Final Fantay ໔
ກະຈົກ໒ດ້ານ ດາບ໒ຄົມ ແລະຫົວໃຈ໒ເຮົາ



Prologue
ຊ່ວງເວລາ໑ດົນມາແລ້ວ... ວັດທະນະທຳເທິງດາວເຄາະນ້ອຍທີ່ແສນຫ່າງໄກ ໄດ້ຜ່ານພົ້ນຊ່ວງເວລາແຫ່ງຄວາມຈະເລີນເຖິງທີ່ສຸດ ແລະກຳລັງກ້າວເຂົ້າສູ່ຄວາມລົ້ມສະຫຼາຍຕາມວົງຈອນແຫ່ງຊີວິດ...

ຄົນທັງປວງ ບໍ່ມີທາງເລືອກອື່ນໃດ ນອກຈາກອົບພະຍົບຍ້າຍຖິ່ນ ເພື່ອຫາບ່ອນລົງຫຼັກປັກຖານໃໝ່... ດ້ວຍເທັກໂນໂລຢີທີ່ແສນກ້າວໄກ ເຮັດໃຫ້ພວກເຂົາໃຊ້ເວລາບໍ່ດົນປານໃດ ກ່ອນຈະມາຄົ້ນພົບສະຖານທີ່ເຊິ່ງເໝາະສົມຢ່າງຍິ່ງ ທີ່ຈະເປັນສະຫວັນແຫ່ງໃໝ່ຂອງພວກຕົນ... ດາວເຄາະສີຟ້າສົດ ເຊິ່ງຖືກຂະໜານນາມວ່າ "ໂລກ" ນັ້ນເອງ.

ແຕ່ໜ້າເສຍດາຍ ທີ່ເທິງໂລກນັ້ນ ພັດມີສິ່ງມີຊີວິດຈຳນວນມາກມາຍ ທີ່ອາໄສຢູ່ກ່ອນແລ້ວ ແລະຕ່າງກໍ່ກຳລັງຢູ່ໃນຊ່ວງເວລາທີ່ສຳຄັນ ທີ່ຈະວິວັດທະນາການສູ່ຄວາມກ້າວໜ້າໃນພາຍຫຼັງ.

ດ້ວຍຄວາມເປັນສິ່ງທີ່ມີຊີວິດທີ່ຮັກສັນຕິ ແລະມີປັນຍາ... ປວງຊົນແຫ່ງວັດທະນະທຳທີ່ດັບສູນນັ້ນ ຕ່າງກໍ່ຄາດຫວັງວ່າໃນທ້າຍທີ່ສຸດ ສິ່ງທີ່ມີຊີວິດເທິງໂລກສີຟ້າ ຈະເຕີບໃຫຍ່ຂຶ້ນຈົນເທົ່າທຽມພວກຕົນ ລວມທັງຄວາມຄິດ ແລະຈິດວິນຍານ... ຫາກເຖິງຕອນນັ້ນ ທັງ໒ເຜົ່າພັນ ຄົງຈະໄດ້ຢູ່ຮ່ວມກັນຢ່າງສັນຕິ... ຕັດສິນໃຈໄດ້ແລ້ວ ພວກເຂົາກໍ່ລົງຫຼັກປັກຖານ ເທິງດວງຈັນທີ່ສ້າງຂຶ້ນວົນວຽນຢູຮອບໂລກແທນ ແລະເຂົ້າສູ່ພາວະຈຳສິນເປັນເວລາດົນນານ ເພື່ອລໍຄອຍວັນແຫ່ງໂຊກຊະຕານັ້ນ... ຢ່າງມິດງຽບ.

...ເມື່ອເວລາຜ່ານໄປ "ຊົນເຜົ່າຈັນທາ" ຫຼືລູນາຣ່ຽນ (Lunarian) ນີ້ກໍ່ກາຍເປັນພຽງແຕ່ເລື່ອງເລົ່າຂານ ທີ່ຖືກຖ່າຍທອດຈາກປາກສູ່ປາກເທົ່ານັ້ນ...



