Final Fantasy ໖
ປະກາຍໄຟແຫ່ງສົງຄາມ ກັບນິຍາມຮັກທີ່ສວນທາງ



Prologue
ສົງຄາມແລະຄວາມກະຫາຍ ເປັນສິ່ງທີ່ຢູ່ຄູ່ກັບສັບພະສິ່ງມາດົນນານ... ເຫດການອັນໜ້າເສົ້າມາກມາຍເທິງປະຫວັດສາດ ທີ່ທະຍອຍໝູນວຽນກັນປະກົດຂຶ້ນ ພ້ອມດ້ວຍສຽງແຜດຮ້ອງແລະລະອອງເລືອດນັ້ນ... ມັນຄອຍຕອກຢ້ຳໃຫ້ຄົນໄດ້ເຫັນພ້ອມກັນວ່າ... ຫຼາຍຄັ້ງຫຼາຍຄາວ... ມັນອາດຈະບໍ່ຈຳເປັນຕ້ອງມີ "ເຫດຜົນ" ທີ່ຍິ່ງໃຫຍ່ຫຼືສຳຄັນຫຍັງເລີຍ... ທີ່ຈະພາກຊີວິດ... ທີ່ຈະທຳລາຍສາຍສຳພັນ... ທີ່ຈະຈົບສິ້ນທຸກລົມຫາຍໃຈ...

ກວ່າພັນປີເມື່ອກາລະຄັ້ງກ່ອນ... ຈຸດສູງສຸດຂອງໂລກແລະວັດທະນະທຳທັງປວງນັ້ນ ຖືກປົກຄອງໂດຍເທບພະເຈົ້າຜູ້ຍິ່ງໃຫຍ່ທັງ໓ (Warring triad) ເຊິ່ງຍຶດຕຳແໜ່ງເປັນ໓ຂົ້ວອຳນາດ ເຝົ້າຄອຍດູແລວິຖີແຫ່ງສິ່ງມີຊີວິດເບື້ອງລຸ່ມ ແລະເປັນຜູ້ໃຫ້ກຳເນີດຂຸມພະລັງທີ່ຊົງພະລານຸພາບເຫຼືອຄະນາ... ເຊິ່ງຄົນທົ່ວໄປຮູ້ຈັກກັນໃນນາມຂອງ "ເວດມົນ" ແລະ "ສັດອະສູນ".

ເມື່ອພະລັງແລະອຳນາດຂອງແຕ່ລະອົງ ເຜີ້ມພູນສູງຂຶ້ນໄປເຖິງຈຸດ໑... ຄວາມຂັດແຍ່ງທີ່ບໍ່ເຄີຍປະກົດມາກ່ອນ ກໍ່ໄດ້ອຸບັດຂຶ້ນ... "ຂົ້ວອຳນາດ" ທັງ໓ນັ້ນ ບໍ່ສາມາດຄວບຄຸມພະລັງ ຄວາມກະຫາຍເລືອດ ແລະຄວາມປາຖະໜາຈະເປັນ໑ ເຊິ່ງແຜດເຜົາຢູ່ໃນຮ່າງກາຍໄດ້... ການຕໍ່ສູ້ຂອງເທບທັງ໓ ຈຶ່ງເປັນຕົ້ນເຫດສຳຄັນທີ່ສຸດ ທີ່ໄຟແຫ່ງສົງຄາມກະຈາຍໄປທົ່ວພື້ນໂລກ... ບັນດາສັດອະສູນທີ່ຖືກສ້າງຂຶ້ນມານັບບໍ່ຖ້ວນ... ແສງ ແຫ່ງເວດມົນແຜດເຜົາຜືນພິພົບຈົນພິນາດ... ທັງຄົນທຳມະດາ ກໍ່ຖືກດຶງໃຫ້ເຂົ້າມາຮ່ວມໃນວັງວົນເປື້ອນເລືອດນີ້ຢ່າງຫຼີກເວັ້ນບໍ່ໄດ້.

...ຊ່ວງເວລາແຫ່ງການຕໍ່ສູ້ ທີ່ຖືກຂະໜານນາມວ່າ "ສົງຄາມເວດມົນ" (War Of Magic) ດຳເນີນໄປຫຼາຍຕໍ່ຫຼາຍປີ... ດົນນານຈົນສຽງແຜດຮ້ອງຕິດຫູ ເລີ່ມຈະຈາງຫາຍໄປ... ຊີວິດນ້ອຍໆຄ່ອຍໆດັບສູນລົງຢ່າງຕໍ່ເນື່ອງ ທັງທຳມະຊາດກໍ່ເສີຍສົມດຸນຈົນສິ້ນ... ໂລກຂອງເຮົາ ກາຍເປັນພຽງແຕ່ຜືນດິນທີ່ແຫ້ງແລ້ງ... ເຕັມໄປແຕ່ຊາກສົບທີ່ກອງເປັນພູ!!

