ໃນວັນທີ 14 ມັງກອນ 2013 ທີ່ຫ້ອງປະຊຸມ ເຮືອນຮັບແຂກກະຊວງສຶກສາທິການ ແລະ ກິລາ (ສສກ) ນະຄອນຫຼວງວຽງຈັນ ໄດ້ຈັດພິທີປະດັບຫຼຽນໄຊແຮງງານ, ຫຼຽນກາແຮງງານ ແລະ ໃບຍອ້ງຍໍຂັ້ນລັດຖະບານ ໃຫ້ກັບຜູ້ທີ່ສ້າງຜົນງານດີເດັ່ນໃນໂຄງການຊາວໝຸ່ມອາສາສະໝັກຕະລຸມບອນ ລຶບລ້າງຄວາມບໍ່ຮູ້ໜັງສືບ້ານຕະປຶນພູ ເມືອງຕະໂອ້ຍ ແຂວງສາລະວັນ ຈຳນວນ 47 ທ່ານ, ໃນນັ້ນຫຼຽນໄຊແຮງງານຊັ້ນ I ໃຫ້ຈຳນວນ 2 ທ່ານ, ຊັ້ນ II ໃຫ້ 7 ທ່ານ, ຊັ້ນ III ຈຳນວນ 23 ທ່ານ, ນອກນັ້ນຍັງໄດ້ມອບໃບຍໍຍອ້ງຂັ້ນລັດຖະບານໃຫ້ຈຳນວນ 11 ທ່ານ ແລະ ປະດັບຫຼຽນກາແຮງງານໃຫ້ຈຳນວນ 4 ທ່ານ, ໂດຍເປັນກຽດເຂົ້າຮ່ວມໃນພິທີພ້ອມປະດັບຫຼຽນ ແລະ ມອບໃບຍ້ອງຍໍໃຫ້ອາສາສະໝັກດັ່ງກ່າວ ໂດຍທ່ານ ຄຳບຸ່ນ ດ້ວງປັນຍາ ເຈົ້າແຂວງໆ ສາລະວັນ, ທ່ານ ບົວລານ ສິລິປັນຍາ ລັດຖະມົນຕີ ຊວ່ຍວ່າການກະຊວງສຶກສາທິການ ແລະ ກິລາ, ທ່ານ ດຣ ວິໄລວົງ ບຸດດາຄໍາ ເລຂາຄະນະບໍລິຫານງານສູນກາງຊາວໝຸ່ມປະຊາຊົນ ປະຕິວັດລາວ.
ທ່ານ ດຣ ອິນຕອງ ເລີດສິນໄຊ ເລຂາທິການບໍລິຫານງານຊາວໝຸ່ມ ຊປປລ, ຄະນະພັກກະຊວງ, ເລຂາຄະນະບໍລິຫານງານຊາວໝຸ່ມກະຊວງສຶກສາທິການ ແລະ ກິລາ, ທັງເປັນຜູ້ຮັບຜິດຊອບໂຄງການ ຊາວໝຸ່ມອາສາສະໝັກຕະລຸມບອນລຶບລ້າງຄວາມບໍ່ຮູ້ໜັງສືກ່າວສະຫຼຸບລາຍງານວ່າ: ພາຍຫຼັງໄດ້ຮັບການມອບໜາຍໃນກອງປະຊຸມຄົບຄະນະ ຄັ້ງທີ 6 ຄະນະກຳມະກຳມາທິການແຫ່ງຊາດກ່ຽວກັບການປະຕິຮູບລະບົບການສຶກສາແຫ່ງຊາດ, ຄະນະບໍລິຫານງານຊາວໝຸ່ມກະຊວງສຶກສາທິການ ແລະ ກິລາ ໄດ້ສົມທົບກັບກົມຈັດຕັ້ງ, ກົມແຜນການ, ກົມການເງິນ, ກົມການສຶກສານອກໂຮງຮຽນ, ສະຫະພັນແມ່ຍິງ ແລະ ພະແນກສຶກສາທິການ ແລະ ກິລາແຂວງສາລະວັນ ເພື່ອກະກຽມຂໍ້ມູນພື້ນຖານຂອງບ້ານເປົ້າໜາຍ ແລະ ເປົ້າໜາຍລຶບລ້າງຄວາມບໍ່ຮູ້ໜັງສື ອາຍຸ 15 – 40 ປີ, ຊັ້ນປະຖົມລະດັບ 1 ຈຳນວນ 186 ຄົນ, ເປັນຍິ 107 ຄົນ ແລະ ແຜນງົບປະມານໂຄງການດັ່ງກ່າວ ແມ່ນເລີ່ມດຳເນີນມາແຕ່ຕົ້ນເດືອນພະຈິກ 2012 ເຊິ່ງມີຊາວໝຸ່ມຕະລຸມບອນລຶບລ້າງຄວາມບໍ່ຮູ້ໜັງສື ເຂົ້າຮວ່ມຈຳນວນ 16 ຄົນ, ຍິງ 5 ຄົນ ລົງປະຕິບັດໜ້າທີ່ປະຈຳຢູ່ບ້ານຕະປຶນພູ ເມືອງຕະໂອ້ຍ ແຂວງສາລະວັນ ເຊິ່ງປະກອບມີ 8 ຄຸ້ມບ້ານ ຄຸ້ມລະ 2 ຄົນຄື: ຄຸ້ມຕຸງລາກ, ຕຸງແຍງ, ຣະນະ, ຕະປຶນພູ, ຕວຍໃຫຍ່, ຕວຍນ້ອຍ, ຕຸງແສງພູ ແລະ ຕຸງແສງນ້ຳ ໂດຍຜົນການຈັດຕັ້ງປະຕິບັດໂຄງການໃນເບື້ອງຕົ້ນມີເປົ້າໜາຍລຶບລ້າງຄວາມບໍ່ຮູ້ໜັງສືອາຍຸ 15 – 40 ປີ ມີ 186 ຄົນ, ຍິງ 107 ຄົນ ແຕ່ເມື່ອດຳເນີນໂຄງການແລ້ວມີເປົ້າໜາຍເຂົ້າລຶບລ້າງ ເລີ່ມແຕ່ອາຍຸ 6 - 14 ປີ ມີ 126 ຄົນ, ເປັນຍິງ 61 ຄົນ ແລະ ອາຍຸ 15 – 40 ປີ ມີ 232 ຄົນ, ຍິງ 132 ຄົນ ລວມທັງໜົດເປັນ 358 ຄົນ ລື່ນຄາດໜາຍ 172 ຄົນ, ເປັນຍິງ 86 ຄົນ, ປະເມີນຜົນໄດ້ຮັບກວມ 95,25 ເປີເຊັນ.
ທ່ານ ດຣ ອິນຕອງ ເລີດສິນໄຊ ຍັງກ່າວຕື່ມອີກວ່າ: ນອກຈາກການປະຕິບັດໜ້າທີ່ໃນການຮຽນ - ການສອນຊັ້ນປະຖົມລະດັບ 1 ແລ້ວຍັງໄດ້ນຳພາ ພໍ່ແມ່ປະຊາຊົນຮັກສາອະນາໄມສາມສະອາດ ກິນ-ດື່ມສະອາດ, ຢູ່ສະອາດ ແລະ ນຸ່ງຫົ່ມສະອາດ ພ້ອມທັງການປິ່ນປົວພະຍາດເບື້ອງຕົ້ນ ເຮັດສວນຄົວ ເຮັດປ້າຍຄຸ້ມບ້ານ, ຫຼັກທຸງ ແລະ ຫຼິ້ນກິລາ ສິລະປະວັນນະຄະດີ. ແນວໃດກໍ່ຕາມສຳລັບເປົ້າໜາຍຕໍ່ໄປຂອງໂຄງການຊາວໝຸ່ມຕະລຸມບອນລຶບລ້າງຄວາມບໍ່ຮູ້ໜັງສືຂອງກະຊວງສຶກສາທິການ ແລະ ກິລາ ແມ່ນຈະສືບຕໍ່ດຳເນີນຢູ່ ແຂວງວຽງຈັນ, ແຂວງຄຳມ່ວນ ແລະ ແຂວງອື່ນໆທີ່ເຫັນວ່າເໜາະສົມ.

ໂຫວດເລີຍ! ເບິ່ງຜົນໂຫວດ

« ຕົວເລືອກສຳລັບແບບສຳຫຼວດ