@@@@@@@@@@@@@@@@@@@

ເຖີງແມ່ນໄກສຸດໄກ   ລະຟາກຟ້າ

ສະເຫນ່ຫາ ຂ້າມຟ້າ  ໄລ່ຕາມມາບັນຈົບ

ໄລຍະທາງ  ໄລຍະໃຈ  ໄຝ່ປະສົງ

ເພາະມີວາດສະໜາ   ຈື່ງໄດ້ມາພົບພໍ້

ຢາກຂອບໃຈໂຊກສະຕາ  ທີນຳມາຄວາມຮັກ

ເມື່ອນາງມີວາຈາ ຄຳວ່າ "ຂ້ອຍຮັກເຈົ້າ"

ເຈົ້າຄື່ພຽງໜື່ງດຽວ ທີໃຈປາຖະຫນາ

ຈະມອບຄວາມຮັກທັງຫມົດຂອງຫົວໃຈ

ຈະມອບລົມຫາຍໃຈທີມີໃຫ້ກັບເຈົ້າ

ຈະຢືນຢັດຮັກເຈົ້າຊົ່ວນິຮັນ.

ໂດຍ: ນັນ ຄົນຮັກແມງກະເບື້ອ

--- ວອນ,,,ຟ້າ ---

--------

ເບີ່ງຟ້າກ້ວາງ ທາງໃຈກັບມືດໝົ່ນ 

ແນມຫາຄົນແມ່ນໃຜມາຮ່ວມຝັນ  

ຢູ່ແຫ່ງໃດໃຜຄົນນັ້ນ ຄອຍນານວັນ

ຄວາມງຽບຫງັດ ພົ້ນຜ່ານການເວລາ 

 (.....ຫຼື ອານົງ ຄອງທ້າວໃນນິຍາຍ?.....)

ໃຈຄົນຄອຍ ຫງອຍເຫງົາ ເຝົ້າຈົດຈໍ

ເໜືອນນົກເຂົາ ຂາດຄູ່ ບີນລ່ອງລອຍ 

ຊ່ອງຊ່ອງຮອຍ ສຽງເອີ້ນທີຮຽກຫາ 

ໃຜຄົນໜື່ງ ຄົນນັ້ນ ກ້າວເຂົ້າມາ 

ວອນຈັນທຣາ ຟ້າເສກສັນ ວັນໄດ້ພົບ

ຕົກຄາວນີ້ ເກັບໃຈໄວ້ຈົນອຸ່ນ

....ນາງຈື່ງໄດ້.... 

ຂຽນບົດກອນ ຜ່ານອັກສອນ ຫ້ອຍສະເໜີ 

ຫວັງບາງຄົນ ໃຜຄົນນັ້ນ ມາອ່ານພົບ 

ຫຼົງລະເມີ ອັກສອນນາງ ທີອ່າວໄວ້  

.....ຂໍຕັ້ງຈິດອະທິຖານ ຜ່ານພູມີພົບ..... 

ຢ່າໃຫ້ຮົບ ໃນຮັກ ທາງສາຍປ່ຽວ

ຢ່າບັນຈົງ ໃຫ້ເຫງົາ ເຂົ້າມາຊົງ  

ໃຜຄົນນັ້ນ ຄອງຄອຍມາຫຼາຍປີ 

ໂປຣດຈົ່ງມີຕົວຕົນ ໃຫ້ປະຈັກ.

v

v

v

v

ພ້ຽງ!....

ໂດຍ: ນັນ ຄົນຮັກແມງກະເບື້ອ 

ລຸງຄອມຸນິສ ທີນັບຖື,

 ນະຄອນຊຽງໄຮ້ ໃນຊ່ວງເວລານີ້ອາກາດເລີ່ມຮ້ອນແລ້ວ ບວກກັບອຸນຫະພຸມຂອງ Shanghai World Expo 2010 ຍີ່ງເຮັດໃຫ້ບັນຍາກາດທະລຸຮ້ອນຂື້ນ.