ກວ່າເທບທັງ໓ ຈະສຳນຶກເຖິງຄວາມໂງ່ຈ້າ ແລະຄວາມຜິດພາດທີ່ພວກຕົນເປັນຜູ້ກໍ່ໄວ້ ໂລກທັງໜ່ວຍກໍ່ເກືອບຈະບໍ່ເຫຼືອຊີວິດໃດໆໃຫ້ດຳລົງຢູ່ຕໍ່ໄປອີກ... ບັນດາຜູ້ໃຫ້ກຳເນີດສັດອະສູນແລະເວດມົນ ຍອມຮັບຄວາມຜິດ ແລະປ່ຽນຕົນເອງໃຫ້ກາຍເປັນເທວະຮູບຫີນອັນງົດງາມ ວາງຕົວຢູ່ໃນບ່ອນລຽບສາມຫຼ່ຽມ ອັນເປັນຕຳແໜ່ງສົມດຸນແຫ່ງພະລັງ... ພ້ອມກ່າວຢ່າງເຊື່ອໝັ້ນວ່າ ຕາບໃດທີ່ສະໜາມພະລັງນີ້ ຍັງຮັກສາສົມດຸນໄດ້ເຊັ່ນທຳອິດ... ພວກຕົນທັງ໓ ກໍ່ຈະເຂົ້າສູ່ນິທາຢ່າງສະຫງົບຕໍ່ໄປ... ຕາບນານເທົ່ານານ.

ບັນດາສັດອະສູນກ່າວຂອບໃຈຕໍ່ພະຜູ້ສ້າງ ແລະຮັບໜ້າທີ່ປົກປ້ອງເທວະຮູບທັງ໓ດ້ວຍຊີວິດ ພ້ອມກກັບເລີ່ມແຍກຕົວຫ່າງອອກຈາກພວກມະນຸດຜູ້ຮຸກຮານ ເຂົ້າໄປສູ່ດິນແດນແຫ່ງສັດອະສູນອັນລຶກລັບ... ບ່ອນທີ່ສິ່ງທີ່ມີຊີວິດ ທັງ໒ສາຍພັນ ຈະບໍ່ມີທາງໄດ້ປະສົບພົບເຫັນກັນອີກເລີຍ...

ແລະແລ້ວ... ເມື່ອການເວລາຜ່ານໄປ ເສັ້ນທາງວິວັດທະນາການຂອງ໒ເຜົ່າພັນ ຕ່າງກໍ່ຄ່ອຍໆແຍກຫ່າງອອກຈາກກກັນ... ຢ່າງຊ້າໆ... ແລະໝັ້ນຄົງ...



Dead End of Evolution
໑໐໐໐ ປີຜ່ານພົ້ນ... ໂລກມະນຸດ ກ້າວເຂົ້າສູ່ຍຸກທີ່ວັດທະນະທຳຂອງເຄື່ອງຈັກອາຍນ້ຳ ທ່ອນເຫຼັກ ແລະຂີ້ເຈຍ ຈະເລີນກ້າວໜ້າເຖິງຂີດສຸດ ສິ່ງໄຮ້ສາລະເໜືອສາມັນສຳນຶກເຊັ່ນ "ເວດມົນ" ຫຼື "ສັດອະສູນ" ກໍ່ກາຍເປັນພຽງແຕ່ນິທານກ່ອນນອນ ສຳຫຼັບເດັກນ້ອຍທີ່ບໍ່ຮູ້ຄວາມເທົ່ານັ້ນ.

ແຕ່ວ່າ ຝັນຮ້າຍເມື່ອຄັ້ງກ່ອນ ພັດຖືກພິກຟື້ນຂຶ້ນເທິງໂລກແຫ່ງຄວາມເປັນຈິງອີກຄັ້ງ ໂດຍ "ຈັກກະພັດກັສທຣ່າ" ຜູ້ທະເຍີທະຍານຈະປຸກພະລັງອັນຍິ່ງໃຫຍ່ທີ່ແສນເພີ້ຝັນ ເຊັ່ນສັດອະສູນແລະເວດມົນ ໃຫ້ກກັບຂຶ້ນມາເປັນທີ່ປະຈັກອີກຄາວ... ຈັກກະພັດໄດ້ຄົ້ນພົບປະຕູມິຕິ ທີ່ແຍກກັ້ນໂລກທັງ໒ມາດົນນານ ພ້ອມຍົກກຳລັງເຂົ້າບຸກ ຈັບບັນດາອະສູນມາມາກມາຍ ໝາຍຈະດັບດູດພະລັງເວດອັນຍິ່ງໃຫຍ່ທີ່ຢູ່ໃນຮ່າງກາຍພວກມັນ ມາໃຊ້ເພື່ອເສີມກຳລັງໃຫ້ກັບກອງທັບຂອງຕົນ.

ບົດສະຫຼຸບຂອງການດີ້ນຮົນ ທຳລາຍເສັ້ນແບ່ງກັ້ນຂອງ໒ເຜົ່າພັນ ຈົບລົງທີ່ການປິດກັ້ນປະຕູມິຕິເປັນຄັ້ງສຸດທ້າຍ... ໂລກທັງ໒ ຖືກແຍກອອກກັນໂດຍສິ້ນເຊີງອີກຄັ້ງ... ກອງກຳລັງກັສທຣ່າຟົ້ງກັບອອກມາໂລກພາຍນອກ ພ້ອມກັບສັດອະສູນຈຳນວນ໑... ແລະແອນ້ອຍຄົນສຳຄັນ... ລູກຊອດຍິງພຽງ໑ດຽວ ຂອງໜຸ່ມອະສູນແລະສາວມະນຸດ ນາມວ່າ "ທີນ່າ".

