ກອນ: ຫວນ​ຄືນ 2 ທັນວາ

ພະຈິກ​ກາ​ຜ່ານ​ພົ້ນ           ກາຍ​ລ່ວງ​ເລີຍ​ໄປ

ວັນ​ເວລາ​ວຽນ​ເຖິງ           ທັນວາ​ເດືອນ​ດວງ​ແກ້ວ

ສຸກ​ສໍາລານ​ເລີດ​ລໍ້າ          ​ເປັນ​ເດືອນ​ຍຶດອໍານາດ

​ເອົາ​ໄຊຊະນະ​ໃຫ້            ປວງ​ຊົນ​ໄດ້​ຊື່ນ​ຊົມ

2 ທັນວາ​ໃຫຍ່​ກ້າວ          ຈະ​ເລີ​ນຮຸ່ງ​ເຮືອງ​ແສງ​

ມວນ​ຊາວ​ລາວ​ພົງພັນ        ຮ່ວມ​ສະຫຼອງສຸກ​ລໍ້າ

ຈິດ​ໃຈ​ເບີຍ​ບານ​ແຍ້ມ         ສາມັກຄີ​ມ່ວນ​ຊື່ນ

ບຸກບື່ນ​ແປປ່ຽນສ້າງ          ຊາດ​ລາວ​ໃຫ້ຮຸ່ງ​ເຮືອງ

ທັນວາ​ເດືອນ​​ແຫ່ງແກ້ວ       ປະດັບ​ເພັດ​ຈິນດາ

​ເປັນ​ວັນ​ມະ​ໂຫລານ          ຂອງ​ເຜົ່າ​ພົງພັນ​ເຊື້ອ

ຫວນ​ປະຫວັດສາດ​ໃຫ້        ຊາວ​ລາວ​ໄດ້​ຈໍາ​ຈື່

ປະ​ເທດ​ເຮົາ​ກ່ອນ​ນັ້ນ         ຖືກ​ຕ່າງ​ດ້າວ​ຮຸກ​ຮານ

ນັບ​ສະ​ໄໝກ່ອນ​ກີ້           ມານ​ຝຣັ່ງບຽດຍຶດ

​ແຍກ​ດິນ​ດາວ​ເປັນ​ສອງ        ​ແມ່​ຂອງ​ເປັນ​ແດນ​ຂັ້ນ

​ເຮັດ​ໃຫ້​ເຮົາ​ເສຍ​ບ້ານ         ​ແດນ​ດິນ​ອາ​ໄສ​ຢູ່

ສູນ​ເສຍ​ລຸງ​ແມ່​ປ້າ           ອາວ​ອາ​ພ້ອມ​ໄຮ່​ສວນ  ທ່ານ​ເອີຍ

​ເມ​ລິ​ກາ​ຍິ່ງ​ຊໍ້າ              ​ເຈັບ​ຈົນ​ກາຍ​ເປັນ​ແຜ

ມັນ​ຂົນ​ລະ​ເບີດ​ມາ           ຖອກ​ເທ​ໃສ່​ເມືອງ​ບ້ານ

ນາ​ສວນ​ສາລີ​ເຂົ້າ            ກັບກາຍ​ເປັນ​ດິນ​ຖ່ານ

​ເຮືອນ​ຊານ​ມຸ່ນໝົດ​ໄໝ້        ​ເຈັບ​ໃຈ​ແທ້​ແມ່​ເອີຍ

​ເຖິງ​ເວລາ​ລ່ວງ​ລໍ້າ           ຜ່ານ​ກາຍຫຼາຍ​ເດືອນ​ປີ

ປະຫວັດ​ລາວ​ຍັງ​ມີ           ຈື່​ຈໍາ​ຈົດ​ເອົາ​ໄວ້

ສອງ​ສັດຕູ​ມານ​ຮ້າຍ          ມັນ​ທໍາລາຍ​ດິນ​ແມ່

​ໂທດ​ກໍາ​ເຫຼືອ​ແຜ່ນ​ຟ້າ         ບໍ່​ອາດ​ລ້າງ​ລົບ​ຫາຍ

ປວງ​ປະຊາ​ໃຫຍ່​ນ້ອຍ         ຮ່ວມ​ສານ​​ໃຈໜຶ່ງດຽວ

ຂັບ​ຕີ​ສັດຕູ​ມານ             ຍາດ​ເອົາ​ອໍານາດ​ໄວ້

ຍົກ​ອິດສະຫຼະ​ໃຫ້            ປະຊາ​ໄດ້​ຊົມ​ຊື່ນ

ຊາວ​ລາວ​ທຸກ​ຊາດ​ເຊື້ອ        ບານ​ແຍ້ມ​ຊື່ນ​ອຸລາ

ພັນ​ເກົ້າ​ຮ້ອຍ​ເຈັດ​ຫ້າ         ​ເຜົ່າ​ພັນ​ລາວ​ໂຮມ​ດຽວ

2 ທັນວາສົດ​ໃສ            ສະຖາ​ລາວ​ອອກ​ພົ້ນ

​ແອກ​ປົກຄອງ​ມານ​ຮ້າຍ       ພາ​ໃຫ້​ລາວ​ກ້າ​ເກັ່ງ

ພັດທະນາ​ຊ່ວຍ​ສ້າງ          ​ເຮືອງ​ເຫຼື້ອມທົ່ວ​ໂລກາ  ນັ້ນ​ແລ້ວ!!

-ຍິນ​ຂ່າວ​ຊາຍ​ຈາກ​ບ້ານ.......      ​ໄປ​ຮໍ່າຮຽນການ​ທະຫານ

ນານຫຼາຍປີ​ຈິງ​ສໍາ​ເລັດ........      ຈັ່ງ​ຊິ​ຕ່າວ​ຄືນ​ບ້ານ

ກັບ​ຄືນ​ມາ​ຫາ​ນ້ອງ ..........        ດວງສະໝອນຜູ້​ຄອຍ​ຢູ່

ຄິດ​ເຖິງ​ຄໍາ​ພີ່​ກ່າວ​ເວົ້າ.........      ມະ​ໂນ​ນ້ອງ​ສຸດ​ຄະ​ນຶງ​ ແທ້ນາ

​-ເປັນ​ແນວ​ໃດ​ພີ່​ອ້າຍ   ...........   ຍັງ​ຄ່ອຍ​ສະບາຍ​ໃຈ    ຢູ່​ບໍ?