ດັ່ງທີພວກເຮົາຮູ້ວ່າ ຈີນໃນມື້ນີ້ແມ່ນຊົງອິດຜົນທຸກໆດ້ານໄປທົ່ວໂລກ, ເຮັດໃຫ້ຫຼານມັກຄິດວ່າ ຊາດຄອມມຸນິສຢ່າງຈີນ ອາດຈະເປັນເຈົ້າໂລກໃນອານາຄົດໄດ້...
2-3ວັນກ່ອນ ຫຼານກັບໝູ່ຄົນໄທຍໄດ້ສົນທະນາກັນກ່ຽວກັບບັນຫາການເມືອງທີກຳລັງເກີດຂື້ນໃນບ້ານເມືອງເພີ່ນ, ໝູ່ຫຼານທີເປັນຄົນໄທຍຖາມວ່າ ”ຄິດຢ່າງໃດກ່ຽວກັບສະຖານະການໃນປະເທດໄທຍ?”; ຫຼານອໍ້າອື້ງ ກ່ອນຈະຕອບວ່າ: ”ບໍ່ຂໍມີຄວາມເຫັນເດີ!”; ”ແລ້ວເພີນຄິດຈັງໃດ?” ຫຼານຖາມຕໍ່. ”ບໍ່ຮູ້ເດ້, ແຕ່ບໍ່ຢາກໃຫ້ມີການໜອງເລືອດເລີຍ!” ລາວຕອບ. ທັນໃດນັ້ນຫຼານກໍ່ເວົ້າໂດຍທີບໍ່ຄິດໜ້າ-ຫຼັງວ່າ ”ແຕ່ນັ້ນແມ່ນຄວາມເດັດຂາດຂອງລັດເພື່ອຮັກສາ ສະຖາບັນການປົກຄອງ”; ”ຖ້າຊັ້ນ ກໍ່ເປັນແບບຄອມຸນິສ ລະຕິ!”ລາວຕອບ. ເທົ່ານັ້ນແຫຼະ, ເໜືອນມີຫຍັງມາຕໍາໃຈ ຫຼານເວົ້າຫຍັງບໍ່ອອກ ຫງຽບຢູ່ຄາວໜື່ງກ່ອນທີຈະເວົ້າຕໍ່ວ່າ: ”ມີລັດຖະບານໃດແດ່ໃນໂລກນີ້ ທີບໍ່ປົກປ້ອງຕົນເອງ”; ”ແຕ່ນັ້ນມັນໝາຍເຖິງຄວາມເປັນ ປະຊາທິປະໄຕນະ!” ລາວເຊື່ມຂື້ນ. ການສົນທະນາຂອງພວກເຮົາ ແມ່ນເປັນພຽງການສົນທະນາທົ່ວໄປ ຂອງນັກສຶກສາທີ່ຢູ່ໃນປະເທດທີສາມ ແຕ່ບັງເອີນບ່ອນທີພວກເຮົາກຳລັງຢູ່ນັ້ນແມ່ນປົກຄອງດ້ວຍລະບອບ ຄອມຸນິສ ແລະຫຼານເອງກໍ່ມາຈາກປະເທດ ຄອມຸນິສ. ພໍດີໄດ້ຈັງຫວະ ຫຼານກໍ່ເລີຍຖາມຕໍ່ວ່າ ”ຈື່ເຫດການ ທ່ຽນອ່ານເໝິນ ໃນປີ1989 ໄດ້ບໍ່? (Tian'an men Square Protest 1989) ຖ້າໃນຕອນນັ້ນລັດຖະບານຈີນ ຫາກບໍ່ເດັດຂາດ ຈີນໃນມື້ນີ້ອາດຈະບໍ່ແມ່ນປົກຄອງດ້ວຍລະບອບຄອມຸນິສ ກໍ່ເປັນໄປໄດ້”......
ເຫດການປະທ້ວງຢູ່ຈະຕຸຮັດ ທ່ຽນອ່ານເໝິນ ໃນກຸງປັກກິ່ງ ຂອງເດືອນມິຖຸນາ 1989 ເປັນການເຄື່ອນໄຫວທາງການເມືອງຂອງນັກບັນຍາຊົນ ທີຮຽກຮ້ອງປະຊາທິປະໄຕ, ລັດໄດ້ໃຊ້ກອງກຳລັງທະຫານ ສະລາຍກຸ່ມຜູ້ປະທ້ວງແລະຈົບລົງດ້ວຍການນອງເລືອດ ມີຜູ້ເສຍຊີວິດບໍ່ຕຳກ່ວາ 2000ຄົນ, ລວມມີ ນັກປັນຍາຊົນ, ທະຫານ ແລະຜົນລະເຮືອນ. ຈົນເຮັດໃຫ້ປະຊາຄົມໂລກເບີ່ງຈີນວ່າເປັນປະເທດ ຜະເດັດການອຳນາດ,ບໍ່ມີປະຊາທິປະໄຕ, ກີດກັ້ນສິດທິຂອງຜົນລະເມືອງ...
