ໄດອາຣີ່ຂອງ ຊາມາ ບາບາລາ: ຂ່າວລືຍິງສາວຖືກຂົ່ມຂືນບໍ່ມີຄວາມຈິງ

ຂຽນເມື່ອ: ກ.ລ.. 8, 2011 | ມີ 14 ຄຳເຫັນ ແລະ 0 trackback(s)

ໃນຍຸກສະໄໝປັດຈຸບັນ ເອີ້ນວ່າ ຍຸກເທັກໂນໂລຢີຂໍ້ມູນຂ່າວສານ ຫຼື ໄອທີ (IT) ຜູ້ໃດທີ່ມີແຫຼ່ງຂໍ້ມູນຂ່າວສານຫຼາຍກ່ວາໝູ່ ໄດ້ຮັບຂໍ້ມູນຂ່າວສານວ່ອງໄວ ທັນການ ຊັດເຈນ ຜູ້ນັ້ນຈະເປັນຜູ້ໄດ້ປຽບ ແລະ ຢູ່ລອດໃນສັງຄົມຕໍ່ໄປ ຈາກບົດບາດຄວາມສຳຄັນ ແລະ ຈຳເປັນດັ່ງກ່າວນັ້ນ ພັກ-ລັດຖະບານ ນັກການເມືອງ ນັກປົກຄອງ ແລະ ນັກບໍລິຫານທຸລະກິດທຸກລະດັບ ກໍລ້ວນແຕ່ມີຄວາມຕ້ອງການ ຂໍ້ມູນຂ່າວສານທີ່ຖືກຕ້ອງ ເພື່ອກຳນົດທິດທາງ ແລະ ແຜນດຳເນີນງານຂອງຕົນ.

ຍ້ອນຍຸກຂອງ (IT) ໂລກໜ່ວຍນີ້ຈຶ່ງຢູ່ໃນກຳມືຂອງຜູ້ຊອກຮູ້-ນຳທັນຍຸກທັນທຸກບັນຫາ ຢູ່ໃນທຸກທະວີບທີ່ລົງທາງ Internet ຍ້ອນແຫຼ່ງຂໍ້ມູນໄຮ້ຂີດພົມແດນ ການບໍລິໂພກຈຶ່ງເກີດມີຄວາມແຕກຕ່າງກັນໄປ ເຊິ່ງຕ້ອງຍອມຮັບວ່າ ບາງຂໍ້ມູນກໍເປັນຈິງ ແລະ ນຳຜົນດີໃຫ້ແກ່ຕົນ ແລະ ສັງຄົມ... ແຕ່ບາງຂໍ້ມູນກໍບໍ່ເປັນຄວາມຈິງ ແລະ ເປັນທີ່ນິຍົມຂອງກຸ່ມໄວລຸ້ນໃຫ້ໄຕ່ຕາມ ແລະ ປະພຶດຕົນໃນທາງທີ່ບໍ່ສອດຄ່ອງ ຕາມຮີດຄອງປະເພນີລາວ ທີ່ໄດ້ສືບສານກັນມານັບແຕ່ຄົນລຸ້ນປູ່...

