ຕອນທີສິບ

 ທີ່ເທັກເປີດໃຫມ່

“It been said and done every beautiful thought ‘s been already sung

And I guess right now here's anothero one so your melody

will play will play on and on with best we own  ♫ ♫"

ສຽງເພງຈັງຫວະແນວຄຶກຄື້ນຖືກເປີດຂຶ້ນໃນຂະນະທີ່ພວກຂ້ອຍກຳລັງຍ່າງເຂົ້າມາໃນງານເປີດພີທີ ດ້ວຍຊຸດທີ່ບໍ່ມີໃຜຍອມໃຜ ເຊິ່ງຕອນນີ້ຂ້ອຍກຳລັງຢູ່ໃນເດຣສສີຂາວຕົກພຽງຫົວເຂົາ...​ ສ່ວນພວກອີ່ຈຽບກັບອີ່ເຜິ້ງຢູ່ໃນຊຸດເດຣສສີເຫລືອງກັບບົວ... ແຕ່ທີ່ໂດດເດັ່ນກວ່າຫມູ່ຄືຊິຫນີບໍ່ພົ້ນອີ່ສຸວັນນີ... ນາງອຸດສາລົງທຶນເຂົ້າຮ້ານອ້າຍຂ້ອຍ ແຕ່ງຫນ້າ ໃສ່ວິກຜົມບ໊ອບ ແບບອະລັງການ ໂດດຍສະເພາະເສື້ອສີບົວກັບໂສງຂາສັ້ນຂອງມັນ ທີ່ກຳລັງໂຊຂາຫມູເປັນຊັ້ນໆ ເຫັນແລ້ວ ອີ່ຕົນສາຍຕາຄົນທີ່ແນມເບິ່ງມັນຂະຫນາດ ບໍ່ຮູ້ຊິຫາງ້ຽງທັນຫລືບໍ່..... ລະອີ່ຈຽບມັນຄິດຖຶກເບາະວະທີ່ເອີ້ນມັນມານຳ...​ ຕອນນີ້ກະເຫລືອແຕ່ບັກໂດ້ເທົ່ານັ້ນທີ່ຍັງບໍ່ໂພ່ຫົວອອກມາ... ເຫັນວ່າມັນຊິມານຳອ້າຍສິນຍ້ອນວ່າລາວເປັນຫມູ່ຂອງຫມູ່ອ້າຍອີ່ຈຽບ... ເອີ້ຈະແມ່ນຊາດ ມັນບັງເອີນ

"ສູນັ່ງໂຕະໃດດີ...." ຂ້ອຍຖາມໃນຂະນະທີ່ພວກມັນກຳລັງເລືອກໂຕະ..

ຟາກຊ້າຍ ເປັນທີ່ປະທັບຂອງພວກຜູ້ຊາຍຫນ້າເຖົ້າ ທີ່ຫວັງຢາກຈະຫຍ້ຳຜູ້ສາວຊຳນ້ອຍ..... ສ່ວນອີກຟາກຂວາເປັນທີ່ປະທັບຂອງພວກຜູ້ຊາຍໄວລຸ້ນ ຫນ້າຕາ ອື່ມ ... ຂໍໂທດ ເຖາະ ໄປຕາຍແລ້ວເກີດໃຫມ່ ຊະ!! ທີ່ຂ້ອຍຢາກຮ້າຍໃຫ້ພວກມັນ ເພາະສາຍຕາອັນຫື່ນໆຫັ້ນແລະ...​ ເຫັນແລ້ວ ຢາກເອົາມີດແທງຕາແມ໊ງໃຫ້ມັນບອດເລີຍເດ... ​ສ່ວນທາງກາງ ຄົບທຸກເພດທຸກໄວດີ ບໍ່ສົນໃຈໃຜ ເຕັ້ນ ແລ້ວກໍ່ມີຄວາມສຸກສະເພາະແຕ່ຕົນເອງ