Incomplete slumber
...ແຕ່ວ່າ ໑ໃນຊົນເຜົ່າຈັນທານັ້ນ ພັດມີຄົນຜູ້໑ ທີ່ບໍ່ຍອມຈະເສຍເວລາລໍຄອຍຢ່າງໄຮ້ຄວາມໝາຍ ແລະລົດຕົວໄປຢູ່ລະດັບດຽວກັບຊາວໂລກຜູ້ຕ່ຳຕ້ອຍ... ນາມນັ້ນແມ່ນ "ເຊມຸສ" (Zemus) ຜູ້ຢືນຢັນສຽງແຂງ ຈະປຸກສຸດຍອດອາວຸດທຳລາຍລ້າງ "ຫຸ່ນຍົນຍັກແຫ່ງບາເບລ" ຂຶ້ນມາ ໝາຍທີ່ຈະກວາດລ້າງຊີວິດເທິງດາວເຄາະສີຟ້າໃຫ້ພິນາດ ເຫຼືອແຕ່ຊາກສົບ ແລະຜືນແຜ່ນດິນໃຫ້ແກ່ຊົນເຜົ່າຂອງຕົນເທົ່ານັ້ນ...

ເຄາະດີ ທີ່໒ອ້າຍນ້ອງ ຜູ້ພິທັກແຫ່ງລູນາຣຽນ ນາມ "ຟຸຊຸຢະ" (Fusuya) ແລະ "ຄລູຢະ" (Kluya) ໄດ້ຈັດການຜະນຶກເຊມຸສທີ່ກຳລັງບ້າບິ່ນ ໃຫ້ເຂົ້າສູ່ພາວະຈຳສິນໄດ້ໃນທີ່ສຸດ...

ຟຸຊຸຢະຈອມປາດ ຮັບໜ້າທີ່ເຝົ້າຮັກສາຮ່າງຂອງບັນດາລູນາຣຽນທັງປວງ ເພື່ອໃຫ້ແນ່ໃຈວ່າ ເມື່ອເຖິງເວລາທີ່ເພື່ອນຝູງມືນຕາຂຶ້ນອີກຄັ້ງ ຈະໄດ້ພົບກັບໂລກແຫ່ງຄວາມຝັນທີ່ແທ້ຈິງ.

ຄລູຢະຜູ້ຮັກອິດສະຫຼະ ຕັດສິນໃຈມາໃຊ້ຊີວິດເທິງໂລກມະນຸດພຽງລຳພັງ ທັງຖ່າຍທອດຄວມຮູ້ ແລະພັດທະນາດວງດາວໃຫ້ກ້າວໜ້າ ກ່ອນທີ່ຈະເສຍຊີວິດລົງ... ບໍ່ດົນເທົ່າໃດ ຫຼັງຈາກໄດ້ຖິ້ມທາຍາດທັງ໒ຄົນໄວ້ນຳສະຕີຊາວໂລກ ຄົນຮັກຂອງຕົນ.

ແລ້ວເຊມຸສຜູ້ຈອງຫອງເດ?... ຫຼັງຈາກທີ່ຖືກບີບໃຫ້ຢູ່ໃນພາວະຈຳສິນ... ສິ່ງທີ່ຍັງຄົງເລາະຢູ່ ກໍ່ຍັງຄົງມີພຽງແຕ່ຈິດວິນຍານອັນດຳມືດ ທີ່ພ້ອມຈະເຮັດທຸກວິທີທາງ ໃຫ້ຄວາມປາຖະໜາແຕ່ຄັ້ງກ່ອນຂອງຕົນເປັນຄວາມຈິງ... ທຳລາຍທຸກຊີວິດ ສ້າງສະຫວັນຂອງພວກຕົນ...

...ແລ້ວເວລາກໍ່ຜ່ານພົ້ນໄປ...



Trembling Pride
ເຊຊິລ ຮາຣ໌ວີຍ໌ ຍອດອັດສະວິນດຳທີ່ເກ່ງກ້າແຫ່ງປະເທດມະຫາອຳນາດ ບາຣອນ... ໄດ້ຮັບການແຕ່ງຕັ້ງເປັນຜູ້ນຳກອງກຳລັງທາງອາກາດພຽງ໑ດຽວເທິງພື້ນພິພົບ... "ກອງທັບປີກແດງ" (Red Wings)... ດ້ວຍພະລັງດາບແຫ່ງຄວາມມືດທີ່ແຂງແກ່ນແລະ ດ້ວຍແສນຍານຸພາບທາງອາກາດທີ່ບໍ່ມີໃຜເທົ່າທຽມໄດ້... ເຊຊິລ ພາຍໃຕ້ຄຳສັ່ງຂອງລາຊາແຫ່ງບາຣອນ ຜູ້ລ້ຽງດູຕົນເອງມາຕັ້ງແຕ່ຍາມນ້ອຍ... ກໍ່ນຳທັບພິຊິດເໜືອ-ໃຕ້ຢ່າງກ້າຫານ...