ເມື່ອສາວນ້ອຍມີສາຍເລືອດເຄິ່ງ໑ ສືບທອດມາຈາກບັນດາສັດອະສູນ ເຮັດໃຫ້ນາງຄອບຄອງຄຸນສົມບັດພິເສດ ທີ່ຈະໃຊ້ພະລັງອັນຍິ່ງໃຫຍ່ເຊັ່ນ "ເວດມົນ" ໄດ້ຕັ້ງແຕ່ເກີດ... ເມື່ອປະສົມຮ່ວມກັບເທັກໂນໂລຢີຂັ້ນສຸດຍອດຂອງກອງທັບ ທີ່ນຳເອົາ "ພະລັງເວດ" (Megitek) ທີ່ດູດມາຈາກພວກສັດອະສູນ ມາປະສົມລວມກັນໄວ້ກັບພົນທະຫານແລະເຄື່ອງຈັກກົນແລ້ວ... ໂສມໜ້າຂອງກອງທັບ ກໍ່ພິກປ່ຽນຈາກໜ້າມືເປັນຫຼັງມື!!



"ແມ່ມົດສາວ" ຜູ້ເກີດມາພ້ອມພອນສະຫວັນແຫ່ງການເຂັ່ນຂ້າ ແລະຖືກຄວບຄຸມຈິດໃຈໂດຍຈັກກະພັດຢ່າງສົມບູນ

"ກອງທັບນັກຮົບເວດ" (Magitek Knight) ທີ່ສາມາດຮຽກໃຊ້ພະລັງເວດມົນປະດິດ ທີ່ຖືກຝັງ ປະສານຢູ່ພາຍໃນຮ່າງກາຍ

"ເວດຍົນມາໂດອາຣ໌ເມີຣ໌" (Magitek armor) ທີ່ສາມາດສັງເຄາະພະລັງເວດທຳລາຍລ້າງຊົງພະລານຸພາບ ອອກມາແຜດເຜົາສັດຕູເບື້ອງໜ້າໃຫ້ເປັນຜົງ.

ເມື່ອປັດໄຈທັງ໓ ມາຮ່ວມກັບການນຳທັບໂດຍມືຂວາຂອງຈັກກະພັດກັສທຣ່າ... ພໍ່ມົດ ໂຕຕະຫຼົກ ແລະຄາດຕະກອນຜູ້ເລືອດເຢັນ... ຮ່າງທົດລອງທຳອິດ ຜູ້ເສຍສະຕິຈາກການພະຍາຍາມຝັງເວດປະດິດໄວ້ໃນຮ່າງກາຍ ນາມ "ເຄຟກ້າ" ...ເມື່ອນັ້ນ ພະລານຸພາບອັນມາກມາຍເຫຼືອຫຼາຍຂອງຈັກກະພັດກັສທຣ່າ ກໍ່ແຜ່ຂະຫຍາຍໄປທົ່ວທຸກມູມໂລກ ກ້າວຂ້າມຂອບເຂດຂອງຄວາມປານີແລະສາມັນທັງປວງ... ຍ້ອມໂລກທັງໜ່ວຍໃຫ້ເປັນສີແດງແຈດ!!

ສົງຄາມເລືອດໄດ້ແຜ່ອອກໄປຢ່າງຢຸດບໍ່ໄດ້ ນຳພາໄປສູ່ເຫດການແລະຕົວສະແດງອີກມາກມາຍ ທີ່ຕ້ອງກ້າວເຂົ້າມາຢູ່ເທິງເວທີທີ່ເນົ່າເໝັນແລະເສື່ອມໂຊມນີ້... ບໍ່ວ່າຈະເປັນ ກອງກຳລັງໃຕ້ດິນ ທີ່ຮວບຮວມຜູ້ຄົນ ຕໍ່ຕ້ານຈັກກະພັດຢ່າງສຸດຄວາມສາມາດ ນັກລ່າສົມບັດທີ່ອອກເດີນທາງນຳຫາສົມບັດຕ່ອນສຳຄັນເພື່ອນາງອັນເປັນທີ່ຮັກ ກະສັດຜູ້ປ່ຽມຄວາມສາມາດທາງຈັກກົນ ນັກບວດຜູ້ສຳເລັດທັກສະການຕໍ່ສູ້ດ້ວຍມືເປົ່າ ນາຍພົນຍິງຜູ້ທໍລະຍົດຂອງຈັກກະພັດ ຍອດນັກຮົບຜູ້ລອດຊີວິດຄົນສຸດທ້າຍຈາການກວດລ້າງອັນໂຫດຫ້ຽມ ນິນຈາພະເນຈອນລຶກລັບຜູ້ເລືອດເຢັນ ນັກພະນັນຜູ້ຄອບຄອບເຮືອບິນພຽງ໑ດຽວເທິງນ່ານຟ້າ ນັກເວດເຖົ້າຜູ້ສືບທອດສາຍເລືອດລ້ຳຄ່າມາແຕ່ປາງກ່ອນ ຯລຯ.