"ກູວ່າຢູ່ທາງກາງດີກວ່າ ເຫມາະສົມທີ່ສຸດ" ອີ່ເຜິ້ງສະເຫນີ

"ດີໆ" ແລ້ວພວກຂ້ອຍກໍ່ຕອບສະຫນອງຢ່າງດີ ຈາກນັ້ນກໍ່ມີແຕ່ຄົນຮີບພາສັງຂານຂອງຕົນເອງໄປບ່ອນໂຕໃກ້ໆກັບຫນ້າເວທີ

"ເອີ້ກູລືມບອກສູໄປວ່າ ມື້ນີ້ບົວມີຮ້ອງເພງຢູ່ເທັກນິ້ນຳ"

"ຫວາ ດີໆ ກູໄດ້ຍິນວ່າບົວຮ້ອງເພງມ່ວນ ກູຢາກເຫັນ..." ຂ້ອຍເວົ້າໃນຂະນະທີ່ກຳລັງວາງກະເປົາລາຄາແພງໄວ້ຂ້າງໆໂຕະ

"ເຮ້ ສູ.." ຈາກນັ້ນສຽງບັກໂດ້ກໍ່ຮ້ອງທັກທາຍຢູ່ທາງເຂົ້າເທັກ ໂດຍທີ່ມີວາທີສາມີສຸດຫລໍ່ຍ່າງມານຳຂ້າງໆ ຈະແມ່ນເຂົາເຈົ້າຮັກກັນ ... ເຫັນແລ້ວອິດສານະ ສ່ວນພວກຂ້ອຍກໍ່ບອກມືໃຫ້ພວກເຂົາເຈົ້າ ບາດແລ້ວທັງສອງກໍ່ມຸ້ງຫນ້າເຂົ້າມາ

"ສັ່ງຫຍັງລະບໍ່" ອ້າຍສິນເອີ່ຍຂຶ້ນຫລັງຈາກທີ່ຍ່າງມາຢຸດທີ່ໂຕະ

"ຍັງ" ອີ່ກະສືສອງໂຕຕອບພ້ອມກັນ........

"ສັ່ງແມ໊ະ" ລາວບອກຕໍ່

"ໂດຍໆ ດຽວນ້ອງຊິສັ່ງໃຫ້ ດີເວີ້ຍເນາະມີເສ່ຍມາລ້ຽງນິ ອິໆໆ" ຈາກນັ້ນອີ່ສຸວັນນີກໍ່ເອີ່ຍສັ່ງໃຫ້ເດັກເສີບທີ່ຢູ່ໃກ້ໆໂຕະເອົາເບຍມາສົ່ງ

"ເອີ້~~ ແລ້ວອ້າຍພາດບໍ່ໄດ້ມານຳຫວາ" ອີ່ແມ່ຊີຫັນຫນ້າໄປເອີ່ຍຖາມອ້າຍສິນ ຂ້ອຍຄິດໄວ້ແລ້ວວ່າມັນຕ້ອງຖາມ

"ບໍ່ມາ.... ພໍດີມັນຄາວຽກ ມີບົດໃຫ້ເຮັດນຳຫມູ່......"

ຄຳຕອບຈາກລາວເຮັດໃຫ້ຫມູ່ຂ້ອຍຍິ້ມອອກມາຫນ້ອຍຫນຶ່ງ ສົງໄສມັນຄືຊິຍັງບໍ່ທັນບອກແຟນມັນຕິວ່າມັນອອກມາຫລິ້ນ

"ຫວາ ແລ້ວລາວຮູ້ລະບໍ່ວ່າ ຂ້ອຍອອກມາຫລິ້ນ ພໍດີຂ້ອຍບໍ່ໄດ້ບອກລາວນະ"

      "ຮູ້!!" ສຽງທຸ້ມໃຫຍ່ເປັນຕາຍ້ານດັງຂຶ້ນຫລັງຈາກນັ້ນ ພ້ອມກັບການປະກົດໂຕຂອງອ້າຍພາດ... ຈາກທີ່ອີ່ແມ່ຊີມັນຍິ້ມຈົນປາກຊິຈີກ ປ່ຽນມາຫຸບລົງທັນທີ.....

