Final Fantasy ໓
ສຽງຮຽກສຸດທ້າຍ ຈາກສາຍລົມ



Prologue
ໂລກໜ່ວຍນີ້ຄົງຢູ່ໄດ້ດ້ວຍພະລັງຂອງຄຣິສຕັລແຫ່ງແສງສະຫວ່າງທັງ໔ ເຊິ່ງເປັນຂຸມພະລັງແຫ່ງທາດອັນຍິ່ງໃຫຍ່ທີ່ຄອຍຫຼໍ່ລ້ຽງໃຫ້ທຸກຊີວິດດຳເນີນໄປ... ແລະເມື່ອມີແສງສະຫວ່າງສ່ອງແສງ ໃນຂະນະດຽວກັນ ກໍ່ຍ່ອມຕ້ອງມີຄວາມມືດມາຖ່ວງດຶງ... ດັ່ງນັ້ນ ຄຣິສຕັລແຫ່ງຄວາມມືດອີກຊຸດ໑ ກໍ່ມີຢູ່ເພື່ອຮັກສາຄວາມທຸ່ນທ່ຽງຂອງຂົ້ວທັງ໒ ໃຫ້ໂລກຄົງຢູ່ໄດ້ຕະຫຼອດຊ່ວງເວລາແຫ່ງປະຫວັດສາດທີ່ຍາວນານນີ້ເອງ.

ເມື່ອໃດທີ່ຄວາມມືດເສຍທຸ່ນທ່ຽງ... ແສງສະຫວ່າງຈະຄັດເລືອກຜູ້ທີ່ຈະມາເປັນຕົວແທນ ສຳສັນຕິສຸກກັບຄືນມາສູ່ທຸກຊີວິດ... ແລະຫາກເຖິງຍາມແສງສະຫວ່າງໄຮ້ອຸ່ນອ່ຽນ... ຄວາມມືດຈະຄັດເລືອກຕົວແທນມາປິດສາກຫາຍະນະນັ້ນໆ ໃຫ້ທຸກຢ່າງກັບສູ່ໂຄຈອນເດີມໃນທີ່ສຸດ...

ບໍ່ວ່າເວລາຈະດົນນານເທົ່າໃດ... ກົງລໍ້ແຫ່ງການປ່ຽນແປງກໍ່ຍັງຄົງໝູນຕໍ່ໄປ.

ດັ່ງເມື່ອຄັ້ງອະດີດ... ເມື່ອເທັກໂນໂລຢີຂອງມະນຸດໄດ້ກ້າວໜ້າເກີນຂີດຈຳກັດ ເຫຼົ່າຜູ້ໂງ່ຈ້າໄດ້ທ້າທາຍທຳມະຊາດ ກະທຳການດຶງພະລັງຈາກຄຣິສຕັລແຫ່ງແສງມາໃຊ້ເພື່ອສ້າງປະໂຫຍດສ່ວນຕົນ ຈົນສຸດທ້າຍ ທຳມະຊາດກໍ່ເກີດປັ່ນປ່ວນ ປະເພນີເຫຼົ່ານັ້ນໄດ້ເສື່ອມສະຫຼາຍລົງເກືອບໝົດສິ້ນ ຄຣິສຕັລແຫ່ງຄວາມມືດຈຶ່ງຄັດເລືອກຕົວແທນນັກຮົບຂຶ້ນມາ ຕໍ່ສູ້ນຳຄວາມທຸ່ນທ່ຽງແຫ່ງແສງກັບຄືນຈຸດເດີມໄດ້ໃນທີ່ສຸດ...



Face the Fate from the Crystal
ການເວລາຜ່ານໄປ... ເມື່ອຈອມເວດຜູ້ສູງສົ່ງ ນາມ"ໂນອາ" ໃກ້ຈະໝົດລົມຫາຍໃຈ ລາວໄດ້ຖິ້ມມໍລະດົກສຸດທ້າຍໃຫ້ກັບລູກສິດຂອງລາວ...

