ສາຍຝົນຢົດຢາດຍ້ອຍ..................ຫຼາຍຄໍ່າວັນຄືນ

ເຈົ້າຊ່າງຝືນໂຮຍລົງ......................ບໍ່ວ່າງເຊົາວາຍເວັ້ນ

ທະທີເຂັນແຂງກ້າ........................ປະກາຍແລວຖ້ວມທົ່ງ

ສັດສິ່ງຂອງປູກລ້ຽງ.....................ລອຍລ້າງຫ່າງໜີ

ຍີນວ່າມີຂ່າວຮ້າຍ......................ນໍ້າຖ້ວມຖິ່ນເມືອງຊຽງເງີນ

ແກ້ມເປີນເວີນຄົນງາມ.................ຢູ່ຢ່າງໃດເດນ້ອງ

ຂ່າວວ່າເຄຫາຫ້ອງ....................ນາສວນນໍ້າຖ້ວມທົ່ວ

ປວງປະຊາພີ່ນ້ອງ......................ແສນເສົ້າໂສກລະທົມ

ເມົາ.....ຢ່າຝືນຢູ່ນິ້ງ..................ນັ່ງດື່ມຈົນລືມຕົວ

ແລ້ວ....ຈົ່ມຄົວຄາວຫາ............ວ່າກະເປົາແປນຮ້າງ

ຢ່າ.....ຊູວາງຄີງໂກ້..................ໂລເລອວດເກັ່ງ

ກັບ....ເມືອເມຍນັ່ງດ່າເປັ້ງເປັ້ງ.....ວ່ານອນຄ້າງຢູ່ໃສ

ຄັນເມົາຫຼາຍໃຫ້ພັກຊົ້ນ...........ເຊົາເມື່ອຍເອົາແຮງ(?)

ພັກໂຮງແຮມຫາຍເມົາ.............ຈິ່ງຕ່າວຄືນເມືອບ້ານ

ຢ່າຝືນຫານເກີນກ້າ...............ຂັບຍາມເມົາຊິວາຍວອດ

ຢ້ານລົດຈອດກ່ອນຮອດບ້ານ....ເປັນຜີເຝົ້າຂ້າງທະໜົນ...

ເກີດມາແລ້ວຕ້ອງສູ້.............ເພື່ອຢືນຢູ່ບົນໂລກາ

ວາສະໜາຄົນເຮົາ...............ແຂ່ງກັນບໍ່ມີໄດ້

ຄັນເມື່ອໃດລວຍແລ້ວ...........ຄົນຈົນເຈົ້າຢ່າມິ່ນ

ຢູ່ບົນດິນໃຕ້ຮົ່ມຟ້າ..............ພຽງພ້ອມຄ່າເທົ່າກັນ

ຄວາມຝັນມີເພື່ອໃຫ້...........ສານຕໍ່ເດີນຕາມ

ຄວາມງາມແນວປະດັບ.......ຊ່ວຍຊູໃຫ້ເຮົາກ້າວ

ຄວາມສະຫາວອວດເອ້........ຄືຄວາມຕາຍທຽມທ່າ

ຄວາມອາດຫານເກັ່ງກ້າ.......ມີໄວ້ໃຫ້ສູ້ຝັນ...ແທ້ນາ..

ຢ່າດ່ວນຕິວ່າອ້າຍ…………..... ຊາຍແກ່ເກີນໄວ
ແກ່ໜ້ອຍດຽວພຽງກາຍ……..ສ່ວນໃຈນັ້ນໄວຫ້າວ
ຫລາຍພັນສາຍາວເຍື້ອນ....…ຫລາຍເດືອນປີອ້າຍທົນຢູ່
ຂາດຄູ່ຄອງຮ່ວມຊ້ອນ………ຈົນເຖົ້າແກ່ສະລາ

ວາດສະໜາໂສກເສົ້າ………. ຫລາຍເທື່ອຜິດຫວັງ

ຮັກເຄີຍເພພັງເສຍ………..… ມຸ່ນທະລາຍມາຍມ້າງ
ຖືກສາວວາງຄຳເວົ້າ……….... ຫວານອຳລຳແລ້ວໄລຫ່າງ
ຮັກລ່ອງລອຍເຄື່ອນຄ້າງ…... ເຫລືອພຽງຊູ້ສ່ວນໃຈ

ຢູ່ຫລາຍປີເລີຍແກ່ເຖົ້າ……… ສາວກ່າວນິນທາ

ຊ່າງເກີດມາດຽວດາຍ………… ຄູ່ຄອງບໍ່ມີຊ້ອນ
ອອນຊອນຍາມເຂົາເຢີ້ຍ……… ພໍ່ລຸງເອີຍເຈົ້ານັ້ນແກ່...ແລ້ວເດ!
ກັບໄປສາ...ໄປຫາແມ່ອີ່ນ້ອຍ…. ຄອຍຖ້າຢູ່ເຮືອນ

ບໍ່ເໝືອນຄຳກ່າວເຢີ້ຍ……..... ຂໍເອີ່ຍຄວາມຈິງ...ນ້ອງເອີຍ!

