Final Fantasy ໕
ເຈຕະນາ ຮຸ່ງອາລຸນແຫ່ງການສືບທອດ



Prologue
ແຕ່ລະໜ້າເຈ້ຍຂອງສະມຸດບັນທຶກເຫຼັ້ມໃຫຍ່ ທີ່ຖືກຮຽກວ່າ"ປະຫວັດສາດ"ນັ້ນ ຕ່າງກໍ່ສະທ້ອນໃຫ້ເຫັນເຖິງວົງວຽນອັນແທ້ຈິງຂອງບັນດາມະນຸດທັງຫຼາຍ.. ມີເກີດ ມີຕາຍ ໝູນວຽນໄປຕາມການເວລາ... ໃນແຕ່ລະຊ່ວງອາຍຸອັນຈຳກັດນັ້ນ ຄົນທັງຫຼາຍຜູ້ສາມາດບັນລຸວັດຖຸປະສົງຂອງຕົນເອງໄດ້ເປັນຜົນສຳເລັດ... ໃນຂະນະທີ່ອີກຫຼາຍຄົນ ເຮັດໄດ້ພຽງແຕ່ກອດເຈຕະນາທີ່ຍັງບໍ່ລຸລ່ວງຂອງຕົນໄວ້... ຈົນວິນາທີສຸດທ້າຍ.

ກວ່າພັນປີກ່ອນໜ້າຍຸກປະຈຸບັນ ຈອມມານຜູ້ຊົງພະລານຸພາບ ເອນູໂອ (Enuo) ໄດ້ໃຊ້ເວດມົນອັນມະຫາສານຂອງຕົນ ສ້າງສິ່ງທີ່ໜ້າຢ້ານກົວທີ່ສຸດໃນປະຫວັດສາດຂອງມະນຸດຊາດຂຶ້ນ... ນາມນັ້ນແມ່ນ "The Void" ມະຫາເວດແຫ່ງຄວາມຫວ່າງເປົ່າ... ເວດຕ້ອງຫ້າມອັນຍິ່ງໃຫຍ່ ທີ່ພ້ອມຈະດູດກືນທຸກສິ່ງທຸກຢ່າງ... ບໍ່ເວັ້ນແມ່ນແຕ່ຕົວມັນເອງ ເຂົ້າສູ່ຫ້ວງມິຕິແຫ່ງຄວາມຫວ່າງເປົ່າທີ່ແສນໄກ... ສູ່ມິດຕິທີ່ບໍ່ມີທັງການກໍ່ກຳເນີດ ແລະບໍ່ມີທັງການດັບສູນ...

ພຽງແຕ່"ການມີຢູ່"ຂອງມັນ ກໍ່ພຽງພໍທີ່ຈະຄຸກຄາມວົງວຽນແຫ່ງຊີວິດ... ບັນດາຜູ້ກ້າໃນຍຸກນັ້ນ ໄດ້ຮ່ວມແຮງຮ່ວມໃຈກັນ ໃຊ້ "ອາວຸດໃນຕຳນານທັງ໑໒" ປາບເອນູໂອລົງໄດ້ເປັນຜົນສຳເລັດ.

ຄວາມປາຖະໜາທີ່ຈະສົ່ງທຸກສິ່ງທຸກຢ່າງກັບສູ່ຄວມຫວ່າງເປົ່າ ເປັນອັນຕ້ອງຈົບສິ້ນໄປ ພ້ອມກັບຈອມເວດຜູ້ຊົ່ວຮ້າຍ... ແຕ່ວ່າ... ມະຫາເວດແຫ່ງຄວມຫວ່າງເປົ່າທີ່ຖືກສ້າງຂຶ້ນມານັ້ນ ພັດບໍ່ມີສິ່ງໃດທຳລາຍມັນລົງໄດ້ເລີຍ... ທາງເລືອກສຸດທ້າຍຂອງບັນດາຜູ້ກ້າ ກໍ່ແມ່ນການເດີມພັນໂດຍໃຊ້ຊະຕາຂອງ"ໂລກ"ທັງໜ່ວຍ ເພື່ອແລກກກັບການ"ຜະນຶກ" ສິ່ງນັ້ນ.