ມອບໝາຍໃຫ້ "ໂດກ້າ" ຄອບຄອງໂລກແຫ່ງເວດມົນ, "ອູນເນ່" ຄອບຄອງໂລກແຫ່ງຄວາມຝັນ ແລະ "ຊານເດ້" ຄອບຄອງໂລກແຫ່ງມະນຸດ ທຸກຢ່າງຄວນຈະດຳເນີນໄປໂດຍດີ...

...ແຕ່ດ້ວຍຄວາມມົວເມົາໃນອຳນາດ ຫຼືອິດທິພົນຈາກກົງລໍ້ແຫ່ງການປ່ຽນແປງກໍ່ແລ້ວແຕ່... ຊານເດ້ ໄດ້ປາຖະໜາຈະຄອບຄອງໂລກທັງ໓ດ້ວຍຕົວຂອງລາວເອງ ຄວາມທະຍານໄດ້ຊຸກດັນລາວຮຽກອະສູນຮ້າຍຈາກໂລກມືດຂຶ້ນມາ ໝາຍໝັ້ນຈະທຳລາຍທຸກປະກາຍແສງສະຫວ່າງໃຫ້ໝົດສິ້ນໄປ.

ເມື່ອຄວາມມືດເລີ່ມແຜ່ລາມ ຄວາມທຸ່ນທ່ຽງກຳລັງຈະປັ່ນປ່ວນ ໂລກກຳລັງຈະພິນາດສິ້ນ... ອີກຄັ້ງ ທີ່ແສງສະຫວ່າງຈະກ້າວເຂົ້າມາ... ຊະຕາກຳໄດ້ຖືກກຳນົດ... ກົງລໍ້ແຫ່ງໂຊກຊະຕາຂອງຜູ້ຖືກເລືອກ... ນັກຮົບແຫ່ງແສງທັງ໔... ກໍ່ເລີ່ມໝູນວຽນ.



On the surface of the light
ສາກໜ້າຂອງຕົວເກມ ຖືກນຳສະເໜີໂດຍເນື້ອເລື່ອງທີ່ລຽບງ່າຍ ຄົງແນວຄວາມຄິດດັ່ງເດີມທີ່ກ່າວເຖິງຊະຕາກຳຂອງຜູ້ຖືກເລືອກ ຂຸມພະລັງແຫ່ງທຳມະຊາດ ແລະສົມດຸນແຫ່ງໂລກ ທີ່ຖ່າຍທອດຜ່ານສັນຍາລັກທີ່ຄຸ້ນເຄີຍເຊັ່ນ ຄຣິສຕັລ ເປັນເອກະລັກທີ່ແມ່ນແຕ່ປະຈຸບັນກໍ່ຍັງຄົງຢູ່.

ແຕ່ ສິ່ງທີ່ຖືກພັດທະນາຂຶ້ນມາຈາກພາກກ່ອນໆ ພັດບໍ່ແມ່ນຕົວເລື່ອງ ທີ່ເປັນການນຳກິ່ນອາຍເກົ່າຈາກພາກທຳອິດກັບມາ ແຕ່ຫາກເປັນຄວາມເລິກຂອງເນື້ອຫາ ແລະມິຕິຂອງທຸກຕົວລະຄອນທີ່ກ່ຽວຂ້ອງກັບຫາຍະນະຂອງຄຣິສຕັລທີ່ກຳລັງເສື່ອມສະຫຼາຍນີ້ເອງ.

Final Fantasy ພາກນີ້ ໄດ້ເນັ້ນຄວາມສຳຄັນກັບບົດບາດ ທີ່ມາທີ່ໄປ ແລະເຫດຜົນໃນການມີຢູ່ຂອງຕົວລະຄອນເຫຼົ່ານັ້ນ ເຊິ່ງເປັນຈຸດອ່ອນຂອງບົດໃນພາກກ່ອນໆ... ການປະກົດຕົວທີ່ຄ່ອຍໆເປີດເຜີຍຈຸດປະສົງທີ່ແທ້ຈິງ... ການເສຍຊີວິດທີ່ມີຜົນຕໍ່ເນື່ອງສືບໄປ... ທຸກອົງປະກອບ ຕ່າງກໍ່ປະສົມລວມກັນໃຫ້ຜູ້ຫຼິ້ນໄດ້ຮູ້ສຶກຜູກພັນກັບຜູ້ຄົນເຫຼົ່ານັ້ນ ແລະເຂົ້າເຖິງອາລົມຂອງເນື້ອເລື່ອງໄດ້ເປັນຢ່າງດີ.