ສະຖານະການຕອນນັ້ນ ແມ່ນໄດ້ຮັບອິດທິຜົນຈາກການປ່ຽນແປງເຫດການໂລກ ລຸງໆຄົງຈະຈື່ໄດ້ ວ່າໃນຊຸມປີ90 ໄດ້ມີການປ່ຽນແປງທາງການເມືອງຂອງໂລກຄັ້ງໃຫຍ່, ການສະລາຍຕົວ ຂອງກຸ່ມປະເທດສັງຄົມນິຍົມໃນເອິລົບ ຕາເວັນອອກ (Communist Bloc) ແລະ ການລົ້ມລະລາຍຂອງ ສະຫະພາບສັງຄົມນິຍົມໂຊວຽດ (USSR) ຖື່ວ່າເປັນການສີ້ນສຸດຂອງສົງຄາມເຢັນ.
ແລະ"ການປະທ້ວງ ທ່ຽນອ່ານເໝິນ" ກໍ່ເປັນໜື່ງໃນກະແສການປະທ້ວງເພື່ອການປ່ຽນແປງລະບອບການປົກຄອງ ແຕ່ບໍ່ສຳເລັດເຮັດໃຫ້ລ.ບຈີນ ສາມາດຮັກສາລະບອບຄອມຸນິສ ຈົນມາເຖິ່ງມື້ນີ້. ຫຼານໄດ້ມາສຳພັດກັບຕາຕົນເອງວ່າ ຊາດຈີນເປັນຊາດທີໃຫຍ່ ທີປະຊາກອນຫຼາຍທີສຸດໃນໂລກ ແຕ່ລັດຖະບານຈີນກໍ່ສາມາດຄວບຄຸມ ແລະບໍລິຫານໄດ້ຖື່ວ່າດີເຕີບ, ລ.ບ ເຮັດວຽກໜັກເພືອຄວາມຢູ່ດີກີນດີຂອງປະຊາຊົນ, ປະຈຸບັນ ປຊຊ ສ່ວນຫຼາຍພໍໃຈກັບຄວາມເປັນຢູ່. (ເປັນມຸມມອງ ຂອງຫຼານ).....
ລະບອບການເມືອງ ບໍ່ວ່າດ້ວຍລະບອບໃດກໍ່ຕາມ ລ້ວນແຕ່ມີທັງອັນດີ ແລະຮ້າຍ. ສີ່ງສຳຄັນເໜືອອື່ນໃດ ແມ່ນຄວາມຕະນັກເຖິງຄວາມເປັນ ”ຊາດ”. ແລະສີ່ງທີຫຼານດີໃຈທີສຸດ ກໍ່ຄື່ ຄຳວ່າ: "ຊາດລາວ" ນັ້ນ ເປັນສີ່ງທີໜ້າເຊີດຊູ ຢ່າງພາກພູມໃຈທີສຸດ ເພາະພວກເຮົາຄົນລາວບໍ່ວ່າຈະຢູ່ມຸມໃດຂອງໂລກ ກໍ່ມີຄວາມພູມໃຈໃນຄວາມເປັນລາວ, ຢູ່ຮ່ວມກັນດ້ວຍຄວາມຮັກແພງ, ສາມັກຄີ ແລະສັນຕິ.
ລຸງທີເຄົາລົບ, ຄວາມຮູ້ ຄວາມເຂົ້າໃຈຂອງຫຼານແມ່ນຊຳກັບເມັດຊາຍ, ຫາກເຂົ້າໃຈຫຍັງຜິດຜາດ ຫຼືເວົ້າບໍ່ຖື່ກຕ້ອງ, ຫວັງວ່າຈະຕອບຈົດໝາຍສະບັບນີ້ ເພື່ອະທິບາຍ ແລະຊີ້ແຈງໃຫ້ຫຼານເຂົ້າໃຈໃໝ່.
 
