ເມື່ອເຈົ້າແຫງນໜ້າເບິ່ງຟ້າ ແລະ ເອື້ອມມືໄປເພື່ອທີ່ຄ້ວາດາວ ເຖິງແມ່ນ ອາດຈະບໍ່ໄດ້ດາວຕິດມືມາດັ່ງທີ່ຕ້ອງການ ແຕ່ຂໍ້ໃຫ້ຮູ້ໄວ້ວ່າ: ສິ່ງທີ່ເຈົ້າຄ້ວາໄດ້ ຈັ່ງໃດກໍ່ບໍ່ແມ່ນດິນ

 ຫຼາຍໆທ່ານຄົງເຄີຍໄດ້ຍິນ ແລະ ບາງທ່ານອາດຈະໄດ້ໃຊ້ ຫຼື ປະສົບພົບພໍ້ຢູ່ ເຊັ່ນຄຳວ່າ: ຄວາມທໍລະມານ ຄືການລໍຄອຍ

ສຳລັບຂ້ອຍ ຂໍແນະນຳວ່າ: ໃນຊ່ວງທີ່ທ່ານກຳລັງລໍຄອຍບາງສິ່ງບາງຢ່າງນັ້ນ ທ່ານຄວນຫາກິດຈະກຳອື່ນເຮັດແທນ ເພາະຈະບໍ່ເສຍເວລາໂດຍໄຮ້ປະໂຫຍດ ແລະ ຈົ່ງຢ່າປັກໃຈກັບມັນ , ບໍ່ແນ່ສິ່ງທີ່ທ່ານລໍຄອຍອາດບໍ່ເປັນຈິ່ງກໍ່ໄດ້

ຫຼື ເພື່ອນໆຄິດແນວໃດ?

ຄົນເຮົາມີໂອກາດເຮັດຜິດ ຫຼື ເຮັດໃຫ້ຄົນອື່ນບໍ່ພໍໃຈ , ເຈັບປວດໄດ້ທຸກຄົນ . ແຕ່ສິ່ງສຳຄັນຄືຫາກຮູ້ວ່າຕົນເອງເຮັດຜິດແລ້ວ ມີຄວາມສຳນຶກຜິດ ພ້ອມທັງຮູ້ຈັກທີ່ຈະກ່າວຄຳຂໍໂທດແກ່ຜູ້ອື່ນທີ່ໄດ້ຮັບຜົນການກະທຳຂອງເຮົາ.

ການກ່າວຄຳຂໍໂທດ ເປັນການສະແດງຄວາມເສຍໃຈໃນສິ່ງທີ່ເຮົາເຮັດລົງໄປແລ້ວ ສົ່ງຜົນກະທົບຕໍ່ບຸກຄົນອື່ນ , ເຖິງແມ່ນຄຳວ່າ" ຂໍໂທດ " ຈະບໍ່ໄດ້ເຮັດໃຫ້ຄວາມເຈັບປວດຫຼຸດລົງ ຫຼື ເຮັດໃຫ້ຄວາມເສຍໃຈຫາຍໝົດໄປ , ແຕ່ຄຳຂໍໂທດມີຜົນທາງຈິດໃຈທີ່ຊ່ວຍໃຫ້ຜູ້ທີ່ໄດ້ຮັບຜົນກະທົບຮູ້ສຶກດີຂື້ນ ແລະ ຮັບຮູ້ວ່າເຮົາເສຍໃຈ ແລະ ສຳນຶກຜິດໃນສິ່ງທີ່ໄດ້ຫະທຳລົງໄປ ທັ້ງທີ່ບໍ່ໄດ້ຕັ້ງໃຈກໍ່ຕາມ ສິ່ງເຫຼົ່ານີ້ຈະຊ່ວຍໃຫ້ຜູ້ໄດ້ຮັບຜົນກະທົບຮູ້ສຶກດີຂື້ນ ແລະ ພ້ອມທີ່ຈະໃຫ້ອະໄພໃນຄວາມຜິດພາດທີ່ເກີດຂື້ນ.

