ທຳມະຊາດຂອງມະນຸດທຸກຄົນກໍລ້ວນແຕ່ຕ້ອງການແຕ່ສີ່ງທີ່ດີ ແລະ ສະພາບແວດລ້ອມທີ່ດີ,ອາຫານການກິນທີ່ດີ,ເສື້ອຜ້າທີ່ດີ,ແລະ ມີຊີວິດທີ່ດີ ດ້ວຍກັນທັງໝົດທຸກຄົນ.ສາເຫດນັ້ນຈີ່ງເຫັນໄດ້ວ່າ:ທຸກມື້ນີ້ໃຜກໍລີ້ນຮົນເພື່ອຊອກສະແຫວງຫາ ວຽກງານທີ່ດີ ແລະ ເຮັດວຍກແຕ່ເຊົ້າຈົນຄ່ຳກໍເພື່ອໃຫ້ໄດ້ພົບກັບຄຳວ່າຊີວິດທີ່ດີ.ນອກນັ້ນກໍຍັງມີການມີຄູຄອງທີ່ດີ ລູກທີ່ດີນຳອີກ.ຫຼາຍຄົນກໍໂຊກດີທີ່ໄດ້ພົບກັບວຽກງານທີ່ດີເງິນເດືອນທີ່ດີ ຈີ່ງມີຄອບຄົວທີ່ດີຕາມມາ.ແຕ່ຫຼາຍຄົນກໍຍັງບໍ່ທັນມີໂຊກຄືກັບຄົນອື່ນ ຍັງຕາມຫາວຽກງານທີ່ດີ ຍັງຕາມຫາຄວາມຮັກທີ່ດີ ແຕ່ບໍ່ມີແວວຈະໄດ້ພົບກັບສີ່ງທີ່ຕົນກຳລັງຕາມຫາມາດົນນານ.

     ຄຳວ່າວຽກດີ ຫຼາຍຄົນກໍອາດຈະບອກເປັນສຽງດຽວກັນວ່າ ເປັນວຽກທີ່ຕົນເອງຖະໜັດ ແລະ ມີສະພາບແວດລ້ອມທີ່ດີເຊັ່ນ:ເພື່ອນຮ່ວມງານດີ,ນາຍດີ ແລະ ທີ່ສຳຄັນເງິນດີນຳອີກ.ແຕ່ສຳລັບຄວາມຮັກທີ່ດີເດລະ ທຸກຄົນຕັດສິນມັນຈາກສີ່ງໃດກ່ອນຈີ່ງສາມາດເອີ້ນມັນວ່າຄວາມຮັກທີ່ດີທີ່ສຸດ. ຖ້າຫາກຖາມຫຼາຍຄົນຂ້ອຍເຊື່ອວ່າແຕ່ລະຄົນກໍອາດຈະມີມູມມອງຂອງການເບີ່ງຄວາມຮັກທີ່ຄິດວ່າດີສຳລັບຕົນເອງແຕ່ກຕ່າງອອກໄປ.ບາງຄົນກໍຄິດວ່າຕົນເອງດີແລ້ວ,ບາງຄົນກໍອາດຈະຄິດວ່າຕົນເອງດີບໍພໍ ຈີ່ງບໍ່ສາມາດມັດໃຈ ຍີງ ຫຼື ຊາຍ ທີ່ຕົນເອງຮັກໄດ້.

     ສີ່ງທີ່ທຸກຄົນຄິດຂ້ອຍກໍບໍ່ປະຕິເສດທີ່ຈະເຫັນດີນຳ ແລະ ບາງອັນກໍບໍ່ເຫັນດີນຳປານໃດ ແຕ່ທັງນີ້ທັງນັ້ນ ຂ້ອຍຈະບໍ່ຕຳນິ ຫຼື ຂັດຂວາງຄວາມຄິດຂອງແຕ່ລະຄົນເພາະວ່າ ທຸກຄົນລ້ວນມີມູມມອງແລະສິດໃນການຄິດບໍ່ຄືກັນ ເຊັ່ນດຽວກັບໂຕຂ້ອຍເອງກໍມີມູມມອງທີ່ແຕ່ກຕ່າງອອກໄປເຊັ່ນກັນ.ໂດຍສ່ວນໂຕຂ້ອຍມັກຄິດສະເໝີວ່າ ຄຳວ່າຄົນດີຂອງ ຜູ້ຍີງ ຫຼື ຜູ້ຊາຍ ມັນຂື້ນກັບວ່າ : ຜູ້ຍີງຄົນນັ້ນ ແລະ ຜູ້ຊາຍຄົນນັ້ນ ເປັນຄົນແບບໃດ,ເກີດຢູ່ໃສ,ສະພາບແວດລ້ອມ ຂອງຍີງ ແລະ ຊາຍ ນັ້ນໆເປັນແນວໃດ.ເພາະ ສີ່ງທີ່ກ່າວມານີ້ກໍເປັນປັດໃຈໜື່ງທີ່ທັງ ຍີງ ແລະ ຊາຍ ຈະຕິດມາເປັນນິໃສ ແລະ ນຳມາເປັນເກນໃນການຕັດສິນ ຄູ່ຄອງຂອງຕົນ.ເຊັ່ນ:

* ຍີງ ຫຼື ຊາຍ ທີ່ມັກຄວາມລ້ຳລວຍ ເຂົາກໍຈະເຫັນຄົນລ້ຳລວຍເປັນຄົນດີໃນສາຍຕາຂອງເຂົາ ບາງທີ່ນິໃສແບບໃດເຂົາກໍບໍ່ໄດ້ສົນໃຈເພາະຄຳວ່າດີຂອງເຂົາຄືຄວາມລ້ຳລວຍ.(ບາງຄົນ ກໍທັງລວຍ ແລະ ນິໃສໃຈຄໍທີ່ດີ ແຫ່ງຍີ່ງດີໄປຕື່ມ)

* ຍີງ ແລະ ຊາຍ ທີ່ເຂົາມັກຄົນງາມ ຄົນຫລໍ່ ເຂົາກໍອາດຈະເຫັນຄົນງາມ ຄົນຫລໍ່ເປັນຄົນດີສຳລັບເຂົາ ເຖີງແມ່ນນິໃສໃຈຄໍຈະບໍ່ຄ່ອຍເປັນມິດ ເວົ້າບໍ່ມ່ວນ,ມັກໂວຍວາຍ ແຕ່ເຂົ້າກໍຍັງຄິດວ່າດີສຳລັບເຂົາ ເພາະເຂົາມັກແບບນັ້ນ.

* ຍີງ ຫຼື ຊາຍ ທີ່ມັກຄົນທີ່ນິໃສ ເຖີງວ່າ ການງານການເງິນຈະທຳມະດາສາມັນ ແຕ່ເຂົາກໍມັກ ເພາະ ເຂົາມັກແບບນັ້ນ ເຖີງຈະພາກັນຂີ່ລົດຈັກຕາກລົມຕາກແດດ ແຕ່ໃນໃຈກໍຍັງມັກແບບນັ້ນ.

* ຍີງ ແລະ ຊາຍ ບາງຄົນ ກໍມັກຄວາມໃສໃຈດູແລ ເຖີງຈະຈົນ ຈະລວຍ ຈະບໍ່ງາມ ບໍ່ຫລໍ່ ແຕ່ເຂົາກໍເຕັມໃຈຮັກ ເພາະ ຄຳວ່າດີຂອງລາວຄືການມີຄົນເອົາໃຈໃສ່ທຸກສີ່ງຢ່າງ ອັນອື່ນອາດຈະບໍ່ກ່ຽວ 

     ສະນັ້ນເຮົາຈະເຫັນໄດ້ເປັນສ່ວນໃຫຍ່ໃນສັງຄົມ ບາງຄົນກໍໜ້າຕາທຳມະດາ ແຕ່ມີແຟນງາມ ແຟນຫລໍ ບາງຄົນລ້ຳລວຍແຕ່ມີແຟນຖານະທຳມະດາ ບາງຄົນໜ້າຕາທຳມະດາແຕ່ມີແຟນລ້ວຍ ສາເຫດກໍອາດຈະເປັນຍ້ອນ ຕົວຢ່າງຂ້າງເທີງນີ້ກໍເປັນໄດ້ ເພາະທຸກຄົນມີມູມມອງ ມີຂອບເຂດ ມີຄວາມມັກໃນແບບສະບັບຂອງຕົນ

     ແຕ່ສີ່ງທີ່ຂ້ອຍຢາກບອກໃຫ້ຮູ້ທີ່່ສຸດໃນບົດຄວາມນີ້ກໍຄື ຄົນເຮົາຈະເຮັດດີເທົ່າໃດກໍຕາມຖ້າເຮົາ ບໍ່ແມ່ນຄົນທີ່ດີ ຫຼື ຄວ່ມດີຂອງເຮົາມັນບໍ່ແມ່ນຄວາມດີທີ່ເຂົາປາດຖະໜາ ສີ່ງຕ່າງໆທີ່ເຮົາເຮັດລົງໄປມັນກໍບໍ່ມີຄວາມໝາຍ ເຊັ່ນດຽວກັບມີບາງຄົນມາຮັກເຮົາມາເຮັດດີນຳເຮົາເກືອບຕາຍແຕາເຮົາກໍບໍ່ຍອມຮັກເຂົາ ກະຍ້ອນເຫດຜົນດຽວກັນນິລະ ເພາະຄຳວ່າດີຂອງເຮົາກັບຂອງເຂົາມັນບໍ່ຄືກັນ.