ພວກເຂົາຕັດສິນໃຈກະທຳກາໃຫຍ່ ໂດຍການແບ່ງຂຸມພະລັງທີ່ຄວບຄຸມໂລກທັງໜ່ວຍ... ຂຸມພະລັງທີ່ບໍລິສຸດແຫ່ງທຳມະຊາດ ເຊິ່ງຢູ່ໃນຮູບຂອງ"ຄຣິສຕັລ"ທັງ໔ ອອກເປັນ໒ຊຸດນຳກັນ... ພ້ອມກັນນັ້ນເອງ... ຜືນແຜ່ນດິນທີ່ເຄີຍເຊື່ອມຕໍ່ ກໍ່ເລີ່ມແຍກອອກ... ທ້ອງທະເລເລີ່ມແບ່ງແຍກ... ແມ່ນແຕ່ສາຍລົມ ກໍ່ປານກັບວ່າຈະຖືກກັ້ນຫ່າງດ້ວຍກຳແພງທີ່ເບິ່ງບໍ່ເຫັນ.

...ໂລກດັ່ງເດີມ ໄດ້ແຍກອອກເປັນ໒ໜ່ວຍໃນທັນທີ!!

ໂລກທັງ໒ຖືກຕັດຂາດຈາກກັນແລະກັນ ໝູນຫ່າງໄປຕາມວົງໂຄຈອນຂອງຕົນເອງ... ແລະໄດ້ກໍ່ເກີດເປັນບໍລິເວນເຄິ່ງກາງ ເຊິ່ງຖືກຂະໜານນາມວ່າ "ຊ່ອງຫວ່າງລະຫວ່າງມິຕິ" (Cleft Of Demension) ທີ່ໆໄຮ້ທາງເຂົ້າແລະທາງອອກ ບ່ອນທີ່ເໝືອນກັບວ່າເວລາຈະຢຸດເດີນ... ຈະມີຈັກແຫ່ງຫົນໃດ ທີ່ມະຫາເວດຕ້ອງຫ້າມຈະຖືກຜະນຶກໄວ້... ກໍ່ຄົງຈະບໍ່ມີສະຖານທີ່ໃດເໝາະສົມໄປກວ່າແຫ່ງນີ້ອີກແລ້ວ...

ການເວລາຜ່ານພົ້ນໄປ ຄວາມຢ້ານກົວເລີ່ມຈາງຫາຍ... ແລ້ວໃນທີ່ສຸດ ແມ່ນແຕ່ຄຳບອກເລົ່າເຖິງຈຸດກຳເນີດຂອງໂລກທັງ໒ໜ່ວຍ ກໍ່ໄດ້ຖືກລືມໄປຕາມການເວລາ...



The most Disgusting Soul ever
ໂລກໜ່ວຍທຳອິດ ເມື່ອ ໓໐໐ ປີກ່ອນ... ຫາຍະນະຄັ້ງໃໝ່ໄດ້ເລີ່ມຕົ້ນຂຶ້ນ ເມື່ອຈິດວິນຍານຊົ່ວຮ້າຍຂອງປີສາດນັບຮ້ອຍນັບພັນ ເຊິ່ງລວມຢູ່ໃຈກາງປ່າສັກສິດແຫ່ງມົວຣ໌... ໄດ້ທະວີຄວາມຮຸນແຮງຫຼາຍຂຶ້ນ "ຈິດ" ເຫຼົ່ານັ້ນກໍ່ເກີດເປັນ "ຊີວິດ" ທີ່ມີຮູບຮ່າງ ມີສະຕິປັນຍາ ແລະເຕັມໄປດ້ວຍຄວາມຊົ່ວຮ້າຍ... ນາມວ່າ "ຈອມເວດ Exdeath".

ກ່ອນທີ່ກ້ອນລວມແຫ່ງຄວາມຊົ່ວຮ້າຍນັ້ນ ຈະຫັນກະທຳການໃດ... ນັກປາດກິໂດ ຜູ້ຍິ່ງໃຫຍ່ ກໍ່ໄດ້ໃຊ້ພະລັງແຫ່ງຄຣິສຕັລທັງ໔ ທຳການຜະນຶກ Exdeath ໄວ້ກາງປ່າສັກສິດແຫ່ງມົວຣ໌ລົງຈົນໄດ້... ຢ່າງໜ້ອຍກໍ່ພຽງແຕ່ໄລຍະເວລາ໑.