ວ່າຂາດຍິງຄຽງກາຍ………... ປ່ຽວດາຍເດີນຍ້າຍ
ສ່ວນວ່າໃຈແລຈ້ອງ………….. ງອຍຄອນຊົມຫຍ້າອ່ອນ
ຢ້ານຫລາຍເດ....ຢ້ານອົກຫັກຕື່ມຊ້ອນ....ຊໍ້າເຖົ້າແກ່ສະລາ

 ຂໍຢ່າຫາວ່າອ້າຍ……………. ກາຍກ່າວວາຈາ

ຄົນສະລາໃຈດີ……………….. ຄ່າແພງພັນລ້ານ
ບໍ່ແມ່ນຄົນພານຮ້າຍ…………. ດື່ມສຸລາຫາຫລິ້ນທ່ຽວ...ໃດເນີ!
ແກ່ເຄິ່ງດຽວພຽງນອກເນື້ອ……. ສ່ວນໃຈນັ້ນບໍ່ແກ່ນຳ

ຂໍນິຍາມອີກຄັ້ງ…………….. ຄົນແກ່ພຽງກາຍ

ຄືແກ່ມີຄວາມໝາຍ................... ວ່ອງໄວແວວກ້າ
ແກ່ປັນຍາຄວາມຮູ້…………… ວິຊາສູງຫລອມຫລໍ່

ແກ່ຮູ້ຊອກຮູ້ຄົ້ນ...ແກ່ຮູ້ໝົ່ນຮູ້ໄງ້…ແກ່ມີໄວ້ຊູ່ແນວ...!..

ຊົມ....ຄວາມງາມເອກອ້າງ................ທິວທັດແຫ່ງເມືອງລາວ

ເຊີຍ....ຄວາມສຸກຍາມເຫັນ..............ຖິ່ນພຽງດອຍກ້ວາງ

ວັນ....ຄືນຫອມຫວນກຸ້ມ................ມາລາງາມບານຊື່ນ

ປູກ....ຄວາມຮັກເຊື່ອງຊ້ອນ...........ຊອນໄວ້ວ່າງໃຈ

ຕົ້ນ....ຕຳນານບອກໄວ້................ເຮົາຮັກໄຄ່ບູຊາ

ໄມ້....ຈຳປາຈຳປີ...........................ມິ່ງຂັວນເມືອງບ້ານ

ແຫ່ງ....ຫົນໃດຫວານຊຶ້ງ..............ຈຳປາລາວລືຊື່

ຊາດ....ຄືຄວາມເອກອ້າງ..............ເດີນກ້າວວັດທະນາ

......................ເອົາຄຳຂຶ້ນຕົ້ນມາເຊື່ອມເຂົ້າກັນ ຈະມີຄວາມໝາຍວ່າ " ຊົມເຊີຍວັນປູກຕົ້ນໄມ້ແຫ່ງຊາດ". ບົດກອນປະເພດນີ້ເອີ້ນວ່າ ກອນຊ່ອນເລັບ

ຄວາມຝັນອ້າຍເປົ່າຮ້າງ.........ນ້ອງຊ່າງປຽນແປງໄປ

ຄວງອື່ນຊາຍມາຄອງ.............ປ່ອຍອ້າຍມອງລະເມີລ້າ

ວັນເວລາທຳໃຫ້....................ໃຈນາງລອຍລອຍປ່ຽນ

ເໝືອນດັ່ງທຽນເຫຼັ້ມນ້ອຍ......ລົມຕ້ອງມອດມົນ

ທົນຄວາມເຈັບທໍ່ນີ້...............ລາກ່ອນຄົນດີ

ຮອຍລາຄີທາງໃຈ................ຊົ່ວນິລັນບໍ່ລືມໄດ້

ຝັງເລິກໄປໃນເນື້ອ..............ເປັນບົດຮຽນໃຫ້ເຮົາທ່ອງ

ເຈັບແລ້ວມອງໂລກກ້ວາງ......ເດີນໜ້າຕໍ່ໄປ....ເພື່ອນເອີຍ.

*­ແຜ່ນ­ດິນ­ລາວ­ໃຫຍ່ກ້ວາງ..............ຮຽມ­ຮັກ­ຫ່ວງ­ສຸດ­ແສນ
ລຸ່ມນະ­ພາ­ສີ­ແດງ.........................­ແມ່­ແພງ­ທະ­ໜອມ­ໄວ້
ພະ­ນອມ­ໄພພຽງ­ພ້ອມ....................ທະ­ລາທອງ­ທຽວ­ທ່ອງ
­ແດນ­ຈໍາປາ­ແຫ່ງ­ຫ້ອງ...................­ແຄນ­ກ້ຽວ­ກ່ອມ­ລໍາ