ຫຼືດວງ​ໃຈ​ມົວໝອງ ..........        ຄິດ​ແຕ່​ຄອງ​ຄືນ​ບ້ານ

​ເປັນ​ແນວ​ໃດ​ກາຍ​ເຈົ້າ.........      ຍັງ​ມີ​ແຮງ​ສານ​ຕໍ່  ຢູ່​ບໍ?

ຫຼືຊາຍ​ທົນ​ໂສກ​ເສົ້າ    ...........   ຂາດ​ຄົນ​ຊວ້ານ​ຊ່ວຍ​ຊູ  ຊາຍ​ເອີຍ

-ທຸກຫຼືສຸກ​ຈົ່ງ​ຜ່ານ​ພົ້ນ.........      ແລ​ເຫັນ​ປ່ອງ​ທາງ​ໄປ  ພີ່​ເນີ

ບິດາ-ມາດາ​ຍັງ​ລໍ​ຫວັງ........      ພີ່​ຊາຍ​ທະຫານ​ຜູ້​ໃຈ​ກ້າ

ນົງຄານ​ຍັງ​ຄອຍ​ຖ້າ    ..........   ສັນຍາ​ຮັກ​ຍັງ​ຈໍາ​ຈື່

ທໍາ​ຕາມ​ສຸພາສິດ​ກ່າວ​ໄວ້ ..........   ​ເກົ້າ​ອົດ​ເກົ້າ​ເຍື້ອນ

                          ຫາກ​ຊິ​ໄດ້​ທ່ອນ​ຄໍາ  ​ແທ້​ແລ້ວ

-ຂໍ​ຝາກ​ກອນ​ບາດ​ທ້າຍ........      ​ເປັນ​ແຫ່ງ​ແຮງ​ໃຈ

ຄົນ​ດີ​ຈົ່ງ​ມີ​ພະລັງ.............            ໝັ່ນສຶກສາຮຽນຮູ້

ທຸກ​ຍາກ​ພຽງ​ໃດ​ຈົ່ງ​ສູ້   ...........       ອຸປະສັກ​ມາກ​ມາຍ​ຕ້ອງ​ຜ່ານ​ຜ່າ

ຈໍາ​ສັນຍາ​ທີ່​ກ່າວ​ໄວ້    ..........        ​ໃຫ້​ເປັນ​ໄດ້​ດັ່ງ​ໃຈ​ຫວັງ  ​ແທ້​ເນີ

ກອນ ສັນຍາ​ວັນ​ລອຍກະ​ໂທ​ງ

ພໍ​ເມື່ອ  ບຸນ​ສົງການ​ລ່ວງ​ລໍ້າ        ​ເດືອນ​ສີ່​ວັນ​ສາກົນ

      ສອງ​ຄົນ​ເຮົາ​ພາກັນ          ທ່ຽວສົງການ​ບານ​ຊ້ອຍ

      ພາກັນ​ສັນຍາ​ໄວ້            ຈະ​ຮັກ​ກັນ​ຊົມ​ຊື່ນ

      ຂໍ​ຮັກ​ພຽງ​ແຕ່​ນ້ອງ           ຄົນ​ນີ້​ບໍ່​ປ່ຽນ​ແປງ

      ພໍ​ສົງການ​ຜ່ານ​ພົ້ນ           ກໍລະກົດ​ວຽນມາ

      ​ເປັນ​ບຸນ​ຈໍາ​ວັດ​ສາ           ບັນດາ​ພະສົງ​ເຈົ້າ

      ວອນ​ຄົນ​ດີ​ລໍ​ອ້າຍ            ອອກ​ພັນ​ສາ​ຈະ​ຕ່າວ

      ວາຈາ​ຊາຍ​ກ່າວ​ເວົ້າ          ຕົວ​ນ້ອງ​ແມ່ນ​ຈື່​ຈໍາ  ຊາຍ​ເອີຍ

      ປະດັບ​ດິນ​ກ່າວ​ເຂົ້າ          ສະຫຼາກຫໍ່​ກາຍ​ໄປ

      ​ໃຈ​ຍັງ​ລໍຄອຍ​ຊາຍ           ຕ່າວ​ກັບ​ຄືນ​ຫາ​ນ້ອງ

      ອອກ​ພັນ​ສາ​ຮອດ​ແລ້ວ        ຄິດ​ຄວນ​ຊາຍ​ຄົງ​ຈື່

      ຈໍາ​ສັນຍາ​ກ່າວ​ໄວ້           ຕົວ​ອ້າຍ​ວ່າ​ຊິ​ຄືນ      ນັ້ນ​ນາ

      ນວນ​ນາງ​ຍັງ​ຈື່​ໄດ້           ຄືນ​ຜ່ານ​ມາ​ປີ​ກາຍ

      ລອຍກະ​ໂທ​ງວຽນທຽນ        ປ່ອຍ​ໂຄມ​ກາງ​ເດືອນ​ແຈ້ງ