ໜ້າປະຫວັດສາດ ພິກໄລ່ມາຈົນເຖິງຊ່ວງເວລາ ໓໐ປີ ກ່ອນຍຸກປະຈຸບັນ ເມື່ອພະລັງຂອງຄຣິສຕັລໃນໂລກໜ່ວຍທຳອິດນັ້ນເລີ່ມອ່ອນລົງ ຈອມເວດໂຕຮ້າຍກໍ່ອອກມາໄດ້ອີກຄັ້ງ ແລະກົງໄປທີ່ໂລກໜ່ວຍທີ່໒ໂດຍບໍ່ຊ້າ... ແຕ່ວ່າ ໔ນັກຮົບຜູ້ຍິ່ງໃຫຍ່ແຫ່ງຍຸກນີ້ ເຊິ່ງຖືກຂະໜານນາມວ່າ "ນັກຮົບແຫ່ງຮຸ່ງອາລຸນ" (Warrior Of Dawn) ກໍ່ໄດ້ໃຊ້ອຸກກາບາດຍັກ ເປັນພາຫະນະໄລ່ນຳມາຈົນເຖິງໂລກໜ່ວຍທີ່໒ນັ້ນ ແລະຈັດການລົ້ມ Exdeath ລົງໄດ້ອີກເທື່ອ໑!!

...ທັງໝົດໃຊ້ພະລັງຂອງຄຣິສຕັລທັງ໔ຂອງໂລກໜ່ວຍທີ່໒ ໃນການຜະນຶກຈອມເວດໂຕຮ້າຍໄວ້ທີ່ໂລກໜ່ວຍນັ້ນ... ແຕ່ດໍຣ໌ແກນ ໑ໃນນັກຮົບແຫ່ງຮຸ່ງອາລຸນ ພັດຮູ້ສຶກຜິດຫຼາຍ ທີ່ຈະຕ້ອງຖິ້ມພາລະຂອງໂລກຕົນເອງໄວ້ກັບໂລກອີກໜ໋ວຍ໑... ຄິດໄດ້ດັ່ງນັ້ນແລ້ວ ລາວກໍ່ຕັດສິນໃຈທີ່ຈະລົງຫຼັກປັກຖານຢູ່ທີ່ໂລກໜ່ວຍນີ້ຕໍ່ໄປ ເພື່ອຄອຍເບິ່ງໃຫ້ແນ່ໃຈວ່າ ຄຣິສຕັລທັງ໔ ຈະຍັງຄົງເປັ່ງປະກາຍເຊັ່ນນີ້ຕະຫຼອດໄປ...

Beginning of the New Age
ເວລາຜ່ານມາຫຼາຍປີ... ແມ່ນວ່າຍອດນັກຮົບກໍ່ຍັງຕ້ອງວົນວຽນຢູ່ໃນກົດແຫ່ງທຳມະຊາດ... ດໍຣ໌ແກນເສຍຊີວິດລົງດ້ວຍໂລກຮ້າຍ ບໍ່ດົນພໍເທົ່າໃດ ກ່ອນຈະຝາກຝັງລູກຊາຍພຽງ໑ດຽວຂອງລາວ... ບັທຊ໌... ໃຫ້ອອກເດີນທາງສູ່ໂລກກວ້າງ ພ້ອມງ່ຽງຫູຟັງສຽງຂອງສາຍລົມ ທີ່ຈະພາລາວໄປສູ່ເສັ້ນທາງທີ່ເໝາະສົມ...

ເຊິ່ງຕະຫຼອດເວລາຫຼາຍສິບປີທີ່ຜ່ານມາ ພະລັງແຫ່ງທຳມະຊາດຂອງ "ຄຣິສຕັລ" ໄດ້ຖືກຜູ້ຄົນນຳມາໃຊ້ຢ່າງປ່ວງບ້າແລະຟູມເຟືອຍ... ເມື່ອຄຣິສຕັລທັງ໔ ຖືກຕິດຕັ້ງດ້ວຍເຄື່ອງຈັກຂອງຊິດ ວິສະວະກອນຜູ້ສະຫຼາດ... ພະລັງຂອງມັນກໍ່ຖືກຜັນປ່ຽນມາສ້າງປະໂຫຍດນາໆປະການໃຫ້ແກ່ບັນດາມະນຸດຜູ້ໂງ່ຈ້າ... ຜືນດິນທີ່ແຂງແກ່ນ ສາຍນ້ຳທີ່ໄຫຼຫຼັ່ງ ສາຍລົມທີ່ຮຸນແຮງ ແລະແປວໄຟທີ່ລຸກໄໝ້... ສຽງຫົວຂອງທຸກຄົນດັງກ້ອງໄປທົ່ວ ໂດຍບໍ່ຮູ້ວ່າຈຸດຈົບຂອງໂລກທັງ໒ໜ່ວຍ ກຳລັງຈະມາເຖິງໃນບໍ່ດົນ...

