ເກີດມາຊາດນີ້   ເໝືອນມີບາບກຳ

ຫົວອົກຕຣົມຊ້ຳ  ຣະກຳອຸຣາ

ຊີວິດນ້ອຍໆ   ຂອງຂ້ອຍເກີດມາ

ເໝືອນຢາດນ້ຳຕາ  ມັນມາເປັນຄູ່ຊີວັນ

ນັບຕັ້ງແຕ່ເກີດ  ກຳເນີດມືນຕາ

ຊີວິດເກີດມາ  ອາພັບແທ້ໜໍ

ພັດພາກເຮືອນຮັງ  ເພື່ອນຝູງແມ່ພໍ່

ທຸກວັນໄຫວ້ຂໍ  ຍັງລໍຄົນຊ່ວຍທີ່ເມດຕາ

ຕັ້ງແຕ່ມື້ເກີດ  ກຳເນີດຊີວາ

ເໝືອນຂ້ອຍເກີດມາ  ໃນຫ້ອງກົງຂັງ

ຂ້ອຍເປັນນົກນ້ອຍ  ທີ່ໄຮ້ພະລັງ

ມະນຸດຈັບຂັງ  ຄົນສ່າງໄຮ້ເວດທະນາ

ຂໍຈົ່ງປ່ອຍຂ້ອຍ  ອອກຈາກກົງຂັງ

ຂ້ອຍມີຄວາມຫວັງ  ຢາກເຫັນພົງໄພ

ມີອະນາຄົດ  ໃນໂລກສົດໃສ

ຂ້ອຍຢາກບິນໄປ ຢາກພົ້ນຊີວິດໃນກົງ