ຄຳຂໍໂທດເປັນມາລະຍາດທີ່ສຳຄັນທີ່ເຮົາຄສນເວົ້າເມື່ອກະທຳຜິດ ແມ່ນຈະເປັນການກະທຳໂດຍບໍ່ຕັ້ງໃຈ ເປັນອຸປະຕິເຫດ ຫຼື ຄວາມຮູ້ເທົ່າບໍ່ເຖິງການ ແຕ່ຫາກເຮົາທຳຜິດພາດໄປ ຫຼື ເຮັດໃຫ້ໃຜຄົນໃດຄົນໜຶ່ງເຈັບປວດ ກໍຄວນສະແດງຄວາມຮັບຜິດຊອບເບື້ອງຕົ້ນ ດ້ວຍຄຳວ່າ " ຂໍໂທດ ".

 ໃຜທີ່ຕິດຕາມຂ່າວສານໃນຊ່ວງນີ້ ຄົງໄດ້ຍິນຄຳວ່າ" ດີເອັນເອ ( DNA ) " ຢູ່ເລື້ອຍໆ ເວລາທີ່ເກີດຄວາມສົງໄສວ່າ: ເດັກຄົນນີ້ກັບຜູ້ຊາຍຄົນນັ້ນ ເປັນພໍ່-ລູກກັນແທ້ຫຼືບໍ່ ຫຼື ໃນລະຄອນທີ່ມີການລັກລູກກັນໄປ ພໍໃຫຍ່ຂື້ນກໍ່ຕ້ອງມາກວດ DNA ເພື່ອພິສູດວ່າ ໃຜຄືທາຍາດຕົວຈິງກັນແທ້.

ມາຮອດນີ້ ຫຼາຍຄົນອາດຢາກຮູ້ວ່າ DNA ແມ່ນຫຍັງ? ດີເອັນເອ ( DNA ) ເປັນຊື່ຫຍໍ້ຂອງສານພັນທຸກຳ ແລະ ມີຊື່ເຕັມວ່າ: ( Deoxyribo Nucleic Acid ) ເຊິ່ງບັນຈຸຂໍ້ມູນທາງພັນທຸກຳຂອງສິ່ງມີຊີວິດຊະນິດນັ້ນໄວ້ ໂດຍການປະສົມປະສານລະຫວ່າງເຄິ່ງໜຶ່ງຂອງດີເອັນເອຂອງແມ່ ແລະ ອີກເຄິ່ງໜຶ່ງຂອງພໍ່ ລວມເປັນລັກສະນະຂອງເຮົາ ແລະ ຍັງສາມາດຖ່າຍທອດໄປຍັງລູກຫຼານ ( Offspring ) ໄດ້ທັງສີຜົມ , ໜ້າຕາ , ແຂນ , ຂາ ແລະ ໃບຫູ . DNA ພົບໃນເຊລ໌ຂອລສິ່ງມີຊີວິດທຸກຊະນິດ ໄດ້ແກ່: ຄົນ , ສັດ , ພືດ , ເຊື້ອລາ , ແບດທີເຣຍ , ໄວຣັສ ເປັນຕົ້ນ.

ຄວາມຈິງດີເອັນເອມາເກືອບ 140 ປີມາແລ້ວ , ຜູ້ຄົ້ນພົບດີເອັນເອ ຄື: ຟຣີດຣິຊ໌ ມີເຊີ ໃນປີ ພ.ສ 2412 ( ຄ.ສ 1869 ) ແຕ່ນັກວິທະຍາສາດສ່ວນໃຫຍ່ບໍ່ໃຫ້ຄວາມສຳຄັນກັບມັນ. DNA ກາຍມາເປັນທີ່ສົນໃຈໃນວົງກວ້າງຫຼາຍຂື້ນເມື່ອ 50 ປີທີ່ແລ້ວມານີ້ເອງ , ເມື່ອນັກວິທະຍາສາດໜູ່ມສອງຄົນໃນຂະນະນັ້ນຄື: ເຈມສ໌ ວັດສັນ ແລະ ຟຣານຊິສ ຄຣິກ ໄດ້ປະກາດການຄົ້ນພົບໂຄງສ້າງ DNA ວ່າເປັນສາຍຄູ່ທີ່ບິດພັບເປັນກຽວຄ້າຍຄືກັບຂັ້ນໄດວຽນ ແບບທີ່ຮຽກວ່າ: double helix , ໃນວາລະສານວິທະຍາສາດທີ່ເກັ່າແກ່ ແລະ ມີຊື່ສຽງໜຶ່ງຄື Nature ເມື່ອວັນທີ 25 ເມສາ 2496 ແລະ ສົ່ງຜົນໃຫ້ ວັດສັນ ແລະ ຄຣິກ ໄດ້ຮັບລາງວັນໂນເບລສາຂາການແພດ ຮ່ວມກັບນັກວິທະຍາສາດອີກທ່ານໜຶ່ງ ທີ່ມີຜົນງານກ່ຽວຂ້ອງກັນຢ່າງໃກ້ສິດ ຄື ມົວຣິສ ວິລຄິນສ໌ ໃນປີ 2505.

