ມື້ນຶ່ງ ອາກາດແຈ້ງສະວ່າງດີ

ມີສາມສ່ຽວທີ່ອາໄສຢູ່ບ້ານດຽວກັນ ໄດ້ຊວນກັນອອກໄປຫາກິນເຂົ້າປ່າ

ໂດຍຫ້າງເອົາຂອງກິນຂອງແກ້ມທຸກຊະນິດ ແລ້ວກໍຍັງມີເຫຼົ້າຂາວ ສອງສາມແກ້ວ

ຕິດຕົວໄປນໍາອີກ. ທັງສາມໄດ້ເດີນທາງຜ່ານທົ່ງນາອັນແສນກ້ວາງໄກ ແດດກໍເລີ້ມຮ້ອນຂຶ້ນມາເລື້ອຍໆ

ທັງສາມແນມ ໄປເຫັນຕົ້ນກົກກະບົກ ໃຫ່ຍພໍສົມຄວນມີໃບໜາຮົ່ມໄປທົ່ວ ທັງສາມຈຶ່ງພາກັນໄປປັກຫຼັກ

ຢູ່ກ້ອງຕົ້ນກະບົກເປັນບ່ອນພັກເຊົາ ເມື່ອມາຮອດທັງສາມກໍພາກັນນັ່ງລົງ  ເອົາຜ້າຂາວມ້າອອກມາປູຢ່າງບໍ່ຊັກຊ້າ

ແລ້ວກໍຈົກເຫຼົ້າຂາວຂອງແກ້ມອອກມາຢາຍໄວ້ ຄ່ອຍໆພາກັນກິນແກ້ມໄປແບບບໍ່ສົນກັບເວລາຫັຍງເລີຍ

ທັງສາມພາກັນນັ່ງຊຸມກັນຢູ່ກ້ອງກົກກະບົກ ໝົດມື້ ຈົນຕາເວັນອ່ອນແສງລົງ ຂອງແກ້ມກໍພໍດີໝົດ

ຈິ່ງປຶກສາກັນເຮັດວິທີໃດຊິໄດ້ຂອງແກ້ມມາແກ້ມອີກ. ໃນຂະນະທີ່ທັງສາມກໍາລັງປຶກສາກັນຢູ່ນັ້ນ

ກໍຫຼຽວໄປເຫັນຄວາຍນ້ອຍໂຕນຶ່ງ ກໍາລັງກິນຫ້ຍານໍາແມ່ຂອງມັນຢູ່ ຊຶ່ງບໍ່ໄກຈາກບ່ອນເຂົານັ່ງພໍປານໃດ

ຈິ່ງຊວນກັນໄປລັກກຸມຫັກຄໍຄວາຍນ້ອຍ ຫວັງວ່າຈະເອົາມາເປັນຂອງແກ້ມໃຫ້ໄດ້ ໃນຂະນະທີ່ທັງສາມກໍາລັງ

ພາກັນກຸມວ່າຊິຂ້າຄວາຍນ້ອຍຢູ່ນັ້ນ ກໍມີເຈົ້າຂອງຄວາຍພະໂລ່ອອກຈາກປ່າມາພໍດີ ແລ້ວຮ້ອງໃສ່ວ່າ:

" ເຮ່..!!! ພວກເຈົ້າພາກັນເຮັດຫັຍງ ? ບໍ່ໄດ້ເດີ ຂ້ອຍຕ້ອງໄປຟ້ອງກໍາລວມບ້ານໃຫ້ໄດ້

ພວກເຈົ້າພາກັນມາລັກກຸມຂ້າ ຄວາຍນ້ອຍຂ້ອຍ!! "

ພໍໄດ້ຍິນຊໍ່ານັ້ນທັງສາມກໍຕົກໃຈປ່ອຍຄວາຍນ້ອຍໃຫ້ແລ່ນໄປນໍາກົ້ນແມ່ຂອງມັນ

ຢ່າງລອດຕາຍ.

ຕົກຕອນແລງມາ ຂະນະບ້ານ ກໍສັ່ງໃຫ້ຄົນໄປເອີ້ນທັງສາມມາພົບ ໂດຍມີເຈົ້າຂອງຄວາຍ ແລະຂະນະ

ສາມະຊິກບ້ານຫຼາຍໆຄົນເຂົ້າມາຟັງນໍາ. ຂະນະບ້ານກໍເລີ້ມຖາມທັງສາມໂລດ ວ່າ:

" ດຽວນີ້ມີເຈົ້າຂອງຄວາຍມາຟ້ອງ ວ່າພວກເຈົ້າທັງສາມຄົນພະຍາຍາມຈະກຸມຂ້າຄວາຍນ້ອຍເຂົາເຈົ້າ

ໃນຕອນສວາຍນີ້ ໂດຍເຈົ້າຂອງຄວາຍໄດ້ມາເຫັນກັບຕາ ພວກເຈົ້າຈະວ່າແນງໃດ ?" 

ທັງສາມນັ່ງບໍ່ປາກບໍ່ຕີງ ດົນເຕີບ ນຶ່ງໃນສາມຄົນຈຶ່ງຄ່ອຍເວົ້າຂຶ້ນວ່າ:

" ຄວາມຈິງມັນບໍ່ແມ່ນແນວນັ້ນເດີຂະນ້ອຍ.. ໝູ່ຂະນ້ອຍທັງສອງຄົນນີ້ເຂົາຖຽງກັນ ວ່າຄວາຍມັນມີແຂ້ວ

ຢູ່ເບື້ອງລຸ່ມຫຼືເບື້ອງເທິງ.. ຄົນນຶ່ງວ່າຢູ່ລຸ່ມ ອີກຄົນນຶ່ງວ່າຢູ່ເທິງ  ເພື່ອຄວາມແນ່ໃຈພວກເຮົາທັງສາມຈຶ່ງ

ພາກັນໄປກຸມຕີ່ເບິ່ງແຂ້ວມັນ ກໍພໍດີເຈົ້າຂອງຄວາຍມາເຫັນ ບໍ່ທັນໄດ້ອະທິບາຍຊໍ້າ ຂະນ້ອຍ..!"

ພໍໄດ້ຍິນເທົ່ານີ້ ກໍມີສຽງຂອງຂະນະບ້ານແລະສາມະຊີກທັງຫຼາຍ ສົນລະວົນກັນຂຶ້ນເລື້ອງແຂ້ວຄວາຍ

ບາງຄົນກໍວ່າຢູ່ເທິງບາງຄົນກໍວ່າຢູ່ເບື້ອງລຸ່ມ ຈົນນັນກັນໄປທົ່ວກອງປະຊຸມ ໃນທີ່ສຸດກໍາລວມບ້ານກໍສັ່ງເລີກລາ

ໃຫ້ໄປພິສູດເບີ່ງພໍໃຜພໍມັນ. ຮາໆໆໆໆໆໆໆໆໆໆໆໆໆໆ 

                        (ຈົບ)

* ງາມເດແມ່ຮ້າງນ້ອຍ        ໜ້າປ່ອຍລ່ອຍ ງາມຂໍາ

ຜົມດົກດໍາ ຍິ້ມຫວານ         ເບິ່ງວ່າປານ ນາງຟ້າ

ງາມໝົດ ຮູບຊົງໜ້າ          ຕາຫວານໆ ແກ້ມບ່ອງ

ມາເຫັນແມ່ເນື້ອທອງ         ລູກສອງຄົນນ້ອຍໆ ໃຈຍິ່ງຄ້ອຍ ຄິດສົງສານ...ເດນໍ

*  ງາມດຸດດັ່ງນາງຟ້າ         ມາຈາກ ສວາງສະຫວັນ

ບໍ່ສໍາຄັນ ລູກຕິດ                ຈິດຍັງໝາຍຄຽງຂ້າງ

ເຖິງແມ່ນເຈົ້າເປັນຮ້າງ        ຫົວໃຈນາງ ນັ້ນໃສສ່ອງ

ແມ່ຮ້າງນ້ອຍລູກສອງ          ອ້າຍຂໍຈອງຍຶດໝັ້ນ ຂໍຂານລ້ຽງ ຊ່ອຍນາງ...ແທ້ນາ

*  ເຖິງແມ່ນນ້ອງເປັນຮ້າງ     ເບິ່ງຮູບຮ່າງ ຍັງດີ

ຍັງມີສີສົດໃສ                      ເໝືອນທົ່ວໄປ ສາວນ້ອຍ

ອ້າຍຍັງຄອງຄອຍເຝົ້າ           ຫວັງເຈົ້າມາຄຽງຄູ່

ຂໍມາຊ່ວຍເຊີດຊູ                  ດູແລໃຈໂອບອ້ອມ  ຖະໜອມຕູ້ມ ແບ່ງເບົາ...ວ່ານາ

*   ຄິດສົງສານ ນ້ອງເຈົ້າ        ຖືກຜົວເກົ່າ ໄລໜີ

ບໍ່ມີໃຜເບິ່ງແຍງ                   ທຸກເຊົ້າແລງ ຫຍຸ້ງຍາກ

ລໍາບາກນໍາລູກນ້ອຍ               ສອງຄົນຄອຍ ໄຫ້ແອ່ວ

ທັງອູ້ມ ທັງຈ່ອງແອວ              ຮ້ອງຫາພໍ່ຢູ່ບໍ່ແລ້ວ ຍັງແອ່ວໄຫ້ ຢາກກິນນົມ...ອີຕົນເດ

ມື້ນຶ່ງ ລຸງຈັນຍ່າງໄປຫາໝູ່ ຈຸດປະສົງວ່າຊິໄປຊຸມເຫຼົ້ານໍາໝູ່ຢູ່ຮ້ານກິນດື່ມແຫ່ງນຶ່ງ...

ໃນມືຂອງລາວຫີ້ວເອົາແກັດເຈັ້ຽຂະໜາດສີ່ຫຼ່ຽມ ໃຫ່ຍພໍສົມຄວນໄປນໍາ.

ພໍໄປຮອດ ລາວກໍປ້າຍກົ້ນນັ່ງລົງຢ່າງໄວວາ ແລ້ວເອົາແກັດເຈັ້ຽທີ່ລາວຫີ້ວໄປນໍານັ້ນ ຕັ້ງໄວ້ຂ້າງໆລາວ

ຫຼັງຈາກນັ້ນ ລາວກໍເລີ້ມສັ່ງເອົາເຫຼົ້າມາກິນທັນທີ...ພໍກິນເຫຼົ້າເຂົ້າໄປ ປະມານສອງສາມຈອກ

ລາວກໍຄ່ອຍໆເປີດແກັດມາສ່ອງເບິ່ງຜູ່ດຽວ ແລ້ວກໍງັບໄວ້ 

ລາວສ່ອງເບິ່ງແກັດເລື້ອຍໆ ຫຼັງຈາກລາວຍົກຈອກເຫຼົ້າແຕ່ລະເທື່ອ.

