ໄດອາຣີ່ຂອງ Keo Kom Many - ພັນລາວ.ຄອມ

ຂຽນເມື່ອ: ມ.ສ.. 3, 2011 | ມີ 0 ຄຳເຫັນ ແລະ 0 trackback(s)

ອີກ100ປີຈະເກີດສົງຄາມອະວະກາດລະຫວ່າງປະເທດ

ໃນຫນັງສືຊື່ The Next 100 Years ຫລື 100 ປີຂ້າງໜ້າ ທີ່ຂຽນໂດຍ George Friedman ຜູ້ກໍ່ຕັ້ງແລະປະທານເຈົ້າຫນ້າທີ່ຝ່າຍບໍລິຫານຂອງບໍລິສັດ Stratfor ໃນລັດເທັກຊັດ ໄດ້ທຳນາຍໄວ້ວ່າ ອີກ 100 ປີຈະເກີດສົງຄາມອະວະກາດລະຫວ່າງປະເທດ ທີ່ເປັນພັນທະມິດກັນຢູ່ໃນປະຈຸບັນ ຈຳນວນປະຊາກອນໂລກຈະຫລຸດລົງແລະປະເທດອຸດສາຫະກຳຕ່າງໆ ຕ້ອງແຂ່ງຂັນກັນແຍ່ງຊິງແຮງງານຕ່າງດ້າວ ຫນັງສືເຫລັ້ມນີ້ຍັງບອກດ້ວຍວ່າປະເທດໂປແລນ ຕວກກີ ເມັກຊິໂກແລະຍີ່ປຸ່ນ ຈະກາຍເປັນປະເທດມະຫາອຳນາດໃນອີກ 1 ສະຕະວັດຕໍ່ຈາກນີ້.

ປັດຈຸບັນ ໜຶ່ງໃນບັນຫາສຳຄັນທີ່ເວົ້າເຖິງກັນທົ່ວໂລກ ຄືຄວາມທ້າທາຍເລື່ອງການຈັດຫາອາຫານໃຫ້ພຽງພໍສຳລັບປະຊາກອນໂລກທີ່ ເພີ່ມຂຶ້ນ ແຕ່ໃນຫນັງສື The Next 100 Years ເຈົ້າ George Friedman ເຊື່ອວ່າໃນສະຕະວັດໜ້າ ບັນຫາດັ່ງກ່າວຈະກາຍເປັນເລື່ອງເລັກນ້ອຍ ເມື່ອທຽບກັບບັນຫາອັດຕາການເກີດຫລຸດລົງ ແລະຜູ້ສູງອາຍຸ ຈະກາຍເປັນປະຊາກອນກຸ່ມໃຫຍ່ທີ່ສຸດໃນໂລກ.

ເຈົ້າ Friedman ບອກວ່າ ທຸກຄົນຮູ້ດີກ່ຽວກັບອາຍຸສະເລ່ຍປະຊາກອນທີ່ເພີ່ມຂຶ້ນ ແລະຄວາມຈິງທີ່ວ່າຫລາຍປະເທດເຊັ່ນເຢຍລະມັນ ແລະລັດເຊຍກຳລັງຈະມີຈຳນວນປະຊາກອນຫລຸດລົງ 25-30% ເຂົາຊີ້ວ່າການທີ່ຈຳນວນປະຊາກອນໃນປະເທດອຸດສາຫະກຳຫລຸດລົງຫລາຍ ຈະສົ່ງຜົນໃຫ້ປະເທດເຫລົ່ານັ້ນ ຕ້ອງແຂ່ງກັນແຍ່ງຊິງແຮງງານຕ່າງດ້າວຈາກປະເທດກຳລັງພັດທະນາ ໄປເຮັດວຽກດ້ານຕ່າງໆ ຫລາຍຂຶ້ນ. ແນວໃດກໍຕາມ ມີຫລາຍຄົນທີ່ໂຕ້ແຍ້ງຄວາມຄິດຂອງ Friedman ໃນເລື່ອງນີ້ ໜຶ່ງໃນນັ້ນຄື Elizabeth Madsen ຜູ້ຊ່ຽວຊານຈາກສະຖາບັນ Population Action International.

Madsen ລະບຸວ່າ ເຖິງແມ່ນອົງການສະຫະປະຊາຊາດຈະປະເມີນວ່າ ອັດຕາການເກີດຂອງປະຊາກອນທົ່ວໂລກຈະຫລຸດລົງຢູ່ໃນລະດັບຕ່ຳ ແຕ່ຈາກແນວໂນ້ມທີ່ເປັນຢູ່ໃນຂະນະນີ້ ທັງໃນປະເທດພັດທະນາແລ້ວແລະປະເທດກຳລັງພັດທະນາຊີ້ໃຫ້ເຫັນວ່າ ການປ່ຽນແປງດັ່ງກ່າວ ຍັງບໍ່ເກີດຂຶ້ນ ແລະບໍ່ໜ້າຈະເກີດຂຶ້ນວ່ອງໄວຢ່າງທີ່ Friedman ທຳນາຍໄວ້.

ສຳລັບໃນເລື່ອງພາວະໂລກຮ້ອນນັ້ນ ຜູ້ຂຽນຫນັງສື The Next 100 Years ເຫັນວ່າ ໃນອະນາຄົດຈະມີພະລັງງານສະອາດ ທີ່ຜະລິດຈາກແຜງຮັບແສງອາທິດຂະໜາດຍັກ ໃນວົງໂຄຈອນໃກ້ໂລກ. Friedman ບອກວ່າໃນອະວະກາດມີບ່ອນວ່າງຫລວງຫລາຍ ທີ່ຈະຕິດຕັ້ງແຜງຮັບແສງອາທິດ ບັນຫາດຽວກໍຄືຈະນຳພະລັງງານນັ້ນກັບສູ່ໂລກໄດ້ຈັ່ງໃດ ຊຶ່ງເຂົາເຊື່ອວ່າມີ 2 ວິທີຄືໃຊ້ສາຍຫລືໃຊ້ຄື້ນແມ່ເຫລັກໄຟຟ້າ ຄວາມຖີ່ສູງ.

