ທຳມະຊາດບ້ານຂ້ອຍ

                ບ້ານຂ້ອຍນີ້                     ນາມວ່າຫາດຍາ

                ງາມໜັກໜາ                     ພູຜາປ່າໄມ້

                ນ້ຳອູໄຫລ                       ຜ່ານຜ່າທາງແຄມ

                ຫລຽວແນມໄປ                   ທາງເໜືອມີແກ້ງ

                ແສນ້ຳແຮງ                      ເປັນຟອງຄື້ນທັ່ງ

                ພວກເຮົານັ່ງ                     ຂີ່ເຮືອລ່ອງຫລິ້ນ

                ຍິນສະອອນ                      ສຽງນົກໜູຮ້ອງ

                ດັງຄຶກກ້ອງ                      ໄປທົ່ວທາລາ

                ງາມແທ້ນາ                       ຜານາກຜາທຶງ

                ຕົກຕະລຶງ                        ຍາມເມື່ອໄດ້ເຫັນ

                 ຮູບຮ່າງເປັນ                     ຄືຫວດເຮົາປີ້ນ

                 ຍາມທ່ຽວຫລິ້ນ                   ເຮົາຊື່ນບານໃຈ

                 ນ້ຳອູໃຫຍ່                       ນັ້ນມີຂົວຜ່ານ

                 ມີດ່ານຕັ້ງ                       ກວດລົດໄປມາ

                 ຊື່ນອຸລາ                        ເມື່ອໄດ້ໄປຊົມ

                 ຊ່າງງາມສົມ                     ຜູ້ຄົນຍົກຍ້ອງ

                  ສຽງດັງກ້ອງ                    ຄົກລິ່ນຫາດຍາ

                  ມີກ່າວມາ                                                       ແຕ່ເດີມຄາວກີ້

                  ບ້ານຂ້ອຍນີ້                      ທິວທັດງາມຫລາຍ

                  ມີດອນຊາຍ                      ໄພສານກວ້າງໃຫຍ່

                  ຊື່ດອນຫລວງ                     ຂວັນໃຈປະຊາ

                  ຍາມເດືອນຫ້າ                     ຕົບທາດແຂ່ງກັນ

                  ແສນສຸກສັນ                       ກັບທຳມະຊາດ

                  ນ້ຳໄຫລຫາດ                      ເປັນໜ້າສະອອນ

                   ປາລົງຄອນ                       ໝູ່ຝູງນ້ອຍໃຫຍ່

                   ແສນສຸກໃຈ                       ບ້ານເມືອງຂ້ອຍເອີຍ !

                             ຈຳຈາກບ້ານ

                 ຈຳຈາກບ້ານ                 ຖານຖິ່ນເຄີຍເນົາ

                 ມາສຶກສາ                   ຢູ່ດິນແດນກວ້າງ

                 ລາໄລແລ້ວ                  ເຮືອນເຄີຍນອນນັ່ງ

                 ຈອນຈາກເຈົ້າ                 ມາສູ້ຮ່ຳຮຽນ

                 ຂຽນແຕ່ງແຕ້ມ                ລາຍລັກອັກສອນ

                 ເປັນກາບກອນ                ສື່ສານຫາເຈົ້າ

                 ໃຈລອຍເລື້ອຍ                ຄະນຶງນຳໝູ່

                 ຄາວກ່ອນກີ້                 ເຄີນຫລິ້ນຊື່ນຊົມ

                 ຮຽມຈາກເຈົ້າ                ມາເພື່ອສຶກສາ

                 ພັດພາກລາ                 ຮ່ຳຮຽນຄວາມຮູ້

                 ມາເສີມສ້າງ                 ເຮືອນຊານເຮືອງຮຸ່ງ

                 ແປປ່ຽນໃຫ້                 ເມືອງບ້ານງົດງາມ

                 ຄວາມຄິດນັ້ນ                ຢາກຢູ່ອາໄສ

                 ນຳອາວອາ                  ແມ່ມາດາເຄົ້າ

                 ເນົາແນບຂ້າງ                 ຄຽງກາຍອົບອຸ່ນ

                 ແລງຄ່ຳຄ້ອຍ                 ເຮົາພ້ອມພ່ຳພຽງ     ນັ້ນນາ

                 ຈອນຈາກແລ້ວ                ແດນຖິ່ນຮຽມຮັກ

                 ຈຳໃຈລາ                    ເພື່ອມາຮຽນຮູ້

                 ທຸກທົນສູ້                   ເຝິກຝົນຕົນເກັ່ງ

                 ດີເດັ່ນແລ້ວ                  ຊິເຕື້ອງຕ່າວຄືນ    ແທ້ເນີ

                          ( ຂໍເປັນກຳລັງໃຈໃຫ້ຄົນຈາກບ້ານທຸກໆຄົນເດີ )

                     ່ນັບແຕ່ຮຽມຈາກເຈົ້າ     ແມ່ມາດາ

                     ພັດພາກຈາກແມ່ມາ     ເພື່ອຮຽນຮູ້

                     ມາຢູ່ດິນແດນກວ້າງ     ພາກໝູ່ຄູ່

                     ລຳບາກລູກທົນສູ້       ບໍ່ທໍ້ຖ້ອຍ

                     ທຸກວັນຄະນຶງພໍ້        ບ້ານເມືອງເຮົາ

                     ພີ່ນ້ອງເຄີຍເນົາຮ່ວມ     ຈົ່ງລໍຄອຍ

                     ຄິດເຖິງບິມາດາ        ໃຈເມີລອຍ

                     ເໝືອນສັກກຸນານ້ອຍ      ພາກຈາກຮັງ

                     ພໍ່ແມ່ຈົ່ງລໍວັນ          ລູກກັບຕ່າວ

                     ຄືນຖິ່ນຖານເຮືອນຢ້າວ     ບ້ານເກົ່າຫຼັງ

                     ກ່ອນມາລູກຍັງຈຳ        ຄຳແມ່ສັ່ງ

                     ຈົ່ງຕັ້ງໃຈສຶກສາ         ຮ່ຳຮຽນເດີ   ລູກເອີຍ!