ຈົນໝູ່ອົດສົງໄສບໍ່ໄດ້ ຈຶ່ງຖາມວ່າ:

ໝູ່: " ອ້າວ.. ລຸງຈັນ ! ແມ່ນແກັດອີ່ຫັຍງເຈົ້າ ຄືສ່ອງເບິ່ງຢູ່ບໍ່ເຊົາແທ້ລະ ! ?"

ລຸງຈັນ: " ໂອ... ແກັດຈອນຟອນ "

ໝູ່:" ອອຍ.. ມາກິນເຫຼົ້າເມົາຢານໍາໝູ່ກາເອົາ ຈອນຟອນມາຫຼິ້ນນໍາພຸ້ນຫວາ ລຸງ ! ?"

ລຸງຈັນ:" ບໍ່ແມ່ນຈັ່ງຊັ້ນ ! ຄືວ່າ... ຍາມລຸງກິນເຫຼົ້າແລ້ວ ບາດຍາມລຸງເມົາມາຄັກໆ ລຸງຄິດ

ຂີ້ຢ້ານງູ... ຈິ່ງເອົາຈອນຟອນມານໍາ ເພື່ອປ້ອງກັນຕົວ . !"

ໝູ່:" ປາດດໂທ.. ເຈົ້າກາໂພດເນາະ ! ເຈົ້າຄິດຊື່ໆນາລຸງ!ມັນບໍ່ມີງູດອກ

ຈັກຊິເອົາຈອນຟອນມານໍາໃຫ້ມັນລໍາບາກຫັຍງເດ..!

ລຸງຈັນ:"  ອ້າວ...!ຈອນຟອນຢູ່ໃນແກັດຂອງລຸງນີ້ ກາແມ່ນຈອນຟອນຄິດເອົາເອງຫັ້ນລະ..!!ຮາໆໆ

ຮາໆໆໆໆໆ!!!