*­ແຜ່ນ­ດິນງາມເລີດ­ລໍ້າ..................ເໜືອ­ແຫ່ງ­ອານາ
ງາມ­ທົ່ງນາ­ພູຜາ..........................ກ່າຍ­ຊອນ­ລຽນ­ຊ້ອນ
­ແສນອອນ­ຊອນ­ດົງ­ໄມ້...................ພະ­ນອມ­ໄພຂຽວອ­ອ່ນໆ­
ນໍ້າ­ໂຕນ­ຄອນ­ລ່ອງ­ແກ້ງ.................ເຫັນ­ແລ້ວ­ໜ້າສະ­ອອນ

*ເມືອງ­ລາວ­ມີ­ພຽບ­ພ້ອມ..................ສັບ­ພະ­ສິ່ງນານາ
ທັງເພັດ­ມິນ­ຈິນດາ........................ຄ່າ­ແພງ­ພັນ­ລ້ານ
ຂອງ­ບູຮານ­ມີ­ພ້ອມ........................ເຕັມເມືອງເຫລືອ­ອ່ານ
ຖານ­ຖິ່ນ­ລາວ­ແຫ່ງ­ຫ້ອງ.................ງາມ­ພ້ອມ­ມັ່ງ­ມີ

*ປະ­ເພ­ນີ­ສືບ­ຊ້ອນ........................ຄາວ­ກ່ອນກາຍມາ
ມີບຸນອອກ­ພັນ­ສາ.........................ຊ່ວງເຮືອ­ໂຮ­ຮ້ອງ
ເນືອງ­ສຽງກອງ­ສຽງ­ຄ້ອງ................ສະ­ຫລອງ­ປາງ­ບຸນ­ໃຫຍ່
ກຸດ­ສົງການ­ຈາ­ລຶກ­ໄວ້...................ເໜືອ­ໃຕ້ມ່ວນ­ສະ­ອອນ

*ຮອຍ­ຍິ້ມ­ຫວານ­ແຊກ­ຊ້ອນ..............ສົມ­ຊື່­ລື­ຊາ
ວ່າປວງ­ຊົນ­ຊາວ­ລາວ....................ຜ່ອງ­ໃສ­ໃຈ­ກ້ວາງ
­ແດນເມືອງ­ຫລວງ­ຖືກເຂົາເຢີ້ຍ.........ວ່າສາວງາມ­ບໍ່­ຮູ້ດ່າ
­ໃຜ­ຜູ້ມາ­ຢ່ອງ­ຢ້ຽມ........................ເຫັນ­ແລ້ວ­ບໍ່­ຢາກ­ຄືນ

*­ແສນ­ໂສກ­ໃຈສະ­ອື້ນ...................ຍາມ­ຫ່າງ­ໄປ­ໄກ
­ໃຈລະ­ເມີ­ລອຍ­ຫາ........................ຖິ່ນ­ລາວ­ທາງ­ພີ້
ຄາວ­ທີ່­ໜີ­ໄກ­ຂ້າງ........................­ແດນ­ຈໍາປາ­ບ້ານ­ແມ່
­ໄດ້­ແຕ່­ຄິດ­ຂ້ອນ­ຄ້ອຍ....................ຄອຍ­ຢ້ອນ­ຕ່າວມາ

*ຊີວາຮຽມ­ຕໍ່­ຕັ້ງ..........................ຮັກ­ແຜ່ນ­ດິນ­ລາວ
ຮັກ­ປວງ­ຊົນ­ຊາວ­ລາວ...................ທົ່ວ­ແດນ­ທັງ­ຄ້າຍ
ທັງ­ລາວເໜືອກາງ­ໃຕ້...................ຫລື­ແດນ­ໄກ­ປະ­ເທດ­ອື່ນ
ຍິ້ມ­ຫວານ­ຍື່ນ­ສົ່ງ­ໃຫ້.....................­ໃຈ­ຊ້ອຍ­ຊື່ນບານ

*ຫາກ­ມີມານ­ລ່ວງເຂົ້າ..................ເຜົາ­ຜ່ານ­ທໍາລາຍ
ສາຍເລືອດ­ລາວ­ທັງ­ຫລາຍ............ຊິ­ຮ່ວມ­ກັນ­ຕີ­ຕ້ານ
ຂໍສາບານ­ຢືນ­ສູ້..........................ກາຍ­ໃຈທະ­ຫວາຍ­ຍື່ນ
ມືກໍາ­ປືນ­ຕໍ່­ສູ້..............................ຮັກ­ສາ­ໄວ້­ແຜ່ນ­ດິນ

*ວັນ­ນີ້­ຊາດ­ດ່ວນ­ກ້າວ...................ມີ­ພັກເກັ່ງ­ນໍາພາ
ປວງ­ປະ­ຊາຊາ­ຊົນ­ລາວ.................­ຢູ່ສະບາຍຫາຍຮ້ອນ
ສ້າງດິນດອນເມືອງບ້ານ.............­ໃຫ້­ທຽມ­ທັນ­ປະ­ເທດ­ອື່ນ
ສ້າງ­ສາທາ­ແຜ່ນ­ຜື້ນ...................­ຈະເລີນ­ກ້າວ­ວັດ­ທະ­ນາ....ຊອບ­ແລ້ວ!