Exdeath ເຊິ່ງຖືກຜະນຶກຢູ່ ບໍ່ພາດໂອກາດງາມ ທີ່ພະລັງຂອງຄຣິສຕັລເລີ່ມອ່ອນແຮງແບບນີ້... ມັນໃຊ້ອຳນາດແຫ່ງຄວາມມືດ ຄອບງວຳຜູ້ຄົນມາກມາຍ ໃຫ້ເຂົ້າຫາຂຸມພະລັງອັນຍິ່ງໃຫຍ່ແຕ່ລະແຫ່ງ ແລະທຳລາຍຄິຣສຕັລທັງ໔ກ້ອນນັ້ນເລີຍ!!!

ບັທຊ໌ - ນັກເດີນທາງໜຸ່ມ ສຳຜັດໄດ້ເຖິງສາຍລົມທີ່ອ່ອນແຮງລົງ... ຈຶ່ງຟ້າວຂຶ້ນໂຈໂຄໂບະຄູ່ໃຈ ໃຫ້ມຸ້ງໜ້າໄປໂດຍໄວ...

ເຣນ່າ - ເຈົ້າຍິງແຫ່ງອານາຈັກ "ໄທຄູນ" ດ້ວຍຄວາມເປັນຫ່ວງພະບິດາ... ຈຶ່ງໂດດຂຶ້ນຫຼັງມັງກອນບິນປະຈຳຕົວ ທະຍານອອກໄປໂດຍທັນທີ...

ກາຣັຟ - ໑ໃນ໔ນັກຮົບແຫ່ງຮຸ່ງອາລຸນ ໄດ້ຮັບຄຳທຳນາຍເຖິງຫາຍະນະທີ່ກຳລັງຈະເກີດຂຶ້ນ ຈຶ່ງຮີບຮ້ອນຂັບອຸກກາບາດຍັກ ຂ້າມມາເຖິງໂລກອີກໜ່ວຍ ດ້ວຍໃຈທີ່ສັ່ນສະເທືອນ...

ຟາຣິສ - ໂຈນສະລັດຜູ້ຍິ່ງທະນົງ ເລີ່ມສັງເກດເຖິງຄວາມຜິດປົກກະຕິເໜືອໜ້ານ້ຳ ຈຶ່ງຮີບບອກກ່າວ "ຊິລດຣາ" ມັງກອນວາລີປະຈຳຕົວ ໃຫ້ລອຍໄປທີ່ຈຸດໝາຍ...

...ຄວາມນຶກຄິດທີ່ແຕກຕ່າງ ພັດນຳພາຊາຍ-ຍິງທັງ໔ ມຸ້ງໜ້າໄປສູ່ຈຸດໝາຍດຽວກັນ... ສູ່ຈຸດເລີ່ມຕົ້ນຂອງເລື່ອງລາວທັງໝົດ.

...ສູ່ວິຫານຄຣິສຕັລແຫ່ງສາຍລົມ...

...ພາບທີ່ປະກົດຂຶ້ນເບື້ອງໜ້ານັກຮົບແຫ່ງໂຊກຊະຕາ ກໍ່ແມ່ນເສດຊາກຂອງຄຣິສຕັລທີ່ກະແຈກກະຈາຍ ແລະຄຳສົ່ງມອບຕໍ່ພວກເຂົາ ວ່າ... ຈຸດຈົບກຳລັງໃກ້ເຂົ້າມາ... ຊະຕາກຳແບບດຽວກັນ ກຳລັງຈະເກີດຂຶ້ນກັບຄຣິສຕັລທີ່ເຫຼືອ... ຕອນນີ້ ເຈ້ຍເປົ່າໆອີກ໑ແຜ່ນ ໄດ້ຖືກພິກຂຶ້ນມາ... ທຸກຄົນຕ່າງຮູ້ດີວ່າ ເຖິງເວລາແລ້ວ ທີ່ຕຳນານໜ້າໃໝ່ກຳລັງຈະຖືກບັນທຶກ ເຖິງເວລາແລ້ວ ທີ່ "ບັນດານັກຮົບແຫ່ງຮຸ່ງອາລຸນ" ລຸ້ນໃໝ່ ຈະເຂົ້າມາເຮັດໃຫ້ເຈຕະນາທີ່ຍັງຄົງຄ້າງ ຂອງບັນດານັກຮົບແຕ່ປາງກ່ອນບັນລຸຜົນ!!!