-   ເຖິງແມ່ນມີນາງຟ້າ      ມາຈາກສວາງສະຫັວນ

ອ້າຍກໍບໍ່ ໄຝ່ຝັນ               ໝັ້ນດຽວ ພຽງເຈົ້າ

ໝື່ນເທວີ ມາເຝົ້າ             ບໍ່ປານເງົາ ເຈົ້າມາເຫຼື່ອມ

ເຈົ້ານັ້ນປຽບສະເໝືອນ      ເດືອນເພັງໃສສ່ອງແຈ້ງ ແຍງໃຫ້ຮຸ່ງໃຈ...ແທ້ນາ

-   ທຸ້ມເທໃຈ ໃຫ້ເຈົ້າ         ຫຼາຍເທົ່າ ຊີວາ

ທົ່ວພາກພື້ນໂລກາ            ຫາໃສປຸນ ປຽບໄດ້

ຮັກໝົດໃຈ ເທົ່າຟ້າ           ພູຜາຊັນ ບໍ່ໜັກທໍ່

ທຽບຟ້າໃສ່ ຍັງບໍ່ພໍ            ດິນຕໍ່ໜັກໝື່ນລ້ານ ສະມຸດກ້ວາງ ກໍ່ບໍ່ປານ...ດອກນາ

-   ຮັກພຽງນາງ ເທົ່ານັ້ນ     ບໍ່ເຄີຍຄິດ ມີລອງ

ບໍ່ປ່ຽນໃຈເປັນສອງ            ໃຫ້ນາງໝອງ ມົວເສົ້າ

ຮັກນຶ່ງດຽວ ພຽງເຈົ້າ          ບໍ່ມີວັນ ແໜງໜ່າຍ

ຮັກເຈົ້າ ສຸດຫົວໃຈ             ເລື້ອຍໄປຊົ່ວດິນຟ້າ ໝູນປິ້ນ ສິ້ນສະລາຍ...ແທ້ນາ

-   ນ້ອງຄົນດີ ຂອງອ້າຍ      ໃຫ້ນອ້ງເຊື່ອໃຈວາງ

ທາງສີ່ຫ້ອງຫົວໃຈ              ອ້າຍນີ້ມີ ພຽງນ້ອງ

ຫົວໃຈອ້າຍທຸກຫ້ອງ           ມີນ້ອງເຕັມ ລົ້ນອັ່ງ

ໃຈດວງນີ້ ເພື່ອນາງ            ວາງຮັກດຽວ ໃຫ້ແກ່ນ້ອງ ຜອງເທົ້າຊົ່ວຊີວັງ...ແທ້ນາ

ເຫັນນາງໄຫ້ ສະອື້ນ            ຢືນຢູ່ ປາຍຊານ

ນໍ້າຕາອາບສອງປາງ          ທ່າທາງ ເຄືອງແຄ້ນ

ແຟນເຂົາໜີປະເຈົ້າ           ໄປມົວເມົາ ຄົນໃໝ່

ປ່ອຍໃຫ້ເຈົ້າເສັຽໃຈ             ຢູ່ຄົນດຽວຮ້ອງໄຫ້    ແລງເຊົ້າ ໝົ່ນໝອງ...ແທ້ນໍ

ນໍ້າຕານອງໃບໜ້າ              ເໝືອນຟ້າຜ່າ ໃຈຊາຍ...ແທ້ເດ

ເຮືອນຢູ່ໃກ້ ຄຽງກັນ            ມັນສະເທືອນ ຮອດອ້າຍ

ຍິນສຽງນາງຮ້ອງໄຫ້             ຫົວໃຈຊາຍ ກໍໝອງໝົ່ນ

ຄິດສົງສານໜ້າມົນ             ເສັຽໃຈຈົນໄຫ້ຮ້ອງ ໝອງເສົ້າ ບໍ່ຊວ່າງເຊົາ...ແທ້ນໍ

ທຸກເຊົ້າ ຍິນສຽງເອີ້ນ           ຍີ້ມໃສ່ ແກມຫົວ

ມື້ນີ້ ໜ້າໝອງມົວ              ທ່າທາງ ຕຶງຄຽດ

ໃຜບັງບຽດໃຈນ້ອງ              ລອງໄຂມາ ໃຫ້ຮູ້ແດ່

ລອງຫັນໜ້າ ມາແລ            ຄົນຜູ່ຢູ່ໃກ້ໆ ພໍໃຫ້ຮູ້ ຮ່ວມນໍາ...ແດ່ດູ

ຫາກນ້ອງ ເຈັບປວດຊໍ້າ         ອ້າຍຈະຮັບ ຮອງປົວ

ຂໍລ້າງ ຄວາມໝອງມົວ         ໃຫ້ສົດໃສ ຂາວແຈ້ງ

ເອົາແຮງໃຈ ສວ່າຍລ້າງ         ຮອຍມົນທິນ ພ້ອຍດ່າງ

ເປັນຢາຮົມໃຈນາງ               ບໍ່ປ່ອຍປະ ລະຮ້າງ ບໍ່ວາງນ້ອງ ໃຫ້ໝົ່ນສີ...ດອກນາ

   ນັ່ງແຄມຂອງ ມອງຟ້າ        ເດືອນເປັ່ງ ປະກາຍໃສ

   ສ່ອງແສງອາບທາໄປ            ສາຍນະທີ ໄກກ້ວາງ

   ດວງດາວຍິບຫັຍບອ້ອມ       ລ້ອມພຣະຈັນ ງາມຍິ່ງ

   ສ່ວນຕົວເຮົາຂາດຍິງ           ທີ່ເຄີຍອີງເອື່ອຍເທີ້ງ ເບິ່ງເດືອນແຈ້ງຄູ່ກັນ...ຫັ້ນນາ

  ຍັງຈົດຈໍາ ຄືນນັ້ນ                ຄືນເຮົາເອີ່ຍ ສັນຍາ

  ເອົາດວງເດືອນ ດາຣາ           ເປັນພະຍານ ໃຫ້ໄວ້

  ອະທິດຖານ ວອນໄຫ້ວ          ສາຍທາຣາ ໄຫຼລ່ອງ

  ສາບານຕໍ່ແມ່ຂອງ              ໃຫ້ສົມປອງຊົ່ວຟ້າ ຢ່າມີມື້ເຊື່ອມຄາຍ...ຫັ້ນເດ

   ແຫງນເບິ່ງເມຄາຍ້າຍ        ໄຫຼຜ່ານດວງເດືອນ

   ເໝືອນຮັກເຮົາເລື່ອນໄປ     ບໍ່ຜ່ານກາຍມາໃກ້

   ຄໍາສັນຍາທີ່ໃຫ້                 ກໍໄຫຼເລີຍ ລອຍລ່ອງ

   ຫາຍໄປກັບສາຍຂອງ         ຖືກເຄື່ອນຟອງຟາດຟົ້ງ ສັນຍາແຕກ ມຸ່ນທະລາຍ..ແທ້ນໍ

  ຄືນນີ້ ເດືອນຫງາຍແຈ້ງ      ແສງສ່ອງໂລກາ

   ເຮືອງຮຸ່ງ ບົນນະພາ           ໝື່ນດວງ ດາວລ້ອມ

   ບາດວ່າອ້ອມແຂນອ້າຍ      ບໍ່ມີອາຍ ເນື້ອອຸ່ນ

   ນັ່ງຢູ່ເທິງໂງ່ນຫີນ             ປິ່ນໜ້າແນມຂຶ້ນຟ້າ ນໍ້າຕາຍ້ອຍເບິ່ງເດືອນ...ແທ້ນາ

ທຸກຊີວິດໃນໂລກ              ລ້ວນປ່ຽນ ແປຜັນ

ປ່ຽນເດືອນປີ ຄືນວັນ          ອຸ່ນໜາວ ເຢັນຮ້ອນ

ມີບ່ອນດີ ບ່ອນຮ້າຍ            ທັງເກີດຕາຍ ເຈັບແກ່

ທຸກຊີວິດປ່ຽນແປ               ບໍ່ມີຫັຍງທ່ຽງແທ້ ດັບສິ້ນທຸກສິ່ງອັນ...ທ່ານເອີຍ

   ກົງກວຽນ ເວລານັ້ນ          ກໍໝູນປ່ຽນ ວຽນວົນ

   ຄ້າຍຊີວິດ ຂອງຄົນ           ໝູນໄປ ບໍ່ຢຸດຍັ້ງ

   ດັ່ງນໍ້າໄຫຼ ບໍ່ຖ້າ                  ປູປາກຸ້ງໃຫ່ຍ

   ສາຍນໍ້າໄຫຼລ່ວງໄປ              ຕັ້ງແຕ່ເໜືອລ່ອງໃຕ້ ບໍ່ໂງໂຄ້ງຕ່າວຄືນ...ດອກນາ

ຄວາມຮັກ ຫວານຊາບຊຶ້ງ         ວັນນຶ່ງ ກໍກັບຂົມ

ຊໍ້າລະທົມດວງໃຈ                   ເໝືອນໄຟ ເຜົາໄໝ້

ວັນນີ້ຮັກກັນໄດ້                      ວັນຕໍ່ໄປ ເປັນແນວອື່ນ

ເຫຼືອພຽງຄວາມຂົມຂື່ນ            ຝືນທົນເຈັບປວດລ້າວ ຕ້ອງນອນໄຫ້ຮໍ່າດາຍ...ແທ້ນາ

   ອີກນຶ່ງ ດວງດອກໄມ້             ອ້າກີບ ເຮືອງສີ

   ມາລີບານຊົ່ວຄາວ                  ກໍຫຼົ່ນລອຍ ລົງພື້ນ

   ວັນຄືນກາຍ ຜ່ານພົ້ນ             ຝົນໂຮຍຮໍາ ດອກຫຼົ່ນ

   ປຽບຊີວິດຂອງຄົນ                  ເກີດຢູ່ບົນໂລກນີ້ ບໍ່ມີຈັ້ງ ທ່ຽງຈີຣັງ...ແທ້ນາ.

ເຄີຍຜິດຫັວງ       ມາຫຼາຍຄັ້ງ         ຍັງບໍ່ຫາຍ

ກັບຊໍ້າໃຈ              ອີກເທື່ອໃໝ່       ໃນພັນລາວ

ຄົງບໍ່ມີ                  ຍິງຄົນໃດ            ສົງສານເຮົາ

ສາວພັນລາວ         ຊ່າງໃຈດໍາ           ປານຖ່ານໄຟ

   ຄັນບໍ່ຮັກ             ຈັກມາຫຼອກ       ກັນເຮັດຫັຍງ...?

   ໃຫ້ຄວາມຫັວງ     ແລ້ວກໍພັງ          ໃຫ້ຊໍ້າໃຈ

   ບໍ່ໜ້າເຊື່ອ           ຄົນງາມໆ            ໃຈໂຫດຮ້າຍ

   ຫຼອກໃຫ້ຕາຍ       ໃຈໄປນໍາ              ຄໍາເວົ້າຫວານ

ນີ້ລະນໍ...                   ຄໍາບູຮານ            ຂານກ່າວໄວ້

ມົດແດງຊາຍ           ມາຕາຍນໍາ          ນໍ້າອ້ອຍຫວານ

ສາວພັນລາວ            ທໍາຮັກເຮົາ          ຂາດສະບັ້ນ

ອົມນໍ້າຕານ              ຫວານເຕັມປາກ  ມາຝາກຮັກ

     ຕ້ອງຜິດຫັວງ      ເໝືອນດັ່ງເຄີຍ     ເລີຍລ່ວງຕິດ

     ຟ້າລິຂິດ               ຜິດຕາມເຄີຍ       ຮັກ...ເອີຍ....ຮັກ....!

      ຮັກຍິງໃດ            ຢູ່ແຫ່ງໃດ             ກໍອົກຫັກ

      ຄໍາວ່າຮັກ             ຈາກໃຈຍິງ            ຄົງບໍ່ມີ

ມີມື້ນຶ່ງ ນາຍທະຫານໄດ້ສັ່ງໃຫ້ທະຫານສອງຄົນ ໄປນອນສະກັດສັດຕູຢູ່ແຄມຫ້ວຍແຫ່ງນຶ່ງ

ໂດຍແຍກທາງກັນໄປນອນ ຢູ່ຄົນລະຟາກຫ້ວຍ .

ພໍຕົກທ່ຽງຄືນ ທະຫານຄົນທີ່ນຶ່ງໂທສາຍມາຫາໝູ່ຜູ່ນອນຢູ່ຟາກກົງກັນຂ້າມວ່າ:

ທະຫານນຶ່ງ:" ເຮີຍ! ປ່ຽນບ່ອນນອນກັນເທາະ?ໃຫ້ກູໄປນອນຢູ່ຟາກມຶງ ແລ້ວໃຫ້ມຶງມານອນຢູ່ຟາກກູພີ້ !"

ທະຫານສອງ:"ອ້າວ...ນອນຢູ່ຟາກນັ້ນມັນເປັນຫັຍງລະ?"

 ທະຫານນຶ່ງ:" ອອຍ.. ຟາກກູນອນມີຕາຍແຕ່ຂີ້ເຂັບ ແມງງອດ ບັກຫຼາຍໆ

ກູແຮງເປັນຄົນຂີ້ຢ້ານ ປ່ຽນບ່ອນກັນເທາະ?ບ່ອນມຶງບໍ່ມີຫວາ ?"

ທະຫານສອງ:"ບໍ່ຕ້ອງປ່ຽນດອກ.. ບ່ອນກູກາມີຄືກັນ ແຕ່ວ່າງູູກິນໝົດແລ້ວ ດຽວນີ້ມີງູເຫົ່ານັບເປັນຮ້ອຍໆໂຕ

ກໍາລັງຂ້າມນໍ້າມຸ້ງໜ້າໄປຊອກກິນຂີ້ເຂັບແລະແມງງອດຢູ່ຟາກມຶງພຸ້ນລະ! 

ຈັກໜ່ອຍກາຮອດຟາກນັ້ນແລ້ວ ໃຈເຢັນໆ!"

ຮາໆໆໆໆໆໆໆໆໆ 

     ເຮົາພົບກັນ       ບໍ່່ນານວັນ   ແລ້ວກໍຈາກ

     ຈໍາໃຈພາກ       ຈາກກັນໄປ  ໄກຄົນກໍ້າ

     ຮັກແສນຫວານ  ກັບມາເສົ້າ  ເຝົ້າຣະກໍາ

     ຕ້ອງເຈັບຊໍ້າ      ນໍາຄວາມຮັກ ທີ່ເຮົາສ້າງ

ຮັກເຄິ່ງທາງ       ໄດ້ຄຽງຂ້າງ   ພຽງຊົ່ວຄາວ

ສຸດປວດຣ້າວ      ເມື່ອຮັກເຮົາ ເຝົ້າໄກຫ່າງ

ນີ້ລະນໍ...           ຮັກທີ່ພໍ້       ກັນເຄິ່ງທາງ

ແລ້ວກໍຮ້າງ        ຫ່າງກັນໄປ    ໃຫ້ໂສກສັນ

     ເຮົາທັງສອງ   ຕ່າງກໍຮູ້       ຢູ່ແກ່ໃຈ

     ວ່າຮັກໄປ      ໃຈຄົງຕຣົມ   ຂົມຈາບັນ

     ຮັກເກີດມາ    ນໍາຟ້າດິນ     ຫຼືອິນປັ້ນ

     ຮ່ວມຮັກກັນ   ແລ້ວກໍບັ່ນ   ຫັ່ນເປັນຕອນ

ບໍ່ນຶກຝັນ      ຊື່ນສຸກສັນ       ແລ້ວຕ້ອງຈາກ

ເຫຼືອພຽງຊາກ  ຮັກເລື່ອນລອຍ  ຄອຍຫຼອກຫຼອນ

ສຸດຣະທົມ       ຂົມອຸຣາ          ໃຈສະທ້ອນ

ຮັກຈາກຈອນ   ຄົງບໍ່ຢ້ອນ         ກັບຄືນມາ

ອາຣຸນໃສສ່ອງແຈ້ງ                 ແສງສ່ອງ ງາມຕາ

ລົມເຢັນໂຊຍພັດມາ                 ຊື່ນອຸຣາ ຍາມເຊົ້າ

ນົກເຂົາຂັນ ສຽງເອີ້ນ                ງອຍຄອນຮຽກຄູ່

ແຄມສາຍທານ ເຊົ້າຕຣູ່             ເຜິ້ງຜູ່ບິນເວີ່ນອ້ອມ ຕອມດອກເບັ່ງບານ

   ດອກຂາວເຫຼືອງ ເຮືອງກ້ານ       ແດງມ່ວງ ສີຊົມພູ

  ໝູ່ກະເບື້ອບິນຕອມ                ດອກຫອມ ແດງຊໍ້າ

  ຫຼຽວລົງໄປລໍານໍ້າ                     ໝູ່ມັດສາ ລອຍລ່ອງ

  ປາຂຶ້ນບ້ອນເປັນຟອງ              ເຟືອນເຕັມສອງຝັ່ງນໍ້າ ງາມເລີດ ດັ່ງວິມານ.....ແທ້ນາ

ຕີນຜາປ່າດົງໄມ້                        ຈັກຈັ່ນ ເນືອງນອງ

ດັງກ້ອງພົງພະນາ                       ສະກູນາ ວອນເວົ້າ

ສາລິກາ ຄອຍເຝົ້າ                       ນົກກາເວົາ ຮ້ອງມ່ວນ

ສຽງຊະນີຄໍ່າຄວນ                        ເຮຮວນ ຮຽກຮໍ່າຊູ້ ດັງກ້ອງກູ່ໄກ...ແທ້ນາ

   ເຕັນຊິວ ງອຍງ່າໄມ້                    ຊອມຈອບກິນປາ

  ກວາງຟານ ແລ່ນໄປມາ               ກະຕ່າຍຕໍາ ໂຕນເຕັ້ນ

  ສິງເສືອ ເຍືອງໝູເໝັ້ນ               ເຕັ້ນຄະໂຍງ ຕາມປ່າ

  ໄກ່ປ່າ ມ່າຍຫາກັນ                      ບາງຜ່ອງຂັນກະຕາກຮ້ອງ ດັງກ້ອງທົ່ວດົງ....ແທ້ນາ

