ການທ່ອງທ່ຽວແມ່ນຂະແໜງເສດຖະກິດໃນຂົງເຂດບໍລິການ ທີ່ຄົນທົ່ວໄປເອີ້ນວ່າ: "ອຸດສາຫະກຳທີ່ບໍ່ມີ
ຄວັນ" ຢູ່ປະເທດອື່ນໆໃນທົ່ວໂລກ ໄດ້ຖືເອົາວຽກງານນີ້ເປັນຂະແໜງເສດຖະກິດສຳຄັນ ສ້າງວຽກເຮັດງານທຳ ແລະ
ກະຈາຍລາຍໄດ້ໄປສູ່ທ້ອງຖິ່ນຮາກຖານມາແລ້ວຫຼາຍຕໍ່ຫຼາຍ ຖ້າຮູ້ຈັກຈັດການໃຫ້ຖືກຕ້ອງຕາມຂັ້ນຕອນ ແລະ ເປັນລະ
ບົບຄົບຊຸດ.
ກິດຈະກຳທ່ອງທ່ຽວ ແບບລາວທ່ຽວລາວ ເຖິງວ່າຈະມີໜໍ່ແໜງເລັກນ້ອຍ ບໍ່ທັນເຕີບໃຫຍ່ ເນື່ອງຈາກລາຍ
ຮັບຂອງບຸກຄົນສະເລ່ຍຍັງຕ່ຳ ແຕ່ກໍພໍມີແວວເຫັນວ່າຈະຄ່ອຍໆເຕີບໃຫຍ່ເປັນລຳດັບໄປ ຜ່ານມາກໍເຫັນມີພຽງແຂກຕ່າງ
ດ້າວທ້າວຕ່າງແດນ ຫຼື ຄົນຕ່າງປະເທດ ທີ່ຍ່າງລຸດໆລ້າຍໆພໍໄດ້ເຫັນຕາມຕົວເມືອງໃຫຍ່ ແລະ ເມືອງທີ່ເປັນຈຸດທ່ອງ
ທ່ຽວສຳຄັນ.
ລາວທ່ຽວລາວ ເປັນກິດຈະກຳໜຶ່ງທີ່ສຳຄັນ ເພື່ອໃຫ້ຄົນລາວສົນໃຈ ຫຼື ຊອກຮູ້ວັດທະນະທຳແບບແຜນ
ດຳລົງຊີວິດຂອງແຕ່ລະທ້ອງຖິ່ນ ແຕ່ລະຊົນເຜົ່າທີ່ມີເຖິງ 49 ເຜົ່າຊົນ ຊຶ່ງດຳລົງຊິວິດເປັນວົງສາຄະນາຍາດແຫ່ງຊາດ
ດຽວກັນ ຢາຍແຕ່ເໜືອເຖິງໃຕ້ ສິ່ງທີ່ເປັນວັດທະນະທຳ ວັດຖຸບູຮານ ປູຊະນີຍະສະຖານ ຫຼື ຮີດຄອງປະເພນີ ແລະ ທຳ
ມະຊາດ ພູຜາປ່າໄມ້ ນ້ຳຕົກຕາດ ຫຼື ສິ່ງທີ່ທຳມະຊາດສ້າງໄວ້ ແລະ ມະນຸດສະສົມໄວ້ ຫຼື ຮ່ອງຮອຍບາດແຜຂອງສົງຄາມ
ທຳລາຍຜ່ານມາ ຍັງມີໃຫ້ເຫັນຫຼາຍທົ່ວປະເທດ ພໍໃຫ້ຜູ້ບໍ່ເຄີຍພົບເຫັນໄດ້ສຳພັດ ຮຽນຮູ້ ແລະ ເຂົ້າໃຈປະເທດຊາດຢ່າງ
ເລິກເຊິ່ງ ເພື່ອເພີ່ມເຕີມຄວາມເຂົ້າໃຈທີ່ບໍ່ທັນເຕັມເມັດເຕັມໜ່ວຍໃຫ້ໜັກແໜ້ນຂຶ້ນຕື່ມ.
ສົມມຸດວ່າ ພວກເຮົາບໍ່ເຫັນ ບໍ່ຮູ້ຄວາມເປັນມາສະຖານທີ່ ຫຼື ວັດຖຸຕົວຈິງ ກໍບໍ່ສາມາດອະທິບາຍເຖິງສິ່ງນັ້ນ
ຖືກຕ້ອງໄດ້ເທົ່າກັບໄດ້ຍິນກັບຫູ ໄດ້ເບິ່ງກັບຕາ ຜ່ານມາຜູ້ຂຽນເຄີຍເຫັນກໍລະນີໜຶ່ງວ່າເກີດຢູ່ພາກໃຕ້ ແຖບດອນໂຂງ ຖືກ
ໝູ່ເພື່ອນທາງວຽງຈັນ ຖາມວ່າ ຄອນພະເພັງ ແລະ ຫຼີ່ຜີ ມີຄວາມໝາຍອັນດຽວກັນບໍ? ຜູ້ກ່ຽວເຮັດທ່າທີອຶດອັດ ເຮັດໜ້າ
ເຫຼືອງ ແລະ ສະແດງທ່າທີຮັບຮູ້ວ່າເປັນອັນດຽວກັນ ຈາກບ່ອນຫັ້ນຈຶ່ງເວົ້າວ່າ ຄົນຢູ່ກັບທ້ອງຖິ່ນຖ້າບໍ່ໄດ້ໄປ ອາດບໍ່ຮູ້ແນ່
ນອນ.