ພຽງແຕ່ວ່າ ໃນໄລຍະຫຼັງນີ້ ຄວາມພູມໃຈຂອງເຂົາ ພັດຄ່ອຍໆຫຼຸດຫາຍໄປເທື່ອລະໜ້ອຍ... ເມື່ອໄດ້ຂ້າຜູ້ຄົນມາກມາຍ ແລະເຖິງຂັ້ນຍາດຊິງສົມບັດອັນສຳຄັນເຊັ່ນ "ຄຣິສຕັລ" ມາຈາກປະຊາຊົນທີ່ບໍ່ມີທາງສູ້ແລ້ວ... ຕົວລາວກໍ່ໄດ້ກັບມາຕັ້ງຄຳຖາມກັບຕົວເອງເປັນຄັ້ງທຳອິດວ່າ... ສິ່ງທີ່ຕົນກະທຳ ເປັນສິ່ງທີ່ຖືກຕ້ອງແທ້ບໍ? ການມຸ້ງໝັ້ນເຮັດຕາມຄຳສັ່ງຂອງຜູ້ມີພະຄຸນ ສຳຄັນກວ່ານ້ຳໜັກຊີວິດຂອງຄົນອື່ນແທ້ຫຼືບໍ່?

ດາບທີ່ກຳແໜ້ນຢູ່ໃນມື ລູກນ້ອງທີ່ຢູ່ໃນສັງກັດ ແລະກອງທັບທີ່ຢູ່ໃຕ້ການປົກຄອງ... ທັງຫຼາຍທັງປວງນີ້ ໜ້າຈະມີຄ່າ ມີສັກສີ ຫຼາຍເກີນກວ່າຈະຖືກລາກເຂົ້າມາລົງສູ່ສ່ວນເລິກຂອງແຫ່ງຄວາມຮູ້ສຶກຜິດຂອງຕົວລາວເອງ...

ທຸກຄັ້ງທີ່ໄດ້ຮັບຟັງຄຳປອບໃຈຈາກ ຊິດ - ຍອດວິຊະວະກອນຜູ້ພັດທະນາເຮືອບິນ ເຊິ່ງຮັກແລະລ້ຽງດູໂຕລາວເໝືອນດັ່ງລູກແທ້ໆ...

ທຸກຄັ້ງທີ່ໄດ້ຮັບຄວາມມຸ້ງໝັ້ນຈາກ ໄຄນ໌ - ອັດສະວິນມັງກອນຜູ້ເກ່ງກ້າ ສະຫາຍຄົນສະນິດ ອີກສ່ວນຂອງຊີວິດທີ່ແສນສຳຄັນ...

ແລະທຸກຄັ້ງທີ່ໄດ້ເບິ່ງເຫັນເຖິງຄວາມຫ່ວງໃຍທີ່ສະທ້ອນໃຈແວວຕາຂອງ ໂຣຊ່າ - ຈອມເວດຂາວຜູ້ອ່ອນໂຍນ ຄົນຮັກທີ່ບໍ່ມີໃຜມາແທນໄດ້...

ເມື່ອນັ້ນ... ຫົວໃຈທີ່ຄວນຈະຫຍາບດ້ານຂອງລາວ ກໍ່ພັດສັ່ນໄຫວຢ່າງຮຸນແຮງ...

ເມື່ອນັ້ນ... ແມ່ນວ່າອັດສະວິນດຳ ຜູ້ແກວ່ງໄກວເພງດາບແຫ່ງຄວາມມືດ ກໍ່ພັດຢ້ານກົວຄວາມຊົ່ວຮ້າຍ ທີ່ກຳລັງຈະເກາະກຸມຕົວຕົນຂອງລາວເອງ!!



Contrast in Harmony
ພາຍຫຼັງພາລະກິດກວາດລ້າງໝູ່ບ້ານນັກຮຽກອະສູນອັນສຸດຈະທົນທານ... ເຊຊິລແລະໄຄນ໌ ຕັດສິນໃຈທີ່ຈະຍຶດໝັ້ນຄຸນະທຳຂອງຕົນເອງ ພວກເຂົາປິ່ນດາບເຂົ້າສູ່ອານາຈັກບາຣອນ... ກຽມໃຈທີ່ຈະຕໍ່ສູ້ກັບຜູ້ລ້ຽງດູ ພວກເຂົາມາ... ແຕ່ເຫດການພັດພິກຜັນໄປອີກທາງ໑ ເມື່ອຈອມເວດລຶກລັບ ນາມວ່າ "ກອລເບຊ" (Golbez) ປະກົດຕົວຂຶ້ນມາ ຮັບຜິດຊອບກອງພັນປີກແດງຕໍ່ຈາກລາວ... ແລະເລີ່ມແຜນການ ບຸກຮຸກຮານຂະຫຍາຍອຳນາດ ຍາດຊິງກ້ອນຄຣິສຕັລແຫ່ງທາດອັນຍິ່ງໃຫຍ່ອີກຄັ້ງ.