...ແລະເມື່ອໄດ້ຮັບສິ່ງສຳຄັນ ທີ່ອາດຈະປ່ຽນເກມຮົບທີ່ເສຍປຽບຢູ່ຫຼາຍຂັ້ນ ເຊັ່ນ "ທີນ່າ ແບຣນຟອຣ໌ດ"... ສາວນ້ອຍຜູ້ມີພະລັງອຳນາດທີ່ບໍ່ເຄີຍພົບເຫັນ ຖືກລ້ຽງດູຂຶ້ນມາໃຫ້ເປັນເຄື່ອງຈັກສັງຫານທີ່ໄຮ້ຄວາມຮູ້ສຶກໂດຍຈັກກະພັດຜູ້ໂຫດຮ້າຍ... ຊ້ຳຍັງເປັນກະແຈສຳຄັນ ທີ່ຈະເປີດເສັ້ນທາງສູ້ໂລກອັນເຊື່ອງຊ້ອນຂອງພວກອະສູນ ໃຫ້ເຜົ່າພັນຊົງພະລັງນັ້ນ ອອກມາສູ່ໂລກພາຍນອກໄດ້ອີກຄັ້ງ!! ການໂຈມກັບຄັ້ງສຳຄັນ ກຳລັງຈະເລີ່ມຕົ້ນຂຶ້ນ!!

ການປະທະກັນຢ່າງຮຸນແຮງ ລະຫວ່າງກອງກຳລັງປະຕິວັດ ແລະທະຫານຈັກກະພັດ ດຳເນີນໄປນັບຄັ້ງບໍ່ຖ້ວນ ທັງໄດ້ປຽບ ເສຍປຽບ ປ່ຽນກັນຮ່ວມມື ປ່ຽນກັນຫັກຫຼັງ ແຜນທາງກົງ ແຜນທາງອ້ອມ ແຜນສະອາດ ແຜນເປື້ອນເປິ ຖືກງັດອອກມາໃຊ້ຢ່າງບໍ່ຕ້ອງຄຳນຶງເຖິງປັດໄຈແລະຄວາມຮູ້ສຶກອີກຫຼວງຫຼາຍ... ປານວ່າ ຫາກບໍ່ຕັດໃຈຈາກຄວາມຮູ້ສຶກຜິດຊົ່ວດີພຽງເລັກນ້ອຍ ແລະມາຄາດຫວັງເຖິງອະນາຄົດທີ່ສະຫວ່າງສະໄຫວຕໍ່ໜ້າແລ້ວ... ແມ່ນແຕ່ຮຸ່ງອາລຸນຂອງມື້ອື່ນ ກໍ່ອາດຈະບໍ່ມີເຫຼືອໃຫ້ເຮົາມານັ່ງເຊີຍຊົມອີກຕໍ່ໄປ.



The Great Warring Triad
...ໃນທີ່ສຸດ ຈັກກະພັດກັສທຣ່າ ແລະເຄຟກ້າຄົນສະນິດ ກໍ່ໄດ້ເຂົ້າເຖິງຂຸມພະລັງທີ່ຍິ່ງໃຫຍ່ທີ່ສຸດ ອັນເປັນຕົ້ນກຳເນີດຂອງເວດມົນແລະສັດອະສູນທັງປວງ... ເທວະຫີນທັງ໓ ຢູ່ທາງໜ້າຂອງທັງ໒ຄົນນີ້ເອງ... ຫາກຜູ້ໃດໄດ້ຄອບຄອງແຫ່ງກຳເນີດອຳນາດອັນໄຮ້ຂີດຈຳກັດນີ້ໄວ້ກັບຕົນ... ໂລກ ກໍ່ເກືອບຈະມາຢູ່ໃນກຳມືຂອງຄົນຜູ້ນັ້ນໄປແລ້ວເຄິ່ງໜ່ວຍ!!

ການດີ້ນຮົນເທື່ອສຸດທ້າຍຂອງກອງທັບປະຕິວັດ ນຳໄປສູ່ຜົນລັບທີ່ບໍ່ມີໃຜຄາດຄິດ... ລະຫວ່າງວິນາທີເປັນຕາຍຂອງການປະທະກັນ ເບື້ອງໜ້າເທວະຮູບ... ຈອມເວດຜູ້ມີຈິດພິກົນພິການ ເຄຟກ້າ ຖືກໂສມຕີຈົນເລືອດກະຈາຍ... ເສັ້ນສະຕິອັນເບົາບາງ ທີ່ຄຸມສຳນຶກຜິດຊອບຊົ່ວດີອັນນິດນ້ອຍ ກໍ່ຂາດຜຶ່ງ... ໂຕຕະຫຼົກປ່ວງບ້າ ສູນເສຍການຄວບຄຸມຕົນເອງໂດຍສິ້ນເຊີງ ຫັນເຂົ້າສູ່ເທວະຮູບທັງ໓ ໝາຍຈະເຄື່ອນຍ້າຍຕຳແໜ່ງອັນເປັນສົມດຸນແຫ່ງພະລັງ "ປ່ຽນແປງ" ການຈັດວາງທີ່ດຳລົງໄວ້ເຊິ່ງຄວາມສະຫງົບສຸກຂອງພື້ນພິພົບມານັບພັນປີ... ເພື່ອສ້າງຫາຍະນະໃຫ້ເກີດກັບຜືນໂລກ ແລະຄອບຄອງພະລັງທຳລາຍລ້າງນັ້ນໄວ້ກັບຕົນ.