                            (ແຕ່ງຈາກໃຈເດີ ມອບແກ່ຄົນຫ່າງໄກບ້ານທຸກຄົນ )

                                                        ່ຫຼວງພະບາງແດນງາມ

                  ຫຼວງພະບາງເຂດແຄວ້ນຖານຖິ່ນ         ແດນເໜືອ

                  ເຈົ້າຊ່າງງາມເຫຼືອຫຼາຍທົ່ວແດນ          ດິນດ້າວ

                  ຕັ້ງຢູ່ທາງຝ່າຍກ້ຳພູຫຼວງ                   ເຂົາຊ່າ

                   ຕິດຊາຍແດນລາວຫວຽດ                  ອ້າຍນ້ອງແມ່ດຽວ

           ຫຼວງພະບາງອານາເຂດກວ້າງ      ງາມເດັ່ນ

           ໂຮມສິບສອງເມືອງເປັນດິນລາວ     ໂຮມເຕົ້າ

           ນະທີເຊືອງແຊງຄານອູພ້ອມ         ຍາວຍຽດ

           ລຳທານນ້ອຍໄຫຼເຂົ້າ              ໂຮມສູ່ແມ່ຂອງ

           ແດນຜາທອກພູງາມເດັ່ນແມ່ນ        ເມືອງງອຍ

           ສັກກຸນາເວີນລອຍນະພາ           ຊົມຊື່ນ

           ພູນາງນອນລຽນຊອນຊ້ອນ         ງາມຍິ່ງ

           ຫວານຊື່ນສຽງຊາວເມືອງ          ຂັບລຳວາດຄ່ອງ

           ນ້ຳບາກລ້ອງຖິ່ນໝາກກ້ຽງຫວານ      ລືຊ່າ

           ເຂົ້າຂາວສາວງາມວິລະຊົນ        ຄົນກ້າ

            ຖ້ຳຕິ່ງປາກອູງາມສົມຄຳ         ຍໍຍ້ອງ

            ບ້ານຊ່າງໄຫຜານາກ          ຜາແອ່ນງາມຕາ

            ຫຼວງພະບາງມາກມາຍສະຖານ    ທ່ອງທ່ຽວ

            ຂຽວງາມທຳມະຊາດຕາດແສ້       ກວາງຊີ

            ແດນແຫ່ງມໍລະດົກເອກອ້າງ       ຊາວເມືອງ

            ວັດຊຽງທອງພູສີ              ມິ່ງເມືອງລ້ານຊ້າງ

            ມີຕຳນານມູນເຄົ້າພະບາງ       ຂັບທຸ້ມ

            ປ່າໄມ້ຂຽວອຸ້ມທຸ້ມແມ່ນເຂດພູທ້າວ    ພູນາງ

            ຖ້ຳກ່າງງາມໜັກໜາຢູ່ເມືອງ       ຈອມເພັດ

            ເມືອງໂພນໄຊປາກແຊງ         ແດນປ່າງາມລ້ຳ

            ເມືອງວຽງຄຳພູຄູນດັ່ງກ້ອງ       ແດນໜາວ

            ຫວານວາຈາສາວເມືອງນານກ່າວ     ອ່ອນນ້ອມ

            ຖິ່ນຊຽງເງິນສົນຫຼວງລືກ້ອງ        ໄປທົ່ວ

            ໂພນທອງຖະໜອມນ້ອຍ         ນ້ອງຫຼ້າເມືອງໃໝ່

             ນ້ຳໃຈຊາວເມືອງມີເຫຼືອຫຼາຍ     ມາກຍິ່ງ

             ມີຫຼາຍສິ່ງເປັນໜ້າສົນໃຈ       ຈິງແທ້

             ບຸນສົງການພາກັນໂຮມແຫ່      ພະບາງ

             ປະກວດຍິງງາມແຫ່             ເປັນນາງສັງຂານ

             ງານຊ່ວງເຮືອເດືອນເກົ້າຍິ່ງໃຫຍ່      ໜັກໜາ

             ຊາວເມືອງຫຼວງສຸພາບອ່ອນຫວານ      ຍາມຍິ້ມ

              ຂໍເຊີນຊວນພີ່ນ້ອງມາຊົມ           ມາແວ່

              ເມືອງຊຽງດົງຊຽງທອງ            ລ້ານຊ້າງລືຊາ    ແດ່ເນີ.

                                            ຊີວິດບໍ່ຕື່ນຕົວສູ້                       ບໍ່ຄວນຄູ່ຄົມຊີວິດ

                                             ລິດທະເລບໍ່ມີຟອງ                 ບໍ່ຄ່ອງຄົມທະເລໄດ້

                                              ໄຟບໍ່ມີຄົນໄຕ້                       ແນມໄກຊິເຫັນຮຸ່ງຕາລື

                                             ເຮືອຄັບຄຸງຫາດຕື້ນ               ຄັນບໍ່ບືນແບກຍູ້

                                                                                          ຖູທື້ນທັ່ງຊິໄປ     ບໍນໍ  !
ໍ