ການກວດດີເອັນເອ ເພື່ອພິສູດຄວາມເປັນບິດາ ອາດໃຊ້ວະທິກວດຈາກເລືອດ , ນ້ຳລາຍ , ກະດູກ , ຜົມ ຫຼື ກວດຈາກເຊລເຍື່ອບຸກະໂພງແກ້ມກໍ່ໄດ້ ໂດຍນຳສົ່ງໄປທີ່ຫ້ອງປະຕິບັດການ ເພື່ອທຳການສະກັດດີເອັນເອ ຜ່ານຂະບວນການກຳມະວິທີເຮັດໃຫ້ເປັນສານບໍລິສຸດ , ຈາກນັ້ນກຽມດີເອັນເອທີ່ສະກັດໄດ້ ນຳມາທຳການທົດສອບກັບຊຸດທົດສອບທີ່ຮຽກວ່າ: DNA markers ຈຳນວນ 16 ຊຸດ , ຜົນທີ່ໄດ້ຈະເປັນແບບແຜນສານພັນທຸກຳຂອງສິ່ງທີ່ໄດ້ສົ່ງກວດ ເມື່ອນຳແບບແຜນສານພັນທຸກຳຂອງສິ່ງກວດທັງໝົດມາປຽບທຽບກັນ ໃຊ້ການວິເຄາະທາງສະຕິຖິ ຄຳນວນຄວາມໜ້າຈະເປັນ ເຊິ່ງຮຽກວ່າ: Probaility of paternity.

ໃນທາງປະຕິບັດ ການແປຜົນການກວດດີເອັນເອເພື່ອພິສູດຄວາມເປັນບິດາ ບໍ່ຫຍຸ້ງຍາກແຕ່ຢ່າງໃດ ໃນກໍລະນີທີ່  Probaility of paternity ເປັນສູນ ກໍ່ສະແດງວ່າ: ເດັກຄົນນັ້ນບໍ່ແມ່ນລູກ ແລະ ໃນກໍລະນີທີ່  Probaility of paternity ເທົ່າກັບຮ້ອຍລະ 99.9 ສະແດງວ່າ: ເດັກຄົນນັ້ນເປັນລູກແນ່ນອນ.

ໂດຍທົ່ວໄປການກວດດີເອັນເອ ໃຊ້ເວລານານ 5-7 ວັນ , ໃນຕ່າງປະເທດຫ້ອງປະຕິບັດການກວດໄດ້ໄວທີ່ສຸດ ສາມາດຮູ້ຜົນກວດພາຍໃນ 3 ວັນ. ຢ່າງໃດກໍ່ຕາມ ການກວດດີເອັນເອນັ້ນ ມີຜົນຕໍ່ພາລະຜູກພັນຕາມກົດໝາຍ ເຊິ່ງເມື່ອກວດແລ້ວຕ້ອງມີການສ້າງເອກະສານຮັບຮອງບຸດດ້ວຍ , ແລະ ເມື່ອຕ້ອງການໃຫ້ເດັກເຮັດເອກະສານທາງກົດໝາຍໃດໆ ກໍ່ຕ້ອງມີການເຊັນຍິນຍອມຈາກຜູ້ເປັນພໍ່ສະເໝີ , ໃນກໍລະນີທີ່ແມ່ເປັນຝ່າຍລ້ຽງລູກຄົນດຽວ ກໍ່ຈະເກີດຄວາມບໍ່ຄ່ອງຕົວໃນຈຸດນີ້.