ແລະເຖິງແມ່ນວ່າແນວຄິດນີ້ຈະເບິ່ງແປກປະຫລາດ ແຕ່ເຈົ້າຂອງຄວາມຄິດບອກວ່າເມື່ອ 100 ປີທີ່ແລ້ວກໍຄົງຈະບໍ່ມີໃຜເຊື່ອວ່າ ຈະມີການໂດຍສານເຄື່ອງບິນທົ່ວໂລກ ຫລືດາວທຽມ ຫລືອິນເຕີເນັດເຊັ່ນກັນ.

ຫນັງສື 100 ປີຂ້າງໜ້າຍັງຄາດທຳນາຍເລື່ອງການເມືອງໄວ້ດ້ວຍວ່າ ໂປແລນແລະຕວກກີຈະກາຍເປັນປະເທດມະຫາອຳນາດ ແລະກ່ອນສິ້ນສະຕະວັດນີ້ ເມັກຊິໂກຈະກ້າວຂຶ້ນມາທ້າທາຍສະຫະລັດເພື່ອຍາດກັນເປັນມະຫາອຳນາດ ໃນແຖບອາເມລິກາເໜືອ ແລະໃນຊ່ວງກາງສະຕະວັດນີ້ ເຈົ້າ George Friedman ທຳນາຍວ່າມີແນວໂນ້ມຈະເກີດສົງຄາມໂລກທີ່ໃຊ້ອາວຸດທີ່ມີຖານຢູ່ໃນ ອະວະກາດ ໂດຍຍີ່ປຸ່ນອາດໃຊ້ຖານທັບເທິງດວງຈັນໂຈມຕີໃສ່ຖານທັບຂອງອາເມລິ ກາທີ່ຢູ່ໃນວົງໂຄຈອນຮອບໂລກ ເໝືອນທີ່ເຄີຍເກີດຂຶ້ນທີ່ອ່າວ ເຟີ ຮາເບີ ໃນສົງຄາມໂລກເທື່ອທີ່ 2 ແຕ່ຄາວນີ້ເປັນຮູບແບບດຽວກັບ Star Wars ຫລືສົງຄາມອະວະກາດ.

ບໍ່ວ່າເຫດການທີ່ວ່ານີ້ຈະເກີດຂຶ້ນຫລືບໍ່ກໍຕາມ? ຜູ້ຂຽນຫນັງສື The Next 100 Years ຍອມຮັບຕາມກົງວ່າ ຄົນທີ່ຈະຮູ້ແທ້ໆ ຕ້ອງມີຊີວິດຢູ່ໄປອີກ 100 ປີຈາກນີ້ເທົ່ານັ້ນ ແລະຈົນເຖິງເວລານັ້ນ ພວກເຂົາອາດຈະໄດ້ຊື່ວ່າເປັນນອດຕາດາມຸດຄົນທີ່ 2 ຫລືບໍ່ກໍ ຈອລ໌ຈ ລູຄັດ ຄົນທີ່ 2 ຜູ້ສ້າງແລະຂຽນບົດໜັງ Star Wars ຕອນໃໝ່ກໍເປັນໄດ້.

ວາງໃຈໄດ້ 2012 ໂລກບໍ່ແຕກ

ຂຽນເມື່ອ: ມ.ສ.. 1, 2011 | ມີ 4 ຄຳເຫັນ ແລະ 0 trackback(s)

ໜວດໝູ່: ຄວາມຮູ້ທົ່ວໄປ

ວາງໃຈໄດ້ 2012 ໂລກບໍ່ແຕກ

ຫລາຍຄົນຄົງເຄີຍໄດ້ຍິນຂ່າວລືວ່າໂລກຈະເຖິງຈຸດຈົບໃນປີ 2012 ແຕ່ເຮົາມີຂ່າວດີມາບອກ!

ປະຕິທິນຂອງຊາວມາຍັນທີ່ໂດ່ງດັ່ງນັ້ນອາດຈະບໍ່ໄດ້ຈົບພຽງແຕ່ວັນທີ່ 21 ທັນວາ 2012 (ນັ້ນກໍໝາຍຄວາມວ່າໂລກອາດບໍ່ໄດ້ສິ້ນສຸດແຕ່ 2012 ເຊັ່ນກັນ) ແຕ່ຂ່າວຮ້າຍກໍຄືຖ້າປະຕິທິນບໍ່ໄດ້ຈົບມື້ນັ້ນແທ້ ກໍບໍ່ມີໃຜຮູ້ວ່າມັນຈະຈົບມື້ໃດແລະຈຸດຈົບຂອງໂລກນັ້ນອາດເກີດຂຶ້ນແລ້ວດ້ວຍຊ້ຳ ໂດຍຂໍ້ໂຕ້ແຍ້ງນີ້ປາກົດໃນຕຳລາ "Calendars and Years II: Astronomy and Time in The Ancient and Medieval World" ເຊິ່ງຊີ້ວ່າການຄິດໄລ່ປະຕິທິນມາຍັນເປັນປະຕິທິນສະໄໝໃໝ່ນັ້ນອາດມີຄວາມຄາດເຄື່ອນ ໄດ້ຕັ້ງແຕ່ 50-100 ປີ ຈັ່ງໃດກໍຕາມ ສາສະດາຈານ ເຈລາໂດ ອັນດານາ ຈາກ University of California ໜຶ່ງໃນຜູ້ຂຽນຕຳລາກໍບໍ່ຍອມບອກວ່າປະຕິທິນທີ່ຖືກຕ້ອງຈະເປັນຢ່າງໃດ ພຽງແຕ່ອອກມາຊີ້ວ່ານັກທິດສະດີມື້ສິ້ນໂລກຜິດເທົ່ານັ້ນເອງ

