ໄດ້ຍິນຄົນກ່າວເວົ້າ ເປັນຂ່າວບໍ່ທາງການ

ຫາວ່າ ດວງສະໝອນສາວຕາຫວານ ແຕ່ງຕົວງາມໂອ້

ໄປອວດໂຕໂຊວເນື້ອ ຕາມຄລັບບາຣ໌ຍາມມືດຄໍ່າ

ໄຟແສງສີທຳໃຫ້ນ້ອງ ຫຼົງຫຼົ້ມເພາະສິ່ງລວງ

ຫຼາຍຄົນຫຼາຍສິ່ງທ້ວງ ໃຫ້ສິ້ນຄ່າຄວາມດີ

ເປັນນາລີຫຼົງແສງສີ ຊອກສະແຫວງຫາເຕັ້ນ

ໄປເປັນຄົນລິນເຫຼົ້າ ກິນນຳເຂົາເມົາແລ້ວມ່ວນ

ຊວນໄປໃສເຈົ້າກໍ່ພ້ອມ ຍອມໃຫ້ແມ່ນແຕ່ຕົວ

ເຂົາວ່ານ້ອງຊົ່ວຊ້າ ມີຜົວຈ່າຍພຽງຄືນ

ເປັນຍິງລືມສັດຈະທຳ ຮີດຄອງດີງາມນັ້ນ

ນ້ອງສຸກສັນໄປພຽງມື້ ຄືນລາຕີທີ່ມືດຄໍ່າ

ໃຜນອນນຳກໍ່ໄດ້ ຂໍພຽງໃຫ້ຈ່າຍເງິນ

ເຂົາປະເມີນຄ່ານ້ອງ ຕໍ່າກວ່າຄວາມຈິງ

ວ່າເປັນຍິງຂາຍຕົວ ມາກຜົວແຝງຊ້ອນ

ແຕ່ອ້າຍ ຫວັງວ່າດວງສະໝອນຫຼ້າ ບໍ່ເປັນເໝືອນຄົນເຂົາວ່າ

ຕົວອ້າຍ ບໍ່ນິນທາຕໍ່ນ້ອງ ຫຼືຫຍາມເວົ້າວ່າຊົ່ວເກີນ

ດັ່ງນັ້ນອ້າຍຈຶ່ງຮຽກເອີ້ນ ເພື່ອເຕືອນຕໍ່ສາຍສະໝອນ

ຢ້ານບັງອອນຫຼົງຄາລົມ ຫຼອກນາງຊົມຫຼິ້ນ

ຢ້ານນ້ອງເປັນນາລີສິ້ນ ເສຍຄວາມສາວລ້າເປົ່າ

ອ້າຍຈຶ່ງເຕືອນຕໍ່ເຈົ້າ ຢ້ານຫຼົງຫຼົ້ມເພາະສິ່ງລວງ

ຍ້ອນອ້າຍຮັກຫ່ວງນ້ອງ ຈຶ່ງບອກກ່າວຄວາມດີ

ຢ້ານນ້ອງມີລາຄີຄາວ ຊິເສື່ອມເສຍສັກສີນ້ອງ

ຢ້ານຕຼົມໝອງອຸລາເສົ້າ ຍາມຮັກເຂົາໄດ້ໂຮຍຫ່ວງ

ກັບໃຈເຖີດ ດວງສະໝອນທີ່ຮັກຂ້ອຍ ອ້າຍຄອຍເຈົ້າດ້ວຍຮັກຈິງ.