 ເຖິງ​ແມ່ນ​ຝົນ​ທີ່​ຕົກ​ໃນ​ເວລາ​ກາງຄືນ ຈະ​ຊ່ວຍ​ໃຫ້​ອາກາດ​ເຢັນ​ສະບາຍ ​ແຕ່​ກໍ່​ແປກ​ທີ່​ຍັງ​ໃຜ​ຫຼາຍໆ​ຄົນ​ນອນ​ຫຼັບ​ບໍ່​ສະໜິດ ຫຼັບໆ ຕື່ນໆ ຫຼື ຮູ້ສຶກ​ຕົວ​ຕະຫຼອດ ​ເປັນ​ປະຈຳ​ ​ເຮັດ​ໃຫ້​ຕື່ນ​ເຊົ້າ​ມາ​ບໍ່​ສົດ​ຊື່ຕ້ອງ​ແວະ​ຮ້ານ​ກາ​ເຟສະ​ເໝີ ​ເປັນ​ແບບ​ນີ້​ນານໆ​ໄປ ຫຼາຍໆ​ສິ່ງ​ເລີ່​ມບໍ່​ເຂົ້າ​ເລື່ອງ , ວັນ​ນີ້​ມີ​ເຕັກນິກ​ຫຼັບ​ສະບາຍ ທີ່​ຈະ​ຊ່ວຍ​ເຈົ້າ​ຜ່ອນຄາຍ ​ແລະ ສາມາດ​ຫຼັບ​ເຕັມ​ອີ່ມ​ກວ່າ​ທີ່​ເຄີຍ​ເປັນ​ມາ​ຝາກ.

1. ບໍ່​ຄວນ​ດີ່ມ​ເຄື່ອງ​ດີ່ມ ທີ່​ມີ​ກາ​ເຟອິນ​ຢ່າງ​ໜ້ອຍ 4 ຊົ່ວ​ໂມງ​ກ່ອນ​ການ​ເຂົ້າ​ນອນ ​ເພື່ອ​ບໍ່​ໃຫ້​ຮ່າງກາຍ​ຮັບ​ສານ​ກ​ະຕຸ້ນ ​ເຮັດ​ໃຫ້​ນອນ​ບໍ່​ຫຼັບ ທັ້ງທີ່​ຢາກ​ຈະ​ນອນ​ທີ່​ສຸດ.

2. ປິດ​ໂທລະສັບ​ກ່ອນ​ເຂົ້າ​ນອນ ​ເພາະ​ເຖິງ​ເວລາ​ພັກຜ່ອນ​ແລ້ວ ຢ່າ​ໃຫ້​ໃຜ​ໂທ​ມາກ​ວນ​ໃນ​ເວລາ​ທີ່​ໃກ້​ຈະ​ຫຼັບ ບໍ່​ສະ​ນັ້ນ​ເຈົ້າ​ອາດ​ຕາ​ສະຫວ່າງ​ໄປ​ອີກ​ຫຼາຍ​ຊົ່ວ​ໂມງ ກວ່າ​ຈະ​ຂົ່ມ​ຕາ​ຫຼັບ​ໄດ້.

3. ຫາກ​ທີ່​ນອນ​ເປັນ​ແອ່ງ ອາດ​ເຮັດ​ໃຫ້​ປວດ​ຫຼັງ , ປວດ​ໄຫຼ່ , ນອນ​ບໍ່​ສະບາຍ ລອງ​ປີ້ນ​ທີ່​ນອນ ​ເພື່ອ​ຈະ​ຊ່ວຍ​ນອນ​ສະບາຍ​ຂື້ນ.

4. ​ໃຫ້​ຄວາມ​ສຳຄັນ​ກັບ​ໝອນ​ໝູນ , ​ເລືອກ​ໝອນ​ທີ່​ຮູ້ສຶກ​ວ່າ​ນອນ​ແລ້ວ​ຮັບ​ກັບ​ຄໍ​ຫຼາຍ​ທີ່​ສຸດ ບໍ່​ນຸ່ມ ​ແລະ ບໍ່​ແຂງ​ຈົນ​ເກີນ​ໄປ.