Accomplish the Nothingness
ດ້ວຍພະລັງທີ່ເສດຊາກຄຣິສຕັລຖ່າຍທອດໃຫ້ກັບນັກຮົບທັງ໔ ເຮັດໃຫ້ພວກເຂົາສາມາດຕິດຕາມໄລ່ລ່າຈິດວິນຍານຂອງ Exdeath ໄປສຸດຫຼ້າຟ້າຂຽວ... ແຕ່ໜ້າເສຍດາຍ ທີ່ຄວາມຊົ່ວຮ້າຍມັກຈະກ້າວໄປກ່ອນ໑ກ້າວສະເໝີ... ແລະແລ້ວ ຄຣິສຕັລກ້ອນສຸດທ້າຍກໍ່ແຕກເປັນຜຸຍຜົງ... ຈອມມານຜູ້ຊົ່ວຮ້າຍ ຟື້ນກັບມາອີກຄັ້ງ!!

ສາກຂອງເລື່ອງລາວ ໂດດຂ້າມຜ່ານຫ້ວງອາວະກາດ ໄປທີ່ໂລກອີກໜ່ວຍ໑... ໂລກໜ່ວຍທຳອິດຂອງກາຣັຟ... ເຊິ່ງເປັນສະຖານທີ່ສະຖິດແຫ່ງຄຣິສຕັລອີກ໔ກ້ອນທີ່ເຫຼືອ... ບ່ອນນີ້ເອງ ທີ່ຈຸດປະສົງຂອງຈອມມານຮ້າຍໄດ້ຖືກເປີດເຜີຍຜ່ານປາກຂອງນັກປາດກິໂດ...

ຈອມມານຜູ້ຊົ່ວຮ້າຍນີ້ ໄລ່ທຳລາຍຄຣິສຕັລທັງ໒ຊຸດ ເພື່ອເຮັດໃຫ້ໂລກທັງ໒ໜ່ວຍທີ່ເຄີຍແຍກຈາກກັນເມື່ອຄັ້ງກ່ອນ... ກັບມາລວມກັນເປັນ໑ດຽວອີກຄັ້ງ ເພື່ອເປີດເສັ້ນທາງສູ່ "ຊ່ອງຫວ່າງມິຕິ" ທີ່ມັນໄດ້ແຕ່ເຄີຍຝັນເຖິງ...

...ສູ່ສະຖານທີ່ໆເຕັມໄປດ້ວຍບັນດາປີສາດເກົ່າແກ່ອັນແສນຊົ່ວຮ້າຍ
...ສູ່ສະຖານທີ່ໆໃຊ້ຜະນຶກເວດມົນຕ້ອງຫ້າມແຕ່ຄັ້ງບູຮານ
...ສູ່ສະຖານທີ່ຕັ້ງຂອງ... The Void...

"ສິ່ງມີຊີວິດທີ່ກໍ່ກຳເນີດຈາກກ້ອນລວມຂອງວິນຍານຮ້າຍທີ່ມາກມາຍເກີນຈະນັບໄດ້" ບໍ່ໄດ້ເປັນຄຳອະທິບາຍທີ່ເກີນໄປເລີຍຈັກໜ້ອຍ... ຈອມເວດ Exdeath ໃຊ້ເວລາບໍ່ດົນເທົ່າໃດ ທີ່ຈະເປີດສາກຕຳນານເກົ່າແກ່... ນັກຮົບແຫ່ງຮຸ່ງອາລຸນຍຸກເກົ່າ ຈົບຊີວິດລົງຈົນໝົດສິ້ນ... ແລະແລ້ວ... ຄຣິສຕັລກ້ອນສຸດທ້າຍກໍ່ພິນາດລົງ... ໂລກທັງ໒ໜ່ວຍໄດ້ລວມກັນເປັນ໑ດຽວອີກຄັ້ງ!! ຈອມເວດ Exdeath ໄດ້ຮັບມະຫາເວດແຫ່ງຄວາມຫວ່າງເປົ່າໄວ້ໃນມືໃນທີ່ສຸດ!!