      "ອ້າຍພາດ......" ມັນຄາງຊື່ລາວອອກມາຄ່ອຍໆດ້ວຍຄວາມອຶ້ງ ງານເຂົ້າແລ້ວມຶງ!!

      "ຊິອອກມາຫລິ້ນຄືບໍ່ບອກຂ້ອຍແດ່....." ສຽງເປັນຕາຢ້ານເອີ່ຍອອກມາອີກຄັ້ງ ເຊິ່ງມັນກໍ່ມີອຳນາດພໍທີ່ຈະເຮັດໃຫ້ອີ່ເຜິ້ງມັນໄດ້ແຕ່ຍິ້ມອອກມາແຫ້ງໆ....​ ມີເລື່ອງເທື່ອໃດມັນເປັນແບບນັ້ນຕະຫລອດ.... ດຽວມັນກະຊິຊອກຫາຄຳແກ້ໂຕ ກຽມເບິ່ງ

       "ແຮໆ ພໍດີຂ້ອຍລືມໄປ..." ຈາກນັ້ນມັນກໍ່ຍ່າງເຂົ້າໄປກອດແຂນແຟນມັນ ອ້ອນແບບຫນ້າຮັກໆ... ຂ້ອຍຍອມຮັບວ່າມັນເຮັດຄື ແນວມັນຫນ້າຮັກເດ... ​ຄັນປ່ຽນມາເປັນອີ່ກະສືສອງຄົນນັ້ນ ລະແມ່ນຫນ້າຫັກຄໍຖິ້ມໃຫ້ພວກມັນຕາຍຄາທີ່ເລີຍ (ອ້າວ!! ມາກ່ຽວຫຍັງກັບພວກກູວະ!!: ຈຽບ +ສຸວັນນີ)

       "ຍົກໂທດໃຫ້ຂ້ອຍໄດ້ບໍ່ ຂ້ອຍເຮັດຜິດໄປແລ້ວ..." ອ້າຍພາດເຮັດສີຫນ້າລັງເລ "ເທື່ອຫນ້າຂ້ອຍຊິບໍ່ເຮັດແບບນີ້ອີກແລ້ວ ທີ່ຮັກ" ປະໂຫຍກຫວານໆຍັງເອີ່ຍອອກມາເພື່ອທີ່ຈະຫວັງໃຫ້ອີກຝ່າຍຍົກໂທດໃຫ້ ເຊິ່ງຜົນສຸດທ້າຍລາວກະຍອມໃຈອ່ອນໃຫ້ມັນຢູ່ດີ

        "ກະໄດ້ໆ.... ແຕ່ເທື່ອຫນ້າຊິໄປໃສກະບອກຂ້ອຍແດ່"

       "ໂດຍໆ"

       "ຈະແມ່ນອິດສາເດ"​ ອີ່ຈຽບເອີ່ຍຂຶ້ນລອຍໆ "ຄັນຊິຫວານກະເກງໃຈຄົນບໍ່ມີຄູ່ແດ່"

       "ແມ່ນແລະ....​" ອີສຸວັນນີເອີ່ຍຕໍ່  "ໂດຍສະເພາະມຶງ ບັກໂດ້" ຫັນໄປເວົ້າໃກ້ຄົນທີ່ກຳລັງຢືນກອດກັນຢູ່ຟາກຂ້ອຍ "ຂໍໂທດເດີ້ ຢູ່ນີ້ບໍ່ແມ່ນແຕ່ໂລກຂອງພວກເຈົ້າເດີ້"

     "ກະແນວພວກກູຮັກກັນເດ..... ແມ່ນບໍ່ທີ່ຮັກ"
    

     "ແມ່ນ" ຈາກນັ້ນ ອ້າຍສິນກໍ່ຫອມແກ້ມໂດຄ່ອຍໆ ຈົນອີກຫນ້າມັນແດງປານຫມາກຕຳນິນ ... ຊິເຮັດຫຍັງກະເບິ່ງອີ່ສາມໂຕຂີ້ອິດສາຄືພວກຂ້ອຍແດ່ກະໄດ້ ອ້າຍສິນເອີ້ຍ