5. ອາດ​ເປີດ​ເພງ​ເບົາໆ ຟັງ​ສະບາຍໆ , ​ເພື່ອ​ເຮັດ​ໃຫ້​ຮູ້ສຶກ​ຜ່ອນຄາຍ ອາດ​ເປັນ​ດົນຕຣີບັນ​ເລງ​ເບົາໆ ​ເພງ​ທີ່​ເຈົ້າ​ມັກ​ທີ່​ສຸດ.

6. ກ່ອນ​ນອນ​ພະຍາຍາມ​ເປີດ​ແສງ​ໄຟ​ນວນ​ຕາ ຫຼື ​ໄຟ​ສີ​ເຫຼືອງ​ສົ້ມ​ຈາກ​ໂຄມ​ໄຟ ຈະ​ເຮັດ​ດວງ​ຕາ​ປັບ​ແສງ​ໄດ້​ດີ , ປະສາດ​ຕາ​ເຮັດ​ວຽກ​ນ້ອຍ​ລົງ ຫຼັງ​ຈາກ​ທີ່​ປິດ​ໄຟ​ນອນ​ຈະ​ຫຼັບ​ສະບາຍ​ຫຼາຍ​ຂື້ນ.

7. ກ່ອນ​ນອນ​ໃສ່​ເສື້ອ​ຜ້າ​ສະບາຍໆ , ​ເລືອກ​ໃສ່​ຊຸດ​ນອນ​ທີ່​ເປັນ​ຜ້າ​ເບົາໆ ບໍ່​ໜາ​ຫຼາຍ​ຈົນ​ເກີນ​ໄປ ​ເພື່ອ​ໃຫ້​ເໝາະ​ກັບ​ອາກາດ ​ແລະ ບໍ່​ຄວນ​ໃສ່​ຊຸດ​ຊັ້ນ​ໃນ​ເວລາ​ນອນ.

8. ຄ່ອຍໆ​ລົ້ມ​ຕົວ​ລົງ​ນອນ ​ແລ້ວ​ສູດ​ຫາຍ​ໃຈ​ຍາວໆ​ຫ​ຼາຍໆ​ຄັ້ງ , ​ເມື່ອ​ເລີ່​ມຮູ້ສຶກ​ຜ່ອນຄາຍ​ແລ້ວ ກໍ່​ຄ່ອຍໆ​ປິດ​ເປືອກ​ຕາ​ລົງ ພຽງ​ເທົ່າ​ນີ້ ກໍ່​ຊ່ວຍ​ໃຫ້​ຜ່ອນຄາຍ , ຫຼັບ​ສະບາຍ ​ແລະ ຕື່ນ​ເຊົ້າ​ວັນ​ໃໝ່​ຢ່າງ​ມີ​ສຸຂະພາບ​ດີ.

 ວັນນີ້ເປັນອີກວັນໜຶ່ງ ທີ່ຂ້ອຍຮູ້ສຶກເກີດມີອາການຫົດຫູ່ຈິດໃຈເປັນທີ່ສຸດ , ມັນເໝືອນມີບາງສິ່ງລອຍມາອັດອັ້ນທີ່ລຳຄໍ ຈົນຫາຍໃຈຝືດ , ເວົ້າຫຍັງອອກມາບໍ່ໄດ້ ແລະ ຕີນມືເລີ່ມສັ່ນເຊັນ , ມັນບໍ່ແມ່ນອາການຂອງໂລກຮ້າຍ ຫຼື ສິ່ງຜິດປົກກະຕິທີ່ເກີດຂື້ນກັບໂຕຂ້ອຍແຕ່ຢ່າງໃດ. ແຕ່ມັນຄືອາການຂອງຄົນທີ່ສູນເສຍສິ່ງທີ່ສຳຄັນທີ່ສຸດໃນຊີວິດ ແລະ ບໍ່ມີວັນທີ່ຈະໄດ້ກັບຄືນມາ , ອາດເວົ້າໄດ້ວ່າ: ຄົງຈະບໍ່ມີໃຜ ຫຼື ບຸກຄົນໃດເພິ່ງປາຖະໜາຢາກຈະພົບພໍ້ມັນ ແລະ ໃນການສູນເສຍຄັ້ງນີ້ມັນໄດ້ສ້າງຄວາມເຈັບຊ້ຳໃຫ້ກັບຂ້ອຍເປັນທີ່ສຸດ , ເຖິງມັນໄດ້ຜ່ານກາຍມາເກືອບຈະໄດ້ 3 ປີແລ້ວ , ແຕ່ພາບນັ້ນຍັງເລື່ອນລອຍ ແລະ ຕິດໃນແກ້ວຕາຂອງຂ້ອຍຕະຫຼອດເວລາ ແລະ ຈະຍັງຄົງຢູ່ຕະຫຼອດໄປຈົນກວ່າວິນາທີສຸດທ້າຍຂອງລົມຫາຍໃຈ.