ເວດມົນໃດໆ ບໍ່ສາມາດສ້າງອັນຕະລາຍໃຫ້ແກ່ເຄຟກ້າໄດ້ອີກຕໍ່ໄປ... ຈັກກະພັດກັສທຣ່າ ຖືກຄົນສະນິດຂອງຕົນສັງຫານຢ່າງຫ້ຽມໂຫດ... ກອງທັບປະຕິວັດ ໜີລອດມາໄດ້ຢ່າງຫອບຫືດ... ເຄຟກ້າເຄື່ອນຍ້າຍຕຳແໜ່ງຂອງເທວະຮູບໄດ້ສຳເລັດ... ທັນໃດ ສົມດຸນແຫ່ງພະລັງກໍ່ປ່ວງບ້າ... ພະລັງອຳນາດອັນມາກມາຍສຸດຢັ່ງເຖິງກໍ່ລົ້ນອອກມາຢ່າງຄວບຄຸມບໍ່ໄດ້ ພະລັງທີ່ເຄີຍທຳລາຍລ້າງໂລກທັງໜ່ວຍໃຫ້ກາຍເປັນດິນແດນທີ່ແຫ້ງແລ້ງແລະໄຮ້ຊີວິດ ຖືກພິກກັບມາອີກຄັ້ງ... ໂດຍການຄວບຄຸມຂອງມະນຸດຜູ້ເສຍສະຕິຄົນນີ້ ແຕ່ພຽງຜູ້ດຽວ...

...ໃນທີ່ສຸດ ໂລກທັງໜ່ວຍ ກໍ່ເປັນອັນຈົບສິ້ນລົງ...



Final Fantasy ໖ - "ບົດແຫ່ງຫ້ວງຄວາມຮັກ" ນັ້ນ ນັບເປັນຊື່ໆ໑ ທີ່ຢູ່ເທິງຈຸດສູງສຸດຂອງເກມພາສາໃນຍຸກນັ້ນຢ່າງໄຮ້ຂໍ້ກັກຂັງ ບໍ່ວ່າຈະແມ່ນ:

ດ້ານພາບ - ເຊິ່ງພິຖີພິຖັນແມ່ນແຕ່ໃນເລື່ອງຂອງການໃສ່ແສງແລະເງົາ ຢ່າງທີ່ບໍ່ເຄີຍໄດ້ເຮັດໃນພາກກ່ອນໆ ຈົນເກີດມາເປັນພາບ໒ມິຕິທີ່ສວຍງາມ ແລະເຕັມໄປດ້ວຍລາຍລະອຽດທີ່ເໜືອຊັ້ນ ສູງສຸດເທົ່າທີ່ຄວາມສາມາດຂອງເຄື່ອງເກມຈະເອື້ອອຳນວຍ... ລະອຽດມາກມາຍ ຈົນອົດງຶດງໍ້ບໍ່ໄດ້ເມື່ອຢ້ອນກັບໄປເບິ່ງພາບຂອງພວກສັດຕູທີ່ແສນຈະອະລັງການັ້ນ.

ດ້ານເພງ - ພາກນີ້ ກໍ່ເຊັ່ນທຸກໆພາກ ທີ່ມີເພງປະກອບທີ່ງົດງາມ ມ່ວນຫູ ແລະຈື່ຈຳຢູ່ມາກມາຍ ທັງຊ້າ ເສົ້າ ຮຸນແຮງ ປະສົມກັນຢ່າງລົງຕົວ ແມ່ນວ່າເວລາະຜ່ານມານັບສິບປີ ແຕ່ເພງຫຼາຍໆເພງ ກໍ່ຍັງຄົງຖືກຢິບຍົກຂຶ້ນມາຟັງ ຂຶ້ນມາຫຼິ້ນ ແລະມາປັບປຸງ ປ່ຽນແປງຫຼາຍຕໍ່ຫຼາຍສະບັບ Main theme / Tina theme / Decisive battle / Aria di Mezzo Carattere ຯລຯ ລ້ວນແລ້ວແຕ່ຢູ່ໃນໃຈຂອງຄົນທີ່ໄດ້ຮັບຟັງ.

