ເໝືອນມີມົນ ດົນບັນດານ ໃຫ້ພານພົບ

ມາປະສົບ ພົບຂັວນຕາ ພາໃຈຝັນ

ເຫັນຄັ້ງດຽວ ກໍຫຼົງຮັກ ປັກຊີວັນ

ໂອຕາຫວານ ສາວໂພນທັນ ງາມບາດໃຈ

     ງາມໃບໜ້າ ວາດວາຈາ ເປັນຕາຮັກ

     ຢາກຮູ້ຈັກ ຢາກຝາກຮັກ ປັກເອົາໄວ້

     ຢາກມາຢູ່ ໃກ້ນວນນາງ ຄຽງຂ້າງກາຍ

     ມອບຫົວໃຈ ນີ້ໄວ້ໃຫ້ ນາງຄົນດຽວ

ສາວໜອງບອນ ສີສັງວອນ ກໍວ່າເດັ່ນ

ບາດມາເຫັນ ສາວໂພນທັນ ໃຈຝັ້ນກ້ຽວ

ຫາກສົມຮັກ ໄດ້ດັ່ງຫັວງ ນຶ່ງນາງດຽວ

ບໍ່ຄົດລ້ຽວ ບ້ຽວແປຜັນ ຫັນທາງໃໝ່

     ບຸນທາດຫຼວງ ເຮົາຈໍາພາກ ຈາກໄກກັນ

     ບໍ່ນານວັນ ຄົງບັນຈົບ ພົບກັນໃໝ່

     ຈາກຄົນດີ ໃນວັນນີ້ ພຽງແຕ່ກາຍ

     ສ່ວນຫົວໃຈ ມອບໄວ້ໃຫ້ ສາວໂພນທັນ