In the deepest part of the Darkness
ລະບົບຂອງ FF III ເຖິງບໍ່ໄດ້ແປກໃໝ່ ແຕ່ຖືກພັດທະນາຂຶ້ນມາຈາກພາກກ່ອນໆແມ່ນ ລະບົບການປ່ຽນອາຊີບຢ່າງອິດສະຫຼະ ທີ່ສ້າງຄວາມພິກຜັນໃນການຫຼິ້ນໄດ້ຢ່າງຫຼາຍ ອາຊີບຕ່າງໆຈະໄດ້ຮັບເຜີ້ມຂຶ້ນມາເມື່ອເນື້ອເລື່ອງດຳເນີນໄປ ຈາກນັກຮົບຫົວຜັກຫອມ ກ້າວໄປສູ່ອັດສະວິນ - ນັກຮົບດາບ - ນັກດາບເວດ ຜູ້ໃຊ້ເວດມົນ ຜູ້ອັນເຊີນ ໄວກິ້ງ - ອັດສະວິນມັງກອນ - ນັກປາດ - ນິນຈາ ຯລຯ ເຊິ່ງມີຜົນຕໍ່ຄ່າສະຖານະພາບ ແລະຄວາມສາມາດໃນຮູບແບບໃໝ່ໆໄປເລື້ອຍໆນີ້ ສ້າງຄວາມມ່ວນຊື່ນໄດ້ບໍ່ຮູ້ຈົບ.

ຜ່ານມາເຖິງ ໑໗ ປີ ແມ່ນວ່າພາກອື່ນໆຈະໄດ້ຮັບການເຮັດໃໝ່ນັບຄັ້ງບໍ່ຖ້ວນ ແຕ່ພາກ ໓ ນີ້ ອາດຈະເປັນພາກດຽວ ທີ່ເບິ່ງຄືວ່າບໍ່ໄດ້ຮັບຄວາມຫຼຽວແລ ຖືກຍົກເລີກໂຄງການເຮັດໃໝ່ໄປຫຼາຍຕໍ່ຫຼາຍຄັ້ງ... ໃນທີ່ສຸດ ມັນກໍ່ໄດ້ຖືກຍົກເຄື່ອງກັບມາຢ່າງຍິ່ງໃຫຍ່ ໃນຮູບແບບ ໓D ໃນເຄື່ອງເກມມືຖື Nintendo DS ທີ່ກຳລັງດັງຢູ່ໃນຕອນນີ້.

ຫຼາຍສິ່ງຫຼາຍຢ່າງໄດ້ປ່ຽນໄປ... ທັງຕົວລະຄອນ ເນື້ອເລື່ອງປີກຍ່ອຍ ບົດສົນທະນາ ລາຍລະອຽດຂອງແຕ່ລະອາຊີບ ຖືກພັດທະນາໃຫ້ມີຄວາມເລິກຂອງເນື້ອຫາທີ່ຫຼາຍຂຶ້ນ ສົມເຫດສົມຜົນຫຼາຍຂຶ້ນ ແລະມີຄວາມພິເສດສະເພາະຕົວຫຼາຍຂຶ້ນ ໂດຍຍັງພະຍາຍາມຄົງເອກະລັກຂອງຕົ້ນສະບັບໄວ້ໃຫ້ຫຼາຍທີ່ສຸດ...