ດ້ວຍຄວາມນັບຖື,
                                                                         ຊຽງໄຮ້ 19.5.2010
 

HHHHHHHHHHHHHHHHHHHHHHHH

~ ສິດທິຂອງຫົວໃຈ ~

 ນາງທັງຮູ້ວ່າຮັກນັ້ນສູກແລະທູກ 

ແຕ່ຍັງຊຸກຫົວໃຈໃຫ້ກັບເຈົ້າ 

ເຝົ້າລໍຄອຍທຸກຢ່າງ ຢ່າງຕັ້ງໃຈ 

ທີລະເລັກລະໜ້ອຍ ຄອຍອົດທົນ  

ປາຖະໜາວ່າຮັກນັ້ນສົມໝາຍປອງ

 ************

ຮັກເອີຍຮັກ ຍາກ-ໜັກຈະໄຄ່ວຄວ້າ  

ພຽງເປັນພາບ ມານຢາ ມາຫັກຫານ 

ສັນຍານໃຈໄຮ້ສິດຄິດເກີນໄກ 

ເປັນພຽງຝັນ ຢຸດນື້ງກາງເວຫາ  

ດັ່ງມີເມກບັງຕາ ພາເຫີນຫ່າງ

 ***********

ຍາມເມືອຮັກ ກໍ່ຈະມັກ ບໍ່ຄຳນຶ່ງ  

ວ່າມື້ໜື່ງ ຮັກອາດລົ້ມຈາງຫ່າງຫາຍ  

ຍາມນັ້ນໃຈອາດອ່ອນແອແພ້ທຸກຢ່າງ 

ເໜື່ອນຊີວິດອັບປາງທາງແສນເຂັນ  

ນໍ້າຕາເອື້ອ ເຫຼື່ອລົ້ນ...ຮັກໃນຕົມ    ແຕ່ຊັນໃດ ຊັນນັ້ນ...ໃຈນາງເຈົ້າ ບໍ່ເຄີຍຈຳ  

ນີ້ລະນໍ ທີເພີ່ນວ່າ "ສິດທິຂອງຫົວໃຈ"

(ໂດຍ: ນັນ ຄົນຮັກແມງກະເບື້ອ)

ທີຮັກ, ອ່ານໜັ່ງສືເຫຼັ້ມນີ້ເຖີດ !