      ຊາຍ​ລັ່ນ​ວາຈາ​ໃຫ້           ຮັກ​ພຽງນາງ​ບໍ່​ປ່ຽນ

      ສາຍ​ທາລາ​ຈົ່ງ​ຮູ້            ​ເດືອນ​ແຈ້ງ​ແມ່ນ​ພິຍານ

      ວັນ​ເວລາ​ເຄື່ອນ​ຍ້າຍ         ໝູນປ່ຽນລະດູ​ການ

      ວັນ​ເລີຍ​ວຽນມາ​ເຖິງ          ອອກ​ພັນ​ສາ​ປີ​ນີ້

      ​ໃຈ​ຊາຍ​ດໍາ​ປົ່ນ​ປີ້            ຄວາມ​ຮັກ​ກາຍ​ເປັນ​ຖ່ານ

      ຊາຍ​ພາ​ຍິງ​ໃຫມ່​ນັ້ນ          ມາ​ໄຫວ້​ລ່ອງ​ກະ​ໂທ​ງ

      ສັນຍາ​ເຄີຍ​ກ່າວ​ໃຫ້          ປີ​ກ່ອນ​ຄົງ​ລືມ​ຄໍາ

      ຊາຍ​ເອີຍ​ຄົນ​ໃຈ​ດໍາ          ຊ່າງ​ມາ​ທໍາ​ລົງ​ໄດ້

      ລືມ​ຮອດ​ສັນຍາໝັ້ນ          ຕໍ່​ເດືອນ​ດາວ​ເທິງ​ຟ້າ

      ລໍາ​ທາ​ຍັງ​ລ່ອງ​ເລື້ອຍ         ​ໃຈ​ອ້າຍ​ແມ່ນ​ລືມ​ໄລ  ​ແທ້ນໍ

      ດວງ​ດາວ​ລອຍ​ຢູ່​ຟ້າ          ວອນ​ຊ່ວຍ​ມາ​ເມດ​ຕາ

      ​ໃຈ​​ແສນ​ທໍລະມານ           ລ່ວງ​ເລີຍ​ລົງ​ເມື່ອຍ​ລ້າ

      ຂໍ​ຄືນ​ວາຈາ​ນີ້               ກັບ​ຫາ​ຊາຍ​ຄື​ເກົ່າ

      ຄໍາ​ສັນຍາ​ກ່ອນ​ນັ້ນ           ນາງ​ຂໍ​ຖິ້ມລ່ອງ​ໄປ   ພຸ້ນ​ເນີ!

            ແຕ່ງ​ໂດຍ ສາຍ​ນໍ້າ​ອູ​ແດນ​ງາມ

​

ອັນວ່າຄວາມຮັກນີ້      ມີເກີດແກ່ທຸກຄົນ

ບໍ່ວ່າທຸກຈົນຫຼືຮັ່ງມີ      ກໍສະເໝີດັ່ງດຽວດ້າມ

ຍາມເມື່ອມີຮັກນັ້ນ       ແດນສະຫວັນບໍ່ທຽມເທົ່າ

ສຸກທັງສອງຂ້ອຍ-ເຈົ້າ    ອີ່ມເທົ້າທົ່ວຊີວາ

ຄວາມຮັກຂອງຄົນນີ້     ກໍມີມາກຫຼວງຫຼາຍ

ມີທັງຮັກດ້ວຍໃຈ        ປະສານໃຈກອດກ້ຽວ

ມີທັງຮັກຈິງຫມັ້ນ        ຫວັງຮ່ວມຄຽງໝອນ

ມີທັງຫຼອກຫຼອນປີ້ນ      ໃຫ້ເຈັບຊໍ້າຊວງໃນ

ມີທັງຮັກຄົນຢູ່ໃກ້        ຜູກພັນເກີດເປັນຮັກ

ມີທັງຮັກແບບສົງສານ    ເພາະຄວາມດີມີໄວ້

ມີທັງຮັກແບບໃຫ້       ບໍ່ຫວັງປອງຮຽງຮ່ວມ

ຮັກຂ້າງດຽວວ່າໄວ້      ບໍ່ໄປຍາດຊີງເຂົາ

ອັນຄວາມຮັກຮຽມນີ້      ເກີດຈາກຫົວໃຈຈິງ

ບໍ່ຫວັງຄິດລວງຫຼອກ     ໃຫ້ເພິ່ນໜ່າຍຊັງໜ້າ

ເຖິງຫ່າງກັນສຸດຂອບຟ້າ  ຂໍເອົາເວລາເປັນສື່

ໃຈປະສານໃຈໝັ້ນ      ອຸປະສັກພັນຊັ້ນກໍພົ້ນຜ່ານ

                   ຂໍພຽງເຈົ້າບໍ່ປີ້ນສັນຍາ.

(ສາຍນໍ້າອູ ແດນງາມ)