ເມື່ອບໍ່ດົນມານີ້ ຢູ່ນະຄອນຫຼວງວຽງຈັນ ໄດ້ມີຂ່າວຮືຮາທີ່ຕໍ່ປາກຕໍ່ຄຳ ຈົນກາຍເປັນພາບພົດທີ່ສ້າງຄວາມເສື່ອມເສຍ ຕໍ່ບໍລິສັດທີ່ແອບອ້າງເຖິງເນື້ອໃນຂ່າວ ພໍສັງລວມໄດ້ວ່າ: ປະມານທ່ຽງຄືນຂອງຕົ້ນເດືອນມິຖຸນາ (ບໍ່ມີຂ່າວທີ່ຊັດເຈນວ່າແມ່ນມື້ໃດ) ມີສາວຈາກບໍລິສັດແຫ່ງໜຶ່ງ ຫຼັງຈາກທີ່ລົດໄປຕ້ອນເອົາກັບບໍລິສັດແລ້ວ ຍິງສາວທີ່ໃສ່ສະເກິດເຂີນໆຄົນນັ້ນ ກໍຂີ່ລົດຈັກກັບບ້ານ ພໍຮອດເຂດກໍ່ສ້າງທີ່ມີກຳມະກອນຕ່າງຊາດຢູ່ ບັງເອີນນ້ຳມັນລົດໝົດທັນທີ ກໍຖືກກຳມະກອນຂົ່ມຂືນ ທຳອິດພຽງ 2-3 ຄົນ ແລະ ກາຍເປັນຄົນທີ 20 ຫຼື 21 ຈົນຜູ້ກ່ຽວໝົດສະຕິ ແລ້ວຄົນສຸດທ້າຍນຳສົ່ງໂຮງໝໍ ແລະ ເສຍຊີວິດໃນເວລາຕໍ່ມາ ບາງຄົນພັດເວົ້າຕໍ່ປາກວ່າ: ຫຼັງຂົ່ມຂືນແລ້ວ ພວກກ່ຽວທັງ 20 ກ່ວາຄົນ ຖືກສົ່ງກັບຄືນປະເທດ ແລະ ປັບໄໝພຽງແຕ່ຜູ້ລະ 20 ລ້ານກີບວ່າຊັ້ນ.

ດ້ວຍຄວາມເອົາໃຈໃສ່ຂອງເຈົ້າໜ້າທີ່ທຸກຂະແໜງການ ໂດຍສະເພາະແມ່ນກອງບັນຊາການ ປກສ ເມືອງສີໂຄດຕະບອງ ເຊິ່ງເປັນບ່ອນທີ່ແອບອ້າງເຖິງ ໄດ້ລົງຊັນນະສູດຂ່າວ ແຕ່ວັນທີ 1ມິຖຸນາ 2011 ເຖິງວັນທີ 26ມິຖຸນາ 2011 ເພື່ອຊອກຫາແຫຼ່ງຂໍ້ມູນທີ່ຄ້າຍຄືກັນນັ້ນ ແຕ່ບໍ່ພົບ ແລະ ມີຂໍ້ສະຫຼຸບວ່າ: ເປັນຂໍ້ມູນບໍ່ເປັນຄວາມຈິງ.

ທ່ານ ຫົງຄຳ ຫອມສົມບັດ ຮອງກອງບັນຊາການ ປກສ ເມືອງສີໂຄດຕະບອງ ຜູ້ຊີ້ນຳວຽກງານຕຳຫຼວດຊີ້ແຈງວ່າ: ພວກເຮົາສົມທົບກັບບ້ານກັບກຸ່ມທົ່ວເມືອງ ນັບທັງປະສານທາງໂຮງໝໍ ທີ່ແຫຼ່ງຂ່າວແອບອ້າງເຖິງແຕ່ບໍ່ມີຂໍ້ມູນໃດໆ.

ຮອງກອງສືບສວນ-ສອບສວນ ປກສ ນະຄອນຫຼວງວຽງຈັນ ເຜີຍຕໍ່ໜັງສືພິມ ປກສ ເມື່ອບໍ່ດົນມານີ້ວ່າ: ພວກເຮົາກຳລັງຊອກແຫຼ່ງຂ່າວຢ່າງຈົດຈໍ່ວ່າ: ເລື່ອງນີ້ອອກຈາກໃຜ ຢູ່ໃສ ເມື່ອໃດ ພວກເຮົາຈະນຳຜູ້ປ່າວຂ່າວນັ້ນ ມາໃຫ້ຂໍ້ມູນຢ່າງຊັດເຈນ.