ເຂັ້ມແຂງນະ

ຂຽນເມື່ອ: ມ.ສ.. 1, 2011 | ມີ 4 ຄຳເຫັນ ແລະ 0 trackback(s)

ໜວດໝູ່: ຄວາມຮູ້ທົ່ວໄປ

ເຂັ້ມແຂງໄວ້ນ໋ະຫົວໃຈ

ມີຜູ້ຄົນຫຼາຍຄົນ ທັງຄົນທີ່ຫົວໃຈອ່ອນແອແລະຄົນທີ່ມີຫົວໃຈເຂັ້ມແຂງ ເຊິ່ງໃນຊີວິດປະສົບພົບພໍ້ຄວາມທຸກຫຼວງຫຼາຍ ແຕ່ສາມາດປະເຊິນເຫດການທີ່ຮ້າຍແຮງທີ່ສຸດໃນຊີວິດໄດ້ດ້ວຍການ ມີສະຕິປັນຍາ ແລ້ວເວລາຈະເຮັດໃຫ້ເຫດການຮ້າຍໆ ນີ້ຜ່ານໄປເອງ.

ຄົນທີ່ຜ່ານຈຸດນີ້ຖືວ່າເປັນຜູ້ອົດທົນມີຫົວໃຈເຂັ້ມແຂງ, ສ່ວນຄົນອ່ອນແອກໍຈະກົງກັນຂ້າມ ເກີດເຫດການອັນໃດກໍຮູ້ສຶກວ່າສູ້ບໍ່ໄດ້ຮູ້ສຶກວ່າຕົນເອງເປັນ ຄົນບໍ່ມີຄ່າສະເໝີ ເຊິ່ງມື້ນີ້ເຮົາມາເບິ່ງນຳກັນວ່າຄົນທີ່ມິຫົວໃຈເຂັ້ມແຂງຈະມີ ລັກສະນະໃດແດ່.

1. ບໍ່ຮູ້ຈັກຈົ່ມຫຼືໂອຍຄາງ

ຄົນຫົວໃຈເຂັ້ມແຂງຈະມີລັກສະນະທໍລະຫົດອົດທົນ. ອົດທົນຕໍ່ການເຮັດວຽກທີ່ຍາກລຳບາກ, ອົດທົນຕໍ່ວິຖີຊີວິດທີ່ຫຍຸ້ງຍາກ, ຄວາມອົດທົນເປັນກ້າວທຳອິດຂອງຄົນທີ່ມີຫົວໃຈເຂັ້ມແຂງ.

2. ບໍ່ຕ້ອງການຊາບວ່າ ຄົນອື່ນຈະຄິດເຫັນວ່າເປັນແນວໃດ

ຄົນຫົວໃຈເຂັ້ມແຂງຈະບໍ່ສົນໃຈຕໍ່ຄຳວິພາກວິຈານ ບໍ່ສົນໃຈຕໍ່ຄວາມຮູ້ສຶກຂອງຜູ້ອື່ນ ບໍ່ເປັນຄົນຫູເບົາສິ່ງໃດທີ່ເຂົາເຫັນວ່າຖືກຕ້ອງຄິດວ່າເປັນ ສິ່ງທີ່ດີແລ້ວ ເຂົາຈະກ້າລົງມືເຮັດແລະຟັນຝ່າອຸປະສັກ ເຮັດໄປຈົນສຳເລັດ.

3. ບໍ່ບອກຄວາມລັບຂອງຕົນໃຫ້ແກ່ໃຜ ແລະບໍ່ຕ້ອງການຮູ້ຄວາມລັບຂອງຜູ້ອື່ນ

ເປັນສິ່ງທີ່ແປກຢູ່ຄືກັນ ຖ້າໃຜຮູ້ຄວາມລັບຂອງໃຜແລ້ວມັກຈະບໍ່ສາມາດປົກປິດໄວ້ໄດ້ ຢາກເລົ່າໃຫ້ຜູ້ອື່ນຟັງ. ສະນັ້ນ, ການເຝິກຝົນເອງໃຫ້ເປັນຄົນມີຫົວໃຈເຂັ້ມແຂງຈະຕ້ອງເຝິກຫັດເກັບ ຄວາມລັບໃຫ້ໄດ້ສາກ່ອນ. ນອກຈາກນີ້ ຈະຕ້ອງບໍ່ສອດສ່ອງາຍຕາຢາກຮູ້ຢາກເຫັນຄວາມລັບຂອງຜູ້ອື່ນ, ສົນໃຈແຕ່ຈະປັບປຸງຕົນເອງ ຄົນຫົວໃຈເຂັ້ມແຂງຈະບໍ່ເປັນຄົນນິນທາຜູ້ອື່ນລັບຫຼັງ.

4. ບໍ່ຄິດວ່າ ໂຕເອງເປັນຄົນເຄາະຮ້າຍ

ຄົນຫົວໃຈເຂັ້ມແຂງຈະສາມາດນຳເອົາເຫດການຮ້າຍຕ່າງໆ ມາສ້າງປະໂຫຍດໃຫ້ແກ່ຕົນເອງທັງນັ້ນ. ຈະຕ້ອງເບິ່ງໂລກໃນແງ່ດີ ຖ້າເຮັດສິ່ງໃດຜິດພາດລົງໄປ ກໍບໍ່ມົວແຕ່ເສຍໃຈ ແຕ່ຈະຖືວ່າຂໍ້ຜິດພາດທຸກເທື່ອເປັນບົດຮຽນທີ່ຈະບໍ່ເຮັດຜິດ ຕໍ່ໄປ ວ່າກັນວ່າ ເຄາະຮ້າຍກໍຄືຄົນຮ້າຍ ຄື ຖ້າມັນຮູ້ວ່າເຮົາບໍ່ຍອມແພ້ ມັນກໍຈະບໍ່ກ້າທຳລາຍເຮົາ ແຕ່ຖ້າໃຜຍິ່ງອ່ອນແອ ມັນຈະຍິ່ງຊ້ຳເຕີມ.