ຝັນຮ້າຍທີ່ຫ່າງຫາຍໄປກວ່າສະຕະວັດ ກຳລັງຈະກັບຄືນມາ... ວົງວຽນແຫ່ງການເກີດແລະດັບສູນ ກຳລັງຈະຖືກທຳລາຍສິ້ນ... ມະຫາອາວະກາດ ກຳລັງຈະຖືກດູດກືນກັບສູ່ຄວາມສິ້ນສູນ!!
ທີ່ແຫ່ງນັ້ນ... ແມ່ນແຕ່ເສດຂອງນິຍາມຄຳວ່າ "ຊີວິດ" ກໍ່ໄຮ້ເຊິ່ງຄວາມໝາຍໃດໆ!!



Behind the Cover
Final Fantasy ໕ - "ບົດແຫ່ງການສືບທອດ" ນັ້ນ ເປັນ໑ໃນພາກທີ່ເອີ້ນໄດ້ວ່າ ມີລະບົບການຫຼິ້ນທີ່ "ສົມບູນ" ທີ່ສຸດ ດ້ວຍການເອົາລະບົບຕັ້ງແຕ່ຄັ້ງເກົ່າກ່ອນເຊັ່ນ "ການປ່ຽນອາຊີບ" ມາພັດທະນາໃຫ້ມີຄວາມເປັນເອກະລັກສະເພາະຕົວ ລວມທັງໝົດ ໒໒ ອາຊີບ (ເຊິ່ງເຜີ້ມເປັນ ໒໖ ອາຊີບໃນສະບັບປັບປຸງໃໝ່) ແລະມີຈຸດເດັ່ນ ຈຸດດ້ອຍຂອງແຕ່ລະອາຊີບທີ່ແຕກຕ່າງກັນຊັດເຈນ ສາມາດປ່ຽນແປງ ຫຼືປະສົມປະສານກັນໄດ້ຢ່າງອິດສະຫຼະແບບທີ່ບໍ່ເຄີຍເປັນມາກ່ອນ... ເອີ້ນໄດ້ວ່າ ແມ່ນວ່າຕົວລະຄອນຫຼັກຂອງພາກ ຈະມີຢູ່ໜ້ອຍ໑ ພຽງແຕ່໔ຄົນ ແຕ່ການນຳແນວຄິດເລື່ອງອາຊີບ ແລະຄວາມສາມາດປະຍຸກລວມກັນໄດ້ຕາມໃຈມັກ ເຮັດໃຫ້ເກີດເປັນກຸ່ມທີ່ແຕກຕ່າງກັນໄປໄດ້ ມາກມາຍຫຼາຍຮ້ອຍຮູບແບບ.

ແຕ່ລະສາຍອາຊີບນັ້ນ ຈະມີຄວາມສາມາດທີ່ແຍກຈາກກັນໄດ້ຢ່າງສິ້ນເຊີງ ແລະພັດທະນາຂຶ້ນຢ່າງຕໍ່ເນື່ອງ ຜ່ານການເກັບຄະແນນຄວາມສາມາດ (Ability Point) ທີ່ໄດ້ຈາກການປາບສັດຕູ... ເມື່ອຮອດຈຸດໆ໑ ນັກເວດກໍ່ຈະໃຊ້ເວດລະດັບຮຸນແຮງຂຶ້ນ ຈອມໂຈນກໍ່ຈະສາມາດຈູ່ໂຈມພ້ອມກັບລັກສິ່ງຂອງ ນັກຮົບກໍ່ຈະຖືດາບ໒ມື ຫຼືຊາມູໄຣກໍ່ຈະສາມາດຈັດການສັດຕູໄດ້ໃນການໂຈມຕີພຽງຄັ້ງດຽວ!!

