ຄຳຖາມຂອງສຸພັດທະກ່ຽວກັບເຈົ້າລັດທິຕ່າງໆ

ຂ້າແຕ່ພຣະໂຄດົມຜູ້ຈະເລີນ ສະມະນະພຣາມເຫລ່ົ່າໃດ ເປັນເຈ້ົາຫມູ່ ເປັນເຈ້ົາຄະນະ ເປັນຄະນາຈານ ມີຊື່ສຽງ ມີຍົດ ເປັນເຈ້ົາລັທທິ (ສາດສະຫນາ) ຊົນເປັນອັນມາກຕ່າງເຂ້ົາໃຈວ່າເປັນຄົນດີ ສະມະນະພຣາມເຫລ່ົານັ້ນທັ້ງຫມົດຕຣັສຣູ້ແລ້ວຕາມປະຕິນຍາຂອງຕົນ ຫລືທັງຫມົດບໍ່ໄດ້ຕຣັສຮູ້ ຫລືວ່າບາງພວກຕຣັສຮູ້ ບາງພວກບໍ່ໄດ້ຕຣັສຮູ້ ຂ້າພຣະອົງຢາກຊາບຄວາມເປັນສະມະນະຂອງເຈ້ົາລັທທິເຫລ່ົານີ້ ຂໍພຣະອົງໂປຣດໃຫ້ຄວາມກະຈ່າງດ້ວຍ”

ພຣະຜູ້ມີພຣະພາກເຈ້ົາຊົງເຫັນວ່າ ປັນຫານີ້ບໍ່ຄວນພະຍາກອນ ເພາະຈະເປັນໄປເພື່ອຄວາມບໍ່ສະຫງົບໃຈ ຈຶ່ງໄດ້ຕຣັສຫ້າມວ່າ “ຢ່າເລີຍສຸພັທທະ ຄຳຖາມນີ້ຢຸດໄວ້ກ່ອນເຖິດ ເຮົາຈະສະແດງທັມແກ່ທ່ານ ທ່ານຈົ່ງຕັ້ງໃຈຟັງທັມນັ້ນໂດຍເຄົາລົບ ຈົ່ງຕັ້ງໃຈຟັງໃຫ້ດີເຖິດ”

ສຸພັທທະປຣິພາຊົກ ທູລຮັບພຣະດຳຣັສຂອງພຣະຜູ້ມີພຣະພາຄເຈ້ົາແລ້ວ

ພຣະພຸທທອົງຈຶ່ງຕຣັສວ່າ... “ດູກ່ອນສຸພັທທະ ສາດສະຫນາໃດບໍ່ມີອຣິຍະມັຄອັນປະກອບດ້ວຍອົງ ໘ ປະການ ສະມະນະຜູ້ສະຫງົບກໍ່ບໍ່ມີໃນສາດສະຫນານັ້ນ ຫາກພິກສຸຫລືໃຜກໍ່ຕາມ ປະຕິບັດຕາມມັກອັນເປັນທາງປະເສີດ ໂລກກໍ່ຈະບໍ່ວ່າງຈາກພຣະອໍລະຫັນ”

ມັກມີີອົງແປດແມ່ນຫຍັງ?

ແນວທາງດຳເນິນອັນປະເສີດຂອງຊີວິດຫລືກາຍ ວາຈາ ໃຈ ເພື່ອຄວາມຫລຸດພ້ົນຈາກທຸກ ເອີ້ນວ່າ ອະຣິຍະມັຄ ແປວ່າທາງອັນປະເສີດ ເປັນຂໍ້ປະຕິບັດທີ່ມີຫລັກບໍ່ອ່ອນແອ ຈົນເຖິງກັບຕົກຢູ່ໃຕ້ອຳນາດ ຄວາມຢາກແຫ່ງໃຈ ແຕ່ກໍ່ບໍ່ແຂງຕຶງຈົນເຖິງກັບເປັນການທໍລະມານກາຍໃຫ້ເຫືອດແຫ້ງຈາກຄວາມສຸຂທາງກາຍ ເພາະສະນັ້ນຈິ່ງໄດ້ເອີ້ນວ່າມັຊຊິມາປະຕິປະທາ ຄືທາງດຳເນິນສາຍກາງ ບໍ່ຍານບໍ່ຕຶງ ແຕ່ພໍເຫມາະເຊ່ັນສາຍດົນຕຣີທີ່ທຽບສຽງໄດ້ທີ່ແລ້ວ

ຄຳວ່າມັຄ ແປວ່າທາງ ໃນທີ່ນີ້ຫມາຍເຖິງທາງເດິນຂອງໃຈ ເປັນການເດິນຈາກຄວາມທຸກໄປສູ່ຄວາມເປັນອິດສະຫລະຫລຸດພ້ົນຈາກທຸກເຊິ່ງມະນຸສຫລົງຢຶດຖືແລະປະກອບຂຶ້ນໃສ່ຕົນດ້ວຍອຳນາດຂອງອະວິຊຊາ

ມັຄມີອົງແປດ ຄືຕ້ອງພ້ອມເປັນອັນດຽວກັນທັງແປດຢ່າງປຽບເຊືອກຟັ້ນແປດກຽວ

ອົງແປດຄື

1. ສັມມາທິດຖິ ຄືຄວາມເຂ້ົາໃຈຖືກຕ້ອງ

2. ສັມມາສັງກັປປະ ຄືຄວາມໃຝ່ໃຈຖືກຕ້ອງ

3. ສັມມາວາຈາ ຄືການເວົ້າຈາຖືກຕ້ອງ

4. ສັມມາກັມມັນຕະ ຄືການກະທຳຖືກຕ້ອງ

5. ສັມມາອາຊີວະ ຄືການດຳລົງຊີບຖືກຕ້ອງ

6. ສັມມາວາຍາມະ ຄືຄວາມພາກພຽນຖືກຕ້ອງ

7. ສັມມາສະຕິ ຄືການລະລຶກປະຈຳໃຈຖືກຕ້ອງ

8. ສັມມາສະມາທິ ຄືການຕັ້ງໃຈຫມັ້ນຖືກຕ້ອງ

ການປະຕິບັດທັມທຸກຂັ້ນຕອນ ລວມລົງໃນມັຄອັນປະກອບດ້ວຍອົງແປດນີ້ ເມື່ອຫຍໍ້ລວມກັນແລ້ວເຫລືອພຽງ 3 ຄື ສີລ - ສະມາທິ - ປັນຍາ ສະຫລຸບສັ້ນໆ ກໍ່ຄື ການປະຕິບັດທັມ(ສີລ-ສະມາທິ-ປັນຍາ)ກໍ່ຄືການເດິນຕາມມັຄ