Behind the Cover
Final Fantasy ໓ - "ບົດແຫ່ງຜູ້ຖືກເລືອກ" ນັ້ນ ສ້າງກະແສທີ່ຕິດໃຈເປັນພິເສດ ແລະເປັນຈຸດພິກຜັນຈຸດສຳຄັນຫຼາຍຈຸດ໑ຂອງເກມ ບໍ່ວ່າຈະເປັນການນຳລະບົບປ່ຽນອາຊີບມາໃຊ້ຢ່າງຈິງຈັງ ການເລີ່ມຕົ້ນລະບົບມົນອະສູນ ແລະການເປີດໂຕສິ່ງມີຊີວິດຄູ່ບຸນຂອງເກມອີກ໑ຕົວ... Moogle ໂຕຂາວຕຸ້ຍນັ້ນເອງ.

ແລະສຳຫຼັບສະບັບປັບປຸງໃໝ່ນັ້ນ ແມ່ນວ່າຈະມີສຽງຈົ່ມໜ້ອຍ໑ ເຖິງຄວາມຊ້າຂອງຕົວເກມ ຄວາມຍາກທີ່ຫຼຸດລົງຫຼາຍ ຈຳນວນສັດຕູທີ່ໜ້ອຍລົງ ແລະສາກດັນຈຽນທີ່ເບິ່ງຄືວ່ານ້ອຍລົງໄປກັບຕາ ເມື່ອເຮັດເປັນສາມມິຕິ... ແຕ່ໂດຍພາບລວມ ສຳຫຼັບທັງແຟນເກົ່າແລະແຟນໃໝ່ແລ້ວ ຄົງບໍ່ມີໃຜຖຽງວ່າທັງ໒ແບບນັ້ນ... "ມ່ວນ"ຫຼາຍເທົ່າໃດ.

ທີ່ສຳຄັນທີ່ສຸດ ນີ້ເປັນພາກທີ່໒ຂອງເກມ ທີ່ຖືກຍົກມາເຮັດເປັນ "ພາສາໄທ" ສົມບູນແບບ ໂດຍການນຳ ແລະການສະໜັບສະໜູນຂອງແຟນໆເກມນີ້.



Balance the Two Force
ບົດສຸດທ້າຍຂອງການເດີນທາງໄລ່ຕາມສຽງຮຽກຂອງຄຣິສຕັລ ນຳທັງ໔ມາສູ່ປາກທາງເຂົ້າດິນແດນແຫ່ງຄວາມມືດ... ພາຍໃຕ້ການຊ່ວຍເຫຼືອຂອງບັນດາສະຫາຍຮ່ວມຮົບ... ພວກເຂົາສາມາດລົ້ມຊານເດ້ລົງໄດ້ໃນທີ່ສຸດ!!

...ແຕ່ວ່າ  ແຜນການຂັ້ນສຸດທ້າຍ ບໍ່ສາມດຖືກຢຸດຢັ້ງໄດ້... ມ່ານໝອກແຫ່ງຄວາມມືດທີ່ຢູ່ເໜືອການເວລາ "ດາຣ໌ຄ ຄລາວດ໌" ກໍ່ປະກົດຕົວອອກມາ ແລະໝາຍໝັ້ນທຳໜ້າທີ່ພຽງ໑ດຽວຂອງມັນໃຫ້ບັນລຸຜົນ ນັ້ນແມ່ນ... ນຳໂລກທັງໜ່ວຍ... ກັບຄືນສູ່ຄວາມຫວ່າງເປົ່າ...

ສູ່ສະຖານທີ່ ທີ່ແສງສະຫວ່າງ ບໍ່ອາດແຜ່ປະກາຍແສງ...

ສູ່ສະຖານທີ່ ທີ່ຄວາມມືດ ບໍ່ອາດບົດບັງສິ່ງໃດ...

"ຜູ້ຖືກເລືອກ" ທັງ໔... ຈຳເປັນຈະຕ້ອງເລືອກ "ອະນາຄົດ" ສຸດທ້າຍຂອງພວກເຂົາ ຢູ່ບ່ອນນີ້ເອງ...

ທີ່ມາ: Zieghart
ແປໂດຍ: TINO