາງຂອງ "ການປະຕິວັດ" ຕັ້ງແຕ່ນີ້ເປັນຕົ້ນໄປ.

ຈົນເຖິງປະຈຸບັນ ເກມບາງເກມ ເລືອກທີ່ຈະຄົງຄວາມຄິດຂອງການມີ "ເອກະລັກ" ເດີມໄວ້ສະເໝີມາ... ແຕ່ສຳຫຼັບFinal Fantasy ພັດຈະເລືອກເດີນໃນເສັ້ນທາງຂອງ "ການປ່ຽນແປງ" ເພາະນອກຈາກຊື່ສະເພາະຕ່າງໆທີ່ຍັງຖືກຍົກມາໃຊ້ເປັນເອກະລັກແລ້ວ... ທັງລະບົບການຫຼິ້ນ ອາລົມຂອງເກມ ສີສັນຂອງເນື້ອເລື່ອງ ແລະບັນຍາກາດຕ່າງໆ ກໍ່ເອີ້ນໄດ້ວ່າ ບໍ່ເຄີຍຊ້ຳກັນ.

ໃນພາກນີ້ ຈະບໍ່ມີການປາບສັດຕູ ນຳແຕ້ມປະສົບການມາເພີ່ມເລເວລ ພັດທະນາຕົວລະຄອນອີກແລ້ວ ແຕ່ຈະເປັນລະບົບ "ຄວາມລື້ງເຄີຍ" ແທນ... ບໍ່ວ່າຈະເປັນພະລັງຊີວິດ ພະລັງເວດມົນ ຄວາມໄວ ຄວາມທົນ ການໃຊ້ດາບ ໃຊ້ຂວານ ໃຊ້ທະນູ ຯລຯ ຕົວລະຄອນໃດ ໃຊ້ການຕໍ່ສູ້ຮູບແບບໃດຫຼາຍຄັ້ງກວ່າ "ຄວາມລື້ງເຄີຍ" ດ້ານນັ້ນກໍ່ຈະຍິ່ງເຜີ້ມພູນ ແລະຮຸນແຮງຂຶ້ນເລື້ອຍໆ.

ສິ່ງອື່ນທີ່ໄດ້ຮັບການຊື່ນຊົມຢ່າງຫຼາຍ ກໍ່ແມ່ນລະບົບ "ຄີຍ໌ເວີຣ໌ດ" ທີ່ເປັນການເອົາ "ຖ້ອຍຄຳ" ທີ່ໄດ້ຮັບມອບຈາກຄົນ໑ ໄປເລືອກເວົ້າກັບຄົນອື່ນໆ ເພື່ອນຳໄປສູ່ການເຂົ້າຫາເນື້ອເລື່ອງທີ່ແຕ່ຕ່າງຈາກເດີມ... ເປັນເພາະໃນໂລກທີ່ບໍ່ສາມາດໄຈ້ແຍກມິດຫຼືສັດຕູໄດ້ແລ້ວ ການເລືອກໃຊ້ຄຳເວົ້າ ກໍ່ກາຍເປັນສິ່ງທີ່ສຳຄັນ ກຳນົດເປັນ-ຕາຍໃນທັນໃດນັ້ນເອງ.

ແລະໃນພາກນີ້ເອງ ທີ່ເປັນຈຸດກຳເນີດຂອງຕົວລະຄອນອີກຫຼາຍຕົວ ທີ່ເປັນທີ່ຈື່ຈຳຂອງເກມ ເຊັ່ນ ສຸດຍອດວິຊະວະກອນເຮືອບິນ "ຊິດ" ຫຼືນົກສີເຫຼືອງຂົນຟູໜ້າຮັກ "ໂຈໂຄໂບະ" ທີ່ແມ່ນວ່າຈະຜ່ານມາອີກກວ່າ ໑໐ພາກ ດົນເກືອບ ໒໐ປີ... ທັງ໒ຕົວລະຄອນກໍ່ຍັງຄົງປະກົດໂສມຢູ່ທຸກຄັ້ງ...



Last Struggle; Once and for All
ຈັກກະພັດພາຣາເມເກຍ ທີ່ໄດ້ກັບມາຈາກໂລກມືດ ໄດ້ສ້າງອານາຈັກໂສມໃໝ່ ໃຫ້ກາຍເປັນຫໍຄອຍທະມິນ ນາມນັ້ນແມ່ນ ແພນເດໂມນຽມ (Pandemonium) ເຊື່ອມຕໍ່ລົງໄປເຖິງກົ້ນຂອງນະຮົກ ພ້ອມທັງປະກາດຈະທຳລາຍລ້າງໂລກໃຫ້ສິ້ນຊາກ...

ຕອນນີ້ ມັນບໍ່ແມ່ນບັນຫາພຽງແຕ່ກຸ່ມໆ໑ ຫຼືເມືອງໆ໑ອີກຕໍ່ໄປ... ແຕ່ໂລກທັງໜ່ວຍກຳລັງຈະກ້າວໄປສູ່ຈົບທີ່ໜ້າເສົ້າຢ່າງທີ່ບໍ່ເຄີຍເປັນມາກ່ອນ... ອີກຄັ້ງ໑ ທີ່ເດັກນ້ອຍທັງ໓ ຈະຕ້ອງເຊື່ອໝັ້ນໃນຄວາມຖືກຕ້ອງ ແລະອີກເທື່ອ໑ ທີ່ພວກເຂົາຈະຕ້ອງຈົບການຕໍ່ສູ້ທີ່ແສນເສົ້ານີ້...
ຢ່າງສົມບູນ...

ທີ່ມາ: Zieghart
ແປໂດຍ: TINO