ລະບົບເກມ - ພາກນີ້ຈະເນັ້ນການໃຊ້ປະໂຫຍດຈາກ "ກຸ່ມ ສະມາຊິກ" ຫຼາຍ ທີ່ແຕ່ລະຄົນກໍ່ຈະມີຄວາມສາມາດເປັນຕົວເອງທີ່ເດັ່ນ ບໍ່ທັບຊ້ອນກັນເລີຍ ເປັນຂໍ້ດີທີ່ພົບໄດ້ໜ້ອຍລົງຢ່າງໜ້າເສຍດາຍ ໃນພາກລຸນມາ... ແລະການ "ແບ່ງກຸ່ມ" ອອກເປັນ໓ກຸ່ມ ກະຈາຍກັນໄປຕາມຈຸດຕ່າງໆຂອງສາກ ຮ່ວມກັນແກ້ປິດສະໜາ ຮ່ວມກັນຝ່າຟັນໄປຈົນຈົບເສັ້ນທາງ ກໍ່ນັບເປັນຈຸດເດັ່ນທີ່ສຳຄັນ ແລະຖືກນຳມາໃຊ້ຫຼາຍຄັ້ງຕະຫຼອດພາກ ນັບເປັນເອກະລັກສະເພາະຕົວ ທີ່ບໍ່ມີພາກໃດເຮັດໄດ້ອີກ.

ແຕ່ສິ່ງທີ່ຕ້ອງຊື່ນຊົມຫຼາຍທີ່ສຸດຂອງນີ້ ກໍ່ໜີບໍ່ພົ້ນ "ເນື້ອເລື່ອງ" ທີ່ຍິ່ງໃຫຍ່ ລະອຽດອ່ອນ ແລະເຊື່ອມກັນຢ່າງໜ້າປະທັບໃຈ ຈົນເວົ້າໄດ້ວ່າ ໜ້າຈະດີກວ່າພາກຕ່າງໆທີ່ມີມາກ່ອນໜ້າ ແລະບໍ່ຕ່າງຊັ້ນກັບພາກອຶ່ນໆ ທີ່ນຳມາພາຍຫຼັງ.

ນັກຂຽນຫຼາຍຄົນໄດ້ເຫັນພ້ອມກັນວ່າ ເລື່ອງລາວທີ່ຖ່າຍທອດໄດ້ຍາກທີ່ສຸດ ແມ່ນເລື່ອງທີ່ມີ "ຕົວລະຄອນຫຼັກ" ຫຼາຍຄົນ ເພາະຖ້າຫາກຕ້ອງການທີ່ຈະໃສ່ລາຍລະອຽດຂອງເນື້ອເລື່ອງ ແລະເນັ້ນໜັກທີ່ມິຕິຂອງຕົວລະຄອນແລ້ວ... ບັນຫາຕ່າງໆຍ່ອມນຳມາຢ່າງຫຼີກເວັ້ນບໍ່ໄດ້ ທັງການຄຸມທິດທາງຂອງເລື່ອງບໍ່ຢູ່ ທັງການແບ່ງບົດຢ່າງບໍ່ສະໝ່ຳສະເໝີ ທັງການສັບສົນຂອງໂຄງເລື່ອງຈົນຈັບປະເດັນບໍ່ໄດ້ ທັງການຫຼົງລືມປະເດັນຍ່ອຍຕ່າງໆ ຯລຯ.

...ແຕ່ FF VI ໄດ້ພິສູດໃຫ້ເຫັນວ່າ ຄຳກ່າວນັ້ນ ບໍ່ຈຳເປັນຕ້ອງຖືກສະເໝີໄປ ດ້ວຍການນຳສະເໜີເລື່ອງລາວທັງໝົດ ຜ່ານ "ຕົວລະຄອນຫຼັກ" ທີ່ຈຳນວນຫຼາຍທີ່ສຸດໃນເກມ... ໝາຍເຖິງ ໑໔ ຄົນນຳກັນ ແລະເກືອບຈະທຸກຄົນ ຕ່າງກໍ່ມີເລື່ອງຫຼັກ ມີທີ່ມາ-ມີທີ່ໄປ ມີແຮງຂັບດັນ ມີເຫດຜົນ ແລະມີເປົ້າໝາຍເປັນຂອງຕົນເອງ ຢ່າງເດັ່ນຊັດ ສົມເຫດສົມຜົນ ແລະເຂົ້າເຖິງໄດ້ຢ່າງແທ້ຈິງ... ພາຍໃຕ້ຫົວຂໍ້ພຽງຂໍ້ດຽວ ທີ່ເຊື່ອມຕໍ່ທຸກຕົວລະຄອນເຂົ້າຫາແກ່ນຂອງເລື່ອງໄດ້ໂດຍພ້ອມພຽງ... ນັ້ນແມ່ນ "ຄວາມຮັກ".