      ເລື່ອງຂອງເລື່ອງມີຢູ່ວ່າ: ໃນຄ່ຳຄືນທີ່ຫງຽບສະຫງັດຂອງວັນທີ່ 30 ເດືອນເມສາ ປີ 2008

ພາຍໃຕ້ຊາຍຄາຂອງເຮືອນຫຼັງໜື່ງ , ມັນເປັນເຮືອນຂອງຂ້ອຍເອງ ເຊິ່ງເຕັມໄປດ້ວຍຄວາມໂສກເສົ້າເສຍໃຈ ເມື່ອ ”ພໍ່ “ ຜູ້ທີ່ຮົ່ມໂພຮົ່ມໄຊ ແລະ ເປັນຫຼັກເສົາທີ່ແສນເຄົາລົບຮັກໄດ້ມາຈາກໄປຢ່າງບໍ່ມີວັນ

ກັບຄືນມາ , ພາຍຫຼັງທີ່ສຳເລັດວຽກທັງໝົດ ຂ້ອຍກໍ່ໄດ້ກັບເຂົ້າປະຈຳວຽກທີ່ Office ແລະ ມຸ່ງງານ

ຕາມທີ່ການຈັດຕັ້ງໄດ້ມອບໃຫ້ ເຊິ່ງບາງວັນຈົນລືມຮອດກິນເຂົ້າ ແລະ ບາງທີກໍ່ຫອບເອົາວຽກມາເຮັດທີ່

ບ້ານ ເພື່ອໃຫ້ໄດ້ຢູ່ກັບແມ່ , ໃກ້ສິດແມ່ ຜູ້ເຊິ່ງເປັນທີ່ເພິ່ງຄົນສຸດທ້າຍຂອງຂ້ອຍ. ແຕ່ກໍ່ປະຕິເສດບໍ່ໄດ້

ເພາະວຽກທີ່ຂ້ອຍເຮັດ ຕ້ອງໄດ້ອອກນອກເມືອງ , ຖ້າຫາກຄອບຄົວມີອ້າຍນ້ອງຫຼາຍຄົງຈະດີບໍ່ໜ້ອຍ

ແຕ່ໜ້າເສຍດາຍ ເພາະໃນຄອບຄົວ ມີພີ່ນ້ອງກັນພຽງແຕ່ສອງຄົນ ເຊິ່ງຂ້ອຍເປັນຄົນທຳອິດ ແລະ ມີ

ນ້ອງສາວອີກຄົນໜຶ່ງເປັນຄົນສຸດທ້ອງ . ນັບວ່າຂ້ອຍໄດ້ກາຍເປັນຫົວໜ້າຄອບຄົວ ທີ່ດູແລຊີວິດການເປັນຢູ່ຂອງແມ່ ແລະ ນ້ອງ .

      ໃນຊ່ວງເວລານັ້ນເອງ ທີ່ຂ້ອຍສັງເກດເຫັນແມ່ມີຄວາມສະບາຍໃຈຂື້ນມາແດ່ໜ້ອຍໜຶ່ງ ແລະ ມີຫຼາຍສິ່ງເຂົ້າທີ່ເຂົ້າທາງ.