5. ມີສະຕິສຳປະຊັນຍະຢູ່ຕະຫຼອດເວລາ

ຄັນຫົວໃຈເຂັ້ມແຂງເປັນຄົນທີ່ເຮັດຫຍັງບໍ່ເມີ່ລອຍຫຼືປະໝາດເຜີ ໂຕ ຈະເຮັດດ້ວຍຄວາມໜັກແໜ້ນຢ່າງມີຈຸດໝາຍ. ຄົນມີສະຕິໃນການເຮັດທຸກຍ່າງຕະຫຼອດເວລາ ເອີ້ນໄດ້ວ່າເປັນຄົນທີ່ມີຫົວໃຈເຂັ້ມແຂງ.

ຄຳເວົ້າທີ່ແມ່ຍິງຢາກຟັງ

ຂຽນເມື່ອ: ມ.ສ.. 1, 2011 | ມີ 5 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

ຄຳເວົ້າທີ່ແມ່ຍິງຢາກຟັງ

1. “ນ້ອງຢາກເຮັດ.... (ອັນໃດອັນໜຶ່ງ)... ບໍ”

ປະໂຫຍກ ຄຳຖາມເຊີນຊວນເຮັດນັ້ນ ເຮັດນີ້ແບບນີ້ ບໍ່ແມ່ນພຽງການສະແດງຄວາມສຸພາບເທົ່ານັ້ນ ແຕ່ຍັງສະແດງໃຫ້ເຫັນວ່າໜຸ່ມໆ ພ້ອມຈະເອົາອົກເອົາໃຈຍິງສາວຂອງພວກເຂົາພຽງໃດ ແລະການໃຫ້ກຽດແມ່ຍິງເປັນຝ່າຍເລືອກວ່າຢາກເຮັດຫຍັງນີ້ແຫລະຄືສິ່ງທີ່ຍິງສາວ ຕ້ອງການຫລາຍເຖິງຫລາຍທີ່ສຸດ

2. “ອ້າຍໄດ້ຄົ້ນພົບອີ່ຫຍັງໆ ໃນຕົວນ້ອງທີ່ເຮັດໃຫ້ອ້າຍມັກນ້ອງຫລາຍຂຶ້ນທຸກມື້ໆ”

ບໍ່ວ່າຜູ້ສາວແບບໃດ ເຊີ້ໆ ຫວານໆ ສົ້ມໆ ຫ້າວໆ ກໍລະລາຍໄດ້ຍ້ອນປະໂຫຍກແບບນີ້ ຄິດເບິ່ງຕີວ່ານາງຈະປື້ມອົກປຶ້ມໃຈສ່ຳໃດ ຖ້າໄດ້ຍິນຊາຍໜຸ່ມສາລະພາບອອກມາກົງໆ ວ່າໃນຕົວນາງມີຫຍັງດີໆ ຊ່ອນຢູ່ຫລວງຫລາຍເຖິງຂັ້ນເຮັດໃຫ້ຜູ້ຊາຍຕົກຂຸມຮັກນາງໄດ້ຫລາຍຂຶ້ນທຸກມື້ ທີ່ສຳຄັນຖ້າຜູ້ຊາຍຮູ້ສຶກແບບນີ້ແທ້ໆ ກໍແປວ່າຄວາມສຳພັນຂອງທ່ານຈະແໜ້ນແຟ້ນບໍ່ຈືດຈາງງ່າຍໆ

3. “ອ້າຍບໍ່ເຄີຍພົບໃຜຄືນ້ອງເລີຍ”

ຜູ້ສາວຮ້ອຍທັງຮ້ອຍຕ້ອງການຄຳຊົມ ແລະຍິ່ງຖ້າເປັນຄຳຊົມທີ່ສະແດງວ່າຕົວເອງເປັນຄົນພິເສດ ແລະບໍ່ຄືຍິງຄົນໃດໆ ໃນໂລກທີ່ເຂົາຄົນນັ້ນເຄີຍພົບມາ ຮັບຮອງປື້ມທຸກຄົນ ແຕ່ໜຸ່ມໆ ຢ່າລືມວ່າປະໂຫຍກນີ້ຕ້ອງຈົບຢູ່ນີ້ເທົ່ານັ້ນ ຢ່າໄດ້ເຜີຕໍ່ໄປວ່າ “ບໍ່ຄືແຟນເກົ່າຂອງອ້າຍ ທີ່... ” ເພາະຈາກເລິກຈະກາຍເປັນເລື່ອງທັນທີ ເພາະແມ່ຍິງກຽດຊັງເລື່ອງຖືກປຽບທຽບກັນເອງທີ່ສຸດ.

4. “ເລົ່າໃຫ້ຟັງຈັກໜ້ອຍຕີ ມື້ນີ້ເປັນຈັ່ງໃດ”

ແມ່ນເລີຍ ຜູ້ສາວມັກລົມ ແລະມີຄວາມສາມາດພິເສດໃນການເລົ່າເລື່ອງໄດ້ເປັນສາກໆ ເພາະສະນັ້ນ ສິ່ງທີ່ດີທີ່ສຸດສຳລັບແມ່ຍິງກໍຄື... ເປີດໂອກາດໃຫ້ເຂົາເຈົ້າໄດ້ເລົ່າ ເລົ່າ ແລະເລົ່າ

5. “ອ້າຍຮັກນ້ອງໃນທຸກອະລິຍາບົດທີ່ນ້ອງເປັນ”