     ທຸກຄົນທີ່ເກີດມາ ແນ່ນອນວ່າຕ່າງກໍຕ້ອງມີຄອບຄົວ,ຍາດພີ່ນ້ອງ,ໝູ່ ແລະ ຄົນຮັກ ຫຼື ຄົນເຄີຍຮັກໝົດທຸກຄົນ ໃນເມື່ອເຮົາໄດ້ຢູ່ກັບຄອບຄົວ ແລະ ຄົນທີ່ຮູ້ຈັກັນເຮົາທຸກຄົນກໍບໍ່ມີໃຜຢາກຈາກລາບຸກຄົນເຫຼົ່ນັ້ນໄປໃສແມ່ນບໍ? ແຕ່ຕາມຄວາມເປັນຈີງແລ້ວ ມັນບໍ່ສາມາດຫ້າມການພົບພາກຈາກລ້າ ຈາກຄົນທີ່ຮັກ ຫຼື ຄອບຄົວ,ຍາດພີ່ນ້ອງ ແລະເພື່ອນຝູ່ງໄດ້ ເພາະມັນເປັນຄວາມຈີງຢ່າງໜື່ງທີ່ພວກເຮົາທັງຫຼາຍບໍ່ສາມາດປະຕິເສດ ເລື່ອງນີ້ໄດ້.

     ເມື່ອເຮົາຍັງນ້ອຍເຮົາເກີດຢູ່ບ້ານນອກບ້ານນາ ແລະ ເຕີບໃຫຍ່ມາໃນຊຸມຊົນຂອງຕົນເອງເປັນເວລາຫຼາຍປີ ໂດຍທີ່ບໍ່ເຄີຍຄິດເລີຍວ່າ: ຢູ່ມາມື້ໜື່ງເຮົາຕ້ອງໄດ້ຈາກບ້ານເກີດເມືອງນອນໄປຢູ່ຫົນແຫ່ງທາງອື່ນ.ຫຼື ເຮົາບໍ່ເຄີຍຄິດເລີຍວ່າຢູ່ມາວັນໜື່ງເຮົາຈະໄດ້ພັດພາກຈາກຄອບຄົວທີ່ຫວງແຫນນັ້ນໄປທີ່ອື່ນ.ຫຼາຍກໍລະນີກໍຈາກດ້ວຍການລົ້ມຫາຍຕາຍຈາກ.ຫຼາຍກໍລິນີທີ່ໂຊກດີກໍຈາກພຽງຊົ່ວຄາວເພື່ອໄປເຮັດພາລະໜ້າທີ່ຂອງຕົນເອງ.ຫຼາຍຄົນກໍຈາກໄປເພື່ອເລີ່ມຕົ້ນຊີວິດໄໝ່ ຢູ່ທີ່ແຫ່ງໄໝ່ ຫຼ ໄປສ້າງຄອບຄົວຢູ່ສະຖານທີ່ໄໝ່ ອີງຕາມເງື່ອນໄຂຂອງຫຼາຍຄົນບໍ່ຄືກັນ.

     ຫຼາຍຄັ້ງທີ່ເກີດການຈາກລາຂອງຄົນທີ່ຢູ່ໃກ້ໂຕເຮົາ ສ່ວນໂຕຂອງຂ້ອຍ ຮູ້ສຶກວ່າ ໂລກອ້ອມຂ້າງຂອງເຮົາໄດ້ປ່ຽນແປງໄໝ່ອີກແລ້ວ ເພາະຄົນທີ່ເຮົາເຄີຍພົບເຫັນ ບໍ່ຮູ້ວ່າເຂົາຈະຫວນຄືນມາຫາເຮົາອີກມື້ໃດ ຫຼື ໂຕເຮົາເອງຈະມີໂອກາດໄດ້ຢູ່ເພື່ອໄດ້ພົບກັບພວກເຂົາເຫຼົ່ານັ້ນຫຼື ບໍ? ມັນມີຄວາມແປກໃຈຜິດປົກກະຕິ ມັນມີຄວາມຕົກໃຈແບບອະທິບາຍຍາກ.ແຕ່ເຮົາກໍຕ້ອງໄດ້ທຳໃຈ ເພາະທຸກສີ່ງຢ່າງ ໃນໂລກໃບນີ້ລ້ວນແຕ່ ບໍ່ທ່ຽງແທ້ແນ່ນອນ ມີພົບກໍມີຈາກ ມີເກີດກໍມີຕາຍ ເປັນໄປຕາມການເວລາຂອງໃຜມັນ.