      ເວົ້າໄດ້ວ່າ: ມັນເປັນວາລະໜຶ່ງທີ່ຂ້ອຍເຫັນແມ່ມີຄວາມສຸກ , ຫຼັງຈາກນັ້ນມາເປັນເວລາບໍ່ເຖິງ

ປີ , ເຫດການບໍ່ຄາດຝັນກໍ່ໄດ້ເກີດຂື້ນກັບຊີວິດຂອງຂ້ອຍ ເມື່ອແມ່ຜູ້ບັງເກີດເກົ້າໄດ້ມາຈາກຂ້ອຍໄປອີກຄົນ ຍ້ອນເສັ້ນເລືອດໃນສະໝອງແຕກ , ມັນເປັນການສູນເສຍອັນໃຫຍ່ຫຼວງທີ່ຈະຮັບເອົາໄດ້ . ເຖິງຈະເປັນຊາຍທີ່ມີຈິດໃຈໝັ້ນທ່ຽງປານໃດກໍ່ຕາມ ແຕ່ນ້ຳຕາກໍ່ຫຼັ່ງອອກມາໂດຍທີ່ບໍ່ໄດ້ບັງຄັບມັນ. ໃນຕອນນັ້ນເອງທີ່ຂ້ອຍບໍ່ຮູ້ຈັກຊິເຮັດ ແລະ ຄິດຫຍັງບໍ່ອອກ ມັນມືດແປດດ້ານໄປໝົດ ໄດ້ແຕ່ອຸທານໃນໃຈ “ ໂອ! ນີ້ໜໍຊີວິດ ເກີດແກ່ເຈັບຕາຍ ເປັນສິ່ງທີ່ຕ້ອງພົບພໍ້ ແລະ ປະຕິເສດບໍ່ໄດ້ “.

ຫຼັງຈາກນັ້ນພຽງສາມເດືອນ ຂ້ອຍກໍ່ຖືກແຕ່ງຕັ້ງໃຫ້ໄປຄຸມງານກໍ່ສ້າງ ( ໂຄງການກໍ່ສ້າງ - ຕໍ່ເຕີມ ນ້ຳປະປາທີ່ສາຂາເມືອງວຽງໄຊ ) ຈົນໂຄງການສຳເລັດລົງໃນກາງເດືອນກໍລະກົດ , ຕໍ່ມາກໍ່ໄດ້ລົງສຳຫຼວດແຫຼ່ງນ້ຳທີ່ເມືອງແອດ ເພື່ອມາກໍ່ສ້າງນ້ຳປະປາ , ໃນຊ່ວງເວລານັ້ນກໍ່ຖືກທາບທາມໃຫ້ມາສຶກສາຕໍ່ຈົນເຖິງປະຈຸບັນ ນັບເປັນຄັ້ງທຳອິດໃນຊີວິດທີ່ໄກບ້ານ ແລະ ຍາວນານເຊັ່ນນີ້. ແຕ່ກໍ່ຖືວ່າເປັນຊ່ວງເວລາທີ່ມີຄ່າຂອງຂ້ອຍ , ແລະ ຈະພະຍາຍາມເຮັດໃຫ້ດີທີ່ສຸດ ເພື່ອຊີວິດ ແລະ ອະນາຄົດ.

ທຸກວັນນີ້ ຄິດເຖິງ “ ພໍ່ ແລະ ແມ່ “ ທີ່ສຸດເລີຍ ແລະ ກໍ່ໄດ້ແຕ່ພາວະນາວ່າ: ຖ້າຫາກຊາດໜ້າມີຈິງ ກໍ່ຂໍໃຫ້ລູກຄົນນີ້ໄດ້ກຳເນີດມາເປັນລູກຂອງ”ພໍ່ ແລະ ແມ່”ອີກຄັ້ງ.

ຫວັງວ່າໃຜທີ່ໄດ້ອ່ານບົດຄວາມນີ້ ອາດເຮັດໃຫ້ຄິດໄດ້ວ່າ: ຊີວິດນີ້ເກີດມາໄດ້ພຽງຄັ້ງດຽວ

ແລະ ໃນຊ່ວງເວລາທີ່ “ ພໍ່ , ແມ່ “ ທ່ານຍັງມີຊີວິດຢູ່ນັ້ນ ຈົ່ງສ້າງແຕ່ຄວາມດີໃຫ້ເພິ່ນໄດ້ພູມໃຈ ເພື່ອຈະບໍ່ຖືກວິຈານວ່າ: ເກີດມາເສຍຊາດ.