ກອນ: ຮັກ​ອ້າຍ​ຊາຍ​ດຽວ

​ແນມ​ເຫັນໝູ່ນົກ​ນ້ອຍ      ກໍ​ມີ​ຄູ່​ໃຜ​ມັນ

​ເຫດ​ໃດ​ນໍ​ຕົວ​ເຮົາ         ຈິ່ງ​ຢູ່ດຽວດາຍ​ແທ້

ຕາ​ແລ​ແນມ​ຫາ​ຊູ້         ຍາມ​ໃດ​ຈະ​ກັບ​ຕ່າວ

​ໃຈ​ນ້ອງໜາວສັ່ນ​ຄ້ອຍ      ຄອງ​ອ້າຍ​ນັ້ນ​ຕ່າວ​ມາ

ຟັງ​ຄໍາ​ເພິ່ນ​ກ່າວ​ເວົ້າ       ຮັກ​ຄົນ​ໄກ​ຕ້ອງ​ທົນ​ທຸກ

ຄວາມສຸກ​ມີ​ເທົ່າ​ກ້ອຍ      ຊິ​ທົນ​ໄດ້​ຢູ່​ບໍ່​ນໍ

ບາ​ງຄົນ​ກໍ​ແປ​ປີ້ນ          ປັບ​ປ່ຽນຄໍາ​ສັນຍາ

​ໃຈ​ນັ້ນ​ແບ່ງ​ເປັນ​ເປັນ​ສອງ   ຄວາມ​ຮັກ​ເລີຍ​ພັງ​ມ້າງ

​ແຕ່​ໃຈ​ນາງ​ກໍ​ຍັງ​ສູ້         ບໍ່​ສົນ​ຄໍາ​ເພິ່ນ​ກ່າວ

ໜາວກາຍ​ໃຈກາງ​ທົນ​ໄດ້    ຂໍ​ແຕ່​ອ້າຍ​ນັ້ນ​ຮັກ​ດຽວ

ນາງ​ຕັ້ງ​ໃຈ​ມຸ່ງໝັ້ນ        ​ໃຫ້​ຮັກ​ນີ້ສຸກ​ສົມ​ຫວັງ

ນາງ​ບໍ່​ຄິດ​ມີ​ໃຈ​ສອງ        ນອກ​ກາຍ​ໃຈ​ຈາກ​ອ້າຍ

ນານ​ພຽງ​ໃດ​ຈະ​ລໍຖ້າ       ວັນ​ອ້າຍ​ມາ​ຂໍ​ແຕ່ງ

ຈະ​ແພງ​ສອງ​ພວງ​ແກ້ມ          ​ໃຫ້​ອ້າຍ​ພຽງຜູ້ດຽວ

ຈະ​ບໍ່ຫຼຽວຫາ​ຊູ້           ມີ​ຮັກ​ໃໝ່​ໃຈ​ສອງ

ຈະ​ປະຄອງ​ໃຈໝັ້ນ        ຮັກ​ແຕ່​ອ້າຍ​ຊາຍ​ດຽວ ​ແທ້​ແລ້ວ.

ກອນ: ວັງ​ວຽງ…ວຽນ​ໃຈ

 ຄັ້ງໜຶ່ງມາ​ພົບ​ພໍ້                ຖານ​ຖິ່ນ​ແດນ​ວັງ​ວຽງ​

ເມືອງ​ຊື່ສຽງລື​ນາມ                ປວງ​ປະຊາ​ຍົກຍ້ອງ

ມີ​ຊື່ສຽງດັງ​ກ້ອງ                  ພູມ​ສັນຖານ​ທໍາ​ມະ​ຊາດ

​ໃສ​ສະອາດ​ງາມ​ນໍ້າ​ໃຈ             ຊາວ​ວັງ​ວຽງຖິ່ນ​ນີ້ນາ

 ຮຽມມາ​ພົບ​ມາ​ເຫັນ             ຈົນ​ບໍ່​ຢາກ​ຈາກ

 ບໍ່​ຢາກ​ພາກ​ເຂດ​ແຄວ້ນ          ດິນ​ແດນ​ສະຖານ

 ຖໍ້າ​ຈັງ​ລ້ອງ​ນໍ້າ​ຊອງ             ມີ​ຂົວ​ອູ່​ຜ່ານ

 ຖໍ້າ​ລົມ​ມີ​ຕໍານານ               ຂຸນ​ລູ-ນາງ​ອົ້ວ​ກ່າວ​ມາ

ງາມ​ພູຜາ​ປ່າ​ເຂົາ              ປ່າດົງ​ວົງກົດ

ສວຍ​ງາມ​ຍາດ​ຍົດ             ຂຽວອຸ້ມ​ທໍາ​ມະ​ຊາດ

ງາມ​ຍາດ​ຍ້ອຍ​ຜາ​ຕັ້ງ          ກາງ​ດົງ​ທົ່ງ​ນາ

ຊື່ນ​ອຸລາ​ເຫັນ​ຮອຍ​ຍິ້ມ         ບ່າວ-ສາວ​ວັງ​ວຽງ

​ໂອກາດໜ້າຈະ​ມາ           ຢ້ຽມຢາມ​ອີກ​ໃໝ່

ຂໍ​ຝາກ​ໃຈ​ເອົາ​ໄວ້            ຖິ່ນ​ນີ້​ທີ່​ງາມ​ຕາ

ເຖິງ​ຈາກ​ລາ​ແລ້ວ             ດວງ​ໃຈ​ຍັງ​ຫ່ວງ​ຫາ

ບໍ່​ນານ​ຈະ​ກັບ​ມາ            ຫາ​ເຈົ້າ​ຖິ່ນ​ວັງ​ວຽງ.

( ສາຍ​ນໍ້າ​ອູ ​ແດນ​ງາມ )