ດ້ວຍຄວາມເຊື່ອໝັ້ນວ່າ ຜູ້ຊົ່ວຮ້າຍນີ້ ຕ້ອງຢູ່ເບື້ອງຫຼັງຄວາມປ່ຽນແປງຂອງອານາຈັກບາຣອນ ແລະດ້ວຍຄວາມໃຝ່ຮູ້ ຢາກຈະເຂົ້າເຖິງຄວາມສຳຄັນທີ່ແທ້ຈິງເບື້ອງຫຼັງກ້ອນຄຣິສຕັລ... ເຊຊິລຕັດສິນໃຈ ໄລ່ນຳປົກປ້ອງຄຣິສຕັລທັງ໔ ກ່ອນທີ່ສິ່ງຮ້າຍໃດໆຈະເກີດຂຶ້ນ.

ຊີວິດຂອງອັດສະວິນດຳບໍ່ໄດ້ງ່າຍດາຍເລີຍ ຫຼັງຈາກກະແຈກກະຈາຍຈົນຕ້ອງແຍກຈາກພີ່ນ້ອງ... ຕະຫຼອດການເດີນທາງ ລາວຕ້ອງສູນເສຍສະຫາຍໄປມາກມາຍ... ທັງໄດ້ພົບປະ... ທັງໄດ້ລາຈາກ ແລະໜ້າເສົ້າຍິ່ງ ທີ່ຄົນເຫຼົ່ານັ້ນ ບໍ່ວ່າຈະເປັນເຈົ້າຊາຍ ນັກຮົບ ນັກປາດ ຫຼືແມ່ນແຕ່ເດັກນ້ອຍ... ກໍ່ລ້ວນແຕ່ກ່ຽວຂ້ອງກັບຫາຍະນະຈາກການໄລ່ນຳຄຣິສຕັລ ທີ່ຕົວລາວເປັນຜູ້ເລີ່ມກ້າວທຳອິດນັ້ນເອງ.

ບໍ່ດົນເກີນລໍຄອຍ... ການປະເຊີນໜ້າກັບຍອດຈອມເວດ ກອລເບຊ ກໍ່ມາເຖິງ... ການໂຈມດີໃດໆກໍ່ບໍ່ອາດຈະເອົາຊະນະອະມະນຸດໂຕນີ້ໄດ້ເລີຍ... ຍັງບໍ່ຕ້ອງກ່າວເຖິງ "ອະສູນກາຍແຫ່ງທາດທັງ໔" (Elemental Lords) ທີ່ຢູ່ຂ້າງກາຍ ແລະມືຂວາຄົນສະນິດຂອງກອລເບຊ... ອັດສະວິນມັງກອນຜູ້ຖືກຄວບຄຸມດ້ວຍມົນສະກົດ... ໄຄນ໌... ສະຫາຍຮັກຂອງລາວນັ້ນເອງ!!



Surpass Thyself
ຫຼັງການພ່າຍແພ້ຢ່າງໝົດຮູບ ເຊຊິລໄດ້ປະເຊີນໜ້າກັບບາບທີ່ຝັງເລິກຢູ່ພາຍໃຕ້ຈິດໃຈຂອງລາວ ແລະຮຽນຮູ້ວ່າ ຄວາມມືດມິດ ຍ່ອມບໍ່ສາມາດຕໍ່ກອນກັບຄວາມມືດມິດໄດ້... ຖ້າຫາກວ່າຈະມີຈັກທາງທີ່ຈະປະເຊີນໜ້າ ກັບດ້ານມືດເຊັ່ນກອລເບຊ... ນັ້ນກໍ່ໝາຍຄວາມວ່າ ລາວຈະຕ້ອງປ່ຽນແປງໄປເປັນຂົ້ວກົງກັນຂ້າມ... ຈະຕ້ອງຮັບພະລັງແຫ່ງດ້ານສະຫວ່າງໄວ້ນຳຕົວເທົ່ານັ້ນ...