ການບໍລິໂພກຂໍ້ມູນຂ່າວສານ ມັນເປັນສິດເສລີພາບຂອງພົນລະເມືອງ ທີ່ມີຄວາມສາມາດເຂົ້າໄປເຖິງ ແຕ່ຕ້ອງເຂົ້າໃຈວ່າ: ປະເທດລາວຄຸ້ມຄອງລັດ ຄຸ້ມຄອງສັງຄົມດ້ວຍ 3ອຳນາດໃຫຍ່ ຄື: ອຳນາດນິຕິບັນຍັດ (ສະພາແຫ່ງຊາດ) ອຳນາດບໍລິຫານ (ລັດຖະບານ) ອຳນາດຕຸລາການ (ໄອຍະການສານ) ເຊິ່ງມີນາຍົກເປັນຫົວໜ້າລັດຖະບານນັ້ນ ເປັນໄປບໍ່ໄດ້ ທີ່ຄົນມີຄວາມຜິດແລ້ວພົ້ນໂທດ ໂດຍບໍ່ມີຂໍ້ກ່າວຫາ ແລະ ປະຕິບັດໂທດໃນກົດໝາຍອາຍາແຫ່ງ ສປປ ລາວ ໝວດທີ 2ມາດຕາທີ 3ໄດ້ກຳນົດເຖິງຂອບເຂດການນຳໃຊ້ ກົດໝາຍອາຍາສະບັບນີ້ ມີຜົນສັກສິດໃນທົ່ວ ສປປ ລາວ ບຸກຄົນໃດຫາກໄດ້ກະທຳຜິດທາງອາຍາ ຢູ່ໃນດິນແດນ ສປປ ລາວ ກໍຈະໄດ້ຮັບຜິດຊອບຕາມກົດໝາຍອາຍາ ຫຼື ກົດໝາຍອື່ນໆທີ່ໄດ້ກຳນົດໂທດທາງອາຍາ.

ຜູ້ຕາງໜ້າທາງການທູດ ຫຼື ບຸກຄົນທີ່ໄດ້ຮັບອະພິສິດທາງການທູດ ຕາມສັນຍາລະຫວ່າງຊາດ ເຊິ່ງໄດ້ກະທຳຜິດໃນດິນແດນ ສປປ ລາວ ກໍຈະໄດ້ຮັບການແກ້ໄຂທາງການທູດ ຫຼາຍກໍລະນີທີ່ຄົນຊາດອື່ນ ມາກະທຳຜິດຢູ່ເຂດນ່ານຟ້າ ເຂດນ້ຳແດນດິນຂອງລາວ ກໍລ້ວນແຕ່ຖືກດຳເນີນຄະດີຕາມກົດໝາຍຂອງລາວ ເຊັ່ນ: ຄະດີຕັດສິນປະຫານຊີວິດ ຄະດີຄ້າຂາຍ-ຂົນສົ່ງຢາເສບຕິດຂອງນາງ ສະມານຕາ ໂອໂລບາເຕີ ແຕ່ເລື່ອງນຳສົ່ງຈຳເລີຍໄປຕັດສິນຢູ່ປະເທດຕົນນັ້ນ ມັນແມ່ນການຕົກລົງລະຫວ່າງປະເທດ ໃນຖານສົ່ງຜູ້ຮ້າຍຂ້າມແດນ.

ຢ່າງໃດກໍດີ ຄະດີທີ່ກ່າວມາຂ້າງເທິງນັ້ນ ຄະນະບັນຊາ ປກສ ເມືອງສີໂຄດຕະບອງ ໄດ້ເຮັດບົດລາຍງານສະບັບເລກທີ 537/ປກສ.ສຄ ລົງວັນທີ 23 ມິຖຸນາ 2011 ເຖິງທ່ານເຈົ້າຄອງນະຄອນຫຼວງວຽງຈັນ ກ່ຽວກັບເລື່ອງດັ່ງກ່າວມານັ້ນ ລ້ວນແຕ່ເປັນເລື່ອງບໍ່ເປັນຄວາມເປັນຈິງ.

ກັບໄປໄດອາຣີ່ຂອງ ຊາມາ ບາບາລາ

ແຈ້ງເນື້ອຫາບໍ່ເໝາະສົມ

ຊາມາ ບາບາລາ

ເບິ່ງທັງໝົດ

ອ່ານຄືນຫຼັງ

2011 (21)
2010 (65)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.