ຫາກໜຸ່ມຄົນໃດຄົ້ນພົບກິລິຍາທ່າທີແບບໃດ ກໍຕາມທີ່ເຮັດໃຫ້ນາງເບິ່ງໜ້າຮັກ ເບິ່ງເຊັກຊີ່ເປັນພິເສດໃນສາຍຕາ ກໍຢ່າລີລໍທີ່ຈະເປີດເຜີຍໃຫ້ຜູ້ສາວຂອງເຮົາໄດ້ຮັບຮູ້ ອາດຈະຍົກຕົວຢ່າງໄປນຳເພື່ອໃຫ້ເຫັນພາບ (ແຕ່ຕ້ອງຮູ້ສຶກຈັ່ງຊັ້ນແທ້ໆ) ເຊັ່ນ “ອ້າຍມັກທ່າຕອນທີ່ນ້ອງຍົກກາເຟຂຶ້ນຈິບ” “ອ້າຍມັກທ່າທາງຂອງນ້ອງຕອນມັດຜົມ” ຫລື “ອ້າຍມັກຕອນເຈົ້າຫົວຈົນຫຼັບຕາ” ແລະອື່ນໆ ເພື່ອຢືນຢັນໃຫ້ຍິງສາວສະບາຍໃຈວ່າຊາຍໜຸ່ມຂອງນາງຍອມຮັບໃນແບບທີ່ນາງເປັນ

6. “ນ້ອງຈະກະລຸນາຊ່ວຍອ້າຍແດ່ໄດ້ບໍ”

ໂດຍ ທຳມະຊາດ ແມ່ຍິງເປັນເພດໃຈດີມັກໃຫ້ຄວາມຊ່ວຍເຫລືອ ເພາະນາງມີສັນຊາດຕະຍານຄວາມເປັນແມ່ຢູ່ໃນຕົວ ດັ່ງນັ້ນ ການທີ່ຜູ້ຊາຍມາຂໍຄວາມຊ່ວຍເຫລືອຈາກນາງ ບໍ່ໄດ້ໝາຍເຖິງຄວາມອ່ອນແອ ແຕ່ມັນສະແດງໃຫ້ເຫັນວ່າພວກເຂົາຍອມຮັບໃຫ້ນາງເຂົ້າໄປເປັນສ່ວນຫນຶ່ງຂອງຊີວິດ ເພາະສະນັ້ນ ຍິງສາວຈະມີຄວາມສຸກທີ່ສຸດເລີຍ ຖ້າຍອມໃຫ້ນາງໄດ້ເຮັດຫຍັງເພື່ອຊາຍໜຸ່ມທີ່ນາງຮັກນຳແດ່... ອ໊ະໆ ແຕ່ຍົກເວັ້ນເລື່ອງຂໍຢືມເງິນເດີ!!!

ຮີດສິບສອງ ຄອງສິບສີ່

ຂຽນເມື່ອ: ມ.ສ.. 1, 2011 | ມີ 3 ຄຳເຫັນ ແລະ 0 trackback(s)

ໜວດໝູ່: ທັມມະ

ຮີດສິບສອງ ຄອງສິບສີ່

“ຮີດ” ແລະ“ຄອງ” ມີຄວາມໝາຍໃກ້ຄຽງກັນ ແຕ່ບໍ່ແມ່ນອັນດຽວກັນ. ຄຳວ່າ “ຮີດ” ແມ່ນໝາຍເຖິງສິ່ງທີ່ໄດ້ປະພຶດປະຕິບັດກັນມາເປັນເວລາດົນນານ, ສ່ວນຄຳວ່າ “ຄອງ” ໝາຍເຖິງກົດຫຼືແນວທາງທີ່ວາງໄວ້ເພື່ອປະຕິບັດຕາມ. ເມື່ອເຮົາເອົາ “ຮີດ” ແລະ “ຄອງ” ມາລວມເຂົ້າກັນ ຈະກາຍເປັນຄຳວ່າ “ຮີດຄອງ” ທີ່ມີຄວາມໝາຍວ່າ: “ແນວທາງການປະພຶດປະຕິບັດທີ່ສືບທອດກັນມາເປັນເວລາດົນນານ”.

“ຮີດສິບສອງຄອງສິບສີ່” ແມ່ນແນວທາງການປະພຶດປະຕິບັດ ທີ່ເຈົ້າຟ້າງຸ່ມມະຫາລາດ ໄດ້ກຳນົດຂຶ້ນ ພາຍຫຼັງທີ່ທ້ອນໂຮມບັນດາຫົວເມືອງລາວເຂົ້າເປັນອານາຈັກລ້ານຊ້າງເອກະ ພາບ. ຈຸດປະສົງກໍແມ່ນເພື່ອໃຫ້ປະຊາຊົນທີ່ເຊື່ອຖືຜີສາງນາງໄມ້ທີ່ ງົມງວາຍ ໃຫ້ມານັບຖືສາສະໜາພຸດ ໂດຍມີແນວທາງປະຕິບັດ ຄື ຮີດສິບສອງຄອງສິບສີ່ແທນ.

ຮີດສິບສອງ

ໃນແຕ່ລະເດືອນຂອງປີໜຶ່ງ ຈະມີການເຮັດບຸນປະເພນີຂອງພຸດທະສາສະນິກະຊົນທີ່ແຕກຕ່າງກັນໄປ ເຊິ່ງສະແດງໃຫ້ເຫັນເຖິງຄວາມຮູ້ບຸນຄຸນຕໍ່ສິ່ງສັກສິດ ທີ່ຊ່ວຍໃຫ້ຕົນເອງມີຊີວິດການເປັນຢູ່ທີ່ດີ. ຮີດສິບສອງປະກອບມີ:

1. ເດືອນຈຽງ (ເດືອນໜຶ່ງ) ບຸນນິມົນພະສົງເຂົ້າກຳ

2. ເດືອນຍີ່ (ເດືອນສອງ) ເຮັດບຸນລານເຂົ້າ ຫຼືບຸນຄຸນເຂົ້າ, ບາງທ້ອງຖິ່ນຍັງເອີ້ນວ່າ ບຸນກອງເຂົ້າກໍມີ.