ຫຼວງພຣະບາງ ມີຊື່ຕັ້ງ           ເມືອງແຫ່ງ ມະຫັດສະຈັນ

ສອງຟາກຝັ່ງ ຂອງຄານ        ເໝືອນວິມານ ບົນຟ້າ

ວັດວາ ອາຮາມຕັ້ງ                ຢາດກັນ ເດັຽຣະດາດ

ຜາສາດ ວັງແວດລ້ອມ           ຈໍາປາອ້ອມ ທົ່ວນະຄອນ....ແທ້ນາ

     ອອນຊອນ ພູໃຫ່ຍນ້ອຍ     ອ້ອມຮອບ ວຽງວັງ

     ພູສີຕັ້ງ ໃຈກາງ                ຮຸ່ງເຮືອງ ເຫຼືອເວົ້າ

     ມີພຣະບາງ ເປັນເຄົ້າ          ວັດຊຽງທອງ ງາມເດັ່ນ

     ເປັນບ່ອນນົບກາບໄຫ້ວ        ຫຼາຍຮ້ອຍ ກວ່າເຊັ່ນຄົນ....ແລ້ວນາ

ຫຼຽວໄປຟາກຝັ່ງນັ້ນ                 ກົງກັນຂ້າມ ຫຼວງພຣະບາງ

ມີພູທ້າວພູນາງ                       ເປັນນິທານ ກ່າວໄວ້

ຫາກຜູ່ໃດ ເຄີຍໄດ້                    ໄປຊົມ ຖານຖິ່ນ

ຄົງໄດ້ຍິນເພິ່ນເວົ້າ                   ນິທານເຄົ້າ ສືບມາ..ຫັ້ນແລ້ວ

  ປູ່ເຍີ ຍ່າເຍີນັ້ນ                    ກໍເປັນນຶ່ງ ໃນຕໍານານ

  ເປັນເຣື່ອງຣາວ ກ່າວຂານ       ນານປີ ຫຼາຍຮ້ອຍ

  ທັງເຖົ້າແກ່ໃຫ່ຍນ້ອຍ            ຖືຮີດຄອງ ເປັນໃຫ່ຍ

  ວັດທະນະທໍາ ເຫຼື້ອມໃສ           ໃຫ້ຊາວເມືອງໄດ້ເຕົ້າ ໂຮມກັນເຂົ້າ ເປັນນຶ່ງດຽວ....ແທ້ນາ

ໝາຍເຫດ:( ພູທ້າວພູນາງ ເປັນນິທານເຣື່ອງ ທ້າວພຸດທະເສນ

              ທີ່ມີເມັຽເປັນຍັກ ນາງກັງຮີ ເປັນນິທານເຣື່ອງ

              ຄວາມຮັກທີ່ແສນໂສກ ຣະວ່າງຍັກ ກັບມະນຸດ)

ເຫິງນານບໍ່ໄດ້ຈວບ            ຫຼາຍຂວບ ເດືອນປີ

ບຸນມີຈຶ່ງໄດ້ພານ                ພົບກັນອີກຄັ້ງ 

ມາເຫັນນາງຄາວນີ້             ໂສພີ ຂຶ້ນຫຼາຍເທົ່າ

ຕັ້ງແຕ່ເມື່ອຍັງເຍົາ             ໝູ່ເຮົາເຄີຍແລ່ນຫຼິ້ນ  ກາງບ້ານຢອກກັນ...ຫັ້ນເດ

   ແກ້ມຂີ້ມູກ ເປື້ອນນັ້ນ       ຜັນປ່ຽນເປັນແດງ

   ໂອນ້ອງຫຼ້າຄໍາແພງ           ອ້າຍຫຼົງແຍງຈົນເພີ້

   ງາມຈົນຕົກສະເງີ້              ປ່ຽນແປງເປັນຄົນໃໝ່

   ໜ້າຕາຂາວສົດໃສ            ງາມວິໄລເລີດລໍ້າ  ງາມແທ້ກວ່າຫຼັງ....ແທ້ນໍ

ຍັງຈົດຈໍາ ຕອນນັ້ນ             ຄາວເຮົາຫຼິ້ນ ເຕັ້ນຢາງ

ຫຼິ້ນໝາກງູກິນຫາງ               ຫຼິ້ນມືກາງ ລອດບ້ວງ

ດວງສະໝອນ ຄາວນີ້             ງາມສົດສີ  ຂຶ້ນໃຫ່ຍ

ກັບມາເຫັນ ຕິດໃຈ                 ໜ້າສົດໃສ ຍິ້ມແຍ້ມ  ແນມເຈົ້າບໍ່ພັບຕາ...ຫັ້ນແລ້ວ

   ຄິດເຫັນເດ ນ້ອງຫຼ້າ             ຄາວເມື່ອ ເຍົາໄວ

   ຄັ້ງເມື່ອສອງເຮົາໄປ             ຫຼິ້ນແຕ່ງງານ ຢູ່ເຮືອນນ້ອຍ

    ຄິດມາ ພາໃຈຄ້ອຍ              ຢາກຫຼິ້ນຄືນ ອີກໃໝ່

    ຫຼິ້ນແຕ່ງງານຕອນໃຫ່ຍ         ຄົງສຸກໃຈເລີດລໍ້າ ເໝືອນຂຶ້ນສູ່ສະຫວັນ...ພຸ້ນແລ້ວ

ງາມເໝືອນດັ່ງນາງຟ້າ             ທິດາແຫ່ງ ສວາງສະຫວັນ

ງາມເໝືອນຈັນວັນເພງ            ພຸ່ງແສງໃສແຈ້ງ

ຍິ່່ງແຍງ ຍິ່່ງງາມເຫຼື້ອມ              ເໝືອນພອຍ ເພັດນໍ້ານຶ່່ງ

ງາມຈົນຕົກຕະລຶງ                   ງາມບາດຕາຊາບຊຶ້້ງ ເໝືອນອິນປັ້ນສົ່່ງມາ...ແທ້ນໍ

   ແວວຕາຫວານຊາບຊຶ້້ງ           ເໝືອນນຶ່່ງ ດວງດາວ

   ແວວວາວ ແສງສົດໃສ           ສ່ອງປະກາຍເທິງຟ້າ

   ງາມນຶ່່ງໃນ ໃຕ້ຫຼ້າ                 ປັດຕະພີ ພື້ນແຜ່ນ

    ເໝືອນມາຈາກເມືອງແຖນ    ແຫ່ງເມືອງແມນຟາກຟ້າ ລົງມາເກີດຮ່ວມຄົນ...ແທ້ນາ

ງາມຈັບໃຈເຫຼືອລົ້ນ                  ຈົນຈິດອ່ອນ ໃຈຫາຍ

ຍິ້້ມລະໄມຊວນຊົມ                   ຜົມດົກດໍາ ງາມເຫຼື້ອມ

ສຸດໄຝ່ຝັນປອງເອື້ອມ                ດອກຟ້າບານ ເທິງງ່າ

ໄດ້ໂປຣດໂນ້ມລົງມາ                  ໃຫ້ຂ້າຊົມກິ່ນເຈົ້າ ພໍຫາຍເສົ້າ ຊວ່າງໃຈ...ແດ່ນາ

  ຫາກແມ່ນໄດ້ດອກຟ້າ              ມາຊື່່ນ ເຊີຍຊົມ

   ສົມດັ່ງຈິດໝັ້ນໝາຍ              ບໍ່່ຂໍໄກລາຮ້າງ

   ຈະບູຊາເທິງຫ້າງ                    ບໍ່່ຫ່າງລາ ຫອມກິ່ນ

   ບໍ່່ໃຫ້ຕົກໃສ່ດິນ                      ບໍ່່ໃຫ້ກິ່ນເກືອກກົ້ວ ຈາງຈືດ ຮ່ວງເຫີຍ...ແທ້ນາ

ນ້ອງນັ້ນເປັນລູກຫຼ້າ          ພໍ່ສຸດຮັກ ແມ່ແພງ

ເບິ່ງແຍງ ຈັບຕາຕິດ         ຢູ່ຊິດ ຕິດໃກ້

ບໍ່່ໃຫ້ຊາຍມາຕົ້ມ              ໃຊ້ຄາລົມ ມາອ່ອຍ

ເປັນລູກສາວຫຼ້ານ້ອຍ         ແມ່ຄອຍລ້ຽງ ພໍ່ຖະໜອມ....ແທ້ນາ

  ຢາກໄດ້ຫັຍງ ແມ່ຫາພ້ອມ  ຖະໜອມດັ່ງດວງຕາ

  ໄປມາແຫ່ງຫົນໃດ             ແມ່ບໍ່ໄລລາຂ້າງ

  ຫັວງໃຫ້ມາສືບສ້າງ            ມູນມັງແທນພໍ່ແມ່

  ຍາມເມື່ອເພິ່ນແກ່ເຖົ້າ        ມອບມູນເຄົ້າ ໃຫ້ເບິ່ງແຍງ...ຫັ້ນນາ

ແມ່ແພງ ພໍ່ກໍຫ້າມ              ສຸດທີ່ຫຶງຫວງ

ຢ້ານແຕ່ຊາຍມາລວງ            ຫຼອກກິນ ແກງຕົ້ມ

ຢ້ານເຂົາຊົມຊີມແລ້ວ            ແສ້ວໜີ ໄປທາງອຶ່ນ

ປ່ອຍໃຫ້ໂຕສະອື້ນ                 ນອນໄຫ້ຮໍ່າດາຍ....ວ່ານາ

  ເຮັດແນວໃດ ຊິໄດ້               ລູກຫຼ້າເພິ່ນມາຄອງ

  ເງິນທອງເຂົ້າຂອງອຶດ           ຂາດເຂີນ ມີໜ້ອຍ

  ເງິນກໍມີດ້າມຮ້ອຍ               ໝູນ້ອຍ ມີໂຕນຶ່ງ

  ເງິນຄ່າດອງບໍ່ເຖິງ                ມີເຄິ່ງດຽວ ມອບໃຫ້ ໄດ້ກັນແລ້ວ ຊິຈ່າຍຄືນ...ພໍ່່ແມ່ເອີຍ.