ເມື່ອໄປເຖິງຊ່ວງເຄິ່ງກາງເກມເປັນຕົ້ນໄປ ຄວາມມ່ວນທີ່ແທ້ຈິງກໍ່ຈະເລີ່ມຕົ້ນຂຶ້ນ... ເມື່ອຜູ້ຫຼິ້ນໄດ້ຮັບຄວາມສາມາດໃນລະດັບທີ່ສູງຂຶ້ນເລື້ອຍໆແລ້ວ ຜູ້ຫຼິ້ນກໍ່ຈະສາມາດນຳທັກສະທີ່ໄດ້ ໄປໃຊ້ຮ່ວມກັບສາຍອາຊີບອື່ນໆໄດ້ ເຮັດໃຫ້ເກີດກຸ່ມນັກຮົບທີ່ມີຄວາມຊຳນານທີ່ມາກມາຍ ບໍ່ຊ້ຳກັນ ຕາມແຕ່ຄວາມເໝາະສົມຂອງສະຖານະການ ແລະຈິນຕະນາການຂອງຜູ້ຫຼິ້ນ... ເຮົາຈະມີນັກກັງຟູທີ່ໃຊ້ເວດມົນດຳ ນັກດົນຕີທີ່ຮຽກສັດອະສູນ ມີນັກພູມສາດທີ່ຖືຂວານອັນໃຫຍ່ ມີນາຍພານທີ່ໃຊ້ພະລັງມັງກອນ ຫຼືແມ່ນແຕ່ນິນຈາທີ່ໂຈມຕີໄດ້ເຖິງ ໘ຄັ້ງ ນຳ!!

...ແມ່ນວ່າຈະມີອາຊີບໃໝ່ ໔ ອາຊີບ ທີ່ຖືກເຜີ້ມຂຶ້ນມາໃນສະບັບປັງປຸງ ແຕ່ຫາກຈະເວົ້າເຖິງ "ອາຊີບລັບ" ທີ່ແທ້ຈິງ ກໍ່ຄົງໜີບໍ່ພົ້ນ "ນັກຮຽນແບບ" ສຸດຍອດອາຊີບທີ່ຢູ່ໃນຄວາມດູແລຂອງຊາຍລຶກລັບແຫ່ງຫໍຄອຍໃຕ້ນ້ຳ ນາມວ່າ "ໂກໂກ້" ເຊິ່ງມີລັກສະນະບໍ່ຄືໃຜ ແລະເປັນຕົ້ນແບບຂອງອາຊີບ ຕົວລະຄອນ ແລະຄວາມສາມາດຕ່າງໆໃນພາກລຸນມາ.

ທີ່ສຳຄັນທີ່ສຸດ FF V ນີ້ ໄດ້ເປີດສາກຕົວລະຄອນໃນຕຳນານ ເຊິ່ງຍັງຄົງປະກົດໂສມໃນພາກຫຼັງໆຢ່າງຕໍ່ເນື່ອງ... ມືຂວາຂີ້ໂກກຂອງຈອມເວດໂຕຮ້າຍ... ນັກສະສົມອາວຸດ ຜູ້ຄອບຄອງເກາະເກນຈິ ແລະໃຊ້ດາບ Excalibur (ປອມ) ຕໍ່ກອນກັບນັກຮົບແຫ່ງຮຸ່ງອາລຸນ... ກະທາຊາຍ ທ້າວ "ກິລກາເມຊ" ນັ້ນເອງ ອາດຈະບອກໄດ້ວ່າ ສີສັນຂອງພາກ໕ ບໍ່ວ່າຈະສຸກ ຈະເສົ້າ ຈະຕື່ນເຕັ້ນ ຫຼືປະທັບໃຈ... ເຫດຜົນ໑ກໍ່ຍ້ອນມືຂວາຊຸດແດງຜູ້ນີ້ໆເອງ...



Connecting the New Era
ບັນດານັກຮົບແຫ່ງຮຸ່ງອາລຸນ ໄດ້ຄາຍຜະນຶກອາວຸດໃນຕຳນານທັງ ໑໒ ລົງ ແລະບຸກຝ່າຟັນເຂົ້າມາເຖິງໃຈກາງຊ່ອງຫວ່າງລະຫວ່າງມິຕິ ຈົນໄດ້ມີໂອກາດປະເຊີນໜ້າກັບຈອມເວດ Exdeath... ແຕ່ກ່ອນທີ່ການຕໍ່ສູ້ຈະເລີ່ມຂຶ້ນ ພວກເຂົາກໍ່ໄດ້ຖືກດູດກືນຫາຍໄປສູ້ມິຕິທີ່ແສນເວີງວ້າງ ແລະຫ່າງໄກ.