3. ເດືອນສາມ ເຮັດບຸນເຂົ້າຈີ່

4. ເດືອນສີ່ ເຮັດບຸນພະເວດ

5. ເດືອນຫ້າ ເຮັດບຸນສົງພະ ຫຼືບຸນປີໃໝ່ລາວ

6. ເດືອນຫົກ ເຮັດບຸນບັ້ງໄຟ

7. ເດືອນເຈັດ ເຮັດບຸນບ້ານ ຫຼືບຸນລ້ຽງຜີມະເຫສັກຫຼັກເມືອງ

8. ເດືອນແປດ ບຸນເຂົ້າພັນສາ

9. ເດືອນເກົ້າ ບຸນຫໍ່ເຂົ້າປະດັບດິນ

10. ເດືອນສິບ ບຸນຫໍ່ເຂົ້າສະຫຼາກ

11. ເດືອນສິບເອັດ ບຸນອອກພັນສາ

12. ເດືອນສິບສອງ ບຸນທອດກະຖິນ

ຄອງສິບສີ່

ຄອງສິບສີ່ໝາຍເຖິງຂໍ້ກຳນົດ 14 ຂໍ້ ທີ່ປະຊາຊົນລາວເຮົາ ຖືເປັນທຳນຽມປະຕິບັດມາຕັ້ງແຕ່ດົນນານ ແລະໃນປັດຈຸບັນກໍຍັງເຊື່ອຖືຢູ່ ແຕ່ອາດຈະບໍ່ເຂັ້ມງວດ ຫຼືບາງຂໍ້ ໃນບາງທ້ອງຖິ່ນກໍປ່ອຍວາງໄປແລ້ວ. ຄອງສິບສີ່ມີຄື:

1. ຢ່າຢຽບເງົາຂອງພະສົງ ຫຼືຜູ້ມີສິນບໍລິສຸດ

2. ຢ່າເອົາອາຫານເຫຼືອ ຫຼືເງື່ອນ ໄປໃຫ້ພະສົງສັນ

3. ຢ່າເສບກາມະຄຸນໃນມື້ວັນສິນ, ວັນເຂົ້າພັນສາ, ວັນມາຄະບູຊາ, ວັນວິສາຂະບູຊາ ແລະວັນກຸດສົງການຢ່າງເດັດຂາດ.

4. ເມື່ອພະສົງກາຍມາໃຫ້ນັ່ງລົງ, ນົບມືໄຫວ້ ແລ້ວຈຶ່ງຄ່ອຍຍ່າງກາຍ ຫຼືຈຶ່ງຄ່ອຍລົມນຳເພິ່ນ.

5. ມື້ພະສົງເຂົ້າກຳ ໃຫ້ມີດອກໄມ້ທູບທຽນ ແລະເຄື່ອງບໍລິຂານໄປທານຮ່ວມເພິ່ນ.

6. ກ່ອນຈະເຂົ້ານອນໃຫ້ອາບນ້ຳ ຫຼືລ້າງຕີນເສຍກ່ອນ

7. ເມື່ອເຖິງວັນສິນດັບ-ສິນເພັງ ໃຫ້ເຮັດບຸນໃສ່ບາດ ຫຼືນິມົນພະສົງມາສູດມຸງຄຸນເຮືອນ.

8. ເມື່ອເຖິງວັນສິນເພັງໃຫ້ແຕ່ງຂັນດອກໄມ້ ທູບທຽນ ໄປສົມມາຜົວຂອງຕົນ

9. ເມື່ອພະສົງສາມະເນນມາບິນທະບາດ ຢ່າໃຫ້ເພິ່ນຄອຍຖ້າ, ເວລາປ່ອນບາດຢ່າໃຫ້ມືຊູນບາດ ຫຼືຊູນຖືກພະສົງສາມະເນນ, ຍາມປ່ອນບາດຢ່າໃສ່ໝວກ, ຢ່າເອົາຜ້າປົກຫົວ, ຢ່າໃສ່ເກີບ, ຢ່າອຸ້ມເດັກນ້ອຍ, ຢ່າຖືມີດຖືພ້າ ຫຼືຢ່າຖືອາວຸດໃດໆ.

10. ເມື່ອຮອດວັນສິນ 8 ຄ່ຳ, 14 ຫຼື 15 ຄ່ຳ ໃຫ້ພາກັນສົມມາກ້ອນເສົ້າ, ແມ່ຂັ້ນໄດ ແລະປະຕູເຮືອນ.(ປັດຈຸບັນ ຢູ່ຊົນນະບົດບາງບ່ອນຍັງປະຕິບັດຢູ່).

11. ກ່ອນຈະຂຶ້ນເຮືອນໃຫ້ລ້າງຕີນສາກ່ອນ.

12. ໃຫ້ພາກັນເຮັດຮົ້ວອ້ອມວັດແລະບ້ານເຮືອນຂອງຕົນໃຫ້ດີ.

13. ເມື່ອເຖິງລະດູການເກັບກ່ຽວຜົນລະປູກ ຢ່າຟ້າວກິນກ່ອນ ໃຫ້ເອົາໄປເຮັດບຸນໃຫ້ທານແກ່ຜູ້ມີສິນກ່ອນ ແລ້ວຈຶ່ງຄ່ອຍກິນ.(ຕົວຢ່າງ: ຍາມເຂົ້າໃໝ່ ກໍເອົາໄປບູຊາ ຫຼືໃສ່ບາດກ່ອນ, ແລ້ວຈຶ່ງຄ່ອຍກິນ).

14. ຢ່າພາກັນລັກໂລບຕາຊິງ, ຢ່າພາກັນຈ່າຍເງິນແດງ ແປງເງິນຄວ່າງ, ຢ່າກ່າວຄຳຫຍາບຊ້າ ກ້າແຂງ ຕໍ່ກັນແລະກັນ.