To Warship and Adore
ຈາກການທີ່ມີຕົວລະຄອນມາກມາຍ ທີ່ຕ່າງກໍ່ເນັ້ນໃຫ້ມີມິຕິຄ້າຍຄວາມຈິງທັນທັງໝົດ ເຮັດໃຫ້ພາກນີ້ມີ "ວັດຖຸດິບ" ເຫຼືອເຟືອ ທີ່ຈະໃຫ້ຢິບຍົກຕົວລະຄອນຕ່າງໆ ທັງຫຼັກແລະຮອງ ມາສ້າງ "ຮູບແບບຄວາມສຳພັນ" ທີ່ບໍ່ຊ້ຳກັນ... ເຖິງແມ່ນວ່າເບິ່ງເຜີນໆແລ້ວ "ແກນຫຼັກ" ຂອງເລື່ອງຈະຍັງໜີບໍ່ພົ້ນເລື່ອງຂອງການ "ກອບກູ້ໂລກ" ເຊິ່ງເປັນເລື່ອງຂອງບັນດາໂຕເອກກຸ່ມ໑ ກັບຄວາມຮູ້ສຶກ "ຢາກຊ່ວຍໂລກ" ມາປະເຊີນໜ້າກັບໂຕຮ້າຍອີກກຸ່ມ໑ ກັບຄວາມຮູ້ສຶກ "ຢາກທຳລາຍໂລກ"... ເປັນແນວຄິດທີ່ເຂົ້າໃຈໄດ້ງ່າຍໆ ບໍ່ສັບຊ້ອນ ແລະຖືກສະເໝີມາ ຕັ້ງແຕ່ພາກທຳອິດ...

ແຕ່ມັນແອບແຝງໄປດ້ວຍລາຍລະອຽດປີກຍ່ອຍທີ່ເລິກ ລະອຽດ ແລະແປກໃໝ່ຢ່າງທີ່ສຸດ...ຈຸດສຳຄັນຂອງການຕໍ່ສູ້ບໍ່ໄດ້ຢູ່ທີ່ "ຜົນລັບ" ພາຍຫຼັງຈາກການມາລວມກຸ່ມເພື່ອຕັດສິນໃຈປົກປ້ອງໂລກເລີຍຈັກໜ້ອຍ ແຕ່ຢູ່ທີ່ "ຈຸດເລີ່ມຕົ້ນ" ກ່ອນໜ້າຂອງແຕ່ລະຕົວລະຄອນ ເຊິ່ງຕ່າງກໍ່ຫຼົງວົນວຽນຢູ່ໃນວັງວົນແຫ່ງຄວາມສຸກ ຄວາມທຸກ ຄວາມປ່ຽນແປງ ແລະຄວາມບໍ່ໝັ້ນຄົງຂອງຄວາມຮັກກັນທັງນັ້ນ.

ເມື່ອເນື້ອເລື່ອງຫຼັກ ທີ່ມີສາກເປັນການເດີນທາງກອບກູ້ໂລກ ດຳເນີນໄປຮອດຈຸດໆ໑... ໂຕເກມຈະຄ່ອຍໆເຜີຍໃຫ້ເຫັນເຖິງ "ຈຸດປະສົງ" ຂອງຕົວລະຄອນແຕ່ລະຕົວອອກມາເທື່ອລະໜ້ອຍ ພຽງພໍທີ່ຈະໃຫ້ຜູ້ຫຼິ້ນໄດ້ຊຶມຊາບ ຄາດເດົາ ແລະຮັບຮູ້ເລື່ອງລາວທັງໝົດ ຕັ້ງແຕ່ເລີ່ມຕົ້ນ ຈົນມາເຖິງບົດສະຫຼຸບຂອງຊີວິດແຕ່ລະຄົນ ໃນຊ່ວງທ້າຍຂອງເກມ.

ເຮົາຈະເຂົ້າໃຈບັນດາຕົວລະຄອນນັ້ນໆຂຶ້ນມາເທື່ອລະໜ້ອຍວ່າ... ທັງເຫດຜົນໃນການຕໍ່ສູ້ ທີ່ມາຂອງອາລົມທີ່ປະກົດ ຕົ້ນເຫດຂອງຄວາມເດັ່ນ ຕະຫຼອດຈົນເຖິງແນວຄິດໃນການຕັດສິນໃຈ ເຊິ່ງເຮົາໄດ້ເຫັນຕັ້ງແຕ່ເກມນັ້ນ ມີ "ຈຸດເລີ່ມຕົ້ນ" ເປັນມາແນວໃດ ມີພັດທະນາການຢ່າງໃດ ກ່ອນທີ່ຈະມາໃຫ້ "ເຮົາ" ເຊິ່ງເປັນຜູ້ຫຼິ້ນ ໄດ້ພົບເຫັນໃນຊ່ວງທຳອິດ... ກ່ອນທີ່ຈະມາໃຫ້ "ເຮົາ" ເຊິ່ງເປັນຜູ້ຫຼິ້ນ ໄດ້ເຫັນຈຸດຈົບໃນຊ່ວງທ້າຍ.

ຜູ້ຂຽນບົດຂອງເລື່ອງ ສະຫຼາດພໍທີ່ຈະບໍ່ປ່ອຍໃຫ້ພາບລວມຂອງເລື່ອງລາວອອກມາໃນເທື່ອດຽວ ແຕ່ຈະຄ່ອຍໆສອດແຊກໄປຕາມບົດສົນທະນາ ບັນທຶກ ພາບອະດີດ ຄວາມຝັນ ແລະເລື່ອງເລົ່າຕ່າງໆ ໃຫ້ຄົນຫຼິ້ນຄ່ອຍໆຢິບຍົກສ່ວນຂອງຄວາມຊົງຈຳ ມາລວມເປັນພາບໃຫຍ່ດ້ວຍຕົນເອງ ກ່ອນທີ່ຈະເປີດເຜີຍເລື່ອງລາວເຕັມໆອອກມາໃນທີ່ສຸດ... ການກຳນົດຈັງຫວະໃນການດຶງອາລົມຂອງຜູ້ຫຼິ້ນໄດ້ຢ່າງເປັນລຳດັບຂັ້ນໂດຍແທ້ຈິງ.