      "ຂໍອະນຸດຍາດເສີບເບຍ" ບາດແລ້ວກໍ່ເດັກເສີບເວົ້າແຊກລະຫວ່າງການສົນທະນາ ໃນຂະນະທີ່ກຳລັງຍົກເບຍມາສອງລັງ

       "ມາເລີຍໆຜູ້ບ່າວ........" ອີ່ສຸວັນນີກໍ່ສະເຫນີຫນ້າໄຂເບຍເປັນຄົນທຳ ແລ້ວກໍ່ເຢ້ນໃຫ້ທຸກຄົນແຕ່ລະຈອກ

        "ຍົກແມ໊ະ" ຂ້ອຍເປັນຜູ້ເອີ່ຍຊັກຊວນ ສ່ວນພວກທີ່ເຫລືອກະເຮັດຕາມຢ່າງເຕັມໃຈ ພ້ອມກັບມີສຽງຫ້ອງໂຮຢ່າງຖືກໃຈທີ່ຖືກບັນເລງຂຶ້ນຫລັງຈາກນັ້ນ

   ທັນວາ Part

      ຂ້ອຍຖືກບັງຄັບໃຫ້ບັກເດັກເປດມາເບິ່ງມັນຫລິ້ນຄອນເສີດ ໂດຍທີ່ມັນອ້າງເຫດຜົນມາວ່າ ຊິເອົາໂທລະສັບມາໃຫ້ຂ້ອຍ ຫ່າມັນນິ ຄັນມັນບໍ່ເວົ້າເລື່ອງໂທລະສັບຂຶ້ນມານະ ຝັນເດີ້ວ່າຂ້ອຍຊິມາຢຽບບ່ອນ.... ລະອີກຢ່າງ ຂ້ອຍກະບອກພວກຫມູ່ຂອງອາລິນ້າແລ້ວວ່າ ຂ້ອຍອອກໄປຫລິ້ນນຳເຂົາເຈົ້າບໍ່ໄດ້ຍ້ອນຄາວຽກ... ບໍ່ຮູ້ວ່າພວກນັ້ນພາກັນໄປຫລິ້ນເທັກໃດ ຫວັງວ່າມັນຄືຊິບໍ່ແມ່ນເລື່ອງບັງເອີນເດີ້

       ລະຊ່ວງນີ້ຈັກອາເລັກມັນເປັນອີ່ຫຍັງຂອງມັນກະບໍ່ຮູ້ ເຫັນງຽບໆ ຊຶມເສົ້າ ຕະຫລອດ ຖາມຄຳຕອບຄຳ ຈິດໃຈບໍ່ຢູ່ກັບເນື້ອກັບໂຕ ..ບໍ່ກວນປະສາດຂ້ອຍຄືຕອນທຳອິດ ເຮີຍຊ່າງມັນເຖາະ...  ຈາກນັ້ນຂ້ອຍກໍ່ສະບັດຄວາມຄິດອອກ ແລ້ວກໍ່ສັ່ງເປັບຊີ້ມາແກ້ວຫນຶ່ງ ພໍດີບໍ່ມີກະຈິກກະໃຈຢ່າງຈະດືມຫຍັງເປັນພິເສດ...  ເພາະວ່າຂ້ອຍເບື່ອທີ່ກຳລັງຢືນຢູ່ຄົນດຽວຢູ່ໃນຝັ່ງຂອງພວກໄວລຸ້ນເດັກນ້ອຍຫນ້າຕາປານຄົນເມົາຢາບ້າ ຂ້ອຍບໍ່ຢາກຈະໄປຢູ່ບ່ອນຟາກຄົນເຖົ້າ ດຽວຊິໄປກົມກືນກັບພວກນັ້ນ ເຮີ່ຍ..... ເຮັດແນວໃດກະຫນ້າເບື່ອນະ ຄັນມີມັນມາຢືນຖຽງນຳກັນຄືແຕ່ກ່ອນກະຄືຊິດີ ຈະບໍ່ຕ້ອງມີອາລົມເບື່ອຫນ່າຍແບບນີ້ນະ