o                  ນັບ​ແຕ່ລູກກໍາເນີດ        ປະສູດອອກໃຫຍ່ມາ

ແມ່ມາດາລ້ຽງດູ           ສູ່ວັນບໍ່ເຂີນຂາດ

ແມ່ອາດຫານຕໍ່ສູ້          ບໍ່ໃຫ້ລູກທຸກຍາກໄຮ້

ອັນຕະລາຍໝື່ນຊັ້ນ        ແມ່ປັດໜີຫ່າງໄກ

o                  ຍາມເມື່ອລູກຈາກບ້ານ      ມາສຶກສາຮໍ່າຮຽນ

ແມ່ກໍຄອຍພຽນອົດ         ເພື່ອຄໍາແພງຫຼ້າ

ແມ່ຫາງານທໍາສ້າງ         ຖະໜອມເງິນໃຫ້ລູກຈ່າຍ

ເມື່ອຍກາຍໃຈແມ່ທົນສູ້      ເພື່ອລູກໄດ້ດັ່ງປະສົງ ຫັ້ນແລ້ວ

o                   ເຖິງເວລາລູກປ່ວຍໄຂ້       ແມ່ຊອກຫາຢຸກຢາ

ມາ​ປະຄອງ​ຈອມຂວັນ       ​ໃຫ້ຫາ​ຍຈາກ​ໄພ​ຮ້າຍ

​        ເມື່ອ​ໃຈ​ກາຍ​ລູກ​ເສົ້າ            ​ແມ່​ເປັນ​ເງົາ​ບໍ່ໜີຫ່າງ

​       ເໝືອນປາ​ບໍ່​ຍອມ​ຫ່າງ​ນໍ້າ          ດັ່ງ​ນະພາ​ຄູ່​ປັດ​ຕະພີ ທ່ານ​ເອີຍ

o               ຄໍາ​ວ່າ​"ແມ່" ​ແມ່​ນີ້               ມີຄ່າ​ໃຫຍ່​ມະຫາສານ

     ທຽບນະທີ​ລໍາ​ທານ               ຈັກກະວານ​ບໍ່​ມີ​ໄດ້

     ຄໍາ​ວ່າ​ແມ່​ນັ້ນ​ຍິ່ງ​ໃຫຍ່       ກວ່າ​ພົງ​ໄພ​ກວ້າງ

      ບຸນຄຸນ​ແມ່​ໃຫຍ່ຫຼວງ        ຫາ​ສິ່ງ​ທຽບ​ແມ່ບໍ່ມີໄດ້

      ລູກ​ຂໍ​ຈົດ​ຈໍາ​ແໜ້ນ           ​ໃນ​ພະ​ຄຸນ​ແມ່​ມາດາ

     ເຖິງ​ຍາມ​ແມ່​ຊະລາ         ລູກ​ຂໍ​ເບິ່ງ​ແຍງ​ເຈົ້າ

      ລູກ​ຈະ​ຕັ້ງ​ໃຈໝັ້ນ          ກະທໍາຕາມ​ຄໍາສອນ​ແມ່

      ຈະ​ບໍ່​ອ່ອນ​ອ່ຽງຄ້ານ         ​ໃຫ້​ໄທບ້ານ​ເພິ່ນ​ກ່າວ​ຂວັນ ​ແທ້​ແລ້ວ.

         ບົດ​ກອນ:  ຄືນ​ຝົນ​ຮໍາ

o   ຄືນ​ນີ້​ຟ້າ​ຮ່ໍາ​ຮ້ອງ         ຝົນ​ກໍ​ຕົກ​ໂຮຍ​ຮໍາ

    ພຶກສາ​ດວງ​ມາລາ               ຊື່ນ​ຊົມ​ບານ​ແຍ້ມ

    ດອກ​ກໍ​ຈໍ​ຈູມ​ຂຶ້ນ             ງົດ​ງາ​ມໄປ​ທຸກ​ທີ່

    ​ແມ່​ນະທີ​ສາຍ​ກວ້າງ          ປາ​ກໍ​ບ້ອນ​ຊົມ​ຝົນ    ຫັ້ນ​ແລ້ວ

o   ອັນວ່າ​ຕົວ​ນ້ອງ​ນີ້        ບໍ່​ໄດ້​ພິລົມ​ສຸກ

    ທຸກ​ໃຈ​ຄໍາ​ຄວານ​ຫາ          ຊາຍ​ຜູ້ໜີ​ໄກ​ບ້ານ

    ຍາມ​ເມື່ອ​ບົວ​ບານ​ແຍ້ມ            ຍັງ​ມີ​ແມງ​ມາ​ຕອມ​ໄຕ່

    ບາດວ່າ​ນ້ອງ​ນັ່ງ​ໄຫ້          ບໍ່​ມີ​ອ້າຍ​ນັ້ນ​ຢູ່​ນໍາ ​ເສົ້າ​ເດ

o   ຮຽມນີ້​ຄິດ​ຢ້ານ​ອ້າຍ      ຈິດ​ດຽວ​ເປັນຫຼາຍ​ໄສ້

    ​ໃຈດຽວ​ເປັນຫຼາຍປ່ອງ         ຢ້ານ​ແຕ່​ອ້າຍ​ຊິ​ຖິ້ມ​ນ້ອງ

    ຄື​ຈອກ​ຢູ່​ກາງ​ແຊງ               ຄື​ແຕງ​ຢູ່​ກາງ​ໄຮ່

    ອ້າຍ​ໄດ້​ກິນໝາກ​ແລ້ວ         ຊິ​ໄລ​ຖິ້ມ​ຕັ້ງ​ແຕ່​ເຄືອ​  ແທ້​ເດ

 o   ນ້ອງ​ນີ້​ຄະ​ນຶງຫາ​ອ້າຍ     ຄື​ກະຕ່າຍໝາຍຈັນ

    ມີ​ແຕ່​ນັ່ງ​ນອນ​ຝັນ                ບໍ່​ເປັນ​ຈິງ​ພໍ​ມື້

    ບໍ່​ເໝືອນດັ່ງ​ດວງ​ໄມ້          ຝົນຮໍາເບີຍ​ບານ​ດອກ

    ຢ້ານ​ແຕ່​ອ້າຍ​ຊິ​ມາຫຼອກ           ອາ​ນົງ​ນ້ອງ​ໃຫ້​ຄິດ​ນໍາ ​ແທ້ນາ

o   ຄັນຈິງ​ໃຈ​ຮັກ​ນ້ອງ           ສິ້ນ​ສົງການ​ໃຫ້​ອ້າຍ​ມາ​ຫາ

    ​ອອກພັນ​ສາ​ໃຫ້​ອ້າຍ​ມາສູ່          ນວນ​ນ້ອງ​ຜູ້​ນັ່ງ​ຄອຍ

    ນາງ​ຊິ​ລໍຖ້າ​ອ້າຍ             ມາ​ຮ່ວມ​ນອນ​ຊ້ອນ​ເສື່ອ

    ຊິນ​ອນ​ເກື້ອ​ກ້ຽວຝັ້ນ          ນໍາ​ອວນ​ອ້າຍ​ຄືນ​ຝົນຮໍາ   ຫັ້ນ​ແລ້ວ

     ​                       

                   ບົດ​ກອນ: ນ້ໍາ​ຕານາ​ງ

     ຍິນ​ສຽງອ້າຍ​ຈາ​ຕ້ານ            ນວນ​ນາງ​ນ້ໍາຕາຫຼັ່ງ

    ນ້ໍາຕາ​ພັງ​ຍ່າວ​ຍ້ອຍ             ຫົວອົກ​ຂ້ອຍໜ້າສົງສານ

    ຄິດ​ເຫັນ​ວັນ​ກ່ອນ​ກີ້         ອ້າຍ​ຈາ​ວ່າ​ນໍາ​ນາງ

    ປານ​ນ້ໍາຕານກ້ອນໜັກ       ວາຈາ​ຫວານ​ອິ່ນອ້ອຍ

    ​ໂອ​ຫົວ​ໃຈ​ດວງ​ນ້ອຍ             ບັດ​ນີ້​ທຸກຂະໝອດ

    ກອດ​ຕົວ​ເອງ​ນັ່ງ​ໄຫ້             ຊິ​ໄປ​ຊົ້ນ​ເພິ່ງ​ໃຜ

    ​ໃຈ​ເອີຍ​ໃຈ​ຄົນ​ມີ​ຮັກ             ສຸດໜັກລະ​ທົມ​ລົ້ນ

    ຄິດ​ຢາກໜີພົ້ນ​ຜ່ານ             ​ເອົາ​ໃຈ​ກາຍໜີຫ່າງ

    ​ແຕ່​ກໍ​ເຮັດບໍ່​ໄດ້   ​ໃຈ​ນັ້ນ​ມີ​ແຕ່​ເຂົາ  ​ເສົ້າ​ໃຈ​ເດ...