The Last Will to Fight
ເຄຟກ້າ ປະສານພະລັງຂອງເທວະຮູບຫີນທັງ໓ໄວ້ກັບຕົນ ກໍ່ເກີດເປັນຊີວິດອັນຍິ່ງໃຫຍ່ ມີພະລັງອຳນາດທຽບເທົ່າກັບເທບພະເຈົ້າ... ຄອຍປົກຄອງໂລກທັງໜ່ວຍຢູ່ຊັ້ນເທິງສຸດຂອງຫໍຄອຍຍັກ ທີ່ສ້າງຈາກເສດຊາກຂອງວັດທະນະທຳເຄື່ອງຈັກທີ່ເຄີຍຍິ່ງໃຫຍ່... ຜູ້ປົກຄອງຄອຍງວຳດ້ວຍຄວາມຢ້ານກົວ ຜູ້ຕໍ່ຕ້ານທຸກຄົນຈະຖືກສັງຫານໂດຍໄຮ້ປານີ ເມືອງທີ່ເປັນປໍລະປັກ ຈະຖືກລຳແສງພິພາກສາ ທຳລາຍຈົນພິນາດສິ້ນ...

ເຊເລສ ຜູ້ຄອງພະລັງເວດປະດິດ ອະດີດນາຍພົນສາວ ຄົນທໍລະຍົດຂອງຈັກກະພັດ ຮູ້ສຶກຕົວຂຶ້ນມາເທິງເກາະຮ້າງ ຫຼັງຈາກສະຫຼົບໄປໃນວັນທີ່ໂລກລົ້ມສະຫຼາຍເປັນເວລາດົນນານ... ເມື່ອພົບກັບຄວາມໂດດດ່ຽວເທິງໂລກທີ່ແຫ້ງແລ້ງ ເກືອບຈະບໍ່ເຫຼືອສຳຜັດຂອງສິ່ງທີ່ມີຊີວິດອື່ນໃດແລ້ວ... ນາງກໍ່ຄ່ອຍໆຍອມຮັບຂຶ້ນມາເທື່ອລະໜ້ອຍວ່າ ບາງຄັ້ງ ການມີຊີວິດຢູ່ຢ່າງໂດດດ່ຽວ ກໍ່ທຸກທໍລະມານຍິ່ງກວ່າຄວາມຕາຍອັນແສນງຽບສະຫງົບອີກ...

ແຕ່ກ່ອນທີ່ນາງຈະທັນຈົບຊີວິດຂອງຕົນເອງລົງ ເຟືອງເສັ້ນສຸດທ້າຍກໍ່ພັດປະກົດຂຶ້ນຕໍ່ໜ້າ... ຜ້າມັດຫົວຂອງ ລ໊ອຄ ໑ ໃນສະມາຊິກສຳຄັນຂອງກອງທັບປະຕິວັດ... ຊາຍຜູ້ຊ່ວຍໃຫ້ນາງກັບມາເລີ່ມຕົ້ນຊີວິດໃໝ່... ຊາຍຜູ້ເປັນ "ຄົນພິເສດ" ກວ່າອື່ນໃດຂອງນາງ ກໍ່ໄດ້ບັນຈົງລອຍລ່ອງມາເບື້ອງໜ້າຂອງນາງ... ເມື່ອລະນຶກເຖິງຄວາມຮູ້ສຶກເຖິງຄວາມຮູ້ສຶກທີ່ຄຸ້ນເຄີຍ ເຮັດໃຫ້ສາວນ້ອຍຕັດສິນໃຈອີກຄັ້ງວ່າ "ການມີຊີວິດຢູ່" ອາດຈະບໍ່ແມ່ນເລື່ອງຊົ່ວຮ້າຍຢ່າງທີ່ຄິດ... ຫາກວ່າຈັກຄັ້ງໃນຊ່ວງຊີວິດຂອງເຮົາ ໄດ້ຮັບ "ຄວາມອົບອຸ່ນ" ຈາກຄົນອັນເປັນທີ່ຮັກແລ້ວ... ມັນກໍ່ຄຸ້ມຄ່າແລ້ວ ທີ່ຈະດີ້ນຮົນນຳຊ່ວງເວລານັ້ນກັບຄືນມາ...

ການເດີນທາງນຳຫາຄົນທີ່ຫາຍສາບສູນ ການໄລ່ນຳຫາຄວາມໝາຍຂອງການຕໍ່ສູ້ຂອງຕົນເອງ ແລະການປະເຊີນໜ້າກັບສັດຕູທີ່ຢູ່ສູງສຸດຂອງສິ່ງທີ່ມີຊີວິດທັງປວງ... ກຳລັງຈະເລີມຕົ້ນຂຶ້ນ...

...ພາຍໃຕ້ໄຫຼ່ນ້ອຍໆ ຂອງຍິງສາວຮ່າງນ້ອຍພຽງຄົນດຽວ...