       ຜ່ານໄປຫລາຍນາທີ ສາຍຕາຂອງຂ້ອຍແນມໄປສຳຫລວດຄົນທີ່ພາກັນມີຄວາມສຸກກັນທົ່ວຫນ້າ ຈາກນັ້ນກໍ່ຫລຽວໄປເຫັນຄົນຫນຶ່ງ ສູງໆ ດຳໆ ອ້ວນໆ ເຕັ້ນທ່າແບບຄົນເມົາຢາຂ້າແມງໄມ້ ... ອ໊ຽດ!!! ດະ ດຽວ ສາບານໄດ້ເລີຍຂ້ອຍບໍ່ໄດ້ຕາຝາດໄປ... ອັນທີ່ຂ້ອຍເຫັນມື້ກີ້ ມັນແມ່ນອີ່ສຸວັນນີຕົວະຫັ້ນ ພາກັນມາຄົບທີມເລີຍ ລວມທັງສິນນຳ ທີ່ກຳລັງຢືນກອດໂດ້ຢູ່ຂ້າງໆ ຈີ໊ດເລີຍ ເຫັນແລ້ວນຳຕາຂ້ອຍຊິໄຫລອ໊ະ

ຈາກອີ່ສຸວັນນີກໍ່ຫລຽວມາເຫັນຂ້ອຍກ່ອນຫມູ່ ຕາຂ້ອຍກັບມັນກຳລັງແນມເບິ່ງຫນ້າກັນພໍດີ ຕາຍລະ ວ່າຊິຫລີ້ມັນແຕ່ບໍ່ທັນຊ້ຳ ແຖມມັນຍັງຮ້ອງໃສ່ບັກດັງອີກ

"ເຮີ້ຍ ເຈ້!!" ສ່ວນທີ່ເຫລືອກໍ່ຫລຽວມາເບິ່ງພ້ອມກັນ.... ບໍ່ໃຫ້ຫລຽວມາແນວໃດ ແນວແຫກປາກດັງປານນັ້ນ ອັນເພງທີ່ເປີດນິ ບໍ່ສາມາດກືນສຽງມັນໄດ້ເລີຍ  ແລ້ວບໍ່ພໍເທົ່າໃດ ຮ່າງໃຫຍ່ໆຂອງມັນກໍ່ຮອບສັງຂານມາຫາຂ້ອຍເຖິງໂຕະ

"ມາໄດ້ແນວໃດນິ ໃສວ່າຊິບໍ່ມາ"

"ມີເຫດຈຳເປັນ ກະເລີຍຕ້ອງມາ" ຂ້ອຍຕອບໄປປັດໆ

"ຫວາ ຊັນໄປຫລິ້ນນຳໂຕະພວກເຮົາດີບໍ່" ມັນຊວນ ແຕ່ຂ້ອຍກະຄືຊິປັດຕິເສດບໍ່ໄດ້ດອກ ແນວຂ້ອຍເອງກະລັງຢືນຢູ່ຄົນດຽວຢູ່ ສ່ວນພວກມັນ ຂ້ອຍກະຮູ້ຈັກ ແຖມສະນິດກັນດີອີກ

"ອື່ມ~~" ຂ້ອຍກະເລີຍຈຳເປັນຕ້ອງງຶກຫົວຕາມນັ້ນ

"ໄປ໋ຊັນ: ຈາກນັ້ມືໃຫຍ່ບວມຂອງມັນກໍ່ລາກແຂນຂ້ອຍໄປເຂົ້າມາຮ່ວມໂຕະ ໂດຍທີ່ເຂົ້າມາຢືນຢູ່ລະຫວ່າງກາງຂອງອາລິນ້າ ໂດຍທີ່ນ້ອງສາວຂອງກຳລັງຢູ່ຟາກຊ້າຍແລະກໍ່ມີສິນທີ່ກຳລັງຢູ່ຟາກຂວາ