<!--[if gte mso 9]><![endif]--><!--[if gte mso 10]>/* Style Definitions */table.MsoNormalTable{mso-style-name:"Table Normal";mso-tstyle-rowband-size:0;mso-tstyle-colband-size:0;mso-style-noshow:yes;mso-style-priority:99;mso-style-qformat:yes;mso-style-parent:"";mso-padding-alt:0in 5.4pt 0in 5.4pt;mso-para-margin-top:0in;mso-para-margin-right:0in;mso-para-margin-bottom:10.0pt;mso-para-margin-left:0in;line-height:115%;mso-pagination:widow-orphan;font-size:11.0pt;mso-bidi-font-size:14.0pt;font-family:"Calibri","sans-serif";mso-ascii-font-family:Calibri;mso-ascii-theme-font:minor-latin;mso-fareast-font-family:"Times New Roman";mso-fareast-theme-font:minor-fareast;mso-hansi-font-family:Calibri;mso-hansi-theme-font:minor-latin;mso-bidi-font-family:"Cordia New";mso-bidi-theme-font:minor-bidi;}<![endif]-->

​ເລື່ອງ​ຊວນ​ຫົວ:  ​ເວົ້າ​ຕາມ​ຄວາມ​ຈິງ

      ມີ​ມື້ໜຶ່ງມີ 2ສ່ຽວຄື ລຸງ​ສີ ກັບ​ລຸງ​ສາ​ ໄດ້ພາກັນ​ເຂົ້າ​ໄປ​ໃນ​ຕົວ​ເມືອງ,

​ໃນ​ຂະນະ​ທີ່​ທັງ​ສອງ​ກໍາລັງ​ລໍຖ້າ​ຄົນ​ໂດຍສານ​ຢູ່​ໃນລົດ​ນັ້ນ 

ລຸງ​ສີ​ໄດ້ຫຼຽວ​ເຫັນ​ພໍ່​ເຖົ້າ​ຄົນໜຶ່ງ ​ເຊິ່ງກໍາລັງ​ຖີບ​ລົດມາ​ແຕ່​ໄກ

ລົດຖີບ​ຂອງ​ພໍ່​ເຖົ້າ​ນັ້ນ​ໄດ້​ມີ​ໂຖ​ນ້ອຍໜ່ວຍໜຶ່ງພ້ອມ​ກັບ​ໄມ​ອາ​ໂລໜຶ່ງອັນ.

ລຸງ​ສີ​ສົນ​ໃຈຫຼາຍ​ ​ເລີຍ​ບອກ​ໃຫ້​ລຸງ​ສາ​ເບິ່ງ​ນໍາພ້ອມ​ທັງ​ຖາມ​ລຸງ​ສາ​ວ່າ:

​ເຮີຍ! ສ່ຽວ, ​ໂຕ​ຄິດ​ວ່າ​ພໍ່​ເຖົ້າ​ນັ້ນ​ມາ​ຂາຍ​ຫຍັງ?

     ​ເຮົາ​ຊິ​ໄປ​ຮູ້​ໄດ້​ຈັ່ງ​ໃດ, ​ໃນ​ເມື່ອ​ນັ່ງ​ນຳ​ກັນ​ຢູ່​ນີ້. ລຸງ​ສາ​ຕອບ

     ​ເອີ​ເນາະ! ຄັນ​ຊັ້ນ​ເຮົາ​ໄປ​ຖາມ​ນຳ​ກັນ​ເທາະສ່ຽວ. ລຸງ​ສີ​ຊວນ

      ​ໃນ​ຂະນະ​ທີ່ 2ສ່ຽວກຳລັງ​ຊັກ​ຊວນ​ກັນ​ຢູ່​ນັ້ນ ສຽງອາ​ໂລ

​ຂອງ​ພໍ່​ເຖົ້າ​ກໍ​ດັງ​ຂຶ້ນ​ມາ​ແຕ່​ໄກ ​ແລະ ພໍ່​ເຖົ້າ​ໄດ້​ເວົ້າວ່າ:

ມາ​ເດີ! ລູກຫຼານ​ເອີຍ ມາ​ຊື້​ກະ​ແລັມຊ່ວຍ​ພໍ່​ເຖົ້າ​ແດ່,

ກະ​ແລັມໝາກພ້າວ​ຫວານໆ ມັນໆ  ກະ​ແລັມໝາກທັນ​ແຊບໆ ຮ້ອນໆ;

ມາ​ຊື້​ຊ່ວຍ​ພໍ່​ເຖົ້າ​ແດ່ທ້ອນ ພໍ່​ເຖົ້າ​ກໍ​ຢາກ​ໄດ້​ເງິນ...

      ​ເມື່ອ​ໄດ້​ຍິນ​ພໍ່​ເຖົ້າ​ເວົ້າ​ຄື​ແນວ​ນັ້ນ ລຸງ​ສີ ກໍ​ເວົ້!ສອດ​ຂຶ້ນ​ວ່າ: ຄື​ມາ​ເວົ້າ​ຖືກ​​ແທ້ນໍ!

      ລຸງ​ສາ​ເລີຍ​ຕອບ​ວ່າ: ຈັງ​ຊີ​ແລ້ວ, ຄົນ​ເວົ້າ​ຕາມ​ຄວາມ​ຈິງ 5! 5! 5!