     ແຕ່ສີ່ງທີ່ຢາກເວົ້າເຖີງກໍຄື ເມື່ອເຮົາຮູ້ແລ້ວວ່າ: ວັນໜື່ງໃນອານາຄົດ ເຮົາ ແລະ ເຂົາກໍຕ້ອງໄດ້ເດີນທາງຈາກກັນແນ່ນອນ ບໍ່ຈາກດ້ວຍວິທີໃດກໍວິທີໜື່ງທີ່ກ່າວມາຂ້າງເທີງນັ້ນ.ແຕ່ຫຼາຍຄົນເວລາທີ່ຢູ່ນຳກັນ ບໍ່ຄ່ອຍສົນໃຈ ໃສ່ໃຈກັນ ແລະ ກັນ ມັກເບີ່ງຂ້າມຄວາມຮູ້ສຶກນຶກຄິດເລັກໆນ້ອຍໆ ຂອງອີກຝາຍ.ແຕ່ພໍຮອດມື້ທີ່ຈະຈາກກັນ ຈີ່ງຮູ້ສຶກເສຍດາຍ ແລະ ເສຍໃຈ ບາງຄົນກໍຈົມພືມພຳວ່າ:ຍັງບໍ່ທັນໄດ້ເຮັດສີ່ງນັ້ນ ສີ່ງນີ້ນຳກັນ ຍັງບໍ່ທັນໄດ້ໄປໃສມາໃສນຳກັນຊ້ຳ.ຍັງບໍ່ທັນເຊີໄພ້ນັ້ນນີ້ລາວຊ້ຳ ສ່ວນໃຫຍ່ມັກຈະໄດ້ຍີນບັນດາຄຳເສຍດາຍພວກນີ້ຈຳນວນຫຼາຍ.

     ສະນັ້ນເພື່ອຈະບໍ່ເສຍໃຈ ແລະ ເສຍດາຍເມື່ອເຖີງເວລາຕ້ອງຈາກກັນ ຕອນທີ່ຍັງມີໂອກາດໄດ້ຢູ່ນຳກັນ ແລະ ຍັງມີເວລາ ຈົ່ງຕັດສິນໃຈເຮັດສາສີ່ງດີໆນຳກັນ.ຢາກເຮັດຫຍັງເພື່ອຄອບຄົວກໍເຮັດສາ,ຢາກເວົ້າຫຍັງນຳຄົນທີ່ຮັກ ແລະ ເພື່ອຝູ່ງ ທີ່ເຮົາຄິດວ່າມັນຂັດຂ້ອງໃນໃຈ ກໍໃຫ້ຟ້າວເວົ້າຟ້າວເອີ້ຍ,ຢາກໄປໃສກໍພາກັນໄປສາ ກ່ອນວັນເວລາທີ່ເຮົາຈະບໍ່ມີໂອກາດໄດ້ເຮັດສີ່ງຕ່າງໆນຳກັນໄດ້ອີກ.

 ວັນເວລາກໍຫຍັບຈໍ້ເຈົ້າມາ ເວລາຜ່ານໄປໄວຫຼາຍ ຄາວດຽວກໍຈະຊີ້ນປີ 2022 ແລ້ວ ຫຼາຍຄົນກໍຄົງຈະໄດ້ເຮັດຫຍັງຫຼາຍໆຢ່າງໃນແກ່ຕົນເອງແລະຄອບຄົວ ພ້ອມທັງວາງແຜນເພື່່ອປີທີ່ຈະມາເຖີງນັ້ນຄື ປີ2023 