ຕັດໃຈ ເສັຽເຖີດນ້ອງ              ຢ່າຮ້ອງໄຫ້ດຽວດາຍ

ນໍ້າຕາໄຫຼລ່ວງໄປ                   ບໍ່ໄດ້ຫຍັງດອກນ້ອງ

ຢ່າມົວໝອງ ຮ້ອງໄຫ້              ເສັຽເວລາ ດາຍເປົ່າ

ຫັນມາຍີ້ມເຖີດເຈົ້າ                ຢ່າໝອງເສົ້າໝົ່ນສີ

   ຢ່າໂສກີ ເຖີດນ້ອງ               ເຂົາມອງໝິ່ນ ນິນທາ

   ເຊັດນໍ້າຕາໃຫ້ຫາຍ              ເລີ້ມຕົ້ນໃໝ່ອີກຄັ້ງ

   ຫົວໃຈຊາຍຍັງຫວ້າງ             ສໍາຫຼັບນາງນ້ອງຢູ່

   ຂໍໃຫ້ນ້ອງຍອດຊູ້                  ຝືນສູ້ ຍິ້ມຕໍ່ໄປ....ນ້ອງເອີຍ

ຖືວ່າເປັນຝັນຮ້າຍ                   ທີ່ກາຍຜ່ານ ເລີຍມາ

ເມື່ອເຮົາຕື່ນມືນຕາ                  ຄ່ອຍເລື່ອນລາ ຄົນກໍ້າ

ເປັນບົດຮຽນ ບົດຊໍ້າ                 ເປັນບົດນໍາ ທີ່ລໍ້າຄ່າ

ຊົ່ວຊາດນີ້ ແລະຊາດໜ້າ             ຢ່າພານພໍ້ ຜ່ານກາຍ

   ຫັກຫ້າມໃຈ ເຖີດນ້ອງ            ຢ່າໝອງໝົ່ນ ກາຍຍາ

   ຂໍເອົາໃຈເປັນຢາ                    ລ້າງມົນທິນໃຫ້ນ້ອງ

   ປົວຫົວໃຈທຸກຫ້ອງ                 ທີ່ເປັນໜອງ ໃນເປື່ອຍ

   ໃຫ້ນ້ອງໄດ້ເຊົາເມື່ອຍ               ແຜເປື່ອຍຄົງຮ່ຽວແຫ້ງ ຫາຍຊໍ້າ ຊົ່ວນິຣັນ...ແທ້ນາ

ຕັດຮັກ ໃຫ້ເຫຼືອບັ້ນ        ສຳພັນມິຕ ໄມຕຣີ

ຕັດຮັກ ບໍ່ໃຍດີ             ສ່ວນໄມຕຣີ ໃຫ້ມີໄວ້

ຢ່າໄດ້ຕັດໝົດສ້ຽງ         ໃຫ້ຕັດພຽງ ຮັກເກົ່າ

ສ່ວນວ່າມິຕຂອງເຮົາ       ຢ່າໄດ້ຕັດປ່ອຍຖິ້ມ ໃຫ້ມີໄວ້ດັ່ງເດີມ...ແທ້ນາ

   ເລີ້ມເປັນມິຕ ອີກຄັ້ງ    ເໝືອນດັ່ງ ເຄີຍມີມາ

   ຮັກເຮົາ ໄຮ້ດຽງສາ       ເກີດຂຶ້ນມາ ຈຶ່ງຮາມຮ້າງ

   ເຮົາບໍ່ຮູ້ຈັກສ້າງ          ຮັກຈີຣັງ ໃຫ້ໝັ້ນທ່ຽງ

   ຮັກເຮົາຈຶ່ງລໍາອຽງ        ງ່ຽງໄປຂວາແລະຊ້າຍ ຍາວສັ້ນບໍ່ທໍ່ກັນ...ນັ້ນແລ້ວ

ຕັດຮັກ ມິຕຍັງໝັ້ນ        ຢ່າຜັນປ່ຽນ ແປງໄປ

ໃຈສອງເຮົາຜູກພັນ         ຕໍ່ກັນຢ່າແປປີ້ນ

ຮັກໝົດ ມິຕບໍ່ສິ້ນ          ຟ້າດີນ ບໍ່ແໜງໜ່າຍ

ເປັນມິຕກັນເລື້ອຍໄປ        ຜິດຖືກ ດີຊົ່ວຮ້າຍ ອາໄພໃຫ້ ແກ່ກັນ...ແທ້ນາ

   ບາງທີ ວັນນຶ່ງນັ້ນ         ຟ້າຜັນປ່ຽນ ແປງໄປ

   ດົນໃຈໃຫ້ເຮົາສອງ        ຄອງຮັກຄືນ ອີກຄັ້ງ

   ມິຕໄມຕຣີ ເຮົາສ້າງ       ສາຍສຳພັນ ບໍ່ແຫ້ງຮ່ຽວ

   ກັບເປັນທອງແຜ່ນດຽວ   ຮັກກົມກຽວອີກຄັ້ງ ຍ້ອນເຮົາສ້າງ ມິຕບໍ່ຈາງ....ຫັ້ນແລ້ວ

ຢາກຈະມີ ຄົນທີ່ຮັກ ຈັກນຶ່ງຄົນ

ທ່ຽວວຽນວົນ ຄົ້ນຊອກຫາ ມາຫຼາຍເດືອນ

ກໍບໍ່ມີ ໃຜຈັກຄົນ ພໍເປັນເພື່ອນ

ໄດ້ຫຼາຍເດືອນ ຈົນວ່າເຄື່ອນ ເລື່ອນຫາປີ

    ລອ໊ກເຂົ້າໄປ ໃນຫ້ອງແຊດ ແປດໂມງເຊົ້າ

    ໄປນັ່ງເຝົ້າ ໃຜເຂົ້າມາ ກໍລາໜີ

    ນັ່ງຄົນດຽວ ຫຼຽວຫາໃຜ ກໍບໍ່ມີ

    ຈົນອອກໜີ ເມື່ອຍເຕັມທີ ນໍາຊອກແຟນ

ເບື່ອແສນເບື່ອ ເຫຼືອໃຈເດ ນໍາຊີວິດ

ພຣົມລິຂິດ ຜິດທາງເດີນ ເກີນສຸດແສນ

ຄິດອິດສາ ຄົນທົ່ວໄປ ຜູ່ຫຼາຍແຟນ

ຈັກຢູ່ແດນ ແຫ່ງຫົນໃດ ດວງໃຈຂ້ອຍ

    ຫາກເມື່ອໃດ ຂ້ອຍໄດ້ແຟນ ມາຄອບຄອງ

    ບໍ່ໃຫ້ໝອງ ໝົ່ນກາຍຍາ ພຽງແຕ່ນ້ອຍ

    ຈະຖະໜອມ ຈະເຝົ້າຮັກ ແລະເຝົ້າຄອຍ

    ຈະບໍ່ປ່ອຍ ໃຫ້ເຈົ້າຢູ່ ຜູ່ດຽວເຫງົາ

ໃນດວງຕາ ...ນ້ອງນັ້ນບອກ ...ກັບອ້າຍວ່າ

ຈະບໍ່ຫາ ...ຊາຍອື່ນມາ ...ຄອງຫົວໃຈ

ຈະຊື່ສັດ ...ຈະປະຄອງ ...ຮັກແຕ່ອ້າຍ

ແຕ່ເຫດໃດ ...ຕາກັບໃຈ ...ຈຶ່ງໄກກັນ

     ຕາບອກຮັກ ...ແຕ່ຫົວໃຈ ...ຫຼາຍມານຍາ

     ຕາບອກວ່າ ...ຈະຮັກແນ່ ...ບໍ່ແປຜັນ

     ແຕ່ແລ້ວໃຈ ...ກໍທຳລາຍ ...ຫຼອກລວງກັນ

     ໃຈເຈົ້ານັ້ນ ...ມັນບໍ່ຊື່ ...ຄືກັບຕາ

ແວວໃນຕາ ...ສົ່ງມາຫາ ...ບອກວ່າຮັກ

ບໍ່ຮູ້ຈັກ ...ວ່າຮັກນັ້ນ ...ມີພຽງຕາ

ສ່ວນວ່າໃຈ ...ບໍ່ໄດ້ຕຣົງ ...ກັບໃບໜ້າ

ມີພຽງຕາ ...ນັ້ນມາບອກ ...ຫຼອກຕາງໃຈ

     ຫຼົງເຊື່ອຕາ ...ວ່າຮັກແທ້ ...ແນ້ວແນ່ຄັກ

     ຕ້ອງອົກຫັກ ...ເມື່ອຮັກນັ້ນ ...ຜັນປ່ຽນໄປ

     ຮັກທັງໝົດ ...ນັ້ນບໍ່ມີ ...ຢູ່ທີ່ໃຈ

     ເຈົ້າທຳລາຍ ...ຮັກຂອງອ້າຍ ...ດ້ວຍສາຍຕາ...