ບໍ່ຮູ້ເປັນຫຍັງມັນຄືລາກຂ້ອຍມາຢູ່ນິວະ... ແຮງບໍ່ຢາກເຫັນພາບບາດຕາໃກ້ໆນິ

"ໃສວ່າເຈ້ຊິບໍ່ມາຫັ້ນ........ ຈຽບເປີດສາກຖາມ ສ່ວນພວກທີ່ເຫລືອກໍ່ຢືນຟັງຢ່າງຕັ້ງໃຈ... ຂໍໂທດເດີ້ ຂ້ອຍບໍ່ແມ່ນນັກໂທດຈັກຫນ້ອຍ

"ກະພໍດີມີເລື່ອງຈຳເປັນ ກະເລີຍຢາກມາ"

"ຈຳເປັນອີ່ຫຍັງລະ"  ເບິ່ງມັນຖາມ...... ແລ້ວຂ້ອຍຊິຕອບຈັງໃດ໋ນິ ແຮງຊອກຫາຄຳແກ້ໂຕຍັງບໍ່ໄດ້ອີກ ... ຂ້ອຍບໍ່ມີທາງບອກພວກມັນໄປດອກວ່າ ຂ້ອຍມາຍ້ອນບັກເດັກເປດນັ້ນ... ດຽວພວດນັ້ນຊິຫາວ່າຂ້ອຍຢາກຫຍ້ໍາຫຍ້າອ່ອນ... ພວກນີ້ແຮງເປັນຂາເຢີ້ຍຢູ່ແລ້ວ

"ກະພໍດີ ເອີ່ ເຈ້ ເອີ່ ມີນັດນຳລູກຄ້າ ແຕ່ຕອນນີ້ເຂົາເຈົ້າມາບໍ່ໄດ້"  ສຸດທ້າຍກະຫາຄຳແກ້ໂຕມາຈົນໄດ້

"ແນ່ໃຈ໊" ອີ່ຈຽບຖາມອີກຄັ້ງ

"ອື່ມ... ພໍດີເຈ້ວ່າຊິກັບແລະນະນິນະ ແຕ່ສຸວັນນີເຂົ້າມາເຫັນເຈ້ກ່ອນ"    ແລ້ວພວກເຫລືອມັນກໍ່ງຶກຫົວເຂົ້າໃຈ......... ເຮີ່ຍ... ລອດໄປແລ້ວກູ

       "ເອີ້ສຸວັນນີເຍັ້ນເບຍໃຫ້ຫມູ່ອ້າຍແດ່ ....​ "

       "ໂດຍ ດຽວນ້ອງຈັດໃຫ້"     ສິນບອກຄົນທີ່ຢູ່ຕໍ່ຫນ້າຂ້ອຍ...​ ພໍແຕ່ໄດ້ຍິນສຽງມັນກະເຮັດໃຫ້ໃຈຂ້ອຍສັ່ນໄຫວແລ້ວ ເປັນຫຍັງສະຫວັນຕ້ອງແກ້ງໃຫ້ຂ້ອຍແອບມັກມັນວະ ໂດຍທີມີມັນກະມີຄົນຢູ່ຂ້າງໆຢູ່ແລ້ວ.... ແຖມແຟນມັນຍັງຫນ້າຫວານກວ່າ ອາຍຸນ້ອຍກວ່າ ຂ້ອຍທຽບກັບໂດ້ບໍ່ໄດ້ແທ້ໆ ແຮງ ຄິດ ນ້ຳຕາຂ້ອຍຊິໄຫລ

..........................................................

ລອງປ່ຽນມາເຮັດໂຕຫນັງສືໃຫ້ມັນຫ່າງໆລອງເບິ່ງ

ບາງເທື່ອມັນອາດຈະອ່ານງ່າຍຂຶ້ນກວ່າເກົ່າ

ເອີ້ລະ Writer ຢາກໄດ້ເຟສບຸກແຕ່ລະຄົນນະ

ຝາກເມລເຟສບຸກໄວ້ແດ່ ຫລື ຊື່ເຟສກະໄດ້

Writer ຢາກໄປແອັດຫລິ້ນນຳ