ຈຸດໃດຍິງກັບຊາຍ ໄວຕໍ່ອາລົມ

ຂຽນເມື່ອ: ມ.ສ.. 1, 2011 | ມີ 5 ຄຳເຫັນ ແລະ 0 trackback(s)

ໜວດໝູ່: ຄວາມຮັກ

ຈຸດໃດຍິງກັບຊາຍ ໄວຕໍ່ອາລົມ

ກໍຄົງຈະໄວເກືອບທຸກສ່ວນຫັ້ນແຫລະ ເພາະພໍແຕະຕ້ອງເຂົ້າສ່ວນຫນຶ່ງ ກໍມັກຈະເກີນເລີຍໄປຍັງອີກສ່ວນຫນຶ່ງ ແລ້ວກໍມັກຈະຫັກຫ້າມໃຈບໍ່ໄດ້ນຳກັນທັງສອງຝ່າຍ

ຜູ້ໃຫຍ່ເພິ່ນຈຶ່ງໃຫ້ແມ່ຍິງຮັກນວນສະຫງວນຕົວຈັ່ງໃດລະ ຄືຢ່າໃຫ້ໃຜມາແຕະເນື້ອຕ້ອງຕົວງ່າຍໆ ເຖິງຈະຮັກໄຄ່ເປັນແຟນກັນກໍຕາມ ເພາະເມື່ອລອງໄດ້ແຕະໜ້ອຍໜຶ່ງແລ້ວ ຝ່າຍຊາຍກໍມັກຈະລາມປາມເລີຍເຖີດໄປເລື້ອຍໆ ຝ່າຍຍິງກໍອາດຈະເຄີບເຄີ້ມ ຫ້າມຕົວເອງບໍ່ໄດ້ ເລີຍຍອມເສຍຕົວໃຫ້ພວກເຂົາງ່າຍໆ ໂດຍບໍ່ຕັ້ງໃຈ ແລະຝ່າຍທີ່ເສຍຫາຍກໍຄືແມ່ຍິງນັ້ນເອງ

ເພາະ ຜູ້ຊາຍເມື່ອມີເພດສຳພັນກັບຍິງແລ້ວ ສັງຄົມເພື່ອນຝູງຈະເບິ່ງວ່າຜູ້ຊາຍເປັນຝ່າຍໄດ້ ແລະເບິ່ງແມ່ຍິງວ່າເປັນຝ່າຍເສຍ ເຊັ່ນ "ເສຍຕົວ" "ເສຍສາວ" ເອີ້ນວ່າເປັນຍິງແລ້ວເສຍປຽບວັນຍັງຄ່ຳ ເຮົາເຖິງຕ້ອງພະຍາຍາມຮັກນວນສະຫງວນຕົວເອົາໄວ້ແດ່.

ຜູ້ໃດຝັນປຽກ ຍົກມືຂຶ້ນ!!

ຂຽນເມື່ອ: ມ.ສ.. 1, 2011 | ມີ 1 ຄຳເຫັນ ແລະ 0 trackback(s)

ໜວດໝູ່: ຄວາມຮູ້ທົ່ວໄປ

ຜູ້ໃດຝັນປຽກ ຍົກມືຂຶ້ນ!!

ຝັນປຽກເປັນເລື່ອງທີ່ເກີດຂຶ້ນເມື່ອຜູ້ຊາຍເລີ່ມເຂົ້າໄວໜຸ່ມ ແຕ່ກໍບໍ່ແມ່ນຈະອາຍຸເພີ່ມຂຶ້ນຈະບໍ່ມີ ພຽງແຕ່ສ່ວນຫລາຍພໍເລິ່ມຮູ້ຈັກຫຼິ້ນແສ້ພານສາວ ຫຼືໄດ້ລູກໄດ້ເມຍແລ້ວ ອາການນີ້ຈະບໍ່ຄ່ອຍເກີດກັບໜຸ່ມທັງຫລາຍອີກນັ້ນເອງ.

ຫລາຍຄົນທີ່ອ່ານມາເຖິງຈຸດນີ້ ແລ້ວຮ້ອງໂອ໋! ແຕ່ໃຫ້ນຶກຄືນໄປເຖິງຄວາມຮູ້ສຶກຕອນນັ້ນ ກໍນຶກບໍ່ອອກຊະແລ້ວແມ່ນບໍ? ກໍແນ່ນອນ ມັນເກີດກັບຕົວເຮົາແທ້ໆ ໄປບໍ່ຈັກມື້ກໍຈື່ເກືອບບໍ່ໄດ້ ແລ້ວເລື່ອງທີ່ເກີດໃນຄວາມຝັນຈະໃຫ້ຈື່ໄດ້ຈັ່ງໃດ. ບໍ່ເປັນຫຍັງ ຈື່ບໍ່ໄດ້ບໍ່ວ່າກັນ ເອົາເປັນວ່າຜູ້ຂຽນຈະຊ່ວຍຮື້ຟື້ນ ຝັນປຽກ ໃຫ້ເອງ ເລື່ອງນີ້ສາວໆ ກໍໜ້າທີ່ຈະອ່ານເປັນຄວາມຮູ້ໄວ້ ເພາະເຖິງມື້ໜຶ່ງເຮົາມີລູກຊາຍ ເຮົາຈະໄດ້ໃຫ້ຄຳປຶກສາກັບພວກເຂົາໄດ້ .

ຝັນປຽກ ບໍ່ແມ່ນອາການຜິດປົກກະຕິແຕ່ຢ່າງໃດ ກັບເປັນສັນຍານບົ່ງບອກເຖິງຄວາມແຂງແຮງຂອງໜຸ່ມໆ ດ້ວຍຊ້ຳໄປ ເລື່ອງມັນເລິ່ມຈາກຈຸດທີ່ເຮົາເຖິງໄວຈະເລີນພັນແລ້ວ ແລະຮ່າງກາຍຂອງເຮົາກໍເລິ່ມສ້າງນ້ຳເຊື້ອເພື່ອການຂະຫຍາຍພັນຈັ່ງ ໃດລະ!