ພັນລາວມີ ດອກໄມ້...ເຮືອງຮຸ່ງ ບານສີ

ມີສາວງາມ ໂສພີ... ທີ່ທຸກຄົນ ຍໍຍ້ອງ

ບົດຂຽນ ຄໍາເຫັນນ້ອງ... ລ້ວນແຕ່ມີຄຸນຄ່າ

ຮູບໂປຣຟາຍລ໌ ນ້ອງຫຼ້າ... ເໝືອນນາງຟ້າ ແຫ່ງສະຫວັນ...ແທ້ນາ

     ຕື້ນຕັນໃຈ ບໍ່ເວັ້ນ... ເຫັນຂ່າວຫຼັງໄມ

     ຂໍເປັນມິດທາງໄກ... ຝາກຫົວໃຈຄິດຮອດ

     ຕະຫລອດແຮງໃຈ ໃຫ້... ຝາກຫຼັງໄມ ໃຫ້ອ່ານ

     ປ່ອຍຂໍ້ຄວາມຫວານໆ... ອ່ານແລ້ວໃຈຄິດຮອດ ຄະນິງນ້ອງ ຜູ່ຢູ່ໄກ... ເດນໍ

ເຫັນພາບ ເໝືອນຢູ່ໃກ້... ໃຈຄິດ ຄວນຫາ

ຢາກພົບໜ້າ ຂັວນຕາ...ໄຂວາຈາ ປາກເວົ້າ

ຢາກຊວນໄປ ກິນເຂົ້າ... ຕອນສວາຍ ຍາມພັກທ່ຽງ  ເດນໍ

ຢາກໄປນັ່ງຟັງສຽງ... ສໍານຽງຫວານຈ້ອຍໆ ອີກຮອຍຍິ້ມ ທີ່ບາດຕາ...ນັ້ນເດ

     ຢາກເຫັນໜ້າ ສາວເຈົ້າ... ເຫງົາຮອດ ຊວງໃນ

     ເບິ່ງແຕ່ພາບຂັວນໃຈ... ຢູ່ໂປຣຟາຍລ໌ ແທນໜ້າ

     ຂໍວອນອິນ ດິນຟ້າ... ໂປຣດປຣານີ ຍູ້ຊ່ອຍ 

     ໃຫ້ສອງໃຈ ເລື່ອນລອຍ... ຂ້າມທະເລ ຟາກຟ້າ ຫັນໜ້າ ເຂົ້າໃສ່ກັນ... ແດ່ທ້ອນ

ສວມແວ່ນດຳ ຊ່າງງາມຂຳ ແທ້ນ້ອງຫຼ້າ

ງາມບາດຕາ ເຂົ້າຊົງໜ້າ ເປັນຕາຮັກ

ຍາມເຈົ້າຍິ້ມ ນັ້ນແຮງງາມ ໃຜກໍມັກ

ງາມຍິ່ງໜັກ ຈົນຫຼົງຮັກ ຫຼົງປັກໃຈ

     ສາວແວ່ນດຳ ງາມເປັນນຶ່ງ ຕຣຶງອຸຣາ

     ງາມໜັກໜາ ຍາມຂວັນຕາ ຍິ້ມມາໃຫ້

     ຈົນຕາຄ້າງ ເມື່ອນາງຍິ້ມ ໃສ່ຍາມໃດ

     ຢາກເກັບໄວ້ ໃນຫ້ອງໃຈ ໃຫ້ນານໆ

ສາວໃສ່ແວ່ນ ຂໍເປັນແຟນ ໄດ້ບໍ່ນໍ ?

ເຈົ້າຮູ້ບໍ່ ຂ້ອຍເຝົ້າລໍ ຄອຍຮ່ວມຝັນ

ເຫັນເຈົ້າມາ ໃສ່ແວ່ນຕາ ດຳທຸກວັນ

ເກັບໄປຝັນ ຢູ່ຄົນດຽວ ຈົນປ່ຽວໃຈ

     ໂປຣດເຖີດນ້ອງ ລອງຖອດແວ່ນ ແດ່ເນື້ອເຢັນ

     ອ້າຍຢາກເຫັນ ແວວຕາຫວານ ນັ້ນເຊື່ອງໄວ້

     ຢາກເຫັນຕາ ມີປະກາຍ ຢູ່ຂ້າງໃນ

     ຢ່າປິດໄວ້ ຈົ່ງໄຂມາ ສົບຕາກັນ.

ແວບພັນລາວ ຍັງມີສາວ ງາມໜ້າຮັກ

ຢາກຮູ້ຈັກ ຢາກຝາກມິດ ຢາກຊິດໃກ້

ເຈົ້າຊ່າງງາມ ເໝືອນທິດາ ຈາກຟ້າໄກ

ເບິ່ງພາບຖ່າຍ ໃນໂພຣຟາຍລ໌ ໃຈແຮງຄິດ

   ສາວພັນລາວ ເຈົ້າງາມເໝືອນ ເດືອນຄູ່ຟ້າ

   ດັ່ງເທວາ ປັ້ນແຕ່ງມາ ເນຣະມິດ

   ພາບເຈົ້າຍິ້ມ ງາມເປັນນຶ່ງ ຊຶ້ງດວງຈິດ

   ພຣົມລິຂິດ ຈິດລໍາພັນ ຝັນເຖິງເຈົ້າ

ຢູ່ຄົນກໍ້າ ຂ້າມພູຜາ ຟ້າແດນໄກ

ແຕ່ຫົວໃຈ ໄຝ່ຫາເຈົ້າ ສາວພັນລາວ

ຢາກເຫັນໜ້າ ທຸກເວລາ ຄໍ່າແລງເຊົ້າ

ດວງໃຈເຝົ້າ ຝັນລະເມີ ເພີ້ບໍ່ວາຍ

   ຖ້າຫາກບຸນ ວາດສະໜາ ນໍາພາຍູ້

   ໄດ້ຄຽງຄູ່ ຂັວນຊີວາ ພາສຸກໃຈ

   ຫາກບຸບເພ ສັນນິວາດ ຊັກນໍາໃຫ້

   ດຶງສອງໃຈ ໃຫ້ພົບກັນ ສຸກສັນຈິງ

--- ຮູ້ກັນມາແຕ່ນ້ອຍ ບ້ານຢູ່ຕິດກັນ

ສັມພັນແບບເພື່ອນມິດ ໃກ້ຊິດແລງເຊົ້າ

ແຕ່ສະໄໝເຮົາເຂົ້າ ຮຽນປະຖົມປໍນຶ່ງ

ຍັງບໍ່ທັນເລິກຊຶ້ງ ເຖິງຂັ້ນພາວະຄົນ

---   ວັນເດືອນປີຜ່ານພົ້ນ ນ້ອງເຕີບໃຫ່ຍເປັນສາວ

     ອ້າຍກໍເປັນບ່າວຕາມ ຊໍ່າກັນໃນບ້ານ

     ຄວາມສັມພັນຍິ່ງໝັ້ນ ຕິດແທດກັນ ສະເໝີເພື່ອນ

     ເຮືອນສອງເຮົາຢູ່ໃກ້ ຕິດຂ້າງຕໍ່ຊານ

--- ເພື່ອນຮັກເລີ້ມໜຽວໝັ້ນ ຫຼາຍກ່ວາທຳມະດາ

ສັນຍາຮ່ວມຮັກກັນ ມອບທັງກາຍ ແລະໃຈໃຫ້

ຮັກສອງເຮົາຈຶ່ງໄດ້ ໃຫ້ແກ່ກັນ ໂດຍບໍ່ຄິດ

ເປັນຮັກຄັ້ງທຳອິດ ທີ່ມອບຈິດຝາກໄວ້ ອຸທິດໃຫ້ ແກ່ກັນ

---   ບໍ່ເຖິງເດືອນຮັກນັ້ນ ເລີ້ມແຕກຕ່າງ ເປັນໄປ

     ເພື່ອນທີ່ເຄີຍເອົາໃຈ ກໍກັບກາຍເຄືອງແຄ້ນ

     ເປັນແຟນນີ້ແສນຍາກ ລຳບາກຫຼາຍ ກວ່າເປັນເພື່ອນ

     ຮັກກັນບໍ່ເຖິງເດືອນ ເສຍເພື່ອນ ຍັງບໍ່ແລ້ວ ເສຍແຟນອີກຕຶ່ມກັນ.