ເຊຊິລຕໍ່ສູ້ກັບຄວາມມືດຂອງໂຕລາວເອງເປັນຄັ້ງສຸດທ້າຍ ແລະໄດ້ກາຍເປັນ "ພາລາດິນ" ອັດສະວິນແຫ່ງແສງສະຫວ່າງໃນທີ່ສຸດ... ຕອນນີ້ ລາວກໍ່ມີຄຸນສົມບັດພ້ອມທີ່ຈະຕໍ່ກອນກັບກອລເບຊ ລາວທວງສິ່ງຕ່າງໆທີ່ຖືກຍາດຊິງໄປກັບຄືນມາໄດ້ຢ່າງຕໍ່ເນື່ອງ ລວມເຖິງເພື່ອນສະນິດ ແລະຄົນຮັກຂອງລາວເອງ... ແຕ່ໜ້າເສຍດາຍ... ພາລະກິດໄລ່ລ່າ "ຄຣິສຕັລແຫ່ງແສງສະຫວ່າງທັງ໔" ເທິງໂລກ ຈົບລົງດ້ວຍຄວາມລົ້ມເຫຼວ... ພາລາດິນໜຸ່ມແລະໝູ່ຄູ່ກໍ່ຍັງບໍ່ຍອມຖອຍຄວາມພະຍາຍາມ ໄລ່ນຳໄປຮອດ "ຄຣິສຕັລແຫ່ງຄວາມມືດ" ອີກ໔ ທີ່ຢູ່ໃຕ້ພື້ນໂລກ ດ້ວຍຄວາມຫວັງສຸດທ້າຍວ່າ ຈະຢຸດຢັ້ງແຜນການຂອງກອລເບຊໃຫ້ຈົນໄດ້!!

...ອີກຄັ້ງ... ທີ່ບັນດານັກຮົບຕ້ອງຜິດຫວັງ...

ຄວາມມືດນັ້ນຍິ່ງໃຫຍ່ເຫຼືອເກີນ ມັນສາມາດແຊກຊຶມໄປໄດ້ທຸກຫົນແຫ່ງ ບໍ່ເວັ້ນແມ່ນແຕ່ຫົວໃຈຂອງຄົນ... ບໍ່ເວັ້ນຄວາມຮູ້ສຶກທີ່ເກັບໄວ້ໃນສ່ວນເລິກທີ່ສຸດ... ເຊັ່ນ... ຄວາມຮັກທີ່ຕ້ອງຫ້າມ... ຄວາມຮັກທີ່ບໍ່ສົມຄວນຈະມີ... ຄວາມຮັກທີ່ຄວນຈະເກັບໄວ້ຢູ່ພຽງແຕ່ໃນຈິນຕະນາການຂອງຕົນເອງ...

ໄຄນ໌ ໄຮວິນດ໌ ຜູ້ຖືກຄອບງວຳໂດຍດ້ານມືດອີກຄັ້ງ... ດ້ວຍຄວາມຮູ້ສຶກລິສະຍາຕໍ່ເພື່ອນສະນິດຂ້າງກາຍ... ດ້ວຍຄວາມຮູ້ສຶກເກີນເລີຍທີ່ມີຕໍ່ແຟນຂອງເພື່ອນຮັກ... ເຊຊິລບໍ່ເຄີຍຮັບຮູ້ຈັກໜ້ອຍເລີຍວ່າ... ເລິກໆແລ້ວ ໄຄນ໌ ອິດສາຕົນສ່ຳໃດ... ແລະປາຖະໜາຕົວໂຣຊ່າຫຼາຍພຽງໃດ!!

ຄຣິສຕັລ໒ຂົ້ວທັງ ໘ກ້ອນ ຖືກກອລເບຊຄອບຄອງໄດ້ໝົດ... ແຜນການສ້າງ"ເສັ້ນທາງສູ່ດວງຈັນ" ທີ່ເຄີຍກ່າວ ໄດ້ເລີ່ມຕົ້ນຂຶ້ນ ກອລເບຊມຸ້ງໜ້າໄປທີ່ດວງຈັນ... ໃນເວລາທີ່ເຊຊິລໄດ້ຮັບຄວາມຮ່ວມມືຈາກຊົນເຜົ່າບູຮານ "ມິຊີເດຍ" - ຊົນເຜົ່າທີ່ລາວຍາດຊິງຄຣິສຕັລກ້ອນທຳອິດມາດ້ວຍມືທີ່ເປື້ອນເລືອດ - ໃຫ້ປຸກເຮືອບິນຍັກໃນຕຳນານ ຜົນງານຂອງຊາວລູນາຣຽນຄົນທຳອິດທີ່ມາອາໄສທີ່ໂລກມະນຸດ... ເຮືອບິນ "ປາວານແສງຈັນ" (The Lunar Whale) ຂອງຄລູຢະນັ້ນເອງ...