<!--[if gte mso 9]><![endif]--><!--[if gte mso 10]>/* Style Definitions */table.MsoNormalTable{mso-style-name:"Table Normal";mso-tstyle-rowband-size:0;mso-tstyle-colband-size:0;mso-style-noshow:yes;mso-style-priority:99;mso-style-qformat:yes;mso-style-parent:"";mso-padding-alt:0in 5.4pt 0in 5.4pt;mso-para-margin-top:0in;mso-para-margin-right:0in;mso-para-margin-bottom:10.0pt;mso-para-margin-left:0in;line-height:115%;mso-pagination:widow-orphan;font-size:11.0pt;font-family:"Saysettha OT","sans-serif";}<![endif]-->

ບົດ​ກອນ: ຄອຍ​ອ້າຍ... ກັບ​ສົງການ

§  ວາ​ໂຍພັດ​ຕ່າວ​ຕ້ອງ               ກາຍ​ເຂດ​ລະດູໜາວ

ຊາວ​ພຸດທະສາສະໜາ        ຊື່ນ​ໃຈ​ມະ​ໂນ​ແມ້ງ

ປົວ​ແປງ​ເຮືອນ​ຊານ​ບ້ານ       ​ໃຫ້​ສວຍ​ງາມ​ທັງ​ສະອາດ

ກຽມຮັບ​ສັງກາດ​ໃໝ່ນັ້ນ       ຍັບ​ຈໍ້​ມໍ້​ທຸກ​ວັນ

§  ​ໃຈ​ນາງ​ກໍ​ຄອຍ​ເຝົ້າ                ລໍ​ວັນ​ອ້າຍ​ກັບ​ຕ່າວ

ຄືນ​ຖິ່ນ​ລາວ​ບ້ານ​ເຮົາ​ພີ້        ຍັງ​ມີ​ນ້ອງ​ຜູ້​ນັ່ງ​ຄອງ

ທຸກ​ວັນ​ນໍ້າ​ຕາ​ຍ້ອຍ           ອອກ​ຈາກ​ມະ​ໂນ​ຈິດ

ທຸກ​ຄືນ​ສະ​ເໜ່ຫາ           ຫ່ວງ​ຊາຍ​ກາຍ​ໃຈ​ເສົ້າ

§  ຍັງ​ຈື່​ຈໍາ​ຄໍາ​ຊາຍ​ເວົ້າ               ບໍ່ນານ​ຈະ​ກັບ​ຕ່າວ

ຄືນ​ສູ່​ດິນ​ແດນ​ລາວ                ຖິ່ນ​ຈໍາປາ​ລ້ານ​ຊ້າງ

ມາ​ຫາ​ນາງ​ນາດ​ນ້ອງ         ຜູ້ໝາຍປອງ​ຄຽງຄູ່

ກັບ​ມາ​ຢູ່​ເສີມ​ສ້າງ           ບ້ານ​ນາ​ກ້າວ​ຮຸ່ງ​ຈະ​ເລີ​ນ

§  ຂໍ​ຝາກ​ລົມ​ເປັນ​ສື່ໝັ້ນ         ຝາກ​ໃຈຄຽງດາວ​ເທິງ​ຟ້າ

ຝາກ​ຮັກ​ຕາມ​ທາລາ​ນ້ອຍ      ປະຄອງ​ກາຍ​ໃຫ້​ອ້າຍ​ອຸ່ນ

​              ໃຫ້​ຄຸ້ນ​ຄິດ​ເຫັນ​ຜູ້​ລໍຖ້າ        ​ໃຈ​ລະ​ເມີ້​ທຸກ​ເຊົ້າ​ຄ່ໍາ

              ສົງການ​ປະຈໍາ​ປີ​ນີ້                ອ້າຍ​ຈະ​ຕ່າວ​ຄືນບ້າ​ນນາ​ເຮົາ

                                     ຢູ່​ບໍ​ເດ?    

<!--[if gte mso 9]><![endif]--><!--[if gte mso 10]>/* Style Definitions */table.MsoNormalTable{mso-style-name:"Table Normal";mso-tstyle-rowband-size:0;mso-tstyle-colband-size:0;mso-style-noshow:yes;mso-style-priority:99;mso-style-qformat:yes;mso-style-parent:"";mso-padding-alt:0in 5.4pt 0in 5.4pt;mso-para-margin-top:0in;mso-para-margin-right:0in;mso-para-margin-bottom:10.0pt;mso-para-margin-left:0in;line-height:115%;mso-pagination:widow-orphan;font-size:11.0pt;font-family:"Saysettha OT","sans-serif";}<![endif]-->

ກອນ: ຮັກ​ຄົນ​ໄກ​ບ້ານ

Ø  ຄິດ​ຫ່ວງ​ຫາ​ຍາມ​ໄກ​ເຈົ້າ               ຊິ​ກືນ​ເຂົ້າ​ບໍ່ລົງ​ຄໍ

ຄິດ​ເຫັນ​​ໃບໜ້າພໍ້​ວໍ້             ຢ້ານ​ພີ່​ຊາຍ​ໃຈ​ປ່ຽນປີ້ນ

ຄິດ​ຖະວິນ​ນໍາ​ແຕ່​ເຈົ້າ            ຍອດ​ດວງ​ໃຈ​ທີ່​ນາງ​ຮັກ

ຄິດໜັກ​ຈົນຈະ​ປ່ວງບ້າ                ຄິດ​ຫາ​ອ້າຍ​ຜູ້​ຫ່າງ​ໄກ

                                ທຸກ​ໃຈ​ເດ!