ນ້ຳເຊື້ອນີ້ຈະໃຊ້ເວລາປະມານ 70 ກວ່າມື້ໃນການສ້າງ (ຜູ້ຂຽນວ່າດົນເຕີບເນາະ) ພໍຖືກສ້າງສຳເລັດກໍໄປລວມກັນທີ່ບໍ່ເກັບ ແລ້ວພໍບໍ່ເກັບນ້ຳເຊື້ອຂອງເຮົາໃກ້ຊິເຕັມ ທຳມະຊາດຂອງຮ່າງກາຍກໍຈະກະຕຸ້ນໃຫ້ເຮົາມີຄວາມຕ້ອງການທາງເພດຫັ້ນ ຕິ ເພື່ອຈະໄດ້ລະບາຍເອົານ້ຳເຊື້ອເກົ່າເກັບທີ່ໃກ້ຈະເຕັມຖັງເຕັມທີ ແລ້ວອອກໄປ ນ້ຳເຊື້ອສົດໆ ໃໝ່ໆ ລຸ້ນຕໍ່ໄປຈະໄດ້ມີທີ່ຢູ່ ຖ້າບໍ່ໄດ້ມີເພດສຳພັນແທ້ໆ ມັນກໍຕ້ອງຫາທາງລະບາຍອອກເອງຫັ້ນແຫຼະ ເພາະເຕັມຖັງຂະໜາດນັ້ນ ສຸດທ້າຍກໍຕ້ອງຄວາມຝັນນີ້ລະເປັນທາງອອກທີ່ງ່າຍດາຍ ບໍ່ເດືອດຮ້ອນໃຜເລີຍ(ແຕ່ອາດຈະເດືອດຮ້ອນຕົວເອງທີ່ຕ້ອງລຸກ ອາບນ້ຳຕອນເດິກໆ 555).

ສະນັ້ນຫາກທ່ານ, ໝູ່ຂອງທ່ານ ຫຼືລູກຂອງທ່ານ ຝັນປຽກ ກໍແປວ່າຮ່າງກາຍແຂງແຮງດີ ແລ້ວກໍບໍ່ໄດ້ໄປໂລໆເລໆບ່ອນໃດ ແລະອາດຍັງບອກໄດ້ວ່າ ພວກເຂົາຄົນນັ້ນໃສ່ໃຈກັບວຽກງານ ຫລືການຮຽນ ຈົນກະທັ່ງບໍ່ມີເວລາປົດປ່ອຍິ່

***ໝາຍເຫດ. ຝັນປຽກອາດເກີດກັບຄົນທີ່ເພດສຳພັນທຸກມື້ກໍໄດ້ ແລະຝັນປຽກເກີດຂຶ້ນໄດ້ທັງກັບຜູ້ຊາຍແລະແມ່ຍິງ ສຳລັບທ່ານຍິງເອົາໄວ້ໂອກາດໜ້າມີເວລາຈັ່ງຊິມາເລົ່າສູ່ຟັງ ຈັກໜ້ອຍຊິວ່າສາຍຍືດສາຍຍາວໂພດ.

Keo Kom Many

ເບິ່ງທັງໝົດ

ອ່ານຄືນຫຼັງ

2011 (7)

ໝວດໝູ່

ໝາຍເຫດ: ບົດຄວາມ, ຂໍ້ຂຽນ, ຄຳເຫັນຕ່າງ ໆ ທີ່ມີໃນໜ້ານີ້ ຖືກສົ່ງເຂົ້າມາໂດຍສາທາລະນະຊົນ ແລະຖືກເຜີຍແຜ່ໂດຍອັດຕະໂນມັດ ບໍ່ໄດ້ຜ່ານການກວດສອບຈາກທີມງານ ດັ່ງນັ້ນ ຈຶ່ງຂໍໃຫ້ທ່ານຜູ່ອ່ານຈົ່ງໃຊ້ວິຈາລະນະຍານ ແລະຖືຄະຕິ ກາລາມະສູດ : ພິຈາລະນາກ່ອນເຊື່ອ ໃນການຮັບຮູ້ຂໍ້ມູນຕ່າງ ໆ ທີ່ມີໃນໜ້າເວັບນີ້ ຫາກທ່ານພົບວ່າມີຂໍ້ຄວາມໃດທີ່ບໍ່ເໝາະສົມ ຫຼືຜິດຕໍ່ລະບຽບກົດໝາຍ ທ່ານສາມາດແຈ້ງເນື້ອຫາບໍ່ເໝາະສົມໄດ້ ຫຼືຕິດຕໍ່ທີມງານພັນລາວໂດຍກົງ ຂໍຂອບໃຈ.

ອີກ100ປີ​ຈະ​ເກີດ​ສົງ​ຄາ​ມອະວະ​ກາດ​ລະຫວ່າງ​ປະເທດ

ວາງ​ໃຈ​ໄດ້ 2012 ໂລກ​ບໍ່​ແຕກ

ເຂັ້​ມ​ແຂງ​ໄວ້​ນ໋ະຫົວ​ໃຈ

ຄຳ​ເວົ້າທີ່​​ແມ່ຍິງ​ຢາກ​ຟັງ

ຮີດສິບສອງ ຄອງສິບສີ່

ຈຸດ​ໃດຍິງ​ກັບ​ຊາຍ ​​​ໄວ​ຕໍ່​ອາລົມ

ຜູ້​ໃດ​​ຝັນ​ປຽກ ຍົກ​ມື​ຂຶ້ນ!!

ອີກ100ປີຈະເກີດສົງຄາມອະວະກາດລະຫວ່າງປະເທດ

ວາງໃຈໄດ້ 2012 ໂລກບໍ່ແຕກ

ເຂັ້ມແຂງໄວ້ນ໋ະຫົວໃຈ

ຄຳເວົ້າທີ່ແມ່ຍິງຢາກຟັງ

ຈຸດໃດຍິງກັບຊາຍ ໄວຕໍ່ອາລົມ

ຜູ້ໃດຝັນປຽກ ຍົກມືຂຶ້ນ!!