ທີ່ຜາສາດຄຣິສຕັລເທິງດວງຈັນ ເຊຊິລໄດ້ພົບກັບຜູ້ພິທັກແຫ່ງຊົນເຜົ່າຈັນທາ... ຈອມປາດຟຸຊຸຢະ... ລາວໄດ້ຮັບຮູ້ເຖິງຄວາມເປັນມາອັນໜ້ານັບຖືຂອງຊາວເຜົ່າຈັນທາເປັນຄັ້ງທຳອິດ ເລີ່ມຕັ້ງແຕ່ຄັ້ງວັດທະນະທຳລົ້ມສະຫຼາຍ ໄລ່ຈົນມາເຖິງ ເສດຊາກຄວາມນຶກຄິດອັນຊົ່ວຮ້າຍຂອງເຊມຸສ ທີ່ຍັງຄົງວົນວຽນຢູ່ທີ່ໃຈກາງຂອງດວງຈັນ... ທີ່ໜ້າຢ້ານກໍ່ແມ່ນ... ຄວາມນຶກຄິດນັ້ນ ມີພະລານຸພາບຂະໜາດສາມາດຄອບງວຳ ແລະບົງການຜູ້ອື່ນໄດ້ຢ່າງງ່າຍດາຍ... ເຊິ່ງຫຸ່ນກະບອກໂຕສຳຄັນ ທີ່ເຊມຸສຄວບຄຸມຢູ່ ແລະເຮັດໜ້າທີ່ເປັນແກນຫຼັກຂອງແຜນການກວາດລ້າງໂລກສີຄາມແຫ່ງນັ້ນກໍ່ແມ່ນ... ກອລເບຊ!! ຊາຍຜູ້ສືບສາຍເລືອດຈາກຊົນເຜົ່າຈັນທາ... ຊາຍຜູ້ເປັນບຸດຄົນກົກ ຂອງຜູ້ພິທັກຄລູຢະຜູ້ລ່ວງລັບໄປເມື່ອດົນນານ!!!



Behind the cover
Final Fantasy ໔ - "ບົດແຫ່ງຄວາມຂັດແຍ່ງ" ນັ້ນເປັນພາກທີ່ສະແດງໃຫ້ເຫັນເຖິງຄວາມກ້າວໜ້າຂອງເກມຢ່າງຊັດເຈນ ເມື່ອຍ້າຍມາສູ່ເຄື່ອງເກມທີ່ດີກວ່າ... ຈາກເຄື່ອງ ນິນເທັນໂດ ມາສູ່ ສຸເປີຣ໌ນິນເທັນໂດ... ທັງພາບ ລະບົບສຽງ ແລະຄວາມແໜ້ນໜາຂອງເນື້ອຫາ ເຮັດໃຫ້ໂຕເກມ ສາມາດໃສ່ຫຼາຍໆອົງປະກອບດັ່ງກ່າວລົງໄປໄດ້ຢ່າງເຕັມທີ່ ບໍ່ຖືກຈຳກັດດ້ວຍປັດໄຈທາງເທັກໂນໂລຢີຄືພາກທີ່ຜ່ານໆມາ.

ລະບົບການຫຼິ້ນທີ່ປ່ຽນຈາກແບບ "ປ່ຽນກັນເລືອກຄຳສັ່ງ" (Turn Base) ມາເປັນລະບົບ "ຍາດຊິງເວລາ" (Active Time Battle ຫຼືATB) ທີ່ຜູ້ຫຼິ້ນຈະມີເວລາທີ່ຈຳກັດໃນການລໍຄອຍ ແລະເລືອກອອກຄຳສັ່ງໃຫ້ກັບຕົວລະຄອນ ກໍ່ນັບເປັນການປ່ຽນໂສມໜ້າຂອງລະບົບການຕໍ່ສູ້ໃນຮູບແບບເກົ່າໆ ໃຫ້ມີຄວາມສົມຈິງ ແລະເພີດເພີນຫຼາຍຍິ່ງຂຶ້ນ.