ໂອເນື້ອເຢັນ ເປັນຫັຍງນ້ອງ ຈຶ່ງຮ້ອງໄຫ້

ຄົງຊໍ້າໃຈ ຫຼາຍເກີນທົນ ຈົນບ້າປ່ວງ

ໂອທີ່ຮັກ ເຈົ້າຄົງຖືກ ເຂົາລໍ້ລວງ

ເຈັບຊໍ້າຊວງ ໃຜລວງຫຼອກ ໃຫ້ຈາບັນ

     ຫຼືເປັນຊາຍ ທີ່ຂັວນໃຈ ໄປມົວເມົາ

     ຫຼົງເຊື່ອເຂົາ ຈົນລືມອ້າຍ ໄປຕັ້ງນານ

     ປ່ອຍອ້າຍເສົ້າ ເຫງົາຄົນດຽວ ສຸດໂສກສັນ

     ແລ້ວນ້ອງນັ້ນ ກໍຕິດຕາມ ນໍາເຂົາໄປ

ເຊັດນໍ້າຕາ ຫຍັບມາໃກ້ ອ້າຍເຖີດນາງ

ອ້າຍຈະຟັງ ນາງບອກເລົ່າ ເຣື່ອງເປັນໄປ

ສອງຫູນີ້ ຈະຟັງນ້ອງ ອະທິບາຍ

ດີຫຼືຮ້າຍ ຈະຕຶກຕອງ ຮອງຮັບຂວັນ

     ອ້າຍບໍ່ໂກດ ໂທດນ້ອງນາງ ແຕ່ຢ່າງໃດ

     ພ້ອມອາໄພ ໃຫ້ແກ້ວຕາ ເຣື່ອງທີ່ຜ່ານ

     ຖືວ່າເປັນ ພຽງເງົາຮ້າຍ ໃນຄວາມຝັນ

     ຈົ່ງລືມມັນ ໃຫ້ຜ່ານໄປ ເໝືອນສາຍນໍ້າ

_ ສາລິກາກູ່ຮ້ອງ ສຽງສົ່ງ ເຕືອນໄກ

ກ່ອນພາກຄູ່ມັນໄປ ຍັງສົ່ງສຽງດັງກ້ອງ

ບາດວ່ານ້ອງພາກອ້າຍ ຄໍາດຽວບໍ່ເອີ້ນສັ່ງ

ປ່ອຍໃຫ້ອ້າຍຜິດຫັວງ ນັ່ງໂສກາໂສກເສົ້າ ເພາະຕົວເຈົ້າ ບໍ່ສັ່ງລາ...ນີ້ແລ້ວ

   _ ມືນຕາຫາຍໄປຈ້ອຍ ມິດຊ່ອຍມ່ອຍ ບໍ່ເຫັນກັບ

      ໄປແລ້ວເລີຍລາລັບ ບໍ່ຫວນກັບປານນີ້

     ດວງຣືດີໝອງເສົ້າ ຍ້ອນເຈົ້າໄປໄກຫ່າງ

     ເຫຼືອພຽງພາບຖ່າຍນາງ ແນບຄຽງຂ້າງທຸກມື້ ແທນໜ້າກ່ອນເຂົ້ານອນ...ນີ້ແລ້ວ

_ ຫຼືໄປມີໃໝ່ຊ້ອນ ຖືກເຂົາຫຼອກ ຫຼອນຕົວະ

ຫຼົງຄາຣົມ ຊາຍຍົວະ ມົ່ວເມົາເປັນບ້າ

ອ້າຍນີ້ຍັງຄອຍຖ້າ ຂັວນຊີວາ ນ້ອງກັບຕ່າວ

ຄືນມາຫາຮັກເຮົາ ເໝືອນດັ່ງຄາວກ່ອນນັ້ນ ຢ່າຫັນໜ້າ ຍ່າງໜີ...ນ້ອງເອີຍ

_ອ້າຍນີ້ ຍັງຮັກໝັ້ນ ບໍ່ຜັນປ່ຽນແປງໄປ

ຍັງເປັນຫ່ວງຂັວນໃຈ ເສົ້າຣືໄທນໍານ້ອງ

ຫົວໃຈທັງສີ່ຫ້ອງ ຍັງຄອງຄອຍນ້ອງຢູ່

ໂປຣດກັບຄືນມາສູ່ ເຮືອນຮັກເຮົາກ່ອນກີ້ ຢ່າໜີໜ້າ ໃຫ້ຮັກໝອງ...ນ້ອງເອີຍ

ອ້າຍ ຕັດໃຈ ໃຫ້ນວນນ້ອງ ຕ້ອງເລືອກທາງ

ຍອມ ໝົ່ນໝາງ ເຖິງອ້າງວ້າງ ອ້າຍຍອມທົນ

ຫຼີກ ທາງໃຫ້ ອ້າຍຈໍາໃຈ ໜີໃຫ້ພົ້ນ

ທາງ ໜ້າມົນ ຈົ່ງຣາບຣື່ນ ຊື່ນສຸກສົມ

ໃຫ້ ຄົນດີ ຈົ່ງມີຮັກ ສະລັກໃຈ

ນ້ອງ ຈົ່ງໄດ້ ດັ່ງໃຈຝັນ ໝັ້ນພິຣົມ

ເດີນ ທາງໃໝ່ ທີ່ແຈ່ມໃສ ຢ່າໄດ້ລົ້ມ

ໄປ ໃຫ້ສົມ ດັ່ງໃຈຄິດ ຈິດມຸ້ງຫັວງ

ໂດຍ: ສະລັກໃຈ

ລົມພັດມາ ເມຄາເຄື່ອນ ເລື່ອນລອຍໄປ

ທ້ອງຟ້າໃສ ກັບມືດມົວ ສະຫລົວຄື້ມ

ເໝືອນດັ່ງເຮົາ ເສົ້າຣືໄທ ເມື່ອຮັກລືມ

ທ້ອງຟ້າຄື້ມ ຍິ່ງຄ້ອຍໃຈ ໃຫ້ຣະທົມ

     ສາຍຝົນຫຼັ່ງ ດັ່ງນໍ້າຕາ ຂອງຂ້າໄຫຼ

     ຟ້າຮ້ອງໄຫ້ ຂ້າເສົ້າໃຈ ສຸດຂື່ນຂົມ

     ຟ້າຄົງເຈັບ ເໝືອນດັ່ງຂ້າ ຊໍ້າຕຣອມຕຣົມ

     ຂ້າຣະທົມ ຂົມດວງໃຈ ຄ້າຍດັ່ງຟ້າ

ຢືນມອງຟ້າ ຝົນຫຼັ່ງມາ ຂ້າເສົ້າໃຈ

ຢືນຮ້ອງໄຫ້ ກາງສາຍຝົນ ທົນໂສກາ

ຟ້າຮ້ອງໄຫ້ ຍັງມີດິນ ເຊັດນໍ້າຕາ

ແຕ່ຕົວຂ້າ ນໍ້າຕາຫຼັ່ງ ຢ່າງໂຫຍຫວນ

     ເສົ້າດວງຈິດ ຄິດຂຶ້ນມາ ພາໃຈຫັ່ວນ

     ຟ້າຮ້ອງລັ່ນ ສັ່ນເວຫາ ເໝືອນຂ້າຄວນ

     ອົກສະທ້ອນ ຮ້ອນຣືໄທ ໃຈປັ່ນປ່ວນ

     ສຸດຄໍ້າຄວນ ຫວນຄິດເຖິງ ຄົນຈາກໄປ

ໂດຍ: ສະລັກໃຈ

ຫາກມີຮັກ ຈັກນຶ່ງຄົນ ບົນຫົວໃຈ

ຈະເປັນໃຜ ໃຫ່ຍຫຼືນ້ອຍ ຈ່ອຍຫຼືພີ

ຈະມອບຮັກ ມອບຫົວໃຈ ອ້າຍດວງນີ້

ໃຫ້ຄົນດີ ໄວ້ຄອບຄອງ ໃນຫ້ອງໃຈ

     ຈະເທີດທູນ ແມ່ເນື້ອອຸ່ນ ໝູນແນບຕັກ

     ຈະຂໍຮັກ ພັກດີໝັ້ນ ຈົນວັນຕາຍ

     ຈະຂໍຢູ່ ຄູ່ຈອມຂັວນ ໝັ້ນຊິດໃກ້

     ຄູຄຽງກາຍ ບໍ່ໃຫ້ນ້ອງ ໝອງໝົ່ນໃຈ

     ຍິນດີຫຼາຍ ທີ່ໄດ້ຮູ້ ໝູ່ພັນລາວ

     ທັງບ່າວສາວ ຍິງແລະຊາຍ ມາກມາຍໜ້າ

     ຜູ່ມາກ່ອນ ຜ່ອງມາລຸນ ບາງມາຊ້າ

     ບໍ່ເລືອກໜ້າ ນ້ອຍຫຼືໃຫ່ຍ ໃຕ້ເໜືອກາງ

ຮັກກັນໄວ້ ໄດ້ກໍາໄລ ທາງໃຈເຮົາ

ໝູ່ພັນລາວ ມາເຖີດເຮົາ ມາເສີມສ້າງ

ຮ່ວມເປັນມິດ ໃຫ້ກ້າວໄກ ໄປຕາມທາງ

ຈຸດມຸ້ງຫັວງ ຢູ່ແຫ່ງໃດ ໃຫ້ເຖິງທີ່

     ມາເຖີດເພື່ອນ ມາຂີດຂຽນ ຮຽນນໍາກັນ

     ຂຽນປະພັນ ນິທານກ້ອມ ພ້ອມກະວີ

     ຂຽນບົດນຶ່ງ ຕື່ມບົດສອງ ສາມແລະສີ່

     ຂຽນກະວີ ບົດປະພັນ ສື່ສານຮັກ

ອານາຄົດ ສ່ອງບໍ່ເຫັນ ວັນຂ້າງໜ້າ

ອາດພົບພາ ໝູ່ພັນລາວ ເຮົາຮູ້ຈັກ

ໃນນັ້ນອາດ ກາຍມາເປັນ ຄົນເຮົາຮັກ

ໃຫ້ຢຸດພັກ ຂຽນບົດໃຈ ໄວ້ແຫ່ງນັ້ນ

ຝັນ ວ່າເຫັນ ນ້ອງມາຄຽງໃກ້

ຝັນ ວ່າໄດ້ ລູບໄລ້ນວນນາງ

ຝັນ ວ່າມີ ນ້ອງນັ່ງຄຽງຂ້າງ

ຝັນ ວ່ານາງ ຮັກແທ້ຈາກໃຈ

     ຝັນ ວ່ານາງ ນັ້ນບໍ່ລວງຫຼອກ

     ຝັນ ວ່າບອກ ຮັກອ້າຍກ່ວາໃຜ

     ຝັນ ວ່ານາງ ມອບກາຍໃຈໃຫ້

     ຝັນ ວ່າໄດ້ ຮ່ວມຮັກນວນນາງ

ຕື່ນຈາກຝັນ ນ້ອງນັ້ນຫາຍໄປ

ຕື່ນຈາກຝັນ ຂັວນໃຈເຫີນຫ່າງ

ຕື່ນຈາກຝັນ ວິມານອ້າງວ້າງ

ຕື່ນຈາກຝັນ ຮັກຮ້າງຫ່າງຫາຍ

     ຄິດຢາກນອນ ຝັນຕໍ່ໄປ ໃຫ້ຝັນຫວານ

     ນານແສນນານ ນອນບໍ່ຫຼັບ ນັບບໍ່ໄດ້

     ມີແຕ່ຄິດ ຫວນຄືນຫຼັງ ຈົນປວດໃຈ

     ເຂົາຈາກໄປ ໄກແສນໄກ ບໍ່ຫວນກັບ

ພຽງໄດ້ພົບ ສົບສາຍຕາ ພາໃຈຝັນ

ຢາກຜູກພັນ ຝັ້ນໄມຕຣີ ທີ່ດີໄວ້

ຂໍຝາກຮັກ ກັບແອວກົມ ອຸດົມໄຊ

ນ້ອງຍິ້ມໃຫ້ ຊ່າງຈັບໃຈ ຫວານໃນຕາ

     ໂອ...ກຸຫຼາບ ອຸດົມໄຊ ພາໃຈຝັນ

     ເໝືອນສະຫັວນ ປັ້ນແຕ່ງໄວ້ ໃຫ້ພົບພາ

     ເໝືອນພະອີນ ເນຣະມິດ ຈາກຟາກຟ້າ

     ງາມບາດຕາ ທັງບາດໃຈ ຫຼົງໄຫຼປອງ

 ເຫັນພຽງຄັ້ງ ຍັງພໍ່າເພີ້ ລະເມີຫາ

ຢາກຈະມາ ເປັນຄູ່ຄຽງ ຮຽງຂ້າງນ້ອງ

ໂປຣດຟ້າດິນ ຈົ່ງປະທານ ໃຫ້ເຮົາສອງ

ໄດ້ປະຄອງ ຫ້ອງໃຈຮັກ ປັກດັ່ງຝັນ

     ງາມຈັບໃຈ ໂອດອກໄມ້ ຖິ່ນເມືອງເໜືອ

     ງາມລົ້ນເຫຼືອ ເໝືອນທິດາ ເລີດລາວັນ

     ງາມກຸຫຼາບ ອຸດົມໄຊ ແດນສະຫັວນ

     ງາມຕຣະການ ບໍ່ຮູ້ເບື່ອ ເມື່ອພົບພານ

ເໝືອນມີມົນ ດົນບັນດານ ໃຫ້ພານພົບ