Ø  ຊາຍ​ຜູ້​ຢູ່​ທາງ​ພຸ້ນ               ຊິ​ຄິດ​ຮອດ​ຄື​ກັນ​ຢູ່​ບໍ

ຫຼື​ໃຈ​ຊາຍ​ເມີນ​ເສີຍ             ບໍ່ຫ່ວງ​ເລີຍ​ຄົນ​ທາງ​ພີ້

ຫຼືຊາຍ​ມີ​ຄົນ​ຄອຍ​ເຝົ້າ            ຄອຍ​ເອົາ​ໃຈບໍ່ໜີຫ່າງ

ຫຼືຊາຍ​ມີ​ຍິງ​ອື່ນ​ແລ້ວ            ຈິ່ງ​ລືມ​ຈ້ອຍ​ຜູ້​ນັ່ງ​ຄອຍ

Ø  ອ້າຍ​ເອີຍ​ຫາກ​ຍັງ​ມີ​ໃຈໝັ້ນ        ຄິດ​ຮັກນາງ​ບໍ່​ແປ​ປ່ຽນ

ໜຶ່ງກໍ​ຮັກ,ສອງ​ກໍ​ຈະ​ຮັກ​ແຕ່​ນ້ອງ          ບໍ່ໝາຍປອງ​ຍິງ​ຄົນ​ໃໝ່

​ເວລາ​ສຸກ-ທຸກ​ຄິດ​ເຫັນໜ້າ        ຍາມ​ທໍ້​ຢາກ​ໃຫ້​ນາງ​ຈາ​ອ່ອຍ

ຈົ່ງ​ປ່ອຍ​ໃຈ​ມາ​ຮັກໝັ້ນ           ພໍ​ໃຫ້​ນາງ​ມີ​ຄວາມ​ຫວັງ     ​  ແດ່ທ້ອນ

Ø  ນ້ອງ​ນີ້ຫຼົງຮັກ​ອ້າຍ              ພຽງວິນາທີ​ທີ່​ພົບ​ເຫັນ

​     ໃຈ​ກະ​ເດັນ​ເຊຊວນ             ຢາກ​ໄປ​ຢູ່ຄຽງຂ້າງ​

ມະ​ໂນ​ນາງ​ຍຶດໝັ້ນ             ຮັກ​ຈິງ​ບໍ່ປີ້ນ​ປ່ຽນ

​     ໃຫ້​ອ້າຍ​ພຽນຮັກ​ນ້ອງ            ປະຄອງ​ຮັກນີ້​ຊົ່ວ​ນິລັນ

                                ຈະ​ໄດ້​ບໍ​ນໍ?  

ບົດ​ກອນ: ສົ່ງ​ໃຈ​ໃຫ້​ຄົນ​ໄກ.

Ø       ຄິດຮອດ​ເດ​ຊາຍ​ຄົນ​ນັ້ນ       ​ໃຈ​ຂະ​ຫຍັ່ນ​ສຶກສາ​ຕໍ່

ຈາກ​ແມ່ພໍ່ຍາດ​ພີ່ນ້ອງ  ​      ໄປ​ເພິ່ງ​ຊົ້ນ​ຢູ່​ຖິ່ນ​ໄກ ພຸ້ນ​ນາ

ຊາຍ​ເອີຍຈົ່ງ​ຕັ້ງ​ໃຈ​ສູ້         ດຸໝັ່ນຄົ້ນ​ຮ່ຳຮຽນ

​     ເອົາ​ໃຈ​ພຽນ​ເປັນຫຼັກ        ​ໃຫ້ປະສົງ​ໃຈ​ກໍ​ຕັ້ງ

Ø  ຖື​ຄຳ​ສອນ​ເປັນຫຼັກໝັ້ນ        ກະທຳ​ຕາມ​ພັກ-ລັດ​ກ່າວ

​      ໃຫ້​ທົ່ວ​ຊາວ​ລາວ​ຮັບ​ຮູ້        ​ໃຈຈິງ​ເຈົ້າ​ຊາດ​ຊາຍ

      ຫຼາຍ​ເດືອນ​ປີ​ຈິງ​ຜ່ານພົ້ນ ​     ໃຫ້​ເຈົ້າຄ່ອຍ​ພຽນອົດ

      ຕາມ​ກົດ​ເກນ​ສຶກສາ          ຊາດ​ທະຫານ​ລາວ​ນີ້

Ø  ນານຫຼາຍປີ​ຈະ​ຄອຍ​ຖ້າ         ບໍ່ກ່າວ​ວາຈາ​ອິດ​ເມື່ອຍ

ຂໍພຽງຮັກ​ນ້ອງ​ເລື້ອຍ         ບໍ່​ແປ​ປີ້ນ​ປ່ຽນຄຳ

ນ້ອງ​ຈະທຳ​ງານ​ສ້າງ         ພາ​ໃຈ​ພຽນລໍ​ພີ່

ມີ​ຫຍັງ​ນາງ​ກໍ​ແບ່ງ​ໄວ້         ​ໃຫ້​ຊາຍ​ໄດ້​ຮ່ວມ​ກິນ ຫັ້ນ​ແລ້ວ

Ø  ​ໃຈ​ຖະວິນ​ນຳ​ເຈົ້າ            ທຸກ​ເຊົ້າ​ຄ່ຳ​ແລງ​ງາຍ

ຢ້ານ​ແຕ່​ຊາຍ​ມາຍ​ໃຈ         ບໍ່​ເປັນ​ດັ່ງ​ຄຳ​ເວົ້າ

ທົ່ງ​ນາ​ຍາວ​ຍັງ​ຄອຍ​ເຝົ້າ       ລໍ​ອ້າຍ​ມາ​ເກັບ​ກ່ຽວ

ຫຼຽວ​ເບິ່ງ​ດາວ​ຍັງ​ຢູ່​ຢັ້ງ        ​ເທິງ​ເວຫາ​ຢູ່​ທຸກ​ວັນ

 Ø  ຊາຍ​ເອີຍ​ຈົ່ງ​ຍຶດໝັ້ນ         ຕັ້ງ​ໃຈ​ສຶກສາຕໍ່

ຂໍ​ໃຫ້​ເອົາ​ໃຈ​ສ້າງ            ທຸກ​ຜົນງານ​ດີ​ເດັ່ນ

​ເປັນ​ດັ່ງ​ດວງ​ອາທິດ​ກ້າ        ​ແພ່​ແສງ​ປະກາຍ​ຮຸ່ງ

ມຸ່ງສ້າງຕົນ​ໃຫ້​ເດັ່ນ​ກ້າວ       ສົມຊາຍ​ຊາດ​ທະຫານ​ລາວ

                              ຜູ້​ເກັ່ງ​ກ້າ​ອາດ​ຫານ   ພຸ້ນ​ເນີ!