ຫາກຈະກ່ວາເຖິງຈຸດເດັ່ນຂອງພາກ໔ ນີ້ ກໍ່ຕ້ອງຊີ້ປະເດັນຫຼັກໄປທີ່ສ່ວນຂອງ"ຕົວລະຄອນ"ເປັນສຳຄັນ ເພາະວ່າ ເຖິງແມ່ນວ່າລະບົບການປ່ຽນອາຊີບຢ່າງອິດສະຫຼະ ຈະປ່ຽນເປັນການມີອາຊີບຕິດຕົວ ປ່ຽນແປງໄປສະເພາະຕາມເນື້ອເລື່ອງຫຼັກ... ແລະການດຳເນີນເນື້ອເລື່ອງ ທີ່ເປັນເສັ້ນກົງ ຍາກຈະພິກຜັນ... ແຕ່ສິ່ງທີ່ໄດ້ກັບມາແມ່ນ ການສ້າງ"ຄວາມເປັນຕົວຕົນ" (Identity) ທີ່ມີເອກະລັກຂອງຕົວລະຄອນແຕ່ລະຕົວເປັນຄັ້ງທຳອິດ.

...ຈາກການຕັດສິນໃຈປູພື້ນຖານ"ອາລົມ"ທີ່ລະອຽດອ່ອນ ແລະກ້າທີ່ຈະຈັບປະເດັນເລື່ອງ"ຄວາມນຶກຄິດ"ຂອງບັນດາຕົວລະຄອນ ເຮັດໃຫ້ຜູ້ຫຼິ້ນສາມາດສຳຜັດໄດ້ເຖິງສະເໜ່ທີ່ຈຳເພາະ ຢ່າງບໍ່ເຄີຍເກີດຂຶ້ນມາກ່ອນ... ອາດຈະບອກໄດ້ເລີຍວ່າ ນີ້ໜ້າຈະເປັນພາກທຳອິດຂອເກມ ທີ່ເຮົາມີບັນດາຕົວລະຄອນທີ່"ມີຕົວຕົນ" "ຈັບບາຍໄດ້" ແລະ"ເຂົ້າເຖິງໄດ້" ໂດຍແທ້ຈິງ.

ດ້ານໂຄງເລື່ອງ ແມ່ນວ່າຈະປະຕິເສດບໍ່ໄດ້ວ່າ FF IV ໄດ້ຮັບອິດທິພົນມາຈາກນິຍາຍ ແລະເລື່ອງວິທະຍາສາດຫຼາຍຕໍ່ຫຼາຍເລື່ອງ ແຕ່ດ້ວຍການດຳເນີນເນື້ອເລື່ອງທີ່ປະສົມກິ່ນອາຍແຟນຕາຊີ ແລະການໃສ່ບັນຍາກາດທີ່ມີມົນສະກົດ ແຊກເຂົ້າໄປຕະຫຼອດທັງເລື່ອງ... ເຮັດໃຫ້ທ້າຍທີ່ສຸດ... ມັນກໍ່ຖືກຳເນີດໃໝ່ ເປັນເກມພາສາສັນຊາດຕາເວັນອອກ ທີ່ມີສ່ວນປະສົມທັງຄວາມໂຣແມນຕິກ ຄວາມຫວານ ຄວາມຮ້າຍແຮງ ແລະຄວາມງົດງາມທີ່ລົງຕົວ... ເປັນເອກະລັກທີ່ບໍ່ເຄີຍມີ ແລະຈະບໍ່ມີໃຜສາມາດຮຽນແບບໄດ້ເລີຍ.

Twisted bloodline
ທີ່ຜາສາດຄຣິສຕັລທີ່ຕັ້ງສະຫງ່າຢູ່ໃຈກາງດວງຈັນ... ເຊຊິລໄດ້ຮັບຮູ້ເຖິງຄວາມຈິງອັນໜ້າຢ້ານອີກ໑ຂໍ້... ວ່າຜູ້ທີ່ສາມາດຢຸຕິເລື່ອງລາວທັງໝົດນີ້ໄດ້ອາດຈະມີພຽງ... ອີກ໑ທາຍາດຄົນສຳຄັນຂອງຄລູຢະ... ລູກຊອດຜູ້ນ້ອງ ຜູ້ສືບທອດເຊື້ອສາຍຈາກຜູ້ພິທັກຊາວລູນາຣຽນ ກັບຍິງສາວຊາວໂລກ... ນ້ອງຊາຍຂອງກອລເບຊ ຜູ້ອ້າຍ... ຊິເຊລ... ພາລາດິນແຫ່ງແສງສະຫວ່າງ... ຕົວລາວນັ້ນເອງ!!!