ໂດຍສ່ວນໂຕແລ້ວ ໃນປີ2022ທີ່ໃກ້ຈະໝົດລົງນີ້ ໄດ້ພົບພໍ້ຫຼາຍອັນສົມຄວນ ທາງດ້ານການງານ,ສຸຂະພາບ,ເສດຖະກິດການເງິນ,ຄວາມຮັກ,ມິດຕະພາບ,ການເດີນທາງ ແລະ ອື່ນໆ ມີທັງສີ່ງທີ່ດີ ແລະ ເກືອບດີ ສີ່ງທີ່ບໍ່ສົມຫວັງ ແລະ ເກືອບສົມຫວັງ ຜ່ານເຂົ້າມາແລະ ຜ່ານໄປຕາມການເວລາ ທັງນັ້ນທັງນີ້ ທຸກສີ່ງຢ່າງທີ່ຜ່ານມາຈະດີ ຫຼື ບໍ່ດີ ມັນລ້ວນແຕ່ແມ່ນສີ່ງທີ່ທຸກຄົ້ນຕ້ອງໄດ້ພົບພ້ໍໃນການໃຊ້ຊີວິດປະຈຳວັນ ສີ່ງນັ້ນເຮົາຈະຕ້ອງການຫຼື ບໍ່ຕ້ອງການກໍຕາມ ເຮົາຈະຢາກເຮັດຫຼື ບໍ່ຢາກເຮັດກໍຕາມ ມັນກໍບໍ່ສາມາດຫຼີກລ້ຽງໄດ້ 

ສຳລັບຂ້າພະເຈົ້າແລ້ວ ປີໜື່ງຜ່ານໄປ ຖືວ່າເປັນປີທີ່ດີຫຼາຍອີກປີໜື່ງ ເຖີງແມ່ນຈະມີທັງສີ່ງທີ່ເພີ່ງພໍໃຈ ແລະ ບໍ່ເພີ່ງພໍໃຈເຂົ້າມາໃນຊີວິດ ແຕ່ນັ້ນກໍຖືວ່າເປັນສີ່ງທີ່ດີທັງໝົດ ເປັນບົດຮຽນທີ່ດີທັງໝົດ ທັງເລື່ອງດີ ແລະ ບໍ່ດີ ສຳລັບເລື່ອງທີ່ດີ ກໍເປັນສີ່ງທີ່ປາຖະໜາຢູ່ແລ້ວ ແນ່ນອນວ່າເຮົາຍອມດີໃຈເປັນພິເສດ ແຕ່ສຳລັບເລື່ອງທີ່ບໍ່ດີ ແນ່ນອນວ່າບໍ່ມີໃຜປາຖະໜາແຕ່ເຖີງຢ່າງໃດກໍຕາມມັນຍອມເກີດຂື້ນແນ່ນອນ ແຕ່ສຳຄັນເວລາເກີດເລື່ອງທີ່ເຮົາບໍ່ມັກນີ້ລະຈະເປັນບົດພິສູດ ຄວາມສາມດທາງດ້ານຄວາມຄິດ ສະຕິປັນຍາ ແລະ ທົດສອບຈິດໃຈທີ່ເຂັມແຂງ ທີ່ຂ້າພະເຈົ້າວ່າ ເລື່ອງບໍ່ດີ ເປັນເລື່ອງດີກໍເພາະວ່າ ເຮົາຈະໄດ້ມີໂອກາດໄດ້ທົດສອບ ຄວາມສາມາດຕົນເອງວ່າເຮົາຈະສາມາດຜ່ານມັນໄປໄດ້ບໍກັບປັນຫາທີ່ຈະເຂົ້າມາໃນອານາຄົດເຮົາ ນັບຈາກນີ້ໄປ ທຸກທ່ານເຊື່ອໂລດວ່າ ຈະມີປັນຫາເຂົ້າມາເລື້ອຍໆ ບໍ່ໝົດບໍ່ຊົີ້ນຈົນກວ່າເຮົາຈະໝົດລົມຫານໃຈຈາກໄປ ສະນັ້ນຈົ່ງເຂັ້ມແຂງແລະຫ້າວຫານຜ່ານຜ່າອຸປະສັກໄປເລື້ອຍໆ 

ສຸດທ້າຍຂອບໃຈທຸກສີ່ງທີ່ເຂົ້າມາໃນປີ 2022 ມີທັງການເດີນທາງທີ່ດີ,ເພື່ອມິດສະຫາຍທີ່ດີ,ເລື່ອງລາວດີໆທີ່ໄດ້ພານພົບ ແລະ ຈະພະຍາຍາມຮັກສາແລະພັດທະນາ ສີ່ງທີ່ດີໄວ້ແລະໃຫ້ຍາວນານຕະຫຼອດການ ຂອບໃຈຕົນເອງທີ່ສາມາດຢູ່ມາໄດ້ຈົນພົ້ນປີ 2022 ສ່ວນປີ 2023 ຈະເປັນແນວໃດກໍເປັນເລ່ອງຂອງອານາຄົດ ຫວັງວ່າມັນຈະດີຂື້ນ ສູ້ໆຕົນເອງ ທຸກຄົນກໍສູ້ເຊັ່ນກັນເດີ