ມາປະສົບ ພົບຂັວນຕາ ພາໃຈຝັນ

ເຫັນຄັ້ງດຽວ ກໍຫຼົງຮັກ ປັກຊີວັນ

ໂອຕາຫວານ ສາວໂພນທັນ ງາມບາດໃຈ

     ງາມໃບໜ້າ ວາດວາຈາ ເປັນຕາຮັກ

     ຢາກຮູ້ຈັກ ຢາກຝາກຮັກ ປັກເອົາໄວ້

     ຢາກມາຢູ່ ໃກ້ນວນນາງ ຄຽງຂ້າງກາຍ

     ມອບຫົວໃຈ ນີ້ໄວ້ໃຫ້ ນາງຄົນດຽວ

ສາວໜອງບອນ ສີສັງວອນ ກໍວ່າເດັ່ນ

ບາດມາເຫັນ ສາວໂພນທັນ ໃຈຝັ້ນກ້ຽວ

ຫາກສົມຮັກ ໄດ້ດັ່ງຫັວງ ນຶ່ງນາງດຽວ

ບໍ່ຄົດລ້ຽວ ບ້ຽວແປຜັນ ຫັນທາງໃໝ່

     ບຸນທາດຫຼວງ ເຮົາຈໍາພາກ ຈາກໄກກັນ

     ບໍ່ນານວັນ ຄົງບັນຈົບ ພົບກັນໃໝ່

     ຈາກຄົນດີ ໃນວັນນີ້ ພຽງແຕ່ກາຍ

     ສ່ວນຫົວໃຈ ມອບໄວ້ໃຫ້ ສາວໂພນທັນ

ທັງໆທີ່ ເຮົາກໍຮູ້ ຢູ່ແກ່ໃຈ

ວ່າຮັກໄປ ໃຈຕ້ອງປວດ ລວດລ້າວໜັກ

ສຸດຈະຫ້າມ ເຕືອນຫົວໃຈ ບໍ່ໃຫ້ຮັກ

ຍາກຍິ່ງໜັກ ຫຼົງຮັກຄົນ ມີເຈົ້າຂອງ

   ໄດ້ແຕ່ຝັນ ທຸກວັນຄືນ ຕື່ນຜະຫວາ

   ຢາກຈະຄ້ວາ ມາເຊີຍຊົມ ສົມໃຈປອງ

   ແຕ່ເສຍດາຍ ໃຈເຂົາມີ ຄົນຈັບຈ່ອງ

   ໄດ້ແຕ່ມອງ ເດີນກົ້ມໜ້າ ໜ້າເສຍດາຍ

ອຸກຫົວໃຈ ອັ່ງຫົວໃຈ ຫຼາຍເຫຼືອທົນ

ຫຼົງຮັກຄົນ ມີເຈົ້າຂອງ ຕ້ອງຊໍ້າໃຈ

ພຽງເຫັນໜ້າ ເຂົາທຸກວັນ ຜ່ານມາໃກ້

ກໍພູມໃຈ ໄດ້ແອບມອງ ຄວາມງາມເຂົາ

   ຄືນແລະວັນ ເກັບມາຝັນ ຫວານເລື້ອຍໄປ

   ຫຼອກຫົວໃຈ ຂອງຕົນເອງ ພໍຫາຍເຫງົາ

   ໄດ້ແຕ່ຮັກ ເຂົາຂ້າງດຽວ ຢູ່ບໍ່ເຊົາ

   ແຕ່ຕ້ອງເສົ້າ ເພາະເຮົາຄິດ ຜິດໄປເອງ

ໂດຍ:

ສະລັກໃຈ

ຄອຍ ຍອດດວງໃຈ

ຍອດດວງໃຈ.......ປານນີ້......ເຈົ້າຢູ່ໃສ

ຢູ່ແຫ່ງໃດ............ໃກ້ໄກ.......ບໍ່ເຫັນມາ

ຮູ້ຫຼືບໍ່.....................ອ້າຍຍັງ.......ຄອຍຂັວນຕາ

ຄອຍນ້ອງມາ......ຮ່ວມຮັກ......ຮ່ວມໃນຝັນ

_ໂອ...ຍອດຮັກ...ດຽວນີ້........ເຈົ້າເຮັດຫັຍງ

ເຈົ້າກໍາລັງ.............ສົດຊື່ນ......ຫຼືໂສກສັນ

ສຸດທີ່ຮັກ...............ອ້າຍເຝົ້າ....ເສົ້າຈາບັນ

ຄອງຄອຍວັນ.......ນ້ອງມາ.....ຫາຮັກເຮົາ

_ໂອ..ຄົນດີ............ຄືນນີ້..........ຫຼັບແລ້ວບໍ່

ອ້າຍນັ່ງລໍ...............ເນື້ອເຢັນ....ບໍ່ເຫັນເງົາ

ເວລານີ້...................ນ້ອງສຸກ......ຫຼືໂສກເສົ້າ

ສຸດງຽບເຫງົາ.........ຣືດີ...............ບໍ່ມີນ້ອງ

_ສຸດທີ່ຮັກ..............ຈາກໄປ........ໄດ້ຫຼາຍວັນ

ໂປຣດກັບຫັນ.........ທຸກວັນ........ອ້າຍໝົ່ນໝອງ

ສຸດອ້າງວ້າງ.............ຫົວໃຈ..........ທັງສີ່ຫ້ອງ

ຄອຍຖ້ານ້ອງ............ຄືນມາ...........ຫາຮັກເກົ່າ

ນາງຄົນດຽວ.......ທີ່ອ້າຍຮັກ.........ສຸດຫົວໃຈ

ນາງຄົນດຽວ.......ທີ່ທຳໃຫ້............ອ້າຍມີຫັວງ

ນາງຄົນດຽວ.......ທຳໃຫ້ອ້າຍ........ມີພະລັງ

ນາງຄົນດຽວ.......ເປັນເສັ້ນທາງ.....ແຫ່ງຄວາມຝັນ

ຢາກຈະບອກ.....ນາງໃຫ້ຮູ້...........ຢູ່ແກ່ໃຈ

ຢາກຈະບອກ.....ຍອດຊາມໄວ......ອ້າຍຮັກໝັ້ນ

ຢາກຈະບອກ....ວ່າອ້າຍຮັກ.........ປັກຈອມຂັວນ

ຢາກຈະບອກ.....ຊົ່ວນິຣັນ...........ບໍ່ເຊື່ອມຄາຍ

ຂໍສາບານ.........ຈະຮັກໝັ້ນ........ນານເທົ່າຟ້າ

ຂໍສາບານ.........ຕໍ່ເທວາ............ຟ້າທັງຫຼາຍ

ຂໍສາບານ.........ຈະຮັກເຈົ້າ.........ເທົ້າວັນຕາຍ

ຂໍສາບານ.........ຈະຮັກໄປ...........ຊົ່ວນີຣັນ.

ສະລັກໃຈ:

5~31~2010

ເມື່ອຮັກນັ້ນ.......ກີດກັ້ນ.........ດ້ວຍເງິນຕຣາ

ຮັກຈຶ່ງລາ.........ເຫີນຫ່າງ......ໄປທາງອື່ນ

ຮັກທີ່ຫວານ.......ກັບຂົມ.......ຕົຣມສຸດຝືນ

ແສນຂົມຂື່ນ......ສະອື້ນ..........ກືນນໍ້າຕາ

ແສນເສຍດາຍ....ຮັກເຮົາ.........ເຝົ້າຖະໜອມ

ມາຕຣົມຕຣອມ..ຫາຍໄປ.........ໃຫ້ໂສກາ

ເຄີຍສາບານ.......ກັນໄວ້..........ຊົ່ວດິນຟ້າ

ຈະບໍ່ລາ............ຫ່າງຫັນ........ຈາກກັນໄປ

ດ້ວຍເຫດໃດ.....ຄຳເຮົາ..........ເວົ້າສາບານ

ບໍ່ຍືນນານ........ເໝືອນຄໍາ.......ທີ່ພໍ່າໄວ້

ບໍ່ໜ້າທໍາ.........ໃຫ້ອ້າຍ.........ຕ້ອງຮ້ອງໄຫ້

ແສນເສັຍໃຈ.....ເສຍດາຍ........ເຫຼືອຄະນາ

ກ່ອນຈາກໄປ.....ອ້າຍຂໍ............ອວຍພອນໄຊ

ໃຫ້ຂັວນໃຈ.......ສຸກຂີ..............ຊື່ນຊີວາ

ສ່ວນອ້າຍນີ້.......ຂໍໄປ...............ໄກສຸດຟ້າ

ໄວ້ຊາດໜ້າ.......ຖ້າມີ..............ຄ່ອຍຮັກກັນ

ເມື່ອບໍ່ຮັກ.......ຢ່າຫວງ.........ຫ່ວງອາໄລ

ຈົ່ງຫຼີກໄປ........ໃຫ້ໄກ...........ສຸດຂອບຟ້າ

ບໍ່ຢາກເຫັນ......ຄົນລວງ........ມາຂວາງໜ້າ

ໜີໄປຊະ..........ດີກ່ວາ..........ມາວຸ້ນວາຍ

ຖ້າບໍ່ຮັກ..........ຢ່າມາ............ຂວາງທາງເດີນ

ອ້າຍຂໍເຊີນ........ໜີໄກ...........ຢ່າມາໃກ້

ເປີດຫົນທາງ......ໃຫ້ຍິງ............ທີ່ມາໃໝ່

ຜູ່ສົນໃຈ...........ມອບຮັກ........ຈາກໃຈຈິງ

ຮັກກັນມາ........ຫຼາຍຟ້າປີ.......ກັບໜີໜ້າ

ລືມສັນຍາ........ເຄີຍໄວ້ໃຫ້.......ໃນກ່ອນນັ້ນ

ໃຈຂອງຍິງ........ຊ່າງບໍ່ຈິງ.........ປ່ຽນແປຜັນ

ຖິ້ມຮັກນັ້ນ........ໃຫ້ສະລາຍ.......ຢ່າງໄຮ້ຄ່າ

ໂອ..ຄວາມຮັກ....ບໍ່ແນ່ນອນ.......ຫຼອກຫຼອນໃຈ

ໃຫ້ດຽວດາຍ.......ໃຈຣະທົມ........ຂົມຂຶ່ນຊໍ້າ

ຍ້ອນຫຼົງຮັກ........ມອບໃຈໃຫ້.......ຍິງໃຈດໍາ

ຕ້ອງເຈັບຊໍ້າ........ນໍ້າຕາໄຫຼ..........ໄປຕັ້ງນານ

ເຮົາເປັນລາວ..........ຕ້ອງຮັກລາວ............ເຮົາຮ່ວມໃຈ

ຈະຢູ່ໃສ.................ໃກ້ຫຼືໄກ...................ໃຈເປັນລາວ

ບໍ່ແມ່ນເຊື້ອ...........ຊາດດຳຂາວ...............ຊາວຕ່າງດ້າວ

ລ້ວນແຕ່ລາວ.........ລູກຫຼານລາວ..............ແດນລ້ານຊ້າງ

http://i47.tinypic.com/9lj409.jpg