------------UU--UU--UU----------

ໃນໄລຍະນີ້ປະເທດເພືອນບ້ານເຮົາມີຄວາມຂັດແຍ່ງທາງການເມືອງພາຍໃນຢ່າງຮຸນແຮງ ເຮັດໃຫ້ນຶກເຖິ່ງສົງຄາມກາງເມືອງທີເກີດຂື້ນໃນອາດີດ,​ ຄິດໄປໆ-ມາໆ ພາໃຫ້ຄິດເຖິ່ງໜັ່ງສືຕ່າງໆ (ທີເຄີຍອ່ານດົນມາແລ້ວ) ທີມີເນື້ອໃນກ່ຽວກັບການຕໍ່ສູ້ຂອງປ.ຊ ລາວຕ້ານສົງຄາມ, ຄິດເຖິ່ງບັນດາໜັ່ງສືທີສະທ້ອນໃຫ້ເຫັນເຖິ່ງ ແງ່ມຸນການຕໍ່ສູ້ເພື່ອປົດປ່ອຍຕົນເອງໃຫ້ເປັນອິສະຫຼະຈາກການກົດຂີ່ ຕາມອຸດົມການທາງການເມືອງຂອງພັກຄອມມູນິສລາວ ເຊີງເປັນຜູ້ນຳໃນການຕໍ່ສູ້ປົດປ່ອຍ. ໜັ່ງສືທີວ່ານີ້ບໍ່ວ່າຈະເປັນ "ເສັ້ນທາງແຫ່ງຊີວິດ" ຂອງ ຈັນທີ ເດືອນສະຫວັນ, "ຄວາມຊົງຈຳຂອງຊີວິດເຮົາ" ຂອງທ່ານ ພູມີ ວົງວິຈິດ, "ສອງເອື້ອຍນ້ອງ" ຂອງ ສ.ບຸບຜານຸວົງ , ໂຮມເລື້ອງສັ້ນ "ຊາວໝຸມລຳລຽງ" ແລະ ອື່ນໆໆ.

ຕົກມາຮອດສະໄໝປະຈຸບັນ ໄວລຸ້ນສ່ວນຫຼາຍ ອາດຄຶດວ່າເນື້ອຫານັ່ງສືເຫຼົ່ານີ້ກາຍເປັນເລື້ອງລ້າສະໄໝໄປແລ້ວ, ແຕ່ເຖິ່ງຈັງໃດກໍ່ຕາມຄຸນຄ່າຂອງໜັ່ງສືເຫຼົ່ານີ້ ບໍ່ໄດ້ດ້ອຍຄ່າລົງແມ່ນແຕ່ໜ້ອຍດຽວ ເພາະໜັ້່ງສືເຫຼົ່ານີ້ (ທີ່ຈະແນະນຳໃຫ້ອ່ານ) ເປັນບັນທຶກທາງປະຫວັດສາດອິກສ່ວນໜື່ງຂອງປະເທດ ຫຼື່ເວົ້າໄດ້ວ່າເປັນບັນທຶກປະຫວັດສາດໂດຍປະຊາຊົນກໍ່ວ່າໄດ້

ມື້ນີ້ຜຂ ຂໍແນະນຳໜັ່ງສືໜ່າອ່ານເຫຼັ້ມນີ້: "ລົງສູ່ຖະໜົນລ້ານຊ້າງ" ໂດຍ: ບຸນທະນອງ ຊົມໄຊຜົນ

ເປັນວັນະກັມທີເວົ້າເຖິ່ງການຕໍ່ສູ້າງທາງການເມືອງຂອງ ປ.ຊລາວ ໃນຊວ່ງສົງຄາມກາງເມືອງ ທີມີອາເມລິກາ ຢູ່ເບື້ອງຫຼັງ, ນອກນີ້ຍັງເວົ້າເຖິ່ງຄວາມຮັກຂອງໝຸ່ມສາວທີມີຄວາມແຕກຕ່າງທາງຊົນຊັ້ນ ໂດຍມີ ທ ບຸນຊົມ ຕົວລະຄອນເອກ ເປັນຕົວເດີນເລືອງ