ອີກດ້ານໜຶ່ງຖ້າວ່າເຮົາໄປທ່ຽວຕ່າງປະເທດເໝືອນກັນ ບໍ່ວ່າຈະໄປທ່ຽວໂດຍກົງ ຫຼືຈະໄປດ້ວຍການໄປປະຊຸມ
ສຳມະນາ ຫຼື ກິດທຸລະສ່ວນຕົວກໍຕາມ ຕ້ອງມີຄວາມລະມັດລະວັງ ແລະ ຄວນກຽມພ້ອມທາງຂໍ້ມູນສະເໜີ ເພາະຂໍ້ມູນ
ຕ່າງໆກ່ຽວກັບປະເທດລາວ ມີນັກທ່ອງທ່ຽວທີ່ມາທ່ຽວ ຂຽນເຖິງຫຼາຍຫົວຂໍ້ແລ້ວ ແລະ ບົດບາດຂອງປະເທດລາວ ຕໍ່
ຄວາມສະດວກສະບາຍໃນການທ່ອງທ່ຽວກໍຖືກຍົກສູງໃຫ້ເຫັນ ແລະ ດຶງດູດເອົານັກທ່ອງທ່ຽວຄົນແລ້ວຄົນເຫຼົ່າ ໃຫ້ເຂົ້າ
ມາທ່ຽວລາວຫຼາຍຂຶ້ນຕາມລຳດັບ ຖ້າວ່າຖືກຖາມຢູ່ຕ່າງປະເທດຢ່າງໜ້ອຍກໍຄວນມີຂໍ້ມູນພື້ນຖານພໍໄດ້ໂອ້ລົມເຂົາເຈົ້າ
ໄດ້ ແລະ ກາຍເປັນຜູ້ໂຄສະນາ ຫຼື ເຮັດການຕະຫຼາດໃຫ້ແກ່ການທ່ອງທ່ຽວລາວໄດ້.
ດັ່ງນັ້ນ ກິດຈະກຳລາວທ່ຽວລາວ ເອົາຄົນເໜືອໄປທ່ຽວໃຕ້ ເອົາຄົນພາກໃຕ້ໄປທ່ຽວພາກເໜືອ ພາກກາງ
ນອກຈາກເພີ່ມພູນສົ່ງເສີມເສດຖະກິດພາຍໃນ ເງິນບໍ່ຮົ່ວໄຫຼແລ້ວ ຍັງເປັນການສ້າງແນວຄິດຮັກຊາດອັນດູດດື່ມ ແລະ
ເວລານັ້ນຈະຮູ້ສຶກວ່າ ຜືນແຜ່ນດິນແຫ່ງນີ້ ບັນພະບູລຸດປົກປັກຮັກສາໄວ້ລຸ້ນຕໍ່ລຸ້ນແມ່ນມີຄ່າມະຫາສານແທ້ໆ ຄວາມອຸ
ດົມສົມບູນທີ່ກ່າວກັນມາບໍ່ແມ່ນເວົ້າເປັນທິດສະດີ ແຕ່ຫາກແມ່ນອຸດົມສົມບູນໃນຕົວຈິງ ເຊັ່ນ: ມີເຂດເປັນພູເຂົາ ທົ່ງພຽງ
ພູພຽງ ສາຍນ້ຳລຳເຊຕ່າງໆທີ່ເປັນສາຂາແມ່ນ້ຳຂອງ ທີ່ກຳລັງເປັນ ແລະ ຈະເປັນໝໍ້ໄຟອາຊຽນ ມີທຳມະຊາດ ພູຜາປ່າ
ໄມ້ສວຍງາມ ແລະ ຄວາມຫຼາກຫຼາຍຂອງຊີວະນາໆພັນທີ່ບາງປະເທດບໍ່ມີ.
ທ່ອງທ່ຽວທາງສາຍຕັ້ງ ທາງເລກທີ 13 ແຕ່ເໜືອເຖິງໃຕ້ພຽງຊົ່ວຂ້າມຄືນ ທ່ຽວທາງສາຍຂວາງ ຕາເວັນອອກ
-ຕາເວັນຕົກ ຕາມສາຍທາງເລກ 8 ເລກ 9 ແລະ ເລກອື່ນໆ ຈະເຫັນວ່າປະເທດຊາດເຮົານີ້ໜ້າທ່ອງທ່ຽວແທ້ໆ ນອກ
ຈາກນີ້ຍັງສຳພັດກັບລົດຊາດອາຫານທີ່ແຊບນົວຂອງແຕ່ລະທ້ອງຖິ່ນຈັດໃຫ້ອີກດ້ວຍ.
ຖ້າຈະບັນລະບາຍເລື່ອງລາວທ່ຽວລາວ ຈະບໍ່ມີຍາມສິ້ນສຸດງ່າຍ ເພາະຢູ່ບ່ອນໃດ ເມືອງໃດ ແຂວງໃດ ລ້ວນ
ແຕ່ມີເອກະລັກ ມີສີສັນຈຸດພິເສດ ມີສະເໜ່ທີ່ບໍ່ຊ້ຳແບບກັນ ແລະ ບໍ່ມີບ່ອນໃດທີ່ຈະສົດໃສສວຍງາມຄືດິນແດນແຫ່ງນີ້...
ບໍ່ເຊື່ອກໍຈົ່ງຄ່ອຍໆພາກັນໄປເທື່ອລະໜ້ອຍ ຖ້າບໍ່ໄປທ່ຽວກໍຈະບໍ່ພົບເຫັນຂອງດີໆໃນປະເທດເຮົາເປັນແນ່ແທ້... ທາງທີ່ດີ
ກໍຄືຕ້ອງພິສູດໃຫ້ເຫັນຢ່າງຈິງຈັງນໍທ່ານ.

ໂຫວດເລີຍ! ເບິ່ງຜົນໂຫວດ

« ຕົວເລືອກສຳລັບແບບສຳຫຼວດ