ຫຸ່ນຍັກແຫ່ງບາເບລ ຖືກປຸກຂຶ້ນມາອີກຄັ້ງ ໂລກກຳລັງນັບຖອຍຫຼັງສູ່ຈຸດຈົບ... ກອລເບຊຫົວຂວັນຢ່າງບ້າບິ່ນ... ເຊມຸສຍິ້ມນ້ອຍໆຢ່າງເຢາະເຢີ້ຍ... ໃນວັນນັ້ນ... ເຊຊິລຕັດສິນໃຈຢ່າງເດັດຂາດ... ບັນດານັກຮົບເດີນທາງກັບສູ່ໂລກທັນທີ... ການປະເຊີນໜ້າລະຫວ່າງ໒ອ້າຍນ້ອງຜູ້ຢືນຢູ່ຄົນລະຝັ່ງຂອງຄວາມຖືກຕ້ອງ ກຳລັງຈະເລີ່ມຂຶ້ນ... ຜົນສຸດທ້າຍຂອງເລື່ອງລາວ... ກຳລົງລວມເຂົ້າສູ່ບົດສະຫຼຸບສຸດທ້າຍ!!!



Beyond Good and Evil
...ຄວາມເພີ້ຝັນບົດທີ່໔ ນີ້ ເນັ້ນຫຼັກໄປທີ່ປະເດັນຂອງ"ຄວາມຂັດແຍ່ງ"ຫຼາຍ ທັງຄວາມຂັດແຍ່ງລະຫວ່າງຄົນຂ້າງກາຍ ຄວາມຂັດແຍ່ງພາຍໃນຫົວໃຈຕົນ ຄວາມຂັດແຍ່ງລະຫວ່າງສາຍເລືອດ ຄວາມຂັດແຍ່ງລະຫວ່າງແສງແລະເງົາ... ຈວບຈົນເຖິງຄວາມຂັດແຍ່ງທີ່ຢູ່ຄົນລະຟາກຂອງຄວາມຖືກຕ້ອງ... ເຊັ່ນດຽວກັບ໒ດ້ານຂອງພາບທີ່ສະທ້ອນຈາກກະຈົກເງົາ ຫຼື໒ດ້ານຂອງດາບທີ່ຕ່າງກໍ່ສຽບແທງຜູ້ເປັນນາຍ... ບໍ່ມີໃຜສາມາດບົ່ງໄດ້ຊັດແຈ້ງວ່າ... ດ້ານ໒ດ້ານບໍ່ມີທາງໄດ້ພົບເຈີກັນນີ້... ດ້ານໃດຈະຖືກຫຼືດ້ານໃດຈະຜິດ... ຄວາມມືດຄືຄຳຕອບທ້າຍສຸດບໍ? ຫຼືແສງສະຫວ່າງຄືຄວາມຖືກຕ້ອງ?

...ມະນຸດໂລກແນມເບິ່ງດວງຈັນມາແສນດົນນານ ແຕ່ກໍ່ສາມາດຊື່ນຊົມມັນໄດ້ພຽງແຕ່ດ້ານດຽວ... ດ້ານທີ່ປິ່ນເຂົ້າມາຫາພວກເຮົາ... ແລ້ວອີກດ້ານ໑ທີ່ພວກເຮົາບໍ່ເຄີຍໄດ້ເຫັນເດ? ຈະແຝງໄປດ້ວຍຄວາມຊົ່ວຮ້າຍ ຫຼືຄວາມດີງາມກັນແທ້... ກ້າວທີ່໔ນີ້ ນຳພາຄວາມເພີ້ຝັນຂອງພວກເຮົາ ໃຫ້ອອກໄປໄກຈາກຂອບຂອງຈິນຕະນາການອີກ໑ຂັ້ນ... ຜ່ານມາເປັນປີ... ສິ່ງທີ່ພວກເຮົາຄາດຫວັງກໍ່ໄດ້ເປັນຈິງຂຶ້ນມາ... ຄວາມເພີ້ຝັນ ທີ່ກ້າວໄປໄກ... ສູ່ຫ້ວງອາວະກາດທີ່ກ້ວາງໄກ...

...ມັນເປັນຄວາມຂັດແຍ່ງ ທີ່... ເປັນຕາຈື່ຈຳເຫຼືອເກີນ...

ທີ່ມາ: Zieghart
ແປໂດຍ: TINO