ເລື້ອງຂອງເລື້ອງກໍ່ຄື່ ບຸນຊົມ ເປັນລູກຊາວນາເຂົ້າມາຮຽນຢູ່ວ.ຈ ແລະເກີດຮັກກັບ ແຈກເກິລີນ ລູກສາວຂອງນັກການທູດຝຮັ່ງ (ກະດ່ຽວວ່າ ແມ່ນ ແຈກເກິຣິນ ແຄນາດິ ໂອນາຊິສ  ເຫີເຫີໆໆໆ ນຶກວ່າໄປເອົານາງເອກ ຂອງທ່ານຈອນເຟ ທີເປັນສະຕຣີໝາຍເລກໜື່ງຂອງ ເມກາໃນເວລານັ້ນພໍດີ ມາໃຊ້ຊັ້ນດອກ! ), ແຕ່ແລ້ວຄວາມຮັກຂອງທັງສອງກໍ່ບໍ່ສົມຫັວງ. ບຸນຊົມ ຜູ້ເຫັນຄວາມອະຍຸດຕິທຳໃນສັງຄົມ, ເຫັນການກົດຂີ່ຂູດຮີດຂອງຜູ້ມີອຳນາດ ແລະຜູ້ມີຖານະທາງສັງຄົມກະທຳຕໍ່ຜູ້ທີດ້ອຍກວ່າ ເຮັດໃຫ້ລາວປ່ຽນຈາກໝຸ່ມທຳມະດາກາຍມາເປັນໝຸ່ມທີເຂົ້າຮ່ວມຂະບວນການປະຕິວັດຂອງປ.ຊລາວ

"ລົງສູ່ຖະໜົນລ້ານຊ້າງ"  ອາດຮຽກໄດ້ວ່າເປັນວັນະກຳທີສະທ້ອນເຖິ່ງເລື້ອງ ຮັກລະຫ່ວາງປະຕິວັດ.  ນອກຈາກສະທ້ອນໃຫ້ເຫັນເຖິງການຕໍ່ສູ້ທີສະແຫວງຫາຄວາມຢຸຕິທຳແລ້ວ ຍັງສື່ໃຫ້ເຫັນເຖິ່ງການຕໍ່ສູ້ພາຍໃນຂອງຕົນ(ເອງ) ຂອງມະນຸດຜູ້ໜື່ງ (ໝົດທຸກຄົນ) ທີ ຮັກ ໂລກ ໂກດ ຫຼົງ... ອັນເປັນທຳມະຊາດຂອງມະນຸດທຸກຄົນທີມີ

ຂໍຍົກເອົາບາງປະໂຫຍກໃນໜັ່ງສືເຫຼັ້ມນີ້ບາງຕອນທີສື່ໃຫ້ເຫັນຄວາມຮູ້ສຶກເຫງົ້າເສົ້າໃນຄວາມຮັກຂອງ ບຸນຊົມ (ທີຜຂ ມັກຫລາຍ, ອ່ານແລ້ວ ເອີຍຄຳວ່າ: ໂອ້ຍ, ຈັງແມ່ນເສົ້ານໍ ອອກມາພ້ອມເດີ ^^)

"ມີຄວາມຈຳເປັນໃດນໍ  ຄວາມຮັກຄັ້ງນີ້ຈື່ງເລືອນລາງໄປດັ່ງລະອອງໝອກຍາມເຊົ້າ................"

"ມີຄວາມຈຳເປັນໃດນໍ  ການພັດພາກນັ້ນ ຈື່ງບໍ່ໃຫ້ໂບກມືອຳລາ ຫຼືສັ່ງເສີຍແມ່ນແຕ່ຄຳດ່ຽວ..................."

"ຟ້າຄົງຈະປວດໃຈສຸດຝືນ  ຟ້າຈື່ງສະອື້ນໝົ່ນໝອງ ຊອກຊໍ້າໃນຊ່ວງ..........."

ຜຂ ຕ້ອງບອກໄດ້ຄຳດຽວວ່າ:  ອ່ານໜັ່ງສືເຫຼັ້ມນີ້ເຖີດ ທີຮັກ ເພື່ອນໆພັນລາວ !

ປລ. ສ່ວນໜັ່ງສືເຫຼັ້ມອື່ນໆໆ ຈະມາແນະຕາມທີຫຼັງ ----(ຄ້ານພີມລະ ຫາກະຮຽນໃຊ້ຄອມ)