...ມະຫາເວດແຫ່ງຄວາມຫວ່າງເປົ່າ ກັກຂັງບັນດາຜູ້ກ້າໄວ້ເປັນຜົນສຳເລັດ!

...ແຕ່ໄມ້ແຫ່ງໂຊກຊະຕາທີ່ຖືສົ່ງມອບ ບໍ່ໄດ້ໄຮ້ຄວາມໝາຍພຽງເທົ່ານັ້ນ... ພັນທະໜ້າທີ່ໆຮັບມອບມາຈາກຫຼຸ້ນກ່ອນ ມີນ້ຳໜັກຫຼາຍກວ່າຈະມາຈົບສິ້ນລົງຢ່າງໄຮ້ຄ່າ ໃນດິນແດນແຫ່ງຄວາມສິ້ນສູນນີ້... ບັນດານັກຮົບແຫ່ງຮຸ່ງອາລຸນໄດ້ຮັບຄວາມຊ່ວຍເຫຼືອຈາກຈິດວິນຍານຂອງຜູ້ກ້າທີ່ລ່ວງລັບ ໃຫ້ກັບຄືນມາສູ່ໂລກພາຍນອກ ແລະຄົ້ນລົ້ມວິນຍານຊົ່ວລົງໃນທີ່ສຸດ!

ຈອມເວດຜູ້ຊົ່ວຮ້າຍ ຮັບບໍ່ໄດ້ກັບເຫດການທີ່ເກີດຂຶ້ນ ແລະຮຽກໃຊ້ພະລັງແຫ່ງ The Void ເຖິງຂີດສຸດ ຈົນສຸດທ້າຍ ຕົວມັນເອງ ກໍ່ກາຍເປັນເຄື່ອງຮອງຮັບພະລັງອັນຍິ່ງໃຫຍ່ນັ້ນ ແລະກໍ່ເກີດເປັນຊີວິດອັນສຸດແສນອັບປະລັກແລະຊົງພະລານຸພາບ ນາມ Neo Exdeath...

ການຕໍ່ສູ້ຄັ້ງສຸດທ້າຍ ທີ່ມິຕິທີ່ແສນໂດດດ່ຽວ ກຳລັງຈະເລີ່ມຕົ້ນຂຶ້ນ... ປະຫວັດສາດ ຈະຖືກລຶບຫາຍໄປພ້ອມກັບຄວາມຊົງຈຳ ຫຼືຕຳນານບົດໃໝ່ຈະຖືກຈາລຶກໄປພ້ອມກັບຄຳເລົ່າຂານ...

ຊາຍໜຸ່ມຢິບດາບມາປະຄອງແໜ້ນ ແລະຫັນໜ້າເຂົ້າໃສ່ປີສາດຮ້າຍໂດຍທັນທີ!!!

ແນ່ນອນວ່າ ເມື່ອຝັ່ງເຮົາມີຄວາມສາມາດທີ່ໄຮ້ຂີດຈຳກັດນີ້ ຝັ່ງສັດຕູເອງກໍ່ບໍ່ແມ່ນວ່າຈະນ້ອຍໜ້າ... ທັງສັດຕູຕາມທາງ ແລະບັນດາຫົວໜ້າທັງຫຼາຍ ຕ່າງກໍ່ມີລູກຫຼິ້ນມາກມາຍ ໃຫ້ເຮົາຕ້ອງເປືອງແຮງ ແລະເປືອງສະໝອງຕໍ່ກອນຢູ່ບໍ່ໜ້ອຍ ແລະພາກນີ້ເອງ ທີ່ເປັນພາກທຳອິດຂອງເກມ ເຊິ່ງເປີດຕົວພວກສັດຕູສຸດໂຫດ ແລະຖືກເອີ້ນລວມງ່າຍໆຢ່າງເຂົ້າໃຈວ່າ "ຫົວໜ້າລັບ" ນັ້ນເອງ... ຜ່ານມາເຖິງທຸກວັນນີ້ ເຄື່ອງຈັກບູຮານທີ່ປະກົດກາຍຈາກຟາກຟ້າ ນາມ "ໂອເມກ້າ" ແລະມັງກອນບິນຜູ້ເຝົ້າດາບແຫ່ງແຣກນາຣ໊ອຄໃນຕຳນານ ນາມ "ຊິນຣິວ" ກໍ່ຍັງເປັນຕົວລະຄອນໃນດວງໃຈຂອງຫຼາຍໆຄົນ.